ᑎᓯᐱᕆ 8, 2022, ᑐᕌᓐᑐ, ᐋᓐᑎᐊᕆᐅ – ᐅᑭᐅᖅᑕᒫᑦ, ᐃᓚᒋᔭᐅᖃᑕᐅᔪᑦ ᐅᑭᐅᖅᑕᖅᑐᒥᒃ ᑐᑭᓯᓂᐊᖃᑎᒌᒃᑯᑦ ᐃᓄᐃᑦ ᖃᐅᔨᓴᐃᓂᕐᒥ ᐊᐅᓚᑦᓯᔨᐅᔪᑦ ᑲᑎᒪᔨᕋᓛᖏᑦ ᐃᓕᑕᖅᓯᓯᒪᕙᒻᒪᑕ ᐃᓅᓪᓗᓂ ᓂᕈᐊᒐᒃᓴᖖᒍᖅᑎᑕᐅᓯᒪᔪᓂᑦ ᒥᒃᓯᖃᑦᑎᐊᖅᑐᑎᒍᑦ ᐃᓄᖕᓂᒃ ᐃᓚᐅᖃᑕᐅᑎᑦᑎᓯᒪᓂᖓᓄᑦ ᐅᑭᐅᖅᑕᖅᑐᒥ ᖃᐅᔨᓴᐃᓂᐅᔪᓄᑦ. ᑕᕝᕙᓂ ᐅᑭᐅᒥ ᐃᓕᑕᕆᔭᐅᔾᔪᑎᑦ ᑐᓂᔭᐅᓚᐅᖅᐳᑦ ᔩᓐ ᐋᓚᓐᒧᑦ ᐃᖃᓗᖕᓂᕐᒥᐅᑕᒧᑦ.
ᐋᓚᓐ, ᐃᓕᑕᕆᔭᐅᔾᔪᑎᓂᒃ ᑐᓂᔭᐅᓯᒪᓕᓚᐅᕐᐳᖅ ᐊᒻᒪᓗ ᓵᓚᒃᓴᐅᑎᑖᕆᓪᓗᓂᒋᑦ ᑮᓇᐅᔭᓂᒃ ᐅᑭᐅᖅᑕᖅᑐᒥᒃ ᑐᑭᓯᓂᐊᖃᑎᒌᒃᑯᑦ ᐊᕐᕌᒍᑕᒫᑦ ᓱᓇᑐᐃᓐᓇᓂᒃ ᖃᐅᔨᓴᐃᓂᓕᕆᓂᕐᒧᑦ ᑲᑎᒪᓂᖃᖅᑐᑦ ᖁᕕᐊᓱᖃᑎᒌᒃᑎᑕᐅᑎᓪᓗᒋᑦ ᑎᓯᐱᕆ 8-ᒥ, ᐃᓱᒪᑕᐅᓪᓗᓂ ᖃᐅᔨᓴᐃᓂᓕᕆᓂᕐᒧᑦ ᐅᖃᐅᔾᔪᐃᒋᐊᖅᑎᒋᔭᐅᕗᖅ ᓄᓇᕗᑦ ᑐᖖᒐᕕᒃᑯᑦ ᑎᒥᖓᓐᓂ. ᐃᖅᑲᓇᐃᔮᕆᔭᒥᓂ ᖃᐅᔨᓴᐃᓂᕐᒧᑦ ᐱᓕᕆᓂᖃᖅᓯᒪᕗᖅ ᓯᕗᒻᒧᒋᐊᖅᑎᑦᓯᓯᒪᓂᒃᓴᒧᑦ ᐊᒥᓱᑲᓪᓚᐅᓪᓗᑎᒃ ᑭᒃᑯᑐᐃᓐᓇᐃᑦ ᐋᓐᓂᐊᖃᓕᖅᑕᐃᓕᒪᓂᖏᓐᓄᑦ ᑐᕌᖓᓪᓗᑎᒃ ᐱᓕᕆᐊᖑᑲᐃᓐᓇᖅᑐᓂᒃ, ᐱᓗᐊᖅᑐᒥᒃ ᐊᑯᓃᖅᑐᒧᑦ ᐅᖃᐅᔾᔪᐃᒋᐊᖅᑎᐅᖃᑦᑕᖅᓯᒪᓕᕐᓱᓂ ᐊᒻᒪᓗ ᒪᓕᒐᓕᕆᓂᕐᒧᑦ ᐃᑲᔪᕈᑎᒃᓴᖃᖅᑎᑦᑎᕙᒃᓱᓂ ᐅᑭᐅᖅᑕᖅᑐᒥᐅᑦ ᑐᖁᓐᓇᖅᑐᓕᕆᓂᕐᒧᑦ ᐱᓕᕆᐊᖑᔪᒧᑦ.
ᐋᓚ ᐱᓕᕆᐊᒃᓴᕆᔭᒥᓂᒃ ᐃᓄᐃᑦ ᓇᖕᒥᓂᖅ ᐃᓱᒪᓕᐅᕈᑎᐅᕈᓐᓇᕐᓂᖏᓐᓄᑦ ᖃᐅᔨᓴᐃᓂᐅᕙᒃᑐᓄᑦ ᑐᑭᒧᐊᒍᑎᒋᖃᑦᑕᕆᓯᒪᕙᖏᑦ ᐃᓅᓯᕐᒥᓂ ᐱᓕᕆᐊᕆᔭᒥᓄᑦ. ᐋᖅᑭᒃᓱᐃᓯᒪᓕᕆᐊᕐᓂᕐᒥᒃ ᓄᑖᖑᓪᓗᑎᒃ ᐱᓕᕆᐊᖑᕙᓪᓕᐊᓂᐅᔪᒃᓴᓂᒃ ᐊᒻᒪᓗ ᐱᓕᕆᓂᐅᕙᓐᓂᐊᖅᑐᓂᒃ ᖃᐅᔨᓴᐃᖃᑦᑕᕐᓂᓕᕆᓂᕐᒥ ᐅᔾᔨᕈᓱᒋᐊᖃᕐᓇᕐᒪᑦ ᐱᕕᒃᓴᖃᕐᒪᖔᕐᒦ ᐊᒻᒪᓗ ᓇᓂ ᐱᓕᕆᓂᖃᕈᓂ ᐋᖅᑭᒃᓱᐃᓯᒪᓕᕋᔭᕐᓂᕐᒥᒃ, ᐅᐱᒍᓱᑦᓯᐊᕆᐊᖃᕐᓂᕐᒥᒃ ᐊᒻᒪᓗ ᑕᐃᒪᐅᔪᓂᒃ ᐊᑐᕈᓐᓇᕆᐊᖃᕐᓂᕐᒥᒃ ᖃᐅᔨᒪᔭᕆᐊᖃᕐᓇᕐᒪᑕ. ᐅᖃᐅᔾᔪᕈᑎᒃᓴᖏᑦ ᐊᒻᒪᓗ ᖃᐅᔨᒪᓂᖏᑦ ᒪᓕᑦᓯᐊᖅᑎᑕᐅᓯᒪᕙᒻᒪᑕ ᐊᒥᓱᐃᓕᖓᓪᓗᑎᒃ ᐅᔨᓴᐃᓂᓕᕆᓂᕐᒥ ᒪᓕᒐᖁᑎᓕᕆᓂᐅᔪᓄᑦ. ᐊᒥᓲᓂᖏᑦ ᓈᒻᒪᒃᑑᑎᑕᐅᓯᒪᓂᖏᓐᓄᑦ ᐱᕈᖅᑎᑦᑎᓯᒪᒋᐊᖅᐸᒃᓱᓂ ᓯᕗᓕᖅᑎᐅᔪᓐᓇᕐᓂᖃᕐᒪᑦ ᖃᐅᔨᒪᔭᐅᑦᑎᐊᖅᓱᓂᓗ ᐱᐅᓱᒋᔮᕈᑎᒋᓇᓂᐅᒃ ᓴᖅᑭᔮᖅᑎᑦᑎᓗᐊᕋᓂᓗ ᐃᒻᒥᓂᒃ ᖁᓚᕆᖖᒋᑦᑑᓂᖓᓂᒃ, ᑕᒪᒃᑭᓐᓂᒃ ᐊᑐᕐᓗᓂ ᐃᓄᐃᑦ ᐱᐅᓯᑐᖃᖓᑎᒍᑦ ᐊᒻᒪᓗ ᖃᓪᓗᓈᑦ ᐱᐅᓯᖓᑎᒍᑦ ᖃᐅᔨᓴᐃᓂᐅᕙᒃᑐᓄᑦ ᐱᓕᕆᓂᖃᕈᓐᓇᖅᓱᓂ.
“ᔩᓐ ᐋᓚᓐ ᐱᓕᕆᓂᕆᕙᒃᑕᖏᑦ ᓯᕗᒻᒧᒃᑎᑦᑎᒋᐊᕐᓂᕐᒧᑦ ᐃᓄᖕᓄᑦ ᑐᕌᖓᑎᑕᐅᓯᒪᓪᓗᑎᒃ ᖃᐅᔨᓴᐃᓂᐅᔪᓄᑦ ᑐᓂᕐᕈᑎᒃᓴᐅᓯᒪᒻᒪᑕ ᐃᓄᐃᑦ ᓄᓇᖓᓐᓂᕐᒥᐅᖑᔪᓄᑦ ᐊᒻᒪᓗ ᑲᓇᑕᒥᐅᖑᔪᓄᑦ,” ᐅᖃᖅᓱᓂ ᐃᓄᐃᑦ ᑕᐱᕇᑦ ᑲᓇᑕᒥ ᐊᖏᔪᖅᑳᖓᑦ ᓇᑖᓐ ᐆᐱᑦ. “ᖁᔭᒋᔭᕗᑦ ᐱᓕᕆᐊᕆᓯᒪᔭᖏᓐᓄᑦ, ᐱᐅᓯᒋᐊᖅᑎᑦᑎᓯᒪᔾᔪᑎᒃᓴᓄᑦ ᑭᓯᐊᓂᑐᐊᖑᖖᒋᑦᑐᖅ ᐋᓐᓂᐊᖃᓕᖅᑕᐃᓕᒪᔪᓕᕆᓂᕐᒥ ᐊᒻᒪᓗ ᖃᓄᐃᖖᒋᑦᑎᐊᕆᐊᖃᕐᓂᖏᑕ ᐃᓄᐃᑦ, ᑭᓯᐊᓂᓗᑦᑕᐅᖅ ᐊᓯᔾᔩᓯᒪᓕᕐᓂᖓᓄᑦ ᒪᓕᒐᖁᑎᐅᔪᓂᒃ ᐊᒻᒪᓗ ᐱᓕᕆᐊᖃᖅᐸᓪᓕᐊᓂᐅᕙᒃᑐᓂᒃ ᐃᓄᐃᑦ ᓯᕗᓪᓕᖅᐸᐅᑎᖁᔭᖏᑦ ᓇᓗᓇᐃᖅᑕᐅᓯᒪᓕᖅᑎᒋᐊᖅᒪᒋᑦ ᐊᒻᒪᓗ ᐱᔭᐅᓯᒪᓕᕋᓱᒍᖕᓇᖁᓪᓗᒋᑦ. ᖁᕕᐊᓱᒍᑎᕙᖅᐳᑦ ᔩᓐ ᐋᓚᓐ ᑕᒪᑐᒧᖓ ᐃᓕᑕᕆᔭᐅᔾᔪᑎᒃᓴᖅᑖᕐᑎᑕᐅᓂᖓᓄᑦ.”
ᐋᓚᓐ ᐊᒥᓲᔪᓂᒃ ᐃᑲᔪᕈᑎᖃᖅᓯᒪᓂᖏᑦ ᐊᒻᒪᓗ ᐱᔭᕇᖅᓯᒪᔭᖏᓐᓄᑦ ᐱᔾᔪᑎᖃᖅᑐᑦ ᐊᒥᓱᑲᓪᓚᒻᒪᕆᐅᕗᑦ ᐊᒻᒪᓗ ᐊᒥᓱᐃᓕᖓᓂᖃᖅᑑᓪᓗᑎᒃ. ᐃᓚᒋᔭᐅᖃᑕᐅᕗᖅ ᐋᖅᑭᒃᓱᐃᓂᕐᒥ ᐃᓄᐃᑦ ᑕᐱᕇᑦ ᑲᓇᑕᒥ ᑲᓇᑕᒥ ᐃᓄᐃᑦ ᐸᕐᓇᐅᑎᓕᐊᕆᓯᒪᔭᖏᓐᓂᒃ ᖃᐅᔨᓴᐃᓂᕐᒧᑦ, ᖃᓄᐃᑉᐱᑖ? ᑲᓇᑕᒥ ᐃᓄᐃᑦ ᐋᓐᓂᐊᖃᕐᓇᖖᒋᑦᑐᓕᕆᓂᕐᒧᑦ ᖃᐅᔨᓴᐃᓂᖓᑦ, ᓄᓇᕗᒻᒥᐅᓂᒃ ᓯᕗᓕᖅᑎᖃᖅᓱᑎᒃ ᑲᓇᑕᒥᐅᑦ ᐃᖅᑲᓇᐃᔭᕐᕕᖓᑦ ᐋᓐᓂᐊᖃᕐᓇᖖᒋᑦᑐᓕᕆᓂᕐᒥ ᖃᐅᔨᓴᐃᓂᐅᔪᓄᑦ (CIHR) ᑮᓇᐅᔭᖁᑎᒃᓴᓂᒃ ᐱᑎᑕᐅᓚᐅᕐᓂᖏᓐᓄᑦ ᓂᕿᑦᑎᐊᕙᖕᓂᒃ ᓂᕿᖃᖃᑦᑕᖁᔨᓂᕐᒧᑦ ᐱᓕᕆᐊᓄᑦ, ᓂᕿᒋᔭᒃᓴᓂᒃ ᐱᓯᒪᓕᕆᐊᖃᕐᓂᕐᒧᑦ ᐱᓕᕆᐊᓄᑦ ᐊᒻᒪᓗ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ ᐱᓕᕆᐊᓂ, ᐊᒻᒪᓗ CIHR-ᑯᑦ ᐸᕐᓇᐅᑎᓕᐊᕆᓯᒪᔭᖏᑦ ᐋᓐᓂᐊᕐᕕᓕᐊᖅᓯᒪᔪᓄᑦ ᑐᕌᖓᑎᑕᐅᓪᓗᑎᒃ ᖃᐅᔨᓴᐃᓂᐅᔪᓄᑦ ᓄᓇᕗᒻᒥ.
“ᐱᓕᕆᐊᖃᕐᓗᐊᖅᓯᒪᓂᖓ ᐃᓄᐃᑦ ᖃᓄᐃᖖᒋᑦᓯᐊᖅᑎᑕᐅᔭᕆᐊᖃᕐᓂᖏᓐᓄᑦ ᐊᒻᒪᓗ ᐊᒃᖢᐃᑦᑑᓕᖅᑎᑕᐅᓂᒃᓴᖏᓐᓄᑦ ᑕᑯᒃᓴᕈᖅᓯᒪᐃᓐᓇᖅᐸᒃᑐᑦ ᐱᓕᕆᐊᕆᔭᖏᓐᓂ. ᐃᓚᒋᔭᐅᖃᑕᐅᓂᖓ ᐃᓄᖕᓄᑦ ᐊᒻᒪᓗ ᓄᓇᖅᑲᑎᒌᒃᑐᓄᑦ ᐊᖏᔪᐊᓗᖕᒥᒃ ᐃᑲᔪᖅᓯᒪᓕᖅᑐᑦ ᐃᓄᐃᑦ ᓇᖕᒥᓂᖅ ᐊᐅᓚᑦᓯᓂᖃᕈᓐᓇᕐᓂᖏᓐᓄᑦ ᖃᐅᔨᓴᐃᓂᐅᕙᒃᑐᑦ ᐱᕈᖅᐸᓪᓕᐊᑎᑕᐅᓂᖏᓐᓂ,” ᐅᖃᖅᓱᓂ ᔭᐃᒻᔅ ᐴᓪᑦ, ᓄᓇᕗᑦ ᑐᖖᒐᕕᒃᑯᑦ ᑎᒥᖓᓂ ᐃᓄᐃᑦ ᖃᐅᔨᓴᐃᓂᕐᒧᑦ ᐅᖃᐅᔾᔪᐃᔨᐅᓚᐅᕐᑐᖅ.
“ᔩᓐ ᓴᐳᔾᔨᒋᐊᖅᑎᐅᖏᓐᓇᖃᑦᑕᖅᓯᒪᕗᖅ ᐊᐅᓚᑦᔭᒋᐊᖅᑎᑕᐅᓂᒃᓴᖏᓄᑦ ᐊᒃᑐᐃᓂᖃᖅᓯᒪᓗᑎᒃ ᐃᓄᖕᓄᑦ ᑐᕌᖓᑎᑕᐅᓯᒪᓪᓗᑎᒃ ᖃᐅᔨᓴᐃᓂᕐᒥ ᒪᓕᒐᖁᑎᓕᕆᓂᐅᔪᓄᑦ,” ᐅᖃᖅᓱᓂ ᔨᓐ ᐱᐊᕋᑦ, ᓄᑖᑎᒍᑦ ᐱᓕᕆᓂᐅᔪᓄᑦ ᐃᓱᒪᑕᐅᔪᖅ, ᐃᓄᕕᐊᓗᐃᑦ ᓱᓇᑐᐃᓐᓇᓂᒃ ᖃᐅᔨᓴᐃᓂᓕᕆᔨᒃᑯᓐᓄᑦ ᐊᒻᒪᓗ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ ᐱᓕᕆᐊᖃᖅᑎᖏᓂ ᐃᓄᕕᐊᓗᐃᑦ ᐊᕕᒃᑐᖅᓯᒪᓂᖓᓂ ᑯᐊᐳᕇᓴᖓᓐᓂ. “ᐃᑲᔪᖅᑐᐃᓂᖃᖅᓯᒪᕗᖅ ᐊᒥᓱᑲᓪᓚᐅᔪᓂᒃ ᐱᓕᕆᓂᐅᓕᕈᒪᔪᓂᒃ ᐊᒻᒪ ᓴᖖᒋᓂᖅᓴᐅᔪᒃᑯᑦ ᐃᓄᐃᑦ ᑐᓴᖅᓴᐅᓂᖃᓕᖅᑎᑕᐅᔾᔪᑎᒋᓪᓗᒋᑦ ᐊᒻᒪᓗ ᐊᖏᔪᐊᓗᖕᒥᒃ ᓇᓕᖅᑲᐅᓕᖅᑎᑦᑎᓂᐅᔪᓄᑦ ᐃᓄᐃᑦ ᓄᓇᓗᒃᑖᕆᔭᖓᓐᓂ. ᐃᒃᐱᓱᒍᑦᑎᐊᖅᑑᓪᓗᓂ ᐱᓕᕆᓂᕆᕙᒃᑕᖏᑦ ᐊᒻᒪᓗ ᓱᓕᓪᓚᕆᒃᑐᒥᒃ ᐱᓕᕆᓂᕆᕙᒃᑕᖏᑦ ᓴᖅᑮᓯᒪᓕᕈᑎᐅᒻᒪᑕ ᓇᓗᓇᐃᑦᑐᒻᒪᕆᒃᒥᒃ ᐊᓯᔾᔨᕆᐊᖅᑎᑕᐅᓯᒪᓕᕐᓂᖏᑕ ᐅᑭᐅᖅᑕᖅᑐᒥ ᖃᐅᔨᓴᐃᓂᐅᔪᓄᑦ ᐱᓕᕆᐊᖑᕙᒃᑐᓂ.”
ᐃᓄᐃᑦ ᖃᐅᔨᓴᐃᓂᕐᒥ ᐊᐅᓚᑦᓯᓂᐅᔪᓄᑦ ᑲᑎᒪᔨᕋᓛᖏᑦ ᑐᓂᐅᖅᑲᐃᕙᒻᒥᔪᑦ ᐅᑭᐅᖅᑕᖅᑐᒥᐅᓂ ᐃᖏᕐᕋᔾᔪᑎᒃᓴᓂᒃ ᐃᑲᔪᕈᑎᒃᓴᐅᓂᐊᖅᑐᓂᒃ ᐊᑭᑐᓗᐊᖅᑑᓪᓗᑎᒃ ᖃᖓᑦᑕᐅᑎᓂᒃ ᐃᓄᐃᑦ ᖃᖓᑦᑕᐅᑎᓂᒃ ᐊᑭᓖᕙᓐᓂᖏᓐᓄᑦ ᐃᓄᐃᑦ ᓄᓇᖓᓐᓂᕐᒥᐅᑦ ᐃᓚᒋᔭᐅᖃᑕᐅᔪᒪᔪᑦ ᐅᑭᐅᑕᒫᑦ ᓱᓇᑐᐃᓐᓇᓂᒃ ᖃᐅᔨᓴᐃᕙᖕᓂᕐᒧᑦ ᑲᑎᒪᓂᖃᖅᑐᓄᑦ. ᑕᕝᕙᓂ ᐅᑭᐅᑦᑎᓐᓂ ᐅᑯᐊ ᓵᓚᒃᓴᐅᑎᑖᖅᑎᑕᐅᓚᐅᖅᐳᑦ:
- ᕆᑦᓱᕐᑦ ᒪᑰ, ᓇᐃᓂ, ᓄᓇᑦᓯᐊᕗᑦ
- ᑕᐃᕕᑦ ᕗᓪᕝᕈᕆ, ᕆᒍᓕᑦ, ᓄᓇᑦᓯᐊᕗᑦ
- ᕆᑭ ᒧᐊᕐᕼᐊᐅᔅ, ᐃᓄᒃᔪᐊᖅ, ᓄᓇᕕᒃ
- ᔨᒥ ᔮᕋᕉᓯ, ᑲᖏᖅᓱᐊᓗᔾᔪᐊᖅ, ᓄᓇᕕᒃ
- ᕆᕗᕐ ᐊᐅᑐᑦ, ᐃᖃᓗᐃᑦ, ᓄᓇᕗᑦ
- ᔨᐊᓯᑲ ᓄᐊᕆᔅ, ᐃᓅᕕᒃ, ᐃᓄᕕᐊᓗᐃᑦ ᐊᕕᒃᑐᖅᓯᒪᓂᖓᓂᑦ
- ᓯᓖᓇ ᕘᓪᑭ, ᐸᐅᓚᑐᖅ, ᐃᓄᕕᐊᓗᐃᑦ ᐊᕕᒃᑐᖅᓯᒪᓂᖓᓂᑦ
ᐃᓕᑕᕆᔭᐅᔾᔪᑎᑖᓚᐅᖅᓯᒪᔪᓄᑦ ᐅᑯᐊ ᐃᓚᒋᔭᐅᖃᑕᐅᕗᑦ ᐃᓄᐃᑦ ᐃᓕᑕᕆᔭᐅᔾᔪᑎᖏᓐᓂᒃ:
- 2021 ᕗᕋᐃᖕᒃ ᐊᒻᒪᓗ ᓂᐊᓕ ᐴᑭᐊᖅ, ᐃᓄᕕᐊᓗᐃᑦ ᐊᕕᒃᑐᖅᓯᒪᓂᖓᓂ, ᐊᒻᒪᓗ ᐃᓕᓴᐱ (ᓕᔾ) ᐱᔪᒋ, ᓄᓇᑦᓯᐊᕗᑦ
- 2020 ᓵᓚᒃᓴᐅᑎᑖᖅᑐᖃᓚᐅᖖᒋᑦᑐᖅ ᓄᕙᒡᔪᐊᕐᓇᖅ-19 ᐊᑐᖅᑎᓪᓗᑕ
- 2019 ᕌᐳᕐᑦ ᕖ, ᓄᓇᑦᓯᐊᕗᑦ
- 2018 ᒥᓯᐊᓪ ᕗᑦ, ᓄᓇᑦᓯᐊᕗᑦ
- 2017 ᓘᑲᓯ ᐊᕋᒍᑦᑕᐃᓐᓇᖅ, ᓄᓇᕗᑦ
- 2016 ᐊᐃᓂᔾ ᓯᕙᒃ, ᓄᓇᑦᓯᐊᕗᑦ
- 2015 ᑕᒡ ᐃᓴᒍᖅ, ᐃᓄᕕᐊᓗᐃᑦ ᐊᕕᒃᑐᖅᓯᒪᓂᖓᓂᑦ
- 2014 ᔫᐃ ᐊᕐᓇᑐᖅ, ᓄᓇᑦᓯᐊᕗ