ᐅᓪᓗᒥ ᐃᓄᐃᑦ ᑲᑎᒋᐊᖅᑐᖅᑎᑕᐅᓯᒪᔪᑦ ᐅᖃᖅᓯᒪᔪᑦ ᕿᒃᓵᓐᓂᖃᕆᐊᖅ ᓴᙱᓂᖃᕆᐊᕐᓗ ᐊᑐᖅᑕᐅᒋᐅᖅᑐᒥ ᑲᑎᖃᑎᖃᖅᑎᓪᓗᒋᑦ ᐃᒃᓯᕋᕐᔪᐊᕌᐱᒃ ᕗᕌᓐᓯᔅᒥᒃ ᐊᓪᓚᒡᕕᖓᓂ ᐃᒃᓯᕋᕐᔪᐊᑦ ᑐᒃᓯᐊᕕᕐᔪᐊᖓᓐᓂ ᕚᑎᑲᓐᒥ. ᐱᓗᐊᖅᑐᒥ ᑲᓇᑕᒥ ᐃᓄᐃᑦ ᓯᕗᓕᖅᑎᖓᑦ ᓇᑖᓐ ᐅᕙᑦ ᑐᒃᓯᕋᐅᑎᖃᖅᑲᐅᔪᖅ ᖃᓄᐃᓕᐅᕆᐊᖁᔨᔾᔪᑎᒥᓂᒃ ᐃᒃᓯᕋᕐᔪᐊᕌᐱᒃ ᕗᕌᓐᓴᔅᒧᑦ ᒪᒥᓴᕆᐊᕈᑕᐅᒍᓐᓇᕐᓂᐊᕐᒪᑕ ᐃᓄᓐᓄᑦ ᑲᓇᑕᒥ.
ᐱᖓᓲᔪᙵᒐᖅᑑᓪᓗᑎᑦ ᑲᑎᒋᐊᖅᑐᖅᓯᒪᔪᑦ, ᐃᓚᐅᓪᓗᓂ ᐅᕙᑦ, ᐅᖃᖅᓯᒪᔪᑦ ᐱᓕᕆᕙᓪᓕᐊᒍᒪᖃᑎᖃᕆᐊᒃᓴᖅ ᐃᒃᓯᕋᕐᔪᐊᕌᐱᒃ ᕗᕌᓐᓴᔅᒥᒃ ᓯᕗᓕᖅᑎᐅᑎᓪᓗᒍ ᐃᒃᓯᕋᕐᔪᐊᑦ ᑐᒃᓯᐊᕐᕕᖏᓐᓄᑦ, ᓴᐃᓕᖃᑎᒌᓐᓂᕐᒧᑦ ᑐᕌᒐᖃᕈᒪᓪᓗᑎᑦ ᐱᓂᕐᓗᒃᑕᐅᒍᑎᒋᓯᒪᔭᖏᓐᓄᑦ ᐱᓂᕐᓗᒃᑕᐅᒍᑎᒋᕙᒃᑕᖏᓐᓄᓪᓗ ᐃᓅᖃᑎᒌᒃᑐᓕᒫᑦ ᐱᔪᓐᓇᐅᑎᖏᑎᒍᑦ ᑐᒃᓯᐊᕕᓐᓄᑦ, ᐊᔪᕿᖅᑐᐃᔨᖏᓐᓄᑦ, ᐱᓕᕆᔨᖏᓐᓄᓪᓗ ᐃᒃᓯᕋᕐᔪᐊᒃᑯᑦ ᑐᒃᓯᐊᕐᕕᖏᓐᓄᑦ.
“ᐊᒃᑐᐊᓂᖃᐃᓐᓇᖅᑐᒥᒃ ᓴᐃᓕᖃᑎᒌᓐᓂᐊᕈᑎᑦ ᐃᓄᐃᓪᓗ ᑐᒃᓯᐊᕐᕖᓪᓗ ᑎᑭᐅᑎᔭᐅᒍᓐᓇᖅᑐᑦ ᑭᓯᐊᓂ ᖃᓄᐃᓕᐅᕆᐊᕈᑎᖃᓪᓚᕆᒃᑯᑎᑦ ᓯᕗᓕᖅᑕᐅᔪᓂᒃ ᑐᑭᒧᐊᒃᑕᐅᔪᓂᓪᓗ ᐃᒃᓯᕋᕐᔪᐊᕌᐱᒃ ᕗᕌᓐᓴᔅᒧᑦ, ᐋᖅᑭᒋᐊᖅᑕᐅᓗᑎᓪᓗ ᑭᖑᓂᒃᑎᓐᓂ ᐱᓂᕐᓗᖕᓂᐅᓯᒪᔪᑦ ᐱᕋᔭᖕᓂᐅᓯᒪᔪᓪᓗ ᑐᒃᓯᐊᕐᕕᖕᒧᑦ ᑭᒡᒐᖅᑐᐃᔨᖏᓐᓄᓪᓗ, ᖃᓄᐃᓕᐅᕆᐊᕈᑎᖃᕐᓗᑎᓪᓗ ᒪᒥᓴᕈᑕᐅᒍᓐᓇᖅᑐᓂᒃ ᐃᓄᑐᐃᓐᓇᕐᓄᑦ, ᐃᓚᒌᒃᑐᓄᑦ ᓄᓇᖅᑲᑎᒌᒃᑐᓄᓪᓗ ᐱᓂᕐᓗᒃᑕᐅᓯᒪᔪᓄᑦ ᑐᒃᓯᐊᕐᕕᖕᒧᑦ,” ᐅᕙᑦ ᐅᖃᐅᒡᔨᓚᐅᖅᑐᖅ ᐃᒃᓯᕋᕐᔪᐊᕌᐱᖕᒥᒃ ᑲᑎᓯᑎᓪᓗᒋᑦ, ᐃᓚᐅᔪᖃᖅᑲᐅᒋᓪᓗᓂ ᐃᓄᓐᓂᒃ ᖃᐃᖅᑯᔭᐅᓯᒪᔪᓂᒃ ᐃᒃᓯᕋᕐᔪᐊᒃᑯᖏᓐᓄᑦ ᐅᑭᐅᖅᑕᖅᑐᒥ ᐅᖃᐅᓯᖃᕆᐊᖅᑐᖅᑐᑎᑦ ᐊᑐᖅᓯᒪᔭᕐᒥᓂᑦ ᓄᓇᖅᑲᑎᒌᒃᑐᓄᓪᓗ ᐋᖅᑭᒋᐊᕆᖁᔨᒡᔪᑎᐅᔪᓂᒃ.
ᐃᓄᐃᑦ, ᐊᓯᖏᓪᓗ ᓄᓇᖃᖅᑳᖅᓯᒪᔪᑦ, ᐊᒃᓱᕉᑎᖃᐃᓐᓇᕐᒪᑕ ᐊᓯᒥᓐᓄᑦ ᐊᐅᓚᑕᐅᓯᒪᓂᕐᒧᑦ ᓄᖑᑎᕆᕙᓪᓕᐊᓯᒪᓪᓗᑎᑦ ᐅᖃᐅᓯᒃᑎᓐᓂᒃ ᐃᓕᖅᑯᓯᑐᖃᒃᑎᓐᓂᓪᓗ, ᐊᑐᕈᓐᓃᖅᑎᒃᓯᓯᒪᓪᓗᓂᓪᓗ ᐃᓚᖏᓐᓂᒃ ᐅᒃᐱᕐᓂᑐᖃᒃᑎᓐᓂᑦ ᓄᓇᑐᖃᒃᑎᓐᓂᓪᓗ, ᐃᓅᖃᑎᒌᒃᑐᐃᓪᓗ ᐱᓇᐃᓗᑕᖃᒻᒪᕆᒃᑎᑕᐅᓪᓗᑎᑦ ᑮᓇᐅᔭᓕᕆᓂᒃᑯᓪᓗ ᐊᒃᓱᕉᑎᖃᓕᖅᑐᑎᑦ ᓄᓇᒃᑎᓐᓂ.
ᐊᑖᓃᑦᑐᖅ ᐅᖃᐅᓯᕆᓯᒪᔭᖏᓐᓂᒃ ᓇᐃᒡᓕᒋᐊᖅᓯᒪᔪᑦ ᐊᖏᔪᖅᑳᑉ ᓇᑖᓐ ᐅᖃᐅᓯᒃᓴᖏᓐᓂ
ᐱᓂᕐᓗᒃᑕᐅᓯᒪᓂᖅ ᐊᑐᖅᓯᒪᕗᖅ ᐃᓕᓐᓂᐊᕆᐊᖅᑎᑕᐅᖃᑦᑕᓚᐅᖅᓯᒪᔪᓄᑦ ᐊᐅᓚᑕᐅᓪᓗᑎᑦ ᐃᒃᓯᕋᕐᔪᐊᒃᑯᑦ ᑐᒃᓯᐊᕐᕕᖏᓐᓄᑦ ᐃᓕᖅᑯᓯᑐᖃᖏᓐᓂᒃ ᐊᑐᙱᑎᑕᐅᒋᐊᓕᖅᑐᑎᑦ, ᑎᒥᒃᑯᑦ ᓄᓕᐊᕐᓂᒃᑯᓪᓗ ᐋᓐᓂᑎᖅᑕᐅᓪᓗᑎᑦ, ᓄᖑᑎᑕᐅᒋᐊᖅᑐᓂᓪᓗ ᐅᖃᐅᓯᕗᑦ, ᐅᑉᐱᕆᔭᑐᖃᕗᑦ ᐃᓕᖅᑯᓯᑐᖃᕗᓪᓗ.
ᑐᒃᓯᐊᕐᕕᒃ ᐱᓂᕐᓗᒃᕕᖃᐃᓐᓇᖅᑐᖅ ᐃᓄᖕᓂᒃ ᐱᓕᕆᐊᖃᒃᑕᐃᓕᓂᒃᑯᑦ ᐊᑐᕆᐊᖃᖅᑎᑕᐅᓯᒪᓂᕐᒥᒍᑦ ᐊᑖᓂ 2006ᒥ ᓄᓇᖃᖅᑳᖅᓯᒪᔪᐃᑦ ᐃᓕᓐᓂᐊᕆᐊᖅᑎᑕᐅᖃᑦᑕᖅᑐᕕᓂᐅᓂᖏᓐᓄᑦ ᐃᖅᑲᖅᑐᐃᕕᐅᑉ ᓯᓚᑖᒍᑦ ᐊᖏᖃᑎᒌᒍᑎᒥ, ᐊᑐᕆᐊᖃᖅᑎᑕᐅᓪᓗᑎᑦ ᑐᒃᓯᐊᕐᕖᑦ ᓇᓗᓇᐃᔭᖅᑕᐅᓯᒪᔪᓂᒃ ᖃᓄᐃᓕᐅᕈᑎᖃᕐᓗᑎᑦ ᓯᕗᒧᐊᒍᓐᓇᖁᓪᓗᒍ ᓴᐃᓕᖃᑎᒌᓐᓂᖅ ᐊᑯᓐᓂᖏᓐᓂ ᐃᓄᐃᑦ ᐊᓯᖏᓪᓗ ᓄᓇᖃᖅᑳᖅᓯᒪᔪᐃᑦ ᐊᒻᒪᓗ ᑐᒃᓯᐊᕐᕕᒃ.
ᐱᓂᕐᓗᒃᑕᐅᓯᒪᖕᒥᔪᑦ ᓄᓕᐊᕐᓂᒃᑯᑦ ᓱᕈᓯᕐᓂᐊᖅᑎᓄᑦ ᑐᒃᓯᐊᕐᕕᖕᒥ ᐊᑐᖅᑐᑎᑦ ᐅᑉᐱᕆᔭᐅᓂᕐᒥᓐᓂ ᓱᓕᔪᕆᔭᐅᒍᓐᓇᕐᓂᒥᓂᒡᓗ ᐃᓄᐃᑦ ᓄᓇᖏᓐᓂ ᓄᓕᐊᕐᓂᒃᑯᑦ ᓱᕈᓯᕐᓂᐊᖃᑦᑕᓚᐅᖅᑐᓄᑦ ᒪᒃᑯᒃᑐᓂᐊᖅᑕᐅᓚᐅᖅᑐᓄᓪᓗ. ᑐᒃᓯᐊᕐᕕᒃ ᐱᓕᕆᐊᖃᒃᑲᓐᓂᕆᐊᖃᖅᑐᖅ ᓱᕈᓯᕐᓂᐊᖃᒃᑕᓚᐅᖅᑐᑦ ᓄᓕᐊᕐᓂᒃᑯᑦ ᐋᓐᓂᖅᑎᕆᖃᒃᑕᓚᐅᖅᑐᑦ ᐊᑭᒃᓯᕋᖅᑕᐅᖁᓪᓗᒋᑦ.
ᐃᓄᐃᑦ ᑲᔪᖏᖅᑐᖅᑐᑎᑦ ᑐᒃᓯᕋᐅᑎᖃᖅᑐᑦ ᐃᒃᓯᕋᕐᔪᐊᕌᐱᒃ ᕗᕌᓐᒥᒃ ᐊᑐᖁᔨᓪᓗᑎᑦ ᒪᑯᓂᖓ ᖃᓄᐃᓕᐅᕈᑎᒋᒍᓐᓇᖅᑕᖏᓐᓂᒃ:
- ᒪᓕᓪᓗᒍ ᑐᒃᓯᕋᐅᑎ 58 ᓱᓕᔪᓂᒃ ᑭᓪᓕᓯᓂᐊᕈᑎᒋᓯᒪᔭᖏᑕ ᑲᓇᑕᒥ, ᒪᒥᐊᒡᕕᖃᕐᓗᑎᑦ ᑲᓇᑕᒥ ᐃᓄᖏᓐᓄᑦ ᐊᓂᒎᒡᔨᓯᒪᔪᐃᑦ ᐃᓕᓐᓂᐊᕆᐊᖅᑎᑕᐅᖃᑦᑕᖅᑐᕕᓂᐅᒋᐊᖅ ᐊᐅᓚᑕᐅᔪᓄᑦ ᐃᒃᓯᕋᕐᔪᐊᒃᑯᑦ ᑐᒃᓯᐊᕐᕕᖏᓐᓄᑦ, ᐱᖃᓯᐅᓪᓗᒍ ᑐᐃᑲᑎᐅᓪ (Turquetil) ᐃᓕᓐᓂᐊᕆᐊᕐᕕᒥᓂᖅ ᐃᒡᓗᓕᒑᕐᔪᒃ, ᓄᓇᕗᒻᒥ, ᐊᒻᒪᓗ ᒍᕋᓕᐅ (Grollier) ᐃᓕᓐᓂᐊᕐᕕᒥᓂᖅ ᐃᓅᕕᒃ, ᓄᓇᑦᓯᐊᕐᒥ.
- ᑐᑭᒧᐊᒃᑎᒃᓯᓗᓂ ᑲᓇᑕᒥ ᑲᑐᒡᔨᖃᑎᒌᖑᔪᓂᒃ ᐃᒃᓯᕋᕐᔪᐊᒃᑯᑦ ᐊᔪᕿᖅᑐᐃᔨᖏᓐᓂᒃ ᐊᑐᓕᖅᑎᑕᐅᖁᓪᓗᒋᑦ ᑐᒃᓯᐊᕐᕕᒻᒧᑦ ᒪᓕᒐᖅᑎᒍᑦ ᒪᓕᒋᐊᖃᖅᑕᖏᓐᓂᒃ ᐊᑖᓂ ᓄᓇᖃᖅᑳᖅᓯᒪᔪᐃᑦ ᐃᓕᓐᓂᐊᕆᐊᖅᑎᑕᐅᖃᑦᑕᖅᑐᕕᓂᐅᓂᕐᒧᑦ ᐃᖅᑲᖅᑐᐃᕕᐅᑉ ᓯᓚᑖᒍᑦ ᐊᖏᖃᑎᒌᒍᑎᖓᑕ
- ᑖᓐᓇ ᐱᖃᓯᐅᓪᓗᒍ ᐊᑭᓕᖅᑕᐅᑲᐅᑎᒋᓗᓂ $25 ᒥᓕᔭᓐᓂᒃ ᑮᓇᐅᔭᕐᓂᒃ ᐋᖅᑭᒋᐊᕈᑎᒃᓴᐅᓗᑎᑦ ᐊᓂᒎᒡᔨᓯᒪᔪᓄᑦ ᐃᓕᓐᓂᐊᕆᐊᖅᑎᑕᐅᖃᑦᑕᖅᑐᕕᓂᕐᓄᑦ.
- ᑐᑭᖃᕐᒥᔪᖅ ᐊᑐᐃᓐᓇᖃᕐᕕᐅᑲᐅᑎᒋᓕᕐᓗᑎᑦ ᐊᑕᖏᖅᑐᓂ ᐊᑑᑎᖃᖅᑐᓂᒃ ᐸᐃᑉᐹᖁᑎᓂᒃ ᑐᒃᓯᐊᕐᕕᐅᑉ ᐸᐸᑕᖏᓐᓂᒃ ᓇᓗᓇᐃᖅᓯᒍᑕᐅᒍᓐᓇᖅᑐᓂᒃ ᐃᓄᓐᓂᒃ ᓄᑕᖅᑲᓂᒃ ᐃᓅᒍᓐᓃᑐᐃᓐᓇᕆᐊᖃᖅᑐᕕᓂᕐᓂᒃ ᐃᓕᓐᓂᐊᕆᐊᖅᑎᑕᐅᓯᒪᑎᓪᓗᒋᑦ ᐊᐅᓚᑕᖏᓐᓄᑦ ᑐᒃᓯᐊᕐᕖᑦ, ᐅᑎᖅᑎᑕᐅᒋᐊᖃᖅᑐᓂᒃ ᑎᒥᖏᑦ ᐃᓚᖏᓐᓄᑦ ᓄᓇᖏᓐᓄᓪᓗ.
- ᑐᒃᓯᐊᕐᕕᒃ ᐱᓕᕆᖃᑎᖃᓪᓚᕆᒋᐊᓖᑦ ᐸᓖᓯᒃᑯᓐᓂᒃ, ᒐᕙᒪᐅᔪᓂᑦ ᐃᓄᓐᓂᓪᓗ ᐊᑭᒃᓯᕋᖅᑕᐅᒍᓐᓇᖁᓪᓗᒋᑦ ᐊᓂᒎᒡᔨᓯᒪᔪᑦ ᐋᓐᓂᑎᖅᑕᐅᓯᒪᓂᕐᒥ ᐃᓚᖏᓐᓄᓪᓗ. ᔪᕼᐋᓇᔅ ᕆᕗᐊ, ᐊᔪᕿᖅᑐᐃᔨᒥᓂᐅᔪᖅ ᓄᓕᐊᕐᓂᒃᑯᑦ ᐋᓐᓂᖅᑎᕆᖃᒃᑕᖅᓯᒪᔪᖅ ᐃᓄᓐᓂᒃ ᓄᑕᖅᑲᓂᒃ ᖃᒃᓯᒐᓚᖕᓂᒃ ᐃᓄᐃᑦ ᓄᓇᖏᓐᓂ, ᑲᓇᑕᒨᖅᑎᑕᐅᔭᕆᐊᓕᒃ ᐊᑭᒃᓯᕋᐅᑎᐅᒍᓐᓇᖁᓪᓗᒍ.
- ᐱᓗᐊᖅᑐᒥ, ᐊᐱᕆᕙᒋᑦ ᐊᖏᔪᖅᑳᕆᔭᐅᑎᓪᓗᑎᑦ ᐃᒃᓯᕋᕐᔪᒃᑯᑦ ᑐᒃᓯᐊᕐᕕᖏᓐᓄᑦ, ᐅᖃᖃᑎᖃᖁᕙᒋᑦ ᔪᕼᐋᓇᔅ ᕆᕗᐊᒥᒃ ᐅᑎᖁᓗᒍ ᑲᓇᑕᒧᑦ ᐃᖅᑲᑐᖅᑕᐅᒐᔭᕐᒪᑦ ᐱᓂᕐᓗᒃᓯᒪᓂᖓᓄᑦ.
- ᑐᑭᓯᕗᖓ ᑕᒪᓐᓇ ᑲᔪᓯᙱᑐᐃᓐᓇᕆᐊᖃᖅᑐᖅ, ᐊᒥᓱᐃᑦ ᐱᒡᔪᑎᒋᓪᓗᒋᑦ. ᑕᐃᒪᐃᖕᒪᑦ, ᐊᐱᕆᕙᒋᑦ ᐱᔪᓐᓇᐅᑏᑦ ᐊᑐᕐᓗᒍ ᓯᕗᓕᖅᑎᖏᑦ ᐅᐃᕖᕐᔪᐊᒃᑯᑦ ᕗᕌᓐᔅᒥ ᐅᑎᖅᑎᒃᓯᖁᓪᓗᒋᑦ ᕆᕗᐊᒥᒃ ᑲᓇᑕᒧᑦ ᐅᒡᕙᓘᓐᓃᑦ ᐃᖅᑲᑐᖅᑕᐅᓗᓂ ᐅᐃᕖᕐᔪᐊᒃᑯᑦ ᓄᓇᖓᓐᓄ ᕗᕌᓐᔅᒥ.
ᑐᒃᓯᕋᖅᑯᖓ ᑕᒪᒃᑮᓐᓂᒃ ᓯᕗᓕᖅᑎᐅᑎᓪᓗᑎᑦ ᐃᒃᓯᕋᕐᔪᐊᒃᑯᑦ ᑐᒃᓯᐊᕐᕕᖏᓐᓄᑦ ᐊᒻᒪᓗ ᓴᙱᓂᖅᐸᐅᖃᑕᐅᔪᓂ ᐃᒃᓯᕙᐅᑕᖃᖅᑎᓪᓗᑎᑦ ᓄᓇᕐᔪᐊᕐᒥ, ᐋᖅᑭᒋᐊᖁᔨᓪᓗᖓ ᑕᒻᒪᕐᓂᐅᒍᓐᓃᕐᓗᓂ, ᐋᖅᑭᒃᓯᐊᓕᕐᓗᒍ, ᐊᑐᕆᐊᖃᓪᓚᕆᒃᑐᖅ, ᐱᔪᓐᓇᐅᑎᖃᓪᓚᕆᒃᑎᓪᓗᑎᑦ ᐃᒃᓯᕋᕐᔪᐊᕌᐱᐅᓂᒃᑯᑦ.
ᑐᑯᓐᓇᕈᒃ ᐊᔾᔨᓕᐊᒥᓂᖅ ᓇᔫᑎᑎᓪᓗᒋᑦ ᐅᖃᐅᓯᕆᔭᖏᑦ ᓇᑖᓐ ᕉᒻᒥ ᓇᒡᒐᔾᔭᐅᒥ, ᒫᔾᔨ, 28, 2022, ᐅᓐᓄᓴᒃᑯᑦ 4ᒥ ᑕᕆᐅᑉ ᐊᑭᐊᓂ ᖃᐅᔨᓴᐅᑎᖓ ᐊᐅᔭᒃᑯᑦ ᒪᓕᒡᓗᒍ, 10ᒥ ᐅᓪᓛᒃᑯᑦ ᑲᓇᓐᓇᐅᑉ ᖃᐅᔨᓴᐅᑎᖓ ᒪᓕᒡᓗᒍ.
ᑕᑯᓐᓇᕈᒃ ᓇᔫᑎᑎᓪᓗᒋᑦ ᑕᑯᓐᓇᕋᒃᓴᐅᓂᐊᖅᑐᖅ ᑲᑎᖃᑎᖃᖅᑎᓪᓗᒋᑦ ᑲᑎᓯᒋᐊᖅᑐᖅᓯᒪᔪᑦ ᐃᒃᓯᕋᕐᔪᐊᕌᐱᒃ ᕗᕌᓐᓯᔅᒥᒃ ᐃᒃᓯᕋᕐᔪᐊᒃᑯᑦ ᑐᒃᓯᐊᕐᕕᕐᔪᐊᖓᓐᓂ ᕚᑎᑲᓐᒥ ᐅᓪᓗᑐᐃᓐᓇᐅᑎᓪᓗᒍ, ᐊᐃᕆᓕ 1, 2022, ᑕᕆᐅᑉ ᐊᑭᐊᓂ ᖃᐅᔨᓴᐅᑎᖓ ᐊᐅᔭᒃᑯᑦ ᒪᓕᒡᓗᒍ, 6ᒥ ᐅᓪᓛᒃᑯᑦ ᑲᓇᓐᓇᐅᑉ ᖃᐅᔨᓴᐅᑎᖓ ᒪᓕᒡᓗᒍ
ᑕᑯᓐᓇᕈᒃ ᓇᔫᑎᑎᓪᓗᒋᑦ ᑕᑯᓐᓇᕋᒃᓴᐅᓂᐊᖅᑐᖅ ᐅᖃᖃᑎᖃᖅᑎᓪᓗᒋᑦ ᐊᓪᓚᖓᔪᐃᑦ, ᐃᓄᐃᑦ ᐊᒻᒪᓗ ᐊᓪᓚᐃᑦ ᓯᕗᓕᖅᑎᖏᑦ ᐅᓪᓗᑐᐃᓐᓇᐅᑎᓪᓗᒍ, ᐊᐃᕆᓕ 1, 2022, ᑕᕆᐅᑉ ᐊᑭᐊᓂ ᖃᐅᔨᓴᐅᑎᖓ ᐊᐅᔭᒃᑯᑦ ᒪᓕᒡᓗᒍ, 9:30 ᒥ ᐅᓪᓛᒃᑯᑦ ᑲᓇᓐᓇᐅᑉ ᖃᐅᔨᓴᐅᑎᖓ ᒪᓕᒡᓗᒍ