Skip to main content
ᑐᓴᖅᑎᑦᓯᔾᔪᑏᑦ

ᐃᓄᐃᑦ ᑕᐱᕇᑦ ᑲᓇᑕᒥ ᐊᒻᒪᓗ ᓯᓚᑦᑐᖅᓴᖅᕕᖓᑦ ᓴᔅᑳᑦᓱᕙᓐ ᐊᑎᓕᐅᕆᕗᒃ ᐱᓕᕆᔾᔪᓯᐅᕙᒃᓯᒪᓇᓂ ᐊᖏᕈᑎᓕᐊᖑᓯᒪᔪᓂᒃ ᐃᓄᐃᑦ ᐱᔪᓐᓇᐅᑎᖏᑦ ᒥᐊᓂᕆᔭᐅᓯᒪᓕᖁᓪᓗᒋᑦ

By July 4, 2024 No Comments

ᔫᓂ 28, 2024

ᓵᔅᑲᑑᓐᓯᓚᑦᑐᖅᓴᖅᕕᖓᑦ ᓴᔅᑳᑦᓱᕙᓐᒥ (USask)  ᐊᒻᒪᓗ ᐃᓄᐃᑦ ᑕᐱᕇᑦ ᑲᓇᑕᒥ (ITK) ᐱᓕᕆᖃᑎᒌᓕᖅᑐᑦ ᓈᒻᒪᖖᒋᓗᐊᖅᑐᑎᒍᑦ ᐊᑐᕐᓂᕐᓗᒃᑕᐅᖃᑦᑕᖁᓇᒋᑦ ᐃᓄᐃᑦ ᑭᓇᐅᓂᖏᑦ ᐊᒻᒪᓗ ᑭᒃᑯᑐᐃᓐᓇᐃᑦ ᐃᓛᒃᑰᖓᔪᑦ ᐃᑲᔫᓯᐊᖅᑖᕈᑎᓂᒃ ᐱᑎᑕᐅᔪᓐᓇᖅᐸᒃᑐᑦ ᑐᖖᒐᕝᕕᒋᓪᓗᑎᒃ ᐃᓅᓂᒥᓐᓂᑦ ᐃᓕᓐᓂᐊᕆᐊᕈᓐᓇᕐᓂᕐᓂᒃ ᐱᓯᒪᔪᓐᓇᖅᑎᑕᐅᕙᖁᓪᓗᒋᑦ ᐱᔾᔪᑎᒋᓪᓗᒋᑦ ᐃᓅᓂᑎᒃ.

ᒪᕐᕉᒃ ᑲᑐᔾᔨᖃᑎᒌᖑᔫᒃ ᐊᑎᓕᐅᕆᓯᒪᓕᓚᐅᖅᑐᑦ ᓯᕗᓪᓕᖅᐹᒻᒪᕆᖕᒥ ᑕᐃᒪᓐᓇᐃᑦᑐᒥᒃ ᑐᑭᓯᐅᒪᑐᕋᐅᓐᓂᕐᒧᑦ ᑎᑎᖅᑲᓂᒃ ᐅᓪᓗᒥ ᐋᖅᑮᓯᒪᓕᕈᑎᐅᓪᓗᓂ ᐱᓕᕆᐊᒃᓴᖃᓕᕐᓂᖏᓐᓂᒃ ᑐᕌᕐᕕᒃᓴᖁᑎᒋᓂᐊᖅᑕᒥᓐᓂᒃ ᐊᒻᒪᓗ ᐱᓯᒪᓕᕈᑎᐅᓂᐊᖅᑐᓂᒃ ᐱᓕᕆᐊᖑᓕᕐᓂᐊᖅᑐᓄᑦ ᓇᓗᓇᐃᔭᐃᔾᔪᑎᐅᕙᓐᓂᐊᕐᓗᑎᒃ ᐃᓕᓐᓂᐊᕆᐊᕈᒪᓂᕐᓄᑦ ᑕᑕᑎᖅᑕᐅᕙᒃᑐᓂᑦ ᐃᓄᖕᓂ ᑐᒃᓯᕋᐅᑎᖃᖅᓯᒪᓪᓗᑎᒃ ᓯᓚᑦᑐᖅᓴᖅᕕᖓᓐᓂᑦ ᓴᔅᑳᑦᓱᕙᓐᒥ (USask) ᑐᖖᒐᕕᖃᖅᓱᑎᒃ ᓄᓇᖃᖅᑳᕐᓯᒪᔪᓄᑦ ᑐᕌᖓᓪᓗᑎᒃ ᐱᓕᕆᓂᖃᕐᕕᐅᔪᓐᓇᖅᑐᓄᑦ ᐅᕝᕙᓘᓐᓃᑦ ᐃᓂᒋᔭᐅᓕᕈᓐᓇᖅᑐᓄᑦ.

“ᑕᒪᑐᒪ ᑐᑭᓯᐅᒪᑐᕋᐅᓐᓂᕐᒧᑦ ᑎᑎᖅᑲᖁᑎᐅᔪᑦ (MOU) ᐱᒻᒪᕆᐅᑎᑕᐅᓂᖓ ᐊᖏᔪᒻᒪᕆᐅᒻᒪᑦ, ᐅᖃᖅᓱᓂ ᓘᑦᑖᖅ ᐋᓐᔨᓚ ᔭᐃᒥ (PhD), ᓯᓚᑦᑐᖅᓴᖅᕕᖕᒥ ᐃᓱᒪᑕᒻᒪᕆᐅᔪᒧᑦ ᑐᖓᓕᕆᔭᐅᔪᖅ, ᓄᓇᖃᖅᑳᖅᓯᒪᔪᓕᕆᔨᓂ. “ᑲᓇᑕᒥ ᐊᓯᐊᓂᒃ ᓯᓚᑦᑐᖅᓴᖅᕕᒃᑕᖃᖖᒋᒻᒪᑦ ᑕᐃᒪᓐᓇ ᖁᑦᑎᖕᓂᖃᖅᑐᓂᒃ ᐊᖏᕈᑎᓕᐅᖃᑎᖃᖅᓯᒪᔪᓂᒃ ᐃᓄᖕᓂᒃ ᒥᐊᓂᕆᔭᐅᓯᒪᓕᕈᑎᓂᒃ ᐃᓚᒋᔭᐅᖃᑕᐅᓂᖏᓐᓄᑦ ᐊᖏᕈᑎᐅᓯᒪᔪᓄᑦ. ᐅᐱᒍᓱᒃᑐᒍᑦ ᐃᓄᐃᑦ ᑕᐱᕇᑦ ᑲᓇᑕᒥ (ITK) ᐅᕙᑦᑎᓐᓂᒃ ᐱᒻᒪᕆᐅᑎᐅᓪᓗᑎᒃ ᐊᖏᕈᑎᑎᒍᑦ ᐱᓕᕆᐊᖃᖃᑎᖃᓕᕐᓂᖏᓂᒃ.

ITK-ᑯᑦ ᑲᓇᑕᒥ ᐱᔾᔪᑎᖃᖅᑎᒋᔭᐅᓪᓗᑎᒃ ᑲᑐᔾᔨᖃᑎᒌᒋᔭᐅᕗᑦ 70,000-ᓗᐊᓄᑦ ᐃᓄᖏᓐᓄᑦ ᑲᓇᑕᒥ, ᐊᒥᓲᓂᖅᓴᐅᔪᑦ ᓄᓇᖃᖅᑐᓂᑦ ᓯᑕᒪᐅᓪᓗᑎᒃ ᐊᕕᒃᑐᖅᓯᒪᓂᕆᔭᐅᔪᓂᑦ ᑲᓇᑕᒥ, ᐃᓄᕕᐊᓗᐃᑦ ᐊᕕᒃᑐᖅᓯᒪᓂᖓᑦ (ᓄᓇᑦᓯᐊᖅ), ᓄᓇᕗᑦ; ᓄᓇᕕᒃ (ᑯᐃᐸᒃ ᑕᒻᕋᖓᓂ); ᐊᒻᒪᓗ ᓄᓇᑦᓯᐊᕗᑦ (ᓛᐸᑐᐊᕆᐅᑉ ᐅᐊᖕᓇᖓᓂ). ᑖᒃᑯᐊ ᐊᕕᒃᑐᖅᓯᒪᓂᕆᔭᐅᔪᑦ ᐱᓕᕆᐊᖃᖅᑎᒋᔭᐅᕙᒃᑐᑦ ᐃᓚᒋᔭᐅᖃᑕᐅᓕᖅᑎᑦᑎᕙᓐᓂᕐᓄᑦ ᑐᖖᒐᕝᕕᒋᓪᓗᒋᑦ ᐊᒥᓱᐃᓕᖓᓪᓗᑎᒃ ᓄᓇᓕᕆᓂᕐᒥ ᐊᖏᕈᑎᐅᓯᒪᔪᑦ ᐋᖅᑭᒃᑕᐅᓯᒪᓕᓚᐅᖅᑐᑦ ᐃᓄᐃᑦ ᓄᓇᖓᓐᓂ ᐊᒻᒪᓗ ᐋᖅᑭᒃᓱᐃᕙᓪᓕᐊᔾᔪᑎᐅᖏᓐᓇᖅᐸᒃᑐᓄᑦ ᐃᓄᐃᑦ ᑕᐱᕇᑦ ᑲᓇᑕᒥ (ITK) ᐱᓕᕆᐊᒃᓴᕆᔭᖏᓐᓂᒃ. ᐃᓚᒋᔭᐅᓪᓗᑎᒃ ᑐᑭᓯᐅᒪᑐᕋᐅᓐᓂᕐᒧᑦ ᐊᖏᕈᑎᓄᑦ (MOU), ITK-ᑯᑦ ᑲᒪᔨᐅᓂᐊᖅᐳᑦ ᐱᓕᕆᐊᖃᕐᓂᖏᓐᓂᒃ ᓯᓚᑦᑐᖅᓴᖅᕕᖓᑕ ᓴᔅᑳᑦᓱᕙᓐ ᐊᒻᒪᓗ ᓯᑕᒪᐅᓪᓗᑎᒃ ᐃᓄᐃᑦ ᐊᖏᕈᑎᑎᒍᑦ ᑲᑐᔾᔨᖃᑎᒌᖑᔪᓂᑦ:

  • ᐃᓄᕕᐊᓗᐃᑦ ᐊᕕᒃᑐᖅᓯᒪᓂᕐᒥ ᑯᐊᐳᕇᓴᓐ
  • ᓄᓇᕗᑦ ᑐᖖᒐᕕᒃ ᑎᒥᖁᑎᖓᑦ
  • ᒪᑭᕕᒃ
  • ᓄᓇᑦᓯᐊᕗᑦ ᒐᕙᒪᖓᑦ

“ᑖᒃᑯᐊ ᐊᖏᕈᑏᑦ ᐱᔾᔪᑎᖃᕐᒪᑕ ᓄᑖᑎᒍᑦ ᐱᓕᕆᐊᖃᖃᑎᒌᓕᖅᓯᒪᓪᓗᑎᒃ ᐱᓕᕆᓂᐅᕙᓕᕐᓂᐊᖅᑐᓂᑦ ᐃᓄᓐᓂᑦ ᐊᒻᒪᓗ ᑲᓇᑕᒥ ᓯᓚᑦᑐᖅᓴᖅᕕᒋᔭᐅᔪᓂᑦ. ᐃᓕᑕᖅᓯᓯᒪᔾᔪᑎᐅᒻᒪᑕ ᐃᓄᐃᑦ ᐊᔾᔨᖃᕋᑎᒃ; ᐱᔪᓐᓇᐅᑎᒋᔭᐅᔪᓂᒃ ᑎᒍᒥᐊᖅᓱᑎᒃ ᓄᓇᖃᖅᑳᕐᓯᒪᔫᓂᖏᓐᓂᒃ ᐃᓚᒋᔭᐅᖃᑕᐅᔪᓄᑦ ᑐᖖᒐᕝᕕᒋᓪᓗᒋᑦ ᐱᖁᔭᕐᔪᐊᓂᑦ ᒥᐊᓂᕆᔭᐅᓯᒪᓪᓗᑎᒃ ᐊᖏᕈᑎᐅᓯᒪᔪᓄᑦ. ᓂᕆᐅᖕᓂᖃᖅᐳᒍᑦ ᑖᒃᑯᐊ ᑐᑭᓯᐅᒪᑐᕋᐅᓐᓂᕐᒧᑦ ᑎᑎᖅᑲᖁᑏᑦ (MOU) ᐊᑐᖅᑕᐅᓕᕐᓂᐊᕐᒪᑦ ᓯᕗᓂᕐᒥ ᐊᖏᕈᑎᓕᐊᖑᕙᓕᕐᓂᐊᖅᑐᓄᑦ ᐃᑲᔪᕈᑎᐅᓗᓂ, ᐊᒻᒪᓗ ᖁᔭᓐᓇᒦᖅᑕᕗᑦ ᓯᓚᑦᑐᖅᓴᖅᕕᖓᑦ ᓴᔅᑳᑦᓱᕙᓐ (USask) ᑕᒪᑐᒧᖓ ᐱᓕᕆᐊᖑᓕᖅᑐᒧᑦ ᓯᕗᓕᖅᑎᐅᓯᒪᓂᖏᓐᓂᒃ, ᐱᒻᒪᕆᐅᑎᑕᐅᓗᐊᖅᑐᒥᒃ ᓄᓇᖃᖅᑳᕐᓯᒪᔪᓕᒫᓄᑦ ᑲᓇᑕᒥ,,” ᐅᖃᖅᓱᓂ ᐃᓄᐃᑦ ᑕᐱᕇᑦ ᑲᓇᑕᒥ ᐊᖏᔪᖅᑳᖓᑦ ᓇᐃᑖᓐ ᐆᐱᑦ.

“ᑖᒃᑯᐊ ᐊᖏᕈᑏᑦ ᓱᓕᓪᓗᑎᒃ ᐃᓕᑕᖅᓯᓯᒪᒻᒪᑕ ᐃᓄᐃᑦ ᐊᖏᕈᑎᑎᒍᑦ ᑲᑐᔾᔨᖃᑎᒌᖏᓂᒃ ᐊᒻᒪᓗ ᐱᔪᓐᓇᐅᑎᖃᕐᓂᖏᓂᒃ ᐃᓱᒪᓕᐅᖅᑎᐅᕙᓐᓂᕐᒧᑦ ᐃᓚᒋᔭᐅᔪᖁᑎᒋᔭᒥᓐᓂᒃ ᐊᒻᒪᓗ ᑭᓇᐅᓂᕋᐅᑎᒋᔭᖏᓐᓄᑦ,” ᐅᖃᖅᓱᓂ ᔭᐃᒥ. “ᓯᓚᑦᑐᖅᓴᖅᕕᖕᒥ ᐱᓕᕆᐊᒃᓴᖃᕋᑦᑕ ᓄᓇᖃᖅᑳᖅᒪᔪᐃᑦ ᐃᓂᖃᖅᑎᑕᐅᔪᓐᓇᕐᓂᖏᑦ ᐱᓯᒪᔭᐅᓯᒪᕙᓐᓂᐊᕐᓂᖏᑕ ᓄᓇᖃᖅᑳᕐᓯᒪᔪᓄᑦ.”

ᑖᒃᑯᑎᒎᓇᖅ ᐊᖏᕈᑎᑎᒍᑦ, USask-ᑯᑦ ᐊᒻᒪᓗ ITK-ᑯᑦ ᐊᖏᖅᓯᒪᒻᒪᑕ ᐱᓕᕆᐊᖃᖃᑎᒌᖕᓂᐊᕐᓂᕐᒥᓐᓄᑦ ᐱᓕᕆᐊᖑᕙᓪᓕᐊᕙᓐᓂᐊᖅᑐᓂᒃ ᐋᖅᑭᒃᓱᐃᓯᒪᓕᕆᐊᕐᓂᕐᒥᒃ:

  • ᐃᓕᓐᓂᐊᖅᑐᑦ ᐃᓕᓐᓂᐊᕆᐊᖅᓯᒪᓪᓗᑎᒃ ᓯᓚᑦᑐᖅᓴᖅᕕᖓᓂ ᓴᔅᑳᑦᓱᕙᓐ (USask) ᐃᓕᑕᕆᔭᐅᔾᔪᑎᑖᖑᔪᓐᓇᖅᑐᓂᒃ, ᑮᓇᐅᔭᑎᒍᑦ ᐃᑲᔪᕈᑎᒃᓴᓂᒃ; ᐃᓂᒋᔭᐅᓕᕈᓐᓇᖅᑐᓂᒃ ᐅᕝᕙᓘᓐᓃᑦ ᐊᓯᖏᓂᒃ ᐱᔭᐅᓯᒪᓕᕈᓐᓇᖅᑐᓂᒃ ᐊᑐᐃᓐᓇᐅᕕᐅᓯᒪᔪᑦ ᐃᓅᓪᓗᑎᒃ ᐃᓚᒋᔭᐅᖃᑕᐅᓂᕐᒥᓐᓄᑦ ᐃᓕᑕᕆᔭᐅᓯᒪᔪᑦ ᐃᓅᓂᖏᓐᓄᑦ
  • ᐱᓕᕆᐊᖃᖅᑎᐅᔪᐃᑦ ᐃᖅᑲᓇᐃᔭᖅᑎᒻᒪᕆᒋᖏᔭᐅᓪᓗᑎᒃ ᓯᓚᑦᑐᖅᓴᖅᕕᖓᓂ ᓴᔅᑳᑦᓱᕙᓐ (USask) ᑐᖖᒐᕕᒋᓪᓗᒋᑦ ᐃᓄᖕᓄᑦ ᐃᓕᑕᕆᔭᐅᔾᔪᑎᓂᒃ ᐱᓯᒪᔪᑦ ᐃᓅᓂᖏᓐᓄᑦ
  • ᖃᐅᔨᓴᐃᓂᕐᒥ ᑮᓇᐅᔭᖁᑎᒃᓴᖃᖅᑎᑕᐅᔪᑦ ᓴᓂᕐᕙᖅᑕᐅᓯᒪᓪᓗᑎᒃ ᐃᓄᖕᓄᑦ ᐱᑕᖃᖅᑎᑕᐅᕙᒃᐳᑦ ᐃᓛᒃᑰᖓᓪᓗᑎᒃ ᑭᓯᐊᓂ ᑕᐃᒃᑯᓄᖓ ᐃᓄᐃᑦ ᐊᖏᕈᑎᑎᒍ ᑲᑐᔾᔨᖃᑎᒌᖑᔪᓄᑦ ᐃᓚᒋᔭᐅᔪᓄᑦ
  • ᓂᐅᕕᖃᑦᑕᕈᓐᓇᕐᓂᖅ ᓴᓂᕐᕙᖅᑕᐅᓯᒪᓪᓗᑎᒃ ᐃᓄᖕᓄᑦ ᐱᑕᖃᖅᑎᑕᐅᕙᒃᐳᑦ ᐃᓛᒃᑰᖓᓪᓗᑎᒃ ᐃᓄᖕᓄᑦ ᑭᓯᐊᓂ ᐃᓚᒋᔭᐅᖃᑕᐅᔪᓄᑦ ᐃᓄᐃᑦ ᐊᖏᕈᑎᑎᒍᑦ ᑲᑐᔾᔨᖃᑎᒌᒋᔭᖏᓐᓄᑦ

ᑖᒃᑯᐊ ᐊᖏᕈᑎᐅᓯᒪᓕᖅᑐᑦ ᐃᑲᔪᕈᑎᐅᓯᒪᓪᓗᑎᒃ ᑲᓇᑕᒥ ᒐᕙᒪᖓᑕ ᐃᓄᐃᑦ ᓄᓇᖓᓐᓂ ᒪᓕᒐᖁᑎᖏᓐᓄᑦ, ᐋᖅᑭᒃᓱᐊᖑᓯᒪᓕᓚᐅᖅᑐᓄᑦ ᐱᓕᕆᖃᑎᒋᓯᒪᓪᓗᒋᑦ ᐃᓄᐃᑦ.

ᑖᒃᑯᐊ ᐊᖏᕈᑎᐅᓯᒪᓕᖅᑐᑦ ᐃᑲᔪᕈᑎᐅᓯᒪᒻᒥᔪᑦ ᓯᓚᑐᖅᓴᖅᕕᖓᑕ ᓯᔅᑳᑦᓱᕙᓐ ᑕᐃᑉᕕᕕᓐ | ᑖᑉᕙᐃᕕᓐ | ᑕᑉᕕᕕᓐ ᒪᓕᒐᖁᑎᖓᓐᓂᒃ, ᐱᑕᖃᖅᑎᑦᓯᔪᓂᒃ ᑐᖖᒐᕝᕕᖁᑎᓂᒃ ᐊᑐᓕᖅᑎᑕᐅᖁᓪᓗᒋᑦ ᓄᓇᖃᖅᑳᖅᓯᒪᔪᐃᑦ ᐃᓚᒋᔭᐅᖃᑕᐅᔾᔪᑎᖏᑦ/ᓄᓇᖃᖃᑕᐅᓂᖏᓐᓄᑦ ᓇᓗᓇᐃᖅᓯᔾᔪᑎᑦ ᑎᑎᕋᖅᑕᐅᓯᒪᔪᓄᑦ ᐃᓚᐅᓪᓗᑎᒃ. ᓯᓚᑦᑐᖅᓴᖅᕕᒃ ᐱᓕᕆᐊᒃᓴᖃᕐᒪᑕ ᒥᐊᓂᖅᓯᔨᐅᒋᐊᒥᒃ ᐱᔪᓐᓇᐅᑎᖏᓐᓂᒃ, ᐃᓕᖅᑯᓯᑐᖃᖓᓐᓂᒃ ᐊᒻᒪᓗ ᓱᓕᑦᓯᐊᖅᑑᓂᖏᑕ ᓄᓇᖃᖅᑳᖅᓯᒪᔪᐃᑦ, ᓄᓇᖃᖅᑳᖅᓯᒪᔪᑦ ᐊᑐᕐᓂᖃᖅᑎᑕᖏᓂᒃ, ᐊᒻᒪᓗ ᓄᓇᖃᖅᑳᕐᓯᒪᔪᑦ ᐅᖃᐅᓯᖏᓂᒃ ᓯᓚᑦᑐᖅᓴᖅᕕᐅᑉ ᐃᓗᐊᓂ.

“ᑐᑭᒧᐊᒍᑎᒋᓪᓗᒋᑦ ᐅᐸᕼᐅᑖᓐ | ᐆᐹᕼᐅᑖᓐ, ᓄᓇᖃᖅᑳᕐᓯᒪᔪᐃᑦ ᖃᓄᖅᑑᕈᑎᓕᐅᕈᑎᖏᓐᓄᑦ ᐅᕙᑦᑎᓐᓄᑦ ᑐᓂᔭᐅᓯᒪᔪᓄᑦ, ᐱᓕᕆᓂᖃᖅᐳᒍᑦ ᓯᓚᑦᑐᖅᓴᕐᕕᖏᒥ ᐃᖅᑲᓇᐃᔭᕐᕕᐅᔪᖅ ᐱᐅᓂᖅᐸᐅᑎᑕᐅᔪᓐᓇᕐᓗᓂ ᐃᓂᖃᕐᕕᐅᔪᓐᓇᖃᑦᑕᕐᓂᒃᓴᖓᓄᑦ ᓄᓇᖃᖅᑳᕐᓯᒪᔪᓄᑦ ᐃᓕᓐᓂᐊᖅᑐᓄᑦ, ᐃᖅᑲᓇᐃᔭᖅᑎᓄᑦ ᐊᒻᒪᓗ ᐃᓕᓴᐃᔨᕐᔪᐊᖑᔪᓄᑦ,” ᐅᖃᖅᓱᓂ ᐲᑕ ᓯᑐᐃᓯᕝ, ᐊᖏᔪᖅᑳᖅ ᐊᒻᒪᓗ ᐊᖏᔪᖅᑳᒧᑦ ᑐᖓᓕᕆᔭᐅᔪᖅ ᓯᓚᑦᑐᖅᓴᖅᕕᖓᓂ ᓴᔅᑳᑦᓱᕙᓐ. “ᐱᓕᕆᐊᒃᓴᖃᕋᑦᑕ ᓄᓇᖃᖅᑳᕐᓯᒪᔪᖅᑕᖃᓕᖅᑎᑦᑎᒋᐊᒥᒃ, ᒐᕙᒪᐅᔪᐃᑦ ᐊᐅᓚᑦᓯᓂᖃᕐᕕᑐᖃᖏᑕ ᐊᑐᕈᖕᓃᖅᑎᑕᐅᓯᒪᓕᕐᓂᒃᓴᖏᓂᒃ ᐊᒻᒪᓗ ᓴᐃᒻᒪᖃᑎᒌᒃᓯᒪᓕᕐᓂᐅᔪᑦ ᑐᖅᑲᔮᖅᑎᑕᐅᓯᒪᖖᒋᓕᖁᓪᓗᒋᑦ, ᐊᒻᒪᓗ ᐱᓕᕆᐊᖃᖃᑎᖃᓕᕐᓂᕗᑦ ᓲᕐᓗ ᐃᓄᐃᑦ ᑕᐱᕇᑦ ᑲᓇᑕᒥ ᑲᑐᔾᔨᖃᑎᒌᖏᓂᒃ ᓴᖖᒋᒃᑎᒋᐊᕈᑎᐅᒻᒪᑕ ᑖᒃᑯᓄᖓ ᐱᓕᕆᐊᒃᓴᐅᔪᓄᑦ ᐊᒻᒪᓗ ᐅᐱᒍᓱᓕᕈᑎᒋᓪᓗᑎᒍᑦ ᓄᓇᖃᖅᑳᕐᓯᒪᔫᓪᓗᑎᒃ ᐃᓅᖃᑎᒌᖑᔪᓂᒃ, ᑲᑎᓐᓂᖃᖅᑐᓂᒃ ᐊᒻᒪᓗ ᐃᓚᒋᔭᐅᖃᑕᐅᔪᓐᓇᕐᓂᕐᒧᑦ ᐱᔪᓐᓇᐅᑎᒋᔭᖏᓐᓂᒃ.”

“ᓂᕆᐅᖕᓂᖃᕐᕕᒋᕙᕋ ᑖᒃᑯᐊ ᐊᑯᓃᖅᑐᐊᓗᒻᒧᑦ ᐱᓕᕆᖃᑎᒌᖃᑦᑕᕐᓂᐅᓂᐊᖅᑐᓄᑦ ᐱᒋᐊᕐᕕᐅᓂᖏᑕ,” ᔭᐃᒥ ᐅᖃᖅᓱᓂ: “ᓯᓚᑦᑐᖅᓴᖅᕕᐅᔪᖅ ᐋᖅᑭᒃᓯᓯᒪᓕᕆᐊᖃᕐᒪᑕ ᖃᓄᐃᓐᓇᖖᒋᑦᑐᒥᒃ ᐊᒻᒪᓗ ᐱᓕᕆᓂᕆᔭᒥᓐᓂᒃ ᓴᖅᑮᓂᖃᕈᓐᓇᑦᓯᐊᕐᓗᑎᒃ ᑐᕌᖓᔪᓄᑦ ᐱᓯᒪᔭᑦᑎᓐᓄᑦ ᐊᒻᒪᓗ ᒥᐊᓂᕆᔭᑦᑎᓐᓄᑦ. ᑕᒪᓐᓇ ᐱᔾᔪᑎᖃᕐᒪᑦ ᐃᓂᖃᖅᑎᑦᑎᓂᕐᓄᑦ ᐃᓄᖕᓂᒃ.”

ᑖᒃᑯᓄᖓ ᑐᓴᕆᐊᒃᑲᓐᓂᖅᑎᑕᐅᔪᒪᔪᑦ, ᖃᐅᔨᒋᐊᒃᑲᓐᓂᕈᓐᓇᖅᐳᑦ ᐅᕙᓂ:

[email protected]