ᐊᐃᐱᕆ 28, 2022 – ᐋᑐᕙ, ᐋᓐᑎᐊᕆᐅ
ᑲᑎᒪᖃᑎᒌᒑᓂᒃᑲᒥᒃ ᑎᓯᐱᕆ 2021-ᒥ ᑲᒥᓯᓄᑦ ᐳᕆᓐᑕ ᓚᑭ, ᕈᐃᐅᓪ ᑲᓃᑎᐊᓐ ᒪᐅᓐᑎᑦ ᐳᓖᔅ-ᑯᓐᓄᑦ (RCMPᔭᐸᓖᓯᒃᑯᑦ) ᐊᒻᒪ ᐊᖏᔪᖅᑳᖅ ᓇᐃᑖᓐ ᐆᐱᒃ, ᐃᓄᐃᑦ ᑕᐱᕇᑦ ᑲᓇᑕᒥ (ITK), ᑕᒪᕐᒥᐅᓪᓗᑎᒃ ᑲᑐᔾᔨᖃᑎᒌᖑᔫᒃ ᐋᖅᑭᒃᓱᐃᓯᒪᓕᖅᑐᒃ ᐊᒥᖅᑲᕈᑎᒋᓗᓂᑦᔪᒃ ᐱᓕᕆᐊᖑᓂᐊᖅᑐᓂᒃ ᐃᑲᔪᕈᑎᒃᓴᐅᓪᓗᑎᒃ ᐱᐅᓯᒋᐊᖅᑎᑕᐅᓯᒪᓂᒃᓴᖏᑕ ᐱᓕᕆᖃᑎᒌᒃᐸᓐᓂᐅᔪᓄᑦ ᐃᓄᐃᑦ ᓄᓇᓕᒋᔭᖏᓐᓂᑦ ᐊᒻᒪ ᐸᓖᓯᒃᑯᓐᓂᑦ (RCMP).
ᐸᕐᓇᐅᑎᓕᐅᕐᓂᖓᑦ ᐱᒋᐊᕐᕕᐅᕗᖅ ᑲᑐᔾᔨᖃᑎᒌᒃᖢᑎᒃ ᐱᓕᕆᖃᑎᒌᓕᕐᓂᐊᕐᓂᖏᑕ ᐸᓖᓯᒃᑯᑦ (RCMP) ᐊᒻᒪ ᐃᓄᐃᑦ ᑲᓇᑕᐅᑉ ᖁᑦᓯᖕᓂᖓᒍᑦ ᐱᓕᕆᐊᖑᓯᒪᓕᖁᓪᓗᒋᑦ ᐃᓚᑰᓂᖃᕐᕕᐅᔪᑦ ᐊᒻᒪ ᓯᕗᓪᓕᖅᐸᐅᑎᑕᒃᓴᐅᔪᑦ ᐸᓖᓯᖃᖅᐸᖕᓂᓕᕆᓂᕐᓂ, ᑐᕌᕐᕕᒃᓴᖃᖅᑎᑕᐅᓪᓗᑎᒃ ᐱᕈᖅᑎᑦᓯᓯᒪᓕᕆᐊᒥᖕᓄᑦ ᑕᑯᒃᓴᐅᑦᓯᐊᖅᑐᑎᒍᑦ ᐊᒻᒪ ᐅᒃᐱᕆᑐᕋᐅᑦᓯᐊᕈᖕᓇᕐᓂᖏᓂᒃ.
ᐊᒥᓱᑦ ᐱᓕᕆᐊᖑᓕᕆᐊᓖᑦ ᓴᖅᑭᑎᑕᐅᓯᒪᕗᑦ ᐊᑐᓕᖁᔭᐅᓪᓗᑎᒃ ᐃᓱᒪᓕᐅᕈᑎᐅᓯᒪᓕᓚᐅᖅᑐᓂᑦ ᑲᓇᑕᒥ ᐃᓄᐃᑦ ᐱᓕᕆᐊᖑᓕᖅᑐᒃᓴᓄᑦ ᐸᕐᓇᐅᑎᓕᐊᕆᓯᒪᔭᖏᓂᑦ
ᐸᓖᓯᒃᑯᑦ (RCMP) ᐱᓕᕆᖃᑎᖃᕐᓂᐊᖅᑐᑦ ᐃᓄᐃᑦ ᑕᐱᕇᒃᑯᓐᓂᒃ ᑲᓇᑕᒥ (ITK) ᒪᑯᓄᖓ ᑐᕌᖅᑎᑕᐅᓯᒪᔪᓄᑦ:
- ᑐᑭᓯᒋᕐᕕᒃᓴᖁᑎᒥᓐᓂᒃ ᐊᒥᖅᑲᕈᑎᖃᕐᓂᐊᕐᓂᕐᒧᑦ ᐃᖕᒥᓃᖅᖢᑎᒃ ᑐᖁᔾᔪᑎᖃᖅᓯᒪᔪᓄᑦ, ᐃᒻᒥᓃᖅᖢᑎᒃ ᑐᖁᔾᔪᑎᖃᕋᓱᒃᓯᒪᔪᓄᑦ ᐊᒻᒪ ᐃᒻᒥᓃᕈᒪᓂᕐᒧᑦ ᐃᓱᒻᒥᖅᓯᒪᖃᑦᑕᖅᓯᒪᔪᓄᑦ
- ᐱᔭᕆᐊᖃᖅᑎᑕᐅᓪᓗᑎᒃ ᐱᐅᓯᑐᖃᓕᕆᓂᕐᒧᑦ ᐱᓕᒻᒪᒃᓴᔭᐅᓯᒪᔭᕆᐊᖃᕐᓂᖏᑕ ᐸᓖᓯᐅᔪᑦ ᐃᖅᑲᓇᐃᔮᖃᖅᑐᓄᑦ ᐃᓄᐃᑦ ᓄᓇᖓᓐᓂ
- ᐊᒥᓱᕈᖅᑎᑕᐅᓯᒪᓕᕐᓂᒃᓴᖏᑕ ᐃᓄᖕᓄᑦ ᐱᔾᔪᑎᖃᖅᑎᐅᔪᓄᑦ ᐸᓖᓯᒃᑯᑦ (RCMP) ᐱᓕᕆᕝᕕᖏᑕ ᐃᓗᐊᓂ ᐊᒻᒪ ᐱᐅᓯᒋᐊᖅᑎᑕᐅᓯᒪᓕᕐᓗᑎᒃ ᐃᓄᒃᑐᑦ ᐅᖃᓪᓚᒍᖕᓇᖅᑐᓂᒃ ᐃᖅᑲᓇᐃᔭᖅᑎᖃᕈᓐᓇᕐᓂᖏᑕ
- ᑲᑐᔾᔨᖃᑎᒌᒃᓗᑎᒃ ᐱᓕᕆᖃᑕᐅᓂᖏᓐᓂᒃ ᑐᕌᖓᔪᓄᑦ ᒐᕙᒪᑐᖃᒃᑯᑦ ᓄᓇᖃᖅᑳᖅᓯᒪᔪᐃᑦ ᐃᖅᑲᖅᑐᐃᕝᕕᓕᕆᓂᕐᒥ ᐸᕐᓇᐅᑎᓕᐊᖏᓐᓄᑦ ᓯᕗᓕᖅᑎᖃᕐᓗᑎᒃ ᑲᓇᑕᒥ ᐃᖅᑲᖅᑐᐃᕝᕕᓕᕆᔨᕐᔪᐊᒃᑯᖏᓐᓂᒃ.
ᐃᓚᒋᔭᐅᖃᑕᐅᓪᓗᓂ ᐱᓕᕆᐊᖑᔪᒃᓴᐅᓪᓗᑎᒃ ᐸᕐᓇᐅᑎᓄᑦ, ᐸᓖᓯᒃᑯᑦ (RCMP) ᐱᓕᕆᓂᖃᖃᑦᑕᕐᓂᐊᕐᓂᕐᒥᓐᓂᒃ ᓇᓗᓇᐃᖅᓯᓯᒪᕗᑦ ᖃᐅᔨᒋᐊᕐᕕᖃᖃᑦᑕᕐᓂᐊᕐᓂᕐᒥᓐᓄᑦ ᐃᓄᐃᑦ ᓯᕗᓕᖅᑎᒋᔭᖏᓐᓂᑦ ᓇᐅᑦᓯᖅᑐᐃᓂᕐᒥᖕᓂ ᐱᓕᕆᐊᖑᓕᖅᓯᒪᔪᓂᒃ. ᑕᒪᕐᒥᒃ ᑲᑐᔾᔨᖃᑎᒌᖑᔫᒃ ᐱᓕᕆᐊᒃᓴᖃᕐᒪᑎᒃ ᐊᒥᖅᑲᕈᑎᖃᖃᑦᑕᕐᓂᐊᕐᓂᕐᒥᓐᓄᑦ ᑐᓴᒐᒃᓴᖁᑎᒥᖕᓂᒃ ᐊᒻᒪᓗ ᑲᑐᔾᔨᓂᖃᕐᓗᑎᒃ ᐱᓕᕆᓂᖃᖅᐸᖕᓂᐊᕐᓂᕐᒥᖕᓄᑦ ᓴᖅᑭᑉᐸᓪᓕᐊᓪᓗᑎᒃ ᐱᕙᓪᓕᐊᔪᓕᕆᓂᐅᔪᓂᒃ.
“ᐃᓄᐃᑦ ᐊᑯᓂᐊᓗᒃ ᐃᓚᐃᓐᓈᖅᑎᑕᐅᖃᑦᑕᖅᓯᒪᓕᖅᐳᑦ, ᐱᑦᓯᐊᖅᑕᐅᖖᒋᖃᑦᑕᖅᓯᒪᓕᖅᓱᑎᒃ ᐊᒻᒪ ᐋᓐᓂᖅᑎᒐᐅᖃᑦᑕᖅᓯᒪᓕᖅᓱᑎᒃ ᐱᕋᔭᒃᓯᒪᔪᓄᑦ ᐃᖅᑲᖅᑐᐃᕝᕕᓕᕆᓂᕐᒥ ᐱᓕᕆᔾᔪᑎᐅᕙᒃᑐᑦ ᐃᓗᐊᓂ. ᓄᓇᓕᒋᔭᑦᑎᓐᓂ ᐱᓕᕆᓂᐅᖃᑦᑕᖅᓯᒪᔪᑦ ᐸᓖᓯᒃᑯᓐᓂᒃ ᐊᒃᓱᕈᕐᓇᖅᑑᖃᑦᑕᖅᓯᒪᓪᓗᑎᒃ. ᑖᒃᑯᑎᒎᓇᖅ ᓄᑖᖑᓪᓗᑎᒃ ᐱᓕᕆᐊᖑᔪᒃᓴᐅᓪᓗᑎᒃ ᐸᕐᓇᐅᑎᑎᒍᑦ ᓂᕆᐅᖕᓂᖅᑕᖃᓕᕐᒪᑦ ᐱᕈᖅᑎᑦᑎᓯᒪᓕᕆᐊᒥᒃ ᓄᑖᖑᔪᑎᒍᑦ ᐱᓕᕆᖃᑎᒌᒃᐸᓐᓂᐅᓂᐊᖅᑐᓂᒃ ᑐᖖᒐᕝᕕᖃᖅᑎᑕᐅᓯᒪᓪᓗᑎᒃ ᐅᐱᒋᑐᕋᐅᑦᓯᐊᕐᓂᕐᓄᑦ ᐊᒻᒪᓗ ᐅᒃᐱᕆᑐᕋᐅᑦᓯᐊᕈᖕᓇᕐᓂᕐᓄᑦ.”
ITK-ᑯᓐᓄᑦ ᐊᖏᔪᖅᑳᖅ ᓇᐃᑖᓐ ᐆᐱᑦ.
“ᑕᒪᑦᑕᐅᓪᓗᑕ ᐅᒃᐱᕆᑐᕋᐅᑦᓯᐊᕈᖕᓇᕐᓂᖅ, ᐅᐱᒋᑐᕋᐅᑦᓯᐊᕈᖕᓇᕐᓂᖅ ᐊᒻᒪ ᐃᒃᐱᒋᑐᕋᐅᑦᓯᐊᕈᖕᓇᕐᓂᖅ ᐱᑕᖃᕆᐊᖃᕐᒪᑕ ᐱᕈᖅᑎᑦᓯᕙᓪᓕᐊᓂᑦᑎᖕᓂ ᓈᒻᒪᑦᓯᐊᖅᑐᑎᒍᑦ ᐱᓕᕆᖃᑎᒌᓕᕈᖕᓇᕐᓂᖏᑕ ᐸᓖᓯᒃᑯᑦ ᐊᒻᒪ ᐃᓄᐃᑦ ᓄᓇᓕᒋᔭᖏᓂᕐᒥᐅᑦ. ᐸᓖᓯᒃᑯᑦ (RCMP) ᐱᓕᕆᖃᑎᖃᕐᓂᐊᖅᑐᑦ ᐃᓄᐃᑦ ᑕᐱᕇᒃᑯᖏᓂᒃ ᑲᓇᑕᒥ (ITK) ᐊᑐᓕᖅᑎᑦᓯᓂᕐᒥ ᑖᒃᑯᓂᖓ ᐱᓕᕆᐊᖑᔪᒃᓴᐅᓪᓗᑎᒃ ᐸᕐᓇᐅᑎᓂᒃ ᐋᖅᑭᒃᓱᒐᐅᓯᒪᓕᖁᓪᓗᒋᑦ, ᐱᕈᖅᑎᑕᐅᓯᒪᓕᒃᑲᓐᓂᖁᓪᓗᒋᑦ ᐊᒻᒪ ᐱᐅᓯᒋᐊᖅᑎᑕᐅᓯᒪᓕᖁᓪᓗᒋᑦ ᐱᓕᕆᖃᑎᖃᖅᐸᖕᓂᕗᑦ ᓄᓇᓕᒋᔭᐅᔪᓂᒃ ᐃᓄᐃᑦ ᓄᓇᖓᓐᓂ.”
RCMP-ᑐᓪᓗᖅ ᑲᒥᓯᓄᕐ ᐳᕆᓐᑕ ᓚᑭ
ITK-ᑯᑦ ᑲᓇᑕᒥ ᐱᔾᔪᑎᖃᖅᑎᒋᔭᐅᔫᓪᓗᑎᒃ ᑲᑐᔾᔨᖃᑎᒌᒋᔭᐅᕗᑦ ᐃᓄᖕᓄᑦ ᑲᓇᑕᒥ. ᐃᓄᐃᑦ ᓄᓇᖓᑦ ᓯᑕᒪᐅᔪᓄᑦ ᐊᕕᒃᑐᖅᓯᒪᓂᖃᕐᐳᖅ: ᐃᓄᕕᐊᓗᐃᑦ (ᓄᓇᑦᓯᐊᖅ), ᓄᓇᕗᑦ, ᓄᓇᕕᒃ (ᑯᐃᐸᒃ ᑕᖅᕋᖓ) ᐊᒻᒪ ᓄᓇᑦᓯᐊᕗᑦ (ᓂᐅᕙᐅᓐᓛᓐ ᐊᒻᒪᓗ ᓛᐸᑐᐊᕆ.)
ᐸᓖᓯᒃᑯᑦ (RCMP) ᐱᑕᖃᖅᑎᑦᓯᔨᐅᕙᒃᐳᑦ ᐸᓖᓯᖃᖅᑎᑦᓯᕙᖕᓂᕐᓄᑦ ᐅᖓᑖᓄᐊᖅᑐᓂᒃ 70 ᐳᕐᓴᓐᑎᖓᓂᑦ ᐃᓄᐃᑦ ᓄᓇᓕᒋᔭᖏᓂ ᐃᓄᐃᑦ ᓄᓇᓗᒃᑖᖓᓂ, ᐃᓚᖃᖅᖢᑎᒃ ᓄᓇᕗᑦ, ᓄᓇᑦᓯᐊᕗᑦ ᐊᒻᒪ ᐃᓄᕕᐊᓗᐃᑦ ᐊᕕᒃᑐᖅᓯᒪᓂᖓᓂ.
ᐃᓄᐃᑦ ᑕᐱᕇᑦ ᑲᓇᑕᒥ
[email protected]
ᐸᓖᓯᒃᑯᑦ (RMCP)