ᒫᔾᔨ 31, 2023 – ᐋᑐᕙ, ᐋᓐᑎᐊᕆᐅ
ᐊᒥᓱᑲᓪᓚᐅᓕᖅᑐᓄᑦ ᐅᑭᐅᓄᑦ, ᐃᒃᓯᕋᕐᔪᐊᕐᒥᐅᑦ ᓯᕗᓕᖅᑎᒋᔭᖏᑦ ᐊᒻᒪᓗ ᐃᓱᒪᓕᐅᕈᑎᓂᒃ ᐊᑐᓕᖅᑎᑦᑎᔨᐅᕙᒃᑐᑦ ᐋᖅᑭᒋᐊᖅᑕᐅᔪᓐᓇᐃᓕᓪᓗᑎᒃ ᓱᕈᖅᑎᕆᓯᒪᓕᕐᒪᑕ ᑲᓇᑕᒥ ᐃᓄᖕᓂᒃ ᐊᒻᒪᓗ ᓄᓇᖃᖅᑳᖅᓯᒪᔪᐃᑦ ᐃᓄᖁᑎᖏᓐᓂᒃ. ᑕᐃᑦᓱᒪᓂᐅᑎᓪᓗᒍ ᐅᒃᐱᕐᓂᓕᕆᓂᐅᕙᒃᑐᑦ ᑐᖖᒐᕝᕕᒋᓪᓗᒋᑦ ᐅᓪᓗᒥᐅᓕᖅᑐᒥᓗ ᐊᑐᕐᓂᕐᓗᒃᑕᐅᓪᓗᓂ ᓄᓇᖃᖅᑳᖅᓯᒪᔪᓂᒃ ᐋᓐᓂᖅᑎᖅᑕᐅᖃᑦᑕᖅᓯᒪᓕᕐᒪᑕ, ᐃᓚᖃᖅᑎᓪᓗᒋᑦ ᓄᓇᒋᔭᑐᖃᑦᑎᓐᓂᒃ ᐋᑕᐅᓯᒪᓕᓚᐅᕐᓂᑦᑎᓐᓂᒃ.
ᐃᒃᓯᕋᕐᔪᐊᕐᒥᐅᑦ ᐊᖏᔪᖅᑳᕐᔪᐊᖓᑕ ᓄᓇᒋᔭᖓᓂᕐᒥᐅᑦ ᐃᓕᑕᖅᓯᓯᒪᓕᕋᓱᐊᖅᓯᒪᓂᖏᑦ ᐅᒃᐱᕐᓂᓕᕆᓂᒃᑯᑦ ᑐᖖᒐᕝᕕᒋᔭᒥᒃᑎᒍᑦ ᐱᓕᕆᔾᔪᑎᒋᕙᒃᑕᒥᓐᓂᒃ ᐱᒋᐊᖅᑎᑦᑎᓯᒪᓕᕈᑎᒋᓚᐅᖅᑕᒥᓐᓂᒃ ᐋᓐᓂᖅᑎᕆᕙᓐᓂᕐᓂᒃ ᓇᓗᓇᐃᖅᓯᔾᔪᑕᐅᒻᒪᑕ ᐱᒻᒪᕆᐅᔪᑎᒍᑦ ᓴᐃᒻᒪᖃᑎᒌᒃᓯᒪᓕᕋᔭᕐᓂᕐᒧᑦ ᐱᓕᕆᓂᖃᕋᓱᓕᕐᓂᖏᓐᓂᒃ.
ᐃᓄᐃᑦ ᑕᐱᕇᑦ ᑲᓇᑕᒥ ᑎᒥᖁᑎᒋᔭᖓᓂ, ᑲᔪᓯᑎᑦᑎᓯᒪᕗᒍᑦ ᐃᑲᔪᖅᑐᐃᓯᒪᓂᑦᑎᓐᓂᒃ ᑭᒡᓕᓯᓂᐊᖅᑎᒃᑯᑦ ᑎᓕᐅᕆᔾᔪᑎᒋᓯᒪᔭᖏᓐᓂᒃ ᐱᓕᕆᐊᖑᓕᖁᓪᓗᒋᑦ, ᐱᓗᐊᖅᑐᒥᒃ ᑕᐃᒃᑯᓇᖖᒐᑦ ᐅᒃᐱᕐᓂᓕᕆᓂᕐᒥ ᐱᓕᕆᐊᖃᖃᑎᒌᒃᑎᐅᔪᑦ ᑎᓕᐅᕆᔾᔪᑎᒋᓯᒪᔭᖏᓐᓂᒃ ᐱᓕᕆᐊᖑᓯᒪᓕᖁᓪᓗᒋᑦ. ᑐᖖᒐᕝᕕᒋᓗᒋᑦ 2022-ᒥ ᑎᑎᕋᓚᐅᖅᓯᒪᔭᕗᑦ ᐊᒻᒪᓗ ᑐᒃᓯᕋᕈᑎᒋᓯᒪᓕᓚᐅᖅᑕᕗᑦ ᐃᒃᓯᕋᕐᔪᐊᕌᐱᒃ ᕗᕌᓐᓯᔅᒧᑦ, ᓱᓕ ᐃᒃᓯᕋᕐᔪᐊᕐᒥᐅᑦ ᑐᒃᓯᐊᕐᕕᖓᑦ ᐃᓕᑕᖅᓯᓯᒪᓕᖁᓪᓗᒍ ᐸᓯᔭᒃᓴᐅᓂᖓᑕ ᔫᕼᐋᓂᔅ ᕆᕝᕗᐊᕐ, ᐃᒃᓯᕋᕐᔪᐊᕐᒥᐅᓄᑦ ᐃᒃᓯᕋᕐᔪᐊᖅ ᐱᕋᔭᒃᓯᒪᓕᓚᐅᕐᓯᒪᔪᖅ ᐃᓄᐃᑦ ᓄᑕᖅᑲᖏᓂᒃ.