ᓄᕕᐱᕆ 29, 2022 – ᒪᓐᑐᕆᐋᓪ
ᐃᓄᐃᑦ ᑕᐱᕇᑦ ᑲᓇᑕᒥ ᑲᑎᒪᔨᖏᑦ ᑲᑎᒪᓂᖃᓚᐅᖅᐳᑦ ᓄᕕᐱᕆ 28-ᖑᑎᓪᓗᒍ ᒪᓐᑐᕆᐋᓪᒥ. ᓯᕗᓕᖅᑏᑦ ᐅᖃᓪᓚᐅᓯᖃᓚᐅᖅᑐᑦ ᐱᓕᕆᐊᖑᔪᑦ ᓯᕗᒻᒧᒋᐊᖅᑎᑕᐅᖁᔨᓪᓗᑎᒃ ᐋᖅᑭᒃᓱᐃᖃᑎᒌᒃᓱᑎᒃ ᒐᕙᒪᑐᖃᒃᑯᑦ ᐊᔾᔨᒌᖖᒋᑦᑑᓂᐅᔪᓄᑦ ᑐᖖᒐᕝᕕᖃᖅᖢᑎᒃ ᓄᓇᖃᖅᑳᖅᓯᒪᔪᑦ ᐋᓐᓂᐊᖅᓯᐅᖅᑎᓕᕆᓂᕐᒧᑦ ᒪᓕᒐᖁᑎᖏᑦ ᓯᕗᒻᒧᒋᐊᖅᑎᑕᐅᓂᒃᓴᖏᓐᓄᑦ ᐊᒻᒪᓗ ᓇᐅᒃᑯᑦ ᐱᐅᓂᖅᐹᑎᒍ ᑐᓴᖅᑎᑦᑎᓯᒪᓕᕈᓐᓇᕐᓂᕐᒥᓐᓂᒃ ᐃᓄᖕᓄᑦ ᑐᕌᖓᑎᑕᐅᓪᓗᑎᒃ ᐱᓕᕆᐊᖑᔪᑦ ᐃᑲᔪᕈᑎᖃᖅᑎᑦᑎᔪᓐᓇᕐᒪᖔᑕ, ᓇᓗᓇᐃᕆᐊᖅᓯᒪᓗᒍ ᓇᖕᒥᓂᖅ ᐃᓱᒪᓕᐅᕈᑎᐅᕈᓐᓇᕐᓂᖏᑦ.
ᐃᓄᐃᑦ ᑕᐱᕇᑦ ᑲᓇᑕᒥ ᐱᓕᕆᓂᖃᖃᑎᒌᒃᓱᑎᒃ ᑲᑎᒪᔾᔪᑕᐅᔪᒃᓴᓂᒃ ᐱᓕᕆᓂᖃᓕᖅᓯᒪᕗᑦ, ᐃᓚᖃᖅᖢᒋᑦ ᐊᑐᓕᖅᑎᑕᐅᔪᓐᓇᖅᑑᓪᓗᑎᒃ ᐋᓐᓂᐊᖅᓯᐅᕐᑎᓕᕆᓂᕐᒧᑦ ᒐᕙᒪᑐᖃᒃᑯᓐᓂᑦ, ᐳᕌᕕᓐᓯᐅᔪᓂᑦ ᐊᒻᒪᓗ ᐊᕕᒃᑐᖅᓯᒪᓂᐅᔪᓂᑦ ᒪᓕᒐᖁᑏᑦ ᕿᒥᕐᕈᔭᐅᓂᒃᓴᖏᓐᓂᒃ, ᖃᐅᔨᓴᐃᓂᕐᒧᑦ ᐋᓐᓂᐊᕐᕕᓕᐊᖅᑐᓄᑦ ᑐᕌᖓᑎᑕᐅᓯᒪᓪᓗᑎᒃ ᐋᓐᓂᐊᖅᓯᐅᕐᑎᓕᕆᔾᔪᑎᑦ ᐱᑕᖃᖅᑎᑕᐅᕙᓐᓂᖏᓐᓂᒃ ᐃᓱᒪᒋᓪᓗᒋᑦ ᐃᓄᐃᑦ ᓄᓇᖃᖅᑐᑦ ᐊᒻᒪᓗ ᓯᓚᑖᓂᕐᒥᐅᖑᔪᑦ ᐃᓄᐃᑦ ᓄᓇᖓᓐᓂᑦ, ᕿᒥᕐᕈᔭᐅᓂᖏᑕ ᐋᓐᓂᐊᖅᓯᐅᑎᓕᕆᓂᕐᒥ ᑐᓂᓯᓯᒪᓕᖅᐸᓐᓂᕐᓄᑦ ᐊᖏᕈᑎᓂᒃ ᐊᒻᒪᓗ ᐊᕕᒃᑐᖅᓯᒪᔪᓄᑦ ᑮᓇᐅᔭᖁᑎᒃᓴᕆᔭᐅᕙᒃᑐᓂᒃ, ᐊᒻᒪᓗ ᕿᒥᕐᕈᐃᓂᖅ ᖃᐅᔨᒋᐊᕐᓂᕐᓗ ᐊᑐᓕᖅᑎᑕᐅᔪᓐᓇᖅᑐᓂ ᐃᓚᑰᓂᖃᕐᕕᐅᔪᓄᑦ ᐱᑕᖃᓕᖅᑎᑦᓯᕙᓐᓂᕐᓂ ᐋᓐᓂᐊᖅᓯᐅᕐᑎᓕᕆᓂᕐᒥ ᐱᔨᑦᓯᕋᕈᑎᒃᓴᓂᒃ. ᐊᒥᓱᕐᓚᐅᓪᓗᑎᒃ ᑐᕌᖓᕝᕕᖃᖅᑎᑕᐅᔪᓂᒃ ᐅᖃᓪᓚᐅᓯᖃᓚᐅᖅᐳᑦ ᐋᖅᑭᒃᓱᐃᓯᒪᓕᕆᐊᒧᑦ ᓂᕆᐅᖕᓂᖃᕐᕕᒋᔭᐅᔪᓂᒃ ᐋᖅᑭᒃᓱᐃᖃᑎᒌᒃᓗᑎᒃ ᐱᓕᕆᓂᐅᓕᕈᓐᓇᖅᑐᓄᑦ ᐱᒋᐊᖅᑎᑕᐅᓯᒪᓕᕐᓂᐊᕐᓂᖏᑕ ᐊᑐᓕᓵᖅᑎᓪᓗᒍ 2023.
ᐃᓚᒋᔭᐅᔪᑦ ᐅᖃᓪᓚᐅᓯᖃᓚᐅᕐᒥᔪᑦ ᑮᓇᐅᔭᖁᑎᒃᓴᐃᑦ 2022-ᒥ ᑐᓂᔭᐅᓯᒪᓕᕐᓂᐊᖅᑐᓄᑦ $300-ᒥᓕᐊᓐᑖᓚᓂᒃ ᐅᑭᐅᑦ ᑕᓪᓕᒪ ᐊᑐᖅᐸᓪᓕᐊᑎᓪᓗᒋᑦ ᐋᖅᑭᒃᓱᐃᖃᑎᒌᓕᕈᑎᒃᓴᐅᓪᓗᑎᒃ ᓄᓇᖃᖅᑳᖅᓯᒪᔪᑦ ᐃᓄᒋᐊᒃᑐᓂᕐᒥᐅᑦ ᐊᒻᒪᓗ ᐅᑭᐅᖅᑕᖅᑐᒥᐅᑦ ᐃᒡᓗᓕᕆᓂᕐᒧᑦ ᐱᓕᕆᐊᖏᓂᒃ. ᑲᑎᒪᔩᑦ ᓴᖖᒋᓂᖅᓴᐅᔪᑎᒍᑦ ᐱᓕᕆᓂᖃᓕᖁᓪᓗᒋᑦ ᐱᔾᔪᑎᒋᓯᒪᓂᐊᕐᓗᒋᑦ ᐃᓄᐃᑦ ᐋᖅᑭᒃᓱᐃᖃᑎᒌᖕᓂᐅᔪᓄ ᐱᓕᕆᐊᖑᕙᓪᓕᐊᑎᓪᓗᒋᑦ ᐱᑕᖃᖅᑎᑕᐅᓯᒪᑎᑕᐅᔾᔪᑎᒃᓴᖏᑕ ᐊᔾᔨᒌᖖᒋᑦᑑᓂᐅᔪᓄᑦ ᑐᖖᒐᕝᕕᖃᖅᑎᑕᐅᓪᓗᑎᒃ ᐸᕐᓇᐅᑎᓕᐊᖑᓯᒪᔪᓂᒃ.
ᑲᑎᒪᔨᓄᑦ ᐃᓚᒋᔭᐅᔪᑦ ᓂᕈᐊᖅᖠᓂᖃᓚᐅᖅᑐᑦ ᓴᓂᕐᕙᐃᓯᒪᓕᕐᓂᐊᕐᓂᕐᒥᓐᓂᒃ ᐅᖓᑖᓄᐊᖅᓯᒪᔪᓂᒃ $750,000-ᑖᓚᓂᑦ ᒐᕙᒪᑐᖃᒃᑯᓐᓂᑦ ᑮᓇᐅᔭᖁᑎᒃᓴᕆᔭᐅᓂᐊᖅᑐᓂᒃ ᓯᑕᒪᐅᓪᓗᑎᒃ ᐊᕕᒃᑐᖅᓯᒪᓂᕐᓂ ᐃᓄᐃᑦ ᑲᑐᔾᔨᖃᑎᒌᖏᓐᓄᑦ ᐋᖅᑭᒃᓱᐃᖃᑎᒌᒍᑎᒃᓴᓂᒃ ᐊᔾᔨᒌᖖᒋᑦᑑᓂᐅᔪᓄᑦ ᑐᖖᒐᕝᕕᖃᖅᑎᑕᐅᓪᓗᑎᒃ ᐊᑯᓃᖅᑐᒧᑦ ᐊᒻᒪᓗ ᒥᐊᓂᕆᔭᐅᕝᕕᖕᓄᑦ ᐋᓐᓂᐊᕐᕕᓕᐊᖅᓯᒪᔪᓄᑦ ᐱᓕᕆᓂᖃᕐᕕᐅᓕᕈᓐᓇᖅᑐᓂᒃ ᐃᓄᐃᑦ ᐱᔾᔪᑎᒋᓪᓗᒋᑦ. ᐃᓄᐃᑦ ᑕᐱᕇᑦ ᑲᓇᑕᒥ ᐱᓕᕆᖃᑎᖃᖃᑦᑕᖅᓯᒪᕗᑦ ᓄᓇᖃᖅᑳᖅᓯᒪᔪᓕᕆᔨᖏᓂᒃ ᑲᓇᑕᒥ ᐋᖅᑭᒃᓱᐃᖃᑎᒌᒃᓯᒪᓕᕋᔭᕐᓂᕐᒧᑦ ᐊᑯᓃᖅᑐᒧᑦ ᒥᐊᓂᕆᔭᐅᕝᕕᒃᓴᓂᒃ ᐋᓐᓂᐊᖅᓯᐅᕐᑎᓕᕆᓂᕐᒥ ᐊᒻᒪᓗ ᐃᓅᖃᑎᒌᒃᑐᓕᕆᓂᕐᒥ ᐱᔨᑦᓯᕋᕈᑎᒃᓴᐅᔪᓄᑦ ᐃᓄᖕᓄᑦ ᓇᓃᓕᕋᓗᐊᖅᐸᑕ ᐃᓅᓯᕐᒥᓐᓂ, ᐃᓚᖃᖅᑎᓪᖢᒋᑦ ᐃᓄᑐᖃᐅᔪᓂᒃ, ᐃᓄᖕᓂᒃ ᑎᒥᒥᒃᑎᒍᑦ ᐃᓱᒪᒥᒃᑎᒍᓪᓗ ᐊᔪᓕᕈᑎᖃᖅᓯᒪᔪᓄᒃ ᐊᒻᒪᓗ ᑐᖁᔾᔪᑎᒋᔪᓐᓇᖅᓱᒋᑦ ᐋᓐᓂᐊᕐᓂᖃᖅᑐᓄᑦ, ᐊᒻᒪᓗ ᐊᓯᖏᓐᓄᑦ.
ᐃᓚᒋᔭᐅᔪᑦ ᓂᕈᐊᖅᖠᓂᖃᓚᐅᕐᒥᔪᑦ ᓈᒻᒪᒃᓴᐃᓯᒪᓂᕐᒥᓐᓂᒃ ᐊᑎᓕᐅᖅᓯᒪᓕᕆᐊᒧᑦ ᐱᓕᕆᐊᖑᓕᕋᔭᕐᓂᖏᑕ ᐋᖅᑭᒃᓱᐃᓯᒪᓕᕆᐊᕐᓂᕐᒧᑦ ᑲᓇᑕᓕᒫᒥ ᐃᓄᐃᑦ ᑭᓇᐅᓂᕐᒥᓐᓄᑦ ᓇᓗᓇᐃᒃᑯᑕᕆᔭᒃᓴᖏᓂᒃ ᐊᐅᒃᑕᔫᖑᓗᑎᒃ. ᓄᑖᖑᓪᓗᑎᒃ ᑲᓇᑕᒥ ᐃᓄᐃᑦ ᑭᓇᐅᓂᕐᒥᓐᓄᑦ ᓇᓗᓇᐃᒃᑯᑕᓕᕆᔨᖏᑕ ᑲᑎᒪᔨᕋᓛᖏᑦ ᑲᑐᔾᔨᖃᑎᒌᑦ ᐃᓗᐊᓂ ᐱᓕᕆᖃᑎᖃᕐᓂᐊᖅᐳᑦ ᓯᑕᒪᐅᓪᓗᑎᒃ ᐃᓄᐃᑦ ᐊᕕᒃᑐᖅᓯᒪᓂᖏᓐᓂ ᑲᑐᔾᔨᖃᑎᒌᖑᔪᓂᒃ, ᐱᓕᕆᖃᑎᒋᓗᒋᑦ ᒐᕙᒪᑐᖃᒃᑯᑦ ᐊᒻᒪᓗ ᐱᓕᕆᔪᓐᓇᐅᑎᑎᒍᑦ ᐱᓕᕆᐊᖃᖅᑎᐅᓕᕈᓐᓇᖅᑐᑦ. ᑐᕌᕐᕕᒃᓴᖃᖅᑎᑕᐅᕗᑦ ᐋᖅᑮᓯᒪᓕᕋᔭᕐᓂᕐᒧᑦ ᒐᕙᒪᑐᖃᒃᑯᓐᓂᑦ ᐃᓕᑕᕆᔭᐅᓯᒪᓗᑎᒃ ᑭᓇᐅᓂᕐᒧᑦ ᐃᓄᖕᓄᑦ ᓇᓗᓇᐃᒃᑯᑕᐅᓕᕋᔭᖅᑐᓂᒃ ᐃᓱᒪᒋᖃᑕᐅᓯᒪᓗᒋᑦ ᑐᓗᖅᑕᕐᕕᐅᓕᕋᔭᖅᑐᑦ ᓂᐅᕕᖅᓯᒪᓕᕋᔭᕐᓂᕐᓄᑦ ᐊᓯᖏᓂᒃ ᓇᓗᓇᐃᒃᑯᑕᕆᔭᐅᕙᒍᓐᓇᖅᑐᓂᑦ.