ᐃᓄᐃᑦ ᑕᐱᕇᑦ ᑲᓇᑕᒥ 2021-ᒥ ᐊᖏᔪᖅᑳᒥᒃ ᓂᕈᐊᖅᖠᓂᖅ

ᐃᓄᐃᑦ ᑕᐱᕇᒃᑯᑦ ᑲᓇᑕᒥ ᒪᑐᐃᖅᓯᕗᑦ ᓂᕈᐊᒐᒃᓴᖖᒍᖅᑎᑦᓯᓐᓇᒥᒃ ᐊᖏᔪᖅᑳᒥᒃ ᓂᕈᐊᖅᖠᓂᖃᕐᓂᐊᕐᓂᕐᒥ

 

ᔪᓚᐃ 28, 2021, ᐋᑐᕙ, ᐋᓐᑎᐊᕆᐅ

ᐊᖏᔪᖅᑳᖑᔪᒥᒃ ᐃᓄᐃᑦ ᑕᐱᕇᒃᑯᓐᓄᑦ ᑲᓇᑕᒥ ᓂᕈᐊᖅᖠᓂᖃᕐᓂᐊᖅᑐᑦ ᓯᑦᑎᐱᕆ 2021-ᒥ, ᐃᓄᐃᑦ ᑕᐱᕇᒃᑯᑦ ᑲᓇᑕᒥ ᑲᑎᒪᕕᒡᔪᐊᕐᓂᖓᑦ ᐃᓱᓕᓯᒪᓕᖅᐸᑦ.

ᐃᓄᐃᑦ ᐅᑭᐅᓖᑦ 18-ᓂᒃ ᐅᖓᑖᓄᓪᓗ ᓂᕈᐊᒐᒃᓴᖖᒍᖅᑎᑕᐅᔪᓐᓇᖅᐳᑦ ᑎᓕᔭᐅᓯᒪᓪᓗᑎᒃ ᐃᓚᒋᔭᐅᖃᑕᐅᔪᓄᑦ ᐱᔾᔪᑎᖃᖅᑎᐅᓪᓗᑎᒃ ᐅᑯᓄᖓ ᑲᑐᔾᔨᖃᑎᒌᒋᔭᐅᔪᓄᑦ: ᐃᓄᕕᐊᓗᐃᑦ ᐊᕕᒃᑐᖅᓯᒪᓂᖓᓂ ᑯᐊᐳᕇᓴᖓᑦ, ᓄᓇᕗᑦ ᑐᖖᒐᕕᒃᑯᑦ ᑎᒥᖁᑎᖓᑦ, ᒪᑭᕕᒃ ᑯᐊᐳᕇᓴᖓᑦ ᐅᕝᕙᓘᓐᓃᑦ ᓄᓇᑦᓯᐊᕗᑦ ᒐᕙᒪᖓᓐᓂ; ᐅᕝᕙᓘᓐᓃᑦ ᑐᓂᓯᓯᒪᓗᑎᒃ ᓂᕈᐊᒐᒃᓴᖖᒍᖅᑎᑦᓯᓂᕐᒧᑦ ᑕᑕᑎᕆᐊᓕᖁᑎᓂᒃ.

ᐃᓛᒃᑰᖓᓪᓗᑎᒃ ᓂᕈᐊᒐᒃᓴᐅᓕᖅᓯᒪᔪᑦ ᓂᕈᐊᒐᒃᓴᖖᒍᖅᑎᑕᐅᓯᒪᓇᑎᒃ ᐃᓚᒋᔭᐅᓪᓗᑎᒃ ᐱᔾᔪᑎᖃᖅᑎᒋᔭᐅᔪᓂᑦ ᐱᑕᖃᖅᑎᑦᓯᓯᒪᔭᕆᐊᖃᖅᑎᑕᐅᕗᑦ ᑎᑎᖅᑲᓂᒃ ᓇᓗᓇᐃᔭᐃᓯᒪᔪᓂᒃ ᐱᓕᕆᓂᖃᖅᓯᒪᓂᕐᒥᓐᓄᑦ ᓯᕗᓕᖅᑎᐅᓪᓗᑎᒃ, ᖃᐅᔨᒪᓂᕐᒥᓐᓄᑦ ᐱᕙᓪᓕᐊᔪᓕᕆᓂᐅᔪᓄᑦ ᐱᒻᒪᕆᐅᑎᑕᐅᓪᓗᑎᒃ ᐃᓄᓐᓄᑦ ᐊᒻᒪᓗ ᓇᓗᓇᐃᔭᐃᓯᒪᓗᑎᒃ ᓱᓇᓂᒃ ᐱᓕᕆᐊᖃᖅᓯᒪᓕᕈᒪᓂᐊᕐᓂᕐᒥᓐᓄᑦ ᐃᓄᐃᑦ ᑕᐱᕇᒃᑯᓐᓄᑦ ᑲᓇᑕᒥ ᐊᖏᔪᖅᑳᖑᓕᕈᑎᒃ, ᐊᒻᒪᓗ 20-ᐅᔪᓂᑦ ᐃᓄᓐᓂᑦ ᐊᑎᓕᐅᖅᑕᐅᓯᒪᔪᓂᒃ ᐱᓯᒪᒻᒥᓗᑎᒃ, ᐅᑭᐅᓕᓐᓂᒃ 18-ᓂᒃ ᐅᖓᑖᓄᓪᓘᓐᓃᑦ, ᐃᑲᔪᖅᑐᐃᓂᖃᖅᑐᓂᒃ ᓂᕈᐊᒐᒃᓴᖖᒍᖅᓯᒪᓂᒥᓄᑦ.

ᓂᕈᐊᒐᒃᓴᖖᒍᖅᓯᒪᔪᑦ ᐱᕕᒃᓴᖃᖅᑎᑕᐅᓂᐊᖅᐳᑦ 10 ᒥᓂᑦᓯᒥᒃ ᐅᖃᓪᓚᒍᓐᓇᕐᓂᕐᒧᑦ ᐃᓚᒋᔭᐅᔪᓄᑦ ᐊᒻᒪᓗ ᑲᑎᒪᕕᒡᔪᐊᕆᐊᖅᓯᒪᔪᓄᑦ ᐃᓄᐃᑦ ᑕᐱᕇᒃᑯᑦ ᑲᓇᑕᒥ ᑲᑎᒪᕕᒡᔪᐊᕐᓂᖃᖅᑎᓪᓗᒋᑦ, ᐊᒻᒪᓗ ᐃᑲᔪᖅᑐᒐᐅᓯᒪᓪᓗᑎᒃ ᓴᖅᑮᓯᒪᓕᕐᓂᐊᖁᓪᓗᒋᑦ ᐅᖃᐅᓯᒃᓴᒥᓐᓂᒃ ᐅᐸᒍᑎᓯᒪᖃᑕᐅᓗᑎᒃ ᑲᑎᒪᕕᒡᔪᐊᖅᑐᓄᑦ. ᑲᑎᒪᕕᒡᔪᐊᕐᓂᖓᑦ ᐱᓕᕆᐊᖑᔭᕆᐊᖃᕋᔭᖅᐸᑦ ᖃᕆᑕᐅᔭᑎᒍᑦ, ᓂᕈᐊᒐᒃᓴᖖᒍᖅᓯᒪᔪᑦ ᑐᓂᔭᐅᓯᒪᓇᔭᖅᐳᑦ ᑐᓴᒐᒃᓴᖁᑎᓂᒃ ᐃᓚᐅᖃᑕᐅᓕᖁᔭᐅᓂᐊᕐᓂᕐᒥᓐᓄᑦ ᖃᕆᑕᐅᔭᑎᒍᑦ ᑲᑎᒪᕕᒡᔪᐊᕐᓂᖃᖅᑐᓄᑦ ᖃᕆᑕᐅᔭᑎᒎᕐᓗᑎᒃ ᐅᕝᕙᓘᓐᓃᑦ ᐅᖄᓚᐅᑎᑎᒍᑦ.

ᓂᕈᐊᒐᒃᓴᖖᒍᖅᑎᑦᓯᓂᖅ ᐃᓱᓕᑎᑕᐅᓯᒪᓂᐊᖅᑐᖅ ᐱᖓᑦᓯᖅᒥ, ᐅᒡᒍᑎ 18, 2021, 5-ᒧᐊᖅᐸᑦ ᐅᓐᓄᒃᓴᒃᑯᑦ. ᓂᕈᐊᒐᒃᓴᖖᒍᖅᑎᑦᓯᓂᕐᒧᑦ ᑕᑕᑎᕆᐊᓕᖁᑏᑦ ᐊᒻᒪᓗ ᐊᓯᖏᑦ ᑎᑎᕋᖅᓯᒪᔪᖁᑏᑦ ᐊᑐᐃᓐᓇᐅᑎᑕᐅᕗᑦ ᖃᕆᑕᐅᔭᑎᒍᑦ ᐅᕙᓂ ᐱᑐᒃᓯᒪᕝᕕᖓᓐᓂ www.itk.ca/2021-itk-presidential-election.

ᐃᓄᐃᑦ ᑕᐱᕇᒃᑯᓐᓄᑦ ᑲᓇᑕᒥ ᐊᖏᔪᖅᑳᑉ ᐃᓂᖓᓄᑦ ᐃᓕᔭᐅᔪᖅ ᓂᕈᐊᖅᑕᐅᓯᒪᕙᒃᑐᖅ ᐃᓱᒪᖅᓱᕈᓐᓇᐅᑎᒥᒃᑎᒍᑦ ᐊᐅᓚᑦᓯᓂᐅᔪᓄᑦ ᐋᖅᑭᒃᓱᐊᖑᓯᒪᔪᑎᒍᑦ ᐱᔾᔪᑎᖃᖅᑎᐅᓪᓗᑎᒃ ᐃᓄᓕᒫᓄᑦ. ᓂᕈᐊᖅᖠᓂᖃᖅᐸᒃᑐᑦ ᑎᓕᔭᐅᓯᒪᓪᓗᑎᒃ ᐃᓚᒋᔭᐅᖃᑕᐅᔪᓄᑦ ᐱᔾᔪᑎᖃᖅᑎᒋᔭᐅᓪᓗᑎᒃ ᐃᓄᕕᐊᓗᐃᑦ ᐊᕕᒃᑐᖅᓯᒪᓂᖓᓂ ᑯᐊᐳᕇᓴᖓᓂᑦ, ᓄᓇᕗᑦ ᑐᖖᒐᕕᒃᑯᑦ ᑎᒥᖁᑎᖓᓂᑦ, ᒪᑭᕕᒃ ᑯᐊᐳᕇᓴᖓᓂᑦ ᐅᕝᕙᓘᓐᓃᑦ ᓄᓇᑦᓯᐊᕗᑦ ᒐᕙᒪᖓᓂᑦ, ᐃᓚᖃᖅᑎᓪᓗᒋᑦ ᒪᕐᕉᓐᓂᒃ ᑲᑎᒪᕕᒡᔪᐊᕆᐊᖃᑕᐅᔪᓂᑦ ᐊᑐᓂ ᐊᕕᒃᑐᖅᓯᒪᓂᐅᔪᓂᑦ, ᐊᒻᒪᓗ ᐃᓄᐃᑦ ᑕᐱᕇᒃᑯᓐᓄᑦ ᑲᓇᑕᒥ ᐊᖏᔪᖅᑳᑉ ᑐᖓᓕᖓᓂᑦ.

 

ᓂᕈᐊᒐᒃᓴᖖᒍᖅᑎᑦᓯᔾᔪᑎᓂᒃ ᓴᖅᑮᓯᒪᓕᖁᔨᓂᖅ

ᐃᓄᐃᑦ ᑕᐱᕇᒃᑯᑦ ᑲᓇᑕᒥ ᐊᖏᔪᖅᑳᖓᓂᒃ ᓂᕈᐊᖅᖠᓂᖅ

ᓂᕈᐊᖅᖠᓂᖃᕐᓂᐊᖅᑐᑦ ᐃᓄᐃᑦ ᑕᐱᕇᒃᑯᑦ ᑲᓇᑕᒥ ᐊᖏᔪᖅᑳᒥᒃ ᐃᓄᐃᑦ ᑕᐱᕇᒃᑯᑦ ᑲᓇᑕᒥ ᑲᑎᒪᕕᒡᔪᐊᕐᓂᖓᑦ ᐃᓱᓕᓯᒪᓕᖅᐸᑦ ᓯᑦᑎᐱᕆ 2021-ᒥ. ᐃᓄᐃᑦ ᑕᐱᕇᒃᑯᑦ ᑲᓇᑕᒥ ᐊᖏᔪᖅᑳᖖᒍᕐᓂᐊᖅᑐᒥᒃ ᓂᕈᐊᖅᖠᓯᒪᓕᕐᓂᐊᖅᐳᑦ ᐊᒥᓲᓂᖅᓴᐅᔪᓂᑦ ᓂᕈᐊᖅᑕᐅᓯᒪᓗᓂ ᑎᓕᔭᐅᓯᒪᓪᓗᑎᒃ ᑲᑎᒪᕕᒡᔪᐊᖅᑐᓄᑦ ᐃᓚᒋᔭᐅᖃᑕᐅᔪᑦ ᐱᔾᔪᑎᖃᖅᑎᒋᔭᖏᓐᓂᑦ ᐊᒻᒪᓗ ᑲᑎᒪᕕᒡᔪᐊᕆᐊᖅᓯᒪᔪᓂᑦ, ᐊᒻᒪᓗ ᐃᓄᐃᑦ ᑕᐱᕇᒃᑯᑦ ᑲᓇᑕᒥ ᐊᖏᔪᖅᑳᑉ ᑐᖓᓕᕆᔭᖓᓂᑦ.

ᓂᕈᐊᒐᒃᓴᖖᒍᕈᓐᓇᖅᑐᑦ

ᐃᓄᐃᑦ ᐅᑭᐅᖃᑐᐊᕈᑎᑦ 18-ᓂᒃ ᓂᕈᐊᒐᒃᓴᖖᒍᕋᓱᐊᕈᓐᓇᖅᐳᑦ.

ᓂᕈᐊᒐᒃᓴᖖᒍᖅᑎᑦᓯᔾᔪᑏᑦ ᐱᓕᕆᐊᖑᕙᓪᓕᐊᕙᓐᓂᖏᑦ

1. ᑎᓕᔭᐅᓯᒪᓪᓗᑎᒃ ᐃᓚᒋᔭᐅᔪᑦ ᐱᔾᔪᑎᖃᖅᑎᒋᔭᐅᓪᓗᑎᒃ ᐊᑐᓂ ᐅᑯᓇᓂ: ᐃᓄᕕᐊᓗᐃᑦ ᐊᕕᒃᑐᖅᓯᒪᓂᖓᓂ ᑯᐊᐳᕇᓴᖓᑦ, ᓄᓇᕗᑦ ᑐᖖᒐᕕᒃᑯᑦ ᑎᒥᖁᑎᖓᑦ, ᒪᑭᕕᒃ ᑯᐊᐳᕇᓴᖓᑦ ᐊᒻᒪᓗ ᓄᓇᑦᓯᐊᕗᑦ ᒐᕙᒪᖓᑦ, ᑎᑎᕋᖅᑕᐅᓯᒪᔪᑎᒍᑦ, ᑭᓇᑐᐃᓐᓇᒥᒃ ᐊᑕᐅᓯᕐᒥᒃ (1) ᐃᓅᓪᓗᓂ ᓂᕈᐊᒐᒃᓴᖖᒍᖅᑎᑦᓯᔪᓐᓇᖅᐳᑦ ᐃᓂᖓᓄᑦ ᐃᓄᐃᑦ ᑕᐱᕇᒃᑯᑦ ᑲᓇᑕᒥ ᐊᖏᔪᖅᑳᖓᑦᑕ.
2. ᑭᓇᑐᐃᓐᓇᖅ ᐃᓄᒃ ᓂᕈᐊᒐᒃᓴᖖᒍᕈᒪᔪᖅ ᐃᓄᐃᑦ ᑕᐱᕇᒃᑯᓐᓄᑦ ᑲᓇᑕᒥ ᐊᖏᔪᖅᑳᑉ ᐃᓂᖓᓄᑦ ᐊᒻᒪᓗ ᓂᕈᐊᒐᒃᓴᖖᒍᖅᑎᑕᐅᓯᒪᖖᒋᓪᓗᓂ ᑎᓕᔭᐅᓯᒪᓪᓗᑎᒃ ᐃᓚᒋᔭᐅᔪᑦ ᐱᔾᔪᑎᖃᖅᑎᒋᔭᐅᔪᒥᑦ ᑐᓂᓯᓯᒪᔭᕆᐊᖃᖅᑎᑕᐅᕗᖅ ᒪᑯᓂᖓ:

ᐃ. ᑕᑕᑎᖅᑕᐅᓯᒪᔪᓂᒃ ᐊᒻᒪᓗ ᐊᑎᓕᐅᖅᓯᒪᔪᓂᒃ ᓂᕈᐊᒐᒃᓴᖖᒍᖅᑎᑦᓯᓂᕐᒧᑦ ᑕᑕᑎᕆᐊᓕᖁᑎᓂᒃ ᐃᓚᖃᖅᑎᓪᓗᒋᑦ ᐊᕙᑎᓂᑦ (20) ᐃᓄᓐᓂᑦ ᐅᑭᐅᓕᓐᓂᒃ 18-ᓂᒃ ᐅᖓᑖᓄᓪᓘᓐᓃᑦ ᐊᑎᓕᐅᖅᑕᐅᓯᒪᔪᓂᒃ

ᐅ. ᑎᑎᖅᑲᓂᒃ ᓇᓗᓇᐃᔭᐃᓯᒪᔪᓂᒃ ᐊᔪᖖᒋᓐᓂᕆᔭᒥᓄᑦ ᐊᒻᒪᓗ ᐱᓕᕆᐊᕆᓯᒪᔭᒥᓄᑦ

ᐊ.  ᓄᑖᓂᒃ ᖁᑦᑎᖕᓂᖏᑦ 1-ᖓᓄᑦ ᐱᕋᔭᒃᓯᒪᖖᒋᒃᑲᓗᐊᕐᒪᖔᑦ ᖃᐅᔨᒋᐊᖅᑕᐅᓯᒪᓂᒥᓄᑦ ᓇᓗᓇᐃᖅᓯᔾᔪᑎᓂᒃ, ᐊᑕᐅᓯᕐᒥᒃ ᐊᑐᓂ ᐳᕌᕕᓐᓯᒋᔭᐅᔪᓂ ᓄᓇᓕᖃᕐᕕᒋᓯᒪᔭᒥᓂᑦ ᐅᑭᐅᑦ ᑕᓪᓕᒪᑦ (5) ᐊᑐᖅᐸᓪᓕᐊᓯᒪᓂᖏᓐᓂ

ᐱ. ᐅᐊᔭᒨᖅᑐᒃᑯᑦ ᐊᔾᔨᓕᐅᖅᑕᐅᓯᒪᓂᕐᒥᓂᒃ ᐊᓯᖏᓐᓄᑦ ᓄᓇᕐᔪᐊᓄᑦ ᐃᑎᕈᓐᓇᐅᑎᑎᑐᑦ ᑕᑯᒃᓴᐅᑦᑎᐊᖅᑎᑕᐅᓯᒪᔪᓂᒃ (ᐅᖓᑖᓂ ᑕᑯᒃᓴᐅᔪᖃᓗᐊᕋᑎᒃ, ᕿᖖᒐᕇᒃᑯᑎᓂᒃ ᐃᒡᒑᖅᓯᒪᔭᕆᐊᖃᖖᒋᑦᑐᖅ ᐅᕝᕙᓘᓐᓃᑦ ᓇᓴᖅᓯᒪᔭᕆᐊᖃᖖᒋᑦᑐᖅ)

ᐳ. ᐊᑭᓕᐅᑎᓂᒃ $500-ᓂᒃ ᖃᕆᑕᐅᔭᑎᒍᑦ ᑮᓇᐅᔭᓂᒃ ᑐᓂᓯᓯᒪᔾᔪᑎᑎᒎᖅᑎᑕᐅᓯᒪᔪᓂᒃ, ᑮᓇᐅᔭᖖᒍᑐᐃᓐᓇᕆᐊᓖᑦ ᑮᓇᐅᔭᒃᓴᑎᒍᑦ ᐊᑭᓖᔾᔪᑎᓂᒃ ᐅᕝᕙᓘᓐᓃᑦ ᑮᓇᐅᔭᓂᒃ ᐊᑭᓕᐅᑎᓂᒃ ᓂᐅᕕᖅᑕᐅᓯᒪᔪᑎᒍᑦ (ᒪᓂ ᐅᐊᑕ), ᐅᕝᕙᓘᓐᓃᑦ ᐊᑮᑦᑐᓕᐅᕈᑎᑎᒍᑦ ᐊᐅᒃᑕᔫᒃᑎᒍᑦ (ᐴᖅᑕᐅᔪᑦ ᐅᑎᖅᑎᑕᐅᓂᐊᖅᐳᑦ ᓂᕈᐊᒐᒃᓴᖖᒍᖅᑎᑕᐅᓯᒪᔪᓂᑦ ᐱᓯᒪᓕᓚᐅᖅᑐᓂᑦ 10%-ᓗᐊᖓᓂᒃ ᓂᕈᐊᖅᑕᐅᓯᒪᓕᕐᓂᕐᒥᑦ ᓂᕈᐊᖅᖠᑎᓪᓗᒋᑦ. ᐴᖅᑕᐅᓯᒪᔪᑦ ᐊᑐᕈᖕᓃᖅᑎᑕᐅᓇᔭᖅᑐᑦ ᑕᐃᓐᓇ ᓂᕈᐊᒐᒃᓴᖖᒍᖅᑎᑕᐅᓯᒪᔪᖅ ᓄᖅᑲᐅᔾᔨᒃᐸᑦ ᓂᕈᐊᒐᒃᓴᖖᒍᖅᓯᒪᓂᕐᒥᓂᑦ).

ᓂᕈᐊᒐᒃᓴᖖᒍᖅᑎᑦᓯᓐᓇᐅᑉ ᐃᓱᓕᕝᕕᖓ

ᑕᒪᕐᒥᒃ ᑎᑎᖅᑲᖁᑎᒋᔭᐅᔪᑦ ᐱᔭᐅᓯᒪᓕᕆᐊᖃᖅᑐᑦ ᐃᓱᒪᑕᐅᓪᓗᓂ ᓂᕈᐊᖅᖠᓂᓕᕆᔨᐅᑉ ᑐᖓᓕᕆᔭᖓᓂᑦ ᓯᕗᕐᖓᓂ ᐅᒡᒍᑎ 18, 2021 ᐅᓪᓗᖓᑕ, 5-ᒧᐊᖅᐸᑦ ᐅᓐᓄᒃᓴᒃᑯᑦ.

ᓂᕈᐊᖅᖠᓂᖃᖅᑎᓪᓗᒋᑦ ᐅᖃᓪᓚᒃᕕᖃᕈᓐᓇᕐᓂᖅ

ᓂᕈᐊᒐᒃᓴᖖᒍᖅᓯᒪᔪᑦ ᐱᕕᒃᓴᖃᖅᑎᑕᐅᓂᐊᖅᐳᑦ 10 ᒥᓂᑦᓯᒥᒃ ᐅᖃᓪᓚᒍᓐᓇᕐᓂᕐᒧᑦ ᐃᓚᒋᔭᐅᔪᓄᑦ ᐊᒻᒪᓗ ᑲᑎᒪᕕᒡᔪᐊᕆᐊᖅᓯᒪᔪᓄᑦ ᐃᓄᐃᑦ ᑕᐱᕇᒃᑯᑦ ᑲᓇᑕᒥ ᑲᑎᒪᕕᒡᔪᐊᕐᓂᖃᖅᑎᓪᓗᒋᑦ, ᐊᒻᒪᓗ ᐃᑲᔪᖅᑐᒐᐅᓯᒪᓪᓗᑎᒃ ᓴᖅᑮᓯᒪᓕᕐᓂᐊᖁᓪᓗᒋᑦ ᐅᖃᐅᓯᒃᓴᒥᓐᓂᒃ ᐅᐸᒍᑎᓯᒪᖃᑕᐅᓗᑎᒃ ᑲᑎᒪᕕᒡᔪᐊᖅᑐᓄᑦ. ᑲᑎᒪᕕᒡᔪᐊᕐᓂᖓᑦ ᐱᓕᕆᐊᖑᔭᕆᐊᖃᕋᔭᖅᐸᑦ ᖃᕆᑕᐅᔭᑎᒍᑦ, ᓂᕈᐊᒐᒃᓴᖖᒍᖅᓯᒪᔪᑦ ᑐᓂᔭᐅᓯᒪᓇᔭᖅᐳᑦ ᑐᓴᒐᒃᓴᖁᑎᓂᒃ ᐃᓚᐅᖃᑕᐅᓕᖁᔭᐅᓂᐊᕐᓂᕐᒥᓐᓄᑦ ᖃᕆᑕᐅᔭᑎᒍᑦ ᑲᑎᒪᕕᒡᔪᐊᕐᓂᖃᖅᑐᓄᑦ ᖃᕆᑕᐅᔭᑎᒎᕐᓗᑎᒃ ᐅᕝᕙᓘᓐᓃᑦ ᐅᖄᓚᐅᑎᑎᒍᑦ.