ᔫᓂ 29, 2022 — ᐃᓅᕕᒃ, ᐃᓄᕕᐊᓗᐃᑦ ᐊᕕᒃᑐᖅᓯᒪᓂᖓᓂ
ᐃᓄᐃᑦ ᑕᐱᕇᑦ ᑲᓇᑕᒥ (ITK) ᑲᑎᒪᔨᖏᑦ ᑲᑎᒪᓚᐅᖅᑐᑦ ᖃᕆᑕᐅᔭᑎᒍᑦ ᔫᓂ 23-ᖑᑎᓪᓗᒍ ᐊᒻᒪ ᔫᓂ 28-29-ᒥ ᐃᓅᕕᖕᒥ, ᑲᑎᒪᓂᖃᖅᓯᒪᓕᖅᑎᓪᓗᒋᑦ ᐃᓄᐃᑦ-ᑲᓇᑕᒥ ᒐᕙᒪᖓᓂᑦ ᐱᓕᕆᖃᑎᒌᒃᑐᑦ ᑲᑎᒪᔨᕋᓛᖏᑦ ᔫᓐ 27-ᒥ. ᑲᑎᒪᔨᑦ ᓂᕈᐊᖅᖠᓯᒪᓕᓚᐅᖅᐳᑦ ᐱᖓᑦᓯᕐᒥ ᓴᓂᕐᕙᐃᓯᒪᓂᐊᕐᓂᕐᒥᓐᓄᑦ $843-ᒥᓕᐊᓐᑖᓚᓂᒃ ᒐᕙᒪᑐᖃᒃᑯᑦ ᑮᓇᐅᔭᖁᑎᒃᓴᖃᖅᑎᑦᓯᓂᖓᓐᓂᒃ ᑲᓇᑕᒥ ᒐᕙᒪᖓᓂᑦ-ᓄᓇᖃᖅᑳᖅᓯᒪᔪᓕᕆᔨᑦ ᐊᒻᒪᓗ ᐅᑭᐅᖅᑕᖅᑐᒥᐅᓕᕆᔨᖏᑦ ᑲᓇᑕᒥ ᑐᓴᖅᑎᑦᑎᓯᒪᓕᓚᐅᕐᓂᖓᓐᓂᑦ ᑮᓇᐅᔭᐃᑦ ᐊᐅᓚᑦᓯᔾᔪᑎᒃᓴᑦ 2022-ᒧᑦ ᐃᑲᔪᕈᑎᒃᓴᐅᓂᐊᕐᓂᖏᑕ ᐃᒡᓗᓕᕆᓂᕐᒧᑦ ᐱᓕᕆᐊᖑᔪᓄᑦ ᐃᓄᐃᑦ ᓄᓇᓗᒃᑖᖓᓐᓂ, ᑐᓂᐅᖅᑲᐃᕙᓪᓕᐊᓂᕐᒥᒃᑎᒍᑦ ᑮᓇᐅᔭᖁᑎᒃᓴᕆᔭᐅᓂᐊᖅᑐᓂᒃ ᐊᑐᓂᑦ ᓯᑕᒪᐅᓪᓗᑎᒃ ᐊᕕᒃᑐᖅᓯᒪᓂᕆᔭᐅᔪᓄᑦ.
ᑲᑎᒪᔨᓄᑦ ᐃᓚᒋᔭᐅᔪᐃᑦ ᓂᕈᐊᖅᖠᓂᖃᓚᐅᕐᒥᔪᑦ ᓴᓂᕐᕙᐃᓯᒪᓕᕆᐊᒧᑦ $21-ᒥᓕᐊᓐᑖᓚᓂᒃ ᑮᓇᐅᔭᓕᕆᓐᓇᐅᑉ ᐅᑭᐅᖓ 2022-23-ᒥ ᒐᕙᒪᑐᖃᒃᑯᓂᑦ ᑮᓇᐅᖁᔭᖁᑎᒃᓴᐅᔪᓂᑦ ᑲᓇᑕᒥ ᐃᖅᑲᓇᐃᔭᕐᓂᓕᕆᔨᑦ ᐊᒻᒪᓗ ᐃᓅᓯᓕᕆᔨᒃᑯᓐᓂᑦ ᐃᑲᔪᕈᑎᒃᓴᐅᓂᐊᖅᑐᓂᒃ ᐃᓄᐃᑦ ᐃᓕᓐᓂᐊᓕᓵᖅᑐᓕᕆᓂᖅ ᐊᒻᒪᓗ ᐸᐃᕆᕝᕕᓕᕆᔨᑯᓐᓄᑦ (IELCC.) ᑖᒃᑯᐊ ᑮᓇᐅᖁᑎᒃᓴᐃᑦ ᓴᓂᕐᕙᖅᑕᐅᓯᒪᓂᐊᖅᑐᑦ ᐃᓄᐃᑦ ᓄᓇᓕᕆᓂᕐᒥ ᑲᑐᔾᔨᖃᑎᒌᖏᓐᓄᑦ ᐃᓱᒪᓕᐅᕈᑎᐅᓂᐊᖅᓱᑎᒃ ᖃᓄᖅ ᑮᓇᐅᔭᖁᑎᒃᓴᐅᔪᑦ ᑐᓂᐅᖅᑲᒐᐅᕙᓪᓕᐊᓂᐊᕐᓂᖏᓐᓄᑦ, ᑐᕌᕐᕕᒃᓴᖃᖅᑎᑕᐅᓪᓗᑎᒃ ᐃᓄᐃᑦ ᐃᓚᒌᖑᔪᑦ ᐊᑐᐃᓐᓇᐅᕝᕕᐅᓕᖁᓪᓗᒋᑦ ᖁᑦᑎᖕᓂᖅᐹᑎᒍᑦ, ᐊᑭᑐᓗᐊᖖᒋᑦᑐᓂᒃ ᐃᓕᓐᓂᐊᓕᓵᖅᑐᓄᑦ ᐊᒻᒪᓗ ᐸᐃᕆᕝᕕᓕᕆᓂᕐᒥ ᐱᓕᕆᐊᖑᔪᓄᑦ ᓇᓂᕐᒥᐅᑕᐅᒐᓗᐊᖅᐸᑕᓘᓐᓃᑦ.
ᑲᑎᒪᔩᑦ ᐊᖏᖃᑎᒌᒃᓯᒪᓕᓚᐅᖅᑐᑦ ᓴᓂᕐᕙᐃᓯᒪᓕᕆᐊᒥᒃ ᐅᖓᑖᓄᐊᖅᑐᓂᒃ $47-ᒥᓕᐊᓐᑖᓚᓂᑦ ᒐᕙᒪᑐᖃᒃᑯᓐᓂᑦ ᑮᓇᐅᔭᖁᑎᒃᓴᖅᑖᕆᔭᐅᓯᒪᔪᓂᒃ ᑲᓇᑕᒥ ᒐᕙᒪᖓᑦ-ᓄᓇᖃᖅᑳᖅᓯᒪᔪᓕᕆᔨᑦ ᐊᒻᒪᓗ ᐅᑭᐅᖅᑕᖅᑐᒥᐅᑕᓕᕆᔨᖏᓂᑦ ᑲᓇᑕᒥ ᐋᖅᑭᒃᓱᐊᖑᓯᒪᔪᒥᑦ ᐊᖏᒡᓕᒋᐊᖅᑎᑕᐅᓯᒪᓕᖁᓪᓗᒋᑦ ᐊᖑᓇᓱᒃᑏᓄᑦ ᐃᑲᔪᕈᑎᒃᓴᓂᒃ ᑮᓇᐅᔭᖁᑎᑖᖅᐸᓐᓂᐅᔪᓄᑦ ᐊᒻᒪᓗ ᓄᑖᖑᓪᓗᓂ ᐱᓕᕆᐊᖑᓕᖅᓯᒪᔪᒧᑦ ᑕᐃᔭᐅᓪᓗᓂ ᓄᓇᓕᐅᔪᒥ ᓂᕿᒋᔭᒃᓴᓕᕆᓂᕐᒥ ᐱᓕᕆᐊᓄᑦ ᑮᓇᐅᔭᖁᑎᒃᓴᓂᒃ (CFPF) 2022-2024 ᐅᑭᐅᖏᑦ ᐊᑐᖅᑎᓪᓗᒋᑦ.
ᑭᖑᓪᓕᕐᒥᒃᓕ, ᑲᑎᒪᔩᑦ ᐃᓱᒪᓕᐅᖅᓯᒪᓕᓚᐅᖅᑐᑦ ᐃᓱᒪᓕᐅᕈᑎᖃᖅᓯᒪᓂᐊᕐᓂᕐᒥᓐᓄᑦ ᒥᓂᔅᑕᒋᔭᐅᔪᒧᑦ ᐃᖃᓪᓕᕿᔨᒃᑯᑦ ᐊᒻᒪᓗ ᑕᕆᐅᕐᒥᐅᑕᓕᕆᔨᒃᑯᓐᓄᑦ ᐊᒻᒪᓗ ᑲᓇᑕᒥ ᐅᒥᐊᕐᔪᐊᖅᑎᒍᑦ ᓇᐅᑦᓯᖅᑐᐃᔨᒃᑯᓐᓄᑦ ᒪᕐᕉᖕᓂᒃ (2) ᐊᑎᕆᔭᐅᓕᕈᓐᓇᖅᑐᓐᓂᒃ ᓄᑖᖑᓪᓗᑎᒃ ᐅᑭᐅᖅᑕᖅᑐᒥ ᐅᒥᐊᕐᔪᐊᓄᑦ: ᐊᑉᐸᓲᒃ, ᐊᑦᓯᖅᓯᒪᓗᒍ ᐊᒃᐸᑐᖅ ᕿᑭᖅᑕᖓ ᐅᖔᕙ ᑕᕆᐅᖓᓃᑦᑐᖅ, ᐊᒻᒪᓗ ᐃᒻᓇᕐᔪᐊᖅ, ᑐᑭᖃᖅᖢᓂ “ᐃᒻᓈᓗᒃ” ᓴᓪᓕᕐᒥᐅᑎᑐᑦ ᐅᖃᕈᓯᖅ ᐃᓄᕕᐊᓗᒃᑐᓐ.
ᑲᑎᒪᔨᓄᑦ ᐃᓚᒋᔭᐅᔪᐃᑦ ᑐᓵᓂᖃᓚᐅᖅᑐᑦ ᒫᓐᓇᒧᑦ ᑎᑭᑦᓱᒋᑦ ᐱᓕᕆᓂᕆᓯᒪᔭᖏᓐᓂᒃ ᐃᓄᐃᑦ ᑕᐱᕇᑦ ᑲᓇᑕᒥ ᓇᓗᓇᐃᖅᑕᐅᓯᒪᓕᕈᒪᓪᓗᑎᒃ ᓴᐳᔾᔨᔨᐅᓂᕐᒥᓐᓄᑦ ᑕᐃᒪ ᐃᖅᑲᖅᑐᐃᕝᕕᒡᔪᐊᒃᑯᑦ ᑐᓵᓂᖃᓕᖅᐸᑕ ᓴᖑᓐᓂᐊᕈᑎᐅᔪᓄᑦ ᐱᔾᔪᑎᒋᓪᓗᒋᑦ ᒪᓕᒐᕐᔪᐊᑎᒍᑦ ᓱᓕᓪᓚᕆᒃᑑᓂᖓᑕ ᒪᓕᒐᖁᑎᑦ ᐅᐱᒍᓱᖃᑦᑕᕆᐊᖃᕐᓂᕐᒥᒃ ᐃᖅᑭᓖᑦ, ᐃᓄᐃᑦ ᐊᒻᒪᓗ ᐊᓪᓚᖓᔪᑦ ᓱᕈᓯᖏᓂᒃ, ᒪᒃᑯᒃᑐᖏᓂᒃ ᐊᒻᒪᓗ ᐃᓚᒌᖑᔪᓂᒃ. ᒪᓕᒐᖁᑎᑦ ᐱᓗᐊᖅᑐᒥᒃ ᑐᕌᕐᕕᒃᓴᖃᕐᒪᑕ ᖁᕝᕙᖅᑎᑦᑎᓯᒪᓕᕆᐊᒧᑦ ᑐᖖᕝᕕᖁᑎᒋᔭᐅᔪᓂᒃ ᐊᖏᔪᐊᓗᖕᒥᒃ ᓇᓕᖅᑲᕇᒃᑎᑕᐅᔭᕆᐊᖃᕐᓂᖏᑕ ᓄᓇᖃᖅᑳᕐᓯᒪᔪᓕᒫᑦ ᑲᓇᑕᓕᒫᒥ ᑐᕌᖑᑎᑕᐅᓪᓗᑎᒃ ᓴᐃᒻᒪᖃᑎᒌᒍᑕᐅᓯᒪᓕᖁᓪᓗᒍ ᑲᓇᑕᒥ ᑕᐃᒪᖓᓂᑐᖃᖅ ᐋᓐᓂᖅᑎᕆᖃᑦᑕᖅᓯᒪᓂᐅᔪᓄᑦ ᒐᕙᒪᖃᐅᓯᖅᑖᖅᑎᑦᓯᓪᓗᑎᒃ ᑲᑎᓯᒪᓕᖅᑎᑦᓯᓂᕐᒧᑦ ᒪᓕᒐᖁᑎᐅᓕᓚᐅᖅᑐᓂᑦ ᓱᕈᖅᐸᓪᓕᐊᔾᔪᑎᐅᓪᓗᑎᒃ ᓄᓇᖃᖅᑳᖅᓯᒪᔪᐃᑦ ᐅᖃᐅᓯᖏᓐᓄᑦ, ᐱᐅᓯᑐᖃᖏᓐᓄᑦ ᐊᒻᒪᓗ ᑭᓇᐅᓂᖏᓐᓄᑦ ᐊᒻᒪᓗ ᓇᓗᓇᐃᒻᒪᕆᒃᑐᒥᒃ ᑭᖑᕚᕇᒃᐸᓪᓕᐊᔪᓄᑦ ᐊᒃᓱᕈᕐᓇᖅᑐᒃᑰᕈᑎᐅᕙᓕᖅᑐᓂᑦ ᐊᒻᒪᓗ ᓈᒻᒪᖖᒋᑦᑐᑎᒍᑦ ᐊᒃᑐᐃᓯᒪᓂᐅᔪᓂᒃ ᑕᒪᐃᓐᓂᒃ ᐃᖅᑭᓕᖕᓂᒃ, ᐊᓪᓚᖓᔪᓂᒃ ᐊᒻᒪᓗ ᐃᓄᖕᓂᒃ, ᑕᐃᒪᓗ ᐅᖓᑎᓗᐊᖓᓄᑦ ᐱᔾᔪᑎᖃᖅᓱᑎᒃ ᐃᓕᕆᓂᐅᓕᖅᓯᒪᔪᓄᑦ ᓄᓇᖃᖅᑳᖅᓯᒪᔪᐃᑦ ᓱᕈᓯᖏᓐᓄᑦ ᐊᒻᒪᓗ ᒪᒃᑯᒃᑐᖏᓐᓄᑦ ᓱᕈᓯᓕᕆᓂᕐᒥ ᐱᓕᕆᔾᔪᑎᐅᔪᑎᒍᑦ ᑕᐃᒪᓗ ᐊᓯᐅᔨᕙᓪᓕᐊᔾᔪᑎᐅᓕᒃᑲᓐᓂᖅᑐᓄᑦ ᐅᖃᐅᓯᑐᖃᖏᓐᓂᒃ, ᐱᐅᓯᑐᖃᖏᓐᓂᒃ ᐊᒻᒪᓗ ᑭᓇᐅᓂᖏᓐᓂᒃ. ᑭᓯᐊᓂᓗ, ᑕᑯᒃᓴᐅᓇᓂ ᐱᔾᔪᑎᐅᓕᖅᓯᒪᓂᖓᑕ ᑯᐃᐸᒃ ᓴᖑᓐᓂᐊᕈᑎᖃᕐᓂᖓᑕ ᒪᓕᒐᖁᑎᓂ ᐅᖃᖅᑕᐅᓯᒪᔪᑦ ᒪᓕᒐᕐᔪᐊᓂᒃ ᒪᓕᖖᒋᓐᓂᕋᖅᓱᓂᔾᔪᒃ ᑐᓗᖅᑕᕐᕕᐅᓕᒃᑲᓐᓂᑐᐃᓐᓇᕐᒪᑦ ᓴᐃᒻᒪᖃᑎᒌᒃᓯᒪᓕᖁᔨᓂᕐᒧᑦ ᑐᕌᕐᕕᐅᑎᑕᐅᔪᓄᑦ ᒪᓕᒐᖁᑎᐅᔪᒥ. ᑐᒃᓯᕋᐅᑎᐅᓯᒪᔪᑦ ᑐᓵᔭᐅᓂᐊᖅᑐᑦ ᓯᑦᑎᐱᕆᒥ.
ᐊᐃᑉᐱᕐᒥ ᐊᒻᒪᓗ ᐱᖓᑦᓯᕐᒥ ᑲᑎᒪᓂᖃᖅᓱᑎᒃ, ᑲᑎᒪᔨᓄᑦ ᐃᓚᒋᔭᐅᔪᐃᑦ ᑐᓵᓂᖃᓚᐅᕐᒥᔪᑦ ᒫᓐᓇᒧᑦ ᑎᑭᑦᓱᒋᑦ ᐱᓕᕆᓂᐅᔪᓄᑦ ᒪᑯᓂᖓ:
- ᓄᑖᖑᓪᓗᓂ ᓂᕿᑦᑎᐊᕙᓐᓂᒃ ᓂᕿᖃᖃᑦᑕᕐᓂᓕᕆᓂᖅ ᐅᑭᐅᖅᑕᖅᑐᖓᓂ ᑲᓇᑕ ᒪᓕᑦᓯᐊᖅᑎᑕᐅᓂᖏᑦ ᐊᒻᒪᓗ ᑮᓇᐅᔭᓕᕆᔾᔪᑎᓂᒃ ᕿᒥᕐᕈᐃᔨᑦ ᑲᑎᒪᔨᕋᓛᖏᑦ, ᐃᓚᖃᖅᓱᑎᒃ ᓯᑕᒪᐅᓪᓗᑎᒃ ᐃᓄᐃᑦ ᐱᔾᔪᑎᖃᖅᑎᒋᔭᖏᓂᒃ ᐱᓕᕆᐊᒃᓴᖃᖅᑎᑕᐅᓯᒪᔪᓂᒃ ᖃᐅᔨᒋᐊᖅᑎᐅᓂᕐᒧᑦ ᓴᖅᑮᔪᓐᓇᑦᓯᐊᖅᑑᓂᕐᓄᑦ ᐃᓱᒫᓗᒍᑎᖃᕐᕕᐅᔪᓄᑦ ᑮᓇᐅᔭᑎᒍᑦ ᐃᑲᔫᓯᐊᖅᑖᕐᑎᑕᐅᕙᒃᑐᓂᑦ ᒐᕙᒪᑐᖃᒃᑯᑦ ᐱᓕᕆᐊᖓᓐᓂ
- ᐋᖅᑭᒃᓱᐃᓂᖅ ᑲᓇᑕᒥ ᐃᓄᐃᑦ ᑕᕆᐅᓕᕆᓂᕐᒧᑦ ᐃᓕᖓᓐᓂᕆᔭᖏᓐᓄᑦ ᑎᑎᕋᖅᑕᐅᓯᒪᔪᓂᒃ, ᑐᕌᖓᑎᑕᐅᓯᒪᓪᓗᑎᒃ ᕿᒥᕐᕈᐃᓂᐊᕐᓗᑎᒃ ᑕᕆᐅᓕᕆᓂᕐᒥ ᐊᐅᓚᑦᓯᓂᐅᔪᓂᒃ, ᐱᓕᕆᓂᖃᕐᕕᐅᔪᓂᑦ ᐱᔭᐅᓯᒪᓕᕆᐊᖃᖅᑐᓄᑦ, ᖃᐅᔨᓴᐃᖃᑦᑕᕐᓂᕐᓂ ᐊᒻᒪᓗ ᐅᑭᐅᖅᑕᖅᑐᒥᒃ ᐊᐅᓚᑦᓯᔨᐅᓂᕐᒧᑦ
- ᐃᓄᐃᑦ ᑕᐱᕇᑦ ᑲᓇᑕᒥ (ITK) ᒫᓐᓇᒧᑦ ᑎᑭᑦᓱᒋᑦ ᑐᒃᓯᕋᐅᑎᐅᓯᒪᔪᓄᑦ ᑮᓇᐅᔭᖁᑎᒃᓴᖅᑖᕈᒪᓪᓗᑎᒃ ᒐᕙᒪᑐᖃᒃᑯᓐᓂᑦ ᓯᕗᕐᖓᓂ 2023-ᒥ ᑮᓇᐅᔭᖁᑎᒃᓴᖅᑖᕐᐸᓐᓂᕐᓂᒃ ᐊᐅᓚᑦᓯᔾᔪᑎᒃᓴᐅᓂᐊᖅᑐᓂᒃ, ᕿᓂᓕᖅᓯᒪᓂᕐᒧᑦ ᑮᓇᐅᔭᖁᑎᒃᓴᓂᒃ ᐃᓗᐃᒃᑲᐅᓪᓗᒍ ᑮᓇᐅᔭᖁᑎᖃᖅᑎᑕᐅᓯᒪᓕᕈᑎᒃᓴᓂᒃ ᐱᓕᕆᓂᖃᕐᓂᒥᓐᓄᑦ ᓄᖑᑎᑕᐅᓯᒪᓕᖁᓪᓗᒍ ᐃᓄᐃᑦ ᐳᕙᒡᓗᓕᖃᑦᑕᕐᓂᖓᑦ 2030 ᐅᑭᐅᖓᑕ ᓯᕗᕐᖓᓂ
- ᖃᓄᐃᑉᐱᑖ? ᑲᓇᑕᒥ ᐃᓄᐃᑦ ᐋᓐᓂᐊᖅᓯᐅᕐᑎᓕᕆᓂᕐᒥ ᖃᐅᔨᓴᐃᓂᖓᑦ. ᑐᑭᓯᒋᐊᕐᕕᒃᓴᖁᑎᑦ ᑲᑎᖅᓱᐊᖑᕙᓪᓕᐊᔪᑦ ᐃᓄᕕᐊᓗᐃᑦ ᐊᕕᒃᑐᖅᓯᒪᓂᖓᓂ ᐱᔭᕇᖅᑕᐅᓯᒪᓕᖅᑐᑦ, ᐊᒻᒪ ᖃᐅᔨᓴᐃᓂᐅᔪᖅ ᐱᒋᐊᖅᑎᑕᐅᓵᓚᐅᖅᑎᓪᓗᒍᓕ ᓄᓇᑦᓯᐊᕗᒻᒥᓂ
ᐃᓄᐃᑦ ᑕᐱᕇᑦ ᑲᓇᑕᒥ ᑲᑎᒪᔨᖏᑦ ᑲᑎᒪᓂᖃᒃᑲᓐᓂᕈᒫᖅᑐᑦ ᓯᑦᑎᐱᕆ 2022-ᒥ.