ᐱᖓᑦᓯᖅ ᔫᓂ 2, 2021 – ᐋᑐᕙ, ᐋᓐᑎᐊᕆᐅ
6 ᐅᑭᐅᑦ ᐅᓪᓗᒥ ᓈᓯᒪᓕᖅᐳᑦ, ᑲᓇᑕᒥ ᑭᓪᓕᓯᓂᐊᖅᑎᒃᑯᑦ (TRC) ᑐᓴᖅᑎᑦᑎᓯᒪᓕᓚᐅᕐᕕᖓᑦᑕ ᓴᖅᑮᓯᒪᓕᕐᓂᕐᒥᓐᓄᑦ 94-ᓂᒃ ᐱᓕᕆᐊᖑᓕᖁᓪᓗᒋᑦ ᑎᓕᐅᕆᓯᒪᔾᔪᑎᒥᓐᓂᒃ ᑐᓴᖅᑎᑕᐅᓯᒪᓂᕐᒥᓐᓂᑦ ᐊᒥᓱᑲᓪᓚᒻᒪᕆᐅᓪᓗᑎᒃ ᑕᐅᓴᓐᑎᖏᓐᓃᑦᑐᓂᑦ ᐊᓂᒍᐃᓯᒪᔪᕕᓂᕐᓂᑦ ᐃᓕᓐᓂᐊᕆᐊᖅᐸᓚᐅᕐᓂᕐᒥᓐᓂᑦ. ᑐᓵᓚᐅᖅᑐᑦ ᓴᖅᑮᓚᐅᕐᒪᑕ ᐅᖃᐅᓯᒃᓴᒥᓐᓂᒃ ᐱᔾᔪᑎᖃᖅᓱᑎᒃ ᑕᐃᒃᑯᓂᖓ ᓇᖕᒥᓂᖅ ᐅᖃᐅᓯᒃᓴᒥᓐᓂᒃ ᓴᖅᑮᔪᓐᓇᖖᒋᑦᑐᓂᒃ.
ᑕᕝᕙᓂ ᐱᓇᓱᐊᕈᓯᕐᒥ, ᓄᓇᕐᔪᐊᕆᔭᑦᑎᓐᓂ ᓴᖅᑮᓯᒪᓕᕐᕕᐅᓕᓚᐅᕐᒥᔪᒍᑦ ᑐᓴᕐᓂᖖᒋᒻᒪᕆᒃᑑᓪᓗᑎᒃ ᓱᓕᓪᓗᑎᒃ ᐃᓕᓐᓂᐊᕆᐊᖅᐸᓚᐅᖅᑐᑦ ᐊᑐᖅᓯᒪᔭᕕᓂᖏᓂᒃ ᑐᓴᖅᑎᑕᐅᒐᑦᑕ ᑲᓇᑕᒥ ᖃᓄᐃᓐᓂᐅᓚᐅᖅᑐᕕᓂᕐᓄᑦ 215-ᓂᑦ ᓱᕈᓰᑦ ᐃᓗᕕᖏᓂᒃ ᓇᓂᔭᐅᒻᒪᑕ ᓇᓗᓇᐃᒃᑯᑕᖃᖅᑎᑕᐅᓇᑎᒃ ᐊᒥᓱᑲᓪᓚᐅᓪᓗᑎᒃ ᐃᓗᕕᖏᑦ ᓯᓚᑖᓂ ᑎᑭᒻᓘᑉᔅ ᑎ ᓯᒃᕖᐸᒥᒃ ᐃᖅᑭᓖᑦ ᓄᓇᖃᕐᕕᒋᔭᖓᓂᑦ ᐳᕈᑎᔅ ᑲᓚᒻᐱᐊᒥ.
ᐆᒻᒪᑎᑦᑎᓐᓂ ᐊᖏᔪᐊᓗᒻᒥᒃ ᓇᒡᓕᒍᓱᖕᓂᕐᒥᒃ ᐃᒃᐱᓐᓂᐊᕕᒋᕙᖅᐳᑦ ᐃᓄᐊᖅᑕᐅᔪᕕᓃᑦ, ᐃᓚᒋᔭᖏᓪᓗ ᐊᒻᒪᓗ ᓄᓇᖅᑲᑎᒌᒃᑐᑦ. ᐃᓄᐃᑦ ᓄᓇᖓᓐᓂᕐᒥᐅᓕᒫᑦ ᐊᒻᒪᓗ ᑲᓇᑕᒥᐅᑦ ᐃᓄᖏᑦ ᕿᒃᓵᖃᑎᖃᓕᖅᓯᒪᕗᑦ ᓄᑖᖑᓪᓗᓂ ᕿᒃᓵᕈᑎᖃᓕᖅᓯᒪᓂᖏᑕ ᐃᖅᑭᓖᑦ ᐊᒻᒪᓗ ᐊᓪᓚᖑᔪᑦ ᑕᒪᑐᒥᖓ ᓈᒻᒪᖖᒋᓪᓚᕆᓗᐊᖅᑐᓂᒃ ᓴᖅᑭᑕᐅᓯᒪᓕᓚᐅᖅᑐᓄᑦ ᐱᓗᐊᒻᒪᕆᒃᑑᓪᓗᓂ ᑕᑯᕋᓐᓂᖖᒋᑦᑐᑎᒍᑦ ᓇᓗᓇᐃᔭᖅᑕᐅᓯᒪᔪᓂᑦ.
ᑖᒃᑯᓂᖓ ᑐᓴᖅᑎᑕᐅᓯᒪᓕᕐᓂᕐᓂᑦ ᐊᒥᓱᑦ ᐃᓄᐃᑦ ᐋᓐᓂᐊᕈᑎᒋᔭᑐᖃᒥᓐᓂᒃ ᓲᕐᓗ ᑭᓕᖅᓯᒪᓂᕕᓂᖏᑦ ᐊᖕᒪᖅᑎᑕᐅᒃᑲᓐᓂᕈᑎᓂᒃ ᐊᑐᓕᖅᓯᒪᖃᑕᐅᒻᒪᑕ. ᕿᒃᓵᕈᑎᖃᕐᓂᖅ ᐃᓅᓯᕐᒥ ᐊᑐᖅᑕᐅᕙᒻᒪᑦ ᑕᒪᐃᓐᓂᑦ. ᓲᕐᓗᑉᑕᐅᖅ ᓂᖖᒐᒍᑎᖃᖅᓯᒪᓂᖅ ᐊᑐᖅᑕᐅᕙᒻᒥᔪᖅ. ᓱᓕᓪᓚᕆᖕᓂᖓᓂᑦ ᑕᒪᑐᒥᖓ ᐊᒃᑐᖅᑕᐅᓯᒪᔭᕆᐊᖃᕐᒥᔪᒍᑦ. ᐊᓯᔾᔨᖅᓯᒪᓕᕈᑎᒋᔭᕆᐊᖃᖅᑕᕗᑦ. ᑲᓇᑕᐅᑉ ᓄᓇᕐᔪᐊᖓᑦᑕᐅᖅ ᐊᓯᔾᔨᖅᓯᒪᓕᕆᐊᖃᕐᒥᔪᖅ ᒪᓕᒃᓗᒋᑦ ᖃᐅᔨᒪᔭᕗᑦ. ᐃᓄᐃᑦ ᐊᒻᒪᓗ ᑕᒪᕐᒥᒃ ᓄᓇᖃᖅᑳᖅᓯᒪᔪᑦ ᑕᒪᑐᒥᖓ ᓱᓕᔪᒥᒃ ᖃᐅᑕᒫᑦ ᐃᓅᓯᕐᒥᓐᓂ ᐊᑐᖅᐸᖕᒪᑕ. ᑲᔪᓯᓪᓗᑕ ᐃᖏᕐᕋᕙᓪᓕᐊᕗᒍᑦ ᐱᓱᒃᓱᑕ ᓴᐃᒻᒪᖃᑎᒌᒃᓯᒪᓕᕐᓂᒃᓴᒧᑦ ᑭᓯᐊᓂᓗ ᐊᑐᕆᐊᒥᒃ ᐊᔪᕐᓇᖅᑐᒻᒪᕆᐊᓘᕗᖅ.
ᓱᒃᑲᐃᑦᑑᒐᓗᐊᖅᓱᓂ ᑕᒪᒃᑯᓄᖓ ᐱᓕᕆᐊᕆᔭᑦᑎᓐᓂᒃ ᓯᕗᒻᒧᒃᐸᓪᓕᐊᓂᖃᖅᑎᑦᓯᕗᒍᑦ.
ᓄᓇᑦᓯᐊᕗᒻᒥᑦ ᐃᓄᐃᑦ ᐃᓚᒋᔭᐅᖃᑕᐅᓚᐅᖖᒋᒻᒪᑕ ᓄᓇᓕᕆᓂᕐᒥ ᐊᖏᕈᑎᒋᔭᐅᓯᒪᔪᓄᑦ ᑐᖖᒐᕝᕕᐅᑎᑕᐅᓪᓗᑎᒃ ᑲᓇᑕᒥ ᑭᒡᓕᓯᓂᐊᖅᑎᒃᑯᑦ ᑎᒥᖓᓐᓄᑦ, ᐅᕝᕙᓘᓐᓃᑦ ᒪᒥᐊᕝᕕᐅᓚᐅᖅᓯᒪᓂᖏᑕ ᐊᓂᒎᑎᓯᒪᔪᑦ 13-ᖑᓕᖅᑐᑦ ᐅᑭᐅᑦ ᑕᕝᕙᓂ ᑕᖅᑭᒥ ᓈᓯᒪᓂᐊᓕᖅᑐᓂᑦ. ᑕᐃᒪᓐᓇᑦᓴᐃᓐᓇᖅ ᐊᑐᓚᐅᖅᓯᒪᔭᑦᑎᓐᓂᒃ ᑲᓇᑕᓕᒫᒥ ᐊᓂᒍᐃᓯᒪᓂᑦᑎᓐᓂᑦ ᐊᑐᖅᓯᒪᖃᑕᐅᒻᒪᑕ ᑭᓯᐊᓂᓗ ᐊᒃᓱᕈᕐᓇᕐᓂᖅᓴᒃᓂᒃ ᐊᑯᓂᐅᓂᖅᓴᒥᒃᓗ ᐱᓕᕆᐊᖑᓕᖁᓪᓗᒋᑦᑕᐅᖅ ᑐᒃᓯᕋᐅᑎᖃᕆᐊᖃᓚᐅᖅᑐᑦ. 2017-ᒥ, ᐃᓚᖓᓂᒃ ᐃᓕᑕᕆᔭᐅᓯᒪᓕᓚᐅᖅᑐᑦ ᐋᓐᓂᕐᓇᖅᑐᓂᒃ ᐊᑐᖅᑎᑕᐅᓯᒪᓂᕕᓂᖏᓐᓄᑦ ᑕᐃᒪ ᑲᓇᑕᒥ ᐊᖏᔪᖅᑳᕐᔪᐊᖅ ᒪᒥᐊᕝᕕᖃᕐᒪᑦ ᓄᓇᑦᓯᐊᕗᒻᒥᐅᓄᑦ ᐊᓂᒍᐃᓯᒪᔪᓄᑦ ᐃᓕᓐᓂᐊᕆᐊᖅᐸᓚᐅᕐᓯᒪᒻᒥᔪᓄᑦ.
ᐃᓄᐃᑦ ᑲᔪᓯᑎᑦᓯᓯᒪᕗᑦ ᓴᐃᒻᒪᖃᑎᒌᖅᓯᒪᓕᕐᕕᒃᓴᒥᒃ ᐱᓕᕆᐊᖑᔭᕆᐊᓖᑦ ᓯᕗᓪᓕᖅᐸᐅᑎᑕᐅᓯᒪᖁᓪᓗᒋᑦ ᐱᓕᕆᐊᖃᕐᓂᐅᔪᓂ ᐃᓄᐃᑦ ᒐᕙᒪᑐᖃᒃᑯᑦ ᐱᓕᕆᐊᖃᖃᑎᒌᖕᓂᖏᓐᓄᑦ ᑲᑎᒪᔨᕋᓛᑎᒍᑦ. ᓯᕗᒻᒧᒋᐊᖅᓯᒪᓕᕈᒪᒐᑦᑕ ᒐᕙᒪᖃᐅᓯᐅᕙᓚᐅᖅᓯᒪᔪᓂᑦ ᐊᒻᒪᓗ ᐊᑭᕋᖅᑐᐃᓂᒃᑯᑦ ᒪᓕᒐᖁᑎᒋᔭᖏᓐᓂᑦ ᑲᓇᑕᐅᑉ ᒐᕙᒪᖓᓐᓂᑦ ᐊᓯᕈᐃᔾᔪᑕᐅᓯᒪᔪᓂᑦ ᐃᓄᖁᑎᑦᑎᓐᓂ, ᐊᒻᒪᓗ ᐱᓕᕆᓂᖃᓕᕈᒪᖁᔨᓪᓗᑕ ᐊᒻᒪᓗ ᖁᕝᕙᖅᑎᑕᐅᒋᐊᖅᓯᒪᓕᖁᓪᓗᒋᑦ ᐊᖏᓂᖅᓴᐅᔪᒥᒃ ᐃᓕᓐᓂᐊᖅᑎᑦᓯᓂᐅᕙᒃᑐᑦ ᑲᓇᑕᒥᐅᓕᒫᓂ.
ᖃᓂᑦᑐᑯᓘᓕᕋᑦᑕ ᑎᑭᓯᒪᓕᕐᕕᒃᓴᑦᑎᓐᓄᑦ ᐱᓯᒪᓕᕐᓂᐊᕐᓗᒋᑦ ᑲᓇᑕᒥ ᑭᒡᓕᓯᓂᐊᖅᑎᒃᑯᑦ ᑎᓕᐅᕆᔾᔪᑎᒋᓯᒪᔭᖓᓄᑦ ᐱᓕᕆᐊᖑᔪᒃᓴᑦ 43-ᒧᑦ – ᐃᓗᐃᒃᑲᐅᔪᒃᑯᑦ ᑎᒍᓯᓯᒪᓕᕐᓂᒃᓴᒥᒃ ᐊᒻᒪᓗ ᐊᑐᓕᖅᑎᑦᓯᓯᒪᓂᒃᓴᒥᒃ ᔪᓇᐃᑎᑦ ᓃᓴᒃᑯᑦ ᓇᓗᓇᐃᖅᓯᓯᒪᔾᔪᑎᖓᓂᒃ ᓄᓇᖃᖅᑳᖅᓯᒪᔪᐃᑦ ᐱᔪᖕᓇᐅᑎᖃᕐᓂᖏᓐᓄᑦ. ᒪᓕᒐᒃᓴᖅ C-15 ᒫᓐᓇᐅᔪᖅ ᑲᓇᑕᒥ ᒥᓂᔅᑕᐃᑦ ᑲᑎᒪᔨᑎᒎᖅᐸᓪᓕᐊᑎᑕᐅᖕᒪᑕ.
ᐊᒻᒪᓗᑦᑕᐅᖅ ᑕᕝᕙᓂᑦᓴᐃᓐᓇᖅ ᐱᓇᓱᐊᕈᓯᕐᒥ, ᑎᑭᓯᒪᓕᕐᓂᐊᕋᑦᑕ ᐊᖏᔫᑎᐅᓪᓗᓂ ᐱᓕᕆᐊᖑᓯᒪᓕᕐᓂᐅᔪᒧᑦ ᑎᓕᐅᕆᔾᔪᑎᐅᓯᒪᓪᓗᓂ ᐱᓕᕆᐊᖑᓕᖁᓪᓗᒋᑦ ᐱᓕᕆᐊᖑᔪᒃᓴᑦ 41-ᒥᒃ – ᑲᓇᑕᓕᒫᒥ ᑐᑭᓯᐅᒪᓕᕋᓱᐊᕐᓱᑎᒃ ᖃᐅᔨᓴᐃᓂᐅᔪᓄᑦ ᐊᓯᐅᔨᔭᐅᓯᒪᔪᑦ ᐊᒻᒪᓗ ᐃᓄᐊᖅᑕᐅᓯᒪᔪᑦ ᓄᓇᖃᖅᑳᕐᓯᒪᔪᐃᑦ ᐊᕐᓇᖏᑦ ᐊᒻᒪᓗ ᓂᕕᐊᖅᓯᐊᖏᑦ (MMIWG) ᓴᖅᑭᑕᐅᑎᓪᓗᒋᑦ ᑲᓇᑕᒥ ᐱᓕᕆᐊᖑᔪᓄᑦ ᐸᕐᓇᐅᑏᑦ ᐊᑐᓕᖅᑎᑕᐅᖁᓪᓗᒋᑦ 231-ᖑᔪᑦ MMIWG-ᓄᑦ ᑎᓕᐅᕆᓯᒪᔾᔪᑎᑦ ᐃᑲᔪᖅᑐᒐᐅᓯᒪᓕᖁᔨᓪᓗᑎᒃ, ᐱᖃᓯᐅᑎᓪᓗᒋᑦ 46-ᖑᔪᑦ ᐃᓄᖕᓄᑦ ᑐᕌᖓᓪᓗᑎᒃ ᑎᓕᐅᕆᓯᒪᔾᔪᑎᑦ ᐃᑲᔪᖅᑐᒐᐅᓯᒪᓕᖁᓪᓗᒋᑦ.
ᑲᓇᑕᒥ ᑭᒡᓕᓯᓂᐊᖅᑎᒃᑯᑦ ᑎᓕᐅᕆᓯᒪᔾᔪᑎᖏᑦ ᐱᓕᕆᐊᖑᓕᖁᓪᓗᒋᑦ ᐊᒻᒪᓗ MMIWG-ᓄᑦ ᑲᓇᑕᒥ ᑐᑭᓯᐅᒪᓕᕆᐊᕈᑎᑦ ᖃᐅᔨᓴᐃᓂᐅᔪᓂᑦ ᑎᓕᐅᕆᓯᒪᔾᔪᑎ ᐃᑲᔪᖅᑐᒐᐅᓯᒪᓕᖁᔨᓪᓗᑎᒃ ᐱᒋᐊᖖᒐᕐᕕᖃᕐᒪᑕ ᐊᑐᖅᑕᐅᓯᒪᔪᓄᑦ ᐊᒻᒪᓗ ᐊᓂᒍᐃᓯᒪᔪᑦ ᐅᖃᐅᓯᕆᓯᒪᔭᖏᓐᓄᑦ, ᐋᓐᓂᖅᑕᐅᓯᒪᔪᓄᑦ ᐊᒻᒪᓗ ᐃᓚᒌᖑᔪᓄᑦ, ᐊᒻᒪᓗ ᐃᓗᐃᒃᑲᐅᓗᒋᑦ ᐊᑐᓕᖅᑎᑕᐅᔭᕆᐊᖃᕐᒪᑕ ᐱᕈᖅᑎᑦᑎᓂᐊᕈᑦᑕ ᐅᒃᐱᕆᑐᕋᐅᓐᓂᕐᒥᒃ, ᐃᑲᔪᖅᑐᐃᓯᒪᓂᐊᕈᑦᑕ ᑭᒃᑯᑐᐃᓐᓇᑦ ᐱᔪᖕᓇᐅᑎᖏᓐᓂᒃ, ᐊᒻᒪᓗ ᓯᕗᒻᒧᒋᐊᖅᑎᑕᐅᓂᐊᖅᐸᑕ ᓴᐃᒻᒪᖃᑎᖃᖅᓯᒪᓕᕐᓂᒃᓴᑦ ᓄᓇᖃᖅᑳᕐᓯᒪᔪᓂᒃ.
ᓱᓕ ᑎᑭᓯᒪᕝᕕᒋᖖᒋᑕᕗᑦ. ᓱᓕ ᐱᓕᕆᐊᖃᖃᑎᒌᖕᓂᐅᔪᒃᓴᓂᒃ ᐱᕈᖅᑎᑦᑎᕙᓪᓕᐊᒐᑦᑕ ᐅᕙᑦᑎᓐᓄᑦ ᐃᑲᔪᕈᑎᐅᓕᕐᓂᐊᖅᑐᓂᒃ ᓯᕗᒻᒧᒋᐊᕐᕕᒃᓴᑦᑎᓐᓄᑦ ᐱᓕᕆᐊᖃᖃᑎᒌᖕᓂᖅᑎᒍᑦ ᐊᒻᒪᓗ ᐅᐱᒋᑐᕋᐅᑦᓯᐊᕐᓂᖅᑎᒍᑦ. ᓱᓕ ᑎᓕᐅᕆᔪᒍᑦ ᐱᓕᕆᐊᖑᓕᖁᔨᓪᓗᑕ. ᑕᒪᕐᒥᒃ ᑲᓇᑕᒥᐅᖑᔪᑦ ᐱᓕᕆᐊᕆᔭᐅᓕᖁᓗᒋᑦ ᑎᓕᐅᕆᓯᒪᔭᕆᐊᖃᕐᒥᔪᑦ.
ᐃᑲᔪᖅᑎᒃᓴᐃᑦ ᐊᑐᐃᓐᓇᐅᕗᑦ ᐃᑲᔪᖅᑎᖃᕆᐊᖃᕈᕕᑦ
ᑲᓇᑕᒥ ᐃᖅᑭᓖᑦ ᐃᓕᓐᓂᐊᕆᐊᖅᐸᓚᐅᖅᓯᒪᔪᑦ ᑐᐊᕕᐅᕐᓇᖅᑐᖃᖅᐸᑦ ᐅᖄᓚᕝᕕᒃᓴᖅ ᐅᕙᓂ 1-866-925-4419 (24/7)
ᖃᓄᐃᖖᒋᑦᓯᐊᖁᔨᓂᖅ ᓂᕆᐅᖕᓂᖃᑦᓯᐊᖁᔨᓪᓗᑎᒃ ᐅᖄᓚᕝᕕᒃᓴᖅ ᐅᕙᓂ 1-855-242-3310 (24/7) – ᐃᓄᒃᑎᑐᑦ ᐅᖃᓪᓚᒃᕕᐅᔪᓐᓇᖅᑐᓂᒃ ᐱᑕᖃᖅᑎᑦᑎᔪᑦ