ᔫᓚᐃ 13, 2021
ᐃᓄᐃᑦ ᑕᐱᕇᒃᑯᑦ ᑲᓇᑕᒥ ᑲᑎᒪᔨᖏᑦ ᑲᑎᒪᓂᖃᓚᐅᖅᐳᑦ ᖃᕆᑕᐅᔭᑎᒍᑦ ᔫᓂ 29-30 ᐊᒻᒪᓗ ᑐᖖᒐᓱᒃᑎᑦᓯᓪᓗᑎᒃ ᐳᕋᐃᐊᓐ ᐹᑐᓪᒥ, ᓄᑖᖑᓪᓗᓂ ᑲᓇᑕᒥ ᒪᒃᑯᒃᑐᑦ ᐃᓄᐃᑦ ᑲᑎᒪᔨᕐᔪᐊᖏᓐᓄᑦ ᐊᖏᔪᖅᑳᕆᔭᐅᓕᖅᑐᒥᒃ. ᑲᑎᒪᔩᑦ ᐃᓚᒋᔭᐅᓚᐅᖅᐳᑦ ᐸᕐᓇᐅᑎᒋᓯᒪᓪᓗᒋᑦ ᕿᒥᕐᕈᓂᐅᔪᓄᑦ ᐃᓄᐃᑦ ᑕᐱᕇᒃᑯᑦ ᑲᓇᑕᒥ ᐊᕕᒃᑐᖅᓯᒪᓂᐅᔪᓄᑦ ᑮᓇᐅᔭᖁᑎᒃᓴᐅᓂᐊᖅᑐᓂᒃ ᓴᓂᕐᕙᐃᓯᒪᓕᕐᓂᕐᒧᑦ ᐋᖅᑭᒃᓱᖅᑕᐅᓯᒪᔪᓂᒃ, ᒪᓕᒡᓗᒋᑦ ᑕᐃᒪ ᐋᖅᑭᒃᓱᐊᖑᓯᒪᓕᖅᑐᑦ ᓈᒻᒪᒋᔭᐅᓯᒪᓕᓚᐅᕐᑎᓪᓗᒋᑦ 2019-ᒥ. ᑖᒃᑯᐊ ᐋᖅᑭᒃᓱᖅᑕᐅᓯᒪᓕᖅᑐᑦ, ᑐᖖᒐᕝᕕᖃᖅᑎᑕᐅᓪᓗᑎᒃ 35%-ᒧᑦ ᑐᖖᒐᕝᕕᖃᖅᑎᑦᑎᓂᐊᕐᓂᕐᒧᑦ ᐊᒻᒪᓗ 65%-ᓄᑦ ᐊᑐᓂ ᖃᓄᑎᒋ ᑮᓇᐅᔭᓕᐅᕐᓂᕆᔭᐅᔪᓄᑦ ᓴᓂᕐᕙᐃᓯᒪᓕᕐᓂᐊᕐᓂᕐᓄᑦ, ᐊᑐᖅᑕᐅᓚᐅᖅᐳᑦ ᑐᓴᖅᑎᑕᐅᓯᒪᓕᖁᓪᓗᒋᑦ ᐃᓄᐃᑦ ᐃᓱᒪᓕᐅᕈᑎᓕᐅᖅᑎᐅᕙᒃᑐᑦ ᑐᕌᖓᔪᓄᑦ ᑮᓇᐅᔭᖁᑎᒃᓴᓂᒃ ᐱᑎᑕᐅᓯᒪᓕᓚᐅᕐᓂᖏᓐᓄᑦ, ᐃᓚᖃᖅᑎᓪᓗᒋᑦ ᓄᕙᒡᔪᐊᕐᓇᖅ-19-ᒧᑦ ᓄᓇᖃᖅᑳᖅᓯᒪᔪᐃᑦ ᓄᓇᓕᒋᔭᖏᑕ ᐃᑲᔪᕈᑎᒃᓴᖅᑖᖅᑎᑕᐅᓯᒪᓂᖏᑦᑎᒍᑦ ᑮᓇᐅᔭᓂᒃ.
ᑲᑎᒪᔩᑦ ᐃᓱᒪᓕᐅᕈᑎᖃᖅᓯᒪᓕᓚᐅᖅᑐᑦ ᑐᑭᓯᒋᐊᕐᕕᒃᓴᖁᑎᓂᒃ ᑲᑎᖅᓱᐃᓂᕐᒧᑦ ᖃᓄᐃᑉᐱᑕ? ᐱᓕᕆᐊᒧᑦ ᑲᓇᑕᒥ ᐃᓄᐃᑦ ᐋᓐᓂᐊᖃᓕᖅᑕᐃᓕᒪᔪᓕᕆᓂᕐᒧᑦ ᖃᐅᔨᓴᐃᓂᐅᔪᓄᑦ (QNIHS) ᐱᓕᕆᐊᖑᔪᑦ ᐊᑕᐅᑦᓯᒃᑰᖅᓯᒪᓂᐊᖖᒋᓐᓂᖏᑕ ᓯᑕᒪᐅᓪᓗᑎᒃ ᐊᕕᒃᑐᖅᓯᒪᓂᐅᔪᓂ ᓯᕗᓪᓕᖅᐹᒥᒃ ᑲᑎᖅᓱᐃᓂᖃᖅᓯᒪᓕᖅᐸᑕ ᑐᑭᓯᒋᐊᕐᕕᒃᓴᖁᑎᓂᒃ. ᑕᒪᕐᒥᒃ ᐃᓄᕕᐊᓗᐃᑦ ᐊᕕᒃᑐᖅᓯᒪᓂᖓᓂ ᐊᒻᒪᓗ ᓄᓇᑦᓯᐊᕗᑦᒥ ᐱᓕᕆᐊᖃᓕᖅᓯᒪᔪᒪᕗᑦ ᐅᑭᐅᖓ 2021 ᐊᑐᐊᓂᒃᐸᓪᓕᐊᓕᖅᑎᓪᓗᒍ, ᓄᓇᕕᐅᑉ ᐊᕕᒃᑐᖅᓯᒪᓂᖓᓂ ᐱᓕᕆᐊᖃᕆᐊᕐᓂᐊᖅᑎᓪᓗᒋᑦ 2022-ᒥ ᐊᒻᒪᓗ ᓄᓇᕗᑦ ᐊᕕᒃᑐᖅᓯᒪᓂᖓᓂᑦ 2023-ᒥ. ᐊᑕᐅᑦᓯᒃᑰᖅᓯᒪᖖᒋᑦᓱᑎᒃ ᐱᓕᕆᓂᖃᕐᕕᒃᓴᐅᔪᑎᒍᑦ ᐱᓕᕆᓂᖃᖅᑎᑕᐅᓂᖏᓐᓂᑦ ᐊᕕᒃᑐᖅᓯᒪᓂᐅᔪᑦ ᐋᖅᑮᓯᒪᓕᕈᓐᓇᖅᑎᑕᐅᓂᐊᕐᒪᑕ ᐱᓕᕆᓂᖃᕈᓐᓇᕐᓂᐅᓂᐊᖅᑐᓂᒃ ᐊᑐᓕᖅᑎᑦᓯᒋᐊᕐᓂᕐᒥ ᑖᒃᑯᓂᖓ ᓯᕗᓪᓕᖅᐹᒥᒃ ᑕᐃᒪᓐᓇᐃᑦᑐᓂᒃ ᖃᐅᔨᓴᐃᓂᖃᕐᓂᒃᓴᒥᓐᓄᑦ. ᐊᑕᐅᑦᓯᒃᑰᖅᓯᒪᓇᑎᒃ ᑐᑭᓯᒋᐊᕐᕕᒃᓴᖁᑎᓂᒃ ᑲᑎᖅᓱᐃᓂᖅ ᐊᕕᒃᑐᖅᓯᒪᓂᐅᔪᓕᒫᓂᑦ ᐱᓕᕆᓂᖃᕐᕕᓴᓂᒃ ᐱᑎᖃᓕᖅᑎᑦᑎᓯᒪᒋᕗᑦ ᐊᕕ4ᑐᖅᓯᒪᓂᐅᔪᐃᑦ ᐃᓕᑉᐸᓪᓕᐊᕝᕕᖃᕈᓐᓇᕐᓂᖏᓂᒃ ᐊᒻᒪᓗ ᐃᑲᔪᖅᑎᒌᒃᓗᑎᒃ ᐱᓕᕆᓂᖃᕈᓐᓇᕐᑎᑕᐅᓗᑎᒃ ᓯᕗᓪᓕᖅᐹᒥᒃ ᐱᓕᕆᓂᖃᖅᑎᓪᓗᒋᑦ QNIHS-ᖁᑎᓂᒃ. ᐊᕕᒃᑐᖅᓯᒪᓂᐅᔪᑦ ᐃᓱᒪᓕᐅᖅᓯᒪᔪᑦ ᐊᑕᐅᑦᓯᒃᑯᑦ ᑐᑭᓯᒋᐊᕐᕕᒃᓴᖁᑎᓂᒃ ᑲᑎᖅᓱᐃᓂᖃᕈᒫᕐᓂᕐᒥᓐᓄᑦ ᑐᒡᓕᕆᔭᖓᓂᒃ ᖃᐅᔨᓴᐃᓂᖃᕐᓂᕐᒥ ᐱᓕᕆᓂᖃᓕᕐᒥᒍᑎᒃ.
ᑲᑎᒪᔩᑦ ᐃᑲᔪᖅᑐᐃᓂᖃᓚᐅᖅᐳᑦ ᐱᒋᐊᖅᑎᑦᑎᓯᒪᓕᕆᐊᒧᑦ ᐃᓄᐃᑦ ᑕᐱᕇᒃᑯᑦ ᑲᓇᑕᒥ ᑕᕆᐅᓕᕆᓂᕐᒥ ᑲᑎᒪᔨᕋᓛᖑᓂᐊᖅᑐᓂᒃ ᑐᓴᖅᑎᑦᓯᔨᐅᕙᒐᔭᖅᑐᓂᒃ ᒪᓕᒐᖁᑎᐅᔪᓄᑦ ᐊᒻᒪᓗ ᐊᐅᓚᑦᓯᓂᐅᔪᓄᑦ ᐅᑭᐅᖅᑕᖅᑐᒥ ᑕᕆᐅᒥ ᐆᒪᓂᖃᖅᑐᓕᕆᓂᕐᓄᑦ, ᐃᑲᔪᖅᑐᐃᓂᖃᖅᑐᓄᑦ ᐃᓄᐃᑦ ᐱᔪᓐᓇᐅᑎᖏᓂᒃ, ᐋᓐᓂᐊᖃᓕᖅᑕᐃᓕᒪᓂᖏᓐᓄᑦ, ᑮᓇᐅᔭᓕᐅᕈᑎᐅᕙᒃᑐᓄᑦ ᐊᒻᒪᓗ ᖃᓄᐃᖖᒋᑦᑎᐊᖅᑎᑕᐅᔭᕆᐊᖃᕐᓂᖏᓐᓄᑦ ᐃᓄᐃᑦ ᐃᓄᐃᑦ ᓄᓇᖓᓐᓂ. ᑲᑎᒪᔨᕋᓛᖑᔪᑦ ᐱᓕᕆᔨᐅᓂᐊᖅᑐᑦ ᐃᓄᐃᑦ ᑲᑎᖖᒐᔩᓐᓇᐅᓗᑎᒃ ᑲᓇᑕᒥ ᐃᖃᓪᓕᕿᔨᒃᑯᑦ ᐊᒻᒪᓗ ᑕᕆᐅᕐᒥᐅᑕᓕᕆᔨᒃᑯᓐᓄᑦ ᐊᒻᒪᓗ ᑲᓇᑕᒥ ᐅᒥᐊᕐᔪᐊᑎᒍᑦ ᓇᐅᑦᓯᖅᑐᐃᔨᒃᑯᑦ ᐅᑭᐅᖅᑕᖅᑐᑉ ᐊᕕᒃᑐᖅᓯᒪᓂᖓᓂ ᑲᑎᒪᔨᕋᓛᖏᓐᓄᑦ, ᐊᒻᒪᓗ ᐃᓚᐅᑎᓪᓗᒍ ᓯᕗᓪᓕᕐᒥᒃ ᓯᕗᓪᓕᖅᐸᐅᑎᑕᒃᓴᖁᑎᒥᓐᓄᑦ, ᐱᓕᕆᓂᖃᕐᓂᐊᖅᑐᑦ ᑭᖑᓪᓕᕐᒥᒃ ᐋᖅᑮᓯᒪᓕᕐᓂᒃᓴᒥᓐᓄᑦ ᐊᐅᓚᑦᓯᔨᐅᔪᓕᕆᓂᕐᒥ ᑐᖖᒐᕝᕕᖁᑎᓂᒃ ᑐᕌᖓᓪᓗᑎᒃ ᓄᑖᖑᓪᓗᑎᒃ ᐅᑭᐅᖅᑕᖅᑐᑉ ᐊᕕᒃᑐᖅᓯᒪᓂᕆᓕᖅᑕᖓᓄᑦ ᐃᓄᐃᑦ ᑲᓇᑕᒥ ᒐᕙᒪᒃᑯᑦ ᐱᓕᕆᐊᖃᖃᑎᒌᓐᓂᖏᓐᓄᑦ ᑲᑎᒪᔨᕋᓛᖑᔪᑎᒍᑦ.
ᑭᖑᓪᓕᕐᒥᒃᓕ, ᑲᑎᒪᔨᐅᔪᑦ ᐃᓱᒪᓕᐅᖅᓯᒪᓕᓚᐅᖅᑐᑦ ᐃᓄᐃᑦ ᓯᓚᑦᑐᖅᓴᖅᕕᖕᓂ ᐃᓕᓐᓂᐊᕆᐊᕐᓂᓕᕆᓂᕐᒧᑦ (IPSE) ᐊᐅᓚᑦᓯᓂᓕᕆᔨᐅᔪᑦ, ᐱᒋᐊᖅᑎᑕᐅᓚᐅᖅᑐᑦ 2020-ᒥ, ᐃᓂᖃᐃᓐᓇᕐᓂᐊᕐᒪᑕ ᐃᓄᐃᑦ ᑕᐱᕇᒃᑯᑦ ᑲᓇᑕᒥ ᐃᖅᑲᓇᐃᔭᕐᕕᖓᓐᓂ. ᐊᐅᓚᑦᓯᓂᓕᕆᔨᐅᔪᑦ ᐃᓛᒃᑰᖓᓕᕐᓗᑎᒃ ᑲᑐᔾᔨᖃᑎᒌᖖᒍᖅᓯᒪᓕᕈᒫᖅᑐᑦ ᐅᑭᐅᖓ 2022 ᐊᑐᓕᖅᐸᑦ ᐱᓕᕆᐊᒃᓴᖃᖅᑎᑕᐅᓗᑎᒃ ᐊᐅᓚᑦᓯᔨᐅᓂᕐᒧᑦ ᐃᑲᔪᕈᑎᒃᓴᐅᔪᓂᒃ ᐃᓄᐃᑦ ᐃᓕᓐᓂᐊᖅᑐᓄᑦ ᐱᖃᓯᐅᑎᓕᒋᑦ ᓯᓚᑦᑐᖅᓴᖅᕕᖕᒥ ᐱᓕᒻᒪᒃᓴᐃᓂᐅᕙᒃᑐᓄᑦ, ᐃᑲᔪᖅᑎᐅᕙᓐᓂᕐᓄᑦ, ᐋᓐᓂᐊᖃᓕᖅᑕᐃᓕᒪᓂᓕᕆᓂᕐᒥ, ᐊᒻᒪᓗ ᐃᓅᓯᓕᕆᓂᕐᒥ ᐃᑲᔪᖅᑎᐅᕙᓐᓂᕐᓄᑦ. ᑕᐃᒪᖖᒐᓂᑦ, ᐃᓄᐃᑦ ᓄᓇᓕᕆᓂᕐᒧᑦ ᑲᑐᔾᔨᖃᑎᒌᖏᑦ ᐃᓱᒪᓕᐅᖅᓯᒪᓕᓚᐅᕐᒪᑕ ᐊᕕᒃᑐᖅᓯᒪᓂᐅᔪᓂ ᑲᑐᔾᔨᖃᑎᒌᖏᑦ ᐊᐅᓚᑦᓯᔨᐅᔪᒫᕐᓂᖏᑕ ᐊᒻᒪᓗ ᓴᖅᑮᔨᐅᓕᕐᓂᐊᕐᓂᖏᑕ ᐃᓕᓐᓂᐊᖅᑐᓄᑦ ᐃᑲᔪᕈᑎᒃᓴᓂᒃ. ᐊᐅᓚᑦᓯᓂᓕᕆᔨᐅᔪᑦ ᑲᔪᓯᑎᑦᑎᓯᒪᓂᐊᖅᑐᑦ ᑲᓇᑕᒥ ᐋᖅᑭᒃᓱᐃᔨᐅᓪᓗᑎᒃ ᐱᓕᕆᐊᖃᖅᑎᐅᓂᕐᒥᓐᓂᒃ, ᐃᓚᖃᖅᑎᓪᓗᒋᑦ ᐋᖅᑭᒃᓱᐃᓂᕐᒧᑦ ᑐᑭᓯᒋᐊᕐᕕᒃᓴᖁᑎᓂᒃ ᐊᐅᓚᑦᓯᔾᔪᑎᒃᓴᓂᒃ, ᐃᑲᔪᖅᑐᐃᓂᕐᒧᑦ ᐊᕕᒃᑐᖅᓯᒪᓂᐅᔪᑦ ᐱᓕᕆᐊᖃᖅᑎᐅᓕᕈᓐᓇᕐᓂᖏᓐᓄᑦ ᐋᖅᑭᒃᓱᐊᖑᔪᓄᑦ ᐊᒻᒪᓗ ᑲᓇᑕᒥ ᐃᓕᓐᓂᐊᖅᑐᓄᑦ ᐃᑲᔪᓕᕆᐊᖅᑎᐅᓂᕐᒧᑦ.
ᑲᑎᒪᔩᑦ ᓯᑦᑎᐱᕆᒥ ᑲᑎᒪᓂᖃᕈᒫᖅᐳᑦ ᐋᖅᑭᒃᑕᐅᕙᒌᖅᓯᒪᓪᓗᒍ ᑲᑎᒪᓂᖃᕐᓂᕐᒥᓐᓄᑦ, ᐃᓚᖃᖅᑎᓪᓗᒍ ᐃᓄᐃᑦ ᑕᐱᕇᒃᑯᑦ ᑲᓇᑕᒥ ᐅᑭᐅᑕᒫᑦ ᑲᑎᒪᕕᒡᔪᐊᕐᓂᖃᕐᓂᖓᓐᓂᒃ.