ᐊᐃᐱᕆ 20, 2022 – ᐋᑐᕙ, ᐋᓐᑎᐊᕆᐅ
ᐅᓪᓗᒥ ᐃᓄᐃᑦ ᑕᐱᕇᑦ ᑲᓇᑕᒥ (ITK) ᑲᑎᒪᔨᖏᑦ ᐋᑐᕙᒥ ᑲᑎᒪᓂᖃᓚᐅᖅᑐᑦ. ᐅᖃᓪᓚᐅᓯᕆᓪᓗᓂᒋᑦ ᑯᐃᐸᒃᒥ ᐃᖅᑲᖅᑐᐃᕝᕕᖓᑕ ᓴᖑᓐᓂᐊᕈᑎᖃᕐᓂᖏᓂᒃ ᕕᑉᕈᐊᕆᐅᑎᓪᓗᒍ ᐃᓱᒪᔾᔪᓯᕆᔭᐅᔪᓄᑦ ᒪᓕᒐᕐᔪᐊᖁᑎᑎᒍᑦ ᐊᑐᓕᖅᑎᑕᐅᓯᒪᔪᓐᓇᕆᐊᖓᑕ ᒪᓕᒐᖁᑎᑦ ᐅᐱᒋᔭᖃᕐᓂᕐᒥᒃ ᐃᖅᑭᓖᑦ, ᐃᓄᐃᑦ ᐊᒻᒪ ᐊᓪᓚᖓᔪᑦ ᓱᕈᓯᖏᓂᒃ, ᒪᒃᑯᒃᑐᖏᓂᒃ ᐊᒻᒪ ᐃᓚᒌᖑᔪᓂᒃ, ᐊᒻᒪ ᑕᐃᒪᓗ ᑲᓇᑕᒥ ᐃᖅᑲᖅᑐᐃᕝᕕᒡᔪᐊᑎᒍᑦ ᓴᖑᓐᓂᐊᕈᑎᖃᓕᓚᐅᖅᓱᑎᒃ ᑕᒪᑐᒥᖓ. ᑲᑎᒪᔩᑦ ᑎᓕᐅᕆᓕᓚᐅᖅᐳᑦ ᐃᓄᐃᑦ ᑕᐱᕇᑦ ᑲᓇᑕᒥ (ITK) ᐱᓯᒪᓕᕋᓱᐊᖁᓪᓗᓂᒋᑦ ᐃᖅᑲᖅᑐᐃᕝᕕᒃᑰᕐᑎᑕᐅᔪᓄᑦ ᐱᓕᕆᐊᖃᖅᑎᐅᓂᕐᒧᑦ ᒪᓕᒐᖁᑎᑦ ᐊᑐᓕᖅᑎᑕᐅᓯᒪᓕᖁᓪᓗᒋᑦ ᒪᓕᒃᑎᑕᐅᓗᑎᒃ ᐋᖅᑭᒃᓱᐃᖃᑎᒌᖕᓂᖅᑎᒍᑦ ᐱᓕᕆᐊᖑᕙᓪᓕᐊᔪᓄᑦ, ᐊᒻᒪᓗ ᒐᕙᒪᑐᖃᒃᑯᓐᓂᑦ ᓇᓗᓇᐃᖅᓯᓯᒪᔾᔪᑎᐅᓚᐅᖅᑐᓄᑦ ᐃᓄᖕᓄᑦ.
ᑲᑎᒪᔩᑦ ᐅᖃᓪᓚᐅᓯᖃᓚᐅᖅᐳᑦ ᒫᓐᓇᓵᖑᓚᐅᖅᑐᒥ ᒐᕙᒪᑐᖃᒃᑯᑦ ᑮᓇᐅᔭᓂᒃ ᐊᑐᖅᑐᒃᓴᖁᑎᓂᒃ ᐊᒻᒪ ᓂᕈᐊᖅᖠᓂᖃᕐᕕᒋᓪᓗᒋᑦ ᒪᕐᕉᒃ ᐊᑐᓕᖅᑎᑕᐅᖁᔭᐅᔪᑦ ᐊᖏᒡᓕᒋᐊᖅᑎᑕᐅᓯᒪᓕᖁᓪᓗᒋᑦ ᑐᑭᓯᒋᐊᕐᕕᒃᓴᖁᑎᓂᒃ ᐱᓕᕆᓂᐅᔪᓐᓇᖅᑐᓄᑦ ᐃᓄᐃᑦ ᓄᓇᓕᓕᒫᖏᓐᓂ. ᐊᖏᖅᓯᒪᔾᔪᑎᖃᖅᖢᑎᒃ ᓴᓂᕐᕙᐃᓯᒪᓂᐊᕐᓂᕐᒧᑦ $4-ᒥᓕᐊᓐᑖᓚᓂᒃ ᒐᕙᒪᑐᖃᒃᑯᓐᓂᑦ ᑮᓇᐅᔭᖁᑎᒃᓴᐅᔪᓂᑦ ᑮᓇᐅᔭᑦ ᐊᑐᖅᑐᒃᓴᐅᑎᑕᐅᓯᒪᓕᓚᐅᖅᑐᓂᑦ 2021-ᒥ ᐃᓄᐃᑦ ᑐᑭᓯᒋᐊᕐᕕᒃᓴᖁᑎᓕᕆᓂᕐᒥ ᐸᕐᓇᐅᑎᓄᑦ, ᑮᓇᐅᔭᐃᑦ ᑐᓂᔭᐅᕙᓪᓕᐊᓂᐊᕐᒪᑕ ᐃᓄᐃᑦ ᑕᐱᕇᒃᑯᓐᓄᑦ ᑲᓇᑕᒥ, ᐃᓄᐃᑦ ᐅᑭᐅᖅᑕᖅᑐᓕᒫᒥ ᑲᑎᒪᔨᖏᓐᓄᑦ ᑲᓇᑕᒥ, ᐊᒻᒪ ᐊᑐᓂᑦ ᓯᑕᒪᐅᓪᓗᑎᒃ ᐊᕕᒃᑐᖅᓯᒪᓂᐅᔪᓄᑦ ᐋᖅᑭᒃᓱᐃᓯᒪᓕᖁᓪᓗᒋᑦ ᐊᕕᒃᑐᖅᓯᒪᓂᕐᒥ ᑐᑭᓯᒋᐊᕐᕕᒃᓴᖁᑎᓄᑦ ᐸᕐᓇᐅᑎᓂᒃ. ᐃᓚᒋᔭᐅᔪᑦ ᓂᕈᐊᖅᖠᓂᖃᓚᐅᕐᒥᔪᑦ ᐃᑲᔪᖅᑐᐃᓂᕐᒥᓐᓄᑦ ᐊᖏᕈᑎᒋᔭᐅᓯᒪᔪᓂᒃ ᐃᓄᐃᑦ ᑕᐱᕇᒃᑯᓐᓂᑦ ᑲᓇᑕᒥ ᐊᒻᒪ ᐊᕕᒃᑐᖅᓯᒪᓂᕐᓂ ᑲᑐᔾᔨᖃᑎᒌᖑᔪᓂᑦ ᑕᒪᕐᒥᐅᓗᑎᒃ ᐊᐅᓚᑦᓯᓂᖃᕐᓂᐊᕐᓂᕐᒥᖕᓄᑦ ᑐᑭᓯᒋᐊᕐᕕᒃᓴᖁᑎᓂᒃ ᑲᑎᖅᓱᐊᖑᓯᒪᔪᓂᒃ ᐱᓕᕆᐊᒥ ᖃᓄᐃᑉᐱᑖ ᑲᓇᑕᒥ ᐃᓄᐃᑦ ᐋᓐᓂᐊᖃᕐᓇᖖᒋᑦᑐᓕᕆᓂᕐᒧᑦ ᖃᐅᔨᓴᐃᓂᐅᔪᓄᑦ.
ᐃᓄᐃᑦ ᑕᐱᕇᑦ ᑲᓇᑕᒥ (ITK) ᐊᖏᔪᖅᑳᖓᑦ ᐊᒥᖅᑲᕈᑎᖃᓚᐅᕐᒪᑦ ᑲᑎᒪᔨᓄᑦ ᑐᕌᖓᔪᓂᒃ ᐃᒃᓯᕋᕐᔪᐊᕌᓘᑉ ᓄᓇᕐᔪᐊᖓᓄᐊᖅᓯᒪᓂᕆᓚᐅᖅᑕᒥᓄᑦ, ᑕᐃᑲᓂᓗ ᐃᒃᓯᕋᕐᔪᐊᕌᓗᒃ ᕗᕌᓐᓯᔅ ᒪᒥᐊᕝᕕᖃᓚᐅᕐᒪᑦ ᓄᓇᖃᖅᑳᖅᓯᒪᔪᓄᑦ ᐃᒃᓯᕋᕐᔪᐊᑦ ᑐᒃᓯᐊᕐᕕᖓᑕ ᐱᓕᕆᓄᕐᓗᒍᑎᒋᓚᐅᖅᓯᒪᔭᖏᓐᓄᑦ ᐃᓕᓐᓂᐊᕆᐊᖅᓯᒪᕝᕕᐅᔪᓂ. ᐅᓪᓗᓗᒃᑖᖅ ᑲᑎᒪᓂᖃᖅᐸᓪᓕᐊᓪᓗᑎᒃ. ᑲᑎᒪᔨᐅᔪᑦ ᒫᓐᓇᒧᑦ ᑎᑭᑦᓱᒋᑦ ᐃᓄᐃᑦ ᐋᓐᓂᐊᖃᕐᓇᖖᒋᑦᑐᓕᕆᓂᕐᒥ ᐱᓕᕆᐊᖑᔪᓄᑦ ᑐᓵᓂᖃᖃᑦᑕᓚᐅᖅᐳᑦ, ᐃᓚᖃᖅᖢᒋᑦ ᑐᑭᒧᐊᒍᑎᒃᓴᓕᐊᕆᓯᒪᔭᖏᓂᒃ ᐃᓄᐃᑦ ᑕᐱᕇᒃᑯᑦ ᑲᓇᑕᒥ (ITK) ᐋᖅᑭᒃᓱᐊᕆᓯᒪᔭᖏᓐᓄᑦ ᐃᓚᒌᖑᔪᓄᑦ ᓇᐅᒃᑰᖅᐸᓪᓕᐊᕕᒃᓴᐅᔪᓄᑦ ᐃᓄᐃᑦ ᓱᕈᓰᑦ ᓯᕗᓪᓕᖅᐸᐅᑎᑕᐅᓗᑎᒃ ᐱᓕᕆᐊᖑᔪᒥ, ᐃᓚᖃᖅᖢᒋᑦ ᐋᖅᑭᒃᓱᐃᖃᑎᒌᒍᑎᐅᓯᒪᔪᓄᑦ ᐊᔾᔨᒌᖖᒋᑦᑑᓂᖏᓐᓄᑦ ᑐᖖᒐᕝᕕᖃᖅᑎᑕᐅᓪᓗᑎᒃ ᓄᓇᖃᖅᑳᖅᓯᒪᔪᐃᑦ ᐋᓐᓂᐊᖃᕐᓇᖖᒋᑦᑐᓕᕆᓂᕐᒥ ᒪᓕᒐᕐᔪᐊᖁᑎᓂᒃ, ᓯᕗᓪᓕᖅᐸᐅᑎᑦᓯᔾᔪᑎᐅᓕᕐᓂᐊᖅᑐᓂᒃ ᐃᓄᐃᑦ ᓇᖕᒥᓂᖅ ᐃᓱᒪᓕᐅᕈᑎᓕᐅᕈᓐᓇᕐᓂᖏᑕ ᐱᑕᖃᓕᖅᑎᑦᓯᓂᕐᒥ ᐋᓐᓂᐊᖃᕐᓇᖖᒋᑦᑐᓕᕆᔾᔪᑎᓄᑦ ᐱᓕᕆᐊᒥᒃ.
ᑲᑎᒪᔩᑦ ᐃᓚᒋᔭᐅᖃᑕᐅᓂᐊᖅᐳᑦ ᖃᐅᒃᐸᑦ ᐃᓄᐃᑦ-ᒐᕙᒪᑐᖃᒃᑯᑦ ᐱᓕᕆᐊᖃᖃᖃᑎᒌᖕᓂᖏᓐᓄᑦ ᑲᑎᒪᔨᕋᓛᑦ ᑲᑎᒪᓂᖃᓕᖅᐸᑕ, ᐊᐃᐱᕆ 21-ᒥ, ᐃᒃᓯᕙᐅᑕᖃᖃᑎᒌᒃᑎᓪᓗᒋᑦ ᑲᓇᑕᒥ ᐊᖏᔪᖅᑳᕐᔪᐊᖅ ᔭᔅᑎᓐ ᑐᕉᑑ ᐊᒻᒪ ᐊᖏᔪᖅᑳᖅ ᐆᐱᑦ. ᐃᓄᐃᑦ ᑕᐱᕇᑦ ᑲᓇᑕᒥ (ITK) ᑲᑎᒪᔨᖏᑦ ᑲᑎᒪᓂᖃᒃᑲᓐᓂᕈᒫᕐᒥᔪᑦ ᔫᓂ 2022-ᒥ.