Skip to main content
ᑐᓴᖅᑎᑦᓯᔾᔪᑏᑦ

ᐃᓄᐃᑦ ᑕᐱᕇᒃᑯᑦ ᑲᓇᑕᒥ ᓈᒻᒪᒃᓴᐃᕗᑦ ᐊᖏᔪᒻᒪᕆᐅᓪᓗᑎᒃ ᓄᓇᖃᖅᑳᖅᓯᒪᔪᓄᑦ ᑮᓇᐅᔭᓂᒃ ᕿᑐᕐᖏᐅᖅᑎᑕᐅᔪᓂᒃ ᑮᓇᐅᔭᖁᑎᒃᓴᕆᔭᐅᔪᒃᓴᓄᑦ 2021-ᒥ

By April 20, 2021 No Comments
ITK President Natan Obed speaks to the CBC’s Rosemary Barton following the release of Budget 2021. 

 

ᐊᐃᐱᕆ 19, 2021 – ᐋᑐᕙ, ᐋᓐᑎᐊᕆᐅ

2021-ᒥ ᒐᕙᒪᑐᖃᒃᑯᑦ ᑮᓇᐅᔭᖁᑎᒃᓴᕆᔭᐅᓂᐊᖅᑐᓂᒃ ᓴᓂᕐᕙᐃᕙᓪᓕᐊᓂᖏᑦ ᐃᓚᖃᖅᑎᑕᐅᕗᑦ ᓂᕆᐅᓇᑦᓯᐊᖅᑑᓪᓗᑎᒃ ᑕᐃᓯᓯᒪᓕᓚᐅᕐᓂᖏᓐᓂᒃ ᓄᓇᖃᖅᑳᖅᓯᒪᔪᓄᑦ ᑐᕌᖓᑎᑕᐅᓪᓗᑎᒃ ᑮᓇᐅᔭᖁᑎᒃᓴᖃᖅᑎᑦᓯᓂᐊᕐᓂᕐᒥᓐᓄᑦ ᐊᒻᒪᓗ ᐱᓕᕆᓂᖃᕐᕕᐅᓂᐊᕐᓂᖏᑕ ᒐᕙᒪᑐᖃᒃᑯᑦ ᑮᓇᐅᔭᓂᒃ ᐊᑐᖅᐸᓪᓕᐊᕐᓂᖏᑕ ᐃᓄᖕᓄᑦ ᑐᕌᖓᔪᓂᒃ ᑐᐊᕕᐅᕐᓇᖅᓯᓯᒪᓪᓗᑎᒃ ᐱᓕᕆᐊᖑᔪᓄᑦ ᓲᕐᓗ ᐃᓕᓐᓂᐊᓕᓵᖅᑐᓕᕆᓂᕐᓂ ᐊᒻᒪᓗ ᐸᐃᕆᕝᕕᓕᕆᓂᕐᓂ ᐱᓕᕆᐊᓂ, ᐃᖅᑲᓇᐃᔭᕐᕕᐅᔪᓄᑦ ᐋᖅᑭᐅᒪᓂᖃᖅᑐᓄᑦ ᐊᒻᒪᓗ ᓂᕿᒋᔭᒃᓴᓂᒃ ᐱᓯᒪᓕᕈᓐᓇᕐᓂᕐᒧᑦ ᐱᓕᕆᐊᓄᑦ.

“ᐊᖏᔪᒻᒪᕆᖕᒥᒃ ᑖᒃᑯᓇᖖᒐᑦ ᒐᕙᒪᑐᖃᒃᑯᑦ ᑮᓇᐅᔭᖁᑎᒃᓴᓕᕆᓂᖏᓐᓂᑦ ᐃᑲᔪᖅᑐᒐᐅᓯᒪᓂᖃᕋᑦᑕ. ᖁᓚᖖᒋᓚᖓᓗ ᖃᓄᑎᒋ ᑮᓇᐅᔭᓂᒃ ᕿᑐᕐᖏᐅᖅᑎᑦᓯᓯᒪᓂᐊᕐᓂᖏᑕ ᑐᕌᖓᑎᑕᐅᔪᓂᒃ ᐃᓄᖕᓄᑦ, ᐃᖅᑭᓕᖕᓄᑦ ᐊᒻᒪᓗ ᐊᓪᓚᖓᔪᓄᑦ,” ᐅᖃᖅᖢᓂ ᐃᓄᐃᑦ ᑕᐱᕇᒃᑯᓐᓄᑦ ᑲᓇᑕᒥ ᐊᖏᔪᖅᑳᖓᑦ ᓇᐃᑖᓐ ᐆᐱᑦ. “ᑭᓯᐊᓂᓗ ᐅᑕᖅᑭᐅᕆᐊᖃᕐᓂᐊᕋᑦᑕ ᐅᓪᓗᓂᒃ ᐊᒥᓱᓂᒃ ᐅᕝᕙᓘᓐᓃᑦ ᐱᓇᓱᐊᕈᓯᕐᓂᒃ ᖃᐅᔨᒪᓕᓚᐅᖅᑳᕋᑕ ᖃᓄᐃᓪᓚᕆᖕᓂᐊᕐᒪᖔᑕ ᐃᓄᖕᓄᑦ ᑖᒃᑯᐊ ᑮᓇᐅᔭᖁᑎᒃᓴᐅᓂᐊᖅᑐᑦ ᐱᑦᔪᑎᒋᓪᓗᒋᑦ.”

ᐊᓯᖏᑦ ᓄᓇᖃᖅᑳᖅᓯᒪᔪᓄᑦ ᑐᕌᖓᓪᓗᑎᒃ ᑐᓴᒐᒃᓴᐅᔪᓂ, ᐃᓄᐃᑦ ᑕᐱᕇᒃᑯᑦ ᑲᓇᑕᒥ ᑐᓴᖅᐸᓪᓕᐊᖏᓐᓇᐅᔭᖅᑐᑦ ᐊᒻᒪᓗ ᑐᑭᓯᐅᒪᓕᖅᐸᓪᓕᐊᖏᓐᓇᐅᔭᖅᓱᓂᖏᑦ ᒪᑯᓄᖓ ᑐᕌᖓᔪᓂᒃ:

ᐃᓕᓐᓂᐊᓕᓵᖅᑐᓕᕆᓂᖅ ᐊᒻᒪᓗ ᐸᐃᕆᕝᕕᓕᕆᓂᖅ: $30-ᐱᓕᐊᓐᑖᓚᐃᑦ ᐊᑐᖅᑕᐅᔪᒃᓴᑦ ᐅᑭᐅᑦ ᑕᓪᓕᒪᑦ ᐊᑐᖅᐸᓪᓕᐊᓂᖏᓐᓂ ᐊᑕᐃᓐᓇᖅᑎᑕᐅᓗᑎᒃ ᑮᓇᐅᔭᖁᑎᒃᓴᖃᖅᑎᑕᐅᓂᐊᖅᑐᓄᑦ ᐱᐅᑦᓯᐊᖅᑐᓂᒃ ᑮᓇᐅᔾᔭᒃᓴᓇᓱᐊᕋᑎᒃ ᐸᐃᕆᕝᕕᖕᓄᑦ, ᐃᓚᖃᖅᑎᓪᓗᒋᑦ ᐱᓕᕆᐊᖃᖅᑎᐅᔪᓐᓇᕐᓂᕐᓂᒃ ᐱᕈᖅᑎᑦᓯᕙᓪᓕᐊᓂᕐᓄᑦ ᐊᒻᒪᓗ ᐃᓅᓯᓕᕆᓂᕐᒥ ᐊᒻᒪᓗ ᐃᖅᑲᓇᐃᔭᕐᕕᖃᖅᑎᑦᓯᓂᕐᓄᑦ ᑮᓇᐅᔭᓂᒃ ᕿᑐᕐᖏᐅᖅᑎᑦᓯᓂᕐᓄᑦ. ᐸᕐᓇᐅᑏᑦ ᑐᕌᖓᑎᑕᐅᓯᒪᕗᑦ ᒥᑭᒡᓕᒋᐊᖅᑎᑕᐅᖁᓪᓗᒋᑦ ᐊᑭᒋᔭᐅᕙᒃᑐᓂ ᐊᐅᓚᑕᐅᓂᖃᖅᓱᑎᒃ ᐸᐃᕆᕝᕕᓕᕆᓂᐅᕙᒃᑐᓂ 50 ᐳᕐᓴᓐᑎᓪᓗᐊᖑᕙᒃᑐᓄᑦ, ᐅᑭᐅᖓ 2022-ᒧᑦ ᑎᑭᓪᓗᒍ, ᑎᑭᓯᒪᓕᖅᑎᑦᓯᒋᐊᕐᓂᕐᒥ $10-ᑐᕐᐸᒃᓗᓂ ᐅᓪᓗᒧᑦ ᐊᑕᐅᓯᕐᒧᑦ ᐋᖅᑭᒃᑕᐅᓯᒪᓂᖃᖅᐸᓐᓂᖓᒍᑦ ᑎᑭᓯᒪᓕᖅᐸᑦ ᐅᑭᐅᖓ 2026 (ᓯᓚᑖᓂ ᑯᐃᐸᒃ).

ᐃᖅᑲᓇᐃᔭᕐᕖᑦ: $4.3-ᐱᓕᐊᓐᑖᓚᑦ ᓄᓇᖃᖅᑳᖅᓯᒪᔪᑦ ᓄᓇᓕᒋᔭᖏᓐᓂ ᐃᖅᑲᓇᐃᔭᕐᕕᐅᔪᓂᑦ ᑮᓇᐅᔭᖁᑎᒃᓴᑦ.

ᐱᓕᕆᐊᖑᔪᖅ ᐊᓯᐅᔨᔭᐅᓯᒪᔪᓄᑦ ᐊᒻᒪᓗ ᐃᓄᐊᖅᑕᐅᓯᒪᔪᓄᑦ ᓄᓇᖃᖅᑳᖅᓯᒪᔪᓂ ᐊᕐᓇᐃᑦ ᐊᒻᒪᓗ ᓂᕕᐊᖅᓯᐊᑦ (MMIWG): ᑮᓇᐅᔭᖁᑎᒃᓴᓂᒃ ᐃᓚᔭᐅᓂᐊᖅᑐᑦ $2.2-ᐱᓕᐊᓐᑖᓚᓂᒃ ᐊᑐᖅᑕᐅᔪᒃᓴᐅᓂᐊᖅᑐᓂᒃ ᐅᑭᐅᑦ ᑕᓪᓕᒪᑦ ᐊᑐᖅᐸᓪᓕᐊᓂᖏᓐᓂ, ᐱᒋᐊᕐᑎᑕᐅᓗᑎᒃ 2021-22-ᒥ, ᐊᒻᒪᓗ $160.9-ᒥᓕᐊᓐᑖᓚᓂᒃ ᐊᑕᐃᓐᓇᖅᑎᑕᐅᓪᓗᑎᒃ ᐱᓕᕆᓂᐅᔪᓄᑦ ᑭᐅᔾᔪᑎᐅᓯᒪᓪᓗᑎᒃ ᐱᓂᕐᓗᐊᕿᑎᑕᐅᓯᒪᓂᖏᑕ ᐊᓯᐅᔨᔭᐅᓯᒪᔪᑦ ᐊᒻᒪᓗ ᐃᓄᐊᖅᑕᐅᓯᒪᔪᑦ ᓄᓇᖃᖅᑳᕐᓯᒪᔪᓂ ᐊᕐᓇᐃᑦ ᐊᒻᒪᓗ ᓂᕕᐊᖅᓯᐊᑦ ᐃᑲᔪᕈᑎᒃᓴᐅᓂᐊᕐᓗᑎᒃ ᐱᕈᖅᑎᑦᓯᓯᒪᓕᕐᓂᕐᒧᑦ ᖃᓄᐃᓐᓇᖖᒋᑦᑐᒦᓪᓗᑎᒃ, ᓴᖖᒋᓂᖃᑦᓯᐊᖅᑐᓂ, ᐊᒻᒪᓗ ᐃᓚᒋᔭᐅᖃᑕᐅᑦᓯᐊᖅᓗᑎᒃ ᐃᓅᖃᑎᒌᒃᑐᓂ.

ᓄᕙᒡᔪᐊᕐᓇᖅ-19: ᐃᓚᒋᐊᖅᑕᐅᓯᒪᔪᑦ $1.2-ᐱᓕᐊᓐᑖᓚᓂᒃ ᐅᑭᐅᖓᓂ 2021-22 ᐊᑐᓕᖅᑎᑕᐅᓯᒪᐃᓐᓇᕐᓂᐊᖅᑐᑦ ᐃᑲᔪᕈᑎᒃᓴᖃᖅᑎᑦᓯᓂᕐᓄᑦ ᓄᕙᒡᔪᐊᕐᓇᖅ-19ᒥᒃ ᐱᓕᕆᐊᖃᕈᑎᒃᓴᓄᑦ ᓄᓇᖃᖅᑳᖅᒪᔪᐃᑦ ᓄᓇᓕᒋᔭᖏᓐᓂ.

ᖃᐅᔨᓴᐃᓂᖅ: $1.2-ᐱᓕᐊᓐᑖᓇᓂᒃ ᑮᓇᐅᔭᖁᑎᒃᓴᖃᖅᑎᑕᐅᓂᐊᖅᑐᑦ ᖃᐅᔨᓴᐃᔾᔪᑎᒃᓴᓂᒃ, ᓱᓇᑐᐃᓐᓇᓂᒃ ᖃᐅᔨᓴᐃᓂᐅᕙᒃᑐᓄᑦ, ᐊᒻᒪᓗ ᖃᐅᔨᓴᐃᓂᕐᓄᑦ ᐱᓕᕆᐊᖑᔪᓄᑦ ᐊᒻᒪᓗ ᐱᓕᕆᐊᖑᓕᕈᒪᔪᓄᑦ ᑐᕌᖓᔪᓄᑦ, ᐃᓚᒋᐊᖅᓯᒪᓗᒋᑦ $4-ᒥᓕᐊᓐᑖᓚᓂᒃ ᐅᑭᐅᑦ ᐱᖓᓱᑦ (3) ᐊᑐᖅᐸᓪᓕᐊᓂᖏᓐᓂ ᐊᑐᖅᑕᐅᔪᒃᓴᓂᒃ ᐃᑲᔪᕈᑎᒃᓴᐅᓪᓗᑎᒃ ᐋᖅᑭᒃᓱᐃᓂᕐᒧᑦ ᐃᓄᐃᑦ ᑐᑭᓯᒋᐊᕐᕕᖁᑎᒃᓴᓂᒃ ᐸᕐᓇᐅᑎᓕᐅᕈᑎᖏᓐᓂ.

ᐃᓱᒪᒃᑯᑦ ᖃᓄᐃᖖᒋᑦᓯᐊᕐᓂᖅ: $597.6-ᒥᓕᐊᓐᑖᓚᐃᑦ ᐊᑐᖅᑕᐅᔪᒃᓴᐅᓂᐊᖅᑐᓂᒃ ᐅᑭᐅᑦ ᐱᖓᓱᑦ (3) ᐊᑐᖅᐸᓪᓕᐊᓂᖏᓐᓂ, ᐱᒋᐊᖅᑎᑕᐅᓗᑎᒃ 2021-22 ᐅᑭᐅᖓᓂ, ᐊᔾᔨᒋᔭᐅᖖᒋᓐᓂᖏᓄᑦ ᑐᖖᒐᕝᕕᖃᖅᑎᑕᐅᓯᒪᓪᓗᑎᒃ ᐃᓱᒪᒃᑯᑦ ᐋᓐᓂᐊᖃᓕᖅᑕᐃᓕᒪᔪᓕᕆᓂᕐᓂ ᐊᒻᒪᓗ ᖃᓄᐃᖖᒋᑦᓯᐊᕐᓂᓕᕆᓂᕐᓂ ᐸᕐᓇᐅᑎᓕᐊᓄᑦ ᐃᖅᑭᓖᑦ, ᐃᓄᐃᑦ, ᐊᒻᒪᓗ ᐊᓪᓚᖓᔪᑦ ᐃᓅᖃᑎᒌᒃᑐᓂ.

ᐅᖃᐅᓯᓕᕆᓂᖅ ᐊᒻᒪᓗ ᐱᐅᓯᑐᖃᓕᕆᓂᖅ: $460-ᒥᓕᐊᓐᑖᓚᐃᑦ ᐊᑐᖅᑕᐅᔪᒃᓴᐅᓂᐊᖅᑐᓂᒃ ᐅᑭᐅᑦ ᑕᓪᓕᒪᑦ (5) ᐊᑐᖅᐸᓪᓕᐊᓂᖏᓐᓂ ᐃᑲᔪᕈᑎᒃᓴᐅᓂᐊᕐᓗᑎᒃ ᓄᓇᖃᖅᑳᖅᓯᒪᔪᐃᑦ ᐅᖃᐅᓯᖏᓂᒃ ᐊᒻᒪᓗ ᐱᐅᓯᑐᖃᖏᓂᒃ ᐆᒻᒪᖅᑎᑦᑎᒋᐊᒃᑲᓐᓂᕐᓂᕐᒥ ᐊᒻᒪᓗ ᓴᑐᖅᑕᐅᓯᒪᓕᕆᐊᕐᓂᖏᓐᓂ.

ᓯᓚᑦᑐᖅᓴᖅᕕᖕᒥ ᐃᓕᓐᓂᐊᕐᓂᓕᕆᓂᖅ: $177-ᒥᓕᐊᓐᑖᓚᐃᑦ ᐊᑐᖅᑕᐅᔪᒃᓴᐅᓂᐊᖅᑐᓂᒃ ᐅᑭᐅᒃ ᒪᕐᕉᒃ (2) ᐊᑐᖅᐸᓪᓕᐊᓂᖏᓐᓂ ᐃᑲᔪᕈᑎᐅᓂᐊᕐᓗᑎᒃ ᓄᓇᖃᖅᑳᖅᓯᒪᔪᓂᑦ ᐃᓕᓐᓂᐊᖅᑐᓂᒃ ᐊᒻᒪᓗ ᐃᓕᓐᓂᐊᕐᕕᓐᓂᒃ ᐃᓚᒋᔭᐅᖃᑕᐅᔪᓄᑦ ᓯᓚᑦᑐᖅᓴᖅᕕᖕᒥ ᐃᓕᓐᓂᐊᕐᓂᓕᕆᓂᕐᓄᑦ ᐱᔭᕇᖅᓯᒪᓕᖅᑎᑕᐅᖁᓪᓗᒋᑦ ᐃᓕᓐᓂᐊᕈᑎᒥᓐᓂᒃ ᓄᕙᒡᔪᐊᕐᓇᒥᒃ ᐊᑐᓕᖅᓯᒪᑎᓪᓗᑕ ᓯᓚᕐᔪᐊᓕᒫᒥ.

ᓂᕿᒋᔭᒃᓴᓂᒃ ᐱᓯᒪᓕᕈᖕᓇᕆᐊᖃᕐᓂᖅ: $164-ᒥᓕᐊᓐᑖᓚᐃᑦ ᐊᑐᖅᑕᐅᔪᒃᓴᐅᓂᐊᖅᑐᓂᒃ ᐅᑭᐅᑦ ᐱᖓᓱᑦ (3) ᐊᑐᖅᐸᓪᓕᐊᓂᖏᓐᓂ ᐱᓕᕆᖃᑎᖃᕐᓂᕐᓂ ᓄᓇᖃᖅᑳᖅᓯᒪᔪᓂᒃ, ᐃᓚᒋᓗᒋᑦ ᐃᓄᐃᑦ ᓄᓇᖓᓐᓂᕐᒥᐅᑦ, ᐊᖏᒡᓕᒋᐊᖅᑎᑕᐅᓯᒪᓕᖁᓪᓗᒋᑦ ᓂᕿᑦᑎᐊᕙᐃᑦ ᐅᑭᐅᖅᑕᖅᑐᖓᓂ ᑲᓇᑕᐅᑉ ᐱᓕᕆᐊᖑᔪᑦ.

ᔪᓇᐃᑎᑦ ᓃᓴᒃᑯᑦ ᓇᓗᓇᐃᖅᓯᔾᔪᑎᖏᑦ: $31-ᒥᓕᐊᓐᑖᓚᐃᑦ ᐊᑐᖅᑕᐅᔪᒃᓴᐅᓂᐊᖅᑐᓂᒃ ᐅᑭᐅᒃ ᒪᕐᕉᒃ (2) ᐊᑐᖅᐸᓪᓕᐊᓂᖏᓐᓂ ᐃᑲᔪᕈᑎᐅᓂᐊᕐᓗᑎᒃ ᐋᖅᑭᒃᓱᐃᖃᑎᒌᖕᓂᕐᓄᑦ ᐱᓕᕆᐊᖑᔪᓄᑦ ᐸᕐᓇᐅᑎᓕᐅᕐᓂᕐᒥ ᐊᑐᓕᖅᑎᑕᐅᖁᓪᓗᒋᑦ ᒪᓕᒐᕐᔪᐊᖁᑏᑦ ᔪᓇᐃᑎᑦ ᓃᓴᒃᑯᑦ ᓇᓗᓇᐃᖅᓯᔾᔪᑎᖏᓂᒃ ᓄᓇᖃᖅᑳᖅᓯᒪᔪᐃᑦ ᐱᔪᖕᓇᐅᑎᖃᕐᓂᖏᓐᓄᑦ.

ᓯᓚᐅᑉ ᐊᓯᔾᔨᖅᐸᓪᓕᐊᓂᖓ: $22.7-ᒥᓕᐊᓐᑖᓚᐃᑦ ᐊᑐᖅᑕᐅᔪᒃᓴᐅᓂᐊᖅᑐᓂᒃ ᐅᑭᐅᑦ ᑕᓪᓕᒪᑦ (5) ᐊᑐᖅᐸᓪᓕᐊᓂᖏᓐᓂ, ᐱᒋᐊᖅᑎᑕᐅᓗᑎᒃ 2021-22 ᐅᑭᐅᖓᓂ, ᐃᑲᔪᕈᑎᒃᓴᐅᓪᓗᑎᒃ ᐃᓄᐃᑦ ᐊᒻᒪᓗ ᐃᖅᑭᓖᑦ ᐊᐅᓚᑦᓯᓂᖏᓐᓂᒃ ᐋᓐᓂᐊᖃᓕᖅᑕᐃᓕᒪᔪᓕᕆᓂᐅᔪᑦ ᐊᒃᑐᖅᑕᐅᓯᒪᓂᖏᑦᑕ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓂᑦ, ᓲᕐᓗ ᓂᕿᒋᔭᐅᕙᒃᑐᑐᖃᓂᒃ ᐱᓯᒪᓕᕆᐊᖅᐸᓐᓂᕐᓄᑦ ᐊᑐᐃᓐᓇᐅᑎᑕᐅᔪᓄᑦ, ᐊᒃᑐᖅᑕᐅᓯᒪᓂᐅᔪᑦ ᐱᓗᐊᖅᑐᒥᒃ ᓯᓚᐅᑉ ᖃᓄᐃᓕᖓᓕᖅᐸᓐᓂᖓᓂᑦ, ᐊᒻᒪᓗ ᐃᓱᒪᒃᑯᑦ ᐋᓐᓂᐊᖃᓕᖅᑕᐃᓕᒪᓂᖏᑦ ᐊᒃᑐᖅᑕᐅᓯᒪᓕᕐᓂᖏᑕ ᒪᒃᑯᒃᑐᑦ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓂᑦ.

ᐃᓄᐃᑦ ᑕᐱᕇᒃᑯᑦ ᑲᓇᑕᒥ ᓴᐳᔾᔨᒋᐊᖅᓯᒪᕗᑦ ᐊᑐᓕᖅᑎᑕᐅᓂᒃᓴᖓᑕ ᐃᓄᐃᑦ ᓄᓇᖓᓐᓂᕐᒥᐅᓄᑦ ᑐᕌᖓᑎᑕᐅᓪᓗᑎᒃ ᐱᓕᕆᓂᐅᓕᕋᔭᖅᑐᓄᑦ ᒐᕙᒪᑐᖃᒃᑯᑦ ᑮᓇᐅᔭᓂᒃ ᐊᑐᖅᐸᓪᓕᐊᕙᓐᓂᖏᓐᓂ. ᐊᑐᓕᖅᑎᑕᐅᓂᖏᑦ ᐃᓄᐃᑦ ᓄᓇᖓᓐᓂ ᑮᓇᐅᔭᓕᕆᓐᓇᐅᑉ ᐅᑭᐅᖓᓂ ᒪᓕᒐᖁᑎᐅᔪᑦ ᒐᕙᒪᑐᖃᒃᑯᓐᓂᑦ ᑮᓴᐅᔭᖁᑎᒃᓴᕆᔭᐅᕙᒃᑐᓂ ᐋᖅᑭᒃᓱᐃᓯᒪᓕᖁᓪᓗᒋᑦ ᑐᑭᓯᓇᑦᓯᐊᖅᑐᓂᒃ, ᐊᑐᕐᓂᖃᖅᑐᓂᒃ, ᐊᑭᑐᓗᐊᖖᒋᑦᑐᓂᒃ, ᐊᒻᒪᓗ ᑕᒡᕙᑲᐅᑎᒋ ᐃᑲᔪᕈᑎᒃᓴᓂᒃ ᐃᓄᖕᓄᑦ, ᑕᐃᒪᓗ ᑲᓇᑕᒥᐅᓕᒫᑦ ᐃᑲᔪᖅᑕᐅᓯᒪᓕᕈᑎᒋᓇᔭᖅᑕᖏᓂᒃ.