ᔫᓂ 28, 2022 — ᐃᓅᕕᒃ, ᓄᓇᑦᓯᐊᖅ
ᑲᓇᑕᒥ ᒐᕙᒪᖓᑦ ᐊᒻᒪᓗ ᐃᓄᐃᑦ ᓯᕗᓕᖅᑎᖏᑦ ᐱᓕᕆᖃᑎᒌᑦᓯᐊᕋᓱᒃᓯᒪᓕᖅᑐᑦ ᐱᓕᕆᐊᒃᓴᕆᔭᒥᓐᓂᒃ ᐃᓄᐃᑦ-ᑲᓇᑕᒥ ᒐᕙᒪᒃᑯᑦ ᐱᓕᕆᖃᑎᒌᖕᓂᖏᓐᓄᑦ ᑲᑎᒪᔨᕋᓛᖑᔪᑎᒍᑦ (ICPC) ᓯᕗᒻᒧᒋᐊᖅᑎᑕᐅᓯᒪᓕᖁᓪᓗᒋᑦ, ᓴᖖᒋᒃᑎᒋᐊᖅᑎᑕᐅᓯᒪᓕᕐᓗᑎᒃᓗ ᐃᓄᐃᑦ-ᑲᓇᑕᒥ ᒐᕙᒪᒃᑯᑦ ᐱᓕᕆᖃᑎᒌᖕᓂᖏᑦ, ᐊᒻᒪᓗ ᐋᖅᑮᓯᒪᓕᕐᓗᑎᒃ ᐊᒃᖢᐃᓐᓂᖅᓴᐅᓕᖅᑎᑦᓯᔾᔪᑎᒃᓴᓂᒃ ᐃᓄᐃᑦ ᓄᓇᖓᓐᓂᒃ ᒥᒃᓯᖃᑦᓯᐊᖅᑐᑎᒍᑦ ᐃᑲᔪᖅᑎᒌᖕᓂᕐᒥᒃᑎᒍᑦ ᐱᓕᕆᐊᖑᔪᓂ.
ᓇᒡᒐᔾᔭᐅᒥ, ᔫᓂ 27, ᑲᓇᑕᒥ ᒐᕙᒪᒃᑯᑦ-ᓄᓇᖃᖅᑳᖅᓯᒪᔪᓕᕆᔨᓂ ᒥᓂᔅᑕᒋᔭᐅᔪᖅ ᒫᒃ ᒥᓪᓗᕐ ᐊᒻᒪᓗ ᐃᓄᐃᑦ ᑕᐱᕇᑦ ᑲᓇᑕᒥ ᐊᖏᔪᖅᑳᖓᑦ ᓇᐃᑖᓐ ᐆᐱᑦ ᐊᓯᖏᓂᒃ ᐃᓚᒋᔭᐅᔪᓂᒃ ICPC-ᑯᑦ ᑲᑎᒪᔨᕋᓛᖏᓐᓄᑦ ᑲᑎᖖᒐᖃᑎᖃᓚᐅᖅᑐᑦ ᐃᓄᕕᐊᓗᐃᑦ ᐊᕕᒃᑐᖅᓯᒪᓂᖓᓂ ᐃᓄᐃᑦ ᓄᓇᖓᓐᓂ ᐅᖃᓪᓚᐅᓯᖃᕐᓂᐊᕐᓱᑎᒃ ᐊᒥᖅᑲᕈᑎᒋᓪᓗᒋᑦ ᓯᕗᓪᓕᖅᐸᐅᑎᑕᐅᖁᔭᐅᔪᓄᑦ, ᐊᒻᒪᓗ ᐊᑐᓕᖅᑎᑕᐅᖁᓪᓗᒋᑦ ᐃᓄᐃᑦ ᓄᓇᖓᓐᓂ ᒪᓕᒐᖁᑎᑦ, ᐊᑎᓕᐅᖅᑕᐅᓯᒪᓕᓚᐅᖅᑐᓄᑦ ᑲᓇᑕᒥ ᒐᕙᒪᖓᓐᓂᑦ ᐊᒻᒪᓗ ᐃᓄᐃᑦ ᓯᕗᓕᖅᑎᖏᓐᓂᑦ ᐊᐃᐱᕆ 2022-ᒥ.
ᒪᓕᒐᖁᑎᓕᐊᖑᓯᒪᔪᑦ ᑐᑭᒧᐊᒍᑎᐅᓂᐊᕐᒪᑕ ᖃᓄᖅ ᒐᕙᒪᑐᖃᒃᑯᓐᓂ ᐃᖅᑲᓇᐃᔭᕐᕕᐅᔪᐃᑦ ᐱᓕᕆᖃᑎᖃᕐᓂᐊᕐᓂᖏᓐᓄᑦ ᐃᓄᖕᓂᒃ ᐱᓕᕆᐊᖃᖃᑎᒋᔭᐅᔪᓂᒃ ᐱᓕᕆᐊᖑᔪᑉ ᑕᐅᑦᑐᕆᓂᐊᖅᑕᖓᓂᒃ, ᐋᖅᑭᒃᓱᐃᓂᕐᒥ ᐊᒻᒪᓗ ᓴᖅᑮᓯᒪᓕᕐᓂᕐᒥ ᓄᑖᖑᓪᓗᑎᒃ ᐊᒻᒪᓗ ᓄᑕᐅᓕᕆᐊᖅᑕᐅᓯᒪᓪᓗᑎᒃ ᒪᓕᒐᖁᑎᐅᔪᓂᒃ, ᐱᓕᕆᐊᓂᒃ, ᐱᔨᑦᓯᕋᕈᑎᒃᓴᓂᒃ ᐊᒻᒪᓗ ᐱᓕᕆᐊᖑᓕᖅᓯᒪᔪᓂᒃ ᐊᑐᓕᖅᑎᑕᐅᓯᒪᓂᐊᖅᑐᓄᑦ ᐃᓄᐃᑦ ᓄᓇᖓᓐᓂ ᐅᕝᕙᓘᓐᓃᑦ ᐃᑲᔪᕈᑎᐅᓕᕐᓂᐊᖅᑐᓄᑦ ᐃᓄᖕᓄᑦ. ᒐᕙᒪᒃᑯᑦ ᓇᓗᓇᐃᖅᓯᓯᒪᓕᕐᒪᑕ ᑮᓇᐅᔭᖁᑎᒃᓴᖃᖅᑎᑦᓯᓂᐊᕐᓂᕐᒥᓐᓂᒃ $25.4-ᒥᓕᐊᓐᑖᓚᓂᒃ ᐊᑐᖅᑕᐅᕙᓪᓕᐊᓇᔭᖅᑐᓄᑦ ᐅᑭᐅᑦ ᑕᓪᓕᒪᑦ (5) ᐊᑐᖅᐸᓪᓕᐊᑎᓪᓗᒋᑦ ᓱᒃᑲᓕᕆᐊᖅᑎᑕᐅᖁᓪᓗᒋᑦ ᐊᑐᓕᖅᑎᑕᐅᕙᓪᓕᐊᓂᖏᑦ ᒪᓕᒐᖁᑎᐅᔪᑦ. ᐃᓄᐃᑦ ᐊᒻᒪᓗ ᒐᕙᒪᑐᖃᒃᑯᑦ ᒫᓐᓇᐅᔪᖅ ᐱᓕᕆᓂᖃᓕᖅᓯᒪᕗᑦ ᐱᒋᐊᖅᑎᑦᑎᓯᒪᓕᕐᓂᒃᓴᒥᓐᓄᑦ ᐊᐅᓚᑦᓯᔨᐅᓂᕐᒧᑦ ᑐᖖᒐᕝᕕᖁᑎᒋᔭᐅᓂᐊᖅᑐᓂᒃ ᐊᒻᒪᓗ ᒐᕙᒪᒃᑯᓐᓂ ᐃᖅᑲᓇᐃᔭᕐᕕᐅᔪᓂᑦ ᐃᑲᔪᖅᓯᖅᑕᐅᓯᒪᓕᕐᓂᒃᓴᒥᓐᓄᑦ ᑕᒪᒃᑯᓄᖓ ᐱᓕᕆᐊᕆᓕᖅᓯᒪᔭᒥᓐᓄᑦ.
ᓇᒡᔭᔾᔭᐅᒥ ᑲᑎᒪᓂᖃᖅᓱᑎᒃ, ᐃᓱᒪᑕᒻᒪᕇᑦ ᐊᑎᓕᐅᕆᓯᒪᓕᓚᐅᖅᑐᑦ ᐱᓕᕆᐊᖑᔪᒪᓪᓗᑎᒃ ᐸᕐᓇᐅᑎᓕᐊᖑᓯᒪᔪᓂᒃ ᒪᕐᕉᓪᓗᑎᒃ ᐃᓄᐃᑦ-ᑲᓇᑕᒥ ᒐᕙᒪᒃᑯᑦ ᐱᓕᕆᖃᑎᒌᖕᓂᖏᓐᓄᑦ ᑲᑎᒪᔨᕋᓛᖑᔪᑦ (ICPC) ᓄᑖᖑᓪᓗᑎᒃ ᓯᕗᓪᓕᖅᐸᐅᑎᑕᐅᖁᔭᖏᓐᓂᒃ:
- ᐊᐅᓚᑦᓯᔨᐅᓂᖅ, ᓴᐳᔾᔨᔨᒋᔭᐅᓂᖅ ᐊᒻᒪᓗ ᒥᐊᓂᖅᓯᔨᒋᔭᐅᓂᖅ
- ᓇᐅᑦᓯᖅᑐᐃᕙᓐᓂᖅ, ᖃᐅᔨᒋᐊᖃᑦᑕᕐᓂᖅ, ᐊᒻᒪᓗ ᐃᓕᓐᓂᐊᕈᑎᖃᕐᐸᓪᓕᐊᓂᖅ
ᑲᓇᑕᒥ ᒐᕙᒪᖓᑦ ᑲᔪᓯᑎᑦᑎᓯᒪᓂᐊᖅᑐᑦ ᐱᓕᕆᖃᑎᖃᕐᓂᕐᒥᓐᓂᒃ ᐃᓄᐃᑦ ᓯᕗᓕᖅᑎᒋᔭᖏᓂᒃ ICPC-ᑯᑎᒍᑦ ᐱᕈᖅᑎᑦᓯᒋᐊᕐᓂᕐᒥᓐᓂ ᓄᑕᐅᓕᕆᐊᖅᑎᑕᐅᖁᓪᓗᒋᑦ ᐃᓄᐃᑦ-ᑲᓇᑕᒥ ᒐᕙᒪᒃᑯᑦ ᐱᓕᕆᖃᑎᒌᖕᓂᖏᑦ ᐊᒻᒪᓗ ᓯᕗᒻᒧᒋᐊᖅᑎᑕᐅᓯᒪᓕᖁᓪᓗᒋᑦ ᓴᐃᒻᒪᖃᑎᒌᒃᓯᒪᓕᕐᓂᒃᓴᐃᑦ ᑐᖖᒐᕝᕕᖃᖅᑎᑕᐅᓗᑎᒃ ᓇᓗᓇᐃᖅᑕᐅᓯᒪᓂᖏᓐᓄᑦ ᐱᔪᓐᓇᐅᑎᖃᕐᓂᐅᔪᓄᑦ, ᐅᐱᒋᑐᕋᐅᓐᓂᕐᒧᑦ, ᐊᒻᒪᓗ ᐱᓕᕆᖃᑎᒌᖕᓂᐅᔪᓄᑦ.
ᔫᓂ 27-ᒥ ᑲᑎᒪᓂᖃᖅᑎᓪᓗᒋᑦ ᐃᓚᒋᔭᐅᖃᑕᐅᔪᓄᑦ ᐅᑯᐊᖑᓚᐅᖅᐳ:
ᒫᒃ ᒥᓪᓗᕐ, ᑲᓇᑕᒥ ᒐᕙᒪᒃᑯᑦ-ᓄᓇᖃᖅᑳᖅᓯᒪᔪᓕᕆᔨᓂ ᒥᓂᔅᑕᒋᔭᐅᔪᖅ (ᐅᐸᒃᓯᒪᖃᑕᐅᓪᓗᓂ)
ᓇᐃᑖᓐ ᐆᐱᑦ, ᐊᖏᔪᖅᑳᖅ ᐃᓄᐃᑦ ᑕᐱᕇᑦ ᑲᓇᑕᒥ (ᐅᐸᒃᓯᒪᖃᑕᐅᓪᓗᓂ)
ᑐᕙᐃᓐ ᓯᒥᑦ, ᐃᒃᓯᕙᐅᑕᖅ ᐊᒻᒪᓗ ᐊᓪᓚᕝᕕᖕᒥ ᐃᓱᒪᑕᒻᒪᕆᒃ, ᐃᓄᕕᐊᓗᐃᑦ ᐊᕕᒃᑐᖅᓯᒪᓂᖓᓂ ᑯᐊᐳᕇᓴᓐ (ᐅᐸᒃᓯᒪᖃᑕᐅᓪᓗᓂ)
ᐊᓗᑭ ᑰᑦᑎᖅ, ᐊᖏᔪᖅᑳᖅ, ᓄᓇᕗᑦ ᑐᖖᒐᕕᒃ ᑎᒥᖁᑎᖓᑦ (ᐅᐸᒃᓯᒪᖃᑕᐅᓪᓗᓂ)
ᐲᑕ ᐋᑕᒥ, ᐊᖏᔪᖅᑳᖅ, ᒪᑭᕕᒃ ᑯᐊᐳᕇᓴᖓᑦ (ᖃᕆᑕᐅᔭᑎᒍᑦ)
ᔫᕼᐋᓐᔅ ᓛᒻᐱ, ᐊᖏᔪᖅᑳᖅ, ᓄᓇᑦᓯᐊᕗᑦ ᒐᕙᒪᖓᑦ (ᖃᕆᑕᐅᔭᑎᒍᑦ)
ᒫᓂᑲ ᐃᐊᓪ-ᑲᓇᔪᖅ, ᐊᖏᔪᖅᑳᖅ, ᐃᓄᐃᑦ ᐅᑭᐅᖅᑕᖅᑐᒥ ᑲᑎᒪᔨᖏᑦ (ᖃᕆᑕᐅᔭᑎᒍᑦ)
ᔨᐊᕆ ᓵᕐᑉ, ᐊᖏᔪᖅᑳᖅ, ᐸᐅᒃᑑᑎᑦ ᐊᕐᓇᐃᑦ ᐃᓄᐃᑦ ᑲᓇᑕᒥ (ᖃᕆᑕᐅᔭᑎᒍᑦ)
ᐳᕋᐃᐊᓐ ᐹᑐᓪ, ᐊᖏᔪᖅᑳᖅ, ᑲᓇᑕᒥ ᒪᒃᑯᒃᑐᑦ ᐃᓄᐃᑦ ᑲᑎᒪᔨᕐᔪᐊᖏᑦ (ᖃᕆᑕᐅᔭᑎᒍᑦ)
ᒥᓂᔅᑕ ᑖᓂᐅᓪ ᕚᓐᑖᓪ, ᒥᓂᔅᑕᒋᔭᐅᔪᖅ ᐅᑭᐅᖅᑕᖅᑐᒥᐅᑕᓕᕆᔨᒃᑯᑦ (ᖃᕆᑕᐅᔭᑎᒍᑦ)The ᒥᓂᔅᑕ ᑕᐃᕕᑦ ᓚᐱᑦᑎ, ᒥᓂᔅᑕᒋᔭᐅᔪᖅ ᐃᖅᑲᖅᑐᐃᕝᕕᓕᕆᔨᒃᑯᑦ (ᐅᐸᒃᓯᒪᖃᑕᐅᓪᓗᓂ)
ᒥᓂᔅᑕ ᐹᑎ ᕼᐋᔾᔫ, ᒥᓂᔅᑕᒋᔭᐅᔪᖅ ᓄᓇᖃᖅᑳᖅᓯᒪᔪᓕᕆᔨᖏᑦ ᑲᓇᑕᒥ (ᖃᕆᑕᐅᔭᑎᒍᑦ)
ᒥᓂᔅᑕ ᐆᒫᕐ ᐃᐊᓪᒑᐳᕋ, ᒥᓂᔅᑕᒋᔭᐅᔪᖅ ᐃᖏᕐᕋᐅᑎᓕᕆᔨᒃᑯᓐᓄᑦ (ᖃᕆᑕᐅᔭᑎᒍᑦ)
ᒥᓂᔅᑕ ᒨᓇ ᕗᐊᑦᑎᐄ, ᑮᓇᐅᔭᓕᕆᔨᕐᔪᐊᒃᑯᑦ ᑲᑎᒪᔨᖏᑦ (ᖃᕆᑕᐅᔭᑎᒍᑦ)
ᒥᓂᔅᑕ ᐹᑉᓘ ᕌᑦᕇᑲᔾ, ᐃᑦᓴᕐᓂᑕᓕᕆᔨᒃᑯᑦ ᑲᓇᑕᒥ (ᖃᕆᑕᐅᔭᑎᒍᑦ)
ᒥᓂᔅᑕ ᐊᓃᑕ ᐊᓈᓐᑦ, ᑲᓇᑕᒥ ᐅᓇᑕᖅᑐᒃᓴᓕᕆᔨᒃᑯᑦ (ᖃᕆᑕᐅᔭᑎᒍᑦ)
ᐅᖃᖅᑕᐅᓯᒪᔪᑦ
“ᖁᔭᓕᔪᖓ ᐅᓪᓗᒥ ᐃᓄᐃᑦ ᓄᓇᖓᓐᓃᒋᐊᓐᓂᒃ ᑲᑎᒪᖃᑎᒋᓂᐊᖅᓱᒋᑦ ᐱᓕᕆᖃᑎᒋᔭᕗᑦ ᐊᒥᖅᑲᕈᑎᒋᓪᓗᒋᑦ ᓯᕗᓪᓕᖅᐸᐅᑎᑕᐅᖁᔭᐅᔪᓄᑦ ᐃᓱᒪᑕᒻᒪᕆᖕᓂᑦ ᐊᑎᓕᖅᑕᐅᓯᒪᓕᖅᑎᓪᓗᒋᑦ ᐃᓄᐃᑦ ᓄᓇᖓᓐᓂ ᒪᓕᒐᖁᑎᑦ. ᓂᕆᐅᖕᓂᖃᖅᐳᖓ ᑲᔪᓯᑎᑦᑎᓂᐊᕐᓂᑦᑎᓐᓄᑦ ᐃᑲᔪᖅᑎᒌᒃᓱᑕ ᐱᓕᕆᓂᖃᕐᓂᐅᔪᓄᑦ ᐊᑐᓕᖅᑎᑦᑎᕙᓪᓕᐊᑎᓪᓗᑕ ᓯᕗᓪᓕᖅᐸᐅᑎᑕᐅᖁᔭᐅᔪᓂᒃ ᒪᓕᒐᖁᑎᓂᑦ ᐊᒻᒪᓗ ᓴᐃᒻᒪᖃᑎᒌᒃᓯᒪᓕᕐᓂᒃᓴᒧᑦ ᐱᓕᕆᓂᖃᕐᓂᑦᑎᓐᓂ.”
ᒥᓂᔅᑕ ᒫᒃ ᒥᓪᓗᕐ
ᒥᓂᔅᑕᒋᔭᐅᔪᖅ ᑲᓇᑕᒥ ᒐᕙᒪᒃᑯᑦ-ᓄᓇᖃᖅᑳᖅᓯᒪᔪᓕᕆᔨᓂ
“ᖁᕕᐊᓱᒃᑐᒍᑦ ᐅᓪᓗᒥ ᑐᖖᒐᓱᒃᑎᑦᑎᒋᐊᑦᑎᓐᓂᒃ ᒐᕙᒪᑐᖃᒃᑯᓐᓂ ᒥᓂᔅᑕᖏᔭᐅᔪᓂᒃ ᐃᓄᐃᑦ ᓄᓇᖓᓐᓄᑦ, ᓯᕗᒻᒧᒃᑎᑦᑎᓯᒪᓕᕆᐊᕐᓂᑦᑎᓐᓂ ᐱᒻᒪᕆᐅᑎᐅᓪᓗᑎᒃ ᐱᓕᕆᐊᕆᔭᖏᓂᒃ ᐃᓄᐃᑦ-ᑲᓇᑕᒥ ᒐᕙᒪᒃᑯᑦ ᐱᓕᕆᖃᑎᒌᖕᓂᖏᓐᓄᑦ ᑲᑎᒪᔨᕋᓛᖑᔪᓂᑦ ᐃᓄᐃᑦ ᓄᓇᖓᓐᓃᑦᓱᑕ. ᐅᑭᐅᓄᑦ ᐊᒥᓱᓄᑦ ᐋᖅᑭᒃᓱᐃᖃᑎᒌᒃᓯᒪᓕᖅᑎᓪᓗᑕ, ᖁᕕᐊᓇᓪᓚᕆᖕᒪᑦ ᑕᑯᓯᒪᓕᕆᐊᒥᒃ ᐃᓄᐃᑦ ᓄᓇᖓᓐᓂ ᒪᓕᒐᖁᑎᐅᔪᑦ ᐊᑐᓕᖅᑎᑕᐅᕙᓪᓕᐊᓯᒪᓕᕈᓐᓇᕐᓂᖏᓐᓄᑦ. ᓂᕆᐅᖕᓂᖃᖅᑐᒍᑦ ᑕᒪᒃᑯᐊ ᐱᓕᕆᐊᖑᔪᑦ ᑲᔪᓯᑎᑕᐅᓯᒪᓂᐊᕐᓂᖏᓐᓄᑦ ᐊᒻᒪᓗ ᐊᓯᖏᑕ ᒪᓕᒐᕐᔪᐊᖁᑎᓂ
ᓇᐃᑖᓐ ᐆᐱᑦ, ᐊᖏᔪᖅᑳᖅ ᐃᓄᐃᑦ ᑕᐱᕇᑦ ᑲᓇᑕᒥ
ᖃᓄᐃᓪᓚᑦᑖᕐᓂᐅᔪᓄᑦ ᓴᖅᑭᑕᐅᓯᒪᔪᑦ
ᐃᓄᐃᑦ-ᑲᓇᑕᒥ ᒐᕙᒪᒃᑯᑦ ᐱᓕᕆᖃᑎᒌᖕᓂᖏᓐᓄᑦ ᑲᑎᒪᕋᓛᖑᔪᑦ ᐱᒋᐊᖅᑎᑕᐅᓯᒪᓕᓚᐅᖅᑐᑦ ᑐᖖᒐᕝᕕᖃᖅᑎᑕᐅᓪᓗᑎᒃ ᒪᓕᒐᖁᑎᓄᑦ ᓇᓕᖅᑲᐅᖃᑎᒌᒃᓗᑎᒃ ᐱᓕᕆᖃᑎᒌᖕᓂᐊᕐᓂᖏᑕ ᐃᓄᐃᑦ ᐊᒻᒪᓗ ᑲᓇᑕᒥ ᒐᕙᒪᒃᑯᑦ ᑕᐃᒪᐅᔭᕆᐊᖃᕐᓂᖏᑕ ᓴᐃᒻᒪᖃᑎᒌᒃᓯᒪᓕᕐᓂᒃᓴᒧᑦ ᐱᓕᕆᐊᖑᔪᓄᑦ. ᑲᑎᒪᔨᕋᓛᖑᔪᑦ ᐅᑭᐅᖅ ᐊᑐᖅᐸᓪᓕᐊᑎᓪᓗᒍ ᐱᖓᓱᐃᖅᓱᑎᒃ ᑲᑎᖕᒪᓂᖃᖅᐸᒃᑐᑦ. ᐅᑭᐅᖅ ᐊᑕᐅᓰᖅᓱᒍ ᐃᒃᓯᕙᐅᑕᐅᖃᑎᒌᒃᐸᒃᑐᑦ ᑲᓇᑕᒥ ᐊᖏᔪᖅᑳᕐᔪᐊᖅ ᐊᒻᒪᓗ ᐊᖏᔪᖅᑳᖑᔪᖅ ᐃᓄᐃᑦ ᑕᐱᕇᒃᑯᓐᓄᑦ ᑲᓇᑕᒥ.
ᑲᑎᒪᔨᕋᓛᖑᔪᑦ ᐅᑯᓂᖓ ᐃᓚᖃᕐᒥᔪᑦ, ᐊᑕᐃᓐᓇᖅᑐᒥᒃ, ᐊᖏᔪᖅᑳᕆᔭᐅᔪᑦ ᐃᓄᐃᑦ ᐅᑭᐅᖅᑕᖅᑐᒥ ᑲᑎᒪᔨᖏᑦ ᑲᓇᑕᒥ, ᑲᓇᑕᒥ ᒪᒃᑯᒃᑐᑦ ᐃᓄᐃᑦ ᑲᑎᒪᔨᕐᔪᐊᖏᑦ, ᐊᒻᒪᓗ ᐸᐅᒃᑑᑎᑦ ᐊᕐᓇᐃᑦ ᐃᓄᐃᑦ ᑲᓇᑕᒥ.
ᐃᓄᐃᑦ ᓄᓇᖓᑦ ᐃᓄᖕᓂ ᓄᓇᒋᔭᐅᔪᑐᖃᐅᕗᖅ ᑲᓇᑕᒥ. ᐊᕙᑎᒋᔭᓕᒫᖏᓂ ᓄᓇᐅᑉ, ᐃᒪᐃᑦ, ᐊᒻᒪᓗ ᓯᑯᐃᑦ ᐃᓄᐃᑦ ᓄᓇᓕᕆᓂᕐᒥ ᐊᕕᒃᑐᖅᓯᒪᓂᕆᔭᖏᓐᓂ ᐃᓄᕕᐊᓗᐃᑦ ᐊᕕᒃᑐᖅᓯᒪᓂᖓᓂ ᓄᓇᑦᓯᐊᕐᒥ, ᓄᓇᕗᑦᒥ, ᓄᓇᕕᒃᒥ ᑯᐃᐸᒃ ᑕᖅᕋᖓᓂ, ᐊᒻᒪᓗ ᓄᓇᑦᓯᐊᕗᑦᒥ ᐅᑭᐅᖅᑕᖅᑐᖓᓂ ᓛᐸᑐᐊᕆᐅᑉ.