ᑎᓯᐱᕆ 2, 2022 — ᐋᑐᕙ, ᐋᓐᑎᐊᕆᐅ
ᐃᓚᒋᔭᐅᖃᑕᐅᔪᐃᑦ ᐃᓄᐃᑦ-ᑲᓇᑕᒥ ᒐᕙᒪᒃᑯᓪᓗ ᐱᓕᕆᖃᑎᒌᖕᓂᖏᓐᓄᑦ ᑲᑎᒪᔨᕋᓛᖏᑦ (ICPC) ᑲᑎᒪᖃᑎᒌᓚᐅᖅᐳᑦ ᐋᑐᕙᒥ ᐃᒃᐸᒃᓴᖅ ᐱᓕᕆᐊᕆᔭᑎᒃ ᓯᕗᒻᒧᒋᐊᖅᑎᑕᐅᓯᒪᓕᖁᓪᓗᒋᑦ ᓴᐃᒻᒪᖃᑎᒌᖕᓂᓕᕆᓂᕐᒧᑦ ᐊᒻᒪᓗ ᐱᑕᖃᓕᖅᑎᑦᑎᓯᒪᓇᔭᕐᓂᕐᒧᑦ ᐊᒃᖢᐃᓐᓂᖅᓴᐅᓕᕈᑎᒃᓴᖏᑕ ᐃᓄᐃᑦ ᓄᓇᖓᓂᕐᒥᐅᑦ ᒥᒃᓯᖃᑦᓯᐊᖅᑐᑎᒍᑦ ᐃᑲᔪᖅᑎᒌᒃᖢᑎᒃ ᐱᓕᕆᓂᖃᕐᓂᐅᔪᑎᒍᑦ.
ᐃᓄᐃᑦ ᓯᕗᓕᖅᑎᒋᔭᖏᑦ ᐊᒻᒪᓗ ᒐᕙᒪᑐᖃᒃᑯᓐᓂ ᒥᓂᔅᑕᒋᔭᐅᔪᐃᑦ ᑎᑭᓯᒪᓂᖃᓕᓚᐅᖅᐳᑦ ᓇᓗᓇᐃᒃᑯᑕᐅᔪᓐᓇᖅᑐᒧᑦ ᐱᓕᕆᖃᑎᒌᒃᓯᒪᓂᒥᓐᓄᑦ ᐊᑎᓕᐅᖅᓯᒪᓂᕐᒥᒃᑎᒍᑦ ᐃᓄᐃᑦ-ᑲᓇᑕᒥ ᒐᕙᒪᒃᑯᓪᓗ ᐋᖅᑭᒃᓱᐃᖃᑎᒌᖕᓂᕐᒧᑦ ᑐᖖᒐᕝᕕᖁᑎᒃᓴᐅᓂᐊᖅᑐᓂᒃ. ᑐᖖᒐᕝᕕᖁᑎᓕᐊᖑᓯᒪᔪᑦ ᐊᑐᓕᖅᑎᑕᐅᓂᐊᖅᐳᑦ ᐊᒻᒪᓗ ᒪᓕᒃᑕᐅᔭᕆᐊᖃᖅᑎᑕᐅᓗᑎᒃ ᐃᓄᖕᓂᑦ ᐊᒻᒪᓗ ᑕᒪᐃᓐᓂᑦ ᒐᕙᒪᑐᖃᒃᑯᓐᓂᑦ ᐱᓕᕆᓂᖃᖃᑕᐅᔪᓂᑦ ᐋᖅᑭᒃᓱᐃᖃᑎᒌᖕᓂᕐᒥ ᐱᓕᕆᓂᐅᓕᕈᒪᔪᓄᑦ.
ᑖᒃᑯᐊ ᑐᖖᒐᕝᕕᖁᑎᐅᔪᑦ ᓯᕗᓕᖃᖅᑎᑕᐅᕗᑦ ᐅᐱᒍᓱᑦᑎᐊᕐᓂᕐᓂᑦ ᐊᒻᒪᓗ ᐃᑲᔪᖅᑐᐃᓯᒪᓂᕐᓂᒃ ᐃᓄᐃᑦ ᐱᔪᖕᓇᐅᑎᖃᕐᓂᖏᑕ ᐊᒻᒪᓗ ᐃᓚᐅᖃᑕᐅᔪᓐᓇᕐᓂᖏᑕ ᐃᓱᒪᓕᐅᕈᑎᓕᐅᖅᐸᓐᓂᕐᓄᑦ ᐊᒃᑐᐃᓯᒪᓂᖃᕐᓂᐊᖅᑐᓄᑦ ᐃᓄᖕᓂᒃ, ᐊᒻᒪᓗ ᒪᓕᑦᓯᐊᖅᑎᑕᐅᓪᓗᑎᒃ ᐊᒻᒪᓗ ᑐᕌᕐᕕᒃᓴᖃᖅᑎᑕᐅᓯᒪᓪᓗᑎᒃ ᐃᑲᔪᕈᑕᐅᓂᐊᕐᓂᖏᓐᓄᑦ ᐊᑐᓕᖅᑎᑦᑎᓯᒪᓕᕐᓂᒃᓴᒧᑦ ᐃᓄᐃᑦ ᓄᓇᖓᓐᓂ ᒪᓕᒐᖁᑎᐅᔪᓂᒃ ᐊᒻᒪᓗ ᔪᓇᐃᑎᑦ ᓃᓴᒃᑯᑦ ᓇᓗᓇᐃᖅᓯᔾᔪᑎᒋᓯᒪᔭᖏᓐᓂᒃ ᓄᓇᖃᖅᑳᕐᓯᒪᔪᓕᕆᓂᕐᓄᑦ. ᑐᕌᕐᕕᒃᓴᖃᖅᑎᑕᐅᓯᒪᕗᑦ ᐊᑐᓕᖅᑎᑕᐅᓯᒪᓂᐊᕐᓂᖏᓐᓄᑦ ᑕᒪᐃᓐᓄᑦ ᑲᔪᓯᑎᑕᐅᓯᒪᓪᓗᑎᒃ ᐊᒻᒪᓗ ᓯᕗᓂᐅᓂᐊᖅᑐᒥ ᐋᖅᑭᒃᓱᐃᖃᑎᒌᓕᕋᔭᕐᓂᕐᒥᓐᓄᑦ, ᐃᓚᖃᖅᑎᓪᓗᒋᑦ ᐊᔾᔨᒌᖖᒋᑦᑑᓂᐅᔪᓄᑦ ᑐᖖᒐᕝᕕᖃᖅᑎᑕᐅᓯᒪᓪᓗᑎᒃ ᓄᓇᖃᖅᑳᖅᓯᒪᔪᐃᑦ ᐋᓐᓂᐊᖅᓯᐅᕐᑎᓕᕆᓂᕐᒥ ᒪᓕᒐᖁᑎᓄᑦ.
ᑎᓯᐱᕆ 1-ᒥ ᑲᑎᒪᓂᖓᑦ, ᐃᒃᓯᕙᐅᑕᖃᖅᓱᑎᒃ ᒥᓂᔅᑕ ᒫᒃ ᒥᓪᓗᕐ, ᒥᓂᔅᑕᒋᔭᐅᔪᖅ ᒐᕙᒪᒃᑯ-ᓄᓇᖃᖅᑳᖅᓯᒪᔪᓕᕆᔨᒃᑯᓐᓄᑦ, ᐊᒻᒪᓗ ᐊᖏᔪᖅᑳᖅ ᓇᑖᓐ ᐆᐱᑦ, ᐃᓄᐃᑦ ᑕᐱᕇᒃᑯᑦ ᑲᓇᑕᒥ, ᑐᕌᕐᕕᒃᓴᖃᖅᑎᑦᑎᓚᐅᖅᐳᒃ ᑲᔪᓯᑎᑕᐅᓯᒪᓪᓗᑎᒃ ICPC-ᑯᑦ ᐱᓕᕆᐊᖏᓐᓂᒃ ᑐᕌᖓᓪᓗᑎᒃ ᐃᓄᐃᑦ ᓄᓇᓕᕆᓂᕐᓄᑦ ᐱᓕᕆᐊᖑᔪᒃᓴᑦ ᐊᑐᓕᖅᑎᑕᐅᓯᒪᓂᒃᓴᖏᓐᓄᑦ, ᐊᑐᓕᖅᑎᑕᐅᓯᒪᓂᒃᓴᖏᓐᓄᑦ ᐃᓄᐃᑦ ᓄᓇᖓᓐᓂ ᒪᓕᒐᖁᑎᐅᔪᑦ, ᐊᒻᒪᓗ ᐃᓄᒃᑐᑦ ᐅᖃᐅᓯᖅ ᐆᒻᒪᖅᑎᑕᐅᒋᐊᒃᑲᓐᓂᕐᓂᖓᓄᑦ ᐱᓕᕆᐊᖑᔪᑦ. ICPC-ᑯᑦ ᑲᑎᒪᔨᕋᓛᖏᓐᓄᑦ ᐃᓚᒋᔭᐅᔪᑦ ᐊᑎᓕᐅᕆᓚᐅᖅᐳᑦ ᑲᑎᒪᔨᕋᓛᒃᑯᑦ ᐃᓄᐃᑦ ᓄᓇᖓᓐᓂ ᐃᒡᓗᓕᕆᓂᕐᒧᑦ ᐊᑐᓕᖅᑎᑕᐅᓯᒪᓕᕐᓂᒃᓴᖏᓐᓄᑦ ᐸᕐᓇᐅᑎᓕᐊᖑᓯᒪᔪᑦ, ᐃᓚᖃᖅᑎᓪᓗᒋᑦ ᓯᓚᕐᔪᐊᓕᒫᒥ ᐃᓄᐃᑦ ᓯᕗᓪᓕᖅᐸᐅᑎᑕᐅᖁᔭᖏᓐᓄᑦ ᐱᓕᕆᐊᓄᑦ ᐸᕐᓇᐅᑎᒋᔭᐅᓯᒪᔪᓂᒃ.
ICPC-ᑯᑦ ᓯᕗᒻᒧᒋᐊᖅᓯᒪᓕᖅᑐᑦ ᐱᓕᕆᐊᕆᔭᒥᓐᓂᒃ ᐊᒥᖅᑲᕈᑕᐅᓪᓗᑎᒃ ᐃᓄᐃᑦ ᐊᒻᒪᓗ ᒐᕙᒪᑐᖃᒃᑯᑦ ᓯᕗᓪᓕᖅᐸᐅᑎᑕᒃᓴᖁᑎᖏᓄᑦ ᐱᔾᔪᑎᖃᖅᑐᓂᒃ. ᑲᑎᒪᔨᕋᓛᑦ ᐅᖃᓪᓚᐅᓯᖃᓚᐅᕐᐳᑦ ᑲᒥᖅᑲᕈᑎᒋᓪᓗᒍ ᐱᓕᕆᐊᒃᓴᖃᕐᓂᕐᒥᓐᓄᑦ ᓄᑕᐅᓕᕆᐊᖅᑎᑕᐅᓯᒪᓪᓗᑎᒃ ᐃᓄᐃᑦ-ᒐᕙᒪᒃᑯᑦ ᐱᓕᕆᖃᑎᒌᖕᓂᖏᑦ ᐊᒻᒪᓗ ᓴᐃᒻᒪᖃᑎᒌᒃᓯᒪᓕᕐᓂᕐᒧᑦ ᑐᖖᒐᕝᕕᖃᖅᑎᑕᐅᓪᓗᑎᒃ ᐃᓕᑕᕆᔭᐅᓯᒪᓕᕐᓂᒃᓴᖏᑕ ᐱᔪᓐᓇᐅᑎᒋᔭᐅᔪᓄᑦ, ᐅᐱᒋᑐᕋᐅᓐᓂᖏᓐᓄᑦ, ᐃᑲᔪᖅᑎᒌᑦᓯᐊᕐᓂᕐᓄᑦ ᐊᒻᒪᓗ ᐱᓕᕆᖃᑎᒌᖕᓂᐅᔪᓄᑦ.
ᐅᑯᐊ ᐅᓪᓗᒥ ᑲᑎᒪᓂᐅᔪᓄᑦ ᐃᓚᒋᔭᐅᖃᑕᐅᓚᐅᖅᑐᑦ:
- ᓇᑖᓐ ᐆᐱᑦ, ᐊᖏᔪᖅᑳᖅ, ᐃᓄᐃᑦ ᑕᐱᕇᑦ ᑲᓇᑕᒥ
- ᑐᕙᐃᓐ ᓯᒥᑦ, ᐃᒃᓯᕙᐅᑕᖅ ᐊᒻᒪᓗ ᐊᓪᓚᕝᕕᖕᒥ ᐃᓱᒪᑕᒻᒪᕆᒃ, ᐃᓄᕕᐊᓗᐃᑦ ᐊᕕᒃᑐᖅᓯᒪᓂᖓᓂ ᑯᐊᐳᕇᓴᖓᑦ
- ᐊᓗᑭ ᑰᑦᑎᖅ, ᐊᖏᔪᖅᑳᖅ, ᓄᓇᕗᑦ ᑐᖖᒐᕝᕕᒃᑯᑦ ᑎᒥᖓᑦ
- ᔫᕼᐋᓐᔅ ᓛᒻᐱ, ᐊᖏᔪᖅᑳᖅ, ᓄᓇᑦᓯᐊᕗᑦ
- ᐲᑕ ᐋᑕᒥ, ᐊᖏᔪᖅᑳᖅ, ᒪᑭᕕᒃ
- ᓖᓴ ᖁᐱᖅᕈᐊᓗᒃ, ᐊᖏᔪᖅᑳᖅ, ᐃᓄᐃᑦ ᐅᑭᐅᖅᑕᖅᑐᒥ ᑲᑎᒪᔨᖏᑦ
- ᔨᐊᕆ ᓵᕐᑉ, ᐊᖏᔪᖅᑳᖅ, ᐸᐅᒃᑑᑎᑦ ᐃᓄᐃᑦ ᐊᕐᓇᐃᑦ ᑲᓇᑕᒥ
- ᐱᐊᕆ ᐹᑐᓪ, ᐊᖏᔪᖅᑳᖅ, ᑲᓇᑕᒥ ᒪᒃᑯᒃᑐᑦ ᐃᓄᐃᑦ ᑲᑎᒪᔨᖏᑦ
- ᒫᒃ ᒥᓪᓗᕐ, ᒥᓂᔅᑕᒋᔭᐅᔪᖅ ᒐᕙᒪᒃᑯᑦ-ᓄᓇᖃᖅᑳᕐᓯᒪᔪᓕᕆᔨᖏᑦ ᑲᓇᑕᒥ
- ᑖᓐ ᕚᓐᑕᓪ, ᒥᓂᔅᑕᒋᔭᐅᔪᖅ ᐅᑭᐅᖅᑕᖅᑐᒥᐅᑕᓕᕆᔨᒃᑯᑦ ᑲᓇᑕᒥ
- ᐹᑎ ᕼᐋᔾᑑ, ᒥᓂᔅᑕᒋᔭᐅᔪᖅ ᓄᓇᖃᖅᑳᕐᓯᒪᔪᓕᕆᔨᖏᑦ ᑲᓇᑕᒥ
- ᐋᒥᑦ ᕼᐆᓯᓐ, ᒥᓂᔅᑕᒋᔭᐅᔪᖅ ᐃᒡᓗᓕᕆᔨᑦ ᐊᒻᒪᓗ ᐊᔾᔨᒌᖖᒋᓐᓂᓕᕆᔨᒃᑯᓐᓄᑦ ᐊᒻᒪᓗ ᐃᓚᐅᖃᑕᐅᑎᑦᑎᕙᓐᓂᓕᕆᔨᒃᑯᓐᓄᑦ
- ᐆᒫᕐ ᐃᐊᓪᒐᑉᕋ, ᒥᓂᔅᑕᒋᔭᐅᔪᖅ ᐃᖏᕐᕋᐅᑎᓕᕆᔨᒃᑯᓐᓂ
- ᒨᓇ ᕗᐊᑦᑎᐄ, ᐊᖏᔪᖅᑳᖅ ᑮᓇᐅᔭᓕᕆᔨᒃᑯᑦ ᑲᑎᒪᔨᖏᓐᓄᑦ
ᐅᖃᖅᑕᐅᓯᒪᔪᑦ:
“ᓴᕆᒪᒋᓪᓚᕆᒃᐸᒃᑲ ᓯᕗᒻᒧᒋᐊᖅᑎᑦᑎᓯᒪᓂᖅᐳᑦ ᐱᕈᖅᑎᑦᑎᓯᒪᓕᕆᐊᒥᒃ ᐊᒃᖢᐃᑦᑑᓕᕐᓗᑎᒃ ᓯᕗᓂᒃᓴᖃᖅᑎᑦᑎᓯᒪᓕᕋᔭᕐᓂᕐᒧᑦ ᐃᓄᖕᓂᒃ ᑲᓇᑕᒥ. ᓴᓇᕐᕈᑎᒃᓴᐅᔪᑦ ᓲᕐᓗ ᐃᓄᐃᑦ ᓄᓇᖓᓂ ᒪᓕᒐᖁᑏᑦ, ᐊᒻᒪᓗ ᐅᓪᓗᒥ ᐃᓄᐃᑦ-ᒐᕙᒪᒃᑯᑦ ᐋᖅᑭᒃᓱᐃᖃᑎᒌᖕᓂᖓᑦ ᑐᖖᒐᕝᕕᖁᑎᒃᓴᐅᓂᐊᖅᑐᓂᒃ ᐱᑕᖃᓕᖅᑎᑕᐅᒻᒪᑕ ᑐᖖᒐᕝᕕᒃᓴᕆᔪᓐᓇᖅᑕᑦᑎᓐᓄᑦ ᓯᕗᒻᒧᒋᐊᖅᑎᑕᐅᓯᒪᓕᖁᓪᓗᒋᑦ ᐱᓕᕆᐊᕆᔭᕗᑦ ᐊᒻᒪᓗ ᓯᕗᒻᒧᒋᐊᖅᑎᑕᐅᓯᒪᓕᖁᓪᓗᒋᑦ ᐱᔾᔪᑎᐅᓗᐊᖅᑐᓄᑦ ᓴᖅᑮᓯᒪᓕᕋᔭᕐᓂᕐᒥᒃ ᐊᓯᔾᔩᓯᒪᓕᕈᑎᐅᔪᓐᓇᖅᑐᓂᒃ ᐃᓄᐃᑦ-ᒐᕙᒪᒃᑯᑦ ᐱᓕᕆᐊᖃᖃᑎᒌᒃᐸᓐᓂᖏᓐᓄᑦ.”
ᓇᑖᓐ ᐆᐱᑦ, ᐊᖏᔪᖅᑳᖅ, ᐃᓄᐃᑦ ᑕᐱᕇᑦ ᑲᓇᑕᒥ
“ᖁᕕᐊᓱᒃᐳᖓ ᐅᓪᓗᒥ ᐋᖅᑭᒃᓱᐃᖃᑎᒌᖕᓂᕐᒧᑦ ᑐᖖᒐᕝᕕᖁᑎᒃᓴᐃᑦ ᐊᑎᓕᐅᖅᑕᐅᓯᒪᓕᕐᓂᖏᑕ. ᑖᒃᑯᐊ ᑐᖖᒐᕝᕕᖁᑎᒃᓴᐃᑦ ᐱᓕᕆᓂᐅᕙᒃᑐᓄᑦ ᐋᖅᑮᓯᒪᓕᕈᑎᐅᓂᐊᕐᒪᑕ ᐃᓄᖕᓄᑐᐊᖑᖖᒋᑦᑐᖅ ᑭᓯᐊᓂᓕ ᑭᒃᑯᑐᐃᓐᓇᓄᑦ ᑲᓇᑕᒥᐅᑕᐅᔪᓄᑦ. ᓂᕆᐅᖕᓂᖃᖅᐳᖓ ᑲᑐᔾᔨᓂᖃᕐᓗᑕ ᐱᓕᕆᐊᖃᖃᑎᖃᕐᓂᐊᕋᑦᑕ ᐃᓄᐃᑦ ᓯᕗᓕᖅᑎᒋᔭᖏᓂᒃ ᒪᓕᒃᑎᑕᐅᓯᒪᔪᓂᒃ ᓴᐃᒻᒪᖃᑎᒌᒃᓯᒪᓕᕐᓂᕐᓄᑦ.”
ᒥᓂᔅᑕ ᒫᒃ ᒥᓪᓗᕐ
ᒥᓂᔅᑕᒋᔭᐅᔪᖅ ᒐᕙᒪᒃᑯᑦ-ᓄᓇᖃᖅᑳᕐᓯᒪᔪᓕᕆᔨᖏᑦ ᑲᓇᑕᒥ
ᓇᐃᓈᖅᓯᒪᓪᓗᒋᑦ ᖃᓄᐃᓪᓚᑦᑖᕐᓂᐅᔪᓄᑦ:
- ᐊᐃᐱᕆ 21, 2022-ᒥ, ᑲᓇᑕᒥ ᐊᖏᔪᖅᑳᕐᔪᐊᖅ, ᔭᔅᑎᓐ ᑐᕉᑑ, ᐊᒻᒪᓗ ᐊᖏᔪᖅᑳᖅ ᓇᑖᓐ ᐆᐱᑦ ᐃᓄᐃᑦ ᑕᐱᕇᒃᑯᓐᓂᑦ ᑲᓇᑕᒥ, ᐃᓚᒋᓪᓗᒋᑦ ᒐᕙᒪᑐᖃᒃᑯᑦ ᒥᓂᔅᑕᐃᑦ ᑲᑎᒪᔨᖏᓐᓄᑦ ᒥᓂᔅᑕᒋᔭᐅᔪᑦ ᐊᒻᒪᓗ ᓂᕈᐊᖅᑕᐅᓯᒪᓪᓗᑎᒃ ᐃᓄᐃᑦ ᓯᕗᓕᖅᑎᒋᔭᖏᑦ ᐃᓄᕕᐊᓗᐃᑦ ᐊᕕᒃᑐᖅᓯᒪᓂᖓᓂ ᑯᐊᐳᕇᓴᖓᓐᓂ, ᓄᓇᕗᑦ ᑐᖖᒐᕕᒃ ᑎᒥᖓᓂᑦ, ᒪᑭᕕᒃ ᑯᐊᐳᕇᓴᖓᓂᑦ, ᐊᒻᒪᓗ ᓄᓇᑦᓯᐊᕗᑦ ᒐᕙᒪᖓᓂᑦ, ᐊᑎᓕᐅᕆᓚᐅᖅᑐᑦ ᓄᑖᖑᓪᓗᑎᒃ, ᐊᔾᔨᖃᕋᑎᒃ ᐃᓄᐃᑦ ᓄᓇᖓᓂ ᒪᓕᒐᖁᑎᓂᒃᑲᑎᒪᓂᖃᖅᑎᓪᓗᒋᑦ ᐃᓄᐃᑦ-ᒐᕙᒪᒃᑯᑦ ᐱᓕᕆᖃᑎᒌᖕᓂᖏᓐᓄᑦ ᑲᑎᒪᔨᕋᓛᖑᔪᑦ (ICPC). ᑖᒃᑯᐊ ᓇᓗᓇᐃᖅᓯᔾᔪᑕᐅᕗᑦ ᓯᕗᓪᓕᖅᐹᒥᒃ ᑲᓇᑕᒥ ᒐᕙᒪᒃᑯᑦ ᐋᖅᑭᒃᓱᐃᖃᑕᐅᓯᒪᓂᖏᓐᓂᒃ ᖁᓛᒍᐊᖅᑎᑕᐅᓯᒪᓪᓗᑎᒃ, ᑕᒪᕐᒥᐅᓪᓗᑎᒃ ᒐᕙᒪᐅᔪᑦ ᒪᓕᒐᖁᑎᓕᐅᕐᓂᕐᓄᑦ ᑕᐃᒪᓐᓇᐃᑦᑐᓂᒃ.
- ᐃᓄᐃᑦ ᓄᓇᖓᓂ ᒪᓕᒐᖁᑏᑦ ᓇᓗᓇᐃᔭᐃᓯᒪᕗᑦ ᐱᓕᕆᓂᖃᕐᕕᐅᔪᓄᑦ ᖃᓄᖅ ᑕᐅᑦᑐᖃᕐᓂᐊᕐᓂᖏᑕ ᐊᒻᒪᓗ ᓄᑕᐅᓕᕆᐊᖅᑎᑕᐅᓯᒪᓂᖏᑕ ᑕᒪᕐᒥᒃ ᒐᕙᒪᑐᖃᒃᑯᓐᓂ ᒪᓕᒐᖁᑎᒋᔭᐅᔪᑦ, ᐱᓕᕆᐊᖑᔪᑦ, ᐱᔨᑦᓯᕋᕈᑎᒃᓴᐅᔪᑦ ᐊᒻᒪᓗ ᐱᓕᕆᓂᖃᕐᕕᐅᓕᖅᓯᒪᔪᑦ ᑐᕌᖓᓂᖃᖅᖢᑎᒃ ᐊᑐᓕᖅᑎᑕᐅᓯᒪᔪᓄᑦ ᐃᓄᐃᑦ ᓄᓇᖓᓐᓂ ᐅᕝᕙᓘᓐᓃᑦ ᐃᑲᔪᕈᑎᒃᓴᐅᔪᓄᑦ ᐃᓄᖕᓄᑦ. ᑕᐃᒪᓐᓇ ᐱᓕᕆᓂᖃᕐᓂᐅᔪᑦ ᐱᐅᓯᒋᐊᖅᑎᑦᓯᓂᐊᖅᑐᑦ ᐋᖅᑭᒃᓱᐃᓂᐅᕙᒃᑐᓄᑦ ᐃᓄᐃᑦ ᓄᓇᖓᓐᓂᓕᒫᖅ ᐊᒻᒪᓗ ᐱᓕᕆᖃᑕᐅᑎᑕᐅᓕᕐᓂᒃᓴᖏᑕ ᐃᓄᐃᑦ ᑕᒪᒃᑯᓇᓂ ᐱᓕᕆᐊᖑᕙᓪᓕᐊᔪᓂ.
- ᐃᓄᐃᑦ-ᒐᕙᒪᒃᑯᑦ ᐱᓕᕆᐊᖃᖃᑎᒌᖕᓂᖏᓐᓄᑦ ᑲᑎᒪᔨᕋᓛᖏᑦ ᐱᒋᐊᖅᑎᑕᐅᓚᐅᖅᓯᒪᕗᑦ ᑐᖖᒐᕝᕕᖃᖅᑎᑕᐅᓪᓗᑎᒃ ᓇᓕᖅᑲᕇᒡᓗᑎᒃ ᐱᓕᕆᐊᖃᖃᑎᒌᖕᓂᐊᕐᓂᖏᓐᓄᑦ ᐃᓄᐃᑦ ᐊᒻᒪᓗ ᑲᓇᑕᒥ ᒐᕙᒪᐅᔪᑦ ᑕᐃᒪᐅᔭᕆᐊᖃᓪᓚᕆᒃᖢᑎᒃ ᓴᐃᒻᒪᖃᑎᒌᖕᓂᓕᕆᓂᕐᒥ ᐱᓕᕆᐊᖑᕙᓪᓕᐊᔪᓄᑦ.
- ᑲᑎᒪᔨᕋᓛᖑᔪᑦ ᐅᑭᐅᖅ ᐊᑐᖅᐸᓪᓕᐊᑎᓪᓗᒍ ᐱᖓᓱᐃᖅᓱᑎᒃ ᑲᑎᒪᓂᖃᖅᐸᒃᑐᑦ ᐊᒻᒪᓗ ᐃᒃᓯᕙᐅᑕᕆᔭᐅᕙᒃᑐᑦ ᐊᖏᔪᖅᑳᖓᓂᑦ ᓇᑖᓐ ᐆᐱᓐ, ᐃᓄᐃᑦ ᑕᐱᕇᑦ ᑲᓇᑕᒥ, ᐊᒻᒪᓗ ᒫᒃ ᒥᓪᓗᕐ, ᒥᓂᔅᑕᒋᔭᐅᔪᖅ ᒐᕙᒪᒃᑯᑦ-ᓄᓇᖃᖅᑳᕐᓯᒪᔪᓕᕆᔨᖏᑦ ᑲᓇᑕᒥ. ᐅᑭᐅᖅ ᐊᑕᐅᓯᐊᖅᖢᒍ, ICPC-ᑯᑦ ᑲᑎᒪᓂᖓᑦ ᐃᒃᓯᕙᐅᑕᖃᖅᐸᒃᑐᑦ ᐊᖏᔪᖅᑳᖅ ᐆᐱᑦᒥᒃ ᐊᒻᒪᓗ ᑲᓇᑕᒥ ᐊᖏᔪᖅᑳᕐᔪᐊᒥᒃ ᔭᔅᑕ ᑐᕉᑑ. .
- ᑲᑎᒪᔨᕋᓛᑦ ᐃᓚᐅᖃᑕᐅᑎᑦᑎᕙᒻᒥᔪᑦ ᐊᑕᐃᓐᓇᖅᑐᒥᒃ ᐃᓚᒋᔭᐅᕙᓐᓂᖏᓂᒃ ᐊᖏᔪᖅᑳᕆᔭᐅᔪᓂᒃ ᐃᓄᐃᑦ ᐅᑭᐅᖅᑕᖅᑐᒥ ᑲᑎᒪᔨᖏᓐᓄᑦ ᑲᓇᑕᒥ, ᑲᓇᑕᒥ ᒪᒃᑯᒃᑐᑦ ᐃᓄᐃᑦ ᑲᑎᒪᔨᖏᓐᓄᑦ, ᐊᒻᒪᓗ ᐸᐅᒃᑑᑎᑦ ᐃᓄᐃᑦ ᐊᕐᓇᐃᑦ ᑲᓇᑕᒥ.
- ᐃᓄᐃᑦ ᓄᓇᖓᑦ ᐃᓄᖕᓄᑦ ᓄᓇᒋᔭᐅᔪᑐᖃᐅᒻᒪᑦ ᑲᓇᑕᒥ. ᐊᕙᑎᒋᔭᐅᔪᓂ ᓄᓇᓂᒃ, ᐃᒪᕐᓂᒃ, ᐊᒻᒪᓗ ᓯᑯᖃᕐᕕᐅᓂᕐᓂᒃ ᐃᓄᐃᑦ ᓄᓇᓕᕆᓂᕐᒥ ᐊᕕᒃᑐᖅᓯᒪᓂᐅᔪᓂ ᐃᓄᕕᐊᓗᐃᑦ ᐊᕕᒃᑐᖅᓯᒪᓂᖓᓂ ᓄᓇᑦᓯᐊᕐᒥ ᐊᒻᒪᓗ ᔫᑳᓐᒥ, ᓄᓇᕗᑦ, ᓄᓇᕕᒃ ᑯᐃᐸᒃ ᑕᖅᕋᖓᓂ, ᐊᒻᒪᓗ ᓄᓇᑦᓯᐊᕗᑦ ᓛᐸᑐᐊᕆᐅᑉ ᐅᑭᐅᖅᑕᖅᑐᖓᓂ.
ᑕᒪᒃᑯᓄᖓ ᑐᕌᖓᓪᓗᑎᒃ ᖃᕆᑕᐅᔭᑎᒍᑦ ᐱᑐᒃᓯᒪᕝᕕᖏᑦ
ᐃᓄᐃᑦ-ᑲᓇᑕᒥ ᒐᕙᒪᒃᑯᑦ ᐱᓕᕆᐊᖃᖃᑎᒌᖕᓂᖏᓐᓄᑦ ᓇᓗᓇᐃᖅᓯᔾᔪᑎᑦ
ICPC-ᑯᑦ ᑐᖖᒐᕝᕕᖁᑎᖏᑦ ᐋᖅᑭᒃᓱᐃᖃᑎᒌᖕᓂᐊᕐᓂᕐᒧᑦ