ᑎᓯᐱᕆ, 13, 2021 — ᐋᑐᕙ, ᐋᓐᑎᐊᕆᐅ
ᐅᓪᓗᒥ, ᒥᓂᔅᑕ ᒫᒃ ᒥᓪᓗᕐ, ᒥᓂᔅᑕᒋᔭᐅᔪᖅ ᒐᕙᒪᑐᖃᒃᑯᑦ-ᓄᓇᖃᖅᑳᖅᓯᒪᔪᓕᕆᔨᖏᑦ ᐊᒻᒪᓗ ᑲᓇᑕᒥ ᐅᑭᐅᖅᑕᖅᑐᒥᐅᑕᓕᕆᔨᒃᑯᓐᓄᑦ, ᐊᒻᒪᓗ ᓇᐃᑖᓐ ᐆᐱᑦ, ᐊᖏᔪᖅᑳᕆᔭᐅᔪᖅ ᐃᓄᐃᑦ ᑕᐱᕇᑦ ᑲᓇᑕᒥ, ᐃᒃᓯᕙᐅᑕᐅᖃᑎᒌᓚᐅᖅᐳᒃ ᐃᓄᐃᑦ ᒐᕙᒪᒃᑯᑦ ᐱᓕᕆᖃᑎᒌᖕᓂᖏᑕ ᑲᑎᒪᔨᕋᓛᖏᑦ (ICPC) ᑲᑎᒪᓂᖃᖅᑎᓪᓗᒋᑦ ᖃᕆᑕᐅᔭᑎᒍᑦ ᐊᒻᒪᓗ ᐅᐸᒍᑎᓯᒪᓪᓗᑎᒃ Shaw Convention Centre-ᒥ (ᓵ ᑲᓐᕕᓐᓴᓐ ᓯᓐᑐᕐ). ᑲᑎᖖᒐᓂᖓᑦ ᐃᓂᖃᕈᓐᓇᖅᑎᑦᓯᓚᐅᕐᐳᖅ ᐃᓄᐃᑦ ᓯᕗᓕᖅᑎᒋᔭᖏᓂᒃ ᑲᓇᑕᓕᒫᒥ ᑲᑐᔾᔨᖃᑎᒌᖑᔪᓂᑦ ᐊᒻᒪᓗ ᐊᑐᓂ ᓯᑕᒪᐅᓪᓗᑎᒃ ᓄᓇᓕᕆᓂᕐᒥ ᑲᑐᔾᔨᖃᑎᒌᖑᔪᓂᑦ, ᐃᓚᖃᖅᓱᑎᒃ ᒐᕙᒪᑐᖃᒃᑯᓐᓂᑦ ᒥᓂᔅᑕᒋᔭᐅᔪᓂᒃ ᐱᕙᓪᓕᐊᔪᓕᕆᑎᓪᓗᒋᑦ ᐊᒃᑐᐃᓂᖃᖅᑐᓄᑦ ᐃᓄᐃᑦ ᓄᓇᖏᓐᓂᕐᒥᐅᓄᑦ.
ᐅᖃᓪᓚᐅᓯᖃᕐᑎᓪᓗᒋᑦ ᐱᔾᔪᑎᒋᔭᐅᓗᐊᓚᐅᕐᐳᖅ ᑲᔪᓯᑎᑕᐅᓯᒪᔭᕆᐊᖃᕐᓂᖓ ᐋᖅᑭᒃᓱᐃᖃᑎᒌᖕᓂᕐᒧᑦ ᐃᓄᐃᑦ ᓄᓇᖓᓂ ᒪᓕᒐᖁᑎᒥᒃ, ᐅᖃᓪᓚᐅᓯᖃᕆᓪᓗᑎᒃ ᐃᓅᓯᓕᕆᓂᕐᒥ ᑮᓇᐅᔭᓕᐅᕋᓱᐊᕈᑎᐅᕙᒃᑐᓄᑦ ᓇᓕᖅᑲᐅᑎᑕᐅᖖᒋᓐᓂᐅᔪᓄᑦ ᐃᓄᐃᑦ ᓄᓇᓗᒃᑖᕆᔭᖓᓂ.
ᑲᓇᑕᐅᑉ ᒐᕙᒪᖓᑦ ᐊᒻᒪᓗ ᐃᓄᐃᑦ ᓯᕗᓕᖅᑎᖏᑦ ᑲᔪᓯᑎᑦᓯᓯᒪᓂᐊᕐᒥᔪᑦ ᐱᒻᒪᕆᐅᓪᓗᑎᒃ ᐱᓕᕆᐊᖃᖃᑎᒌᖕᓂᕐᒥᓐᓂᒃ ᑲᓇᑕᒥ ᐱᓕᕆᐊᓄᑦ ᐸᕐᓇᐅᑎᓂᒃ, ᐃᓄᐃᑦ ᐱᓕᕆᐊᓄᑦ ᐸᕐᓇᐅᑎᖏᓂᒃ ᐊᒻᒪᓗ ᒐᕙᒪᑐᖃᒃᑯᑦ ᓇᐅᒃᑰᕐᕕᒃᓴᖏᑦ ᐱᓕᕆᐊᖑᓕᖁᓪᓗᒋᑦ ᐅᒡᒍᐊᕐᓇᒻᒪᕆᒃᑑᓪᓗᑎᒃ ᐊᓯᐅᔨᔭᐅᓯᒪᔪᑦ ᐊᒻᒪᓗ ᐃᓄᐊᖅᑕᐅᓯᒪᔪᑦ ᓄᓇᖃᖅᑳᖅᓯᒪᔪᐃᑦ ᐊᕐᓇᖏᓐᓂ, ᓂᕕᐊᖅᓯᐊᖏᓂ ᐊᒻᒪᓗ 2SLGBTQQIA+-ᖑᓪᓗᑎᒃ ᐃᓅᖃᑎᒌᒃᑐᓄᑦ.
ᐊᓯᖏᑦ ᐅᓪᓗᒥ ᑲᑎᒪᓂᐅᔪᒥ ᐃᓚᐅᖃᑕᐅᔪᓄᑦ ᐃᓚᖃᓚᐅᖅᑐᑦ:
- ᑐᐄᓐ ᓯᒥᑦ, ᐃᓄᕕᐊᓗᐃᑦ ᐊᕕᒃᑐᖅᓯᒪᓂᖓᓂ ᑯᐊᐳᕇᓴᖓᑦ
- ᐊᓗᑭ ᑰᑦᑎᖅ, ᓄᓇᕗᑦ ᑐᖖᒐᕕᒃ ᑎᒥᖓᑦ
- ᐲᑕ ᐋᑕᒥ, ᒪᑭᕕᒃ ᑯᐊᐳᕇᓴᖓᑦ
- ᔫᕼᐋᓐᔅ ᓛᒻᐱ, ᓄᓇᑦᓯᐊᕗᑦ ᒐᕙᒪᖓᑦ
- ᒫᓂᑲ ᐃᐊᓪ-ᑲᓇᔪᖅ, ᐃᓄᐃᑦ ᐅᑭᐅᖅᑕᖅᑐᒥ ᑲᑎᒪᔨᖏᑦ
- ᕆᐱᑲ ᑲᓪᓗᒃ, ᐸᐅᒃᑑᑎᑦ ᐊᕐᓇᐃᑦ ᑲᓇᑕᒥ
- ᐳᕋᐃᐊᓐ ᐹᑐᓪ, ᑲᓇᑕᒥ ᒪᒃᑯᒃᑐᑦ ᐃᓄᐃᑦ ᑲᑎᒪᔨᕐᔪᐊᖏᑦ
- ᒥᓂᔅᑕ ᑖᓂᐅᓪ ᕚᓐᑖᓪ, ᐅᑭᐅᖅᑕᖅᑐᒥᐅᑕᓕᕆᔨᒃᑯᓐᓄᑦ ᒥᓂᔅᑕ
- ᒥᓂᔅᑕ ᔪᐃᔅ ᒨᕆ, ᒥᓂᔅᑕᒋᔭᐅᔪᖅ ᐃᖃᓪᓕᕿᔨᒃᑯᑦ, ᑕᕆᐅᓕᕆᔨᑦ ᐊᒻᒪᓗ ᑲᓇᑕᒥ ᐅᒥᐊᕐᔪᐊᒃᑯᑦ ᒥᐊᓂᖅᓯᔨᒃᑯᓐᓄᑦ (CCG)
- ᒥᓂᔅᑕ ᒨᓇ ᕗᐊᑦᑎᐄ, ᑲᓇᑕᒥ ᑲᑎᒪᔨᕐᔪᐊᒃᑯᓐᓄᑦ ᐊᖏᔪᖅᑳᖅ
- ᒥᓂᔅᑕ ᐹᑉᓘ ᕌᑦᑐᕇᒐᔅ, ᑲᓇᑕᒥ ᐱᐅᓯᑐᖃᓕᕆᔨᒃᑯᓐᓄᑦ ᒥᓂᔅᑕ
- ᒥᓂᔅᑕ ᑕᐃᕕᑦ ᓚᒥᐊᑦᑎ, ᐃᖅᑲᖅᑐᐃᕝᕕᓕᕆᔨᒃᑯᓐᓄᑦ ᒥᓂᔅᑕ
- ᒥᓂᔅᑕ ᐹᑎ ᕼᐋᔾᔫ, ᑲᓇᑕᒥ ᓄᓇᖃᖅᑳᕐᓯᒪᔪᓕᕆᔨᒃᑯᓐᓄᑦ ᒥᓂᔅᑕ
- ᒥᓂᔅᑕ ᐆᒫᕐ ᐃᓪᒑᐳᕋ, ᐃᖏᕐᕋᐅᑎᓕᕆᔨᒃᑯᓐᓄᑦ ᒥᓂᔅᑕ
ᐅᖃᖅᑕᐅᔪᑦ
“ᐅᓪᓗᒥ ᐊᑦᑕᑕᖅᓯᒪᖃᑎᒋᔪᖕᓇᖅᓯᓚᐅᕋᑦᑎᒍ ᐃᓄᐃᑦ ᐱᓕᕆᐊᖃᖃᑎᒋᕗᑦ ᐱᒻᒪᕆᐅᓪᓗᑎᒃ ᐊᒥᖅᑲᕈᑕᐅᓪᓗᑎᒃ ᓯᕗᓪᓕᖅᐸᐅᑎᑕᐅᖁᔭᐅᔪᓄᑦ ᐊᒻᒪᓗ ᐅᖃᓪᓚᐅᓯᕆᓚᐅᖅᓱᑎᒍ ᑕᒪᑦᑕᐅᓪᓗᑕ ᑐᕌᕐᕕᒃᓴᐅᔪᒪᓂᐊᖅᑐᓄᑦ ᓯᕗᓂᕆᔭᑦᑎᓐᓂ. ᓂᕆᐅᖕᓂᖃᖅᐳᖓ ᑲᑐᔾᔨᓂᖃᕐᓗᑕ ᐱᓕᕆᐊᖃᖃᑎᒌᖕᓂᕆᓂᐊᖅᑕᑦᑎᓐᓂᒃ ᐊᒻᒪᓗ ᑲᔪᓯᑎᑕᐅᓯᒪᓂᖏᓐᓄᑦ ᐱᓕᕆᖃᑎᒌᖕᓂᐅᔪᓄᑦ ᐃᓄᐃᑦ ᓯᕗᓕᖅᑎᒋᔭᖏᓐᓂᒃ ᐱᓕᕆᐊᕆᓕᕆᐊᖅᓱᒋᑦ ᓯᕗᓪᓕᖅᐸᐅᑎᑕᖁᔭᓯ ᐊᒻᒪᓗ ᐊᓯᔾᔨᖅᑕᐅᓯᒪᓕᖁᓪᓗᒋᑦ ᐊᑯᓃᖅᑐᒧᑦ ᐊᒃᑐᖅᑕᐅᓯᒪᓕᕐᓂᐊᖅᑐᓄᑦ ᐃᓄᐃᑦ ᓄᓇᓗᒃᑖᖓᓐᓂ.”
ᒥᓂᔅᑕ ᒫᒃ ᒥᓪᓗᕐ, ᒥᓂᔅᑕ ᒐᕙᒪᑐᖃᒃᑯᑦ-ᓄᓇᖃᖅᑳᖅᓯᒪᔪᓕᕆᔨᒃᑯᓐᓄᑦ
“ᖁᕕᐊᓱᓪᓚᕆᒃᑐᖓ ᐃᒃᓯᕙᐅᑕᕆᔭᐅᖃᑕᐅᓚᐅᕐᓂᓐᓄᑦ ᑕᕝᕙᓂ ᓯᕗᓪᓕᖅᐹᒥᒃ ᐃᓄᐃᑦ-ᒐᕙᒪᒃᑯᑦ ᐱᓕᕆᖃᑎᒌᖕᓂᖏᑕ ᑲᑎᒪᔨᕋᓛᖏᑦ (ICPC) ᑲᑎᖖᒐᓂᖃᖅᑎᓪᓗᒋᑦ ᓄᑖᖑᓪᓗᑎᒃ ᒐᕙᒪᒃᑯᑦ ᑲᑎᒪᕕᒡᔪᐊᕐᕕᖓᓐᓂ ᒐᕙᒪᓕᕆᔨᐅᔪᑦ ᑲᑎᒪᓂᖃᖅᑎᓪᓗᒋᑦ ᐃᒃᓯᕙᐅᑕᐅᖃᑎᒋᓪᓗᒍ ᐃᓂᖃᓕᖅᑎᑕᐅᓵᖅᓯᒪᔪᖅ, ᒫᒃ ᒥᓪᓗᕐ, ᒐᕙᒪᑐᖃᒃᑯᑦ-ᓄᓇᖃᖅᑳᖅᓯᒪᔪᓕᕆᔨᒃᑯᑦ ᐊᒻᒪᓗ ᑲᓇᑕᒥ ᐅᑭᐅᖅᑕᖅᑐᒥᐅᓕᕆᔨᒃᑯᓐᓄᑦ ᒥᓂᔅᑕᕆᔭᐅᔪᖅ. ᑕᕝᕙᓂ ᑲᑎᒪᓂᐅᔪᒥ ᓯᕗᓪᓕᖅᐹᒥᒃ ᐱᕕᒃᓴᖃᖅᑎᑕᐅᓚᐅᕐᒪᑕ ᐃᓄᐃᑦ ᓯᕗᓕᖅᑎᖏᑦ ᐊᒻᒪᓗ ᒐᕙᒪᑐᖃᒃᑯᓐᓂᑦ ᒥᓂᔅᑕᕆᐅᔪᑦ ᑲᑎᖖᒐᖃᑎᒌᓪᓚᑦᑖᕈᓐᓇᖅᑎᑕᐅᓪᓗᑎᒃ ᐅᑭᐅᒃ ᒪᕐᕈᑲᓵᒃ ᓈᓯᒪᓕᖅᑎᓪᓗᒋᑦ. ᐅᓪᓗᒥ ᑲᑎᖖᒐᓂᖃᖅᑎᓪᓗᑕ ᓄᑕᐅᓕᕆᐊᖅᑎᑦᓱᓐᓇᓚᐅᖅᑕᕗᑦ ᐱᓕᕆᐊᒃᓴᕆᔭᑦᑎᓐᓂᒃ ᐱᓕᕆᐊᖃᖃᑎᒌᓐᓂᐊᕐᓂᑦᑎᓐᓄᑦ ᐋᖅᑮᓯᒪᓕᕐᓂᐊᕐᓗᑕ ᐊᔪᖖᒋᑦᓯᐊᖅᑑᓕᕈᑎᐅᔪᓐᓇᖅᑐᓂᒃ ᐃᓄᓐᓄᑦ ᑲᓇᑕᒥ. ᐋᖅᑭᒃᓱᐃᓯᒪᓕᓚᐅᕋᑦᑕ ᐃᑲᔪᕐᓂᖃᖅᑑᓪᓗᑎᒃ ᐅᖃᓪᓚᐅᓯᕆᓚᐅᖅᑕᑦᑎᓐᓂᑦ ᐱᔾᔪᑎᒋᓪᓗᒋᑦ ᐊᑐᓕᖅᑎᑕᐅᓂᒃᓴᖏᑦ 2021-ᒥ ᒐᕙᒪᑐᖃᒃᑯᑦ ᑮᓇᐅᔭᖁᑎᒃᓴᖃᖅᑎᑦᓯᕙᓐᓂᖏᑦ ᐊᒻᒪᓗ ᐃᓄᐃᑦ ᓯᕗᓪᓕᖅᐸᐅᑎᑕᐅᖁᔭᖏᑦ ᑮᓇᐅᔭᖁᑎᖃᖅᑎᑕᐅᓗᑎᒃ ᐱᓕᕆᐊᒃᓴᓂᒃ 2022-ᒥ, ᐊᒻᒪᓗ ᐊᒥᖅᑲᕈᑎᒋᓪᓗᑎᒍ ᐱᓕᕆᐊᒃᓴᕆᔭᑦᑎᓐᓂᒃ ᐱᓕᕆᐊᖑᓕᖁᓪᓗᒋᑦ ᐃᓅᓯᓕᕆᓂᕐᒥ ᐊᒻᒪᓗ ᑮᓇᐅᔭᓕᐅᕋᓱᐊᖅᐸᓐᓂᕐᓂ ᓇᓕᖅᑲᕇᒃᑎᑕᐅᖖᒋᓐᓂᐅᔪᑦ ᐃᓄᐃᑦ ᓄᓇᓕᒋᔭᖏᓐᓂ ᓄᑖᑎᒍᑦ ᑮᓇᐅᔭᓂᒃ ᕿᑐᕐᖏᐅᖅᑎᑦᓯᓯᒪᓕᕐᓂᖅᑎᒍᑦ ᐊᒻᒪᓗ ᐊᑐᓕᖅᑎᑕᐅᓂᖏᑦᑎᒍᑦ ᐃᓄᐃᑦ ᓄᓇᖓᓐᓂ ᒪᓕᒐᖁᑏᑦ.”
ᓇᐃᑖᓐ ᐆᐱᑦ, ᐊᖏᔪᖅᑳᖅ ᐃᓄᐃᑦ ᑕᐱᕇᑦ ᑲᓇᑕᒥ
ᑲᑎᒪᔭᖅᑐᕐᓯᒪᓚᐅᖅᑐᑦ ᐅᐸᒍᑎᓯᒪᓪᓗᑎᒃ, ᓴᐅᒥᐊᓂᑦ: ᒪᑭᕕᒃ ᑯᐊᐳᕇᓴᖓᓂ ᐊᖏᔪᖅᑳᖅ ᐲᑕ ᐋᑕᒥ, ᒐᕙᒪᑐᖃᒃᑯᑦ-ᓄᓇᖃᖅᑳᖅᓯᒪᔪᓕᕆᔨᒃᑯᓐᓄᑦ ᒥᓂᔅᑕ ᒫᒃ ᒥᓪᓗᕐ, ᓄᓇᕗᑦ ᑐᖖᒐᕕᒃ ᑎᒥᖓᓂ ᐊᖏᔪᖅᑳᖅ ᐊᓗᑭ ᑰᑦᑎᖅ, ᓄᓇᑦᓯᐊᕗᑦᒥ ᐊᖏᔪᖅᑳᖓᑦ ᔫᕼᐋᓐᔅ ᓛᒻᐱ, ᐅᑭᐅᖅᑕᖅᑐᒥᐅᓕᕆᔨᒃᑯᓐᓄᑦ ᒥᓂᔅᑕ ᑖᓐ ᕚᓐᑖᓪ, ᐃᖃᓪᓕᕿᔨᒃᑯᑦ ᐊᒻᒪᓗ ᑕᕆᐅᓕᕆᔨᒃᑯᓐᓄᑦ ᒥᓂᔅᑕ ᔪᐃᔅ ᒨᕆ, ᑲᓇᑕᒥ ᑲᑎᒪᔨᕐᔪᐊᒃᑯᓐᓄᑦ ᐊᖏᔪᖅᑳᖓᑦ ᒨᓇ ᕗᐊᑦᑎᐄ, ᐃᖅᑲᖅᑐᐃᕝᕕᓕᕆᔨᒃᑯᓐᓄᑦ ᒥᓂᔅᑕ ᑕᐃᕕᑦ ᓚᒥᐊᑎ, ᐃᓄᕕᐊᓗᐃᑦ ᐊᕕᒃᑐᖅᓯᒪᓂᖓᓂ ᑯᐊᐳᕇᓴᖓᑕ ᐃᒃᓯᕙᐅᑕᖓᑦ ᑐᕙᐃᓐ ᓯᒥᑦ, ᑲᓇᑕᒥ ᒪᒃᑯᒃᑐᑦ ᐃᓄᐃᑦ ᑲᑎᒪᔨᕐᔪᐊᖏᓐᓂ ᐊᖏᔪᖅᑳᖅ ᐳᕋᐃᐊᓐ ᐹᑐᓪ ᐊᒻᒪᓗ ᐃᓄᐃᑦ ᑕᐱᕇᒃᑯᓐᓄᑦ ᑲᓇᑕᒥ ᐊᖏᔪᖅᑳᖅ ᓇᐃᑖᓐ ᐆᐱᑦ. (ᐃᓄᐃᑦ ᐅᑭᐅᖅᑕᖅᑐᒥ ᑲᑎᒪᔨᖏᑦᑕ ᑲᓇᑕᒥ ᐊᖏᔪᖅᑳᖓᑦ ᒫᓂᑲ ᐃᐊᓪ-ᑲᓇᔪᖅ, ᐸᐅᒃᑑᑎᒃᑯᓐᓂ ᐊᖏᔪᖅᑳᖅ ᕆᐱᑲ ᑲᑦᓗᒃ, ᓄᓇᖃᖅᑳᖅᓯᒪᔪᓕᕆᔨᒃᑯᓪᓗᑦ ᒥᓂᓕᐞᑕ ᐹᑎ ᕼᐋᔾᔫ ᐊᒻᒪᓗ ᐃᖏᕐᕋᐅᑎᓕᕆᔨᒃᑯᓐᓄᑦ ᒥᓂᔅᑕ ᐆᒫᕐ ᐃᓪᒑᐳᕋ ᑲᑎᒪᔭᖅᑐᕐᓯᒪᖃᑕᐅᓚᐅᖅᑐᑦ ᖃᕆᑕᐅᔭᑎᒍᑦ.)