ᐋᑐᕙ, ᐋᓐᑎᐊᕆᐅ – ᔪᓚᐃ 12, 2021
ᐃᓄᐃᑦ ᓄᓇᖓᓐᓂ ᓂᕿᒋᔭᒃᓴᒥᓐᓂᒃ ᐱᓯᒪᓕᖃᑦᑕᕈᓐᓇᕐᓂᕐᒧᑦ ᐸᕐᓇᐅᑏᑦ (INFSS), ᓴᖅᑭᑕᐅᓚᐅᖅᑐᑦ ᐅᓪᓗᒥ ᐃᓄᐃᑦ ᑕᐱᕇᒃᑯᓐᓂᑦ ᑲᓇᑕᒥ ᐋᖅᑮᓯᒪᓕᕈᑎᐅᕗᑦ ᑐᖖᒐᕝᕕᐅᓂᐊᖅᑐᓂᒃ ᐃᓱᓕᑎᑦᑎᓯᒪᓕᕆᐊᕐᓂᕐᒧᑦ ᑳᓗᐊᖃᑦᑕᕐᓂᐅᔪᓂᒃ ᐃᓄᐃᑦ ᓄᓇᖓᓐᓂ, ᐃᓄᐃᑦ ᓄᓇᒋᔭᑐᖃᖓᓐᓂ ᑲᓇᑕᒥ. ᓯᕗᒻᒧᒋᐊᖅᑎᑦᑎᓯᒪᔪᑦ ᐃᓄᖕᓂᑦ ᐱᓕᕆᐊᖑᓕᖅᑎᑕᐅᓯᒪᓪᓗᑎᒃ ᐋᖅᑮᒋᐊᕈᑎᐅᔪᓐᓇᖅᑐᓂᒃ ᐱᐅᓯᒋᐊᖅᑎᑕᐅᓯᒪᓕᖁᓪᓗᒋᑦ ᓂᕿᒋᔭᒃᓴᒥᓐᓂᒃ ᐱᓯᒪᓕᖃᑦᑕᕈᓐᓇᕐᓂᕐᓄᑦ ᐊᒻᒪᓗ ᐱᒋᐊᖅᑎᑦᓯᓯᒪᓕᕋᔭᕐᓂᕐᒧᑦ ᑲᔪᓰᓐᓇᖅᑎᑕᐅᔪᓐᓇᕐᓗᑎᒃ ᓂᕿᓕᕆᓂᕐᒥ ᐱᓕᕆᔾᔪᑎᐅᓂᐊᖅᑐᓂᒃ ᐃᓄᐃᑦ ᓄᓇᖓᓐᓂ.
ᓂᕿᒋᔭᒃᓴᒥᓐᓂᒃ ᐱᓯᒪᓕᖃᑦᑕᕈᓐᓇᖖᒋᓐᓂᐅᔪᑦ ᐃᓄᖕᓂ ᑕᐃᒪᐅᖏᓐᓇᐅᔭᖅᑑᓂᖓ ᐃᓚᒋᔭᐅᖃᑕᐅᒻᒪᑦ ᐊᑯᓂᐅᓂᖅᐸᐅᓪᓗᓂ ᑭᒃᑯᑐᐃᓐᓇᐃᑦ ᐋᓐᓂᐊᖃᓕᖅᑕᐃᓕᒪᕙᓐᓂᖏᓐᓄᑦ ᑐᐊᕕᐅᕐᓇᖅᓯᓯᒪᓪᓗᓂ ᐱᓕᕆᐊᖑᓯᒪᓕᕆᐊᖃᕐᓂᐅᔪᓂᑦ ᑲᓇᑕᒥ. ᐊᒃᑐᖅᑕᐅᓯᒪᓂᖃᖅᖢᓂ ᐊᒥᓱᕐᓚᐅᓪᓗᑎᒃ ᐊᑕᕝᕕᒋᑐᕋᐅᑦᑐᓂᑦ ᐱᔾᔪᑎᐅᓯᒪᔪᓂᑦ, ᐃᓚᖃᖅᑎᓪᓗᒋᑦ ᐊᒃᖢᓗᐊᓕᖅᓯᒪᓂᐅᔪᓂᒃ, ᐊᓐᓇᐅᒪᓇᓱᐊᕈᑎᒃᓴᐃᑦ ᐊᑭᑐᔪᒻᒪᕆᐅᓂᖏᓐᓂᑦ, ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓂᑦ, ᓈᒻᒪᖖᒋᓗᐊᕐᓂᖏᓐᓂᑦ ᐱᓕᕆᐊᖃᕐᕕᒃᓴᐅᔪᑦ ᑕᐃᒪᐅᓕᐊᓂᒃᖢᑎᒃ ᐊᒻᒪᓗ ᐱᓕᕆᔾᔪᑎᑎᒍ ᐅᕕᓂᖃᑎᒋᖖᒋᑕᒥᓐᓂᒃ ᐊᑭᕋᖅᑐᐃᕙᓐᓂᐅᔪᓂᒃ.
ᑖᒃᑯᐊ INFSS-ᖁᑏᑦ ᐱᑕᖃᓕᖅᑎᑦᑎᓯᒪᕗᑦ ᐱᓕᕆᐊᖑᓯᒪᔪᓂᒃ ᐊᓯᔾᔩᕙᓪᓕᐊᓂᒃᓴᒥ ᓂᕿᒋᔭᒃᓴᓂᒃ ᐱᑕᖃᖅᑎᑦᑎᓯᒪᓕᕐᓂᒃᓴᒧᑦ ᑐᕌᖓᔪᓂᒃ ᐃᑲᔪᕈᑎᐅᓪᓚᕆᒃᑐᓂᒃ ᓂᕿᒋᔭᒃᓴᒥᓐᓂᒃ ᐱᓯᒪᓕᖃᑦᑕᕈᖕᓇᖖᒋᓐᓂᐅᔪᓄᑦ. ᐊᖏᔪᑲᓪᓚᒻᒪᕆᐅᓪᓗᑎᒃ ᓂᕿᒋᔭᐅᕙᒃᑐᑦ ᐃᓄᖕᓂᑦ ᐅᓯᔭᐅᓪᓗᑎᒃ ᐊᒃᔭᖅᑕᐅᕙᖕᒪᑕ ᐊᒥᓱᑲᓪᓚᐅᔪᓂᒃ ᑭᓗᒦᑕᓂᒃ ᖃᖓᑕᓲᑎᒍᑦ ᐊᒻᒪᓗ ᐅᒥᐊᕐᔪᐊᖅᑎᒍᑦ, ᐊᖏᔪᑲᓪᓚᐅᔪᓪᓗ ᓂᖀᑦ ᐊᕕᒃᑐᖅᓯᒪᓂᐅᔪᒥᑦ ᐊᐅᓪᓚᖅᑎᑕᐅᕙᒃᑎᓪᓗᒋᑦ ᑮᓇᐅᔭᓕᐅᕈᑎᒃᓴᐅᓪᓗᑎᒃ ᓂᐅᕝᕈᑕᐅᓗᑎᒃ.
ᐸᕐᓇᐅᑏᑦ ᑎᓕᐅᕆᓯᒪᖕᒪᑕ ᐋᖅᑭᒃᓱᐊᖑᓯᒪᔪᑎᒍᑦ ᐱᓕᕆᓂᖃᓕᖁᔨᓪᓗᑎᒃ ᐊᒻᒪᓗ ᑮᓇᐅᔭᓂᒃ ᕿᑐᕐᖏᐅᖅᑎᑦᓯᓕᖁᔨᓪᓗᑎᒃ ᑕᒪᒃᑯᐊ ᓇᓕᖅᑲᕇᖖᒋᓐᓂᐅᔪᑦ ᐱᓕᕆᐊᖑᓯᒪᓕᖁᓪᓗᒋᑦ, ᐃᑲᔪᖅᑐᐃᓂᖅᑎᒍᑦ ᐊᖑᓇᓱᐊᖅᖢᑎᒃ ᐱᓕᕆᓂᐅᕙᒃᑐᓂᒃ ᐊᒻᒪᓗ ᐃᓄᐃᑦ ᐆᒪᔪᓕᕆᓂᕐᒥ ᐊᐅᓚᑦᓯᓂᕐᓄᑦ ᐃᓱᒪᓕᐅᕈᑎᐅᕙᒃᑐᓂᒃ, ᑮᓇᐅᔭᑎᒍᑦ ᐃᑲᔪᕈᑎᐅᕙᒃᑐᓂᒃ ᐊᒻᒪᓗ ᐊᐅᓚᑦᓯᓂᐅᔪᓂᒃ ᒪᓕᒐᑎᒍᑦ ᓂᕿᓂᒃ ᐊᒃᔭᖅᑐᓂᐅᕙᒃᑐᓄᑦ, ᐱᐅᓯᒋᐊᖅᑎᑦᓯᓂᕐᓄᑦ ᓂᕿᓕᕆᓂᕐᒥ ᐱᓕᕆᕝᕕᐅᔪᓂᒃ ᓄᓇᓕᐅᔪᓂ, ᐊᒻᒪᓗ ᐃᑲᔪᖅᑐᐃᓂᒃᑯᑦ ᐊᕕᒃᑐᖅᓯᒪᓂᕐᓂ ᓂᕿᓕᕆᓂᐅᔪᓂᒃ ᐋᖅᑭᒃᓱᐃᓯᒪᓕᕐᓂᖅᑎᒍᑦ ᓄᓇᓕᐅᔪᓂ ᓂᕿᓂᒃ ᓂᐅᕕᐊᒃᓴᖃᖅᐸᒃᖢᑎᒃ ᓂᐅᕕᕐᕕᖕᓂᒃ.
ᓇᓗᓇᐃᔭᐃᓯᒪᕗᑦ ᖃᐅᔨᒋᐊᖅᑕᐅᔪᓐᓇᖅᖢᑎᒃ ᑐᕌᕐᕕᒃᓴᖁᑎᒋᔭᐅᔪᓂᒃ ᑕᓪᓕᒪᐅᔪᑦ ᓯᕗᓪᓕᖅᐸᐅᑎᑕᒃᓴᐃᑦ ᐃᓗᐊᓃᑦᑐᓂᒃ: ᖃᐅᔨᓴᐃᓂᐅᕙᒃᑐᑦ ᐊᒻᒪᓗ ᓴᐳᔾᔨᒋᐊᕐᓂᐅᕙᒃᑐᑦ, ᓂᕿᓕᕆᔾᔪᑎᓄᑦ ᐱᓕᕆᔾᔪᑏᑦ ᐊᒻᒪᓗ ᖃᓄᐃᖖᒋᑦᓯᐊᕈᓐᓇᕐᓂᖅ; ᒪᓕᒐᕐᔪᐊᓕᕆᓂᖅ ᐊᒻᒪᓗ ᒪᓕᒐᓕᕆᓂᖅ; ᐱᓕᕆᐊᖑᔪᑦ ᐊᒻᒪᓗ ᐱᔨᑦᓯᕋᕈᑎᒃᓴᐃᑦ; ᐊᒻᒪᓗ ᖃᐅᔨᒪᓂᐅᔪᑦ ᐊᒻᒪᓗ ᐊᔪᖖᒋᓐᓂᕆᔭᐅᔪᑦ. ᐊᑐᓕᖅᑎᑕᐅᓯᒪᓕᕐᓂᐊᖅᑐᑦ ᐃᑲᔪᖅᑎᒌᒡᓗᑎᒃ ᐋᖅᑭᐅᒪᓂᖏᑎᒍᑦ ᐃᓄᐃᑦ ᑲᓇᑕᒥ ᒐᕙᒪᒃᑯᑦ ᐱᓕᕆᐊᖃᖃᑎᒌᒃᑎᑦ ᑲᑎᒪᔨᕋᓛᖏᓂᑦ, ᑖᒃᑯᑎᒎᓇᖅ ᓂᕿᒋᔭᒃᓴᒥᓐᓂᒃ ᐱᓯᒪᓕᕈᓐᓇᖃᑦᑕᕐᓂᕐᓄᑦ ᐱᔾᔪᑎᖃᖅᑐᑦ ᐊᒥᖅᑲᕈᑎᐅᓪᓗᓂ ᓯᕗᓪᓕᖅᐸᐅᑎᑕᒃᓴᖖᒍᓚᐅᕐᒪᑕ ᑕᐃᒪᖖᒐᓂᑦ ICPC-ᑯᑦ ᐱᒋᐊᖅᑎᑕᐅᓯᒪᓕᓚᐅᕐᑎᓪᓗᒋᑦ 2017-ᒥ.
ᑖᒃᑯᐊ ᐸᕐᓇᐅᑏᑦ ᐋᖅᑭᒃᓱᐊᖑᓚᐅᖅᑐᑦ ᐃᓄᐃᑦ ᑕᐱᕇᒃᑯᓐᓂᑦ ᑲᓇᑕᒥ (ITK), ᐱᓕᕆᖃᑎᒋᓪᓗᒋᑦ ᐃᓄᕕᐊᓗᐃᑦ ᐊᕕᒃᑐᖅᓯᒪᓂᕐᒥ ᑯᐊᐳᕇᓴᖓᑦ, ᓄᓇᕗᑦ ᑐᖖᒐᕕᒃ ᑎᒥᖁᑎᖓᑦ, ᒪᑭᕕᒃ ᑯᐊᐳᕇᓴᖓᑦ ᐊᒻᒪᓗ ᓄᓇᑦᓯᐊᕗᑦ ᒐᕙᒪᖓᑦ, ᐃᓚᒋᖃᑕᐅᓪᓗᒋᑦ ᓄᓇᕗᒃ ᐊᕕᒃᑐᖅᓯᒪᓂᕐᒥ ᐋᓐᓂᐊᖅᓯᐅᖅᑎᓕᕆᔨᑦ ᑲᑎᒪᔨᖏᑦ ᐊᒻᒪᓗ ᐃᓅᓯᓕᕆᔨᖏᑦ, ᐃᓄᐃᑦ ᐅᑭᐅᖅᑕᖅᑐᒥ ᑲᑎᒪᔨᖏᑦ ᑲᓇᑕᒥ, ᐸᐅᒃᑑᑎᑦ ᐊᕐᓇᐃᑦ ᐃᓄᐃᑦ ᑲᓇᑕᒥ, ᐊᒻᒪᓗ ᑲᓇᑕᒥ ᒪᒃᑯᒃᑐᑦ ᐃᓄᐃᑦ ᑲᑎᒪᔨᕐᔪᐊᖏᑦ.
ᐅᖃᐅᓯᐅᓯᒪᔪᑦ
“ᖁᑦᑎᓂᖅᐸᐅᓂᖏᑦ ᓂᕿᒋᔭᒃᓴᒥᓐᓂᒃ ᐱᓯᒪᓕᖃᑦᑕᕈᖕᓇᖖᒋᓐᓂᐅᔪᑦ ᐃᓄᖕᓂ ᑲᓇᑕᒥ ᓈᒻᒪᖖᒋᓪᓚᕆᖕᒪᑕ. ᐃᓄᐃᑦ ᓄᓇᖓᓐᓂ ᓂᕿᒋᓂᐊᖅᑕᒥᓐᓂᒃ ᐱᓯᒪᓕᖃᑦᑕᕈᓐᓇᕐᓂᕐᒧᑦ ᐸᕐᓇᐅᑏᑦ ᐃᓗᓕᖃᖅᐳᑦ ᐱᓕᕆᐊᖑᕙᓪᓕᐊᓪᓗᑎᒃ ᐊᓯᔾᔩᕙᓪᓕᐊᔾᔪᑎᓂᒃ ᐱᓕᕆᐊᖑᔪᓂᒃ ᐱᓕᕆᐊᖑᓕᕈᑎᒃ ᐊᑕᐅᑦᓯᒃᑰᖅᑎᑕᐅᓯᒪᓗᑎᒃ ᓇᓗᓇᐃᑦᑐᒥᒃ ᐊᒃᑐᐃᓯᒪᓕᕐᓂᐊᕐᒪᑕ ᑐᒪᑐᒥᖓ ᑐᐊᕕᐅᕐᓇᖅᓯᓯᒪᓂᐅᔪᒥᒃ. ᓇᓗᓇᐃᔭᐃᓯᒪᕗᑦ ᖃᓄᖅ ᐃᑲᔪᖅᑐᐃᓂᖃᓕᕈᓐᓇᕐᓂᕐᒥ ᐋᖅᑭᒃᓱᐃᓂᕐᓄᑦ ᐃᓄᐃᑦ ᓄᓇᖓᓐᓂ ᓂᕿᓕᕆᓂᕐᒥ ᐱᓕᕆᔾᔪᑎᓂᒃ ᐱᓕᕆᓂᖃᓕᕐᓂᐅᔪᓄᑦ ᐃᑲᔪᖅᑐᐃᓪᓗᑎᒃ ᐃᓄᐃᑦ ᖃᓄᐃᒋᑦᓯᐊᖅᑎᑕᐅᖁᓪᓗᒋᑦ ᐊᒻᒪᓗ ᑕᑯᒃᓴᐅᑎᑦᑎᓯᒪᓗᑎᒃ ᖃᓄᐃᓪᓚᕆᖕᓂᐅᔪᓄᑦ, ᓯᕗᓪᓕᖅᐸᐅᑎᑕᒃᓴᓄᑦ ᐊᒻᒪᓗ ᐃᓅᓯᕆᔭᑦᑎᓐᓂᒃ ᐃᓄᒃᑎᒍᑦ.
ᓇᐃᑖ ᐆᐱᑦ – ᐊᖏᔪᖅᑳᖅ, ᐃᓄᐃᑦ ᑕᐱᕇᑦ ᑲᓇᑕᒥ
“ᐃᓄᕕᐊᓗᐃᑦ ᐊᕕᒃᑐᖅᓯᒪᓂᖓᓂ ᑯᐊᐳᕇᓴᖓᑦ (IRC) ᖁᕕᐊᓱᒍᑎᖃᖅᐳᑦ ᓴᖅᑭᑕᐅᓯᒪᓕᕐᓂᖏᑕ ᐃᓄᐃᑦ ᓄᓇᖓᓐᓂ ᓂᕿᒋᔭᒃᓴᒥᓐᓂᒃ ᐱᓯᒪᓕᖃᑦᑕᕈᓐᓇᕐᓂᕐᒧᑦ ᐸᕐᓇᐅᑎᓂᒃ. ᑖᒃᑯᐊ ᐋᖅᑭᒃᓱᒐᐅᓯᒪᓂᖏᑦ ᐸᕐᓇᐅᑏᑦ ᐃᓚᖃᖅᑎᑦᑎᓯᒪᒻᒪᑕ ᐃᓄᕕᐊᓗᐃᑦ ᐱᔾᔪᑎᖃᖅᑎᖏᓂᒃ ᐊᒻᒪᓗ ᒪᓕᒃᓯᒪᑎᑕᐅᓪᓗᑎᒃ IRC-ᑯᑦ ᓂᕿᒋᔭᒃᓴᒥᓐᓂᒃ ᐱᓯᒪᓕᖃᑦᑕᕈᓐᓇᕐᓂᕐᒧᑦ ᐱᓕᕆᐊᖑᔪᓄᑦ. IRC-ᑯᑦ ᓄᕙᒡᔪᐊᕐᓇᖅ-19-ᒧᑦ ᑭᐅᔾᔪᑎᒋᓯᒪᓕᕆᐊᖅᓱᒋᑦ ᐱᓕᕆᓂᕆᔭᖏᑎᒍᑦ, ᓂᕿᒋᔭᒃᓴᒥᓐᓂᒃ ᐱᓯᒪᓕᖃᑦᑕᕈᓐᓇᕐᓂᖅ ISR-ᒥ ᐱᐅᓯᒋᐊᖅᑎᑕᐅᓯᒪᓕᕐᒪᑕ ᐱᑕᖃᖅᑎᑦᑎᓯᒪᓂᖅᑎᒍᑦ ᐃᓄᕕᐊᓗᓐᓄᑦ ᓴᓇᕐᕈᑎᒃᓴᖏᓂᒃ ᐊᒻᒪᓗ ᐊᖑᓇᓱᐊᕈᑎᒃᓴᖏᓐᓄᑦ ᐊᒻᒪᓗ ᑐᖅᑯᐊᖃᖃᑦᑕᕐᕕᒃᓴᓄᑦ ᐃᓄᖕᓂᑦ ᓂᕿᒋᔭᐅᕙᒃᑐᓂᒃ, ᑐᑭᒧᐊᒃᑎᑦᑎᔨᐅᓂᕐᒧᑦ ᓂᕿᓂᒃ ᐊᒥᖅᑲᖃᑎᖃᖅᐸᓐᓂᕐᓄᑦ ᐃᓄᕕᐊᓗᓐᓄᑦ ᐱᓯᒪᓕᕆᐊᖃᖅᑐᓄᑦ, ᐊᒻᒪᓗ ᐱᐅᓯᒋᐊᖅᑎᑦᓯᓂᕐᒥ ᖃᓄᐃᖖᒋᑦᑎᐊᖅᑎᑕᐅᖁᓪᓗᒋᑦ ᐃᓄᕕᐊᓗᐃᑦ ᐃᓄᖏᑦ ᐊᒻᒪᓗ ᐃᓄᕕᐊᓗᐃᑦ ᐱᐅᓯᑐᖃᖓᑦᑕ. ᑖᒃᑯᐊ ᓄᑖᖑᓪᓗᑎᒃ ᐸᕐᓇᐅᑏᑦ ᓇᓗᓇᐃᖅᓯᓯᒪᔾᔪᑎᐅᕗᑦ ᑲᓇᑕᒥ ᒐᕙᒪᒃᑯᑦ ᐱᓕᕆᐊᒃᓴᖃᓕᕐᓂᖏᑕ ᐊᑐᓕᖅᑎᑦᑎᓂᐊᕐᓂᕐᒥᒃ ᐃᓄᖕᓂᒃ ᓯᕗᓕᖅᑎᖃᖅᓗᑎᒃ ᐸᕐᓇᐅᑎᓕᐊᖑᓯᒪᔪᓂᒃ ᐊᒻᒪᓗ ᐱᐅᓯᒋᐊᖅᑎᑦᓯᔾᔪᑎᒃᓴᓂᒃ ᐃᓄᕕᐊᓗᐃᑦ ᐃᓅᓯᖏᓐᓂᒃ.”
ᑐᕙᐃᓐ ᓂᖓᖅᓯᖅ ᓯᒥᑦ – ᐃᒃᓯᕙᐅᑕᖅ/ᐊᓪᓚᕕᖕᒥ ᐃᓱᒪᑕᖅ, ᐃᓄᕕᐊᓗᐃᑦ ᐊᕕᒃᑐᖅᓯᒪᓂᖓᓂ ᑯᐊᐳᕇᓴᖓᑦ
“ᓄᓇᕗᒻᒥ ᐃᓄᖏᓐᓄᑦ, ᐊᖑᓇᓱᐊᖅᐸᓐᓂᖅ, ᓂᕿᓕᕆᕙᓐᓂᖅ ᐊᒻᒪᓗ ᓂᕿᖃᖅᐸᓐᓂᖅ ᐃᓄᐃᑦ ᓂᕿᒋᕙᒃᑕᖏᓐᓂ ᐊᖏᔪᐊᓗᖕᒥᒃ ᐊᑕᕝᕕᖃᕐᒪᑕ ᓄᓇᖅᑲᑎᒌᑦ ᐱᑦᓯᐊᖅᑐᕋᐅᑎᕙᓐᓂᖏᓐᓄᑦ ᐊᒻᒪᓗ ᐃᓄᐃᑦ ᑭᓇᐅᓂᖏᓐᓄᑦ. ᐃᓅᖃᑎᒌᖑᔪᑎᒍᑦ ᖃᓄᐃᖖᒋᑦᑎᐊᖅᑑᓂᒃᓴᑦᑎᓐᓂᒃ ᖃᐅᔨᒪᒋᐊᖅᐸᓐᓂᕗᑦ ᐊᒻᒪᓗ ᐱᕈᖅᑎᑦᑎᓯᒪᓕᕆᐊᕐᓂᕗᑦ ᐃᓅᖃᑎᑦᑎᓐᓂᒃ ᐱᓕᕆᖃᑎᖃᖅᐸᓐᓂᑦᑎᒍᑦ ᐊᒻᒪᓗ ᐊᓯᖏᓂᒃ ᓄᓇᖅᑲᑎᒋᔭᑦᑎᓐᓂᒃ ᑕᐃᒪᐅᑎᑕᐅᔭᕆᐊᖃᕐᒪᑕ ᐊᒻᒪᓗ ᐃᓚᒋᔭᐅᓪᓚᕆᒃᖢᑎᒃ ᐃᓄᐃᑦ ᐱᐅᓯᑐᖃᖏᓐᓄᑦ. ᐊᓯᔾᔨᖅᑎᓯᒪᓕᕆᐊᖃᖅᑕᕗᑦ ᐃᓱᒪᕙᓐᓂᕗᑦ ᐱᔾᔪᑎᖃᖅᑐᑦ ᓂᕿᒋᔭᒃᓴᒥᓐᓂᒃ ᐱᓯᒪᓕᖃᑦᑕᕈᓐᓇᕐᓂᕐᓂᑦ ᓂᕿᓕᕆᓂᕐᓂ ᐊᐅᓚᑦᓯᔨᐅᓂᕐᓄᑦ. ᓂᕿᓕᕆᓂᕐᓂ ᐊᐅᓚᑦᓯᔨᐅᓂᖅ ᑎᒍᓯᓯᒪᓕᕈᑎᐅᒻᒪᑦ ᒪᓕᒐᓕᕆᓂᕐᒥ ᐱᓕᕆᔾᔪᓯᐅᔪᓄᑦ ᑕᐃᒪᐅᔭᕆᐊᖃᖅᑐᓄᑦ ᐱᓕᕆᓂᖃᕐᓂᐊᕐᓗᓂ ᑕᑯᒃᓴᐅᓇᑎᒃ ᐱᔾᔪᑎᐅᓕᖅᓯᒪᔪᓂᒃ ᐊᒃᑐᐃᓯᒪᓂᖃᖅᑐᓂᒃ ᐃᓄᖕᓂᒃ ᐊᒻᒪᓗ ᑭᐅᓯᒪᓕᕈᓐᓇᕐᓂᑦᑎᓐᓂᒃ ᐱᓕᕆᐊᖃᓕᕆᐊᕐᓗᑕ ᓇᖕᒥᓂᖅ ᐱᓯᒪᓕᕆᐊᖃᖅᑕᑦᑎᓐᓂᒃ ᐋᓐᓂᐊᕐᓂᖃᓕᖅᑕᐃᓕᒪᔪᓕᕆᓂᕐᓂ, ᐱᐅᓯᑐᖃᒃᑯᑦ ᓈᒻᒪᒃᑐᓂᒃ, ᐊᒻᒪᓗ ᐱᐅᓯᑐᖃᑦᑎᓐᓂ ᓂᕿᒋᕙᒃᑕᑦᑎᓐᓄᑦ. ᑕᒪᓐᓇ ᑐᑭᖃᕐᒪᑦ ᐃᓄᖕᓂᒃ ᐱᔪᓐᓇᐅᑎᑖᖅᑎᑦᑎᓯᒪᓕᕐᓂᕐᒧᑦ ᓇᖕᒥᓂᖅ ᓄᓇᖅᑲᑎᒋᔭᒥᓐᓂᒃ ᓂᕿᒋᔭᒃᓴᖃᖅᑎᑦᑎᔪᓐᓇᕐᓂᖏᓐᓄᑦ.”
ᐊᓗᑭ ᑰᑦᑎᖅ – ᐊᖏᔪᖅᑳᖅ, ᓄᓇᕗᑦ ᑐᖖᒐᕕᒃ ᑎᒥᖁᑎᖓᑦ
“ᐅᓪᓛᒃᑯᑦ ᑐᐸᒃᑯᓂ ᖃᓄᖅ ᐃᒡᓗᒥᐅᖃᑎᒥᑕ ᓂᕆᔭᒃᓴᐅᓂᐊᖅᑕᖏᓂᒃ ᓵᒧᑦ ᐃᓕᐅᖅᑲᐃᔪᓐᓇᕋᔭᕆᐊᖅ ᐃᓅᑉ ᐃᓱᒫᓗᒍᑎᒋᖅᑳᕆᐊᖃᖖᒋᑕᕋᓗᐊᖓ, ᑭᓯᐊᓂᓕ ᑕᐃᒪᓐᓇ ᐊᒥᓱᑦ ᐃᓄᐃᑦ ᐃᓅᓯᖃᕐᐸᒻᒪᑕ ᐃᓄᐃᑦ ᓄᓇᓕᓕᒫᖏᓐᓂ. ᑕᒪᒃᑯᓄᖓ ᑐᕌᖓᔪᓂᒃ ᐱᑕᖃᖖᒋᑦᔪᑎᔭᐅᓯᒪᔪᒍᑦ ᓄᓇᕕᖕᒥ ᐱᔾᔪᑎᒋᓪᓗᒍ ᐊᖏᖃᑎᒌᒐᓱᐊᕈᑎᖃᖅᓯᒪᓂᑦᑎᓐᓂᑦ ᑮᓇᐅᔭᖁᑎᒃᓴᐅᓕᕋᔭᖅᑐᓂᒃ ᐊᑭᓕᐅᑕᐅᕙᓐᓂᐊᕐᓗᑎᒃ 6-ᖑᔪᓄᑦ ᐊᓐᓇᐅᒪᔾᔪᑎᒃᓴᐃᑦ ᐊᑭᑐᓗᐊᕐᓂᖏᓐᓄᑦ ᒥᑭᒡᓕᒋᐊᕈᑎᒃᓴᐅᓕᕈᓐᓇᖅᑐᓂᒃ ᐃᑲᔪᖅᑐᐃᔾᔪᑎᐅᓕᖅᑐᓂᒃ ᐱᓕᕆᐊᓄᑦ ᐱᑕᖃᖅᑎᑦᓯᔾᔪᑎᐅᕙᒃᑐᓄᑦ ᐃᓄᑐᖃᓄᑦ ᐃᑲᔪᖅᑕᐅᔾᔪᑎᒃᓴᓂᒃ, ᐃᓄᐃᑦ ᓂᕿᒋᕙᒃᑕᖏᓄᑦ ᐃᑲᔪᕈᑎᒃᓴᓂᒃ, ᐃᒡᓗᒥᐅᖃᑎᒌᑦ ᓱᓇᖁᑎᒃᓴᖏᓐᓄᑦ ᐊᒻᒪᓗ ᐊᖑᓇᓱᐊᕈᑎᒃᓴᐅᓪᓗᑎᒃ ᓴᓇᕐᕈᑎᓄᑦ, ᓂᕿᓄᑦ, ᒐᓴᓖᒃᓴᓄᑦ ᐊᓯᖏᓄᓪᓗ ᐱᓯᒪᔭᐅᕙᒋᐊᓕᖁᑎᓄᑦ. ᑕᒪᒃᑯᐊ ᐊᑭᒋᔭᐅᕙᒃᑐᓄᑦ ᒥᑭᒡᓕᒋᐊᕈᑎᒃᓴᐅᔪᑦ ᐃᑲᔪᕐᓂᖃᒻᒪᕆᒃᑲᓗᐊᖅᑎᓪᓗᒋᑦ ᐃᓅᖃᑎᒌᑦ ᐊᒥᓲᓂᖏᓐᓄᑦ ᓯᕗᓪᓕᖅᐹᒥᒃ ᐱᓕᕆᐊᖃᕆᐊᖅᓯᒪᓂᐅᒻᒪᑕ ᐊᓐᓇᐅᒪᔾᔪᑎᒃᓴᓄᑦ ᐊᑭᒋᔭᐅᕙᒃᑐᑦ ᓄᓇᕕᒻᒥᐅᓄᑦ ᓇᓕᖅᑲᐅᓕᖅᑎᑕᐅᖁᓪᓗᒋᑦ ᐊᓯᖏᓄᑦ ᑲᓇᑕᒥᐅᖑᔪᓄᑦ ᓄᓇᖃᖅᑐᓄᑦ ᖃᓪᓗᓈᑦ ᓄᓇᖓᓐᓂ. ᐃᓄᐃᑦ ᓄᓇᖓᓐᓂ ᓂᕿᒋᓂᐊᖅᑕᒥᓐᓂᒃ ᐱᓯᒪᓕᖃᑦᑕᕈᓐᓇᕐᓂᖏᓐᓄᑦ ᐸᕐᓇᐅᑎᓕᐊᖑᓯᒪᔪᑦ ᐋᖅᑮᓯᒪᓕᕈᑎᐅᒻᒪᑕ ᓇᓗᓇᐃᔭᐃᓯᒪᓪᓗᑎᒃ ᐱᓕᕆᐊᖑᕙᓪᓕᐊᔪᒃᓴᓄᑦ ᐱᓕᕆᐊᖑᔭᕆᐊᖃᖅᑐᓂᒃ ᑕᐃᒪᓐᓇ ᓴᖅᑭᑕᐅᓯᒪᓕᖁᓪᓗᒋᑦ ᐃᓄᖕᓄᑦ.”
ᐲᑕ ᐋᑕᒥ – ᐊᖏᔪᖅᑳᖅ ᒪᑭᕕᒃ ᑯᐊᐳᕇᓴᖓᑦ
“ᓂᕿᒋᔭᒃᓴᒥᓐᓂ ᐱᓯᒪᓕᖃᑦᑕᕈᖕᓇᖖᒋᓐᓂᐅᔪᖅ ᑲᓇᑕᒥᐅᑦ ᐃᓄᖏᓐᓂ ᑭᒃᑯᑐᐃᓐᓇᐃᑦ ᐋᓐᓂᐊᖃᓕᖅᑕᐃᓕᒪᔪᓕᕆᓂᕐᓄᑦ ᑐᐊᕕᐅᕐᓇᖅᓯᓯᒪᓕᕈᑎᐅᕗᑦ. ᐃᓛᓗ ᑕᒪᓐᓇ ᐊᒥᓱᐃᓕᖓᔫᓪᓗᓂ ᐱᕙᓪᓕᐊᔪᓕᕆᓂᐅᒐᓗᐊᖅᑎᓪᓗᒍ, ᐃᓄᐃᑦ ᓄᓇᖓᓐᓂ ᓂᕿᒋᔭᒃᓴᒥᓐᓂᒃ ᐱᓯᒪᓕᖃᑦᑕᕈᓐᓇᕐᓂᕐᒧᑦ ᐸᕐᓇᐅᑏᑦ ᓈᒻᒪᑦᓯᐊᖅᑑᓪᓗᓂ ᑐᖖᒐᕝᕕᖁᑎᓕᐊᖑᓯᒪᖕᒪᑦ ᓇᓂᓯᓯᒪᓕᕆᐊᕐᓂᕐᓂ ᐋᖅᑮᓯᒪᓕᕈᑎᒃᓴᓄᑦ ᑕᒪᒃᑯᓄᖓ ᓈᒻᒪᖖᒋᓐᓂᐅᔪᓄᑦ. ᓂᕆᐅᖕᓂᖃᖅᐳᖓ ᑖᒃᑯᐊ ᐸᕐᓇᐅᑏᑦ ᐋᖅᑭᒃᓱᐊᖑᓯᒪᓕᕐᓂᒃᓴᖏᑕ ᐊᒻᒪᓗ ᓈᒻᒪᒃᑐᑎᒍᑦ ᐊᒃᑐᐃᓯᒪᓕᕋᔭᕐᓂᖏᑕ ᐃᓄᐃᑦ ᐃᓅᓯᖏᓐᓂ ᓄᓇᑦᓯᐊᕗᒻᒥᐅᓄᑦ ᐊᒻᒪᓗ ᐃᓄᐃᑦ ᓄᓇᖓᓐᓂᕐᒥᐅᓄᑦ.”
ᔫᕼᐋᓐᔅ ᓛᒻᐱ – ᐊᖏᔪᖅᑳᖅ, ᓄᓇᑦᓯᐊᕗᑦ
“ᐱᓕᕆᐊᖑᓕᕆᐊᖃᕐᓂᖏᑦ ᓂᕿᒋᔭᒃᓴᒥᓐᓂᒃ ᐱᓯᒪᓕᖃᑦᑕᕈᓐᓇᖖᒋᓐᓂᐅᔪᑦ ᓄᓇᓕᒋᔭᑦᑎᓐᓂ ᓯᕗᓪᓕᖅᐸᐅᑎᑕᐅᔭᕆᐊᖃᕐᑐᑦ ᐱᔾᔪᒋᓪᓗᒍ ᐃᓚᐅᖃᑕᐅᓂᖏᑕ ᑎᒥᒃᑯᑦ ᐊᒻᒪᓗ ᐃᓱᒪᒃᑯᑦ ᖃᓄᐃᖖᒋᑦᓯᐊᖅᑎᑕᐅᔭᕆᐊᖃᕐᓂᖏᑕ ᐃᓄᓕᒫᑦ. ᐃᓄᐃᑦ ᐊᔪᕐᓇᖖᒋᑦᑐᑎᒍᑦ ᐊᑐᐃᓐᓴᐅᓕᕐᕕᐅᔭᕆᐊᖃᕐᒪᑕ ᓂᕿᑦᑎᐊᕙᓐᓂᒃ, ᓂᐅᕕᕐᕕᖕᓂᑦ ᓂᐅᕕᐊᖑᕙᒃᑐᓄᑦ ᐊᒻᒪᓗ ᐃᓄᐃᑦ ᓂᕿᖏᓐᓄᑦ. ᐃᑲᔪᖅᑎᒌᒃᓗᑕ ᐱᓕᕆᐊᖃᕐᓂᕗᑦ ᑖᒃᑯᓂᖓ ᐱᓕᕆᐊᖑᓕᖅᓯᒪᔪᓄᑦ, ᐃᑲᔪᖅᑐᐃᓂᖃᕋᑦᑕ ᐊᑐᐃᓐᓇᐅᑎᑕᐅᓗᑎᒃ, ᐱᐅᓯᑐᖃᕐᒧᑦ ᓈᒻᒪᒃᑐᓄᑦ ᐋᖅᑭᒋᐊᖅᑕᐅᓯᒪᓪᓗᑎᒃ ᓂᕿᒋᓂᐊᖅᑕᒥᓐᓂᒃ ᐱᓯᒪᓕᖃᑦᑕᕈᓐᓇᕐᓂᕐᒧᑦ ᐸᕐᓇᐅᑎᓂᒃ.”
ᒥᓂ ᒍᕇ – ᐊᓪᓚᕝᕕᖕᒥ ᐃᓱᒪᑕᖅ, ᓄᓇᕕᒃ ᐊᕕᒃᑐᖅᓯᒪᓂᖓᓂ ᐋᓐᓂᐊᖅᓯᐅᖅᑎᓕᕆᔨᒃᑯᑦ ᐊᒻᒪᓗ ᐃᓅᓯᓕᕆᔨᒃᑯᑦ
“ᐊᑯᓂᐊᓗᒃ ᑖᒃᑯᐊ ᐸᕐᓇᐅᑏᑦ ᐱᓕᕆᐊᖑᓯᒪᓕᕐᓱᑎᒃ ᖁᕕᐊᓇᕐᒪᑦ ᓴᖅᑭᑕᐅᓯᒪᔪᓐᓇᓕᕐᒪᑕ ᐊᓱᐃᓛᒃ ᐊᒻᒪᓗ ᓴᕆᒪᒋᕙᖅᐳᑦ ᑭᖑᓪᓕᕐᐹᒥᒃ ᐱᑕᖃᓕᕈᓐᓇᖅᑎᑕᐅᓂᖏᑦ. ᐊᔪᕐᓇᖖᒋᑦᑑᓪᓗᓂ ᐱᓕᕆᐊᒃᓴᐅᓚᐅᖖᒋᒻᒪᑦ ᐱᔾᔪᑎᒋᓪᓗᒍ ᐊᒥᓱᐃᓕᖓᔫᓪᓗᑎᒃ ᓂᕿᒋᔭᒃᓴᒥᓐᓂᒃ ᐱᓯᒪᓕᖃᑦᑕᕈᓐᓇᖖᒋᓐᓂᐅᔪᑦ ᐃᓗᓕᖃᕐᓂᖏᑕ ᐊᒻᒪᓗ ᓇᓂᓯᓯᒪᓕᕋᓱᓐᓂᕐᒥ ᐊᒥᖅᑲᕈᑎᐅᓪᓗᓂ ᓇᐅᒃᑯᑦ ᓯᕗᒻᒧᒋᐊᖅᑎᑕᐅᓯᒪᓕᕋᔭᕐᓂᖏᓐᓂ. ᐱᓕᕆᐊᖑᕙᓪᓕᐊᓯᒪᔪᑦ ᐃᓄᐃᑦ ᓂᕿᒋᔭᒃᓴᒥᓐᓂᒃ ᐱᓯᒪᓕᖃᑦᑕᕈᓐᓇᕐᓂᕐᒧᑦ ᐱᓕᕆᐊᖃᖅᑎᖏᓂᑦ ᐃᓚᐅᑎᑦᓯᔪᓐᓇᓚᐅᕐᒪᑕ ᐊᒻᒪᓗ ᑐᖖᒐᓱᒃᑎᑦᓯᓯᒪᓪᓗᑎᒃ ᐊᑐᓕᖅᑎᑕᐅᖁᔭᐅᓪᓗᑎᒃ ᐃᓱᒪᓕᐅᕈᑎᓂᒃ ᐊᒻᒪᓗ ᐃᓱᒪᒋᔭᐅᔪᓂᒃ ᐊᕕᒃᑐᖅᓯᒪᓂᐅᔪᓂᑦ ᐊᒻᒪᓗ ᑲᑐᔾᔨᖃᑎᒌᒋᔭᐅᔪᓂᑦ ᐊᒻᒪᓗ ᐊᒃᓱᕈᕈᑎᒋᓪᓗᒍ ᐱᓕᕆᓂᕆᓯᒪᔭᖏᑦ ᐱᓕᕆᓂᖃᕈᓐᓇᑦᓯᐊᕐᓂᖏᓪᓗ ᐃᓕᑕᕆᔭᐅᓯᒪᔭᕆᐊᖃᖅᐳᑦ. ᖁᓚᕆᖖᒋᑕᕗᑦ ᐱᓕᕆᐊᖑᔪᒃᓴᑦ ᓇᓗᓇᐃᖅᑕᐅᓯᒪᓪᓗᑎᒃ ᐸᕐᓇᐅᑎᓂ ᒥᑭᒡᓕᒋᐊᖅᑎᑦᑎᓯᒪᓕᕐᓂᐊᕐᓂᖏᑕ ᖁᑦᑎᖕᑐᒻᒪᕆᐅᓪᓗᑎᒃ ᑕᐃᒪᐅᖏᓐᓇᐅᔭᕐᓂᖏᑕ ᓂᕿᒋᓂᐊᖅᑕᒥᓐᓂᒃ ᐱᓯᒪᓕᖃᑦᑕᕈᓐᓇᖖᒋᓐᓂᐅᔪᓄᑦ ᐃᓄᖕᓂ ᐃᓄᐃᑦ ᓄᓇᓕᓕᒫᖏᓐᓂ ᐊᒻᒪᓗ ᐊᕐᓇᐃᑦ ᓱᕈᓯᐅᔪᓪᓗ ᑕᒪᑐᒪᖖᒐᑦ ᐊᒃᑐᖅᑕᐅᓯᒪᓂᖃᓪᓚᕆᒃᑑᓪᓗᑎᒃ. ᑲᓇᑕᒥ ᐃᓄᐃᑦ ᓂᕿᒋᓂᐊᖅᑕᒥᓐᓂᒃ ᐱᓯᒪᓕᖃᑦᑕᕈᓐᓇᕐᓂᖏᓐᓄᑦ ᐸᕐᓇᐅᑏᑦ ᐱᒻᒪᕆᐅᓪᓗᑎᒃ ᑎᑭᑕᐅᓯᒪᓕᕐᓂᐅᔪᓄᑦ ᓇᓗᓇᐃᒃᑯᑕᐅᒻᒪᑕ ᐱᓯᒪᓕᕋᓱᐊᕐᓂᕐᒥᒃ ᓂᕿᒋᓂᐊᖅᑕᓂᒃ ᐊᐅᓚᑦᓯᔨᐅᔪᓐᓇᕐᓂᕐᒧᑦ ᐊᒻᒪᓗ ᐱᐅᓯᒋᐊᖅᑎᑕᐅᓯᒪᓕᕐᓂᒃᓴᖏᑕ ᓂᕿᒋᓂᐊᖅᑕᒥᓐᓂᒃ ᐱᓯᒪᖃᑦᑕᓕᕈᓐᓇᕐᓂᖏᑕ ᐃᓄᐃᑦ. ᐊᒻᒪᓗᑦᑕᐅᖅ ᐸᐅᒃᑑᑎᒃᑯᑦ ᑎᒥᖓᑦ ᐋᖅᑭᒃᓯᒪᓕᕐᕕᒋᖕᒪᒍ ᐃᑎᓂᖅᓴᐅᔪᒥᒃ ᐱᓕᕆᓂᖃᕐᕕᖃᓕᕈᓐᓇᕐᓂᕐᒧᑦ ᓂᕿᒋᔭᒃᓴᒥᓐᓂᒃ ᐱᓯᒪᓕᖃᑦᑕᕈᓐᓇᕐᓂᕐᒧᑦ ᐸᕐᓇᐅᑎᓄᑦ ᑐᕌᖓᓗᐊᖅᑎᓪᓗᒋᑦ ᐊᕐᓇᖏᓐᓄᑦ ᐃᓄᐃᑦ. ᓂᕆᐅᖕᓂᖃᖅᐳᒍᑦ ᐃᑲᔪᖅᑐᐃᓕᕐᓂᒃᓴᑦᑎᓐᓂᒃ ᐊᑐᓕᖅᑎᑕᐅᓯᒪᓕᕐᕕᒃᓴᖏᑕ.
ᕆᐱᑲ ᑲᓪᓗᒃ, – ᐊᖏᔪᖅᑳᖅ, ᐸᐅᒃᑑᑎᑦ ᐊᕐᓇᐃᑦ ᐃᓄᐃᑦ ᑲᓇᑕᒥ
“ᐅᑭᐅᖅᑕᖅᑐᒥᐅᑦ ᐃᓱᒪᔾᔪᓯᖏᑎᒍᑦ ᖁᕕᐊᓱᒃᐳᒍᑦ ᑖᒃᑯᐊ ᐸᕐᓇᐅᑏᑦ ᓴᖅᑭᑕᐅᓯᒪᓕᕐᓂᖏᓐᓂᒃ,” ᐅᖃᖅᖢᓂ ᐃᓄᐃᑦ ᐅᑭᐅᖅᑕᖅᑐᒥ ᑲᑎᒪᔨᖏᓐᓂᑦ ᑲᓇᑕᒥ ᐊᖏᔪᖅᑳᖓᑦ ᒫᓂᑲ ᐃᐊᓪ-ᑲᓇᔪᖅ. “ᐊᒥᓱᒻᒪᕆᐅᔪᑦ ᐱᕙᓪᓕᐊᔪᓕᕆᓂᐅᔪᑦ ᐱᓕᕆᐊᖑᓯᒪᒻᒪᑕ ᐸᕐᓇᐅᑎᓂ. ᓲᕐᓗ, ᓂᕿᒋᔭᒃᓴᒥᓐᓂᒃ ᐱᓯᒪᓕᖃᑦᑕᕈᓐᓇᖖᒋᓐᓂᐅᔪᑦ ᐱᓗᐊᒻᒪᕆᒃᑐᒥᒃ ᑭᒃᑯᑐᐃᓐᓇᐃᑦ ᐋᓐᓂᐊᖃᓕᖅᑕᐃᓕᒪᔪᓕᕆᓂᖏᓐᓂ ᐱᕙᓪᓕᐊᔪᓕᕆᓂᐅᒻᒪᑕ ᐱᔾᔪᑎᒋᓪᓗᒍ ᐊᑕᕝᕕᖃᓪᓚᑦᑖᖅᑑᓂᖏᑕ ᑭᓇᑐᐃᓐᓇᐅᑉ ᐃᓅᑉ ᑕᒪᐃᑎᒍᑦ ᐋᓐᓂᐊᖃᓕᖅᑕᐃᓕᒪᕙᓐᓂᖏᓄᑦ ᐊᒻᒪᓗ ᖃᓄᐃᖖᒋᑦᐊᕆᐊᖃᕐᓂᖏᓄᑦ. ᐃᓄᐃᑦ ᓂᕈᐊᖅᖠᔭᕆᐊᖃᕋᔪᒃᑎᑕᐅᖕᒪᑕ ᓂᕿᑦᑎᐊᕙᓐᓂᒃ ᐅᕝᕙᓘᓐᓃᑦ ᖃᓄᑎᒋ ᓂᕿᒋᔭᒃᓴᒥᓐᓂᒃ ᓂᕿᖃᖅᐸᒋᐊᖃᕐᓂᕐᒥᓐᓄᑦ ᐱᓯᒪᔪᓐᓇᕐᓂᐊᕐᒪᖔᕐᒦᒃ, ᑕᐃᒪᓗ ᓈᒻᒪᒍᖕᓃᖅᓯᒪᓕᕈᑎᐅᕙᒃᖢᑎᒃ ᐋᓐᓂᐊᖃᓕᖅᑕᐃᓕᒪᔪᓐᓇᕐᓂᖏᑦ. ᑖᒃᑯᐊ ᐸᕐᓇᐅᑏᑦ ᐃᑲᔪᕈᑎᐅᓕᕐᓂᐊᕐᒪᑕ ᑕᒪᓐᓇ ᓈᒻᒪᖖᒋᓐᓂᐅᔪᖅ ᐋᖅᑭᒃᑕᐅᓯᒪᓕᕐᓂᒃᓴᖓᓄᑦ.”
ᒫᓂᑲ ᐃᐊᓪ-ᑲᓇᔪᖅ – ᐊᖏᔪᖅᑳᖅ, ᐃᓄᐃᑦ ᐅᑭᐅᖅᑕᖅᑐᒥ ᑲᑎᒪᔨᖏᑦ ᑲᓇᑕᒥ
“ᐊᖏᔪᐊᓗᖕᒥᒃ ᑕᐃᒪᐅᖏᓐᓇᖅᑑᔪᓐᓇᕐᓂᐅᔪᑦ ᒪᒃᑯᒃᑐᖏᓂ ᐃᓄᐃᑦ ᐃᓄᐃᑦ ᓄᓇᓕᓕᒫᖏᓐᓂ ᓱᓕ, ᐊᒻᒪᓗ ᑲᔪᓰᓐᓇᖅᓯᒪᓪᓗᑎᒃ, ᓇᕿᑎᖅᑕᐅᓯᒪᓂᖏᑕ ᖃᓄᐃᓪᓚᑦᑖᕐᓂᐅᔪᓂᑦ ᑕᐃᒪᐅᔭᕆᐊᖃᓪᓚᕆᒃᑑᓪᓗᑎᒃ ᐱᕈᖅᑎᑦᑎᕙᓪᓕᐊᔪᓐᓇᕐᓂᕐᓄᑦ ᐋᓐᓂᐊᖃᖖᒋᑦᓯᐊᕐᑐᓂᒃ ᐊᒻᒪᓗ ᖁᕕᐊᓱᑦᑎᐊᕐᓗᑎᒃ ᐃᓅᓯᖃᓕᖅᑎᑕᐅᓂᒃᓴᖏᓐᓄᑦ ᐱᑕᖃᖖᒋᑎᑕᐅᒐᔪᖕᒪᑕ, ᐃᓚᖃᖅᑎᓪᓗᒋᑦ ᓈᒻᒪᒃᑐᓂᒃ ᓂᕿᒋᔭᒃᓴᒥᓐᓂᒃ ᐱᓯᒪᓕᖃᑦᑕᕈᓐᓇᖖᒋᓐᓂᐅᔪᓂᒃ. ᐅᓪᓗᒥ, ᓂᕆᐅᖕᓂᖃᓪᓚᕆᓕᖅᓯᒪᕗᖓ ᓂᕿᒋᓂᐊᖅᑕᒥᓐᓂᒃ ᐱᓯᒪᓕᖃᑦᑕᕈᓐᓇᕐᓂᕐᒧᑦ ᓈᒻᒪᖖᒋᔾᔪᑎᐅᓕᖅᓯᒪᔪᑦ ᒪᒃᑯᒃᑐᖏᓐᓂ ᐃᓄᐃᑦ ᐱᓗᐊᕈᖕᓃᖅᑎᑕᐅᓂᐊᓕᕐᓂᖓᑕ, ᒥᑭᒡᓕᒋᐊᖅᑎᑕᐅᓯᒪᓕᕐᓂᐊᕐᓂᖖᒋᒃᑯᑎᒃ, ᓴᖅᑮᓯᒪᓕᕐᓂᖅᑎᒍᑦ ᐃᓄᐃᑦ ᓄᓇᖓᓐᓂ ᓂᕿᒋᓂᐊᖅᑕᒥᓐᓂᒃ ᐱᓯᒪᖃᑦᑕᓕᕈᓐᓇᕐᓂᖏᓐᓄᑦ ᐸᕐᓇᐅᑏᑦ.”
ᐳᕋᐃᐊᓐ ᐹᑐᓪ – ᐊᖏᔪᖅᑳᖅ, ᑲᓇᑕᒥ ᒪᒃᑯᒃᑐᑦ ᐃᓄᐃᑦ ᑲᑎᒪᔨᕐᔪᐊᖏᑦ
“ᑭᓇᑐᐃᓐᓇᖅ ᐃᓄᒃ ᐃᓱᒫᓗᒍᑎᖃᖅᑎᑕᐅᔭᕆᐊᖃᖖᒋᒻᒪᑦ ᓇᑭᑦ ᖃᓄᖅ ᓂᕆᔭᒃᓴᒥᓐᓂᒃ ᐱᓯᒪᓕᕈᖕᓇᕐᓂᐊᕐᒪᖔᕐᒦᒃ. ᐃᓕᑕᕆᓯᒪᕙᕋ ᐱᕙᓪᓕᐊᔪᓕᕆᓂᐅᔪᑦ ᓂᕿᒋᔭᒃᓴᒥᓐᓂᒃ ᐱᓯᒪᓕᖃᑦᑕᕈᓐᓇᕐᓂᕐᒧᑦ ᐱᓕᕆᐊᖑᔪᑦ ᐊᑯᓂᐊᓗᒻᒪᕆᒃ ᓯᕗᓪᓕᖅᐸᐅᑎᑕᒃᓴᐅᓯᒪᓕᕐᒪᑕ ᐃᓄᖕᓄᑦ, ᐊᒻᒪᓗ ᐱᓕᕆᐊᒃᓴᖃᓕᖅᓯᒪᒐᒪ ᐱᓕᕆᖃᑎᖃᕐᓂᐊᕐᓂᓐᓄᑦ ᐃᓄᐃᑦ ᑕᐱᕇᒃᑯᖏᓐᓂᒃ ᑲᓇᑕᒥ ᐊᒻᒪᓗ ᒐᕙᒪᑐᖃᒃᑯᓐᓂ ᐃᖅᑲᓇᐃᔭᖃᑎᒋᔭᓐᓂᒃ ᐱᐅᓂᖅᐹᑎᒍᑦ ᐃᑲᔪᖅᑐᐃᓯᒪᓕᕐᓂᒃᓴᒧᑦ ᐃᓄᐃᑦ ᑕᐱᕇᒃᑯᓐᓂᒃ ᑲᓇᑕᒥ ᐊᑐᓕᖅᑎᑦᑎᕙᓪᓕᐊᓂᖏᓐᓂ ᓇᖕᒥᓂᖅ ᐋᖅᑭᒋᐊᕈᑎᒃᓴᐅᔪᓄᑦ ᓂᕿᒋᔭᒃᓴᒥᓐᓂᒃ ᐱᓯᒪᓕᖃᑦᑕᕈᓐᓇᕐᓂᐅᔪᓄᑦ ᐃᓄᐃᑦ ᓄᓇᖓᓐᓂ.”
ᒥᓂᔅᑕ ᒫᒃ ᒥᓪᓗᕐ – ᒥᓂᔅᑕᒋᔭᐅᔪᖅ ᓄᓇᖃᖅᑳᕐᓯᒪᔪᓕᕆᔨᒃᑯᓐᓂ
“ᓂᕿᒋᔭᒃᓴᒥᓐᓂᒃ ᐱᓯᒪᓕᖃᑦᑕᕈᖕᓇᖖᒋᓐᓃᑦ ᐊᒃᑐᐃᓯᒪᓂᖃᓪᓚᕆᖕᒪᑕ ᐊᒥᓱᓄᑦ ᓄᓇᓕᒋᔭᐅᔪᓂᑦ ᐃᓄᐃᑦ ᓄᓇᓕᓕᒫᖏᓐᓂ ᐱᔾᔪᑎᒋᓪᓗᒋᑦ ᐅᖓᓯᒃᑐᒥᐅᖑᓗᐊᕐᓂᖏᑦ, ᐊᑭᑐᓗᐊᕐᑑᓂᖏᑦ ᐊᓐᓇᐅᒪᔾᔪᑎᒃᓴᐃᑦ, ᐊᒻᒪᓗ ᐊᕙᑎᐅᔪᑉ ᐊᓯᔾᔨᖅᐸᓪᓕᐊᓂᖓᑕ. ᑲᔪᓯᑎᑦᑎᓯᒪᕗᒍᑦ ᐱᓕᕆᖃᑎᖃᑦᓯᐊᕐᓂᑦᑎᓐᓂᒃ ᐱᓕᕆᐊᖃᖃᑎᒌᒃᑐᓂ, ᐃᓚᖃᖅᑎᓪᓗᒋᑦ ᐃᓄᐃᑦ ᑕᐱᕇᒃᑯᑦ ᑲᓇᑕᒥ ᐊᒻᒪᓗ ᐃᓄᐃᑦ ᓂᕿᒋᓂᐊᖅᑕᒥᓐᓂᒃ ᐱᓯᒪᓕᖃᑦᑕᕈᓐᓇᕐᓂᖏᓐᓄᑦ ᐱᓕᕆᐊᖃᖅᑎᒋᔭᐅᔪᑦ, ᓯᕗᒻᒧᒋᐊᖅᑎᑕᐅᓯᒪᓕᖁᓪᓗᒋᑦ ᐋᖅᑮᒋᐊᕈᑎᒃᓴᐅᔪᑦ ᐃᑲᔪᖅᑐᐃᓯᒪᓂᖃᖅᓱᑎᒃ ᐊᒻᒪᓗ ᑕᑯᒃᓴᐅᑎᑦᓯᓯᒪᔪᓂᒃ ᐃᓄᐃᑦ ᓯᕗᓪᓕᖅᐸᐅᑎᑕᐅᖁᔭᖏᓐᓂᒃ. ᑕᒪᒃᑯᐊ ᐃᓚᖃᖅᐳᑦ ᐋᖅᑭᒃᓱᐃᖃᑎᒌᒃᓯᒪᓪᓗᑎᒃ ᐊᖑᓇᓱᒃᑏᑦ ᐃᑲᔫᓯᐊᖅᑖᖑᕙᒃᑐᓄᑦ ᑮᓇᐅᔭᖁᑎᒃᓴᖏᓂᒃ ᐃᑲᔪᕈᑎᒃᓴᐅᑎᑕᐅᓪᓗᑎᒃ ᐊᑭᑐᓗᐊᖅᐸᖕᓂᖏᑕ ᐱᐅᓯᑐᖃᖅ ᒪᓕᒃᖢᒍ ᐊᖑᓇᓱᐊᖃᑦᑕᕐᓂᐅᔪᓄᑦ ᐊᒻᒪᓗ ᐊᖑᓇᓱᒃᐸᓐᓂᐅᔪᓄᑦ ᐊᒻᒪᓗ ᐋᖅᑭᒃᓱᐃᓯᒪᓕᕐᓂᕐᒧᑦ ᐊᖏᒡᓕᒋᐊᖅᑎᑕᐅᓯᒪᓕᖁᓪᓗᒋᑦ ᐊᑐᐃᓐᓇᐅᑎᑕᐅᕙᒃᑐᓄᑦ ᐃᓄᐃᑦ ᓂᕿᒋᕙᒃᑕᖏᓐᓂᒃ. ᑲᔪᓯᑎᑦᑎᓯᒪᓂᐊᖅᑐᒍᑦ ᓯᕗᒻᒧᒋᐊᖅᑎᑦᓯᓂᕐᒥ ᐃᑲᔪᖅᑎᒌᒃᓗᑕ ᐱᓕᕆᖃᑎᒌᖕᓂᐅᔪᓂᒃ, ᐱᓕᕆᐊᖃᖃᑎᒌᓐᓂᕐᓂᒃ, ᐊᒻᒪᓗ ᑕᒪᕐᒥᐅᓪᓗᑎᒃ ᒐᕙᒪᐅᔪᓂ ᐱᓕᕆᐊᖑᓕᖅᓯᒪᓂᖏᑎᒍᑦ, ᐱᐅᓯᒋᐊᖅᑎᑕᐅᓯᒪᓕᖁᓪᓗᒋᑦ ᓂᕿᒋᔭᒃᓴᒥᓐᓂᒃ ᐱᓯᒪᓕᖃᑦᑕᕐᓂᐅᔪᓄᑦ ᐃᓄᐃᑦ ᓄᓇᖓᓐᓂ. ᖁᔭᓐᓇᒦᕈᒪᕙᒃᑲ ᐃᓄᐃᑦ ᑕᐱᕇᒃᑯᑦ ᑲᓇᑕᒥ ᑲᔪᓰᓐᓇᖅᑎᑦᑎᓯᒪᓂᖏᓐᓂᒃ ᓯᕗᓕᖅᑎᐅᓂᕐᒥᓐᓄᑦ ᐊᒻᒪᓗ ᐊᒃᓱᕈᕈᑎᒋᓪᓗᒋᑦ ᐋᖅᑮᓯᒪᓕᕐᓂᖏᓐᓄᑦ ᑖᒃᑯᓂᖓ ᐃᓄᐃᑦ ᓄᓇᖓᓐᓂ ᓂᕿᒋᔭᒃᓴᒥᓐᓂᒃ ᐱᓯᒪᖃᑦᑕᓕᕈᓐᓇᕐᓂᕐᓄᑦ ᐸᕐᓇᐅᑎᓂᒃ.”
ᒥᓂᔅᑕ ᑖᓂᐅᓪ ᕚᓐᑖᓪ, P.C., M.P. – ᐅᑭᐅᖅᑕᖅᑐᒥᐅᓕᕆᔨᒃᑯᓐᓄᑦ ᒥᓂᔅᑕᒋᔭᐅᔪᖅ