ᒫᔾᔨ 9, 2023 – ᐋᑐᕙ, ᐋᓐᑎᐊᕆᐅ
ᐃᓄᐃᑦ ᑕᐱᕇᑦ ᑲᓇᑕᒥ ᓴᖅᑮᓯᒪᓕᖅᑐᑦ ᑲᓇᑕᒥ ᐃᓄᐃᑦ ᐃᓕᖓᓐᓂᕆᔭᖏᓐᓄᑦ ᑎᑎᕋᖅᑕᐅᓯᒪᔪᓂᒃ ᑐᑭᒧᐊᒍᑎᒃᓴᐅᓂᐊᖅᑐᓂᒃ ᓯᕗᓂᕐᒥ ᒪᓕᒐᖁᑎᐅᓕᕋᔭᖅᑐᓄᑦ ᐊᒻᒪᓗ ᐱᓕᕆᐊᓂᒃ ᐊᐅᓚᑦᓯᑦᔪᑕᐅᓇᔭᖅᑐᓄᑦ ᑕᕆᐅᑉ ᐊᕙᑎᒋᔭᔭᖏᓐᓄᑦ ᐃᓄᐃᑦ ᓄᓇᖓᓐᓂ.
ᐃᒪᕐᔪᐊᑦ ᐊᑐᖅᑕᐃᓐᓇᕗᑦ: ᐃᓄᐃᑦ ᓄᓇᖓᑦ ᑕᕆᐅᕐᒥ ᐊᑐᐊᒐᖅ ᓯᕗᓪᓕᐅᑎᔭᐅᖁᔭᐅᔪᑦ ᐊᒻᒪᓗ ᐱᓕᕆᖁᔭᐅᓯᒪᔪᓂᑦ ᓴᖅᑭᑎᑕᐅᓯᒪᓕᕈᓐᓇᕐᒪᑦ ᑐᖖᒐᕝᕕᒋᓗᒋᑦ ᐃᓄᐃᑦ ᑕᐱᕇᑦ ᑲᓇᑕᒥ 2020-2023 ᖃᓄᖅᑑᕈᑎᓕᐅᕈᑎᒋᓪᓗᒋᑦ ᐸᕐᓇᐅᑎᖏᑦ ᐊᒻᒪᓗ ᐱᓕᕆᐊᖑᔪᓄᑦ ᐸᕐᓇᐅᑎᑦ ᐊᒻᒪᓗ ᐱᔾᔪᑎᖃᖅᓱᑎᒃ ᐊᖏᔪᒥᒃ ᖃᐅᔨᓴᐃᓂᐅᓚᐅᖅᑐᓄᑦ ᐊᒻᒪᓗ ᖃᐅᔨᒋᐊᕐᓂᕆᖃᑦᑕᖅᓯᒪᔭᖏᓐᓄᑦ ᑲᓇᑕᒥ ᐃᓄᐃᑦ ᑕᕆᐅᓕᕆᓂᕐᒥ ᑲᑎᒪᔨᕋᓛᖏᓐᓂᑦ.
ᑖᒃᑯᐊ ᐃᓕᖓᓐᓂᐅᔪᓄᑦ ᑎᑎᕋᖅᓯᒪᔪᑦ ᓇᓗᓇᐃᔭᐃᓯᒪᒻᒪᑕ ᑕᕆᐅᓕᕆᓂᕐᒥ ᐱᕙᓪᓕᐊᔪᓕᕆᓂᐅᔪᓄᑦ ᐊᒃᑐᐃᓂᖃᖅᓱᑎᒃ ᐃᓄᐃᑦ ᓄᓇᓕᒋᔭᖏᓐᓂᒃ, ᐃᓚᖃᖅᑎᓪᓗᒋᑦ ᐅᒥᐊᕐᔪᐊᑎᒍᑦ ᐅᓯᖃᑦᑕᕐᓂᐅᔪᓄᑦ ᐊᒃᑐᐃᓯᒪᓕᕐᓂᖏᓂᒃ, ᖃᓄᐃᖖᒋᑦᓯᐊᖅᑎᑦᑎᔭᕆᐊᖃᕐᓂᕐᒧᑦ ᐊᒻᒪᓗ ᒥᐊᓂᕆᔭᐅᓯᒪᓂᖏᓐᓄᑦ, ᑕᕆᐅᒥ ᐱᓕᕆᓂᖃᕐᕕᐅᓕᖅᑐᒃᓴᓄᑦ ᐊᒥᒐᖅᓯᓂᐅᔪᓄᑦ ᐊᒻᒪᓗ ᖃᐅᔨᓴᐃᓂᐅᕙᒃᑐᓄᑦ ᐊᒻᒪᓗ ᓇᐅᑦᓯᖅᑐᐃᓂᐅᕙᒃᑐᓄᑦ. ᓇᓗᓇᐃᔭᐃᓯᒪᕗᑦ ᐃᓄᐃᑦ ᒪᓕᒐᓕᕆᓂᕐᒥ ᐃᓕᖓᓐᓂᕆᔭᖏᓂᒃ ᐊᒻᒪᓗ ᐱᓕᕆᖁᔭᐅᓯᒪᔪᓂᒃ ᑐᖖᒐᕝᕕᒋᓗᒋᑦ ᐱᔪᓐᓇᐅᑎᖃᕐᓂᕗᑦ ᐃᓱᒪᓕᐅᖅᑎᐅᔪᓐᓇᕐᓂᕐᒥᒃ ᓯᕗᓂᕆᓂᐊᖅᑕᑦᑎᓐᓄᑦ ᑕᕆᐅᕐᒥᐅᑕᐅᓪᓗᑕ.
“ᒫᓐᓇᐅᔪᖅ ᐱᓕᕆᓂᖃᓕᕆᐊᖃᖅᑐᒍᑦ ᒥᐊᓂᕆᔭᐅᓕᖁᓪᓗᒋᑦ ᐊᒻᒪᓗ ᑲᔪᓰᓐᓇᖅᑎᑕᐅᔪᓐᓇᕐᓗᑎᒃ ᐊᐅᓚᑦᓯᓂᖃᓕᕐᓗᑕ ᑕᕆᐅᑦᑕ ᓯᒡᔭᖁᑎᒋᔭᖏᓂᒃ ᐊᒻᒪᓗ ᑕᕆᐅᑦ ᐊᕙᑎᒋᔭᖏᓂᒃ ᐊᒻᒪᓗ ᐱᓕᕆᐊᖑᓕᖁᓪᓗᒋᑦ ᓈᒻᒪᒍᖕᓃᖅᑎᑕᐅᓪᓚᕆᒃᓱᑎᒃ ᐊᒃᑐᖅᑕᐅᓯᒪᓕᕐᓂᖏᓂᒃ ᑕᐃᒪᐅᓇᑎᒃ ᑕᕆᐅᓕᕆᓂᕐᒥ ᐱᓕᕆᓂᖃᕐᕕᐅᓕᖅᑐᒃᓴᑦ ᑕᒪᒃᑯᐊ ᐊᓯᑦᔨᖅᐸᓪᓕᐊᓕᕐᓂᖏᓐᓂ,” ᐅᖃᖅᓱᓂ ᓇᐃᑖᓐ ᐆᐱᑦ, ᐊᖏᔪᖅᑳᖅ ᐃᓄᐃᑦ ᑕᐱᕇᑦ ᑲᓇᑕᒥ.
“ᐃᓄᐃᑦ ᓄᓇᓕᕆᓂᕐᒥ ᐊᖏᕈᑎᖏᑦ, ᔪᓇᐃᑎᑦ ᓃᓴᒃᑯᑦ ᓇᓗᓇᐃᖅᓯᓂᖏᑦ ᐱᔪᓐᓇᐅᑎᖃᕐᓂᖏᑕ ᓄᓇᖃᖅᑳᖅᓯᒪᔪᐃᑦ ᐊᒻᒪᓗ ᐃᓄᐃᑦ ᓄᓇᖓᓂ ᒪᓕᒐᖁᑎᖏᑦ – ᐃᓕᑕᖅᓯᓯᒪᒻᒪᑕ ᓄᓇᒋᔭᑐᖃᕆᒐᑦᑎᒍ ᐊᔾᔨᖃᕋᓂ ᐊᕕᒃᑐᖅᓯᒪᓂᐅᔪᒦᑦᑐᖅ ᐊᖏᓂᖃᖅᓱᓂ ᐅᖓᑕᑖᓄᐊᖅᓯᒪᔪᒥᒃ 70 ᐳᕐᓴᓐᑎᖓᑕ ᑲᓇᑕᐅᑉ ᓄᓇᕐᔪᐊᖓᓂ ᑕᕆᐅᑦ ᓯᒡᔭᒋᔭᖏᓐᓃᑦᑐᓂᒃ – ᑕᒪᕐᒥᒃ ᓇᓗᓇᐃᕈᑎᐅᒻᒪᑕ ᑐᖖᒐᕝᕕᒋᑐᕋᐅᑦᑑᓂᑦᑎᓐᓂᒃ ᑕᕆᐅᑦ ᐊᕙᑎᒋᔭᖏᓐᓄᑦ ᐊᒻᒪ ᐃᓕᑕᕆᔭᐅᓯᒪᓕᕆᐊᖃᓪᓚᕆᖕᒪᑕ ᐊᒻᒪᓗ ᒥᐊᓂᕆᔭᐅᓯᒪᓕᕐᓗᑎᒃ ᒥᒃᓯᖃᑦᑎᐊᖅᑐᑎᒍᑦ ᑕᕆᐅᓕᕆᓂᕐᒥ ᐃᓱᒪᓕᐅᕈᑎᓕᐅᕈᑎᑎᒍᑦ, ᑐᖖᒐᕝᕕᖃᖅᑎᑕᐅᓯᒪᓗᑎᒃ ᓴᐃᒻᒪᖃᑎᒌᒃᓯᒪᓕᕐᓂᕐᒧᑦ ᑐᖖᒐᕝᕕᖁᑎᒃᓴᐅᔪᓄᑦ.”
ᑐᓴᒐᒃᓴᓕᕆᔾᔪᑎᓄᑦ ᐊᐱᖅᑯᑎᒃᓴᖃᖅᑐᑦ: