ᓯᑦᑎᐱᕆ 9, 2022 – ᐋᑐᕙ, ᐋᓐᑎᐊᕆᐅ – ᐅᓪᓗᒥ, ᑲᓇᑕᒥ ᒪᒃᑯᒃᑐᑦ ᐃᓄᐃᑦ ᑲᑎᒪᔨᖏᑦ ᐊᒻᒪᓗ ᐃᓄᐃᑦ ᑕᐱᕇᑦ ᑲᓇᑕᒥ ᑲᑎᓐᓂᖃᕐᓂᐊᖅᑐᑦ ᐃᓅᓯᕐᒥᒃ ᒐᕙᒪᑦᑐᖅ ᒪᓕᒐᓕᐅᕐᕕᒡᔪᐊᖓᓂ ᖁᕕᐊᓱᒍᑎᖃᕆᐊᖅᓯᒪᓗᑎᒃ ᐊᒻᒪᓗ ᐃᓄᐃᑦ ᑲᔪᓰᓐᓇᕈᓐᓇᕐᓂᖓᓂᒃ ᓯᓚᕐᔪᐊᓕᒫᒥ ᐃᒻᒥᓃᖃᑦᑕᖁᔨᖖᒋᓐᓂᕐᒧᑦ ᐅᓪᓗᖓᓂ. ᐅᑭᐅᑕᒫᑦ ᐃᖅᑲᒪᔭᐅᕙᓐᓂᖓᓂ ᓯᑦᑎᐱᕆ 10-ᒥ, ᓯᓚᕐᔪᐊᓕᒫᒥ ᐃᒻᒥᓃᖃᑦᑕᖁᔨᖖᒋᓐᓂᕐᒧᑦ ᐅᓪᓗᖓᓂ ᐃᓄᐃᑦ ᑲᑎᓐᓂᖃᖅᓱᑎᒃ ᐊᓯᐅᔨᓯᒪᔭᑦᑎᓐᓂᒃ ᐃᖅᑲᐅᒪᖃᑎᒌᒃᓱᑎᒃ ᐅᓪᓗᖃᖅᑎᑦᓯᕙᒃᑐᑦ ᐊᒻᒪᓗ ᐱᓕᕆᐊᖃᓕᕋᓱᓐᓂᑦᑎᒍᑦ ᖃᓄᐃᖖᒋᑦᓯᐊᖅᑐᓂᒃ, ᖁᕕᐊᓱᓐᓂᖅᓴᐅᔪᓂᒃ ᓄᓇᓕᖃᓕᖅᑎᑦᓯᒋᐊᑦᑎᓐᓄᑦ ᐃᓄᐃᑦ ᓄᓇᓗᒃᑖᖏᓂ.
ᒪᓕᒃᑎᑕᐅᓗᑎᒃ ᐊᕕᒃᑐᖅᓯᒪᓂᕆᔭᐅᔪᓂ ᖁᑦᑎᖕᓂᕆᔭᐅᓂᖏᑕ, ᐃᓄᐃᑦ ᐃᒻᒥᓃᖃᑦᑕᕐᓂᖏᑦ 5-ᓂᑦ 25-ᓄᑦ ᖁᑦᑎᖕᓂᖃᕐᓂᖅᓴᐅᒪᑕ ᑲᓇᑕᒥᐅᖑᖃᑎᒋᔭᒥᓐᓂᑦ ᖁᑦᑎᖕᓂᐅᔪᓂᑦ. ᑕᒪᓐᓇ ᑕᐃᒪᓐᓇᐃᓚᕿᑎᑕᐅᕗᖅ ᓱᒃᑲᓕᔪᒻᒪᕆᖕᒥᒃ ᐃᓅᖃᑎᒌᖑᔪᑦ ᑲᑎᖖᒐᖃᑎᖃᖅᐸᓪᓕᐊᓂᖏᓂᒃ ᐃᓄᐃᑦ ᓄᓇᖓᓐᓂ, ᒐᕙᒪᖃᐅᓯᐅᕙᒃᑐᓂᓪᓗ, ᐊᑭᕋᖅᑐᐃᓂᐅᕙᒃᑐᓪᓗ ᐅᕕᓂᖃᑎᒋᖖᒋᑕᒥᓐᓂᒃ, ᐃᓕᓐᓂᐊᕆᐊᕐᕕᐅᕙᓚᐅᖅᓯᒪᔪᓂᑦ ᐊᒻᒪᓗ ᑭᖑᕚᕇᒃᑐᑦ ᐊᒃᓱᕈᕐᓇᖅᑐᒃᑰᖅᐸᓪᓕᐊᕙᓐᓂᖏᓐᓂᑦ.
ᑕᐃᒪᓗ, ᐃᓄᐃᑦ – ᐱᓗᐊᖅᑐᒥᒃ ᒪᒃᑯᒃᑐᖏᑦ ᐃᓄᐃᑦ – ᐊᑦᑕᓇᖅᑐᒦᓕᖅᓯᒪᓂᖏᑦ ᖁᕝᕙᓯᒃᓯᓗᐊᖅᓯᒪᓕᕐᒪᑦ. ᑲᓇᑕᒥ ᒪᒃᑯᒃᑐᑦ ᐃᓄᐃᑦ ᑲᑎᒪᔨᖏᑦ ᐃᓱᒪᒃᑯᑦ ᐋᓐᓂᐊᖃᓕᖅᑕᐃᓕᒪᔪᓕᕆᓂᕐᒥ ᐊᒻᒪᓗ ᐃᒻᒥᓃᖃᑦᑕᖁᔨᖖᒋᓐᓂᓕᕆᓂᕐᒥ ᐱᓕᕆᐊᒃᓴᐅᔪᓂᒃ ᓯᕗᓪᓕᖅᐸᐳᑎᑕᒃᓴᖖᒍᖅᑎᑦᑎᓯᒪᓕᖅᐳᑦ, ᑎᓕᐅᕆᔾᔪᑎᒋᓪᓗᒍ ᑲᓇᑕᐅᑉ ᖁᑦᑎᖕᓂᖓᓂᑦ ᑭᐅᔭᐅᓯᒪᓕᖁᓪᓗᒋᑦ ᐊᒻᒪᓗ ᐊᖏᒡᓕᒋᐊᖅᑎᑕᐅᓯᒪᓕᖁᓪᓗᒋᑦ ᐃᓄᐃᑦ ᓄᓇᓕᒋᔭᖏᑕ ᐃᑲᔪᖅᑐᒐᐅᔾᔪᑎᒃᓴᑖᕆᕙᒃᑕᖏᑦ ᐱᓕᕆᐊᕆᔭᐅᔪᓐᓇᖅᓯᓂᐊᕐᒪᑕ ᐃᓄᖕᓂᒃ ᓯᕗᓕᖅᑎᖃᕐᓗᑎᒃ ᑕᒪᒃᑯᐊ ᐋᖅᑮᒋᐊᕈᑎᒃᓴᐅᓕᕋᔭᖅᑐᑦ ᒥᑭᒡᒋᐊᖅᑎᑕᐅᓯᒪᓕᖁᓪᓗᒋᑦ ᐃᒻᒥᓃᖃᑦᑕᕐᓂᐅᔪ ᖁᑦᑎᖕᓂᕆᔭᖏᑦ.
“ᐊᒥᓲᓂᖅᓴᐃᑦ ᐃᓄᐃᑦ ᐃᓅᓯᕐᒥᓐᓂ ᐃᒻᒥᓃᖅᑐᖃᖃᑦᑕᖅᓯᒪᔪᓂᑦ ᖃᓂᑕᕆᔭᒥᓐᓂᑦ ᐊᒃᑐᖅᑕᐅᓯᒪᖕᒪᑕ, ᐊᒻᒪᓗ ᑕᐃᒪᓕ ᐊᑦᑕᓇᖅᑐᒦᓕᕈᓐᓇᕐᓂᐅᔪᑦ ᖁᑦᑎᖕᓂᖅᓴᒻᒪᕆᐅᓕᕐᒪᑕ,” ᐅᖃᖅᓱᓂ NIYC-ᑯᓐᓄᑦ ᐊᖏᔪᖅᑳᖑᔪᖅ ᐳᕋᐃᐊᓐ ᐹᑐᓪ. “ᐊᑏ ᐱᓕᕆᖃᑎᒌᓕᓚᐅᖅᑕ ᐱᐅᓂᖅᓴᐅᔪᑎᒍᑦ ᐃᑲᔪᖅᓱᒐᐅᓯᒪᓕᖁᓪᓗᒋᑦ ᐃᓚᒌᒃᑐᖁᑎᒋᔭᕗᑦ ᐊᒻᒪᓗ ᐱᖃᑎᐊᓗᒋᔭᕗᑦ ᐱᓯᒪᔭᕆᐊᖃᖅᑕᒥᓐᓂᒃ ᐊᑐᐃᓐᓇᐅᓕᕐᕕᐅᖁᓪᓗᒋᑦ ᐃᓅᓯᖏᓐᓄᑦ ᐃᑲᔫᑕᐅᓕᕈᓐᓇᖅᑐᓂᒃ ᖁᕕᐊᓱᑦᑎᐊᕐᓗᑎᒃ ᖃᓄᐃᖖᒋᑦᑎᐊᖅᑑᓗᑎᒃᓗ ᐃᓅᓯᖃᓕᕈᓐᓇᖁᓪᓗᒋᑦ.”
ᑖᒃᑯᐊ ᐱᓕᕆᐊᖑᔪᑦ ᑐᑭᒧᐊᒍᑎᒃᓴᖃᓕᖅᑎᑕᐅᖁᓪᓗᒋᑦ, 2016-ᒥ ᐃᓄᐃᑦ ᑕᐱᕇᑦ ᑲᓇᑕᒥ ᐱᒋᐊᖅᑎᑦᑎᓯᒪᓕᓚᐅᖅᑐᑦ ᑲᓇᑕᒥ ᐃᓄᐃᑦ ᐃᒻᒥᓃᖃᑦᑕᖁᔨᖖᒋᓐᓂᓕᕆᓂᕐᒧᑦ ᐸᕐᓇᐅᑎᓂᒃ, ᐃᓄᖕᓄᑦ ᑐᕌᖓᓪᓗᑎᒃ ᐸᕐᓇᐅᑎᓕᐊᖑᓯᒪᔪᓂᒃ ᐱᓕᕆᐊᖑᓯᒪᓕᖁᓪᓗᒋᑦ ᑕᐃᒪᐅᖏᓐᓇᐅᔭᖅᑑᓪᓗᓂ ᑭᒃᑯᑐᐃᓐᓇᑦ ᐋᓐᓂᐊᖅᓯᐅᕐᑎᓕᕆᓂᓕᕐᓂ ᐃᒻᒥᓃᖃᑦᑕᕐᓂᓕᕆᓂᐅᔪᖅ ᑐᐊᕕᐅᕐᓇᖅᓯᓯᒪᓂᖓᑕ ᐃᓄᖕᓂ.
ᑖᒃᑯᐊ ᐸᕐᓇᐅᑎᓕᐊᖑᓯᒪᔪᑦ ᑐᕌᕐᕕᒃᓴᖃᕐᒪᑕ ᐊᑐᐃᓐᓇᐅᓕᖅᑎᑕᐅᓯᒪᖁᓪᓗᒋᑦ ᐃᓱᒪᒃᑯᑦ ᖃᓄᐃᖖᒋᑦᑎᐊᕐᓂᓕᕆᓂᕐᒧᑦ ᐱᔨᑦᓯᕋᕈᑎᒃᓴᐃᑦ ᑕᐃᒪᐅᖏᓐᓇᖅᑎᑕᐅᖁᓪᓗᒋᑦ ᐃᓄᖕᓄᑦ, ᒪᒥᓴᕈᑎᐅᓯᒪᓕᖁᓪᓗᒍ ᐊᒃᓱᕈᕐᓇᖅᑐᒃᑰᕐᓯᒪᓂᐅᔪᓂᑦ ᐊᒻᒪᓗ ᕿᒃᓵᕈᑎᖃᐃᓐᓇᖅᓯᒪᓂᐅᔪᓂᑦ ᑕᐃᒪᐅᖏᓐᓇᐅᔭᖅᓯᒪᔪᓂᑦ, ᐊᒻᒪᓗ ᐱᓕᕆᔾᔪᑎᒃᓴᐅᔪᑦ ᐃᓄᐃᑦ ᖃᐅᔨᒪᔭᑐᖃᖏᑦ ᑲᔪᓰᓐᓇᕆᐊᕈᓐᓇᕐᓂᕐᒧᑦ ᐊᒻᒪᓗ ᐃᒻᒥᓃᖃᑦᑕᖁᔨᖖᒋᓐᓂᓕᕆᓂᕐᒧ ᐊᑐᓕᖅᑎᑕᐅᓯᒪᖁᓪᓗᒋᑦ.
ᐃᓱᒻᒥᖅᓯᒪᓐᓂᕈᕕᑦ ᐃᒻᒥᓃᕈᒪᓪᓗᑎᑦ ᐊᒻᒪᓗ ᐃᑲᔪᖅᑕᐅᔭᕆᐊᖃᕈᕕᑦ, ᐊᑏ ᐅᖄᓚᕝᕕᒋᓚᐅᒃᑭᑦ ᖃᓄᐃᖖᒋᑦᓯᐊᖁᔨᓕᕆᓂᕐᒧᑦ ᐅᖄᓚᕝᕕᒃᓴᐅᔪᑦ ᐅᕙᓂ 1-855-242-3310. ᒪᒃᑯᒃᑐᑦ ᐃᑲᔪᖅᑕᐅᔭᕆᐊᓖᑦ ᐅᖄᓚᔪᓐᓇᖅᑐᑦ ᓱᕈᓯᕐᓄᑦ ᐃᑲᔪᖅᑎᒃᓴᒃᑯᑦ ᐅᖄᓚᐅᑎᖓᓄᑦ ᐅᕙᓂ 1-800-668-6868 ᐅᕝᕙᓘᓐᓃᑦ ᐅᖄᓚᐅᑎᐊᓛᒃᑯᑦ ᑎᑎᕋᕐᕕᒋᓗᒋᑦ ᐅᕗᖓ 686868.
-30-