Skip to main content
ᑐᓴᖅᑎᑦᓯᔾᔪᑏᑦ

ᐃᓄᐃᑦ ᑕᐱᕇᑦ ᑲᓇᑕᒥ ᑲᑎᖕᖓᔨᖏᑦ ᐋᑐᕚᒥᑦ ᑲᑎᔪᕕᓃᑦ, ᐊᖏᕈᑎᖃᕐᓱᑎᓗ ᐃᓄᐃᑦ ᓄᓇᖓᓂᑦ ᐃᓕᓐᓂᐊᕕᕐᔪᐊᑉ ᓄᐃᑕᐅᓂᑦᓴᖓᓂᑦ

By December 18, 2023 No Comments

ᑏᓯᒻᐱᕆ 14, 2023 – ᐋᑐᕚ

ᐃᓄᐃᑦ ᑕᐱᕇᑦ ᑲᓚᑕᒥ ᑲᑎᖕᖓᔨᖏᑦ ᑲᑎᔪᕕᓃᑦ ᐋᑐᕚᒥᑦ ᑏᓯᒻᐱᕆ 11-ᖑᑎᓪᓗᒍ.

ᑲᑎᖕᖓᔩᑦ ᐊᖏᕈᑎᖃᕐᓯᒪᔪᑦ ᐊᑕᐅᓯᐅᖕᖏᑐᓂᒃ ᐅᓐᓂᑑᑎᓕᐊᖑᓯᒪᔪᓂᑦ ᓯᕗᒧᐊᕐᐸᓕᐊᕈᑎᐅᓂᐊᕐᑐᓂᒃ ᓄᐃᑕᐅᓂᑦᓴᖓᓄᑦ ᐃᓕᓐᓂᐊᕕᕐᔪᐊᖅ ᐃᓄᐃᑦ ᓄᓇᖓᓂᑦ. ᐱᔭᑦᓴᓕᐊᖑᓯᒪᔪᑦ ᐃᓚᓖᑦ ᓇᓃᒐᔭᕐᓂᖓᓂᒃᑦ ᓇᓗᓀᕐᓯᓂᕐᒥᒃ ᖃᓄᐃᑦᑐᓂᓪᓗ ᐃᓕᓐᓂᐊᕈᑎᑦᓴᖃᕐᓂᐊᓂᖓᓂᑦ, ᐊᒻᒪᓗ ᒫᓐᓇᓯᐅᑎᐅᓗᑎᒃ ᐃᓂᓪᓚᑎᕆᔨᐅᓂᐊᕐᑐᓂᒃ ᐊᓪᓚᓯᒪᔪᖕᖑᑎᑦᓯᓂᕐᒥᒃ ᐱᖁᔮᐱᑦᓴᖏᓐᓂᑦ, ᐃᖏᕐᕋᑎᑦᓯᓂᕐᒧᑦ ᒪᓕᒐᖏᓐᓂᑦ ᐊᒻᒪᓗ ᐱᖁᔭᖕᖑᑎᑕᐅᓂᑦᓴᖓᓄᑦ ᐃᓕᓐᓂᐊᕕᕐᔪᐊᒥᒃ ᐊᐅᓚᑦᓯᒍᑎᐅᓂᐊᕐᑐᓄᑦ.

ᑲᑎᖕᖓᔩᑦ ᐊᖏᕈᑎᖃᕐᓯᒪᔪᑦ ᐃᓄᐃᑦ ᑕᐱᕇᑦ ᑲᓇᑕᒥ ᐸᕐᓇᓯᒪᐅᑎᖓᓂᑦ 2024-2028-ᒧᑦ ᐃᓕᖓᔪᓂᑦ, ᑎᒥᐅᔫᑉ ᑎᓕᔭᐅᒪᐅᑎᒋᓂᐊᕐᑕᖓ ᐊᕐᕌᒍᓄᑦ ᓯᑕᒪᓄᑦ. ᐸᕐᓇᓯᒪᐅᑎᒃ ᑐᕌᕐᓂᓕᒃ ᐃᓄᐃᑦ ᑕᐱᕇᑦ ᑲᓇᑕᒥ ᓯᕗᓪᓕᐅᔨᒍᑎᒋᓂᐊᕐᑕᖏᓐᓂᑦ ᓯᑕᒪᐅᔪᖕᖏᒐᕐᑐᓂᒃ, ᐃᓚᖃᕐᓱᑎᒃ: ᓄᑭᑖᓕᐅᒥᑎᑦᓯᓂᕐᒥᒃ ᐃᓄᐃᑦ ᓇᒻᒥᓂᖅ ᐊᐅᓚᑦᓯᒍᒪᓂᖏᓐᓂᑦ; ᐱᐅᓯᐅᒥᑎᑦᓯᓂᕐᒥᒃ ᐃᓕᓐᓂᐊᓂᕐᒥᒃ ᐱᕕᑦᓴᐅᔪᓂᑦ ᐊᒻᒪᓗ ᐃᓗᓯᓕᕆᔭᐅᓂᕐᒧᑦ ᐱᒍᑦᔨᐅᑎᓂᒃ; ᐃᓄᒃᑎᑐᑦ ᐅᖃᐅᓯᖅ ᓲᖑᓯᓕᐅᒥᑎᑕᐅᓂᖓ, ᐊᓯᐅᑐᐃᓐᓇᑎᑕᐅᑦᑌᓕᓂᖓ ᖃᐅᔨᓵᕆᒍᑕᐅᓂᖓᓗ; ᐊᒻᒪᓗ ᐃᓄᐃᑦ ᓄᓇᖓᓂᑦ ᐃᓪᓗᔪᐊᖃᖕᖏᓗᐊᕐᓂᖅ ᖃᓄᕐᑑᕈᑕᐅᓂᖓ. ᐸᕐᓇᓯᒪᐅᑎ ᓇᐅᓕᒫᓄᑦ ᓯᐊᒻᒪᑎᑕᐅᓛᕐᑐᖅ ᑐᓴᕋᑦᓴᐅᓗᓂ ᐊᕐᕌᒍᒥ ᓄᑖᒥ.

ᐊᓪᓕᕇᕐᑐᓂ ᑲᑎᒪᓂᖃᕐᓱᑎᒃ, ᑲᑎᖕᖓᔩᑦ ᑐᑭᑖᓚᐅᕐᑐᑦ ᑮᓇᐅᔭᕐᑐᕈᑎᐅᒐᔭᕐᑐᑦ ᑮᓇᐅᔭᖃᕐᑎᑕᐅᒍᑎᐅᒐᔭᕐᑐᐃᓗ ᓇᐅᑦᓯᑐᕐᑕᐅᒍᑎᖏᓐᓂᑦ, ᐃᓂᓪᓚᑎᕆᒍᑎᐅᓂᐊᕐᓱᓂ ᐃᓄᒃᑐᑦ ᐅᖃᐅᓯᕐᒥᒃ ᐱᓇᓲᑎᑦᓴᓂᒃ. ᐱᓇᓱᐊᕐᑕᐅᓂᖓ ᐱᑕᖃᕐᑎᓯᓚᖓᔪᖅ ᐊᑦᔨᒌᑦᑎᓯᑦᓯᐊᓂᕐᒥᒃ  ᐊᒻᒪᓗ ᓱᓪᓕᑐᐃᓂᕐᒥᒃ ᑲᕙᒪᑐᖃᒃᑯᓂᑦ ᑮᓇᐅᔦᑦ ᐱᔭᐅᔪᑦ ᓄᓇᓕᓐᓅᔭᕐᑕᐅᖃᑦᑕᓂᐊᕐᒪᑕ ᑭᖕᖒᒪᒋᔭᖏᑦ ᒪᓕᓪᓗᒋᑦ.

2023-2024-ᒥᑦ, ᐃᓄᒃᑐᑦ ᐅᖃᐅᓯᕐᒨᓕᖓᔪᑦ ᑮᓇᐅᔦᑦ ᑲᓇᑕᒥ ᐃᓗᕐᖁᓯᓕᕆᕕᐅᑉ ᑐᕐᖃᑕᕐᕕᖓᓂᑦ ᐱᔪᑦ ᒥᑦᓴᐅᓵᕐᓱᒍ $23-ᒥᓕᐊᓐᖑᓚᐅᔪᑦ. ᐃᓄᒃᑐᑦ ᐅᖃᐅᓯᐅᑉ ᑮᓇᐅᔭᕐᑐᕋᔭᕐᓂᖓ ᑐᓴᕐᑎᓯᒍᑎᐅᓚᐅᔪᖅ ᐃᓄᐃᑦ ᑕᐱᕇᑦ ᑲᓇᑕᒥ 2024-ᒥᑦ ᑮᓇᐅᔦᑦ ᑐᕌᒐᕆᓛᕐᑕᖏᓐᓄᑦ, ᐊᒧᔭᐅᒐᓱᐊᕐᓂᐊᓂᖏᓐᓄᑦ $1-ᐱᓕᐊᓐᑖᓓᑦ ᐃᓕᖓᒐᔭᕐᑐᑦ ᐊᕐᕌᒍᓄᑦ 10-ᓄᑦ ᐃᓄᒃᑐᑦ ᐅᖃᐅᓯᐅᑉ ᐊᓯᐅᔨᔭᐅᑦᑌᓕᒐᓱᐊᕐᓂᖓᓄᑦ, ᐆᒻᒪᑎᑕᐅᒋᐊᓪᓚᕋᓱᐊᕐᓂᖓᓄᑦ, ᓱᕐᕋᑕᐅᑦᑌᓕᑎᑕᐅᒐᓱᐊᕐᓂᖓᓄᓪᓗ ᓈᒻᒪᖏᑦᑐᑯᑦ.

ᑲᑎᖕᖓᔩᑦ ᐊᖏᕈᑎᖃᓚᐅᕐᒥᔪᑦ ᐃᓄᐃᑦ ᓇᒻᒥᓂᖁᑎᓖᑦ ᖄᖏᕐᓂᑯᓕᐅᕋᓱᐊᕐᓂᒥᒃ ᐃᓄᐃᑦ ᓄᓇᖓᑕ ᓯᓚᑖᓃᑦᑐᑦ ᐊᑐᕐᑕᐅᒍᓐᓇᕆᐊᖃᕐᓂᖏᓐᓂᑦ ᑲᕙᒪᒃᑯᑦ ᑮᓇᐅᔭᖃᕐᑎᓯᑉᐸᑕ ᐱᒍᑦᔨᐅᑎᑦᓴᓂᒃ. ᑲᕙᒪᑐᖃᒃᑯᑦ ᐊᖏᕈᑎᖃᕐᓯᒪᒻᒪᑕ ᑕᓪᓕᒣᑦ ᓄᓇᖃᕐᖄᓯᒪᔪᑦ ᓇᒻᒥᓂᖁᑎᖏᑦ ᐱᒍᑦᔨᒍᓐᓇᕆᐊᖃᕐᓂᖏᓐᓂᑦ.