ᔪᓚᐃ 27, 2022 – ᐋᑐᕙ, ᐋᓐᑎᐊᕆᐅ
ᐅᓪᓗᒥ ᐊᕐᕕᓂᓕᖕᓂᒃ (6) ᐅᑭᐅᓂᒃ ᓇᓪᓕᐅᓂᖅᓯᐅᕈᑎᖃᓕᖅᐳᑦ ᓴᖅᑭᑕᐅᓚᐅᖅᓯᒪᕕᖏᓂᑦ ᑲᓇᑕᒥ ᐃᓄᐃᑦ ᐃᒻᒥᓃᖃᑦᑕᖁᔨᖖᒋᓐᓂᓕᕆᓂᕐᒧᑦ ᐸᕐᓇᐅᑏᑦ (NISPS) ᐃᓄᐃᑦ ᑕᐱᕇᒃᑯᓐᓂᑦ ᑲᓇᑕᒥ. ᑖᒃᑯᐊ NISPS-ᖁᑎᑦ ᐋᖅᑭᒃᓱᐊᖑᓯᒪᕗᑦ ᐋᖅᑭᒃᓱᐃᔾᔪᑎᐅᓂᐊᖅᓱᑎᒃ ᐃᒻᒥᓃᖃᑦᑕᖁᔨᖖᒋᓐᓂᓕᕆᓂᕐᒧᑦ ᐱᓕᕆᐊᖑᓕᖅᓯᒪᔪᓂᒃ ᑲᓇᑕᐅᑉ, ᐊᕕᒃᑐᖅᓯᒪᓂᐅᔪᑦ, ᐊᒻᒪᓗ ᓄᓇᓕᐅᔪᑦ ᖁᑦᑎᖕᓂᖏᑎᒍᑦ. ᑖᒃᑯᐊ ᐸᕐᓇᐅᑏᑦ ᐃᓕᓯᓯᒪᕗᑦ ᐊᒻᒪᓗ ᐱᑕᖃᖅᑎᑦᓯᓪᓗᑎᒃ ᐃᑲᔪᖅᑐᐃᔾᔪᑎᓂᒃ ᒫᓐᓇᐅᔪᒥ ᓄᓇᓕᐅᔪᓂᑦ ᐊᒻᒪᓗ ᐊᕕᒃᑐᖅᓯᒪᓂᐅᔪᓂᑦ ᐱᓕᕆᐊᖑᓕᖅᓯᒪᔪᓄᑦ ᐃᒻᒥᓃᖃᑦᑕᖁᔨᖖᒋᓐᓂᕐᒧᑦ.
“ᐃᒻᒥᓃᖃᑦᑕᖅᑐᑦ ᐊᒃᑐᐃᓯᒪᕙᖕᒪᑕ ᐃᓄᓕᒫᓂᒃ ᐃᓄᐃᑦ ᓄᓇᓗᒃᑖᖓᓐᓂ. ᐋᖅᑭᒋᐊᒍᑎᒃᓴᐅᓇᔭᖅᑐᑦ ᐊᒥᓱᐃᓕᖓᒐᓗᐊᖅᓱᑎᒃ ᐱᔭᐅᓯᒪᓕᕈᖕᓇᖅᐳᑦ. ᐃᓅᖃᑎᑦᑎᓐᓄᑦ ᐱᑕᖃᖅᑎᑦᓯᔭᕆᐊᖃᓪᓚᕆᒃᑲᑦᑕ ᐊᒃᓱᕈᓕᖅᓯᒪᓂᖃᖅᑐᓂᒃ—ᐱᓗᐊᖅᑐᒥᒃ ᒪᒃᑯᒃᑐᖁᑎᑦᑎᓐᓄᑦ—ᐃᑲᔪᖅᓱᐃᔾᔪᑎᒃᓴᓂᒃ ᐱᓯᒪᓕᕆᐊᖃᖅᑕᖏᓂᒃ ᓴᖖᒋᓂᖃᕈᑎᒋᔪᓐᓇᖅᑕᖏᓂᒃ ᐊᒻᒪᓗ ᒪᑭᒋᐊᒃᑲᓐᓂᕈᑎᒋᔪᓐᓇᕐᓂᐊᖅᑕᖏᓂᒃ ᐃᓅᓯᓕᒫᒥᖕᓂ. ᐃᒻᒥᓃᖃᑦᑕᖁᔨᖖᒋᓐᓂᓕᕆᓂᕐᒧᑦ ᐱᓕᕆᐊᖑᔪᑦ ᓱᓕ ᖁᑦᓯᖕᓂᖅᐸᐅᑎᑕᐅᕗᑦ ᓯᕗᓪᓕᖅᐸᐅᑎᑕᐅᔭᕆᐊᖃᖅᑐᓂᑦ ᐃᓄᐃᑦ ᑕᐱᕇᒃᑯᓐᓂᑦ ᑲᓇᑕᒥ, ᐊᒻᒪᓗ NISPS-ᖁᑎᐅᔪᑦ ᓱᓕ ᐱᑕᖃᖅᑎᑦᓯᕙᒃᐳᑦ ᓇᓗᓇᐃᖅᑕᐅᓯᒪᔪᓄᑦ ᑐᖖᒐᕝᕕᖃᖅᑎᑕᐅᓪᓗᑎᒃ ᐱᓕᕆᐊᖃᕈᓯᐅᓇᔭᖅᑐᓂᒃ ᑐᑭᒧᐊᒍᑎᒃᓴᐅᓂᐊᖅᑐᓂᒃ ᐊᒻᒪᓗ ᑐᓴᐅᒪᑎᑦᓯᕙᒃᓱᑎᒃ ᑕᒪᐃᓐᓂᒃ ᐱᓕᕆᐊᖑᓕᖅᓯᒪᔪᓄᑦ,” ᐅᖃᖅᓱᓂ ITK-ᑯᑦ ᐊᖏᔪᖅᑳᖓᑦ ᓇᐃᑖᓐ ᐆᐱᑦ.
ᐊᑐᕐᓂᖃᑦᓯᐊᖅᑑᓂᖏᑕ NISPS-ᖁᑎᑦ ᓇᓗᓇᐃᔭᖅᑕᐅᓯᒪᕗᑦ ᐱᒻᒪᕆᐅᑎᐅᔪᑎᒍᑦ ᐊᑕᕝᕕᒋᑐᕋᐅᑦᑑᓂᖏᓐᓄᑦ ᐊᑦᑕᓇᖅᑐᒦᓕᖅᓯᒪᓂᕐᓄᑦ ᐊᒻᒪᓗ ᒥᐊᓂᖅᓯᓯᒪᔾᔪᑎᐅᔪᓄᑦ ᑖᔅᓱᒧᖓ ᐃᓚᒋᔭᐅᖃᑕᐅᔪᓂᑦ. ᐸᕐᓇᐅᑏᑦ ᐊᑐᓕᖅᑎᑕᐅᓂᖏᑦ ᑐᑭᒧᐊᒍᑎᒃᓴᖃᖅᑎᑕᐅᕗᑦ ᑲᓇᑕᒥ ᐃᓄᐃᑦ ᐃᒻᒥᓃᖃᑦᑕᖁᔨᖖᒋᓐᓂᓕᕆᓂᕐᒧᑦ ᐱᓕᕆᐊᖃᖅᑎᖏᑕ ᑎᒥᖁᑎᖓᓐᓂᑦ. ᐊᑐᖅᑕᐅᑐᐃᓐᓇᖅᐸᖖᒋᒻᒪᑕ ᑭᓯᐊᓂ ᐋᖅᑭᒃᓱᐃᓂᐊᕐᓗᑎᒃ ᐊᕕᒃᑐᖅᓯᒪᓂᕐᒥ ᐃᒻᒥᓃᖃᑦᑕᖁᔨᖖᒋᓐᓂᓕᕆᓂᕐᒧᑦ ᐸᕐᓇᐅᑎᓂᒃ ᐊᒻᒪᓗ ᐱᓕᕆᐊᓂᒃ, ᑮᓇᐅᔭᓂᒃ ᐱᓯᒪᓕᕋᓱᐊᕈᑎᒃᓴᓂᒃ ᐃᒡᓗᓕᕆᓂᕐᒥ ᐱᓕᕆᐊᖃᕈᑎᒃᓴᓂᒃ, ᑐᓴᖅᑎᑦᓯᓂᐊᕐᓗᑎᒃ ᒪᓕᒐᖁᑎᓕᕆᓂᕐᒧᑦ ᐊᒻᒪᓗ ᒪᓕᒐᕐᔪᐊᖁᑎᓕᕆᓂᕐᒧᑦ ᐱᓕᕆᐊᓄᑦ, ᐃᑲᔪᕈᑎᐅᓯᒪᕙᒻᒥᔪᑦ ᐊᕕᒃᑐᖅᓯᒪᓂᐅᔪᓄᑦ ᑐᕌᖓᓪᓗᑎᒃ ᐱᓕᕆᐊᖑᔪᓄᑦ ᑐᕌᖓᓗᐊᖅᑐᓄᑦ ᓴᖖᒋᒃᑎᑦᓯᒋᐊᕐᓂᕐᒥᒃ ᐃᓚᒌᖑᔪᓂᒃ, ᐱᕈᖅᑎᑦᓯᕙᓪᓕᐊᓂᕐᒧᑦ ᐃᓅᖃᑎᒌᒃᑐᓄᑦ ᓇᓕᖅᑲᐅᑎᑦᑎᓂᕐᒧᑦ, ᐊᒻᒪᓗ ᐱᐅᓯᑐᖃᓕᕆᓂᕐᒥ ᐃᑲᔪᖅᑐᐃᓂᕐᓄᑦ ᓇᓕᖅᑲᐅᑎᑦᑎᓂᕐᒧᑦ. ᑕᒪᒃᑯᐊ ᐃᓚᒋᔭᐅᖃᑕᐅᖕᒥᔪᑦ ᐊᑐᕐᓂᖃᑐᐃᓐᓇᖅᓯᒪᖖᒋᓚᑦ ᐱᕈᖅᑎᑦᑎᕙᓪᓕᐊᓂᕐᒥᒃ ᒪᑭᒋᐊᒃᑲᓐᓂᕈᓐᓇᖅᑑᓂᖏᑕ ᐃᓅᖃᑎᒌᒃᑐᑦ, ᑭᓯᐊᓂᓕᑦᑕᐅᖅ ᖁᕝᕙᓪᑎᑦᓯᒋᐊᖅᐸᓐᓂᕐᒧᑦ ᒪᒥᓴᐃᓂᖃᕈᓐᓇᕐᓂᕐᒥᒃ ᐊᓂᒍᐃᓯᒪᓕᕈᑎᒋᓂᐊᕐᓗᒋᑦ ᐅᑭᐅᓄᑦ ᐊᒥᓱᓄᑦ ᑭᖑᕚᕇᒃᐸᓪᓕᐊᓯᒪᔪᑦ ᐊᒃᓱᕈᕐᓇᖅᑐᒃᑰᖅᓯᒪᓂᖏᓐᓄᑦ ᐊᒻᒪᓗ ᐃᓚᐃᓐᓈᖅᑎᑕᐅᖃᑦᑕᖅᓯᒪᓂᖏᓐᓄᑦ.
ᓇᓗᓇᐃᖅᓯᒪᓕᕐᓂᐊᕐᓗᒍ ᓇᓪᓕᐅᓂᓯᐅᕐᓂᖓᓐᓄᑦ, ᐃᓄᐃᑦ ᑕᐱᕇᑦ ᑲᓇᑕᒥ ᓴᖅᑮᓯᒪᓕᖅᐳᑦ ᐊᒥᓱᐃᓕᖓᓪᓗᑎᒃ ᓴᓇᕐᕈᑎᒃᓴᐅᓂᐊᖅᑐᓂᒃ ᑕᐃᔭᐅᓪᓗᑎᒃ ᐱᒋᐊᕐᕕᖃᕐᓂᖅ ᓇᐅᑦᓯᖅᑐᐃᓂᕐᓂᒃ, ᖃᐅᔨᒋᐊᖅᓯᒪᓂᕐᓂᒃ ᐊᒻᒪᓗ ᐃᓕᑦᓯᕙᓪᓕᐊᓂᖅ (MEL). ᑖᒃᑯᐊ ᓴᓇᕐᕈᑎᒃᓴᓕᐊᖑᓯᒪᔪᑦ ᐱᔭᐅᓯᒪᓕᕈᓐᓇᖅᐳᑦ ᑲᓇᑕᒥ ᐃᓄᐃᑦ ᐃᒻᒥᓃᖃᑦᑕᖁᔨᖖᒋᓐᓂᓕᕆᓂᕐᒧᑦ ᐸᕐᓇᐅᑎᑎᒍᑦ (NISPS) ᓯᕗᓪᓕᖅᐸᐅᑎᑕᐅᖁᔭᐅᓯᒪᔪᓄᑦ 6-ᖓ ᐱᓕᕆᐊᖃᓕᖅᑎᑦᓯᓂᖅ ᐃᓄᐃᑦ ᖃᐅᔨᒪᔭᑐᖃᖏᓐᓂᑦ ᒪᑭᒋᐊᒃᑲᓐᓂᕈᓐᓇᕐᓂᕐᓄᑦ ᐊᒻᒪᓗ ᐃᒻᒥᓃᖃᑦᑕᖁᔨᖖᒋᓐᓂᓕᕆᓂᕐᒧᑦ, ᐊᒻᒪᓗ ᑐᕌᖓᑎᑕᐅᓯᒪᓪᓗᑎᒃ ᐃᑲᔪᕈᑎᐅᓂᐊᕐᓂᖏᑕ ᐃᓄᐃᑦ ᓇᖕᒥᓂᖅ ᐃᓱᒪᓕᐅᕈᑎᓕᐅᕈᓐᓇᕐᓂᖏᓐᓄᑦ.
ᐃᓄᐃᑦ ᓇᖕᒥᓂᖅ ᐃᓱᒪᓕᐅᕈᑎᓕᐅᕈᓐᓇᓕᖅᐸᓪᓕᐊᑎᓪᓗᒋᑦ ᐱᓕᕆᐊᖑᔪᑦ ᑕᐅᑦᑐᕆᓂᐊᖅᑕᖏᓐᓄᑦ ᐊᒻᒪᓗ ᓴᖅᑭᑕᐅᓯᒪᓕᕐᓂᐊᕐᓂᖏᓐᓄᑦ, ᐱᒻᒪᕆᐅᖃᑕᐅᒻᒪᑕ ᐃᓱᒪᓕᐅᕈᑎᖃᕈᓐᓇᕐᓂᖅ ᖃᓄᖅ ᑕᒪᒃᑯᐊ ᐱᓕᕆᐊᖑᔪᑦ ᓇᐅᑦᓯᖅᑐᒐᐅᕙᓐᓂᐊᕐᓂᖏᑕ ᐊᒻᒪᓗ ᖃᐅᔨᒋᐊᖅᑕᐅᓯᒪᓕᖅᐸᓐᓂᐊᕐᓂᖏᑕ. ᑖᒃᑯᐊ ᓴᓇᕐᕈᑎᒃᓴᓕᐊᖑᓯᒪᔪᑦ ᑐᕌᖓᑎᑕᐅᓯᒪᕗᑦ ᐊᑐᖅᑕᐅᕙᓐᓂᐊᖅᓱᑎᒃ ᖁᑦᑎᖕᓂᖅᓴᓄᑦ ᐱᔾᔪᑎᖃᖅᑐᓄᑦ ᐃᖏᕐᕋᓂᖃᑦᓯᐊᖅᑎᑕᐅᓗᑎᒃ ᐱᓕᕆᐊᖑᓕᕈᓐᓇᖅᑐᑦ ᖃᐅᔨᒋᐊᖅᑕᐅᖃᑦᑕᕈᓐᓇᕐᓂᐊᕐᒪᑕ ᐊᒻᒪᓗ ᐃᑲᔪᕈᑎᐅᓯᒪᓕᕐᓗᑎᒃ ᖃᐅᔨᒪᓂᕆᔭᐅᔪᓄᑦ ᐊᒻᒪᓗ ᐱᐅᓂᖅᐹᑎᒍᑦ ᐱᓕᕆᔾᔪᓯᐅᕙᓐᓂᐊᖅᑐᓄᑦ ᐃᒻᒥᓃᖃᑦᑕᖁᔨᖖᒋᓐᓂᓕᕆᓂᕐᓄᑦ. ᐊᒥᓱᖖᒍᖅᐸᓪᓕᐊᑎᓪᓗᒋᑦ ᐃᓄᐃᑦ ᓇᐅᑦᓯᖅᑐᐃᔨᐅᕙᓐᓂᖏᓂ ᐊᒻᒪᓗ ᖃᐅᔨᒋᐊᖅᑎᐅᓪᓗᑎᒃ ᐱᓕᕆᓂᐅᔪᓄᑦ, ᑕᒪᒃᑯᐊ ᓇᐅᑦᓯᖅᑐᐃᓂᐅᕙᒃᑐᑦ ᐊᒻᒪᓗ ᖃᐅᔨᒋᐊᕐᓂᐅᕙᒃᑐᑦ ᐃᑲᔫᑕᐅᓯᒪᓕᕐᓂᐊᕐᒪᑕ ᐱᓯᒪᓕᕈᒪᔭᑦᑎᓐᓄᑦ ᐃᓄᐃᑦ ᓄᓇᓗᒃᑖᖓᓐᓂ.
ᑐᓴᒐᒃᓴᓕᕆᔾᔪᑎᓄᑦ ᐊᐱᖅᑯᓯᒃᓴᖃᖅᑐᓄᑦ:
ᐅᖄᓚᐅᑎᖓᑦ: 1 (613) 238-8181 ext. 276
ᖃᕆᑕᐅᔭᑎᒍᑦ: [email protected]
ᖃᓄᐃᓪᓚᑦᑖᕐᓂᐅᔪᓄᑦ:
- ᑲᓇᑕᒥ ᐃᓄᐃᑦ ᐃᒻᒥᓃᖃᑦᑕᖁᔨᖖᒋᓐᓂᓕᕆᓂᕐᒧᑦ ᐸᕐᓇᐅᑏᑦ (NISPS) ᐅᖃᖅᓯᒪᕗᑦ ᐋᖅᑭᒃᓱᐊᕆᔭᐅᓯᒪᔪᓂᒃ ᐱᓕᕆᓂᐅᓇᔭᖅᑐᓂᒃ ᐊᒻᒪᓗ ᓴᐳᔾᔨᒋᐊᕐᓂᐅᓇᔭᖅᑐᓂᒃ ᐱᓕᕆᐊᖑᓯᒪᓕᖁᓪᓗᒋᑦ ᖁᑦᑎᓗᐊᒻᒪᕆᖕᓂᖏᑕ ᐃᒻᒥᓃᖃᑦᑕᖅᑐᓄᑦ ᐃᓄᖕᓂ. ᐸᕐᓇᐅᑏᑦ ᖁᕝᕙᖅᑎᑦᑎᒋᐊᖅᓯᒪᕗᑦ ᐊᒥᖅᑲᕈᑎᒋᔭᐅᓪᓗᑎᒃ ᑐᑭᓯᐅᒪᓂᐅᔪᓂᒃ ᐃᓗᓕᕆᔭᖏᓐᓂ, ᐊᒻᒪᓗ ᑕᑯᒃᓴᐅᓇᑎᒃ ᐊᑦᑕᓇᖅᑐᒦᓕᖅᐸᒃᑐᓄᑦ ᐊᒻᒪᓗ ᒥᐊᓂᖅᓯᔾᔪᑎᐅᓯᒪᓕᕈᓐᓇᖅᑐᓄᑦ ᐃᓚᒋᔭᐅᖃᑕᐅᔪᓂᒃ, ᐃᒻᒥᓃᖃᑦᑕᕐᓂᓕᕆᓂᕐᓂ ᐃᓄᐃᑦ ᓄᓇᓕᖏᓐᓂ, ᐊᒻᒪᓗ ᑐᑭᒧᐊᒍᑎᐅᕙᒃᑐᓂᒃ ᒪᓕᒐᖁᑎᓄᑦ ᐊᕕᒃᑐᖅᓯᒪᓂᐅᔪᑦ ᐊᒻᒪᓗ ᑲᓇᑕᒥ ᖁᑦᑎᖕᓂᕆᔭᖏᓐᓂ ᓇᓗᓇᐃᖅᑕᐅᓯᒪᔪᓄᑦ ᑐᖖᒐᕝᕕᖃᖅᑎᑕᐅᓪᓗᑎᒃ ᐱᓕᕆᔾᔪᓯᐅᕙᓐᓂᐊᖅᑐᓄᑦ ᐃᒻᒥᓃᖃᑦᑕᖁᔨᖖᒋᓐᓂᓕᕆᓂᕐᒥ.
- ᓯᑕᒪᐅᓪᓗᑎᒃ ᐃᓄᐃᑦ ᐊᕕᒃᑐᖅᓯᒪᓂᕆᔭᖏᑦ ᑲᓇᑕᒥ (ᐃᓄᕕᐊᓗᐃᑦ ᐊᕕᒃᑐᖅᓯᒪᓂᖓᑦ ᓄᓇᑦᓯᐊᕐᒥ, ᓄᓇᕗᑦ, ᓄᓇᕕᒃ ᑯᐃᐸᒃ ᑕᖅᕋᖓᓂ, ᐊᒻᒪᓗ ᓄᓇᑦᓯᐊᕗᑦ ᓛᐸᑐᐊᕆᐅᑉ ᐅᑭᐅᖅᑕᖅᑐᖑᓂ), ᑕᒪᕐᒥᐅᓪᓗᑎᒃ ᖃᐅᔨᒪᔭᐅᔪᑦ ᐃᓄᐃᑦ ᓄᓇᒋᖕᒪᒋᑦ, ᐃᖕᒥᓃᖃᑦᑕᕐᑐᐃᓄᑦ ᖁᑦᑎᖕᓂᖃᕐᒪᑕ 5-ᖏᖅᑕᕈᓐᓇᓂᖏᓐᓂᑦ 25-ᖏᖅᑕᕈᖕᓇᕐᓂᖏᓐᓄᑦ ᖁᑦᑎᖕᓂᖅᓴᐅᓪᓗᑎᒃ ᐃᖕᒥᓃᑲᑦᑕᕐᓂᐅᔪᑦ ᖁᑦᑎᖕᓂᕆᔭᖏᓐᓂᑦ ᑲᓇᑕᒥᐅᓕᒫᓂᑦ.
- 2016-ᒥ, ᑲᓇᑕᒥ ᒐᕙᒪᖓᑦ ᑮᓇᐅᔭᓂᒃ $9-ᒥᓕᐊᓐᑖᓚᓂᒃ ᕿᑐᕐᖏᐅᖅᑎᑦᑎᓕᓚᐅᖅᓯᒪᕗᑦ ᑲᓇᑕᒥ ᐃᓄᐃᑦ ᐃᒻᒥᓃᖃᑦᑕᖁᔨᖖᒋᓐᓂᓕᕆᓂᕐᒧᑦ ᐸᕐᓇᐅᑎᓄᑦ (NISPS) ᐊᑐᖅᑕᐅᓂᐊᖅᓱᑎᒃ ᐅᑭᐅᑦ ᐱᖓᓱᑦ (3) ᐊᑐᖅᐸᓪᓕᐊᓂᖏᓐᓂ. 2019-ᒥ ᒐᕙᒪᑐᖃᒃᑯᑦ ᑮᓇᐅᔭᖁᑎᒃᓴᓂᒃ ᐊᐅᓚᑦᓯᔾᔪᑎᒃᓴᓂᒃ ᑐᓂᓯᓯᒪᓕᓚᐅᖅᓯᒪᓪᓗᑎᒃ $50-ᒥᓕᐊᓐᑖᓚᓂᒃ ᑮᓇᐅᔭᓂᒃ ᕿᑐᕐᖏᐅᖅᑎᑕᒥᓐᓂᒃ ᐊᑐᖅᑕᐅᔪᒃᓴᐅᓂᐊᖅᓱᑎᒃ ᐅᑭᐅᑦ ᖁᓕᑦ (10) ᐊᑐᖅᐸᓪᓕᐊᑎᓪᓗᒋᑦ, ᐃᓚᒃᑲᓐᓂᖅᓱᒋᑦ $5-ᒥᓕᐊᓐᑖᓚᒃᑲᓐᓂᕐᓂᒃ ᐅᑭᐅᖅ ᑕᒫᒧᑦ ᑲᔪᓯᑎᑕᐅᓯᒪᓪᓗᑎᒃ ᐃᑲᔪᕈᑎᒃᓴᓄᑦ ᐊᑐᓕᖅᑎᑕᐅᕙᓪᓕᐊᔾᔪᑎᐅᓂᐊᖅᑐᓄᑦ NISPS-ᖁᑎᓂᒃ. ᑎᓯᐱᕆ 2019-ᒥ ᐃᓄᐃᑦ ᑕᐱᕇᑦ ᑲᓇᑕᒥ ᑲᑎᒪᔨᖏᑦ ᑲᔪᓯᑎᑦᑎᓚᐅᖅᓯᒪᕗᑦ ᐱᖁᔨᕗᖔᕈᑎᓂᒃ ᓴᓂᕐᕙᐃᓯᒪᓕᖁᔨᓪᓗᑎᒃ ᑮᓇᐅᔭᖁᑎᒃᓴᓂᒃ ᐃᓄᐃᑦ ᑕᐱᕇᒃᑯᓐᓄᑦ ᑲᓇᑕᒥ ᐊᒻᒪᓗ ᓯᑕᒪᐅᓪᓗᑎᒃ ᐃᓄᐃᑦ ᓄᓇᓕᕆᓂᕐᒥ ᑲᑐᔾᔨᖃᑎᒌᖏᓐᓄᑦ ᐊᑐᓕᖅᑎᑦᓯᔾᔪᑎᒃᓴᐅᓂᐊᖅᑐᓂᒃ NISPS-ᖁᑎᓄᑦ.