ᒫᔾᔨ 21, 2023 – ᐋᑐᕙ. ᐋᓐᑎᐊᕆᐅ
ᑲᓇᑕᒥᐅᑦ ᐃᓄᐃᑦ ᖁᑦᑎᖕᓂᖅᐸᐅᓪᓗᑎᒃ ᑎᑎᕋᖅᑕᐅᓯᒪᔪᖃᕐᒪᑕ ᓂᕿᒋᔭᒃᓴᒥᓐᓂᒃ ᐱᓯᒪᓕᕈᓐᓇᖅᐸᖖᒋᓐᓄᖏᓐᓄᑦ ᐊᓯᖏᓐᓂ ᓄᓇᖃᖅᑳᖅᓯᒪᔫᖃᑕᐅᔪᓂ ᓴᓇᕝᕕᖃᖅᑑᓪᓗᑎᒃ ᓄᓇᕐᔪᐊᖃᖅᑐᓂᑦ. ᑕᐃᒪᓐᓇᐃᒃᑲᓗᐊᖅᑎᓪᓗᒍᓗ ᐋᖅᑭᒃᓱᐊᖑᓯᒪᔪᑎᒍᑦ, ᑲᓇᑕᒥ ᐱᓕᕆᓂᖃᕐᕕᐅᓕᖖᒋᓚᑦ ᐃᓄᐃᑦ ᓂᕿᒋᔭᒃᓴᒥᓐᓂᒃ ᐱᓯᒪᓕᕈᓐᓇᖅᐸᖖᒋᓐᓂᖏᓐᓄᑦ ᑐᕌᖓᔪᓂᒃ.
ᐅᓂᒃᑳᓕᐊᖑᓯᒪᔪᑦ ᐋᖅᑭᒃᓱᐃᖃᑎᒌᒃᖢᑎᒃ ᐃᓄᐃᑦ ᑕᐱᕇᑦ ᑲᓇᑕᒥ, ᐃᓄᐃᑦ ᐱᓕᕆᐊᖃᖃᑎᒌᑦ ᐊᒻᒪᓗ ᒐᕙᒪᑐᖃᒃᑯᑦ ᖃᐅᔨᔭᐅᓯᒪᓕᓚᐅᕐᒪᑕ ᖃᓄᐃᖖᒋᑦᓯᐊᖅᑎᑕᐅᓂᐊᕈᑎᒃ ᐃᓕᓐᓂᐊᖅᑐᐃᑦ ᐃᓄᐃᑦ ᓄᓇᖓᓐᓂᕐᒥᐅᑦ ᐃᑲᔪᖅᑕᐅᓯᒪᓕᕈᓐᓇᕐᓂᖏᑕ ᐃᓕᓴᕖᑦ ᓂᕆᑎᑦᑎᖃᑦᑕᕐᓂᖏᓂᑦ ᐱᓕᕆᐊᒃᑯᑦ.
ᑐᑭᓯᓂᖅ ᐊᑭᖏᖕᓂᑦ ᐃᓄᐃᑦ ᓄᓇᖓᓐᓂᒃ ᐃᓕᓴᕖᑦ ᓂᕆᑎᑦᑎᖃᑦᑕᕐᓂᖏᖕᓄᑦ ᐱᓕᕆᐊᖑᔪᖅ ᐱᓕᕆᓂᖃᕐᕕᐅᓕᖅᓯᒪᕗᖅ ᓴᖅᑭᑎᑦᑎᓯᒪᓕᕆᐊᕐᓂᕐᒥ ᐊᑭᑐᓗᐊᖖᒋᑦᑐᓂᒃ, ᐊᑐᖅᑕᐅᔪᓐᓇᑦᓯᐊᖅᑐᒥᒃ, ᐊᒻᒪᓗ ᐃᓄᖕᓄᑦ ᑐᕌᖓᑎᑕᐅᓪᓗᓂ ᓂᕆᑎᑦᑎᖃᑦᑕᕐᓂᖅ ᐊᑐᓕᖅᑎᑕᐅᖁᓪᓗᒍ 75-ᖑᔪᓂ ᐃᓕᓐᓂᐊᕐᕕᖕᓂ ᐃᓄᐃᑦ ᓄᓇᖓᓐᓂ, ᐃᓄᐃᑦ ᓄᓇᒋᔭᑐᖃᖓᓐᓂ 51-ᖑᓪᓗᑎᒃ ᓄᓇᓕᖃᖅᑐᒥ ᐃᓄᕕᐊᓗᐃᑦ ᐊᕕᒃᑐᖅᓯᒪᓂᖓᓂ (ᓄᓇᑦᓯᐊᖅ), ᓄᓇᕗᑦᒥ, ᓄᓇᕕᒃᒥ (ᑯᐃᐸᒃ ᑕᖅᕋᖓᓂ), ᐊᒻᒪᓗ ᓄᓇᑦᓯᐊᕗᑦᒥ (ᓛᐸᑐᐊᕆᐅᑉ ᐅᐊᖕᓇᖓᓂ).
ᐃᓄᐃᑦ ᑕᐱᕇᑦ ᑲᓇᑕᒥ ᕿᓂᓕᖅᓯᒪᕗᑦ ᑮᓇᐅᔭᖁᑎᒃᓴᒥᓐᓂᒃ $1.66-ᐱᓕᐊᓐᑖᓚᓂᒃ ᐊᑐᓕᖅᑎᑦᑎᔾᔪᑎᒃᓴᓂᒃ ᐊᒻᒪᓗ ᑲᔪᓰᓐᓇᖅᑎᑦᑎᔾᔪᑎᒃᓴᓂᒃ ᐃᓕᓴᕐᕕᖕᓂ ᓂᕆᑎᑦᑎᖃᑦᑕᕐᓂᖏᓐᓄᑦ ᐱᓕᕆᐊᖑᔪᒥᒃ ᐃᓄᐃᑦ ᓄᓇᓕᒫᖓᓐᓂ ᐅᑭᐅᑦ 15 ᐊᑐᖅᐸᓪᓕᐊᓂᐊᖅᑎᓪᓗᒋᑦ. ᐊᑐᓕᖅᑎᑕᐅᓂᖏᑦ ᐱᓕᕆᐊᖑᔪᑉ ᐱᓯᒪᔭᕆᐊᖃᕋᔭᖅᑐᑦ ᐱᓯᒪᓕᕐᓂᕐᒥᓐᓂᒃ, ᐊᑯᓃᖅᑐᒧᑦ ᑮᓇᐅᔭᑎᒍᑦ ᕿᑐᕐᖏᐅᖅᑎᑦᑎᔾᔪᑎᖃᕐᓂᕐᒥᒃ ᐃᖅᑲᓇᐃᔭᖅᑎᖃᕐᓂᒃᑯᑦ ᐊᒻᒪᓗ ᐱᓕᕆᓂᖃᕐᕕᐅᓇᔭᖅᑐᓂᒃ.
ᖃᐅᔨᓴᐃᓂᐅᓚᐅᖅᑐᑦ ᓇᓗᓇᐃᖅᓯᓯᒪᕗᑦ ᐊᒥᓱᐃᓕᖓᓪᓗᑎᒃ, ᐃᓕᐅᖅᑲᒐᐅᓯᒪᓪᓗᑎᒃ ᐃᓕᓴᕐᕕᖕᓂ ᓂᕆᑎᑦᑎᖃᑦᑕᕐᓂᖏᓐᓄᑦ ᐱᓕᕆᐊᖑᔪᑦ ᐱᐅᓯᒋᐊᖅᑎᑦᑎᓯᒪᓂᖏᑕ ᐃᓕᓐᓂᐊᕈᑎᒋᔭᒥᓐᓂᒃ ᐃᓕᑦᑎᕙᓪᓕᐊᔪᓐᓇᕐᓂᖏᑕ ᐃᓕᓐᓂᐊᖅᑐᓂ ᓄᑕᖅᑲᓂ.
“ᓂᕿᒋᔭᒃᓴᓂᒃ ᐱᓯᒪᓕᕈᓐᓇᕐᓂᖅ ᐊᖏᔪᒥᒃ ᐊᒃᑐᐃᓯᒪᓂᖃᕐᒪᑕ ᐃᓅᓯᖃᕈᓐᓇᕐᓂᑦᑎᓐᓂᒃ ᖃᓄᐃᖖᒋᑦᑎᐊᖅᑑᓗᑕ, ᐋᓐᓂᐊᕐᓂᖃᖖᒋᓪᓗᑕ, ᐊᒻᒪᓗ ᐊᒃᖢᐃᑦᑑᓗᑕ,” ᐅᖃᖅᓱᓂ ᓇᐃᑖᓐ ᐆᐱᑦ, ᐊᖏᔪᖅᑳᖅ ᐃᓄᐃᑦ ᑕᐱᕇᑦ ᑲᓇᑕᒥ. “ᐃᓄᐃᑦ ᓄᑕᕋᖏᑕ ᐊᒥᒐᖖᒋᑦᑐᓂᒃ ᓂᕆᔭᒃᓴᖃᖅᑎᑕᐅᕙᓕᕐᓂᖏᑦ ᐱᐅᓯᒋᐊᖅᑎᑦᑎᔾᔪᑕᐅᓯᒪᓕᕐᓂᐊᖅᑐᑦ ᐃᓕᓐᓂᐊᕈᑎᒥᓐᓂᒃ ᐃᓕᑦᓯᕙᓪᓕᐊᑦᓯᐊᕈᓐᓇᕐᓂᖏᓐᓂᒃ, ᐃᓱᒪᒃᑯᑦ ᖃᓄᐃᖖᒋᑦᓯᐊᖅᑑᔪᓐᓇᕐᓂᖏᓐᓂᒃ, ᐊᑦᑕᑕᖅᓯᒪᑦᑎᐊᕈᓐᓇᕐᓂᖏᓐᓄᑦ ᐃᓄᐃᑦ ᐱᐅᓯᑐᖃᖏᓐᓄᑦ ᐊᒻᒪᓗ ᑕᒪᐃᑎᒍᑦ ᒥᐊᓂᕆᔭᐅᓯᒪᓂᖏᓐᓄᑦ.”
ᐃᓱᒪᓕᐅᕈᑎᐅᓯᒪᔪᖅ ᐱᓕᕆᐊᖑᓕᕈᒪᓪᓗᓂ ᐱᑕᖃᓕᖅᑎᑦᑎᓇᔭᕐᒪᑦ ᐅᓪᓛᕈᒥᑕᒃᓴᖃᖅᑎᑦᑎᕙᓐᓂᕐᒥᒃ ᐊᒻᒪᓗ ᐅᓪᓗᕈᒥᑕᒃᓴᖃᖅᑎᑦᑎᕙᓐᓂᕐᒥᒃ ᐃᓕᓐᓂᐊᖅᑐᓄᑦ, ᑐᕌᕐᕕᒃᓴᖃᖅᑎᑕᐅᓯᒪᓪᓗᑎᒃ ᓂᕿᑦᑎᐊᕙᓐᓂᒃ ᐊᒻᒪᓗ ᓄᓇᓕᐅᔪᒥ ᓂᕿᒋᔭᐅᕙᒃᑐᑦ ᐱᑕᖃᖅᐸᓐᓂᖏᓐᓄᑦ. ᐋᖅᑭᒋᐊᖅᑕᐅᓯᒪᓕᕈᓐᓇᕐᓂᐊᖅᑐᑦ ᐊᕕᒃᑐᖅᓯᒪᓂᐅᔪᒥ ᐊᒻᒪᓗ ᓄᓇᓕᐅᔪᒥ ᐱᓯᒪᓕᖅᑕᐅᔭᕆᐊᖃᖅᑐᓄᑦ ᑐᕌᖓᑎᑕᐅᓯᒪᓕᕐᓗᑎᒃ, ᐊᒻᒪᓗ ᑐᖖᒐᕝᕕᖃᖅᑎᑕᐅᓯᒪᓗᑎᒃ ᐃᓄᐃᑦ ᐱᐅᓯᑐᖃᕆᔭᖓᓐᓄᑦ.
ᑖᒃᑯᐊ ᐅᓂᒃᑳᓕᐊᖑᓯᒪᔪᑦ ᐋᖅᑭᒃᓱᐊᖑᓚᐅᖅᑐᑦ ᐃᓄᐃᑦ-ᒐᕙᒪᑐᖃᒃᑯᑦ ᓂᕿᒋᔭᒃᓴᓂᒃ ᐱᓯᒪᓕᕈᓐᓇᕐᓂᕐᒧᑦ ᐱᓕᕆᐊᖃᖅᑎᐅᔪᑎᒍᑦ, ᐱᓕᕆᐊᖃᖅᑎᒋᔭᐅᔪᓂᑦ ᐃᓄᐃᑦ ᓯᕗᓕᖅᑎᖏᓐᓂᑦ, ᐃᓄᐃᑦ ᑕᐱᕇᑦ ᑲᓇᑕᒥ ᐱᔾᔪᑎᖃᖅᑎᖏᓐᓂᑦ ᐊᒻᒪᓗ ᒐᕙᒪᑐᖃᒃᑯᑦ ᐃᖅᑲᓇᐃᔭᕐᕕᖏᓐᓂᑦ. ᑖᒃᑯᐊ ᐱᕈᖅᑎᑕᐅᓯᒪᕗᑦ ᐊᑐᓕᖁᔭᐅᓯᒪᓕᓚᐅᖅᑐᓂᑦ ᐃᓄᐃᑦ ᑕᐱᕇᑦ ᑲᓇᑕᒥ 2021-ᒥ ᐃᓄᐃᑦ ᓄᓇᖓᓐᓂ ᓂᕿᒋᔭᒃᓴᓂᒃ ᐱᓯᒪᓕᕈᓐᓇᕐᓂᕐᒧᑦ ᐸᕐᓇᐅᑎᖓᓐᓂᑦ, ᓯᕗᒻᒧᒋᐊᖅᑎᑦᑎᔾᔪᑎᐅᔪᓂᑦ ᐃᓄᖕᓂᑦ ᐃᖏᕐᕋᓕᖅᑎᑕᐅᓯᒪᓪᓗᑎᒃ ᐋᖅᑭᒋᐊᕈᑎᒃᓴᓂᒃ ᐱᐅᓯᒋᐊᖅᑎᑦᑎᓂᕐᒥ ᓂᕿᒋᔭᒃᓴᓂᒃ ᐱᓯᒪᓕᕈᓐᓇᕐᓂᕐᓄᑦ ᐊᒻᒪᓗ ᐋᖅᑭᒃᓱᐃᓯᒪᓕᕈᑎᐅᓪᓗᑎᒃ ᑲᔪᓰᓐᓇᖅᑎᑕᐅᓪᓗᑎᒃ ᓂᕿᒋᔭᒃᓴᓂᒃ ᐱᓯᒪᓕᕈᓐᓇᕐᓂᐅᔪᓄᑦ ᐃᓄᐃᑦ ᓄᓇᖓᓐᓂ.
ᐋᖅᑭᒃᓱᐊᖑᓯᒪᓂᖓ ᓂᕆᑎᑦᑎᖃᑦᑕᕐᓂᕐᒧᑦ ᐱᓕᕆᐊᖑᔪᑉ, ᐱᐅᓯᒋᐊᕈᑎᒃᓴᐅᓪᓗᑎᒃ ᓂᕿᒋᔭᒃᓴᓂᒃ ᐱᓯᒪᓕᖃᑦᑕᕈᓐᓇᕐᓂᕐᒥᒃ ᓇᖕᒥᓂᖅ ᐃᓱᒪᓕᐅᕈᑎᖃᕈᓐᓇᕐᓂᒃᑯᑦ, ᐃᓚᒋᔭᐅᓚᐅᕐᒪᑕ ᑕᓪᓕᒪᐅᓪᓗᑎᒃ ᑎᓕᐅᕆᓯᒪᓂᕐᓂᒃ ᑮᓇᐅᔭᓂᒃ ᕿᑐᕐᖏᐅᖅᑎᑦᑎᓯᒪᓕᖁᔨᓪᓗᑎᒃ ᑎᑎᕋᖅᑕᐅᓯᒪᓕᓚᐅᖅᑐᓂᑦ ᐃᓄᐃᑦ ᑕᐱᕇᑦ ᑲᓇᑕᒥ 2023-ᒥ ᑮᓇᐅᔭᖁᑎᒃᓴᖅᑖᕐᓂᐊᓵᕐᓂᖏᓐᓂ ᑐᓂᔭᐅᓯᒪᓕᓚᐅᖅᑐᓄᑦ.
ᐃᓄᐃᑦ ᑕᐱᕇᑦ ᑲᓇᑕᒥ (ITK) ᑲᓇᑕᓕᒫᒥ ᑲᑐᔾᔨᖃᑎᒌᖑᕗᑦ ᐱᔾᔪᑎᖃᖅᑎᒋᔭᐅᓪᓗᑎᒃ 70,000-ᓗᐊᓄᑦ ᐃᓄᖕᓄᑦ ᑲᓇᑕᒥ, ᐊᒥᓲᓂᖅᓴᐅᔪᑦ ᓄᓇᓕᖃᖅᑑᓪᓗᑎᒃ ᐃᓄᐃᑦ ᓄᓇᖓᓐᓂ, ᐃᓄᐃᑦ ᓄᓇᒋᔭᑐᖃᖓᓐᓂ 51-ᖑᓪᓗᑎᒃ ᓄᓇᓕᖃᖅᑐᒥ ᐃᓄᕕᐊᓗᐃᑦ ᐊᕕᒃᑐᖅᓯᒪᓂᖓᓂ (ᓄᓇᑦᓯᐊᖅ), ᓄᓇᕗᑦᒥ, ᓄᓇᕕᒃᒥ (ᑯᐃᐸᒃ ᑕᖅᕋᖓᓂ), ᐊᒻᒪᓗ ᓄᓇᑦᓯᐊᕗᑦᒥ (ᓛᐸᑐᐊᕆᐅᑉ ᐅᐊᖕᓇᖓᓂ). ᐃᓄᐃᑦ ᑕᐱᕇᑦ ᑲᓇᑕᒥ (ITK) ᐱᔾᔪᑎᖃᖅᑎᒋᔭᐅᕗᑦ ᐃᓄᐃᑦ ᐱᔪᓐᓇᐅᑎᒋᔭᖏᓐᓂᒃ ᐊᒻᒪᓗ ᐱᓯᒪᓕᕈᒪᔭᖏᓂᒃ ᑲᓇᑕᐅᑉ ᖁᑦᑎᖕᓂᖓᓂ ᐃᓱᒪᖅᓱᕈᑎᖃᕈᓐᓇᕐᓗᑎᒃ ᐊᐅᓚᑦᓯᔨᐅᔪᓐᓇᕐᓂᕐᒧᑦ ᐱᓕᕆᓂᖃᕈᑎᑎᒍᑦ ᐱᔾᔪᑎᖃᖅᑎᐅᓗᑎᒃ ᑕᒪᐃᓐᓄᑦ ᐃᓄᐃᑦ ᐊᕕᒃᑐᖅᓯᒪᓂᕆᔭᖏᓐᓄᑦ.
ᑐᓴᒐᒃᓴᓕᕆᔾᔪᑎᓄᑦ ᐊᐱᖅᑯᑎᒃᓴᖃᕈᑦᓯ: