ᒫᔾᔨ 29, 2023 – ᐋᑐᕙ, ᐋᓐᑎᐊᕆᐅ
2023-ᒥ ᒐᕙᒪᑐᖃᒃᑯᑦ ᑮᓇᐅᔭᑦ ᐊᑐᖅᑕᐅᓂᒃᓴᖏᓐᓄᑦ ᓴᖅᑭᑎᓯᒪᔭᖏᑦ ᒫᔾᔨ 28-ᒥ ᐱᑕᖃᖅᑎᑦᑎᓯᒪᕗᑦ ᐃᓚᖓᓂᒃ ᑮᓇᐅᔭᖁᑎᒃᓴᕆᔭᐅᔭᕆᐊᖃᕐᓂᐊᖅᑐᓂᑦ ᓄᖑᑎᑕᐅᓯᒪᓕᖁᓪᓗᒍ ᐳᕙᒡᓗᖕᓂᕐᒥᒃ ᐋᓐᓂᐊᖃᓕᖅᐸᖕᓂᓕᕆᓂᕐᒧᑦ ᐃᓄᐃᑦ ᓄᓇᖓᓐᓂ ᐊᒻᒪᓗ ᐊᒥᓲᖖᒋᑦᑑᒐᓗᐊᓂᒃ ᐃᓚᒋᐊᕈᑎᓂᒃ ᐱᑕᖃᓕᖅᑎᑦᑎᓯᒪᓪᓗᑎᒃ ᐊᖏᔪᒻᒪᕆᖕᒥᒃ ᓇᓕᖅᑲᐅᑎᑕᐅᓗᑎᒃ ᐊᑐᐃᓐᓇᐅᓕᕐᕕᐅᔾᔪᑎᒃᓴᖏᓐᓄᑦ ᐃᓄᐃᑦ ᐊᒻᒪᓗ ᐊᓯᖏᑕ ᑲᓇᑕᒥᐅᑕᐅᔪᐃᑦ.
ᑮᓇᐅᔭᑦ ᐊᑐᖅᑕᐅᓂᒃᓴᖏᓐᓄᑦ ᓴᖅᑭᑎᓯᒪᓕᕐᑐᑦ 2023-ᒥ ᐊᖏᕈᑎᖃᖅᓯᒪᕗᑦ ᐱᑕᖃᓕᖅᑎᑦᑎᓂᐊᕐᓂᕐᒥᓐᓂᒃ $16.2-ᒥᓕᐊᓐᑖᓚᓂᒃ ᐅᑭᐅᑦ ᐱᖓᓱᓄᑦ ᐊᑐᖅᑕᐅᕙᓪᓕᐊᔪᒃᓴᓂᒃ “ᓴᐳᔾᔨᒋᐊᕈᑎᒃᓴᐅᓗᑎᒃ ᒥᑭᒡᓕᒋᐊᖅᑎᑦᑎᓂᕐᒥ ᐳᕙᒡᓗᓕᕐᓂᕐᒥᒃ ᐋᓐᓂᐊᖃᓕᖅᐸᒃᑐᓄᑦ ᖁᑦᑎᖕᓂᕆᔭᐅᔪᓂᒃ ᐃᓄᐃᑦ ᓄᓇᓕᖏᓐᓂ.” ᑖᒃᑯᐊ ᑮᓇᐅᔭᖁᑎᒃᓴᖅᑖᕆᔭᐅᓂᐊᖅᑐᑦ ᖃᓄᑎᒋᐅᓕᖏ 1/4-ᓗᐊᑐᐃᓐᓇᖓᓂᒃ ᖃᔅᓯᑐᕋᔭᕐᓂᖓᓂᑦ ᓇᓗᓇᐃᖅᓯᒪᓕᓚᐅᖅᑕᖏᓐᓂᑦ ᐃᓄᐃᑦ ᑕᐱᕇᑦ ᑲᓇᑕᒥ ᐱᓕᕆᐊᖑᕙᓪᓕᐊᓂᖏᑕ ᑐᒡᓕᕆᔭᖏᓄᑦ ᐳᕙᒡᓗᓕᖃᑦᑕᕐᓂᕐᒥᒃ ᓄᖑᑎᑦᑎᓯᒪᓕᕆᐊᓂᐊᕐᓗᑎᒃ ᑮᓇᐅᔭᑦ ᐊᑐᖅᑕᐅᓂᒃᓴᖏᓐᓄᑦ ᓴᖅᑮᓯᒪᓕᓚᐅᖅᑳᖅᑎᓐᓇᒋᑦ ᑐᓂᓯᒪᓕᓚᐅᖅᑕᖏᓐᓄᑦ ᐅᑭᐊᒃᓵᖑᓚᐅᖅᑐᒥᑦ.
“ᑖᒃᑯᐊ ᒥᑭᑦᑑᓪᓗᑎᒃ ᑮᓇᐅᔭᓂᒃ ᕿᑐᕐᖏᐅᖅᑎᑦᑎᓯᒪᓕᕐᓂᐅᔪᑦ ᐃᓄᐃᑦ ᐋᓐᓂᐊᖅᓯᐅᕐᑎᓕᕆᓂᕐᒥ ᓯᕗᓪᓕᖅᐸᐅᑎᑕᐅᖁᔭᖏᓐᓄᑦ ᐱᓕᕆᐊᓄᑦ ᐃᓗᐃᒃᑲᐅᔪᑎᒍᑦ ᐱᓕᕆᓂᖃᓕᕈᑎᒋᔪᓐᓇᕐᓂᐊᖖᒋᓐᓇᑦᑎᒍ ᑲᑐᔾᔨᓗᑕ ᐱᓕᕆᐊᒃᓴᕆᔭᑦᑎᓐᓄᑦ ᐱᓕᕆᖃᑎᒋᓗᑎᒍ ᑲᓇᑕᒥ ᒐᕙᒪᖓᑦ ᓄᖑᑎᑕᐅᓯᒪᓕᖁᓪᓗᒍ ᐳᕙᒡᓗᓕᖕᓂᕐᒥᒃ ᐋᓐᓂᐊᖃᓕᖅᐸᒃᑐᓕᕆᓂᕐᓄᑦ ᐃᓄᐃᑦ ᓄᓇᖓᓐᓂ ᐅᑭᐅᖓ 2030-ᐅᑉ ᓯᕗᕐᖓᓂ,” ᐅᖃᖅᓱᓂ ᓇᐃᑖᓐ ᐆᐱᑦ, ᐊᖏᔪᖅᑳᖅ ᐃᓄᐃᑦ ᑕᐱᕇᑦ ᑲᓇᑕᒥ (ITK). “ᑕᐃᒪᓐᓇᐃᒃᑲᓗᐊᖅᑎᓪᓗᒍᓗ ᖁᓚᕈᓱᓕᖖᒋᑦᑐᒍᑦ ᓯᕗᓂᕐᒥ ᒐᕙᒪᑐᖃᒃᑯᑦ ᑮᓇᐅᔭᑦ ᐊᑐᖅᑕᐅᓂᒃᓴᖏᓐᓄᑦ ᐱᓕᕆᓂᐅᓕᖅᐸᒃᑐᑦ ᒪᑐᐃᖅᑕᐅᓯᒪᓕᕈᒫᕐᓂᖏᑕ ᑮᓇᐅᔭᖁᑎᒃᓴᓂᒃ ᐱᓯᒪᓕᕆᐊᖃᖅᑕᑦᑎᓐᓄᑦ ᐱᓕᕆᐊᒃᓴᕆᔭᕗᑦ ᑖᑦᓱᒧᖓ ᐱᓕᕆᐊᖑᓯᒪᓕᕐᓂᐊᖁᓪᓗᒍ.”
ᐃᓄᐃᑦ ᑕᐱᕇᑦ ᑲᓇᑕᒥ (ITK) ᑲᑎᒪᔨᖏᑦ ᓇᓗᓇᐃᔭᐃᓯᒪᓕᓚᐅᖅᑐᑦ ᑕᓪᓕᒪᓂᒃ ᖃᓄᖅᑑᕈᑎᒃᓴᓕᐊᓂᒃ ᐸᕐᓇᐅᑎᓕᐊᖑᓯᒪᔪᓂ ᓯᕗᓪᓕᖅᐸᐅᑎᑕᒃᓴᐅᓂᐊᖅᑐᓂᒃ ᑮᓇᐅᔭᑦ ᐊᑐᖅᑕᐅᓂᒃᓴᖏᓐᓄᑦ 2023-ᒥ. ᐃᓚᒋᔭᐅᓪᓗᑎᒃ ᐳᕙᒡᓗᓕᖃᑦᑕᕐᓂᐅᑉ ᓄᖑᑎᑕᐅᓯᒪᓕᕆᐊᕐᓂᖓᑕ ᐱᓕᕆᐊᒧᑦ, ᐃᓚᐅᓕᖅᑎᑦᑎᓚᐅᕐᒪᑕ ᓇᓗᓇᐃᔭᖅᓯᒪᓪᓗᒋᑦ ᐸᕐᓇᐅᑎᓂᒃ ᓴᖅᑮᓯᒪᓕᕈᑎᒃᓴᓂᒃ ᐊᒻᒪᓗ ᐱᓕᕆᓂᐅᓕᕋᔭᖅᑐᒧᑦ ᐃᓄᐃᑦ ᓄᓇᖓᓐᓂ ᐃᓕᓐᓂᐊᕐᕕᖕᓂ ᓂᕆᔭᒃᓴᖃᖅᑎᑦᑎᕙᓐᓂᕐᒧᑦ ᐱᓕᕆᐊᒥᒃ, ᐊᑭᒋᔭᐅᓇᔭᖅᑐᓄᑦ ᐱᓕᕆᔾᔪᑎᐅᓕᕋᔭᖅᑐᒥᒃ ᓴᑐᖅᑕᐅᓯᒪᓕᕐᓂᒃᓴᖓᑕ, ᐆᒻᒪᖅᑎᑕᐅᒋᐊᒃᑲᓐᓂᖅᓯᒪᓕᕋᔭᕐᓂᖓᑕ, ᐱᓕᕆᐊᖑᓕᕋᔭᕐᓂᖓᑕ ᐊᒻᒪᓗ ᓴᖖᒋᒃᑎᒋᐊᕈᑎᒃᓴᖏᓂᒃ ᐃᓄᒃᑐᑦ ᐅᖃᐅᓯᐅᑉ, ᐊᑐᓕᖅᑎᑕᐅᓂᒃᓴᖏᑕ ᐱᓕᕆᐊᖑᕙᓪᓕᐊᓂᖏᑦ 2-ᖓ ᑲᓇᑕᒥ ᐃᓄᐃᑦ ᐸᕐᓇᐅᑎᓕᐊᕆᓯᒪᔭᖏᑦ ᖃᐅᔨᓴᐃᓂᐅᕙᒃᑐᓄᑦ ᐊᒻᒪᓗ ᑮᓇᐅᔭᓂᒃ ᕿᑐᕐᖏᐅᖅᑎᑦᑎᓯᒪᓕᕋᔭᕐᓂᕐᒧᑦ ᐱᓕᕆᐊᖑᔪᒃᓴᓄᑦ ᐃᓄᐃᑦ ᓄᓇᖓᓐᓂ ᐱᓕᕆᓂᖃᕐᕕᐅᓕᐊᓂᒃᑐᓂ ᐱᓕᕆᐊᖑᑲᐃᓐᓇᖅᑐᑎᒍ ᐋᖅᑮᓯᒪᓕᕈᑎᐅᔪᓄᑦ ᑕᒪᐃᑎᒍᑦ ᐊᒥᓱᐃᓕᖓᔫᓪᓗᑎᒃ ᖃᐅᔨᒋᐊᕐᓂᐅᔪᓄᑦ ᓱᓇᓂᒃ ᐱᓯᒪᓕᕆᐊᖃᕐᓂᕐᒧᑦ ᐃᓗᐃᒃᑲᕈᖅᑎᑕᐅᓯᒪᓕᖁᓪᓗᒍ ᐱᓕᕆᐊᖑᓕᐊᓂᒃᑐᓂ ᐃᓚᑰᓂᖃᕐᕕᐅᔪᓄᑦ ᐃᓄᐃᑦ ᓄᓇᖓᓐᓂ 2030 ᐅᑭᐅᖓᑕ ᓯᕗᕐᖓᓂ.
ᐃᓄᐃᑦ ᑕᐱᕇᑦ ᑲᓇᑕᒥ (ITK) ᑲᔪᓯᓗᑎᒃ ᓴᐳᔾᔨᒋᐊᖅᓯᒪᓂᐊᖅᑐᑦ ᓄᓇᖃᖅᑳᖅᓯᒪᔪᐃᑦ ᐊᔾᔨᒌᖖᒋᑦᑑᓂᖏᓐᓄᑦ ᑐᖖᒐᕝᕕᖃᖅᑎᑕᐅᓯᒪᓪᓗᑎᒃ ᑮᓇᐅᔭᖁᑎᒃᓴᖅᑖᕐᑎᑕᐅᕙᒋᐊᖃᕐᓂᖏᓐᓄᑦ ᒐᕙᒪᑐᖃᒃᑯᓐᓂ ᑮᓇᐅᔭᓕᕆᓐᓇᐅᑉ ᐅᑭᐅᖓ ᐊᑐᖅᑎᓪᓗᒍ ᓇᓗᓇᐃᔭᖅᑕᐅᓯᒪᓕᑦᓯᐊᖃᑦᑕᓕᕐᓂᐊᕐᒪᑕ ᐊᒻᒪᓗ ᖁᓚᕐᓇᖖᒋᓐᓂᖅᓴᐅᓕᖅᑎᑕᐅᓗᑎᒃ ᐊᒥᓱᐃᓕᖓᓪᓗᑎᒃ ᐸᕐᓇᐅᑎᓕᐅᖅᐸᓪᓕᐊᓂᕐᒥ ᐱᓕᕆᐊᖑᕙᒃᑐᓂ ᓯᑕᒪᐅᓪᓗᑎᒃ ᐊᔾᔨᖃᕋᑎᒃ ᐊᕕᒃᑐᖅᓯᒪᓂᕆᔭᐅᔪᓂ ᐃᓄᐃᑦ ᓄᓇᖓᓐᓂ.
ᐃᓄᐃᑦ- ᒐᕙᒪᑐᖃᒃᑯᑦ ᐱᓕᕆᐊᖃᖃᑎᒌᖕᓂᖏᓐᓄᑦ ᑲᑎᒪᔨᕋᓛᖏᑦ ᓯᕗᓕᖅᑎᐅᓪᓗᑎ ᐱᓕᕆᓂᖃᓕᖅᑎᑦᑎᔨᐅᒻᒪᑕ ᐃᓄᐃᑦ ᐊᒻᒪᓗ ᒐᕙᒪᑐᖃᒃᑯᑦ ᐃᑲᔪᖅᑎᒌᒃᓱᑎᒃ ᐱᓕᕆᐊᖃᕐᓂᖏᓐᓄᑦ ᐱᕙᓪᓕᐊᔪᓕᕆᓂᐅᔪᓂ ᐊᒥᖅᑲᕐᑕᐅᓪᓗᑎᒃ ᓯᕗᓪᓕᖅᐸᐅᑎᑕᒃᓴᐅᔪᑦ ᑐᕌᖓᑎᑕᐅᖁᓪᓗᒋᑦ ᒐᕙᒪᑐᖃᒃᑯᑦ ᑮᓇᐅᔭᓂᒃ ᕿᑐᕐᖏᐅᖅᑎᑦᑎᕙᓐᓂᖏᓐᓂ ᐊᒻᒪᓗ ᐃᑲᔪᖅᑐᐃᓂᖃᕐᓂᖏᓐᓂ ᐃᓄᐃᑦ ᓇᖕᒥᓂᖅ ᐃᓱᒪᓕᐅᕈᑎᓕᐅᕈᓐᓇᕐᓂᖏᓐᓄᑦ ᐱᔾᔪᑎᖃᖅᑐᓄᑦ. ᐃᓄᐃᑦ ᑕᐱᕇᑦ ᑲᓇᑕᒥ (ITK) ᓂᕆᐅᖕᓂᖃᖅᐳᑦ ᑐᓴᖅᑎᑕᐅᒋᐊᒃᑲᓐᓂᕈᑎᒃᓴᒥᓐᓂᒃ ᑖᒃᑯᓄᖓ ᑮᓇᐅᔭᑦᐊᑐᖅᑕᐅᓂᒃᓴᖏᓐᓄᑦ ᐱᔾᔪᑎᖃᖅᑐᓂᒃ ᐊᒻᒪᓗ ᐱᓕᕆᖃᑎᖃᑦᑎᐊᕐᓂᕐᒥᓐᓂᒃ ᑲᓇᑕᒥ ᐊᖏᔪᖅᑳᕐᔪᐊᒥᒃ ᐊᒻᒪᓗ ᐃᓱᒪᑕᒻᒪᕆᐅᓪᓗᑎᒃ ᒥᓂᔅᑕᒋᔭᐅᔪᓂᒃ ᑲᑎᒪᓂᖃᓕᕐᒥᒃᐸᑕ ICPC-ᑯᑦ ᓯᕗᓕᖅᑎᒋᔭᖏᑦ ᓇᐃᓂ, ᓄᓇᑦᓯᐊᕗᑦᒥ, ᒪᐃ 2023-ᖑᓕᖅᐸᑦ.