ᒪᐃ 4, 2023 – ᓚᓐᑕᓐ, ᐃᖕᓚᓐᑦ
ᑲᓇᑕᒥ ᐃᓱᒪᑕᒻᒪᕆᒃ ᕉᔅᐋᓐ ᐋᕐᓯᐹᓪᑦ ᐃᖅᑭᓖᑦ ᑲᑐᔾᔨᖃᑎᒌᖏᓐᓂᑦ, ᐊᖏᔪᖅᑳᕆᔭᐅᔪᖅ ᓇᐃᑖᓐ ᐆᐱᑦ ᐃᓄᐃᑦ ᑕᐱᕇᑦ ᑲᓇᑕᒥ ᐊᒻᒪᓗ ᐊᖏᔪᖅᑳᕆᔭᔪᖅ ᑳᓯᑎ ᑭᐊᕋᓐ ᐊᓪᓚᖓᔪᑦ ᑲᓇᑕᒥ ᑲᑎᒪᔨᖏᓐᓄᑦ, ᐃᓚᒋᓪᓗᒍ ᓂᖅᑐᕐᓇᕐᑐᖅ ᒥᐊᕆ ᓴᐃᒪᓐ, ᑭᖕ ᑭᒡᒐᖅᑐᖅᑎᖓ ᑲᓇᑕᒥ, ᑲᑎᖖᒐᖃᑎᖃᕈᓐᓇᓚᐅᕐᒪᔾᔪᒃ ᐊᖓᔪᖅᑳᕐᔪᐊᖅ ᑭᖕ ᓵᕈᓪᔅ III ᑭᖕ ᐊᖏᕐᕋᖓᓂ ᐸᑭᖕᕼᐊᒻ ᐸᐃᓚᔅᒥ ᐅᓪᓛᖅ.
ᐅᖃᓪᓚᐅᓯᖃᖃᑎᒌᓚᐅᖅᑐᑦ ᑕᒪᕐᒥᐅᓪᓗᑎᒃ ᐱᓕᕆᖃᑎᒌᒍᓐᓇᕐᓂᕐᒥᓐᓂᒃ ᐱᕕᒃᓴᖃᖅᑎᑕᐅᓕᕋᒥᒃ ᐃᑎᓂᖅᓴᐅᔪᒃᑯᑦ ᐱᓕᕆᖃᑎᖃᕐᓂᕆᕙᒃᑕᒥᓐᓂᒃ ᒐᕙᒪᑐᖃᒃᑯᓐᓂᒃ, ᐊᒻᒪᓗ ᑭᖕᒥᒃ, ᐱᓗᐊᖅᑐᒥᒃ, ᓄᓇᖃᖅᑳᖅᓯᒪᔪᓂᒃ ᑲᓇᑕᒥ. ᑖᒃᑯᑐᐊᖑᑎᑕᐅᓪᓗᑎᒃ ᓈᓚᒃᑕᐅᔪᓐᓇᓚᐅᕐᒪᑕ ᐊᖏᖅᑕᐅᓯᒪᓪᓗᑎᒃ ᑭᖕᒥᑦ ᑲᓇᑕᒥᐅᖑᔪᑦ ᐃᓕᑕᕆᔭᐅᓯᒪᓕᕐᕕᒃᓴᖓᑕ ᓯᕗᕐᖓᓂ, ᐃᓕᑕᕆᔭᐅᓯᒪᓕᕐᓂᐊᖅᑎᓪᓗᒍ ᑭᖕ ᒪᐃ 6-ᒥ.
ᑲᓇᑕᒥ ᓄᓇᖃᖅᑳᖅᓯᒪᔪᓄᑦ ᓯᕗᓕᖅᑎᒋᔭᐅᔪᑦ ᑕᒪᕐᒥᐅᓪᓗᑎᒃ ᓇᓗᓇᐃᖅᓯᓚᐅᖅᐳᑦ ᑐᖖᒐᓱᒃᑎᑦᑎᓯᒪᔪᒪᓂᕐᒥᓐᓂᒃ ᐊᖓᔪᖅᑳᕐᔪᐊᖅ ᑭᖕᒥᒃ ᐃᖅᑭᓖᑦ, ᐃᓄᐃᑦ ᐊᒻᒪᓗ ᐊᓪᓚᖓᔪᑦ ᓄᓇᒋᔭᑐᖃᖓᓐᓄᑦ ᐱᕕᒃᓴᖃᕈᓐᓇᖅᓯᑐᐊᖅᐸᑦ.
ᑲᓇᑕᒥ ᐃᓱᒪᑕᒻᒪᕆᒃ ᐋᕐᓯᐹᓪᑦ ᐅᖃᓪᓚᐅᓯᖃᓚᐅᕐᐳᖅ ᐃᑉᔪᕐᓇᐃᑦᑑᑎᑕᐅᓪᓗᑎᒃ ᐊᖏᕈᑎᐅᓯᒪᔪᓄᑦ ᐃᖅᑭᓖᑦ ᐃᓅᖃᑎᒌᒃᑐᖁᑎᖏᓐᓂᑦ ᐊᒻᒪᓗ ᐊᖓᔪᖅᑳᕐᔪᐊᒥᑦ ᓯᕗᓂᑲᓪᓚᒻᒪᕆᐊᓂ ᑲᓇᑕᒥ ᒐᕙᒪᖃᐅᓯᖅᑖᓚᐅᖅᑎᓐᓇᒍᓱᓕ ᐊᒻᒪᓗ ᐊᖏᕈᑎᓕᐊᖑᓯᒪᓕᓚᐅᖅᑐᓄᑦ ᓄᓇᕐᔪᐊᕐᒥᑦ ᓄᓇᕐᔪᐊᕐᒧᑦ ᑐᖖᒐᕝᕕᖃᖅᑎᑕᐅᓯᒪᓪᓗᑎᒃ. ᐃᓱᒪᓕᐅᕈᑎᖃᓚᐅᕐᐳᖅ ᒪᒥᓴᖅᐸᓪᓕᐊᓂᕐᒥ ᓇᐅᒃᑰᕐᕕᒃᓴᓕᐅᖅᓯᒪᓕᕆᐊᒧᑦ ᓯᕗᒻᒧᒃᑎᑦᑎᖃᑎᒌᖁᔨᓪᓗᓂ ᑐᖖᒐᕝᕕᖃᖅᑎᑕᐅᓯᒪᓗᑎᒃ ᑕᒪᕐᒥᐅᓪᓗᑎᒃ ᐃᓱᒫᓗᒍᑎᖃᕐᕕᐅᔪᓄᑦ ᐊᒻᒪᓗ ᓯᕗᓪᓕᖅᐸᐅᑎᑕᐅᖁᔭᐅᔪᓄᑦ ᐱᓕᕆᖃᑎᒋᓗᒍ ᐊᖓᔪᖅᑳᕐᔪᐊᖑᔪᖅ ᐃᓚᖃᖅᑎᑕᐅᓯᒪᔪᓂᒃ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ, ᓇᖕᒥᓂᖅ ᐱᓕᕆᕝᕕᓕᕆᓂᕐᓄᑦ, ᐊᒻᒪᓗ ᐱᐅᓯᑐᖃᕆᔭᐅᔪᑉ ᐸᐸᑕᐅᓯᒪᓕᕋᔭᕐᓂᖏᓐᓄᑦ.
ᐊᖏᔪᖅᑳᖅ ᐆᐱᑦ ᐅᖃᓪᓚᐅᓯᖃᓚᐅᕐᐳᖅ ᐃᓄᐃᑦ ᒐᕙᒪᑐᖃᒃᑯᑦ ᐱᓕᕆᖃᑎᒌᖕᓂᖏᑕ ᑲᑎᒪᔨᕋᓚᖑᔪᑦ ᐱᓕᕆᐊᕆᔭᖏᓐᓂᒃ ᐆᒃᑐᕋᐅᑎᒋᓪᓗᓂᐅᒃ ᐊᖓᔪᖅᑳᕐᔪᐊᑉ ᐊᒃᑐᐃᓯᒪᓂᖃᕐᓂᖓᓂᒃ ᓴᐃᒻᒪᖃᑎᒌᒃᓯᒪᓕᕋᔭᕐᓂᕐᓄᑦ ᑲᓇᑕᒥ, ᐊᒻᒪᓗ ᐃᓄᐃᑦ ᓯᕗᓕᖅᑎᒋᔭᐅᔪᑦ ᐃᓚᒋᔭᐅᖃᑕᐅᔪᒪᓂᖏᓐᓂᒃ ᓯᕗᒻᒧᒋᐊᖅᑎᑕᐅᓯᒪᓕᖁᓪᓗᒋᑦ ᐅᖃᓪᓚᐅᓯᖃᖃᑎᒌᖕᓂᐅᔪᑦ ᐅᑎᖅᑎᑕᐅᓯᒪᓕᕐᓂᒃᓴᖏᑕ ᐱᖁᑎᒋᔭᐅᔪᐃᑦ ᐱᐅᓯᑐᖃᕐᒥᓐᓂ ᐱᒻᒪᕆᐅᑎᑕᐅᔪᑦ ᐃᖕᓚᓐᒥ ᑕᑯᔭᖅᑐᐃᕝᕕᖏᓐᓂᑦ.
ᐊᖏᔪᖅᑳᖅ ᑭᐊᕋᓐ ᐅᖃᐅᓯᖃᓚᐅᕐᐳᖅ ᐱᓕᕆᖃᑎᒌᖕᓂᐅᔪᑦ ᐱᕈᖅᑎᑕᐅᕙᓪᓕᐊᓯᒪᓂᖏᑕ ᑏᑐᖃᑎᒌᒃᐸᒃᓯᒪᓪᓗᑎᒃ 100-ᓗᐊᓂᒃ ᐃᕐᖑᓯᕐᓂᒃ ᐊᒻᒪᓗ ᖁᕕᐊᓱᓐᓂᕐᒥᓂᒃ ᓯᕗᓪᓕᖅᐹᒥᒃ ᑏᑐᖃᑎᒋᔪᓐᓇᕋᒥᐅᒃ ᐊᒻᒪᓗ ᓴᖅᑮᕝᕕᒋᓯᒪᓕᕈᓐᓇᖅᓱᒍ ᐊᖓᔪᖅᑳᕐᔪᐊᖅ ᑭᖕ ᐅᓂᒃᑳᒃᓴᕆᔭᐅᔪᓂᒃ ᓄᓇᓕᒋᔭᐅᔪᓂᑦ ᓇᓗᓇᐃᔭᐃᔾᔪᑎᒋᓂᐊᕐᓗᒍ ᐊᑯᓂᒻᒪᕆᐅᓕᖅᑐᒥᒃ ᐱᓕᕆᖃᑎᒌᖃᑦᑕᖅᓯᒪᓕᕐᓂᖏᓐᓂᒃ ᐊᖓᔪᖅᑳᕐᔪᐊᕆᔭᐅᔪᒥᑦ ᐊᒻᒪᓗ ᐊᓪᓚᖓᔪᐃᑦ ᓄᓇᓕᒋᔭᖏᓐᓂᑦ.
ᐊᖏᔪᖅᑳᕐᔪᐊᖅ ᑭᖕ ᐊᒥᖅᑲᕈᑎᖃᓚᐅᕐᐳᖅ ᑐᓴᒐᒃᓴᖁᑎᒋᔭᒥᓂᒃ ᐱᓯᒪᓕᕈᒪᓪᓗᓂᒋᑦ ᐊᒻᒪᓗ ᓯᕗᓪᓕᖅᐸᐅᑎᑕᐅᖁᓯᒪᔭᒥᓂᒃ, ᐃᓚᖃᖅᖢᒋᑦ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓂᒃ ᐊᒻᒪᓗ ᓄᓇᖃᖅᑳᖅᓯᒪᔪᐃᑦ ᖃᐅᔨᒪᔭᑐᖃᖏᓐᓂᒃ, ᐃᒡᓗᓕᕆᓂᕐᓄᑦ ᑐᕌᖓᔪᓂᒃ ᐊᒻᒪᓗ ᓯᕗᒻᒧᒋᐊᖅᑎᑕᐅᓯᒪᓕᖁᓪᓗᓂᒋᑦ ᐱᕙᓪᓕᐊᔪᓕᕆᓂᐅᔪᐃᑦ ᓴᐃᒻᒪᖃᑎᒌᒃᓯᒪᓕᕋᔭᕐᓂᕐᒧᑦ.
ᑕᒪᕐᒥᐅᓪᓗᑎᒃ ᓯᕗᓕᖅᑎᒋᔭᐅᔪᐃᑦ ᐃᓕᑕᖅᓯᓯᒪᓚᐅᖅᑐᑦ ᓈᒻᒪᑦᓯᐊᕐᑑᓂᖏᑕ ᐅᖃᓪᓚᖃᑎᒌᖕᓂᐅᔪᑦ ᐊᒻᒪᓗ ᐃᒃᐱᒋᔭᖃᕐᓂᕐᒥᓐᓂᒃ ᑲᑎᒪᖃᑎᒌᖕᓂᐅᔪᖅ ᐊᖏᓂᖅᓴᐅᔪᒥᒃ ᓇᓗᓇᐃᖅᓯᔾᔪᑎᐅᓯᒪᓂᖓᑕ ᑭᓯᐊᓂᓗ ᒥᒃᓯᖃᑦᓯᐊᖅᑐᑎᒍᑦ ᑲᑎᒪᖃᑎᒌᖕᓂᐅᓂᖓᑕ ᐊᒻᒪᓗ ᐱᒋᐊᕈᑎᐅᓯᒪᓂᖓᓄᑦ ᓄᑖᑎᒍᑦ ᐱᓕᕆᐊᖃᖃᑎᒌᖕᓂᐅᓕᕐᓂᐊᕐᒪᑕ ᓄᑖᖑᓪᓗᓂ ᐊᖓᔪᖅᑳᕐᔪᐊᖑᓕᖅᑐᒥᒃ.