ᐋᑐᕙ, ᐋᓐᑎᑎᐊᕆᐅ (ᒫᔾᔨ 24, 2023)
ᐃᓄᐃᑦ ᑕᐱᕇᑦ ᑲᓇᑕᒥ ᐊᖏᔪᖅᑳᖓᑦ ᓇᐃᑖᓐ ᐆᐱᑦ ᐊᒻᒪᓗ ᓄᓇᖃᖅᑳᖅᓯᒪᔪᓕᕆᔨᒃᑯᓐᓄᑦ ᒥᓂᔅᑕᖓᑦ ᐹᑎ ᕼᐋᔾᑑ ᓴᖅᑮᓯᒪᓕᓚᐅᖅᐳᑦ ᑐᓴᖅᑎᑦᓯᑦᔪᑎᓂᒃ ᐅᓪᓗᒥ ᓯᓚᕐᔪᐊᓕᒫᒥ ᐳᕙᒡᓗᓕᖃᑦᑕᕐᓂᕐᒥᒃ ᐋᓐᓂᐊᖃᓕᖅᐸᒃᑐᑦ ᐅᓪᓗᖓᓂ 2023:
“ᐳᕙᒡᓗᓕᖃᑦᑕᕐᓂᕐᒥᒃ ᐋᓐᓂᐊᖃᓕᖅᐸᒃᑐᑦ ᑲᔪᓰᓐᓇᖅᓯᒪᓂᖓᑦ ᐅᒡᒍᐊᕐᓇᕋᓗᐊᕐᐳᖅ ᐊᒻᒪᓗ ᑕᐃᒪᐃᑦᓴᕆᐊᖃᖖᒋᒃᑲᓗᐊᖅᓱᓂ ᓱᓕ ᑕᐃᒪᓐᓇᐃᓐᓂᖓᑕ ᐃᓄᐃᑦ ᓄᓇᖓᓐᓂ. ᐳᕙᒡᓗᓕᖃᑦᑕᕐᓂᖅ (TB) ᖁᑦᑎᓗᐊᒻᒪᕆᖕᓂᖓ ᐊᒃᑐᐃᓯᒪᓂᖃᕐᒪᑦ ᐃᓄᐃᑦ ᓄᓇᓕᒋᔭᖏᓂᒃ ᑲᓇᑕᓕᒫᒥ. ᑲᓇᑕᒥ ᒐᕙᒪᖓᑦᒃ ᐊᒻᒪᓗ ᐃᓄᐃᑦ ᑕᐱᕇᑦ ᑲᓇᑕᒥ (ITK), ᑲᓇᑕᓕᒫᒥ ᐱᔾᔪᑎᖃᖅᑎᐅᓪᓗᑎᒃ ᑲᑐᔾᔨᖃᑎᒌᑦ ᐃᓄᖕᓄᑦ ᑲᓇᑕᒥ, ᑲᑐᔾᔨᓪᓗᑎᒃ ᐱᓕᕆᐊᖃᖃᑎᒌᖕᒪᑕ ᓄᖑᑎᑕᐅᓯᒪᓕᖁᓪᓗᒍ ᐳᕙᒡᓗᓕᖃᑦᑕᕐᓂᕐᒥᒃ ᐋᓐᓂᐊᖃᓕᕐᓂᐅᕙᒃᑐᖅ ᐃᓄᐃᑦ ᓄᓇᖓᓐᓂᑦ, ᐋᓐᓂᐊᖃᖅᑐᑦ ᐃᖢᐊᖅᓴᖅᑕᐅᓯᒪᓕᖅᐸᖕᓂᖏᑎᒍᑦ ᐊᒻᒪᓗ ᐋᓐᓂᐊᖃᓕᖁᔨᖖᒋᓐᓂᕐᒥᒃ ᐱᓕᕆᓂᐅᔪᑎᒍᑦ ᑐᕌᕐᕕᖃᖅᑎᑕᐅᓯᒪᓗᑎᒃ ᐋᓐᓂᐊᖃᓕᖅᑕᐃᓕᒪᓂᕐᒧᑦ, ᓂᕿᒋᔭᒃᓴᓂᒃ ᐱᓯᒪᓕᖃᑦᑕᕈᓐᓇᕐᓂᕐᒥ ᐊᒻᒪᓗ ᐃᑲᔪᕈᑎᒃᓴᐅᔪᓄᑦ ᐱᔨᑦᓯᕋᕈᑎᒃᓴᐅᔪᓄᑦ ᒥᑭᒡᓕᒋᐊᕈᑎᐅᔪᓐᓇᖅᑐᓄᑦ ᐋᓐᓂᐊᖃᓕᖅᑕᐃᓕᒪᑎᑦᑎᓂᕐᒧᑦ.
ᐅᑭᐅᖏᑕ 2015 ᐊᒻᒪᓗ 2019 ᐊᑯᓐᓂᖏᓐᓂ, ᓴᖅᑭᑕᐅᓯᒪᓕᓚᐅᖅᑐᑦ ᐋᓐᓂᐊᖃᓕᖅᐸᒃᑐᓄᑦ ᖁᑦᑎᖕᓂᕆᔭᐅᔪᓄᑦ ᐳᕙᒡᓗᓕᖃᑦᑕᕐᓂᕐᒥ ᐋᓐᓂᐊᖃᓕᖅᓯᒪᔪᓄᑦ ᐃᓄᖕᓂ ᓄᓇᖃᖅᑐᓂ ᐃᓄᐃᑦ ᓄᓇᖓᓐᓂ 300-ᖏᖅᑕᕈᓐᓇᓚᐅᕐᒪᑕ ᖁᑦᑎᖕᓂᕆᔭᐅᓕᖅᓯᒪᔪᓂᑦ ᑲᓇᑕᒥ ᐃᕐᓂᖓᖑᓯᒪᓪᓗᑎᒃ ᑲᓇᑕᒥᐅᓂ, ᓄᓇᖃᖅᑳᖅᓯᒪᔫᓇᑎᒃ. ᑕᒪᓐᓇ ᓈᒻᒪᖖᒋᓪᓚᕆᒃᑑᓪᓗᓂ ᖁᑦᑎᖕᓂᕆᔭᖓ ᐳᕙᒡᓗᓕᖃᑦᑕᖅᑐᓄᑦ ᐃᓄᐃᑦ ᓄᓇᓗᒃᑖᖓᓂ ᑕᑯᒃᓴᐅᑎᑦᑎᓯᒪᕗᑦ ᐊᐅᓚᑦᓯᔾᔪᑎᐅᕙᒃᑐᑐᖃᐃᑦ ᓴᖖᒋᒃᑎᒋᐊᕈᑎᐅᓯᒪᓂᖏᑕ ᐋᓐᓂᐊᖃᓕᖅᑕᐃᓕᒪᓂᓕᕆᓂᕐᓄᑦ ᐊᒻᒪᓗ ᐃᓅᓯᓕᕆᓂᕐᒧᑦ ᑮᓇᐅᔭᓕᐅᕋᓱᐊᕈᑎᐅᕙᒃᑐᑦ ᐊᔾᔨᒌᖖᒋᑦᑐᒥᒃ ᐱᓕᕆᓂᖃᕐᕕᐅᕙᒻᓐᓂᖏᑕ ᐃᓄᐃᑦ ᐊᒻᒪᓗ ᐊᓯᖏᑕ ᑲᓇᑕᒥᐅᑕᐅᔪᑦ, ᐃᓚᖃᖅᑎᓪᓗᒋᑦ ᐃᓄᒋᐊᓗᐊᖅᓱᑎᒃ ᐃᒡᓗᒥᐅᖃᑎᒌᒃᐸᖕᓂᐅᔪᓄᑦ, ᓂᕿᒋᔭᒃᓴᒥᓐᓂᒃ ᐱᓯᒪᓕᕈᓐᓇᖃᑦᑕᖖᒋᓐᓂᕐᓄᑦ, ᑐᓗᖅᑕᕐᕕᖃᕐᓂᕐᒥᒃ ᐋᓐᓂᐊᖅᓯᐅᕐᑎᓕᕆᔾᔪᑎᓄᑦ, ᐊᒻᒪᓗ ᐊᒃᖢᓗᐊᖅᑑᓂᖏᓐᓄᑦ.
2018-ᒥ, ᑲᓇᑕᒥ ᒐᕙᒪᖓᑦ ᐊᒻᒪᓗ ᐃᓄᐃᑦ ᑕᐱᕇᑦ ᑲᓇᑕᒥ (ITK) ᐱᓕᕆᐊᖃᖃᑎᒌᖕᓂᐊᕐᓂᕐᒥᓐᓂᒃ ᓇᓗᓇᐃᖅᓯᓯᒪᓕᓚᐅᕐᒪᑕ ᓄᖑᑎᑕᐅᓯᒪᓕᖁᓪᓗᒍ ᐳᕙᒡᓗᓕᖃᑦᑕᕐᓂᕐᒥᒃ ᐋᓐᓂᐊᖃᓕᖅᐸᒃᑐᓄᑦ ᐃᓄᐃᑦ ᓄᓇᖓᓐᓂᕐᒥᐅᓂ ᓯᕗᕐᖓᓂ 2030 ᐅᑭᐅᖓᑕ. ᑲᓇᑕᒥ ᒐᕙᒪᖓᑕ ᓯᕗᓪᓕᕐᒥᒃ ᑮᓇᐅᔭᓂᒃ ᕿᑐᕐᖏᐅᖅᑎᑦᑎᓯᒪᓕᓚᐅᕐᓂᖏᑦ $27.5-ᒥᓕᐊᓐᑖᓚᓂᒃ ᐊᑐᖅᑕᐅᓚᐅᕐᒪᑕ ᐱᓕᕆᓂᖃᕐᕕᐅᔪᓄᑦ ᐸᕐᓇᐅᑎᓕᐅᕐᓂᕐᒧᑦ ᑐᕌᖓᑎᑕᐅᓯᒪᔪᓄᑦ ᐊᑐᓂᑦ ᓯᑕᒪᐅᓪᓗᑎᒃ ᐊᕕᒃᑐᖅᓯᒪᓂᕆᔭᐅᔪᓄᑦ ᐃᓄᐃᑦ ᓄᓇᖓᓐᓂ. ᐱᓕᕆᐊᒧᑦ ᐸᕐᓇᐅᑎᒋᔭᐅᓯᒪᔪᑦ ᐃᓚᖃᖅᐳᑦ ᑐᕌᕐᕕᒃᓴᐅᔪᓂᒃ ᓲᕐᓗ ᐳᕙᒡᓗᓕᕐᓯᒪᒋᐊᒃᓴᖏᓂᒃ ᖃᐅᔨᓴᐃᖃᑦᑕᕐᓂᕐᒥ ᐱᓕᕆᓂᐅᔪᓂᒃ, ᓄᓇᓕᐅᔪᒥ ᐃᑲᔪᓕᕆᐊᕈᑎᒃᓴᓂᒃ, ᐱᓕᒻᒪᒃᓴᐃᓯᒪᓕᕆᐊᒧᑦ ᓄᓇᓕᐅᔪᒥ ᐋᓐᓂᐊᖃᕐᓇᖖᒋᑦᑐᓕᕆᔨᒃᑯᓐᓄᑦ ᓴᓇᔨᓂᒃ, ᐃᓄᖕᓄᑦ ᑐᕌᖓᑎᑕᐅᓪᓗᑎᒃ ᖃᐅᔨᓴᐃᓂᐅᓕᕋᔭᖅᑐᓂᒃ ᐊᒻᒪᓗ ᖃᐅᔨᓴᒐᐅᓯᒪᓕᕐᓂᒃᓴᖏᑕ ᐊᑕᕝᕕᒋᑐᕋᐅᑦᓱᓐᓇᕐᒪᖔᑕ ᐳᕙᒡᓗᓕᖃᑦᑕᕐᓂᕐᒥᒃ ᐋᓐᓂᐊᖃᓕᖅᐸᖕᓂᐅᔪᑦ (TB) ᐊᒻᒪᓗ ᓄᕙᒡᔪᐊᕐᓇᖅ-19. ᑲᓇᑕᒥ ᒐᕙᒪᖓᑦ ᐊᑕᐃᓐᓇᖅᑐᒥᒃ ᐱᓕᕆᓂᖃᐃᓐᓇᖅᐳᑦ ᓇᓂᓯᓯᒪᓕᕆᐊᒃᓴᒥᓐᓂᒃ ᓄᑖᓂᒃ ᐱᓕᕆᓂᖃᕐᕕᐅᓕᕋᔭᖅᑐᓂᒃ ᐃᑲᔪᕈᑎᐅᓕᕐᓂᐊᕐᓗᑎᒃ ᑎᑭᓯᒪᓕᕈᑎᒃᓴᑦᑎᓐᓂᒃ ᑐᕌᕐᕕᐅᓕᖅᓯᒪᔪᓄᑦ ᓄᖑᑎᑦᑎᓯᒪᓕᕆᐊᒥᒃ ᐳᕙᒡᓗᓕᖃᑦᑕᕐᓂᕐᒥᒃ ᐋᓐᓂᐊᖃᓕᖅᐸᖕᓂᐅᔪᖅ (TB).
ᑲᔪᓰᓐᓇᖅᑎᑕᐅᔭᕆᐊᖃᕐᒪᑕ ᑮᓇᐅᔭᓂᒃ ᕿᑐᕐᖏᐅᖅᑎᑦᑎᓂᐅᔪᑦ ᓄᖅᑲᖅᑎᑕᐅᓯᒪᓕᖁᓪᓗᒍ ᐳᕙᒡᓗᓕᖃᑦᑕᕐᓂᕐᒥᒃ ᐋᓐᓂᐊᖃᓕᖅᐸᖕᓂᐅᔪᑦ ᐃᓄᐃᑦ ᓄᓇᓗᒃᑖᖓᓐᓂ. ᐃᓄᐃᑦ ᑕᐱᕇᑦ ᑲᓇᑕᒥ (ITK) ᐃᓱᒪᓕᐅᖅᓯᒪᓕᖅᑐᑦ ᐊᑕᐃᓐᓇᖅᑐᒥᒃ ᐊᒻᒪᓗ ᓈᒻᒪᒃᑐᓂᒃ ᑮᓇᐅᔭᓂᒃ ᐱᑎᑕᐅᓯᒪᖃᑦᑕᕆᐊᖃᕐᓂᖏᑕ 8-ᖑᓂᐊᖅᑐᓄᑦ ᐅᑭᐅᓄᑦ ᓄᖑᑎᑦᑎᓯᒪᓕᕈᒪᓂᐊᕈᑦᑕ ᐳᕙᒡᓗᓕᖃᑦᑕᕐᓱᑎᒃ ᐋᓐᓂᐊᖃᓕᖅᐸᒃᑐᓂᒃ ᐃᓄᐃᑦ ᓄᓇᓕᒋᔭᖏᓐᓂ. ᐱᒻᒪᕆᐅᓗᐊᖅᐳᕐᓗ, ᑲᔪᓯᑎᑦᑎᓯᒪᔭᕆᐊᖃᕐᓂᕗᑦ ᐃᒡᓗᕐᔪᐊᓕᐅᖅᐸᓪᓕᐊᓂᑦᑎᓐᓂᒃ, ᐱᐅᓂᖅᓴᑎᒍᑦ ᓂᕿᒋᔭᒃᓴᓂᒃ ᐱᓯᒪᓕᖃᑦᑕᕈᑎᐅᔪᓐᓇᖅᑐᓂᒃ ᐊᒻᒪᓗ ᐱᓕᕆᐊᖑᓯᒪᓕᖁᓪᓗᒋᑦᑕᐅᖅ ᐊᓯᖏᑦ ᐃᓕᖓᓐᓂᐅᓕᖅᓯᒪᔪᑦ ᐱᑕᖃᓕᕈᑎᐅᔪᓐᓇᖅᓱᑎᒃ ᖃᓄᐃᖖᒋᑦᓯᐊᖅᑐᓂᒃ ᐃᓄᖕᓂᒃ ᐊᒻᒪᓗ ᓄᓇᓕᒋᔭᐅᔪᓂᒃ ᐃᓄᐃᑦ ᐳᕙᒡᓗᓕᖃᑦᑕᕐᓂᕐᒥᒃ ᐋᓐᓂᐊᖃᓕᖃᑦᑕᕈᖕᓃᖅᑎᓐᓂᐊᕈᑦᑎᒍ.
ᑲᓇᑕᒥ ᒐᕙᒪᖓ ᑲᔪᓯᑎᑦᑎᓯᒪᓂᐊᖅᑐᑦ ᐱᓕᕆᐊᖃᖃᑎᖃᕐᓂᕐᒥᓐᓂᒃ ᐃᓄᖕᓂᒃ ᐱᓕᕆᐊᖃᖃᑎᒌᒃᑐᓂᒃ ᐊᒻᒪᓗ ᐋᓐᓂᐊᖅᓯᐅᕐᑎᓕᕆᔾᔪᑎᓄᑦ ᐃᖅᑲᓇᐃᔭᖅᑎᒻᒪᕆᐅᔪᓂᒃ ᐃᑲᔪᖅᑐᒐᐅᓯᒪᓕᖁᓪᓗᒋᑦ ᐃᓄᖕᓂᒃ ᓯᕗᓕᖅᑎᖃᕐᓗᑎᒃ, ᓄᓇᓕᒋᔭᐅᔪᓂ ᐳᕙᒡᓗᓕᖃᑦᑕᕐᓂᓕᕆᓂᕐᒧᑦ (TB) ᐱᓕᕆᐊᖑᓕᖅᓯᒪᔪᑦ ᐊᒻᒪᓗ ᐱᓕᕆᐊᖑᔪᑦ ᓯᕗᓪᓕᖅᐸᐅᑎᑦᑎᓯᒪᓪᓗᑎᒃ ᐱᐅᓯᑐᖃᒃᑯᑦ ᖃᓄᐃᖖᒋᑦᓯᐊᖅᑎᑦᓯᒋᐊᕐᓂᕐᒧᑦ, ᐱᐅᓯᑐᖃᒥ ᖃᐅᔨᒪᔭᐅᔪᓂᒃ ᐊᒻᒪᓗ ᐱᓕᕆᔾᔪᓯᐅᕙᒃᑐᓂᒃ, ᐊᒻᒪᓗ ᓇᖕᒥᓂᖅ ᐃᓱᒪᓕᐅᕈᑎᓕᐅᕈᓐᓇᕐᓂᕐᓂᒃ.
ᓯᓚᕐᔪᐊᓕᒫᒥ ᐳᕙᒡᓗᓕᖃᑦᑕᕐᓂᕐᒥᒃ ᐋᓐᓂᐊᖃᓕᖅᐸᒃᑐᑦ ᐅᓪᓗᖓᓂ, ᓇᓗᓇᐃᖅᓯᕗᒍᑦ ᑲᔪᓯᑎᑦᑎᓂᐊᕐᓂᑦᑎᓐᓂᒃ ᐱᓕᕆᐊᕆᔭᑦᑎᓐᓂᒃ ᐱᓯᒪᓕᕈᑎᐅᓇᖅᑐᓂᒃ ᐋᓐᓂᐊᖅᓯᐅᕐᑎᓕᕆᓂᕐᒥ ᐱᓕᕆᓂᐅᔪᑦ ᓇᓕᖅᑲᕇᒃᑎᑕᐅᓕᖁᓪᓗᒋᑦ ᑭᒃᑯᑐᐃᓐᓇᐃᑦ ᐋᓐᓂᐊᖅᓯᐅᕐᑎᓕᕆᓂᖏᓐᓂ ᐃᓄᖕᓄᑦ, ᐊᒻᒪᓗ ᐃᓕᔭᐅᓯᒪᓕᕐᓂᒃᓴᖏᑕ ᐱᔭᐅᓯᒪᔭᕆᐊᖃᖅᑐᑦ ᑮᓇᐅᔭᑎᒍᑦ ᐃᑲᔪᕈᒃᓴᐃᑦ ᐃᓕᑕᕆᔭᐅᓯᒪᓕᖁᓪᓗᒋᑦ ᐱᓕᕆᐊᒃᓴᕆᓕᖅᓯᒪᔭᕗᑦ ᓄᖑᑎᑕᐅᓯᒪᓕᖁᓪᓗᒍ ᐳᕙᒡᓗᓕᖃᑦᑕᕐᓂᕐᒥᒃ ᐋᓐᓂᐊᖃᓕᕐᓂᐅᕙᒃᑐᓄᑦ (TB) ᐃᓄᐃᑦ ᓄᓇᖓᓐᓂ ᑎᑭᐅᑎᓚᐅᖅᑳᕐᑎᓐᓇᑕ 2030 ᐅᑭᐅᖓᓄᑦ, ᐊᒻᒪᓗ ᑲᔪᓰᓐᓇᖅᑎᑕᐅᓯᒪᖁᓪᓗᒍ ᓄᖑᑎᑕᐅᓯᒪᓕᕐᓂᖓ ᑭᖑᓂᐊᓂ.”