ᓄᕕᐱᕆ 2, 2022 – ᐋᑐᕙ, ᐋᓐᑎᐊᕆᐅ – ᑲᓇᑕᒥ ᐋᓐᓂᐊᖃᖅᑕᐃᓕᒪᔪᓕᕆᓂᕐᒧᑦ ᖃᐅᔨᓴᖅᑏᑦ ᐃᖅᑲᓇᐃᔭᕐᕕᖏᑦ
ᑲᓇᑕᒥ 70,000-ᓗᐊᖑᖕᒪᑕ ᐃᓄᐃᑦ ᓄᓇᓕᖃᖅᖢᑎᒃ 51-ᓂ ᓄᓇᓕᐅᔪᓂ ᐃᓄᐃᑦ ᓄᓇᑐᖃᖓᓐᓂ ᖃᐅᔨᒪᔭᐅᓪᓗᓂ ᐃᓄᐃᑦ ᓄᓇᒋᖕᒪᒍ. ᐃᓄᖕᓄᑦ, ᐋᓐᓂᐊᖃᖅᑕᐃᓕᒪᓂᖅ ᐊᑕᕝᕕᖃᐅᕐᒪᑦ ᐆᒪᔪᖁᑎᐅᔪᓄᑦ, ᐊᕙᑎᐅᔪᒧᑦ, ᐱᐅᓯᑐᖃᖓᓐᓄᑦ ᐊᒻᒪᓗ ᐊᓯᖏᓐᓄᑦ ᐃᓅᖃᑎᒌᒃᑐᑦ ᐋᓐᓂᐊᖃᓕᖅᑕᐃᓕᒪᓂᕆᕙᒃᑕᖏᓐᓄᑦ. ᐃᓄᐃᑦ ᐱᐅᓂᖅᐹᑎᒍᑦ ᓇᓗᓇᐃᖅᓯᔨᐅᔪᖕᓇᕐᒪᑕ ᖃᐅᔨᓴᐃᕙᓐᓂᕐᒥ ᓯᕗᓪᓕᖅᐸᐅᑎᑕᒃᓴᐅᖁᔭᐅᔪᓂᒃ ᐊᒻᒪᓗ ᖃᐅᔨᓴᐃᓂᕐᒥ ᐱᓕᕆᐊᖃᖅᑎᐅᔪᓐᓇᕐᓂᖅᓴᐅᓪᓗᑎᒃ ᐱᓕᕆᐊᖃᕐᓂᐊᕐᓂᕐᓂ ᓄᓇᓕᒋᔭᒥᓐᓂᑦ ᐱᔭᐅᓯᒪᓕᕆᐊᖃᖅᑐᓂᒃ ᐊᒻᒪᓗ ᐅᐱᒍᓱᑦᓯᐊᕈᓐᓇᖅᖢᑎᒃ ᐱᔪᓐᓇᐅᑎᖃᕐᓂᖏᓐᓂᒃ.
ᑲᓇᑕᒥ ᒐᕙᒪᖓᑦ ᐃᓗᐃᒃᑲᐅᑎᑦᓯᓗᑎᒃ ᐱᓕᕆᐊᖃᕈᓐᓇᕐᒪᑕ ᓯᕗᒻᒧᒃᑎᑦᓯᒋᐊᕐᓂᒃᓴᒥᒃ ᓴᐃᒻᒪᖃᑎᒌᒃᓯᒪᓕᕋᔭᕐᓂᕐᒧᑦ, ᓴᖖᒋᒃᑎᑦᓯᒋᐊᖅᑎᐅᓂᕐᒧᑦ ᐃᓄᐃᑦ-ᒐᕙᒪᑐᖃᒃᑯᑦ ᐱᓕᕆᐊᖃᖃᑎᒌᖕᓂᖏᓐᓂᒃ, ᐊᑐᓕᖅᑎᑦᓯᓂᕐᒧᑦ ᐃᓄᐃᑦ ᓄᓇᖓᓐᓂ ᒪᓕᒐᖁᑎᐅᔪᓂᒃ ᐊᒻᒪᓗ ᐱᑕᖃᓕᖅᑎᑦᓯᒋᐊᒧᑦ ᐊᒃᖢᐃᑦᑑᓂᖅᓴᐅᓗᑎᒃ ᐃᓄᐃᑦ ᓄᓇᒋᔭᖃᓕᕐᓂᒃᓴᖓᓐᓄᑦ ᒥᒃᓯᖃᑦᓯᐊᖅᑐᑎᒍᑦ ᑲᑐᔾᔨᓂᖃᕐᓗᑎᒃ ᐱᓕᕆᐊᖃᓕᕐᓂᖅᑎᒍᑦ. ᑕᐃᒪᖖᒐᓂᑦ 2017-ᒥᑦ, ᐱᓕᕆᖃᑎᖃᖅᓯᒪᓕᕋᑦᑕ ᐃᓄᐃᑦ ᑕᐱᕇᒃᑯᓐᓂᒃ ᑲᓇᑕᒥ (ITK) ᐊᒻᒪᓗ ᐊᓯᖏᓂᒃ ᐃᓄᐃᑦ ᑲᑐᔾᔨᖃᑎᒌᖏᓐᓂᒃ ᐃᓄᐃᑦ-ᒐᕙᒪᑐᖃᒃᑯᑦ ᐱᓕᕆᐊᖃᖃᑎᒌᖕᓂᖏᓐᓄᑦ ᑲᑎᒪᔨᕋᓛᑎᒍᑦ ᐱᒻᒪᕆᐅᔪᑎᒍᑦ ᓯᕗᒻᒧᒋᐊᖅᓯᒪᓕᖁᓪᓗᒋᑦ ᐃᓄᐃᑦ ᓇᖕᒥᓂᖅ ᐃᓱᒪᓕᐅᕈᑎᓕᐅᕈᓐᓇᕐᓂᖏᑦ ᐊᒻᒪᓗ ᐃᑲᔪᖅᑐᐃᓯᒪᓗᑎᒃ ᐃᓄᖕᓂᒃ ᓯᕗᓕᖅᑎᖃᕐᓗᑎᒃ ᐋᖅᑭᒋᐊᕈᑎᒃᓴᐅᔪᓂᒃ ᓇᓗᓇᐃᑦᑐᒥᒃ ᐱᕙᓪᓕᐊᔪᓕᕆᓂᐅᔪᓄᑦ ᐊᒻᒪᓗ ᐱᔭᕆᑐᔫᓪᓗᑎᒃ ᐱᓕᕆᐊᒃᓴᕆᔭᖏᓐᓄᑦ ᐃᓄᐃᑦ.
ᐅᓪᓗᒥ, ᒥᓂᔅᑕ ᔮᓐ-ᐄᕝ ᑑᒃᓛᔅ, ᐋᓐᓂᐊᖅᓯᐅᕐᑎᓕᕆᔨᒃᑯᓐᓄᑦ ᒥᓂᔅᑕᒋᔭᐅᔪᖅ, ᐊᒻᒪᓗ ᓇᑖᓐ ᐆᐱᑦ, ᐊᖏᔪᖅᑳᖅ ᐃᓄᐃᑦ ᑕᐱᕇᑦ ᑲᓇᑕᒥ, ᑐᓴᖅᑎᑦᓯᓚᐅᖅᐳᒃ ᑮᓇᐅᔭᖁᑎᖃᖅᑎᑦᓯᓂᐊᕐᓂᕐᒧᑦ $6.4-ᒥᓕᐊᓐᑖᓚᓂᒃ ᐱᒋᐊᕈᑎᒃᓴᐅᓂᐊᖅᓱᑎᒃ ᐃᓄᐃᑦ ᖃᐅᔨᓴᐃᓂᕐᒥ ᐱᓕᕆᐊᖃᖃᑎᒌᖑᓕᕐᓂᐊᖅᑐᓂᒃ. ᑖᒃᑯᐊ ᑮᓇᐅᔭᐃᑦ, ᐱᑕᖃᖅᑎᑕᐅᓯᒪᔪᑦ ᑲᓇᑕᒥ ᐋᓐᓂᐊᖃᕐᓇᖖᒋᑦᑐᓕᕆᓂᕐᒧᑦ ᖃᐅᔨᓴᖅᑏᑦ ᐃᖅᑲᓇᐃᔭᕐᕕᐅᔪᑎᒍᑦ (CIHR), ᓴᖖᒋᒃᑎᒋᐊᕈᑎᐅᓂᐊᕐᐳᑦ ᐱᓕᕆᐊᖃᖅᑎᐅᔪᓐᓇᕐᓂᐅᔪᓂᒃ ᐃᓄᖕᓂᒃ ᓯᕗᓕᖅᑎᖃᕐᓗᑎᒃ ᖃᐅᔨᓴᐃᓂᐅᕙᒃᑐᓄᑦ ᐊᒻᒪᓗ ᐃᑲᔪᖅᑐᐃᓂᕐᒥ ᑕᐃᒪᐅᓕᐊᓂᒃᖢᑎᒃ ᐊᒻᒪᓗ ᓄᑖᑎᒍᑦ ᖃᐅᔨᓴᐃᓂᕐᒥ ᐱᓕᕆᐊᖑᓕᕈᒪᔪᓂᒃ ᐱᓕᕆᐊᖑᓯᒪᓕᖁᓪᓗᒋᑦ ᐃᓄᐃᑦ ᐱᓯᒪᓕᕆᐊᖃᖅᑕᖏᑦ ᐊᒻᒪᓗ ᐊᑐᓕᖅᑎᑦᓯᓂᕐᒥ ᒐᕙᒪᐅᔪᓂ ᐃᓱᒪᑕᒻᒪᕆᐅᔪᓄᑦ ᐊᑦᑕᑕᖅᓯᒪᓕᕆᐊᖃᕐᓂᐅᔪᑦ.
ᐃᓄᐃᑦ ᖃᐅᔨᓴᐃᓂᕐᒥ ᐱᓕᕆᐊᖃᖃᑎᒌᓂᒃ ᐱᒋᐊᕈᑎᒃᓴᐅᓪᓗᑎᒃ ᑮᓇᐅᔭᐃᑦ ᐃᑲᔪᕈᑎᓂᐊᖅᐳᑦ ᐊᑐᓕᖅᑎᑦᓯᓂᕐᒧᑦ ᐃᓄᐃᑦ ᑕᐱᕇᑦ ᑲᓇᑕᒥ (ITK) ᑲᓇᑕᒥ ᐃᓄᐃᑦ ᖃᐅᔨᓴᐃᓂᓕᕆᓂᕐᒥ ᐸᕐᓇᐅᑎᖏᓐᓂᒃ, ᑐᕌᕐᕕᒃᓴᖃᖅᑎᑕᐅᔪᓄᑦ ᐱᐅᓯᒋᐊᖅᑎᑦᓯᓯᒪᓕᕋᔭᕐᓂᕐᒥᒃ ᐃᓄᐃᑦ ᐱᓕᕆᐊᖃᖅᑎᐅᔪᓐᓇᕐᓂᖏᓂᒃ, ᖃᐅᔨᒪᓂᖏᓂᒃ ᐊᒻᒪᓗ ᓇᖕᒥᓂᖅ ᐃᓱᒪᓕᐅᕈᑎᓕᐅᕈᓐᓇᖅᑑᓂᖏᓐᓂᒃ ᖃᐅᔨᓴᐃᓂᐅᕙᒃᑐᓄᑦ, ᐱᔾᔪᑎᒋᓗᐊᖅᖢᒋᑦ ᐃᓄᐃᑦ ᐋᓐᓂᐊᖃᓕᖅᑕᐃᓕᒪᔪᓕᕆᓂᖏᑦ ᐊᒻᒪᓗ ᖃᓄᐃᖖᒋᑦᓯᐊᕈᓐᓇᕐᓂᖏᑦ, ᐃᓄᐃᑦ ᓄᓇᖓᑕ ᐃᓗᐊᓂ ᓯᓚᑖᓂᓗ.
ᑖᒃᑯᐊ ᑮᓇᐅᔭᖁᑎᒃᓴᐅᔪᑦ ᕿᑐᕐᖏᐅᖅᑎᑕᐅᕗᑦ ᓯᑕᒪᐅᓪᓗᑎᒃ ᐃᓄᐃᑦ ᐊᕕᒃᑐᖅᓯᒪᓂᖏᓐᓄᑦ ᐊᒻᒪᓗ ᓄᓇᓕᕆᓂᕐᒥ ᑲᑐᔾᔨᖃᑎᒌᒋᔭᐅᔪᓄᑦ, ᐃᓄᕕᐊᓗᐃᑦ ᐊᕕᒃᑐᖅᓯᒪᓂᕐᒥ ᑯᐊᐳᕇᓴᖓᓐᓄᑦ, ᓄᓇᕗᑦ ᑐᖖᒐᕕᒃ ᑎᒥᖁᑎᖓᓐᓄᑦ, ᒪᑭᕕᒃ ᑯᐊᐳᕇᓴᖓᓐᓄᑦ ᐊᒻᒪᓗ ᓄᓇᑦᓯᐊᕗᑦ ᒐᕙᒪᖓᓐᓄᑦ, ᑐᑭᒧᐊᒍᑎᒃᓴᐅᓂᐊᖅᖢᑎᒃ ᖃᐅᔨᓴᐃᓂᐅᕙᒃᑐᓄᑦ ᓴᖖᒋᑦᑎᒋᐊᖅᑎᑕᐅᓯᒪᓕᖁᓪᓗᒋᑦ ᐃᓄᐃᑦ ᐋᓐᓂᐊᖃᕐᓇᖖᒋᑦᑐᓕᕆᓂᖏᑦ.
ᐅᖃᖅᑕᐅᓯᒪᔪᑦ
“ᑲᔪᓯᑎᑦᓯᓯᒪᑎᓪᓗᑕ ᐱᓕᕆᐊᖃᖃᑎᒌᖕᓂᑦᑎᓐᓂᒃ ᐃᓄᐃᑦ ᑕᐱᕇᒃᑯᓐᓂᒃ ᑲᓇᑕᒥ ᐊᒻᒪᓗ ᑲᓇᑕᒥ ᐃᓄᖏᓐᓂᒃ, ᓱᓕ ᐃᑲᔪᖅᑐᐃᓂᑦᑎᓐᓂᒃ ᐊᒻᒪᓗ ᐅᐱᒍᓱᑦᓯᐊᕐᓂᑦᑎᓐᓂᒃ ᐃᓄᐃᑦ ᓇᖕᒥᓂᖅ ᐃᓱᒪᓕᐅᕈᑎᓕᐅᕈᓐᓇᕐᓂᖏᓂᒃ ᐋᓐᓂᐊᖃᕐᓇᖖᒋᑦᑐᓕᕆᓂᕐᒥ ᖃᐅᔨᓴᐃᓂᐅᕙᒃᑐᓄᑦ ᐱᓕᕆᐊᒃᓴᖃᕋᑦᑕ. ᑖᒃᑯᐊ ᓄᑖᖑᓪᓗᑎᒃ ᖃᐅᔨᓴᐃᓂᐅᕙᒃᑐᓄᑦ ᐱᓕᕆᐊᖃᖃᑎᒌᑦ ᐃᑲᔪᖅᑐᐃᔨᐅᓂᐊᕐᒪᑕ ᐃᓄᖕᓂᒃ ᓯᕗᓕᖅᑎᖃᕐᓗᑎᒃ ᖃᐅᔨᓴᐃᓂᐅᕙᒃᑐᓄᑦ ᐊᒻᒪᓗ ᖃᐅᔨᒪᓂᐅᔪᓂᒃ ᐊᒥᖅᑲᕈᑎᖃᖃᑦᑕᕐᓂᕐᓄᑦ ᐃᑲᔪᕈᑎᐅᓂᐊᕐᓗᑎᒃ ᐱᐅᓯᒋᖅᑎᑦᓯᓂᒃᓴᒧᑦ ᐃᓄᐃᑦ ᐋᓐᓂᐊᖃᓕᖅᑕᐃᓕᒪᕙᓐᓂᖏᓐᓄᑦ ᐊᒻᒪᓗ ᖃᓄᐃᖖᒋᑦᓯᐊᕐᓂᓕᕆᓂᖏᓐᓄᑦ ᑲᓇᑕᒥ ᓴᖖᒋᒃᑎᑦᓯᒋᐊᕐᓗᑎᒃᓗ ᐊᑯᓃᖅᑐᒧᑦ ᐱᓕᕆᐊᖃᖅᑎᐅᔪᓐᓇᕐᓂᕐᓂᒃ ᐃᓄᖕᓂᒃ ᓯᕗᓕᖅᑎᖃᕐᓗᑎᒃ ᖃᐅᔨᓴᐃᓂᐅᕙᒃᑐᓄᑦ ᐊᒻᒪᓗ ᖃᐅᔨᒪᓂᐅᔪᓂᒃ ᐱᓕᕆᓂᖃᓕᖅᑎᑦᓯᒋᐊᕐᓂᕐᒥᒃ ᑕᒪᐃᓐ ᐃᓱᒪᑕᒻᒪᕆᐅᓪᓗᑎᒃ ᐃᖅᑲᓇᐃᔭᕐᕕᐅᔪᓂ.”
ᒥᓂᔅᑕ ᔮᓐ-ᐄᕝ ᑑᒃᓚᔅ
ᐋᓐᓂᐊᖅᓯᐅᖅᑎᓕᕆᔨᒃᑯᓐᓄᑦ ᒥᓂᔅᑕᒋᔭᐅᔪᖅ
“ᐃᓄᐃᑦ ᑕᐱᕇᒃᑯᓐᓂ ᑲᓇᑕᒥ (ITK), ᐃᓕᑕᕆᔭᐅᓯᒪᒻᒪᑕ ᐱᒻᒪᕆᐅᑎᐅᓪᓗᑎᒃ ᐱᓕᕆᐊᖑᕙᒍᓐᓇᕐᒪᑕ ᖃᐅᔨᓴᕐᓂᐅᕙᒃᑐᑦ ᑐᑭᓯᐅᒪᓕᕆᐊᕐᓂᑦᑎᓐᓂᒃ ᐱᔭᐅᓯᒪᓕᕆᐊᖃᖅᑐᓂᒃ ᐊᒻᒪᓗ ᐱᕈᖅᑎᑦᓯᔾᕙᓪᓕᐊᓂᕐᓄᑦ ᓴᖖᒋᒃᑎᑦᓯᒋᐊᕐᓂᕐᓄᑦ ᓄᓇᓕᒋᔭᐅᔪᓂᒃ. ᑖᒃᑯᑎᒎᓇᖅ ᑮᓇᐅᔭᖁᑎᒃᓴᐅᔪᑎᒍᑦ ᐋᖅᑭᒃᓱᐃᓯᒪᓕᕈᓐᓇᕐᓂᐊᕋᑦᑕ ᓄᑖᓂᒃ ᐱᓕᕆᓂᖃᕐᓂᐅᓕᕈᓐᓇᖅᑐᓂᒃ ᖃᓄᖅ ᖃᐅᔨᓴᐃᓂᐅᕙᒃᑐᑦ ᐱᓕᕆᐊᖑᕙᒋᐊᖃᕐᓂᖏᓐᓄᑦ ᐃᓄᐃᑦ ᓄᓇᖓᓐᓂ, ᐊᒻᒪᓗ ᖁᕕᐊᓱᓪᓚᕆᒃᑐᒍᑦ ᐱᕈᖅᑎᑕᐅᕙᓪᓕᐊᓂᖏᓐᓂ ᑐᑭᒧᐊᒃᑎᑦᓯᔨᐅᔪᓐᓇᕆᐊᑦᑎᓐᓂᒃ.”
ᓇᑖᓐ ᐆᐱᑦ
ᐊᖏᔪᖅᑳᖅ, ᐃᓄᐃᑦ ᑕᐱᕇᑦ ᑲᓇᑕᒥ
“ᑲᓇᑕᒥ ᐋᓐᓂᐊᖃᕐᓇᖖᒋᑦᑐᓕᕆᓂᕐᒧᑦ ᖃᐅᔨᓴᖅᑏᑦ (CIHR) ᓴᕆᒪᒍᓱᒃᐳᑦ ᐱᓕᕆᖃᑎᖃᕐᓂᐊᕐᓂᕐᒥᓐᓂᒃ ᐃᓄᐃᑦ ᑕᐱᕇᒃᑯᓐᓂᒃ ᑲᓇᑕᒥ ᑖᒃᑯᐊ ᑲᓇᑕᒥ ᐃᓄᐃᑦ ᖃᐅᔨᓴᐃᕙᓐᓂᕐᓄᑦ ᐸᕐᓇᐅᑏᑦ ᐆᒻᒪᖅᑎᑕᐅᓯᒪᓕᖁᓪᓗᒋᑦ ᑖᒃᑯᑎᒎᓇᖅ ᖁᕕᐊᓇᖅᑑᓪᓗᑎᒃ ᐱᑕᖃᓕᖅᑎᑕᐅᓂᖏᑕ ᐃᓄᐃᑦ ᖃᐅᔨᓴᐃᕙᓐᓂᕐᓂ ᐱᓕᕆᐊᖃᖃᑎᒌᑦ ᑮᓇᐅᔭᖁᑎᒃᓴᑎᒍᑦ. ᖃᐅᔨᓴᐃᓂᐅᕙᒃᑐᑦ ᓯᕗᓕᖅᑎᖃᖅᓱᑎᒃ ᐃᓄᖕᓂᒃ, ᐃᓄᖕᓄᑦ ᐅᖃᖅᑕᐅᓯᒪᔪᓂᒃ ᓴᖅᑭᑕᐅᓯᒪᓕᕐᓂᐊᕐᒪᑕ ᐱᓕᕆᐊᖑᓕᕐᓂᖏᑎᒍᑦ ᐃᓄᐃᑦ ᖃᐅᔨᓴᐃᕙᓐᓂᕐᓄᑦ ᓯᕗᓪᓕᖅᐸᐅᑎᑕᐅᖁᔭᐅᔪᓂᒃ ᐊᒻᒪᓗ ᐊᐅᓚᔾᔭᐃᒋᐊᕈᑎᐅᓂᐊᕐᓗᑎᒃ ᓈᒻᒪᑦᓯᐊᖅᑐᑎᒍᑦ ᐊᓯᔾᔩᓯᒪᓕᕈᑎᐅᓇᔭᖅᑐᓄᑦ ᐃᓄᐃᑦ ᐃᓚᒌᖑᔪᓄᑦ ᐊᒻᒪᓗ ᓄᓇᓕᒋᔭᐅᔪᓄᑦ. ᐱᓕᕆᓂᐅᓕᕋᔭᖅᑐᓄᑦ ᓇᓗᓇᐃᖅᓯᔾᔪᑎᐅᒻᒪᑕ CIHR-ᑯᑦ ᐱᓕᕆᐊᖃᓕᕐᓂᐊᕐᓂᖏᓐᓄᑦ ᐊᑐᓕᖅᑎᑦᓯᓯᒪᓂᐊᕐᓂᕐᒥᓐᓂ ᓯᕗᓪᓕᖅᐸᐅᑎᑕᒃᓴᖁᑎᑦ C-ᖏᓂᒃ ᐱᓕᕆᐊᖑᓕᕈᒪᔪᓄᑦ ᐸᕐᓇᐅᑎᓕᐊᕆᓯᒪᔭᑦᑎᓐᓂ “ᓱᒃᑲᓕᕆᐊᖅᑎᑕᐅᓯᒪᓕᖁᓪᓗᒋᑦ ᓇᖕᒥᓂᖅ ᐃᓱᒪᓕᐅᕈᑎᓕᐅᕈᓐᓇᖅᑑᓂᖏᑦ ᓄᓇᖃᖅᑳᖅᓯᒪᔪᐃᑦ ᐋᓐᓂᐊᖃᕐᓇᖖᒋᑦᑐᓕᕆᓂᕐᒥ ᖃᐅᔨᓴᐃᓂᐅᕙᒃᑐᓄᑦ”.
ᓘᑦᑖᖅ ᒪᐃᑯᓪ ᔨ. ᓯᑐᕌᖕ
ᐊᖏᔪᖅᑳᖅ, ᑲᓇᑕᒥ ᐋᓐᓂᐊᖃᖅᑕᐃᓕᒪᔪᓕᕆᓂᕐᒧᑦ ᖃᐅᔨᓴᖅᑏᑦ ᐃᖅᑲᓇᐃᔭᕐᕕᖏᑦ
ᖃᓄᐃᓪᓚᕆᖕᓂᐅᔪᑦ
- ᐃᓄᐃᑦ ᑕᐱᕇᑦ ᑲᓇᑕᒥ (ITK) ᑲᓇᑕᓕᒫᒥ ᐱᔾᔪᑎᖃᖅᑎᒋᔭᐅᔫᓪᓗᑎᒃ ᑎᒥᒋᔭᐅᒻᒪᑕ ᐱᓕᕆᐊᒃᓴᖃᖅᑎᑕᐅᓯᒪᓪᓗᑎᒃ ᒥᐊᓂᖅᓯᔨᐅᓂᕐᒧᑦ ᐊᒻᒪᓗ ᓯᕗᒻᒧᒋᐊᖅᑎᑦᓯᔨᐅᓂᕐᒧᑦ ᐃᓄᐃᑦ ᐱᔪᓐᓇᐅᑎᒋᔭᖏᓐᓂᒃ ᐊᒻᒪᓗ ᐱᓯᒪᓕᕈᒪᔭᖏᓐᓂᒃ ᑲᓇᑕᒥ.
- 2018-ᒥ ᐃᓄᐃᑦ ᑕᐱᕇᑦ ᑲᓇᑕᒥ (ITK) ᓴᖅᑮᓚᐅᕐᒪᑕ ᑲᓇᑕᒥ ᐃᓄᐃᑦ ᖃᐅᔨᓴᐃᓂᐅᕙᒃᑐᓄᑦ ᐸᕐᓇᐅᑎᓂᒃ (NSIR) ᓇᓗᓇᐃᔭᐃᓯᒪᔪᓂᒃ ᐱᓕᕆᐊᖃᖃᑎᒌᖕᓂᐅᔪᓄᑦ ᐊᒻᒪᓗ ᐱᓕᕆᐊᒃᓴᓂᒃ ᓴᖖᒋᒃᑎᑕᐅᓯᒪᓕᖁᓪᓗᒋᑦ ᐊᒃᑐᐃᓂᐅᕙᒃᑐᓄᑦ, ᐊᔪᖖᒋᑦᓯᐊᕐᓂᐅᔪᓄᑦ, ᐊᒻᒪᓗ ᐊᑐᕐᓂᖃᕐᓂᖏᓐᓄᑦ ᐃᓄᐃᑦ ᓄᓇᖓᓐᓂ ᖃᐅᔨᓴᐃᓂᐅᕙᒃᑐᓄᑦ ᐱᔾᔪᑎᒋᓪᓗᒋᑦ ᐃᓄᐃᑦ.
- ᐃᓄᐃᑦ ᑕᐱᕇᑦ ᑲᓇᑕᒥ (ITK) ᐋᖅᑭᒃᓱᐃᓯᒪᓕᓚᐅᕐᒪᑕ ᐅᑭᐅᓄᑦ ᑕᓪᓕᒪᓄᑦ (5) ᐱᓕᕆᐊᖑᓕᕈᒪᓪᓗᑎᒃ ᐸᕐᓇᐅᑎᓂᒃ ᐋᖅᑭᒃᓱᐃᖃᑎᒋᓪᓗᒋᑦ CIHR-ᑯᑦ ᑐᑭᒧᐊᒍᑎᒃᓴᓂᒃ ᐊᑐᓕᖅᑎᑦᓯᕙᓪᓕᐊᓂᕐᓂ ᑲᓇᑕᒥ ᐃᓄᐃᑦ ᖃᐅᔨᓴᐃᓂᐅᕙᒃᑐᓄᑦ ᐸᕐᓇᐅᑎᓂᒃ (NSIR). ᐱᔾᔪᑎᐅᓗᐊᖅᑐᓄᑦ ᐃᓚᒋᔭᐅᖃᑕᐅᓪᓗᓂ ᐱᓕᕆᐊᖑᓕᕈᒪᓪᓗᑎᒃ ᐸᕐᓇᐅᑎᓄᑦ ᑐᕌᖓᕗᑦ ᐱᒋᐊᖅᑎᑦᑎᓯᒪᓕᕋᔭᕐᓂᕐᒥᒃ ᐃᓄᐃᑦ ᖃᐅᔨᓴᐃᓂᐅᕙᒃᑐᓄᑦ ᐱᓕᕆᐊᖃᖃᑎᒌᓂᒃ, ᐃᑲᔪᖅᑐᒐᐅᓯᒪᓂᐊᖅᑐᓂᑦ ᑮᓇᐅᔭᖁᑎᒃᓴᖃᓕᖅᑎᑦᓯᓂᒃᑯᑦ $6.4-ᒥᓕᐊᓐᑖᓚᓂᒃ CIHR-ᑯᓐᓂᑦ.
ᐊᓯᖏᑦ ᐱᑐᒃᓯᒪᓕᕐᕕᒃᓴᐃᑦ
- Inuit Tapiriit Kanatami (ᐃᓄᐃᑦ ᑕᐱᕇᑦ ᑲᓇᑕᒥ)
- National Inuit Strategy on Research (ᑲᓇᑕᒥ ᐃᓄᐃᑦ ᖃᐅᔨᓴᐃᓂᐅᕙᒃᑐᓄᑦ ᐸᕐᓇᐅᑎᖏᑦ)
- ITK and CIHR leadership renew commitment to improving health outcomes in Inuit communities (ᐃᓄᐃᑦ ᑕᐱᕇᒃᑯᑦ ᑲᓇᑕᒥ (ITK) ᐊᒻᒪᓗ ᑲᓇᑕᒥ ᐋᓐᓂᐊᖃᕐᓇᖖᒋᑦᑐᓕᕆᓂᕐᒧᑦ ᖃᐅᔨᓴᖅᑏᑦ (CIHR) ᓯᕗᓕᖅᑎᐅᓂᖏᑦ ᓄᑕᐅᓕᖅᑎᑕᐅᓂᖏᑕ ᐱᓕᕆᐊᒃᓴᕆᔭᖏᑦ ᐱᐅᓯᒋᐊᖅᑎᑕᐅᓯᒪᓕᖁᓪᓗᒋᑦ ᐋᓐᓂᐊᖃᕐᓇᖖᒋᑦᑐᓕᕆᓂᐅᔪᓄᑦ ᖃᓄᐃᓕᖓᓂᐅᔪᑦ ᐃᓄᐃᑦ ᓄᓇᓕᖏᓐᓂ)
- CIHR Strategic Plan 2021-2031 (ᑲᓇᑕᒥ ᐋᓐᓂᐊᖃᕐᓇᖖᒋᑦᑐᓕᕆᓂᕐᒧᑦ ᖃᐅᔨᓴᖅᑏᑦ (CIHR) ᐱᓕᕆᐊᖑᓕᕈᒪᔪᓄᑦ ᐸᕐᓇᐅᑎᖏᑦ 2021-2031)
ᖃᐅᔨᒋᐊᕐᕕᐅᔪᓐᓇᖅᑐᑦ
ᒧᕇ-ᕗᕌᓐᔅ ᐳᕉᓪ (Marie-France Proulx)
ᑐᓴᒐᒃᓴᓕᕆᔨᓂ ᑎᑎᕋᖅᑎ
ᒥᓂᔅᑕ ᔮᓐ-ᐄᕝ ᑑᒃᓚᔅ ᐊᓪᓚᕝᕕᖓᓂᑦ
ᐋᓐᓂᐊᖃᕐᓇᖖᒋᑦᑐᓕᕆᔨᒃᑯᓐᓄᑦ ᒥᓂᔅᑕ
613-957-0200
ᑐᓴᒐᒃᓴᓕᕆᔨᒃᑯᑦ
ᐃᓄᐃᑦ ᑕᐱᕇᑦ ᑲᓇᑕᒥ
[email protected]
ᑐᓴᒐᒃᓴᓕᕆᔨᒃᑯᑦ
ᑲᓇᑕᒥ ᐋᓐᓂᐊᖃᕐᓇᖖᒋᑦᑐᓕᕆᓂᕐᒧᑦ ᖃᐅᔨᓴᖅᑏᑦ (CIHR)
[email protected]