Skip to main content
ᑐᓴᖅᑎᑦᓯᔾᔪᑏᑦ

ᒐᕙᒪᑐᖃᒃᑯᑦ ᐃᖅᑲᖅᑐᐃᕕᖓᑦ ᐅᖃᖅᑐᖅ NCC-ᑯᑦ ᐊᒻᒪᓗ ᑲᓇᑕᐅᑉ ᒐᕙᒪᖓᑕ ᑐᑭᓯᐅᒪᑐᕋᐅᓐᓂᕐᒧᑦ ᑎᑎᖅᑲᖁᑎᖏᑦ (MOU) ᐃᓱᒪᓕᐅᕈᑎᐅᖖᒋᒻᒪᑕ ᐊᕕᒃᑐᖅᓯᒪᔪᑦ 35-ᒥ ᐱᔪᓐᓇᐅᑎᓂ

ᔫᓂ 14, 2024 – ᐋᑐᕙ, ᐋᓐᑎᐊᕆᐅ

ᒐᕙᒪᑐᖃᒃᑯᑦ ᐃᖅᑲᖅᑐᐃᕕᖓᑦ ᐋᖅᑮᓯᒪᓕᓚᐅᖅᑐᑦ ᐃᖅᑲᖅᑐᐃᓂᕐᒥᓐᓂ ᔫᓂ 12-ᖑᑎᓪᓗᒍ ᑖᒃᑯᐊ ᑐᑭᓯᐅᒪᑐᕋᐅᓐᓂᕐᒧᑦ ᑎᑎᖅᑲᖁᑎᖏᑦ ᐊᑎᓕᐅᖅᑕᐅᓯᒪᔪᐃᑦ ᓄᓇᑐᖃᕗᑦ ᑲᑎᒪᔨᒃᑯᖏᓐᓄᑦ (NCC) ᐊᒻᒪᓗ ᒐᕙᒪᑐᖃᒃᑯᓐᓂᑦ ᒥᓂᔅᑕᕆᔭᐅᔪᒧᑦ ᒐᕙᒪᓕᕆᔨᒃᑯᑦ-ᓄᓇᖃᖅᑳᕐᓯᒪᔪᓕᕆᔨᒃᑯᓐᓄᓪᓗ ᐋᖅᑮᓯᒪᓕᕈᑎᐅᖖᒋᒻᒪᑕ ᓄᓇᖃᖅᑳᖅᓯᒪᔪᓄᑦ ᐱᔪᓐᓇᐅᑎᖃᕐᓂᕐᒥᓐᓂᒃ ᓲᕐᓗ ᓇᓗᓇᐃᔭᖅᑕᐅᓯᒪᔪᓂᑦ ᐊᕕᒃᑐᖅᓯᒪᔪᑦ 35-ᒥ ᑲᓇᑕᒥᐅᑦ ᐱᖁᔭᕐᔪᐊᖁᑎᖏᓐᓂᑦ.

ᐃᖅᑲᖅᑐᐃᔨ ᓯᓯᓕ ᓯᑐᕆᒃᓚᓐᑦ ᐃᓱᒪᓕᐅᓚᐅᕐᑐᖅ ᐃᖅᑲᖅᑐᐃᕕᑎᒍᑦ ᕿᒥᕐᕈᔭᐅᑎᑦᑎᓂᖏᑕ ᓴᖅᑭᑕᐅᓯᒪᓪᓗᑎᒃ ᐃᓐᓄ ᐃᓅᖃᑎᒌᒃᑐᓂᑦ ᐱᔾᔪᑎᒋᓪᓗᒋᑦ 2019-ᒥ ᑐᑭᓯᐅᒪᑐᕋᐅᓐᓂᕐᒧᑦ ᑎᑎᖅᑲᖁᑎᖏᓐᓄᑦ NCC-ᑯᑦ ᐊᒻᒪᓗ ᑲᓇᑕᐅᑉ ᒐᕙᒪᖓᑕ ᐅᖃᓪᓚᐅᓯᖃᕈᒪᓪᓗᑎᒃ ᐃᓕᑕᕆᔭᐅᓂᕐᒥᑦ ᓄᓇᖃᖅᑳᖅᓯᒪᔪᐃᑦ ᐱᔪᓐᓇᐅᑎᖏᓐᓂᒃ ᐱᓯᒪᓂᕐᒥᒃ ᐊᒻᒪᓗ ᓇᖕᒥᓂᖅ ᐃᓱᒪᓕᐅᕈᑎᓕᐅᕈᓐᓇᕐᓂᕐᒧᑦ ᐱᓕᕆᐊᖑᕙᓪᓕᐊᓂᕐᒥᒃ.

ᐃᓐᓄ ᐃᓅᖃᑎᒌᑦ ᐃᖅᑭᓕᖏᑦ ᓇᓗᓇᐃᖅᓯᒋᐊᓕᓚᐅᕐᒪᑕ ᒪᓕᒐᑎᒍᑦ ᑖᒃᑯᐊ ᑐᑭᓯᐅᒪᑐᕋᐅᓐᓂᕐᒧᑦ ᑎᑎᖅᑲᖁᑎᐅᔪᓂᒃ ᐊᒃᑐᐃᓂᖃᖅᓯᒪᓕᕈᓐᓇᕐᓂᖏᑕ ᓄᓇᓕᕆᓂᕐᒥ ᐊᖏᖃᑎᒌᓕᐅᒐᓱᐊᖅᑎᓪᓗᒋᑦ ᐱᓕᕆᓂᖃᕐᕕᒋᓯᒪᓕᖅᑕᒥᓂᑦ ᑕᐃᒪᖖᒐᓂᑦ 1978-ᒥᑦ. ᓄᓇᑦᓯᐊᕗᑦ ᒐᕙᒪᖓᑦ, ᐱᔪᖕᓇᐅᑎᒋᔭᐅᔪᓂᒃ ᑎᒍᒥᐊᖅᑎᐅᓪᓗᑎᒃ ᐃᓄᖕᓄᑦ ᓛᐸᑐᐊᕆᒥᐅᓄᑦ, ᓴᐳᔾᔨᒋᐊᖅᑎᒋᔭᐅᓚᐅᖅᐳᑦ.

ᐃᖅᑲᖅᑐᐃᔨ ᓯᑐᕆᒃᓚᓐᑦ ᐋᖅᑮᓯᒪᓕᓚᐅᖅᑐᖅ ᐃᖅᑲᖅᑐᐃᕕᒃᑎᒍᑦ ᑖᒃᑯᐊᑦ MOU ᖁᑎᐅᔪᐃᑦ ᐋᖅᑮᓯᒪᓕᕈᑎᐅᖖᒋᓐᓂᖏᑕ ᐅᕝᕙᓘᓐᓃᑦ ᐊᓯᔾᔩᓯᒪᓕᕈᑎᐅᖖᒋᓐᓂᖏᑕ ᖃᓄᐃᑦᑐᑐᐃᓐᓇᓂᒃ ᐱᔪᓐᓇᐅᑎᒋᔭᐅᔪᓂᑦ ᐅᕝᕙᓘᓐᓃᑦ ᐱᓕᕆᐊᕆᔭᕆᐊᖃᖅᑕᖏᓐᓂᑦ NCC-ᑯᑦ, ᑲᓇᑕᐅᑉ ᐅᕝᕙᓘᓐᓃᑦ ᓇᓕᖏᑕ ᓄᓇᖃᖅᑳᕐᓯᒪᔪᐃᑦ, ᐊᒻᒪᓗ ᒪᓕᒐᑎᒍᑦ ᐊᑐᓕᖅᑎᑕᐅᓯᒪᖖᒋᑦᑑᓪᓗᑎᒃ. “ᑖᓐᓇ MOU ᐃᓕᑕᖅᓯᓯᒪᖖᒋᑦᑐᑦ ᓄᓇᑐᖃᕗᑦ ᑲᑎᒪᔨᒃᑯᖏᓐᓂᒃ (NCC), ᐱᓯᒪᑎᑦᑎᖏᑦᑐᖅ NCC-ᑯᓂᑦ ᖃᓄᐃᑦᑐᑐᐃᓐᓇᓂᒃ ᐱᔪᓐᓇᐅᑎᓂᒃ ᐊᒻᒪᓗ ᐱᖃᕈᓐᓇᐃᑎᑦᑎᓇᑎᒃ ᑐᒃᓯᕋᐅᑎᖃᖅᑎᓂᒃ, ᓴᐳᔾᔨᒋᐊᖅᑎᐅᔪᒧᑦ ᐅᕝᕙᓘᓐᓃᑦ ᓇᓕᑐᐃᓐᓇᖏᑕ ᑲᑎᓐᓂᖃᖅᑐᑦ ᖃᓄᐃᑦᑐᑐᐃᓐᓇᓂᒃ ᐱᔪᓐᓇᐅᑎᒋᔭᖏᓂᒃ.”

ᐅᔾᔨᕈᓱᒃᓱᓂ ᓄᓇᑐᖃᕗᑦ ᑲᑎᒪᔨᒃᑯᖏᑦ (NCC) ᐃᖏᕐᕋᑦᑎᐊᓕᖅᓯᒪᖖᒋᑦᑐᓂᒃ ᐱᖓᓱᐃᖅᓱᑎᒃ ᐱᓯᒪᓂᖃᐅᑎᖃᖅᓯᒪᓕᕐᓂᖏᓂᒃ ᑐᖖᒐᕝᕕᒋᕙᒃᓱᒋᑦ ᑲᓇᑕᒥ ᓄᓇᓕᕆᓂᕐᓄᑦ ᒪᓕᒐᖁᑎᖏᑦ ᑕᐃᒪᖖᒐᓂᑦ 1991-ᒥᑦ, ᐊᒻᒪᓗ MOU-ᖁᑎᐅᕙᒃᑐᑦ ᐃᓱᒪᓕᐅᕈᑎᐅᕙᓐᓂᐊᕐᓗᑎᒃ ᐅᕝᕙᓘᓐᓃᑦ ᓇᓗᓇᐃᖅᓯᔾᔪᑎᐅᕙᓐᓂᐊᕐᓗᑎᒃ ᐊᕕᒃᑐᖅᓯᒪᓂᖏᑦ 35-ᒥ ᐱᔪᓐᓇᐅᑎᒋᔭᐅᔪᓄᑦ ᑐᕌᖓᑎᑕᐅᓯᒪᓕᓚᐅᖖᒋᒻᒪᑕ. “ᓇᓂᓘᓐᓃᑦ MOU−ᒥᒃ ᐅᖃᖅᓯᒪᖖᒋᒻᒪᑕ ᓄᓇᑐᖃᕗᑦ ᑲᑎᒪᔨᒃᑯᖏᑦ (NCC) ᐃᓕᑕᖅᓯᓯᒪᓂᕐᒥᓐᓂᒃ “ᑲᓇᑕᒥ ᓄᓇᖃᖅᑳᕐᓯᒪᔫᓂᕋᐃᓪᓗᑎᒃ” ᐅᕝᕙᓘᓐᓃᑦ ᐃᓱᒪᓕᐅᕈᑎᐅᓯᒪᓂᖓᑕ NCC-ᑯᑦ ᐱᓯᒪᖃᑕᐅᑎᑕᐅᓂᖏᓂᒃ ᐊᕕᒃᑐᖅᓯᒪᓂᖏᑦ 35-ᒥ ᐱᔪᓐᓇᐅᑎᖃᕐᓂᐅᔪᓄᑦ.”

ᐃᓄᐃᑦ ᓄᓇᖓᓐᓄᑦ ᒪᓕᒐᖁᑎᒋᔭᐅᔪᑦ ᒐᕙᒪᑐᖃᒃᑯᓐᓂ ᒪᓕᒐᖁᑎᐅᒻᒪᑕ ᐋᖅᑭᒃᑕᐅᓯᒪᓕᖅᑳᓚᐅᖅᑐᓄᑦ ᐃᓕᑕᖅᓯᓯᒪᓂᕐᒥᒃ ᐃᓄᐃᑦ ᑕᐃᒪᖖᒐᓂᑐᖃᒥᑦ ᐱᔪᓐᓇᐅᑎᖃᕐᓂᖏᓂᒃ ᐊᒻᒪᓗ ᐊᖏᕈᑎᐅᓯᒪᔪᑎᒍᑦ ᐱᔪᓐᓇᐅᑎᖃᕐᓂᖏᓂᒃ. ᓇᓗᓇᐃᔭᐃᓯᒪᒻᒪᑕ ᐃᓄᐃᑦ ᐃᓚᒋᔭᐅᖃᑕᐅᓂᖏᑕ ᐃᓄᐃᑦ ᓄᓇᖓᓐᓂ ᓄᓇᓕᕆᓂᕐᒧᑦ ᐊᖏᖃᑎᒌᒥᑦ, ᐅᑯᐊᖑᔪᓂᒃ:  ᐃᓄᕕᐊᓗᐃᑦ ᑭᖑᓪᓕᖅ ᐊᖏᕈᑎᒃ, ᔦᒥᔅᐯᒥᓗ ᑯᐯᒃ ᑕᕐᕋᖓᓂᓗ ᐊᖏᖃᑎᒌᖓ, ᐊᖏᕈᑎᑦ ᐃᓄᓐᓄ ᓄᓇᕗᒻᒥ, ᐊᒻᒪᓗ Labrador ᐃᓄᐃᑦ ᓄᓇᓕᕆᓂᕐᒧᑦ ᐊᖏᕈᑎ.

ᐊᑐᓕᖁᔭᐅᓯᒪᓪᓗᑎᒃ ᐃᓱᒪᓕᐅᕈᑎᐅᓯᒪᓕᓚᐅᖅᑐᓄᑦ ᓯᑦᑎᐱᕆ 2023-ᒥ; ᑕᐃᒃᑯᐊ ᑲᑐᔾᔨᖃᑎᒌᖑᔪᐃᑦ; ᐃᓚᖃᖅᓱᑎᒃ ᓂᕈᐊᕈᓐᓇᖅᑎᑕᐅᓪᓗᑎᒃ ᐃᓚᒋᔭᐅᔪᓂᒃ ᐃᓄᐃᑦ ᑕᐱᕇᒃᑯᑦ ᑲᓇᑕᒥ ᑲᑎᒪᔨᖏᓐᓄᑦ, ᐃᓱᒪᓕᐅᖅᓯᒪᓕᓚᐅᕐᓂᖏᑕ ᒐᕙᒪᑐᖃᒃᑯᑦ ᓇᓗᓇᐃᔭᖅᓯᒪᑦᓯᐊᖖᒋᑦᑐᑎᒍᑦ ᑭᐅᓯᒪᓕᓚᐅᕐᓂᖏᓐᓄᑦ ᓄᓇᑐᖃᕗᑦ ᑲᑎᒪᔨᖏᓐᓄᑦ (NCC)  ᐅᐃᒻᒪᒍᑎᐅᓯᒪᓕᕐᒪᑕ ᐊᒻᒪᓗ ᓯᓚᑖᒍᑦ ᐱᓕᕆᓂᐅᔪᓂᑦ ᐱᐅᓯᒋᐊᖅᑎᑦᑎᓯᒪᓕᕆᐊᖅᓱᑎᒃ ᐃᓅᓯᓕᕆᓂᕐᒥ ᐊᒻᒪᓗ ᑮᓇᐅᔭᓕᐅᕋᓱᐊᕈᑎᐅᕙᒃᑐᑦ ᐃᓕᖓᓐᓂᕆᔭᖏᓐᓄᑦ ᐃᓄᖕᓂ ᐃᓗᐊᓂ ᐊᒻᒪᓗ ᓯᓚᑖᓂ ᐃᓄᐃᑦ ᓄᓇᖓᑦᑕ.

ᐃᓄᐃᑦ ᑕᐱᕇᑦ ᑲᓇᑕᒥ ᑲᑎᒪᔨᖏᑦ ᐋᖅᑮᓯᒪᓕᓚᐅᖅᑐᑦ NCC-ᑯᑦ ᐃᓄᖕᓄᑦ ᑕᐃᒪᐃᓐᓄᑦ ᐃᓚᒋᔭᐅᖃᑕᐅᔫᙱᓐᓂᖏᑕ, ᐃᓚᒋᔭᐅᖃᑕᐅᔪᖁᑎᖏᑦ ᑎᒍᒥᐊᖅᑎᑕᐅᓂᕐᒥᒃ ᐊᔪᕐᒪᑕ ᐊᕕᒃᑐᖅᓯᒪᓂᖏᑦ 35-ᒥ ᐱᔪᓐᓇᐅᑎᒋᔭᐅᔪᓂᒃ; ᐊᒻᒪᓗ ᐃᓕᑕᕆᔭᐅᓯᒪᖖᒋᑦᓱᑎᒃ ᐃᓅᓂᖏᑕ ᐃᓄᐃᑦ ᑕᐱᕇᒃᑯᓐᓄᑦ ᑲᓇᑕᒥ.

ᐊᒻᒪᓗᒃᑲᓐᓂᖅ; ᐃᓄᐃᑦ ᐊᖏᖃᑎᒌᒐᓱᐊᕐᓂᖃᖅᓱᑎᒃ ᐱᖁᔭᕐᔪᐊᓂᑦ ᒥᐊᓂᕆᔭᐅᓯᒪᓪᓗᑎᒃ ᐅᓪᓗᒥᐅᓕᖅᑐᒥ ᐊᖏᕈᑎᖃᖃᑎᖃᖅᓯᒪᒻᒪᑕ ᒐᕙᒪᑐᖃᒃᑯᓐᓂᒃ ᐃᓱᒪᓕᐅᖅᑎᐅᕙᒃᑐᓂᒃ ᑕᒪᕐᒥᐅᓪᓗᑎᒃ ᐊᒻᒪᓗ ᐃᓛᒃᑰᖓᓪᓗᑎᒃ ᑭᓇᐅᓂᖏᓐᓄᑦ ᐃᓄᐃᑦ. ᐃᓄᐃᑦ ᕿᐱᓗᒍᑎᖃᖅᓯᒪᒻᒪᑕ ᐊᑕᐅᓯᐅᓕᖓᓪᓗᑎᒃ ᐊᒻᒪᓗ ᒐᕙᒪᖃᐅᓯᖅᑎᒍᑦ ᐊᐅᓚᑦᓯᓂᐅᕙᒃᑐᑎᒍᑦ ᐱᓕᕆᓂᕆᕙᒃᑕᖏᓂᒃ ᐃᓅᓇᑎᒃ ᒐᕙᒪᐅᔪᐃᑦ ᓇᓗᓇᐃᔭᐃᓯᒪᓇᓱᐊᖅᐸᓐᓂᖏᓐᓂᒃ ᐅᕝᕙᓘᓐᓃᑦ ᓇᓗᓇᐃᔭᐃᒃᑲᓐᓂᕋᓱᒃᐸᓐᓂᖏᓂᒃ ᐃᓄᐃᑦ ᑕᒪᕐᒥᐅᓪᓗᑎᒃ ᐅᕝᕙᓘᓐᓃᑦ ᐃᓄᐃᑦ ᑭᓇᐅᓂᖏᓐᓄᑦ.