Announcements

ᒐᕙᒪᑐᖃᒃᑯᑦ ᐊᑐᓕᖅᑎᑦᑎᔪᑦ ᐊᑕᐅᓯᐅᖃᑎᒌᑦ ᓄᓇᓕᒐᓴᕐᔪᐊᖁᑎᓖᑦ ᓇᓗᓇᐃᕈᑎᒋᓯᒪᔭᖓᓐᓂᒃ ᓈᒻᒪᑦᑐᒥᒃ ᐊᒻᒪᓗ ᐃᖅᑲᐅᒪᔭᔅᓴᓕᐅᓂᐊᓕᕐᒥᔪᒥᒃ ᐱᒻᒪᕆᐅᔪᒥᒃ ᐊᑐᖅᑕᐅᓂᐅᓴᔪᒥᒃ

By December 4, 2020 No Comments

ᑎᓯᐱᕆ 3, 2020

ᐃᓄᐃᑦ ᑕᐱᕇᑦ ᑲᓇᑕᒥ ᑐᙵᓱᑦᑎᑦᑎᔪᑦ ᓇᓗᓇᐃᖅᑕᐅᓂᖓᓂᒃ ᒪᓕᒐᔅᓴᖅ C-15, ᒪᓕᒐᖅ ᓂᑲᒋᓪᓗᒋᑦ ᐊᑕᐅᓯᐅᖃᑎᒌᑦ ᓄᓇᓕᒐᓴᕐᔪᐊᖁᑎᓖᑦ ᓇᓗᓇᐃᕐᓯᓯᒪᒍᑎᖓᑦ ᐱᔪᓐᓇᐅᑎᖏᓐᓄᑦ ᓄᓇᖃᖅᑐᑐᖃᐃᑦ,” ᓈᒻᒪᑦᑐᒥᒃ ᐊᒻᒪᓗ ᐃᖅᑲᐅᒪᔭᔅᓴᐅᓂᐊᓕᖅᑐᒥᒃ ᐱᒻᒪᕆᐅᔪᒥᒃ ᐊᑐᖅᑕᐅᓂᐅᓴᔪᒥᒃ.
ᑕᐱᕇᒃᑯᑦ ᐃᑲᔪᕐᓰᓯᒪᒻᒪᑕ ᑲᑦᑐᖓᐃᕈᑎᒋᓯᒪᔭᖓᓐᓂᒃ ᑲᓇᑕᐅᑉ ᒐᕙᒪᒃᑯᖏᑕ ᐱᕙᓪᓕᐊᑎᑦᑎᖃᑎᖃᕈᒪᓪᓗᑎᒃ ᒪᓕᒐᓕᐊᖑᔪᒥᒃ ᐃᓄᓐᓂᒃ, ᐊᓪᓚᓂᑦ ᐊᓪᓚᖓᔪᓂᓪᓗ ᐊᑐᓕᖅᑎᑦᑎᓂᕐᒧᑦ ᐊᑕᐅᓯᐅᖃᑎᒌᑦ ᓄᓇᓕᒐᓴᕐᔪᐊᖁᑎᓖᑦ ᓇᓗᓇᐃᕐᓯᓯᒪᔾᔪᑎᖓᓐᓂᒃ, ᐊᒻᒪᓗ ᐱᓕᕆᖃᑎᖃᕐᓯᒪᓪᓗᑎᒃ ᒐᕙᒪᑐᖃᒃᑯᓐᓂᑦ ᓈᒻᒪᑦᑐᒥᒃ ᐊᑑᑎᓂᖃᖁᓪᓗᒋᑦ ᐱᕙᓪᓕᐊᑎᑕᖏᓐᓄᑦ. ᒐᕙᒪᑐᖃᒃᑯᑦ ᒪᓕᒐᓕᐊᖓᑦ ᐊᑐᖅᑕᐅᔭᕆᐊᖃᕐᖓᑦ ᐊᔾᔨᐅᖏᑦᑐᒥᒃ ᐃᓕᖅᑯᓯᖃᕐᕕᐅᖃᑦᑕᖁᓇᒋᑦ ᐊᒻᒪᓗ ᐊᔾᔨᐅᖏᑦᑐᒥᒃ ᐱᓂᐊᕐᓂᖃᕐᕕᐅᖃᑦᑕᖁᓇᒋᑦ ᐃᓄᐃᑦ ᑕᐃᒫᒃ ᒐᕙᒪᑐᖃᒃᑯᑦ ᒪᓕᒐᖏᑦ ᐊᑐᐊᒐᖏᓪᓗ ᓇᓕᒧᔅᓯᑎᑕᐅᓗᑎᒃ ᑕᒪᒃᑯᓄᖓ ᐊᑕᖃᓯᐅᑎᔪᑦ, ᑐᕚᖃᖃᑎᒌᒍᑕᐅᔪᑦ, ᐊᒻᒪᓗ ᐊᕕᑎᑕᐅᔪᓐᓇᖏᑦᑐᑦ ᐱᔪᓐᓇᐅᑎᓄᑦ ᓇᓗᓇᐃᖅᑕᐅᓯᒪᔪᓄᑦ ᐊᑕᐅᓯᐅᖃᑎᒌᓄᑦ ᓄᓇᓕᒐᓴᕐᔪᐊᖁᑎᓕᓐᓄᑦ ᓇᓗᓇᐃᕐᓯᕙᑦᑐᓂᑦ.

ᒪᓕᒐᔅᓴᖅ C-15 ᐱᖃᓯᐅᔾᔨᔪᖅ ᐅᑯᓂᖓ ᐱᔾᔪᑎᓪᓗᐊᑕᖏᓐᓂᒃ:

  • ᐃᓕᓴᕐᓯᓂᖅ ᐊᑕᐅᓯᐅᖃᑎᒌᓄᑦ ᓄᓇᓕᒐᓴᕐᔪᐊᖁᑎᓕᓐᓄᑦ ᓇᓗᓇᐃᕐᓯᒍᑎᖓᓐᓂᒃ ᐃᓘᓐᓇᖏᓐᓂᒃ ᓄᓇᕐᔪᐊᓕᒫᒥ ᑭᒃᑯᑐᐃᓐᓇᕐᓄᑦ ᐱᔪᓐᓇᐅᑎᓕᕆᔾᔪᑎᒥᒃ ᐊᑐᖅᑎᑕᐅᓂᐊᖅᑐᓂ ᑲᓇᑕᒥᐅᑦ ᒪᓕᒐᖓᓐᓄᑦ.
  • ᑲᒪᒋᔭᔅᓴᖃᕐᓂᖏᓐᓂᒃ ᐃᓘᓐᓇᖏᓐᓂᒃ ᑲᒪᒋᔭᐅᔭᔭᕿᐊᓕᓐᓂᑦ ᑕᐃᒫᒃ ᖃᐅᔨᒪᑦᑎᐊᓂᐊᕐᖓᑕ ᒪᓕᒐᖏᑦ ᑲᓇᑕᒥ ᓈᒻᒪᒃᑲᓗᐊᕐᒪᖔᑕ ᐱᔪᓐᓇᐅᑎᖏᓐᓄᑦ ᓇᓗᓇᐃᖅᑕᐅᓯᒪᔪᓄᑦ ᐊᑕᐅᓯᐅᖃᑎᒌᓄᑦ ᓄᓇᓕᒐᓴᕐᔪᐊᖁᑎᓖᑦ ᓇᓗᓇᐃᕐᓯᓯᒪᒍᑎᖓᓐᓄᑦ.
  • ᑲᒪᒋᔭᔅᓴᖃᕐᓂᖏᑦ ᐅᐸᓗᖓᐃᔭᐃᓂᕐᒧᑦ ᖃᓄᖅᑑᕈᑎᔅᓴᓂᑦ ᐸᕐᓇᐅᑎᓂᑦ ᐱᖓᓱᑦ ᐊᕐᕌᒍᑦ ᑐᖔᓂ ᑲᑐᔾᔨᖃᑎᖃᕐᓗᑎᒃ ᓄᓇᖃᖅᑐᑐᖃᕐᓂᑦ ᑎᑭᐅᑎᓂᐊᕐᖓᑕ ᐱᔾᔪᑎᖏᓐᓄᑦ ᐊᑕᐅᓯᐅᖃᑎᒌᓄᑦ ᓄᓇᓕᒐᓴᕐᔪᐊᖁᑎᓖᑦ ᓇᓗᓇᐃᕐᓯᔾᔪᑎᒋᓯᒪᔭᖓᓐᓄᑦ.
  • ᑲᒪᒋᔭᔅᓴᖏᑦ ᐱᖃᓯᐅᔾᔨᖁᓪᓗᒋᑦ, ᖃᓄᖅᑑᕈᑎᔅᓴᓄᑦ ᐸᕐᓇᐅᑎᓂᑦ, ᖃᓄᖅᑑᕈᑕᐅᓂᐊᖅᑐᓂᑦ ᓇᐅᑦᑎᕐᓱᕐᓂᕐᒨᖓᔪᓂᑦ, ᑲᒪᒋᔭᖃᕐᓂᕐᒨᖓᔪᓂᑦ, ᓴᖑᑎᑦᑎᓂᕐᒨᖓᔪᓂᑦ ᐅᕝᕙᓘᓐᓃᑦ ᐋᖅᑭᔅᓯᓂᕐᒨᖓᔪᓂᑦ ᐱᔪᓐᓇᐅᑎᓂᑦ ᓇᓗᓇᐃᖅᑕᐅᓯᒪᔪᓂᑦ ᐊᑕᐅᓯᐅᖃᑎᒌᓄᑦ ᓄᓇᓕᒐᓴᕐᔪᐊᖁᑎᓕᓐᓄᑦ ᓇᓗᓇᐃᕐᓯᔾᔪᑕᐅᓯᒪᔪᒥᒃ, ᑕᐃᒫᒃ ᖃᐅᔨᒪᑦᑎᐊᓂᐊᕐᖓᑕ ᒪᓕᑦᑎᑦᑎᒍᑕᐅᔪᓐᓇᕐᓂᖏᓐᓂᒃᑕ.

ᑕᐱᕇᒃᑯᑦ ᐋᖅᑭᐅᒪᑎᑦᑎᔪᑦ ᐋᖅᑭᓯᒪᔾᔪᑎᖓᓂᒃ ᓇᓕᑐᐃᓐᓇᖏᑦ ᒐᕙᒪᑐᖃᒃᑯᓐᓂ ᒪᓕᒐᓕᐊᖑᓯᒪᔪᑦ ᐊᑐᓕᖅᑎᑦᑎᖁᓪᓗᒋᑦ ᐊᑕᐅᓯᐅᖃᑎᒌᓄᑦ ᓄᓇᓕᒐᓴᕐᔪᐊᖁᑎᓕᓐᓄᑦ ᓇᓗᓇᐃᕐᓯᔾᔪᑕᐅᓯᒪᔪᒥᒃ ᑕᒪᒃᑯᐊ ᐱᑕᖃᐅᙱᑦᑐᑦ ᑕᐃᒪᐃᑦᑐᓂᑦ ᒪᓕᒐᕐᓂᑦ ᒪᓕᒐᔅᓴᖃᖅᑎᑦᑎᔪᓂᑦ ᐱᓕᕆᔾᔪᓯᐅᕙᑦᑐᓂᑦ ᓇᓗᓇᐃᒃᑯᑕᖃᑐᐃᓐᓇᕐᓂᐅᑉ ᓴᓂᐊᓂ ᐊᖏᓂᕐᓴᐅᒻᒪᑦ ᐋᖅᑭᓯᒪᙱᑦᑐᓂᑦ  ᓄᓇᕐᔪᐊᓕᒫᒥ ᑭᒃᑯᑐᐃᓐᓇᕐᓄᑦ ᐱᔪᓐᓇᐅᑎᓄᑦ ᐱᐅᓯᕆᔭᐅᒐᔪᑦᑐᓄᑦ ᐊᐅᓚᔾᔪᓯᐅᕙᑦᑐᓄᓪᓗ, ᐊᒻᒪᓗ ᐊᔾᔨᒌᙱᑎᑦᑎᒋᐊᒃᑲᓐᓂᕈᑕᐅᕙᑦᑐᓂ ᐊᓯᔾᔨᖅᑕᐅᑎᓪᓗᒋᑦ ᑭᒃᑯᑐᐃᓐᓇᕐᓄᑦ ᐱᔪᓐᓇᐅᑏᑦ ᑐᕌᒐᕆᔪᒪᓗᒋᑦ.

ᐊᖏᔪᒥᒃ ᑲᒪᒋᔭᖃᕆᐊᖃᕐᓂᐊᕐᖓᑕ ᖃᐅᔨᒪᑦᑎᐊᕈᑕᐅᓂᐊᕐᖓᑦ ᒪᓕᒐᔅᓴᖅ C-15 ᓯᕗᒧᐊᑦᑎᑕᐅᓂᐊᕋᓗᐊᕐᒪᖔᖅ ᒪᓕᒐᓕᐅᕐᓂᕐᒧᑦ ᐱᓕᕆᓂᒃᑯᑦ ᐊᒻᒪᓗ ᖁᕝᕙᓯᓐᓂᕐᐹᒥ ᐊᖏᖅᑕᐅᖁᓪᓗᒍ ᐊᖏᖅᑕᐅᓴᕋᐃᔾᔫᒥᓗᓂ. ᑕᐱᕇᒃᑯᑦ ᑎᓕᐅᕆᓪᓚᕆᑦᑐᑦ ᒪᓕᒐᓕᐅᖅᑎᐅᖃᑕᐅᔪᓂᑦ ᒪᓕᒐᓕᐅᕐᕕᔾᔪᐊᕐᒥ ᐃᑲᔪᕐᓱᐃᖁᓪᓗᒋᑦ ᒪᓕᒐᔅᓴᖅ C-15ᒥᒃ ᓯᕗᒧᐊᒍᓐᓇᕐᓯᑎᑕᐅᓂᐊᕐᖓᑦ ᑐᐊᕕᕐᓇᖅᑐᒥᒃ ᐃᖅᑲᓇᐃᔮᖑᔭᕆᐊᓕᒃ ᐊᑐᓕᖅᑎᑦᑎᓂᕐᒧᑦ ᐊᑕᐅᓯᐅᖃᑎᒌᓄᑦ ᓄᓇᓕᒐᓴᕐᔪᐊᖁᑎᓕᓐᓄᑦ ᓇᓗᓇᐃᕐᓯᔾᔪᑕᐅᓯᒪᔪᒥᒃ ᑲᓇᑕᒥ ᐊᒻᒪᓗ ᓄᖅᑲᓂᐊᕐᖓᑦ ᐊᔾᔨᒋᔭᐅᙱᑎᑦᑎᓂᐅᕙᑦᑐᖅ ᐃᓄᓐᓂᑦ ᐃᓘᓐᓇᖏᓐᓂᓪᓗ ᓄᓇᖃᖅᑐᑐᖃᓕᒫᓂᑦ.

.