ᐅᑐᐱᕆ 6, 2022 – ᐋᑐᕚ, ᐋᓐᑎᐅᕆᐅ
ᖃᓪᓕᕙᓪᓕᑎᓪᓗᑕ ᓄᓇᕐᔪᐊᓕᒫᕐᒥ ᐃᓱᒪᒃᑯᑦ ᖃᓄᐃᙱᑦᓯᐊᕐᓂᕐᒧᑦ ᐅᓪᓗᖓᓄᑦ, ᒐᕙᒪᒃᑯᖏᑦ ᑲᓇᑕᐅᑉ ᐊᒻᒪᓗ ᐃᓄᐃᑦ ᑕᐱᕇᑦ ᑲᓇᑕᒥᒃᑯᑦ ᑐᓴᕋᑦᓴᖃᖅᑐᑦ $11 ᒥᓕᔭᓐᓂᑦ ᓄᑖᖑᓪᓗᑎᑦ ᐃᑲᔪᖅᓯᒋᐊᕈᑕᐅᓗᑎᑦ ᓴᙱᓕᕆᐊᖅᑕᐅᖁᓪᓗᒍ ᑲᓇᑕᒥ ᐃᓄᐃᑦ ᐃᓅᓯᖏᓐᓂᑦ ᑭᐱᓯᑎᑦᓯᑦᑕᐃᓕᓂᕐᒧᑦ ᖃᓄᖅᑑᕈᑎᒥᒃ. ᑖᓐᓇ ᑮᓇᐅᔭᖃᖅᑎᑕᐅᓂᖓ ᐱᓯᒪᔪᖅ ᑮᓇᐅᔭᖅᑑᑎᑦᓴᓄᑦ 2022ᒥ ᐱᕈᕆᐊᕈᑕᐅᓪᓗᓂᓪᓗ ᓯᕗᓂᐊᒍᑦ ᑮᓇᐅᔭᑎᒍᑦ ᐃᑲᔫᑎᑦᓴᓕᐊᖑᓯᒪᔪᓂ ᑮᓇᐅᔭᖅᑑᑎᑦᓴᓂ 2019 ᐱᓯᒪᔪᓂ.
ᓴᖅᑭᖅᑎᑕᐅᓚᐅᖅᓯᒪᔪᑦ ᐃᓄᐃᑦ ᑕᐱᕇᑦ ᑲᓇᑕᒥᒃᑯᓐᓄᑦ 2016ᒥ, ᑲᓇᑕᒥ ᐃᓄᐃᑦ ᐃᓅᓯᖏᓐᓂᑦ ᑭᐱᓯᑎᑦᓯᑦᑕᐃᓕᓂᕐᒧᑦ ᖃᓄᖅᑑᕈᑎ ᐃᓄᓐᓄᑦ-ᓯᕗᓕᖅᑕᐅᔪᖅ, ᓱᖅᑯᐃᖅᓯᕈᑕᐅᒍᓐᓇᖅᑐᓂᑦ-ᑐᙵᕆᖃᖅᑐᓂ, ᓄᓇᕐᔪᐊᓕᒫᕐᒥᓪᓗ ᑐᑭᓯᒪᓂᒃᑯᑦ ᐊᑐᖅᑕᐅᒋᐊᖅᑐᖅ ᐃᓄᐃᓴᓪᓕᒋᐊᖁᓪᓗᒋᑦ ᐃᓅᓯᕐᒥᓐᓂ ᑭᐱᓯᖃᑦᑕᖅᑐᑦ ᐃᓄᓐᓂᑦ ᐃᓄᐃᑦ ᓄᓇᖓᓐᓂ. ᐱᖓᓲᔪᖅᑐᓂᑦ ᓯᕗᓪᓕᐅᑎᑦᓯᒍᒪᓂᓖᑦ ᖃᓄᐃᓕᐅᕆᐊᕈᑎᒋᓪᓗᒋᑦ ᐃᓚᐅᓗᒋᑦ: ᓴᖅᑭᖅᑎᑦᓯᓗᑎᑦ ᐃᓅᖃᑎᒌᑦᑐᑦ ᐱᕕᑦᓴᖃᑎᒌᑦᓯᐊᕐᓗᑎᑦ, ᓴᖅᑭᑎᑦᓯᓂᒃᑯᑦ ᐃᓕᖅᑯᓯᑐᖃᕐᒥᓐᓂ ᑲᔪᓯᑎᒃᓯᒋᐊᖅᑐᓂᑦ, ᐸᖅᑭᑦᓯᐊᕐᓂᕐᒥᒃ ᖃᓄᐃᙱᑦᓯᐊᖅᑐᓂᑦ ᐃᓄᓐᓂᑦ ᓄᑕᖅᑲᓂᑦ, ᐱᕕᑦᓴᖃᖅᑎᑦᓯᐊᕐᓗᒋᑦ ᐃᓱᒪᓕᕆᓂᒃᑯᑦ ᐃᑲᔪᖅᓯᒋᐊᕈᑕᐅᒍᓐᓇᖅᑐᓂᑦ ᐃᓱᓕᑦᑕᕐᕕᖃᙱᑦᑐᓂᑦ ᐃᓄᓐᓄᑦ, ᒪᒥᓴᕐᓂᖃᕐᓗᑎᑦ ᖁᐊᖅᓵᕐᓇᖅᑐᒃᑰᖅᓯᒪᔪᑦ ᑭᑦᓴᕐᓂᖃᖅᓯᒪᔪᓪᓗ ᐊᓂᒎᔾᔨᓯᒪᙱᑦᑕᒥᓐᓂ, ᐊᐅᓚᔾᔭᒋᐊᕐᓗᒋᓪᓗ ᐃᓄᐃᑦ ᖃᐅᔨᒪᓂᖃᖅᑐᑦ ᒪᑭᑕᒋᐊᕈᓐᓇᕐᓂᕐᒥᒃ ᐃᓅᓯᕐᒥᓪᓗ ᑭᐱᓯᑎᑦᓯᑦᑕᐃᓕᓂᕐᒥ.
ᑕᒪᓐᓇ ᓄᑖᖅ ᑮᓇᐅᔭᑎᒍᑦ ᐃᑲᔪᖅᓯᒋᐊᕈᑎ ᐅᓪᓗᒥ ᑐᓴᖅᑎᑦᓯᒍᑎᐅᔪᖅ ᐃᑲᔪᖅᓯᓂᐊᖅᑐᑦ ᐱᓕᕆᐊᕇᓐᓇᖅᑕᖏᓐᓂᑦ ᐃᓄᐃᑦ ᑕᐱᕇᑦ ᑲᓇᑕᒥᒃᑯᑦ ᐊᒻᒪᓗ ᐃᓄᐃᑦ ᓄᓇᑖᕐᓂᕐᒧᑦ ᑎᒥᖁᑎᖏᓐᓄᑦ, ᐃᓘᓐᓇᖓᒍᑦ ᕿᒥᕐᕈᓂᖃᕆᐊᖅᓯᒪᓪᓗᓂ, ᐃᓄᓐᓄᑦ-ᑐᕌᖓᔪᓂᑦ ᐊᑐᕆᐊᖅᑕᐅᒍᓐᓇᖅᑐᓂᑦ ᐃᓅᓯᕐᒥᒃ ᑭᐱᓯᑎᑦᓯᑦᑕᐃᓕᓂᕐᒧᑦ ᐱᓕᕆᐊᖃᓪᓚᕆᑦᑐᓂᓪᓗ ᐱᓇᓱᐊᕈᑎᐅᕙᑦᑐᑦ ᐊᓯᔾᔨᕆᐊᕐᓗᒋᑦ, ᐃᓱᒪᓕᓵᕐᓂᖏᓐᓂ ᓄᖅᑲᖅᑎᑦᓯᒋᐊᕐᓂᕐᒥᒃ ᐃᑲᔪᖅᑐᖅᑕᐅᑦᓯᐊᕐᓗᑎᑦ, ᑭᓇᑐᐃᓐᓇᖅ ᑎᑭᐅᑎᖁᓇᒍ ᐃᓅᓯᕐᒥᓐᓂ ᑭᐱᓯᒍᒪᓂᕐᒧᑦ. ᑮᓇᐅᔭᖃᖅᑎᑕᐅᓂᖅ ᐊᑐᐃᓐᓇᖃᖅᑎᑦᓯᓂᖅᓴᐅᓂᐊᖅᑐᖅ ᐱᓕᕆᐊᑦᓴᓄᑦ ᐱᔨᑦᓯᕋᐅᑎᑦᓴᓄᓪᓗ, ᐱᕈᖅᐸᓪᓕᐊᑎᑦᓯᓗᓂ ᐊᔪᙱᓐᓂᖃᖅᑐᓂᑦ, ᐃᑲᔪᖅᓯᓗᓂᓪᓗ ᖃᐅᔨᓴᕈᑕᐅᔪᓂᑦ ᕿᒥᕐᕈᒋᐊᕈᑕᐅᔪᓂᓪᓗ.
ᑕᐃᒃᑯᓄᖓ ᐃᑲᔪᖅᑕᐅᒋᐊᖃᖅᑐᓄᑦ, ᓂᕆᐅᓐᓂᖅ ᖃᓄᐃᙱᑦᓯᐊᕐᓂᕐᒧᑦ ᐅᖄᓚᕋᕐᕕᖓ ᐊᑐᐃᓐᓇᖃᖅᐸᑦᑐᑦ ᒫᓐᓇᑦᓴᐅᑎᒋᒨᖓᔪᓂᑦ, ᐃᓕᖅᑯᓯᒧᑦ ᐅᓗᕆᐊᓇᙱᑦᑐᓂᑦ, ᐅᖄᓚᐅᑎᒃᑯᑦ ᐅᖁᒪᐃᓪᓕᐅᖅᑐᓄᑦ ᐃᑲᔪᖅᑕᐅᕕᒻᒥᒃ ᐃᓘᓐᓇᖏᓐᓄᑦ ᓄᓇᖃᖅᑳᖅᓯᒪᔪᓄᑦ ᑲᓇᑕᒥ, 24ᓂᑦ ᐃᑲᕐᕋᓂᑦ ᒪᑐᐃᖓᕙᑦᑐᑦ ᖃᐅᑕᒫᑦ, 7 ᐅᓪᓗᐃᑦ ᐱᓇᓱᐊᕈᑎᑕᒫᑦ (1-855-242-3310 ᐅᑉᕙᓘᓐᓃᑦ ᐃᑭᐊᖅᑭᕕᒃᑯᑎᒍᑦ ᑎᑎᕋᖃᑦᑕᐅᑎᓗᑎᑦ ᐅᕙᓂ hopeforwellness.ca) ᖃᓪᓗᓈᑎᑐᑦ, ᐅᐃᕕᑎᑐᑦ, ᑐᑦᓯᕋᖅᑕᐅᒍᓂᓪᓗ ᐃᓄᒃᑎᑐᑦ, ᑯᕇᑎᑐᑦ ᐊᒻᒪᓗ ᐅᔨᒡᕗᐃᑎᑐᑦ. ᐃᓅᓱᑦᑐᑦ ᐃᑲᔪᖅᑕᐅᒍᒪᔪᑦ ᐅᖄᓚᒍᓐᓇᕐᒥᔪᑦ ᓄᑕᖅᑲᓄᑦ ᐃᑲᔪᖅᑕᐅᕕᒻᒧᖅ ᐅᖄᓚᕕᒻᒧᑦ ᐅᕗᖓ 1-800-668-6868, ᐅᖄᓚᐅᑎᕋᓛᒃᑯᓪᓘᓐᓃᑦ ᑎᑎᕋᕐᕕᖃᕐᓗᑎᑦ ᐅᕗᖓ 686868.
ᐅᖃᐅᓯᐅᓯᒪᔪᑦ
“ᐊᑯᓂᐅᓗᐊᖅᑐᑦ, ᐱᓕᕆᐊᑦᓴᐃᑦ ᐃᓅᓯᕐᒥᒃ ᑭᐱᓯᑎᑦᓯᑦᑕᐃᓕᓂᕐᒨᖓᔪᑦ ᓴᓇᔭᐅᓯᒪᓂᖃᓚᐅᕐᒪᑕ ᐃᓱᒪᒋᔭᖃᕐᓇᑎᑦ ᐃᓄᓐᓂᑦ ᐃᑲᔪᕈᑎᒋᒐᓱᐊᖅᑕᒥᓐᓂ. ᑖᓐᓇ ᐃᓄᓐᓄᑦ-ᑐᕌᖓᔪᖅ, ᓴᓇᔭᐅᓯᒪᓪᓗᓂ ᓯᕗᓕᖅᑕᐅᓪᓗᓂᓪᓗ ᑲᓇᑕᒥ ᐃᓄᐃᑦ ᐃᓅᓯᕐᒥᒃ ᑭᐱᓯᑎᑦᓯᑦᑕᐃᓕᓂᕐᒧᑦ ᖃᓄᖅᑑᕈᑎ ᐊᓯᔾᔨᖅᑐᐃᕙᓪᓕᐊᔪᖅ ᐃᓘᓐᓇᖓᓐᓂ. ᓄᓇᖃᖅᑳᖅᒥᒪᔪᓄᑦ ᐱᔨᑦᓯᕐᕋᕐᓃᑦ ᑲᓇᑕᒥ ᑮᓇᐅᔭᑦᓴᖃᖅᑎᑦᓯᓂᐊᖅᑐᑦ $11 ᒥᓕᔭᓐᓂᑦ ᖄᒃᑲᓐᓂᐊᒍᑦ ᐱᓕᕆᐊᖑᓂᖓᓄᑦ ᖃᓄᖅᑑᕈᑎᐅᑉ ᐃᓄᐃᑦ ᐊᑐᐃᓐᓇᖃᑦᓯᐊᕐᓂᖅᓴᐅᖁᓪᓗᒋᑦ ᑕᒪᒃᑯᓂᖓ ᐃᓅᓯᕐᒥᒃ-ᖁᑉᐸᖅᑎᕆᒋᐊᕐᓂᕐᒨᖓᔪᓂᑦ ᐱᓕᕆᐊᑦᓴᓄᑦ ᐱᔨᑦᓯᕋᐅᑎᑦᓴᓄᓪᓗ. ᐃᑲᔪᖅᓯᓂᒃᑯᑦ ᐊᔪᙱᓐᓂᖃᖅᑐᓂᑦ ᐱᕈᖅᐸᓪᓕᐊᑎᑦᓯᓂᕐᒥ ᑎᒥᐅᔪᓂ ᓄᓇᓕᓐᓂᓪᓗ, ᐃᓄᐃᑦ ᑕᐱᕇᑦ ᑲᓇᑕᒥᒃᑯᑦ ᐋᖅᑭᒋᐊᕆᒍᓐᓇᖃᑦᑕᕐᓂᐊᖅᑐᑦ ᖃᓄᖅᑑᕈᑎᒥᒃ ᐃᓄᐃᑦ ᐃᑲᔪᖅᑕᐅᓂᖅᓴᐅᒍᓐᓇᖁᓪᓗᒋᑦ ᐃᓚᒥᓐᓃᖏᓐᓇᖁᓪᓗᒋᑦ ᓄᓇᖅᑲᑎᒥᓐᓂᓪᓗ.
ᑕᒪᓐᓇ ᖃᓄᖅᑑᕈᑎ ᐱᒻᒪᕆᐅᔪᖅ, ᑕᐃᒪᐃᒻᒥᔪᑦ ᐊᓯᖏᑦᑕ ᒐᕙᒪᒃᑯᖏᑦ ᑲᓇᑕᐅᑉ ᐱᓕᕆᖃᑎᖃᕐᓂᖓᓐᓄᑦ ᐃᓄᐃᑦ ᑕᐱᕇᑦ ᑲᓇᑕᒥᒃᑯᓐᓂᑦ ᑐᙵᕕᑦᓴᖃᑦᓯᐊᖁᓪᓗᒋᑦ ᖃᓄᐃᙱᑦᓯᐊᕐᓂᕐᒧᑦ ᐃᓅᖃᑎᒌᑦᑐᓂ ᓄᓇᖅᑲᑎᒌᑦᑐᓂᓪᓗ. ᐃᑲᔪᖅᓯᒋᐊᖏᓐᓇᕆᐊᖃᖅᑐᒍᑦ ᐱᐅᓂᖅᓴᓂᑦ ᐃᓪᓗᖃᖁᓪᓗᒋᑦ, ᐃᓕᓐᓂᐊᖅᑐᓕᕆᖁᓪᓗᒋᑦ, ᓂᕿᖃᑦᓯᐊᕐᓂᖅᓴᐅᖁᓪᓗᒋᑦ, ᐊᑐᐃᓐᓇᖃᕐᓂᖅᓴᐅᖁᓪᓗᒋᓪᓗ ᐃᓗᓯᓕᕆᓂᕐᒧᑦ ᐱᔨᑦᓯᕋᐅᑎᐅᔪᓂᑦ, ᐊᑦᓱᕉᑎᖃᒃᑲᓐᓂᕐᓗᑎᓪᓗ ᓄᖅᑲᖅᑎᖁᓪᓗᒍ ᓈᒻᒪᒋᔭᐅᖃᑦᑕᙱᓐᓂᖅ ᐱᓕᕆᒡᕕᓐᓂ ᐅᕕᓂᐅᖃᑎᒋᙱᑦᑕᒥᓐᓂᓪᓗ ᐱᐅᒃᓴᙱᓐᓂᐅᕙᑦᑐᖅ – ᓴᖅᑭᓯᒪᔪᑦ ᑕᒪᒃᑯᐊ ᓯᓚᑎᑦᑎᓐᓃᖔᖅᑐᓄᑦ ᐊᐅᓚᑕᐅᓯᒪᓂᕐᒧᑦ. ᐅᐱᒋᕙᒃᑲ ᐃᓄᐃᑦ ᑕᐱᕇᑦ ᑲᓇᑕᒥᒃᑯᑦ ᐊᑦᓱᕉᑎᒌᓐᓇᖅᑕᖏᑦ ᐱᕚᓪᓕᕆᐊᖁᓪᓗᒋᑦ ᐃᓄᐃᑦ ᐊᑕᖏᕐᓗᒋᑦ ᐃᓄᐃᑦ ᓄᓇᖓᓐᓃᑦᑐᑦ, ᓯᕗᓕᖅᐸᓐᓂᖏᓐᓂᓪᓗ ᐃᓅᓯᕐᒥᒃ ᖁᑉᐸᖅᑎᕆᒋᐊᕐᓂᕐᒥᒃ ᓇᓕᒧᒌᑦᑎᑦᓯᒋᐊᕐᓂᕐᒥᓪᓗ.”
ᒪᓕᒐᓕᐅᖅᑎ ᐹᑎ ᕼᐊᔾᑐ
ᒥᓂᔅᑕ ᓄᓇᖃᖅᑳᖅᓯᒪᔪᐃᑦ ᐱᔨᑦᓯᖅᑕᐅᓂᖏᓐᓄᑦ
“ᖁᐊᖅᓵᕐᓇᖅᑐᒦᓐᓇᕐᓂᖓ ᐃᓅᓯᕐᒥᓐᓂ ᑭᐱᓯᕙᑦᑐᑦ ᐃᓄᐃᑦ ᓄᓇᖏᓐᓂ ᐊᑕᖏᖅᑐᖓ, ᐃᓅᓪᓗᑕ, ᓵᙱᐃᓐᓇᖅᐸᑦᑕᕗᑦ ᖃᐅᑕᒫᑦ. ᑕᒪᓐᓇ ᓄᑖᖅ ᑮᓇᐅᔭᑎᒍᑦ ᐃᑲᔫᑎᑦᓴᐅᔪᖅ ᐃᑲᔪᖅᓯᓂᐊᖅᑐᑦ ᐱᓕᕆᐊᖑᒋᐊᕐᓗᓂ ᐊᑦᓱᕈᓐᓇᖅᑐᒦᓐᓂᕆᕙᑦᑕᕗᑦ ᐊᔪᙱᓐᓂᖃᖅᑐᓂᓪᓗ ᐱᕈᖅᐸᓪᓕᐊᑎᑦᓯᓗᓂ ᖃᓄᐃᙱᑦᓯᐊᕐᓂᖅᓴᐅᖁᓪᓗᑕ, ᒪᑭᑕᒋᐊᕐᓂᖅᓴᐅᒍᓐᓇᖅᑐᓂᓪᓗ ᓄᓇᓕᖃᕈᓐᓇᖁᓪᓗᑕ. ᐃᓅᓯᕐᒥᒃ ᑭᐱᓯᑎᑦᓯᑦᑕᐃᓕᓂᖅ ᖁᑦᓯᓂᖅᑕᐅᖏᓐᓇᖅᑐᖅ ᓯᕗᓪᓕᐅᑎᑕᖏᓐᓄᑦ ᐃᓄᐃᑦ ᑕᐱᕇᑦ ᑲᓇᑕᒥᒃᑯᑦ, ᐊᒻᒪᓗ ᑲᓇᑕᒥ ᐃᓄᐃᑦ ᐃᓅᓯᖏᓐᓂᑦ ᑭᐱᓯᑎᑦᓯᑦᑕᐃᓕᓂᕐᒧᑦ ᖃᓄᖅᑑᕈᑎ ᓱᖅᑯᐃᖅᓯᕈᑕᐅᒍᓐᓇᖅᑐᓂᑦ-ᑐᙵᕆᖃᐃᓐᓇᖅᑐᖅ ᐊᔭᐅᖅᑐᐃᒍᑎᐅᓪᓗᓂ ᐱᓕᕆᐊᕆᕙᑦᑕᑦᑎᓐᓄᑦ”
ᓇᑖᓐ ᐅᕙᑦ
ᐃᓄᐃᑦ ᑕᐱᕇᑦ ᑲᓇᑕᒥ ᐊᖏᔪᖅᑳᖓᑦ
ᓱᓕᓂᓖᑦ
- 2016ᒥ, ᒐᕙᒪᒃᑯᖏᑦ ᑲᓇᑕᐅᑉ ᑮᓇᐅᔭᖃᖅᑎᑦᓯᓚᐅᖅᑐᑦ $9 ᒥᓕᔭᓐᓂᑦ ᐊᑐᖅᑕᐅᔪᑦᓴᕐᓂᑦ ᐊᕐᕌᒍᕐᓄᑦ ᐱᖓᓱᓄᑦ ᐊᑐᓕᖅᑎᑕᐅᖁᓪᓗᒍ ᑲᓇᑕᒥ ᐃᓄᐃᑦ ᐃᓅᓯᖏᓐᓂᑦ ᑭᐱᓯᑎᑦᓯᑦᑕᐃᓕᓂᕐᒧᑦ ᖃᓄᖅᑑᕈᑎᒧᑦ. ᑭᖑᓂᐊᒍᑦ 2019ᒥ, ᖄᒃᑲᓐᓂᐊᒍᑦ ᑮᓇᐅᔭᖃᖅᑎᑦᓯᓚᐅᕐᒥᔪᑦ $50 ᒥᓕᔭᓐᓂᑦ ᐊᑐᖅᑕᐅᔪᑦᓴᒫᖑᑎᓪᓗᒋᑦ 10ᓄᑦ ᐊᕐᕌᒍᕐᓄᑦ, ᖄᒥᐅᑕᓕᖅᑕᐅᕙᓪᓗᓂ $5 ᒥᓕᔭᓐᓂᑦ ᐊᕐᕌᒍᑕᒫᑦ ᑲᔪᓯᓂᖓᓂ.
- ᓄᓇᖃᖅᑳᖅᓯᒪᔪᓂᑦ ᐱᔨᑦᓯᕋᖅᑏᑦ ᑲᓇᑕᒥ ᐱᓕᕆᖃᑎᖃᑦᓯᐊᐸᑦᑐᑦ ᓄᓇᖃᖅᑳᖅᓯᒪᔪᓂᑦ ᐱᓇᓱᐊᖃᑎᐅᔪᓂᑦ ᐊᔭᐅᖅᑐᐃᒍᑎᖃᖅᑐᑎᑦ ᑎᑎᖅᑲᖁᑎᓪᓗᐊᑕᐅᔪᓂᑦ ᐱᓕᕆᐊᖑᓯᒪᔪᓄᑦ ᓄᓇᖃᖅᑳᖅᓯᒪᔪᓄᑦ ᐱᓇᓱᐊᖁᑎᐅᔪᓄᑦ, ᑕᐃᓗᐊᕐᓗᒍ ᓄᓇᖃᖅᑳᖅᓯᒪᔪᑦ ᐃᓱᒪᓕᕆᓂᕐᒧᑦ ᖃᓄᐃᙱᑦᓯᐊᕐᓂᕐᒧᑦ ᐱᓕᕆᔾᔪᑎᖓ, ᐅᐱᒍᓱᓐᓂᖅ ᓴᙱᓂᑦᑎᓐᓂᑦ ᐊᒻᒪᓗ ᑲᓇᑕᒥ ᐃᓄᐃᑦ ᐃᓅᓯᖏᓐᓂᑦ ᑭᐱᓯᑎᑦᓯᑦᑕᐃᓕᓂᕐᒧᑦ ᖃᓄᖅᑑᕈᑎᒥ. ᑕᒪᒃᑯᐊ ᐱᖓᓱᖅ ᑎᑎᖅᑲᖁᑏᑦ ᓇᓗᓇᐃᖅᓯᓯᒪᔪᑦ ᐃᓘᓐᓈᒎᖓᔪᒥᑦ ᐊᑐᕆᐊᖅᑐᑦ ᐃᓱᒪᒃᑯᑦ ᖃᓄᐃᙱᑦᓯᐊᕐᓂᕐᒨᖓᔪᓂᑦ ᑐᙵᕕᖃᖅᑐᑎᓪᓗ ᐃᓕᖅᑯᓯᑐᖃᖏᓐᓂᑦ ᑐᕌᖓᓂᖃᖅᑐᑎᓪᓗ-ᓄᓇᖃᖅᑳᖅᓯᒪᔪᓄᑦ ᐊᐳᖅᑕᕈᑕᐅᕙᑦᑐᓂ ᐃᓗᓯᓕᕆᓂᕐᒧᑦ.
- ᑭᐅᔾᔪᑎᐅᓪᓗᓂ ᐊᒥᓲᓗᐊᖅᑐᑦ ᑭᐱᓯᖃᑦᑕᕐᓂᖏᓐᓄᑦ ᐃᓅᓯᒥᓐᓂ ᐃᓚᖏᓐᓂ ᓄᓇᖃᖅᑳᖅᓯᒪᔪᐃᑦ ᓄᓇᖏᓐᓂ, ᒐᕙᒪᒃᑯᖏᑦ ᑲᓇᑕᐅᑉ ᐃᑲᔪᖅᓯᓂᖃᖅᑐᑦ ᐊᔾᔨᒌᙱᑦᑑᑎᓂᑦ ᐱᒋᐊᖅᑎᑕᐅᓯᒪᔪᓂᑦ ᑐᕌᖓᓂᖃᖅᑐᓂ ᐃᓅᓯᕐᒥᒃ ᖁᑉᐸᖅᑎᕆᓂᕐᒨᖓᔪᓂᑦ ᐊᒻᒪᓗ ᐃᓅᓯᕐᒥᒃ ᑭᐱᓯᑎᑦᓯᑦᑕᐃᓕᓂᕐᒨᖓᔪᓂᑦ, ᐱᖃᓯᐅᑎᓪᓗᒍ ᓂᕆᐅᓐᓂᖅ ᖃᓄᐃᙱᑦᓯᐊᕐᓂᕐᒧᑦ ᐅᖄᓚᕋᕐᕕᒃ, ᑲᓇᑕᒥ ᐃᓄᐃᑦ ᐃᓅᓯᖏᓐᓂᑦ ᑭᐱᓯᑎᑦᓯᑦᑕᐃᓕᓂᕐᒧᑦ ᖃᓄᖅᑑᕈᑎ, ᑲᓇᑕᒥ ᓄᓇᖃᖅᑳᖅᓯᒪᔪᑦ ᐃᓅᓱᑦᑐᑦ ᐃᓅᓯᖏᓐᓂᑦ ᑭᐱᓯᑎᑦᓯᑦᑕᐃᓕᓂᕐᒧᑦ ᖃᓄᖅᑑᕈᑎ, ᐊᒻᒪᓗ ᐃᓅᓱᑦᑐᑦ ᓂᕆᐅᓐᓂᖃᕐᓂᖏᓐᓄᑦ ᑮᓇᐅᔭᑦᓴᖅ. ᑖᓐᓇ ᓂᕆᐅᓐᓂᖅ ᖃᓄᐃᙱᑦᓯᐊᕐᓂᕐᒧᑦ ᐅᖄᓚᕋᕐᕕᒃ ᐊᑐᐃᓐᓇᐅᑦᓴᐅᑎᒋᕙᑦᑐᑦ, ᐃᓕᖅᑯᓯᑐᖃᕐᒧᑦ ᐅᓗᕆᐊᓇᙱᑦᑐᓄᑦ, ᐅᖄᓚᐅᑎᒃᑯᑦ ᐅᖁᒪᐃᓪᓕᐅᖅᑐᓂ ᐅᖄᓚᕕᐅᒍᓐᓇᖅᑐᖅ ᓄᓇᖄᖅᑳᖅᓯᒪᔪᓄᑦ ᑲᓇᑕᒥ, 24 ᐃᑲᕐᕋᐃᑦ ᖃᐅᑕᒫᑦ, 7 ᐅᓪᓗᐃᑦ ᐱᓇᓱᐊᕈᓯᑕᒫᑦ (1-855-242-3310, ᐅᑉᕙᓘᓐᓃᑦ ᐃᑭᐊᖅᑭᕕᒃᑯᑎᒍᑦ ᑎᑎᕋᖃᑦᑕᐅᑎᓗᑎᑦ ᐅᕙᓂ hopeforwellness.ca) ᖃᓪᓗᓈᑎᑐᑦ, ᐅᐃᕕᑎᑐᑦ, ᑐᑦᓯᕋᖅᑕᐅᒍᓂᓪᓗ ᐃᓄᒃᑎᑐᑦ, ᑯᕇᑎᑐᑦ ᐊᒻᒪᓗ ᐅᔨᒡᕗᐃᑎᑐᑦ.