Skip to main content
ᑐᓴᖅᑎᑦᓯᔾᔪᑏᑦ

ᓄᑖᖑᓪᓗᑎᒃ ᖃᓄᖅᑑᕈᑎᓕᐊᖑᓯᒪᓪᓗᑎᒃ ᐸᕐᓇᐅᑏᑦ ᑐᑭᒧᐊᒍᑎᒃᓴᐅᓂᐊᖅᑐᑦ ᐃᓄᐃᑦ ᑕᐱᕇᑦ ᑲᓇᑕᒥ ᐱᓕᕆᐊᒃᓴᕆᓂᐊᖅᑕᖏᓐᓄᑦ ᐅᑭᐅᑦ ᓯᑕᒪᑦ ᐊᑐᖅᐸᓪᓕᐊᓂᖏᓐᓂ

By April 9, 2024 No Comments

ᐊᐃᐱᕆ 9, 2024 – ᐋᑐᕙ, ᐋᓐᑎᐊᕆᐅ

ᐃᓄᐃᑦ ᑕᐱᕇᑦ ᑲᓇᑕᒥ ᓴᖅᑮᓯᒪᓕᖅᐳᑦ ᖃᓄᖅᑑᕈᑎᓕᐊᖑᓯᒪᓪᓗᑎᒃ ᐸᕐᓇᐅᑎᓕᐊᕆᓯᒪᔭᒥᖕᓂᒃ 2024-2028 ᐅᑭᐅᖏᑦ ᐊᑐᖅᐸᓪᓕᐊᓂᖏᓐᓂ, ᐃᑲᔪᕈᑎᒃᓴᐅᓪᓗᑎᒃ ᑲᑐᔾᔨᖃᑎᒌᖑᔪᑦ ᐱᓕᕆᐊᒃᓴᕆᓂᐊᖅᑕᖏᓐᓂᒃ ᐅᑭᐅᑦ ᓯᑕᒪᑦ ᐊᑐᖅᐸᓪᓕᐊᑎᓪᓗᒋᑦ. ᑖᒃᑯᐊ ᐸᕐᓇᐅᑏᑦ ᐱᒻᒪᕆᐅᑎᐅᓪᓗᑎᒃ ᓴᐳᔾᔨᒋᐊᖅᑎᐅᓂᕐᒥ ᓴᓇᕐᕈᑎᒃᓴᕆᔭᐅᕗᑦ ᐃᓄᐃᑦ ᑲᑎᓐᓂᖃᖅᓯᒪᓗᑎᒃ ᐊᒻᒪᓗ ᐊᒥᖅᑲᕈᑎᖃᕈᓐᓇᖁᓪᓗᒋᑦ ᓯᕗᓪᓕᖅᐸᐅᑎᑕᐅᖁᔭᒥᓐᓂᒃ.

ᑖᒃᑯᓇᓂ ᐸᕐᓇᐅᑎᓂ ᑐᕌᕐᕕᒃᓴᖁᑎᒋᔭᐅᔪᑦ, ᐱᓕᕆᐊᖑᔪᑦ ᐊᒻᒪᓗ ᓴᖅᑭᑎᑕᐅᓯᒪᓕᕈᓐᓇᖅᑐᑦ ᖃᓄᖅᑑᕈᑎᓕᐊᖑᓯᒪᓪᓗᑎᒃ ᐸᕐᓇᐅᑏᑦ ᑲᑐᔾᔭᐅᓪᓗᑎᒃ ᐃᓱᒪᓕᐅᕈᑎᐅᓯᒪᕗᑦ ᐃᓄᐃᑦ ᐊᖏᕈᑎᖃᖅᓯᒪᔪᑦ ᑲᑐᔾᔨᖃᑎᒌᖏᓐᓂᑦ (ITOs), ᐃᓄᕕᐊᓗᐃᑦ ᐊᕕᒃᑐᖅᓯᒪᓂᕐᒥ ᑯᐊᐳᕇᓴᖓᓂᑦ, ᓄᓇᕗᑦ ᑐᖖᒐᕕᒃ ᑎᒥᖁᑎᖓᓐᓂᑦ, ᒪᑭᕕᒃᑯᓐᓂᑦ ᐊᒻᒪᓗ ᓄᓇᑦᓯᐊᕗᑦ ᒐᕙᒪᖓᓐᓂ, ᐊᒻᒪᓗ ᐊᑐᓕᖅᑎᑕᐅᓂᐊᖅᓱᑎᒃ ᐋᖅᑭᒃᓱᐃᖃᑎᒌᑦᓯᐊᕐᓂᖏᑎᒍᑦ ᑕᒪᕐᒥᐅᓪᓗᑎᒃ ᓯᑕᒪᐅᔪᑦ ᑲᑐᔾᔨᖃᒌᒋᔭᖏᓐᓂᑦ. ᖃᓄᖅᑑᕈᑎᓕᐊᖑᓯᒪᓪᓗᑎᒃ ᐸᕐᓇᐅᑏᑦ ᐃᑲᔪᕈᑎᐅᓂᐊᕐᒥᔪᑦ ᓴᓇᕐᕈᑎᖃᕐᓂᕐᒥᒃ ᖃᐅᔨᒋᐊᖅᐸᓐᓂᐊᕐᓂᕐᒧᑦ ᐃᓄᐃᑦ ᑕᐱᕇᑦ ᑲᓇᑕᒥ ᓯᕗᒻᒧᒃᑎᑦᑎᒋᐊᖅᓯᒪᓕᕐᓂᖏᓐᓄᑦ.

ᐊᖏᔪᒥᒃ ᓱᓕ ᐱᓕᕆᓂᖃᕐᕕᐅᔭᕆᐊᖃᖅᐳᑦ ᐃᓄᐃᑦ ᐃᓅᓯᖃᖅᑎᑕᐅᔪᓐᓇᖁᓪᓗᒋᑦ ᐅᐱᒋᓯᒪᑦᓯᐊᕐᓗᑎᒃ ᐃᒻᒥᓐᓂᒃ ᐊᒻᒪᓗ ᐱᓕᕆᓂᖃᕈᓐᓇᖅᑎᑕᐅᓗᑎᒃ ᓇᖕᒥᓂᖅ ᐃᓱᒪᓕᐅᕈᑎᓕᐅᕈᓐᓇᕐᓂᕆᔭᒥᓐᓂᒃ, ᐊᑐᕈᓐᓇᖅᑎᑕᐅᓗᑎᒃ ᐃᓅᓯᕐᒥᓐᓂ ᐱᐅᓯᑐᖃᕆᔭᒥᓐᓂᒃ ᐊᒻᒪᓗ ᐃᓅᓯᕐᒥᓐᓂ ᓈᒻᒪᒃᑐᒥᒃ ᐃᓅᓯᖃᖃᑕᐅᔪᓐᓇᖅᑎᑕᐅᓗᑎᒃ ᐃᓅᓯᕆᔭᐅᔪᓂᑦ ᐊᓯᖏᓂ ᑲᓇᑕᒥᐅᖃᑎᒥᓐᓂᑦ. ᐃᓄᐃᑦ ᑕᐱᕇᑦ ᑲᓇᑕᒥ ᖃᓄᖅᑑᕈᑎᓕᐊᕆᓯᒪᓪᓗᒋᑦ ᐸᕐᓇᐅᑎᖏᑦ 2024-2028 ᐅᑭᐅᖏᓐᓂ ᐱᓕᕆᐊᒃᓴᖃᖅᑎᑕᐅᓯᒪᕗᑦ 7-ᖑᔪᓂᒃ ᓯᕗᓪᓕᖅᐸᐅᑎᑕᐅᔭᕆᐊᖃᖅᑐᓂᒃ:

  • ᓴᖖᒋᒃᑎᑦᑎᓂᖅ ᐃᓄᐃᑦ ᑲᑎᓐᓂᖃᖅᓯᒪᓂᖏᓂᒃ, ᐊᐅᓚᑦᓯᔨᐅᓂᖏᓐᓂᒃ ᐊᒻᒪᓗ ᓇᖕᒥᓂᖅ ᐃᓱᒪᓕᐅᕈᑎᓕᐅᕈᓐᓇᕐᓂᖏᓂᒃ
  • ᐱᐅᓯᒋᐊᖅᑎᑕᐅᓯᒪᓂᖏᑦ ᐊᑐᐃᓐᓇᐅᑎᑕᐅᔪᑦ ᐃᓕᓐᓂᐊᕐᓂᓕᕆᓂᕐᒥ, ᐋᓐᓂᐊᖅᓯᐅᕐᑎᓕᕆᔾᔪᑎᓄᑦ ᐊᒻᒪᓗ ᑎᒥᒥᒃᑎᒍᑦ ᐃᓱᒪᒃᑯᓪᓘᓐᓃᑦ ᐊᔪᕈᑎᖃᖅᑐᓄᑦ ᐱᔨᑦᓯᕋᕈᑎᔅᓴᐃᑦ
  • ᐱᐅᓯᒋᐊᖅᑎᑕᐅᓂᖏᑦ ᐃᓄᒃᑐᑦ ᐅᖃᐅᓯᖓᑕ ᐆᒻᒪᖅᑎᑕᐅᒋᐊᒃᑲᓐᓂᕐᓂᖓᓄᑦ, ᐋᖅᑭᐅᒪᑎᑕᐅᑦᓯᐊᕐᓂᖓᓄᑦ, ᒥᐊᓂᕆᔭᐅᓯᒪᓂᖓᓄᑦ ᐊᒻᒪᓗ ᖁᕝᕙᖅᑎᑕᐅᒋᐊᖅᐸᓐᓂᖓᑕ
  • ᐃᑲᔪᖅᑐᐃᓯᒪᔪᑦ ᐊᑐᓕᖅᑎᑕᐅᓂᒃᓴᖏᑕ ᑭᒃᑯᑐᐃᓐᓇᐃᑦ ᐱᔪᓐᓇᐅᑎᖃᕐᓂᖏᓂᒃ ᐃᓄᐃᑦ ᓄᓇᖓᓐᓂ
  • ᓯᕗᒻᒧᒋᐊᖅᑎᑦᑎᓯᒪᔪᑦ ᐃᓄᐃᑦ ᓇᖕᒥᓂᖅ ᐃᓱᒪᓕᐅᕈᑎᓕᐅᕈᓐᓇᕐᓂᖏᓂᒃ ᖃᐅᔨᓴᐃᓂᐅᕙᒃᑐᓄᑦ
  • ᐃᑲᔪᕈᑎᒃᓴᖃᖅᑎᑦᓯᓂᖅ ᐱᐅᓯᒋᐊᖅᑎᑕᐅᓂᒃᓴᖏᑕ ᖃᓄᐃᖖᒋᑦᓯᐊᖅᑎᑕᐅᔭᕆᐊᖃᕐᓂᖏᑕ ᐊᒻᒪᓗ ᒥᐊᓂᕆᔭᐅᓯᒪᓂᖏᑕ ᐊᒃᑐᖅᑕᐅᓴᕋᐃᑦᑑᓪᓗᑎᒃ ᐃᓄᖕᓂ ᐃᓅᖃᑎᒌᒃᑐᑦ
  • ᐱᓕᕆᓂᖃᕐᓗᑎᒃ ᐱᔭᕇᖅᑕᐅᓯᒪᓕᖁᓪᓗᒋᑦ ᐃᓄᐃᑦ ᓄᓇᖓᓐᓂ ᐱᓕᕆᕝᕕᐅᓪᓗᑎᒃ ᐊᐅᓚᑦᓯᓂᖃᕐᕕᐅᔪᓂ ᐃᓚᑰᓂᖃᕐᑐᑦ

“7-ᖑᓪᓗᑎᒃ ᓯᕗᓪᓕᖅᐸᐅᑎᑕᒃᓴᐅᔪᐃᑦ ᐃᓕᔭᐅᖃᑕᐅᓯᒪᔪᑦ ᑖᒃᑯᓇᓂ ᖃᓄᖅᑑᕈᑎᓕᐊᖑᓯᒪᓪᓗᑎᒃ ᐸᕐᓇᐅᑎᓂ ᐱᔾᔪᑎᖃᖅᐳᑦ ᐃᓄᐃᑦ ᑕᐱᕇᑦ ᑲᓇᑕᒥ ᐱᓕᕆᐊᒃᓴᖃᕐᓂᖏᓂᒃ ᐋᖅᑭᒃᓱᐃᓯᒪᓕᕆᐊᒥᒃ ᐊᒃᑐᐃᓂᖃᕈᓐᓇᖅᑐᓂᒃ, ᐊᑯᓃᖅᑐᒧᑦ ᐱᐅᓯᒋᐊᖅᑎᑕᐅᓯᒪᓕᕈᓐᓇᖅᑐᓂᒃ ᐃᓅᖃᑎᒋᔭᑦᑕ ᐃᓅᓯᖏᓐᓂᒃ,” ᐅᖃᖅᓱᓂ ᐃᓄᐃᑦ ᑕᐱᕇᑦ ᑲᓇᑕᒥ ᐊᖏᔪᖅᑳᖓᑦ ᓇᐃᑖᓐ ᐆᐱᑦ.

“ᐃᓄᐃᑦ ᑕᐱᕇᑦ ᑲᓇᑕᒥ ᓇᐅᑦᓯᖅᑐᐃᓯᒪᓂᐊᖅᐳᑦ ᓴᐳᑎᓯᒪᒋᐊᕐᓗᒋᓪᓗ ᐊᑐᓕᖅᑎᑕᐅᓯᒪᓕᖁᓪᓗᒋᑦ ᐃᓄᒃᑎᒍᑦ ᑭᒃᑯᑐᐃᓐᓇᐃᑦ ᐱᔪᓐᓇᐅᑎᖃᕐᓂᑎᒋᔭᑦᑎᓐᓂᒃ, ᐊᒻᒪᓗ ᐊᑐᓕᕐᑎᓪᓗᒋᑦ ᓯᓚᕐᔪᐊᓕᒫᒥ ᐱᓕᕆᓂᖃᓕᕈᑎᒃᓴᐅᔪᑦ ᑐᕌᖓᑎᑕᐅᓯᒪᓪᓗᑎᒃ ᓄᓇᕐᔪᐊᕆᔭᐅᔪᐃᑦ ᓴᖅᑮᓯᒪᓕᕆᐊᖃᕐᓂᖏᓐᓂᒃ ᑭᒃᑯᑐᐃᓐᓇᐃᑦ ᐱᔪᓐᓇᐅᑎᖃᕐᓂᖏᓐᓄᑦ ᐊᖏᕈᑎᖃᓕᖅᑎᑦᑎᓯᒪᒋᐊᒥᓐᓂ ᐱᓕᕆᐊᕆᔭᕆᐊᖃᖅᑕᒥᓐᓂᒃ.”

ᐃᓄᐃᑦ ᑕᐱᕇᑦ ᑲᓇᑕᒥ ᖃᓄᖅᑑᕈᑎᓕᐊᖑᓯᒪᓪᓗᑎᒃ ᐸᕐᓇᐅᑏᑦ ᐱᕈᖅᑎᑕᐅᕕᐅᕙᓪᓕᐊᓯᒪᕗᑦ ᐃᖏᕐᕋᑦᑎᐊᖅᑎᑕᐅᓯᒪᓂᖏᑕ ᐊᑐᓕᖅᑎᑕᐅᕙᓪᓕᐊᓯᒪᓂᖏᓐᓂ ᐸᕐᓇᐅᑎᓕᐊᕆᖅᑳᓚᐅᖅᑕᑦᑎᓐᓄᑦ, ᑕᐃᒪᓗ ᓇᓗᓇᐃᑦᑐᑎᒍᑦ ᓯᕗᒻᒧᒋᐊᕈᑎᐅᓯᒪᓕᖅᓱᑎᒃ ᐃᓄᐃᑦ ᐊᐅᓚᑦᓯᔨᐅᔪᓐᓇᕐᓂᖏᓂᒃ ᐊᒻᒪᓗ ᓇᖕᒥᓂᖅ ᐃᓱᒪᓕᐅᕈᑎᓕᐅᕈᓐᓇᕐᓂᖏᓂᒃ, ᐃᓚᖃᖅᑎᓪᓗᒋᑦ ᐋᖅᑭᒃᓱᐃᓯᒪᓕᕐᓂᕐᒥᒃ ᒐᕙᒪᑐᖃᒃᑯᑦ ᐃᓄᐃᑦ ᓄᓇᖓᓐᓂ ᒪᓕᒐᖁᑎᖓᓐᓂᒃ, ᐱᒋᐊᖅᑎᑕᐅᓯᒪᓕᕐᓂᖓᓂᒃ ᐃᓄᐃᑦ ᓱᕈᓰᑦ ᓯᕗᓪᓕᖅᐸᐅᑎᑕᐅᓗᑎᒃ ᐱᓕᕆᐊᖑᔪᒧᑦ ᐊᒻᒪᓗ ᓴᖅᑮᓯᒪᓕᕐᓂᕐᒥᒃ ᐃᓄᐃᑦ ᓄᓇᖓᓐᓂ ᓂᕿᒋᔭᒃᓴᓂᒃ ᐱᓯᒪᓕᕈᓐᓇᕐᓂᕐᒧᑦ ᖃᓄᖅᑑᕈᑎᓕᐊᖑᓯᒪᔪᓂᒃ.

ᐃᓗᐃᒃᑲᐅᓗᒋᑦ ᖃᓄᖅᑑᕈᑎᓕᐊᖑᓯᒪᓪᓗᑎᒃᑦ ᐸᕐᓇᐅᑎᓕᐊᖑᓯᒪᔪᑦ 2024-2028 ᐅᑭᐅᖏᑦ ᐊᑐᖅᐸᓪᓕᐊᑎᓪᓗᒋᑦ ᐅᕙᓂ ᐅᖃᓕᒫᖅᑕᐅᔪᓐᓇᖅᐳᑦ.