ᓯᑦᑎᐱᕆ 27, 2023 – ᓇᐃᓂ, ᓄᓇᑦᓯᐊᕗᑦ
ᔫᓕ ᑎᒃᑯᕐ ᓵᓚᒃᓴᐅᑎᑖᓚᐅᕐᐳᖅ 2023-ᒥ ᐃᓄᐃᑦ ᑕᐱᕇᑦ ᑲᓇᑕᒥ ᐃᓄᐃᑦ ᐊᔪᖖᒋᑦᑎᐊᖅᑑᓂᖏᓐᓄᑦ ᐃᓕᑕᕆᔭᐅᔾᔪᑎᑖᕈᑎᖓᓐᓂᒃ. ᐱᔾᔪᑎᒋᓪᓗᒍ ᓯᕗᓪᓕᖅᐹᐅᓪᓗᓂ ᐃᓅᓪᓗᓂ ᐃᓕᓐᓂᐊᕐᕕᖕᒥ ᐃᓱᒪᑕᕆᔭᐅᓕᖅᑑᓂᖓᓄᑦ ᓇᐃᓂᒥ, ᐊᒻᒪᓗ ᐃᑲᔪᖅᑐᐃᔨᒻᒪᕆᐅᓂᖓᓄᑦ ᐃᓄᒃᑐᑦ ᐃᓕᓐᓂᐊᖅᑎᑦᓯᖃᑦᑕᕐᓂᐅᔪᓄᑦ ᐊᒻᒪᓗ ᑎᒥᒃᑯᑦ ᐃᖃᐃᓕᓴᖅᐸᓐᓂᕐᒧᑦ ᐃᓕᓐᓂᐊᖅᑎᑦᓯᓂᐅᕙᒃᑐᓄᑦ, ᔫᓕ ᐅᐱᓐᓇᖅᑑᓕᖅᑎᑦᑎᑎᓯᒪᕗᖅ ᐃᓄᐃᑦ ᓇᖕᒥᓂᖅ ᐃᓱᒪᓕᐅᕈᑎᓕᐅᖅᑎᐅᔪᓐᓇᕐᓂᖓᓐᓄᑦ ᐃᓕᓐᓂᐊᕐᓂᓕᕆᓂᕐᒥ.
ᔫᓕ ᐃᓕᓴᐃᔨᐅᕗᖅ ᐊᒻᒪᓗ ᐃᓕᓐᓂᐊᕐᕕᖕᒥ ᐃᓱᒪᑕᕆᔭᐅᓪᓗᓂ ᔨᐊᓐᔅ ᕼᐄᕙᓐ ᒥᒧᐊᕆᐅᓪ ᐃᓕᓐᓂᐊᕐᕕᐊᓂ, ᐃᓕᓐᓂᐊᓕᓵᖅᑐᓂᑦ ᖁᑦᑎᖕᓂᖃᖅᑐᓄᑦ 12-ᓂᒃ ᐃᓕᓐᓂᐊᕈᑎᖃᖅᑐᓄᑦ ᓇᐃᓂ ᓄᓇᓕᖓᓂ, ᐅᐊᖕᓇᖅᐸᓯᓛᖑᓪᓗᓂ ᓄᓇᓕᒋᔭᐅᔪᒥ ᓄᓇᑦᓯᐊᕗᑦᒥ. ᐃᓕᓐᓂᐊᖅᑎᑦᓯᔨᐅᓂᕐᒧᑦ ᐃᓕᑕᕆᔭᐅᔾᔪᑎᑖᖅᓯᒪᕗᖅ ᐊᒻᒪᓗ ᖁᑦᑎᖕᓂᖅᐹᒥᒃ ᑎᒥᒃᑯᑦ ᐃᖃᐃᓕᓴᖅᐸᓐᓂᕐᒧᑦ ᐃᓕᓐᓂᐊᕐᓂᓕᕆᔨᐅᓂᕐᒧᑦ ᐊᒻᒪᓗ ᐃᓕᓐᓂᐊᖅᑎᑦᓯᔨᐅᓂᕐᒧᑦ ᐃᓕᓐᓂᐊᕌᓂᒍᑎᖃᖅᓯᒪᓪᓗᓂ ᒥᒧᐊᕆᐅᓪ ᓯᓚᑦᑐᖅᓴᖅᕕᖓᓂᑦ ᓂᐅᕙᐅᓐᓛᓐᒥ ᐊᒻᒪᓗ ᐃᓕᓐᓂᐊᕈᑎᖃᖅᐸᓪᓕᐊᓕᖅᓱᓂ ᖁᑦᑎᖕᓂᖅᐹᓂᒃ (PhD) ᐅᑭᐅᖅᑕᖅᑐᒥ ᐊᒻᒪᓗ ᐅᑭᐅᖅᑕᖅᑐᑉ ᖃᓂᑦᑎᐊᖓᓂ ᓯᕗᓂᒃᓴᕆᔭᐅᔪᓕᕆᓂᕐᓄᑦ ᒥᒧᐊᕆᐅᓪ ᓯᓚᑦᑐᖅᓴᖅᕕᖓᓂ ᓂᐅᕙᐅᓐᓛᓐᒥ (MUN).
ᓛᐸᑐᐊᕆᒥ ᐃᓕᓐᓂᐊᕐᕕᐊᓂ ᑲᑎᒪᔨᖏᓄᑦ ᐃᖅᑲᓇᐃᔭᖅᑎᒋᐅᓯᒪᕗᖅ ᐅᑭᐅᓄᑦ 14-ᓄᑦ, ᓯᕗᓪᓕᖅᐸᐅᓪᓗᓂ ᐊᕐᓇᐅᓪᓗᓂ ᐃᓄᒃ ᐃᓕᓴᐃᔨᐅᓕᓚᐅᕐᐳᖅ ᑎᒥᒃᑯᑦ ᐃᖃᐃᓕᓴᖅᐸᓐᓂᓕᕆᓂᕐᒥ ᐃᓕᓴᐃᔨᐅᓂᕐᒧᑦ, ᓯᕗᓪᓕᖅᐹᒥᒃ ᔮᓐ ᑯᕆᔅᑎᓐ ᐃᐅᕐᕼᐋᕐᑦ ᒥᒧᐊᕆᐅ ᐃᓕᓐᓂᐊᕐᕕᐊᓂ ᒪᑰᕕᒃ, ᓄᓇᑦᓯᐊᕗᑦᒥ, ᐊᒻᒪᓗ ᑭᖑᓂᐊᓂ ᓄᓇᑐᖃᕆᔭᒥᓂ ᓇᐃᓂᒥ. ᑕᐃᒪ ᔨᓐᔅ ᕼᐄᕕᓐ ᒥᒧᐊᕆᐅᓪ ᐅᑭᐅᖕᓄᑦ ᒪᕐᕉᖕᓄᑦ ᐊᑕᐃᓐᓇᖅᑐᒥᒃ ᐃᓄᒃᑐᑦ ᐃᓕᓴᐃᔨᖃᖖᒋᓯᒪᓕᖅᑎᓪᓗᒍ, ᔫᓕ ᐃᓄᒃᑐᑦ ᐃᓕᓴᐃᔨᒋᔭᐅᓕᓚᐅᖅᓯᒪᔪᖅ.
ᐊᕐᕌᓂᐅᓚᐅᕐᑐᖅ, ᔫᓕ ᐃᓕᓴᐃᔨᐅᓂᕐᒥᓂ ᓄᖅᑲᖔᑲᓚᐅᖅᓯᒪᕗᖅ ᐃᓕᓐᓂᐊᕐᕕᖕᒥ ᐃᓱᒪᑕᖖᒍᖅᑎᑕᐅᒐᒥ ᔨᓐᔅ ᕼᐄᕕᓐ ᒥᒧᐊᕆᐅᓪ ᐃᓕᓐᓂᐊᕐᕕᖓᓂ. ᐱᕕᒃᓴᖃᓕᑐᐊᕌᖓᒥ, ᓱᓕ ᐃᑲᔪᖅᑎᐅᕙᒃᑐᖅ ᐃᓄᒃᑎᑐᑦ ᐃᓚᖃᖅᓱᒍ ᐊᑭᓕᖅᓱᒐᐅᓇᓂ ᐃᑲᔪᖅᑎᐅᕙᓐᓂᕐᒥᓄᑦ ᒪᒃᑯᒃᑐᐃᑦ ᐱᖖᒍᐊᕈᑎᖏᓐᓄᑦ. ᐊᐅᔭᐅᓚᐅᖅᑐᒥ, ᒪᕐᕉᖕᓄᑦ ᐱᓇᓱᐊᕈᓰᖕᓄᑦ ᕼᐋᓕᕚᒃᔅᒥ ᐊᐅᓚᑦᓯᔨᒋᔭᐅᓚᐅᕐᐳᖅ ᓂᐅᕙᐅᓐᓛᓐᑦ ᐊᒻᒪᓗ ᓛᐸᑐᐊᕆᒥ ᐃᓅᓱᒃᑐᐃᑦ ᕚᓕᐹᖅᑎᖏᓐᓄᑦ ᓄᐊᔅ ᐊᒥᐊᕆᑲᒥ ᓄᓇᖃᖅᑳᖅᓯᒪᔪᐃᑦ ᐱᖖᒍᐊᕕᒡᔪᐊᖅᑎᑕᐅᑎᓪᓗᒋᑦ. ᐃᑲᔪᖅᑎᒋᔭᐅᖃᑕᐅᒋᕗᖅ ᓄᓇᑦᓯᐊᕗᑦᒥ 45-ᒋᔭᖓᓂᒃ ᐅᑭᐅᑕᒫᑦ ᐅᑭᐊᒃᓵᒥ ᐱᖖᒍᐊᖅᑎᑦᑎᓂᐅᔪᒧᑦ ᐱᖖᒍᐊᖅᑎᑦᑎᔨᒋᔭᐅᓪᓗᓂ ᓇᐃᓂᒥ ᐃᓕᓐᓂᐊᕐᕕᐊᓂ.
“ᔫᓕᐅᑉ ᐃᕿᐊᒋᓇᒍ ᐱᓕᕆᔨᐅᔪᓐᓇᕐᓂᖓ ᐊᒻᒪᓗ ᓯᕗᓕᖅᑎᒋᔭᐅᔪᓐᓇᕐᓂᖓ ᐃᔾᔪᐊᕈᒥᓇᖅᑑᔾᔪᑎᒋᕙᖓ ᑭᒃᑯᑐᐃᓐᓇᓄᑦ ᓄᓇᑦᓯᐊᕗᑦᒥᐅᓕᒫᓄᑦ ᐊᒻᒪᓗ ᐃᓄᐃᑦ ᓄᓇᖓᓐᓂᕐᒥᐅᖑᔪᓄᑦ. ᐃᑲᔪᖅᑐᐃᓂᖓ ᐱᖖᒍᐊᕈᑎᒋᔭᐅᕙᒃᑐᓄᑦ ᐊᒻᒪᓗ ᐅᖃᐅᓯᓕᕆᓂᕐᒥ ᐱᓕᕆᐊᖑᔪᓄᑦ ᐃᑲᔪᕈᑎᐅᓯᒪᕗᑦ ᐃᓄᐃᑦ ᓴᖖᒋᓂᖃᕐᓂᖏᓐᓄᑦ, ᖃᓄᐃᖖᒋᑦᑎᐊᖅᑑᓂᖏᓐᓄᑦ ᐊᒻᒪᓗ ᓴᕆᒪᒍᓱᒃᓗᑎᒃ ᐃᓅᓯᖃᕈᓐᓇᕐᓂᖏᓐᓄᑦ,” ᐅᖃᖅᓱᓂ ᓇᐃᑖᓐ ᐆᐱᑦ, ᐊᖏᔪᖅᑳᖅ ᐃᓄᐃᑦ ᑕᐱᕇᑦ ᑲᓇᑕᒥ. “ᖁᕕᐊᓱᒍᑎᒋᓪᓚᕆᒃᐸᕗᑦ ᐅᐱᒋᓯᒪᓕᕈᓐᓇᕋᑦᑎᒍ ᐃᓄᓐᓄᑦ ᐱᔨᑦᓯᕋᕈᑎᒋᓯᒪᔭᖏᓐᓄᑦ.”
ᐃᓄᐃᑦ ᑕᐱᕇᑦ ᑲᓇᑕᒥ ᐃᓄᐃᑦ ᐊᔪᖖᒋᑦᑎᐊᖅᑑᓂᖏᓐᓄᑦ ᐃᓕᑕᕆᔭᐅᔾᔪᑎᑖᕈᑎᒋᕙᒃᑕᖏᑦ ᐅᑭᐅᑕᒫᑦ ᐊᕙᑎᓄᑦ (20) ᐅᑭᐅᓄᑦ ᑐᓂᕐᕈᑎᒋᔭᐅᕙᒃᓯᒪᓕᖅᐳᑦ. 2023-ᒥ ᐃᓕᑕᕆᔭᐅᔾᔪᑎᑖᖑᕙᒃᑐᑎᒍᑦ, ᐃᓄᐃᑦ ᑕᐱᕇᒃᑯᑦ ᑲᓇᑕᒥ ᐊᒥᓱᐃᖑᔪᓄᑦ ᐃᓕᑕᕆᔭᐅᔾᔪᑎᑖᖅᑎᑦᑎᕙᓐᓂᕐᒥᓐᓂᑦ ᐱᒋᐊᖅᑎᑦᑎᓯᒪᓕᓚᐅᖅᐳᑦ ᐊᑕᐅᓯᕐᒥᒃ ᐃᓄᖕᒥ ᓇᓗᓇᐃᖅᓯᓯᒪᔪᒥᒃ ᐊᔪᖖᒋᓐᓂᖃᖅᑑᓂᖓᓂ ᐃᑲᔪᕈᑎᒃᓴᖃᖅᑎᑦᑎᕙᓐᓂᕐᒥᓄᑦ ᐃᓄᐃᑦ ᓇᖕᒥᓂᖅ ᐃᓱᒪᓕᐅᕈᑎᓕᐅᕈᓐᓇᕐᓂᖏᓐᓄᑦ ᑐᕌᖓᑎᑕᐅᔪᓂᒃ.
2023-ᒥ ᓵᓚᒃᓴᐅᑎᑖᖅᑎᑕᓂᐊᕐᑐᖅ ᓇᓗᓇᐃᖅᑕᐅᓯᒪᓕᓚᐅᕐᐳᖅ 39-ᓂᑦ ᓂᕈᐊᒐᒃᓴᖖᒍᖅᑎᑕᐅᓯᒪᔪᓂᑦ ᐃᓄᐃᑦ ᑕᐱᕇᑦ ᑲᓇᑕᒥ ᓂᕈᐊᖅᖠᓯᒪᓕᖅᑎᐅᓪᓗᑎᒃ ᑲᑎᒪᔨᕋᓛᖏᓐᓂᑦ. ᑕᒪᕐᒥᒃ ᓂᕈᐊᒐᒃᓴᖖᒍᖅᑎᑦᑎᔨᐅᔪᑦ ᐊᒻᒪᓗ ᓂᕈᐊᒐᒃᓴᖖᒍᖅᑎᑕᐅᔪᑦ ᐃᓚᒋᔭᐅᖃᑕᐅᔭᕆᐊᖃᖅᐳᑦ ᐃᓄᐃᑦ ᓄᓇᖓᓐᓂ ᓄᓇᓕᕆᓂᕐᒥ ᐊᖏᕈᑎᒋᔭᐅᓯᒪᔪᓄᑦ. ᐃᓄᐃᑦ ᑕᐱᕇᑦ ᑲᓇᑕᒥ ᐃᓕᑕᕆᔭᐅᔾᔪᑎᑖᕐᑎᑦᑎᔪᒫᓕᕆᕗᑦ ᐃᓄᐃᑦ ᐊᔪᖖᒋᑦᓯᐊᖅᑑᓂᖏᓐᓄᑦ ᐃᓕᑕᕆᔭᐅᔾᔪᑎᓂᒃ ᐅᑭᐊᒃᓵᖓᓂ 2024.
ᐃᓄᐃᑦ ᑕᐱᕇᑦ ᑲᓇᑕᒥ ᑲᓇᑕᓕᒫᒥ ᐱᔾᔪᑎᖃᖅᑎᒋᔭᐅᔫᓪᓗᑎᒃ ᑎᒥᖁᑎᒋᔭᐅᕗᑦ ᒥᐊᓂᖅᓯᔨᐅᓪᓗᑎᒃ ᐊᒻᒪᓗ ᓯᕗᒻᒧᒋᐊᖅᑎᑦᓯᔨᐅᓪᓗᑎᒃ ᐃᓄᐃᑦ ᐱᔪᖕᓇᐅᑎᖏᓐᓂᒃ ᐊᒻᒪᓗ ᐱᓯᒪᓕᕈᒪᔭᖏᓐᓂᒃ ᑲᓇᑕᒥ.
ᑖᒃᑯᓂᖓ ᑐᓴᖅᑎᑕᐅᒋᐊᒃᑲᓐᓂᕈᒪᔪᑦ ᖃᐅᔨᒋᐊᕈᓐᓇᖅᐳᑦ ᐅᕙᓂ
[email protected]