Skip to main content
Announcements

ᔫᓇᐃᑕᑦ ᑭᖕᑕᒻ−ᑲᓇᑕᒥ ᐃᓄᐃᑦ ᓄᓇᖓᑦ ᐊᒻᒪ ᐅᑭᐅᕐᑕᖅᑐᕐᒥ ᖃᐅᔨᓴᕐᓂᖅᒧᑦ ᐱᓕᕆᐊᒃᓴᖅ ᐃᑲᔪᕈᑎᐅᓂᐊᖅᑐᖅ ᐃᓄᐃᑦ ᓇᖕᒥᓂᖅ ᐱᓇᓱᖕᓂᖏᓐᓂᒃ ᖃᐅᔨᓴᕐᓂᒃᑯᑦ

By May 13, 2021 No Comments

ᐋᑐᕚ, ᐋᓐᑎᐅᕆᐅ, ᒪᐃ 7, 2021 − ᐅᓪᓗᒥ ᑐᓴᖅᑎᑦᑎᒐᑦᑕ ᓄᑖᒥᒃ ᑐᑭᓯᖃᑦᑕᐅᑎᓯᒪᓂᖅᒧᑦ ᑎᑎᕋᖅᓯᒪᔪᓂᒃ (MOU) ᐃᑲᔪᕈᑎᓂᒃ ᐅᑯᓂᖓ ᔫᓇᐃᑕᑦ ᑮᖕᑕᒻᑲᓇᑕᒥ ᐃᓄᐃᑦ ᓄᓇᖓᑦ ᐊᒻᒪ ᐅᑭᐅᕐᑕᖅᑐᕐᒥ ᖃᐅᔭᓴᕐᓂᖅᒧᑦ ᐱᓕᕆᐊᒃᓴᒧᑦ ᐊᑎᓕᐅᖅᑕᐅᓚᐅᕐᓂᖓᓂᒃ ᐅᑯᓇᙵᑦ ᐃᓄᐃᑦ ᑕᐱᕇᑦ ᑲᓇᑕᒥ, ᔫᓇᐃᑕᑦ ᑭᖕᑕᒻ ᖃᐅᔨᓴᕐᓂᖅᒧᑦ ᐊᒻᒪ ᐱᓇᓱᐊᕐᓂᖅᒧᑦ, ᐅᑭᐅᕐᑕᖅᑐᖅᒥᑦ ᖃᐅᔨᒪᓂᖅ ᑲᓇᑕᒥ (POLAR), ᑲᓇᑕᒥ ᖃᐅᔨᓴᖅᑐᓕᕆᓂᖅᒧᑦ ᑲᑎᒪᔨᒃᑯᑦ (NRC), ᒥᕐᖑᐃᕐᓯᖅᕕᓕᕆᔨᒃᑯᑦ ᑲᓇᑕᒥ ᐱᓕᕆᕝᕕᖓ, ᐊᒻᒪᓗ ᐅᑯᐊ ᖃᐅᔨᓴᖅᑐᓕᕆᔨᒃᑯᑦ ᑯᐸᐃᒃᒥᑦ.

ᐅᑭᐅᕐᑕᖅᑑᑉ ᓯᓚᖓ ᓱᒃᑲᓕᔪᒥᒃ ᐊᓯᙳᖅᐸᓪᓕᐊᑎᓪᓗᒍ, ᑕᒪᑐᒧᖓ ᑐᑭᓯᓯᒪᓂᖅᑕᖃᕆᐊᖃᕐᒪᑦ ᐊᒻᒪᓗ ᐊᕙᑎᒋᔭᒧᑦ ᖃᓄᐃᓕᐅᕈᑎᑕᖃᕆᐊᖃᖅᖢᓂ, ᐃᓅᖃᑎᒌᖕᓂᒃᑯᓪᓗ ᐊᒻᒪ ᑮᓇᐅᔭᖃᕈᓐᓇᖅᓂᒃᑯᑦ ᐊᒃᑐᖅᑕᐅᔾᔪᑎᒋᔭᐅᔪᓂᒃ. ᐅᓇ ᑐᑭᓯᖃᑦᑕᐅᑎᓯᒪᓂᖅᒧᑦ ᑎᑎᕋᖅᓯᒪᔪᖅ (MOU) ᑐᕌᖓᓗᐊᕐᑐᖅ ᐱᓕᕆᖃᑎᒌᖕᓂᒃᑯᑦ ᐋᖅᑭᒃᓱᐃᕙᓪᓕᐊᓂᖅᒥᒃ ᐊᒻᒪ ᐊᐅᓚᑦᑎᓂᖅᒥᒃ ᐆᒥᖓ ᓄᑖᒥᒃ ᐱᓕᕆᐊᒃᓴᖅᒥᒃ, ᑖᓐᓇᓗ ᒪᓕᒃᓯᒪᓪᓗᓂ ᑲᓇᑕᒥ ᐃᓄᐃᑦ ᖃᓄᐃᓕᐅᕈᑎᖏᓐᓄᑦ ᖃᐅᔨᓴᕐᓂᖅᒧ ᖃᓄᐃᓕᐅᕈᑎᒃᓴᓂᒃ ᐊᒻᒪ ᐱᓕᕆᐊᒃᓴᓂᒃ. ᐊᖏᓂᕐᓴᒃᑯᓪᓕ, ᖃᐅᔨᓴᕐᓂᖅᒧᑦ ᐃᑲᔫᑎᒃᓴᑦ ᐅᕘᓈᖅᑐᑦ ᐱᓕᕆᐊᑎᒍᑦ ᑐᕌᖓᓗᐊᕐᓂᐊᖅᑐᓂᒃ ᐅᑭᐅᕐᑕᖅᑐᕐᒥ ᖃᓄᐃᓕᐅᖅᐸᓪᓕᐊᔾᔪᑎᓂᒃ ᐊᒻᒪᓗ ᐊᒃᑐᐃᔾᔪᑎᓂᒃ ᐃᓄᐃᑦ ᓄᓇᓕᖏᓐᓂᒃ ᐅᖓᑖᓄᓪᓗ, ᐊᒻᒪᓗ ᖃᐅᔨᓇᓱᒃᓂᐊᖅᖢᑎᒃ ᖃᓄᐃᓕᐅᕈᑎᒃᓴᒃᑯᑦ ᐊᒻᒪ ᐱᑐᐃᓐᓇᕆᐊᓕᖕᓂᒃ ᐋᖅᑭᒃᓱᐃᔾᔪᑎᐅᓇᔭᖅᑐᓂᒃ ᐊᒻᒪ ᐊᑐᓕᕈᓐᓇᖅᓂᖅᒥᒃ ᐊᐅᓚᐅᑎᓕᖕᓂᒃ ᐊᒻᒪ ᐱᓕᕆᔾᔪᑎᓂᒃ ᐱᐅᓯᕚᓪᓕᖅᑎᑦᑎᓇᓱᒡᓗᑎᒃ ᐊᕙᑎᒋᔭᐅᔪᓄᑦ ᐊᓯᙳᕈᑎᐅᕙᓪᓕᐊᔪᓂᒃ.

ᑖᒃᑯᐊ ᐱᓕᕆᖃᑎᒌᖕᓂᐊᖅᑐᑦ ᑲᑎᒪᔨᕋᓛᑎᒍᑦ ᐋᖅᑭᒃᓱᐃᓂᐊᕐᒪᑕ ᐱᓕᕆᐊᒧᑦ ᑐᕌᖓᔪᓕᒫᓂᒃ. ᐱᓕᕆᖃᑎᒌᒃᑐᑦ ᐃᒪᓐᓇ ᐱᓕᕆᐊᒃᓴᖃᖅᑐᑦ:

  • ᐋᖅᑭᒃᓱᐃᓗᑎᒃ ᖃᐅᔨᓴᕐᓂᖅᒧᑦ ᓯᕗᓪᓕᐅᑎᔭᕆᐊᓕᖕᓄᑦ ᐱᓕᕆᐊᒃᓴᓂᒃ,
  • ᐃᑲᔪᕐᓗᑎᒃ ᐃᓄᖕᓂᒃ ᐱᓕᕆᕙᓪᓕᐊᑎᑦᑎᓂᒃᑯᑦ,
  • ᐋᖅᑭᒃᓱᐃᓗᑎᒃ ᒪᑯᓂᖓ ᑐᒃᓯᕋᕈᑎᓂᒃ ᐱᔪᒪᔾᔪᑎᒃᓴᓂᒃ,
  • ᐋᖅᑭᒃᓯᓗᑎᒃ ᑲᑐᔾᔨᓂᒃᑯᑦ ᑐᒃᓯᕋᕈᑎᓕᐅᕐᓂᖅᒧᑦ ᐱᓕᕆᖃᑎᒌᖕᓂᐊᖅᑐᓂᒃ,
  • ᖃᐅᔨᓴᕐᓂᖅ ᐱᓕᕆᐊᕆᔭᐅᑎᑕᐅᓗᓂ ᓈᒻᒪᓛᖑᓂᒃᑯᑦ.

ᐱᓕᕆᖃᑎᒌᒃᑐᑦ ᒫᓐᓇ ᐱᓕᕆᔪᑦ ᐱᐊᓂᒃᒐᓱᒃᖢᑎᒃ ᖃᓄᐃᓕᖓᓂᐊᕐᓂᖏᓐᓂᒃ ᑖᔅᓱᒪ ᓄᑖᑉ ᐱᓕᕆᐊᒃᓴᐅᑉ. ᖃᐅᔨᓴᕈᒪᔪᓂᒃ ᑐᒃᓯᕋᕈᑎᓂᒃ ᓴᖅᑭᑦᑎᓛᖅᑐᑦ ᐅᐱᕐᖔᖑᓕᖅᐸᑦ.

ᐅᖃᐅᓰᑦ

“ᑲᓇᑕᒥ ᐱᓇᓱᐊᒐᖃᕐᒪᑕ ᓄᓇᖃᖅᑳᖅᑐᑦ ᓇᖕᒥᓂᖅ ᐱᓇᓱᒍᒪᓂᖏᓐᓄᑦ ᐅᑭᐅᕐᑕᖅᑐᕐᒥ ᖃᐅᔨᓴᕐᓂᖅᒥᒃ ᑕᒪᓐᓇᓗ ᐊᑐᕐᑕᐅᔪᓐᓇᖅᓂᐊᕐᓗᓂ ᐱᓕᕆᔪᓐᓇᖅᑐᓂᒃ ᐅᓄᕐᓯᕙᓪᓕᐊᑎᑦᑎᓂᖅᒧᑦ, ᐃᓕᓐᓂᐊᕐᓂᖅᒧᑦ, ᖃᕋᓴᐅᔭᒃᑯᑦ ᐱᓕᕆᖃᑎᒌᒍᓐᓇᖅᓂᕐᒧᑦ ᐊᒻᒪᓗ ᐱᓇᓱᐃᓐᓇᕈᓐᓇᕐᓂᖅᒧᑦ. ᑕᐃᒪᓐᓇ ᐱᓕᕆᓂᐅᔪᖅ ᖃᐅᔨᓴᕐᓂᖅᒥᒃ ᐅᑭᐅᕐᑕᖅᑐᕐᒥ ᐊᒃᑐᐃᓂᖃᑦᑎᐊᕋᓗᐊᕆᐊᒃᓴᖓᓂᒃ, ᐊᒻᒪ ᐊᑐᕐᑕᐅᔪᓐᓇᕐᓗᓂ ᒐᕙᒪᐅᔪᓄᑦ, ᐊᒻᒪᓗ ᐅᑯᓄᖓ ᓄᓇᖃᖅᑳᖅᑐᓄᑦ ᐃᓄᖕᓄᑦ ᐊᒻᒪ ᓄᓇᓕᖏᓐᓄᑦ ᑖᒃᑯᐊᓗ ᓄᓇᒋᔭᐅᖃᑦᑕᖅᓯᒪᔭᖏᑦ ᖃᐅᔨᓴᖅᑕᐅᕙᓪᓕᐊᓪᓗᑎᒃ. ᐅᓇ ᓄᓇᕐᔪᐊᑎᒍᑦ ᐱᓕᕆᖃᑎᒌᖕᓂᖅ ᓇᓗᓇᐃᖅᓯᔾᔪᑎᐅᔪᖅ ᓄᓇᖃᖅᑳᖅᑐᑦ ᖃᐅᔨᒪᓂᖏᑦᑎᒍ ᐅᑭᐅᕐᑕᖅᑐᕐᒥ ᖃᐅᔨᓴᖅᑐᓕᕆᓂᖅ ᐊᓯᙳᖅᑕᐅᓂᖓᓂᒃ.”

ᓂᕐᓱᕐᓇᕐᑐᖅ ᑖᓂᐅᓪ ᕚᓐᑐᓪ, ᒥᓂᔅᑕ ᐅᑭᐅᖅᑕᖅᑐᓕᕆᓂᖅᒧᑦ

 

“ᐅᑭᐅᕐᑕᖅᑐᖅᒥᑦ ᖃᐅᔨᒪᓂᖅ ᑲᓇᑕᒥ (POLAR) ᐱᓇᓱᐊᒐᖃᕐᑐᖅ ᐃᑲᔪᕐᓂᐊᕐᓗᑎᒃ ᐋᖅᑭᒃᓱᐃᕙᓪᓕᐊᓂᕐᒥᒃ ᐊᑐᖅᑕᐅᔪᓐᓇᖅᑐᓂᒃ ᐅᑭᐅᕐᑕᖅᑑᑉ ᐊᕙᑎᒋᔭᖓᓂᒃ ᖃᐅᔨᒪᓂᕐᒥᒃ ᑕᒪᓐᓇᓗ ᑐᙵᕕᖃᕐᓗᓂ ᓇᖕᒥᓂᖅ ᐱᓇᓱᖕᓂᒃᑯᑦ ᖃᐅᔨᒪᓂᖅᒥᒃ ᑕᒪᒃᑯᐊ ᓄᓇᓖᑦ ᐱᔪᓐᓇᕐᓂᖃᖅᑎᑕᐅᔪᓐᓇᕐᓗᑎᒃ ᖃᐅᔨᒪᓂᒃᑯᑦ ᐃᓱᒪᓕᐅᕆᔨᐅᔪᓐᓇᕐᓂᖏᓐᓂᒃ. ᐃᓇ ᐱᓕᕆᖃᑎᒌᖕᓂᖅ ᓯᕗᒧᒃᐹᓪᓕᕈᑎᐅᔪᖅ ᑕᒪᒃᑯᓄᖓ ᑐᕌᒐᕆᔭᐅᔪᓄᑦ.”

ᔭᓂᕗ ᓰ. ᕼᐊᐳᑦ, ᐊᖓᔪᖅᑳᖅ ᐊᒻᒪ ᐊᐅᓚᑦᑎᔨ, ᐅᑭᐅᕐᑕᖅᑐᖅᒥᑦ ᖃᐅᔨᒪᓂᖅ ᑲᓇᑕᒥ

“ᐋᖅᑭᒃᓯᓂᖅ ᐃᓱᒪᒋᔭᖃᑦᑎᐊᕐᓂᖅᒧᑦ ᐊᒻᒪ ᐃᑲᔪᕈᑎᒃᓴᓂᒃ ᐃᓄᖕᓂ ᓇᖕᒥᓂᖅ ᐱᓇᓱᖕᓂᒃᑯᑦ ᖃᐅᔨᓴᕐᓂᖅᒥᒃ ᐱᒋᐊᕈᑎᒻᒪᕆᐅᕗᖅ ᐱᐅᓯᕚᓪᓕᖅᑎᑦᑎᓂᖅᒧᑦ ᐊᒻᒪ ᐊᒃᑐᕈᑎᐅᔪᓄᑦ ᖃᐅᔨᓴᕐᓂᖅᒥᒃ ᐃᓄᐃᑦ ᓄᓇᖓᓂᒃ. ᐅᓇ ᖃᐅᔨᓴᕐᓂᖅᒧᑦ ᐱᓕᕆᐊᖑᔪᖅ ᐋᖅᑭᒃᑕᐅᔪᖅ ᐃᑲᔪᕈᑎᐅᓂᐊᕐᑐᖅ ᐱᓕᕆᖃᑎᒌᖕᓂᒃᑯᑦ ᐋᖅᑭᒃᓱᐃᖃᑎᒌᖕᓂᖅᒥᒃ ᐱᓕᕆᐊᒧᑦ ᖃᐅᔨᓴᕈᑎᐅᓂᐊᖅᑐᓂᒃ ᓯᕗᓪᓕᐅᑎᑕᐅᔪᓂᒃ ᐊᒻᒪᓗ ᐱᓕᕆᖃᑎᒌᖕᓂᖅᒥᒃ ᐅᑯᓂᖓ ᐃᓄᐃᑦ ᐊᒻᒪ ᐊᓯᖏᑦ ᖃᐅᔨᓴᖅᑏᑦ ᖃᓄᖅ ᐱᓕᕆᐊᖃᕐᓂᖏᓐᓂᒃ ᖃᐅᔨᓴᕐᓂᒃᑯᑦ. ᔫᓇᐃᑕᑦ ᑭᖕᑕᒻᑲᓇᑕᒥ ᐃᓄᐃᑦ ᓄᓇᖓᑦ ᐊᒻᒪ ᐅᑭᐅᕐᑕᖅᑐᕐᒧᑦ ᖃᐅᔨᓴᕐᓂᖅᒧᑦ ᐱᓕᕆᐊᒃᓴᖅ ᐱᒋᐊᒃᑲᓐᓂᕈᑎᐅᕗᖅ ᖃᐅᔨᓴᕐᓂᖅᒥᒃ ᖃᓄᐃᓕᐅᕐᓂᖅᒥᒃ ᐃᓄᐃᑦ ᓄᓇᖓᓂᒃ, ᑖᓐᓇᓗ ᐋᕿᒃᓯᔾᔪᑎᐅᓪᓗᓂ ᖃᓄᖅ ᐃᓄᐃᑦ, ᒐᕙᒪᐅᔪᑦ, ᖃᐅᔨᓴᕐᕕᓕᕆᔨᒃᑯᑦ, ᐊᒻᒪᓗ ᖃᐅᔨᓴᖅᑎᐅᔪᑦ ᐱᓕᕆᖃᑎᒌᖃᑦᑕᕐᓂᐊᕐᓂᖏᓐᓄᑦ.”

ᓇᐃᑕᓐ ᐅᐱᐊᑦ, ᐊᖓᔪᖅᑳᖅ, ᐃᓄᐃᑦ ᑕᐱᕇᑦ ᑲᓇᑕᒥ

“ᓯᓚᐅᑉ ᐊᓯᙳᖅᐸᓪᓕᐊᓂᖓ ᓱᓕ ᐅᑭᐅᕐᑕᖅᑐᕐᒥᑦ ᐊᓯᙳᖅᑎᑦᑎᕙᓪᓕᐊᓪᓚᕆᒃᑐᖅ. ᑐᑭᓯᓯᒪᓂᖅᓴᐅᔭᕆᐊᖃᓕᕋᑦᑕ ᐊᒻᒪᓗ ᐱᓕᕆᐊᖃᕐᓂᖅᓴᐅᓗᑕ ᐊᕙᑎᓕᕆᓂᖅᒥᒃ, ᐃᓅᖃᑎᒌᖕᓂᖅᒧᑦ, ᐊᕙᑎᓕᕆᓂᖅᒧᑦ. ᐊᐅᓚᐅᑎᓕᕆᓂᖅᒧᑦ, ᐱᓕᕆᕝᕕᓕᐅᖅᐸᓪᓕᐊᓂᒃᑯ ᐊᒻᒪᓗ ᐃᓕᖅᑯᓯᕐᒧᑦ ᐊᒃᑐᐃᔾᔪᑎᓂᒃ ᐊᓯᙳᕈᑎᐅᔪᒧᑦ ᐊᒻᒪᓗ ᐱᓕᕆᐊᖑᓗᓂ ᐱᓕᕆᖃᑎᒌᓪᓗᑎᒃ ᑕᒪᑐᒧᖓ ᐊᒃᑐᖅᑕᐅᓯᒪᓛᖑᔪᑦ. ᐅᓇ ᓄᑖᖅ ᐱᓕᕆᖃᑎᒌᓕᕐᓂᖅ ᔫᓇᐃᑕᑦ ᑭᖕᑕᒻ ᖃᐅᔨᓴᕐᓂᖅᒧᑦ ᐊᒻᒪ ᐱᓇᓱᐊᕐᓂᖅᒧᑦ ᑲᑎᖃᑎᒋᔾᔪᑎᒋᔭᐅᓂᐊᕐᑐᖅ ᖃᐅᔨᓴᖅᑎᓂᒃ ᔫᓇᐃᑕᑦ ᑭᖕᑕᒻᒥᑦ, ᑲᓇᑕᒥ ᐊᒻᒪᓗ ᐃᓄᐃᑦ ᓄᓇᖏᓐᓃᑦᑐ, ᑖᒃᑯᐊ ᐱᓕᕆᖃᑎᒌᓕᕐᓗᑎᒃ ᖃᐅᔨᒪᔭᖏᓐᓂᒃ ᐊᒻᒪ ᐊᔪᖏᓐᓂᖏᓐᓂᒃ ᐊᑐᖅᑐᐃᓐᓇᐅᓗᑎᒃ. ᑕᒪᓐᓇ ᐱᒻᒪᕆᐅᒋᔭᖃᕐᓂᒃᑰᖓᔭᕆᐊᖃᕐᓂᐊᖅᑐᖅ ᐊᒻᒪᓗ ᐃᓱᒪᒋᔭᖃᑦᑎᐊᕐᓂᒃᑯᑦ ᑕᒪᐃᓐᓂ ᖃᐅᔨᒪᓂᖏᑦᑎᒍᑦ ᐊᔾᔨᒌᖕᓂᒃᑯᑦ ᑕᐃᒪᓐᓇᓗ ᑖᓐᓇ ᐱᒋᐊᓕᓵᕈᑎᐅᓂᐊᖅᖢᓂ ᖃᓄᖅ ᐅᑭᐅᕐᑕᖅᑐᖅ ᖃᐅᔨᓴᖅᑕᐅᖃᑦᑕᕐᓂᖓᓄᑦ. ᓂᕆᐅᒻᒪᕆᒃᑐᖓ ᑖᓐᓇ ᐱᒻᒪᕆᐊᓗᒃ ᐱᓕᕆᐊᒃᓴᖅ ᐋᖅᑭᒃᑕᐅᕙᓪᓕᐊᓂᐊᕐᒪᑦ ᐊᒻᒪᓗ ᐅᕙᑦᑎᓐᓂᒃ ᑲᑎᑎᑦᑎᔾᔪᑎᐅᓗᓂ ᖃᓄᐃᓕᐅᕈᑎᒃᓴᓕᕆᓂᒃᑯ ᐊᒻᒪ ᓴᐳᔾᔨᓯᒪᓂᕐᒥᒃ ᐊᕙᑎᒋᔭᑦᑎᓐᓂᒃ.”

ᐃᓕᓴᐃᔨ ᑯᕆᔅᑕᕗ ᓯᒥᑦ, ᓄᓇᕐᔪᐊᒥ ᐱᓕᕆᔨᒻᒪᕆᒃ, ᔫᓇᐃᑦ ᑭᖕᑕᒻ ᖃᐅᔨᓴᕐᓂᖅᒧᑦ ᐊᒻᒪ ᐱᓇᓱᐊᕐᓂᖅᒧᑦ ᐊᒻᒪ ᐊᐅᓚᑦᑎᔨᐅᓪᓗᓂ ᐃᒃᓯᕙᐅᑕᖅ, ᓴᓇᐅᒐᓄᑦ ᐊᒻᒪ ᐃᓅᓯᕐᓄᑦ ᖃᐅᔨᓴᕐᓂᖅᒧᑦ ᑲᑎᒪᔨᒃᑯᑦ

 

“ᑲᓇᑕᒥ ᖃᐅᔨᓴᖅᑐᓕᕆᓂᖅᒧᑦ ᑲᑎᒪᔨᒃᑯᑦ (NRC) ᓂᕆᐅᒻᒪᕆᒃᑐᑦ ᐃᑲᔪᖅᑐᐃᓂᐊᕐᓂᖏᓐᓂᒃ ᔫᓇᐃᑕᑦ ᑭᖕᑕᒻᑲᓇᑕᒥ ᐃᓄᐃᑦ ᓄᓇᖓᓂᒃ ᐊᒻᒪ ᐅᑭᐅᕐᑕᖅᑐᕐᒥ ᖃᐅᔨᓴᕐᓂᖅᒧᑦ ᐱᓕᕆᐊᒃᓴᕐᒥ ᒪᐅᓇ ᐱᓕᕆᖃᑎᒌᖕᓂᒃᑯᑦ ᖃᐅᔨᓴᖃᑦᑕᕐᓂᖅᒥᒃ ᐊᒻᒪ ᐱᕙᓪᓕᐊᔪᓕᕆᓂᖅᒥᒃ, ᑐᕌᒐᖃᖅᑐᓂᒃ ᐃᓱᒫᓘᑎᐅᓗᐊᖅᑐᓂᒃ ᐊᒃᑐᕈᑎᐅᔪᓂᒃ ᐅᑭᐅᕐᑕᖅᑐᕐᒧᑦ ᐊᒻᒪ ᐅᑭᐅᕐᑕᖅᑐᕐᒦᑦᑐᓄᑦ.”

ᒥᑦᔅ ᑕᐃᕕᔅ, ᐊᖓᔪᖅᑳᖅ, ᑲᓇᑕᒥ ᖃᐅᔨᓴᖅᑐᓕᕆᓂᖅᒧᑦ ᑲᑎᒪᔨᒃᑯᑦ.

 

“ᐅᑯᐊ ᖃᐅᔨᓴᖅᑐᓕᕆᔨᒃᑯᑦ ᑯᐸᐃᒃᒥᑦ ᖁᕕᐊᓱᒃᑎᐊᖅᑐᑦ ᐃᓚᐅᑎᑕᐅᔪᓐᓇᕐᓂᖏᓐᓂᒃ ᐱᓕᕆᖃᑎᒌᒃᑐᓂᒃ ᐃᓄᖕᓂᒃ, ᑲᓇᑕᒥᐅᑕᓂ ᐊᒻᒪ ᐳᕆᑎᔅᒥᐅᑕᓂᒃ ᐃᑲᔪᕋᓱᖕᓂᒃᑯᑦ ᐱᕙᓪᓕᐊᔪᓕᕆᔭᐅᓂᐊᖅᑐᖅ ᐊᕐᕌᒍ ᐅᖓᑖᓅᖓᔪᓂᒃ ᐊᔾᔨᒌᙱᑦᑑᑎᓄᑦ ᖃᐅᔨᓴᕐᓂᖅᒧᑦ ᐱᓕᕆᐊᒃᓴᓂᒃ, ᓴᓇᖃᑕᐅᓂᖅᒥᒃ ᐅᑯᓂᖓ ᐃᓄᖕᓂ ᑭᒡᒐᑦᑐᐃᔪᓂᒃ ᓄᓇᓕᖕᓂ ᐱᔾᔪᑎᖃᕐᓗᑎᒃ ᓯᕗᓪᓕᐅᑎᑕᐅᖁᔭᖏᓐᓂᒃ ᐊᒻᒪ ᖃᐅᔨᓴᕐᓂᖅᒧᑦ ᐱᓕᕆᐊᖃᕐᓂᖅᒧᑦ. ᖃᐅᔨᓴᕐᓂᖅ ᐊᒃᑐᐃᔾᔪᑎᖃᕐᓂᐊᕐᓗᓂ ᐃᓄᐃᑦ ᓄᓇᓕᖏᓐᓂᒃ, ᐱᒻᒪᕆᐊᓘᕗᖅ ᑮᒡᒐᖅᑐᐃᔨᖏᑦ ᐃᓚᐅᑎᑕᐅᕙᒡᓗᑎᒃ ᑕᒪᐃᓐᓂ ᐱᓕᕆᐊᖑᕙᓪᓕᐊᓂᖓᒍᑦ ᖃᐅᔨᓴᕐᓂᐅᑉ. ᓂᕆᐅᒃᐳᖓ ᑐᓴᓛᕐᓂᑦᑎᓐᓂᒃ ᐱᓕᕆᐊᕆᔭᐅᔪᓂᒃ ᒪᑯᑎᒎᓇ ᑐᒃᓯᕋᕈᑎᓕᐅᕐᓂᒃᑯᑦ ᐱᓕᕆᐊᖑᔪᓂᒃ.”

ᕆᒥ ᑭᕌᓐ, ᐊᖓᔪᖅᑳᖅ ᖃᐅᔨᓴᖅᑎ ᑯᐸᐃᒃᒥᑦ, ᖃᐅᔨᓴᖅᑐᓕᕆᔨᒃᑯᑦ ᑯᐸᐃᒃᒥᑦ

 

 

“ᒥᕐᖑᐃᕐᓯᕐᕕᓕᕆᔨᒃᑯᑦ ᑲᓇᑕᒥ ᖁᕕᐊᓱᒃᑐᑦ ᐃᑲᔪᕐᓂᐊᕐᓂᖏᓐᓂᒃ ᓄᓇᕐᔪᐊᒃᑯᑦ ᐱᓕᕆᓂᐅᓂᐊᖅᑐᖅ ᐃᓚᐅᓕᖅᑎᑦᑎᓯᒪᓂᖓᓂᒃ ᑲᓇᑕᒥ ᐃᓄᐃᑦ ᖃᓄᐃᓕᐅᕈᑎᖏᓐᓄᑦ ᖃᐅᔨᓴᕐᓂᖅᒧᑦ. ᐃᑲᔪᖅᑐᐃᑦᑎᐊᕐᓂᖅ ᐃᓄᐃᑦ ᓇᖕᒥᓂᖅ ᐱᓕᕆᔪᒪᓂᖏᓐᓂᒃ ᖃᐅᔨᓴᕐᓂᒃᑯᑦ ᐃᑲᔪᕈᑎᒻᒪᕆᐅᔪᖅ ᒫᓐᓇ ᐃᓄᖕᓄᑦ ᐊᒻᒪ ᓯᕗᓂᕆᓂᐊᖅᑕᖏᓐᓄᑦ, ᐱᓕᕆᖃᒌᒃᑎᓪᓗᑕ ᓴᐳᔾᔨᓯᒪᓇᓱᖕᓂᖅᒥᒃ ᖁᑦᑎᕐᑐᕐᒥᑦ ᐅᓇ ᓯᓚᐅᑉ ᐊᓯᙳᖅᐸᓪᓕᐊᓂᖓ ᑕᕝᕙᐅᑎᓪᓗᒍ.”

ᓂᕐᓱᕐᓇᖅᑐᖅ ᔮᓇᑕᓐ ᕕᐊᑭᓐᓴᓐ
ᒥᓂᔅᑕ ᐊᕙᑎᓕᕆᓂᖅᒧᑦ ᐊᒻᒪ ᓯᓚᐅᑉ ᐊᓯᙳᖅᐸᓪᓕᐊᓂᖓᓄᑦ ᐊᒻᒪᓗ ᒥᓂᔅᑕ ᑲᒪᒋᔭᖃᖅᑐᖅ ᒥᕐᖑᐃᕐᓯᕐᕕᓕᕆᔨᒃᑯᓐᓂᑦ ᑲᓇᑕᒥ

 

ᓇᐃᑦᑑᑏᑦ ᓱᓕᔪᑦ

  • ᐃᓄᐃᑦ ᑕᐱᕇᑦ ᑲᓇᑕᒥ (ITK) ᑭᒡᒐᖅᑐᐃᔨᐅᓪᓗᑎᒃ ᑲᑐᔾᔨᖃᑎᒌᖑᔪᑦ ᓴᐳᔾᔨᓯᒪᔨᐅᓪᓗᑎᒃ ᐊᒻᒪ ᓯᕗᒧᒋᐊᖅᑎᑦᑎᔨᐅᓪᓗᑎᒃ ᐱᔪᓐᓇᐅᑎᒋᔭᐅᔪᓂᒃ ᐊᒻᒪ ᐃᓱᒪᒋᔭᐅᔪᓂᒃ ᐃᓄᖕᓄᑦ ᑲᓇᑕᒥ.ᐋᖅᑭᒃᓱᐃᓚᐅᕐᑐᑦ ᐆᒥᖓ ᑲᓇᑕᒥ ᐃᓄᐃᑦ ᖃᓄᐃᓕᐅᕈᑎᖏᓐᓄᑦ ᖃᐅᔨᓴᕐᓂᖅᒧᑦ (NISR), ᑖᓐᓇᓗ ᓇᓗᓇᐃᖅᓯᓯᒪᓪᓗᓂ ᓇᐅᒃᑯᑦ ᐱᓕᕆᖃᑎᒌᖕᓂᒃᑯ ᐊᒻᒪ ᖃᓄᐃᓕᐅᖅᐸᓪᓕᐊᓂᒃᑯ ᓴᙱᒃᑎᑉᐹᓪᓕᕈᑎᐅᔪᓐᓇᕐᒪᖔᑦ ᐊᒃᑐᐃᔾᔪᑎᓂᒃ ᐊᒻᒪ ᐊᑐᕈᑎᖃᖅᑐᓂᒃ ᐃᓄᖕᓄᑦ ᖃᐅᔨᓴᕐᓂᒃᑯᑦ ᐃᓄᐃᑦ ᓄᓇᖓᓂ.
  • ᔫᓇᐃᑕᑦ ᑭᖕᑕᒻ ᖃᐅᔨᓴᕐᓂᖅᒧᑦ ᐊᒻᒪ ᐱᓇᓱᐊᕐᓂᖅᒧᑦ (UKRI) ᐱᓕᕆᕝᕕᖕᓄᑦ ᐱᓕᕆᔨᐅᙱᑦᑐᖅ ᑭᒃᑯᓕᒫᓄᑦ ᐱᓕᕆᔨᐅᓪᓗᑎᒃ ᐃᑲᔪᖅᑕᐅᓪᓗᑎᒃ ᓇᖕᒥᓂᖅ ᐱᓕᕆᐊᖃᕐᓂᖅᒧᑦ, ᐆᒻᒪᖅᑯᑎᓕᕆᓂᖅᒧᑦ ᐊᒻᒪ ᓴᓇᕝᕕᓕᕆᓂᖅᒧᑦ ᖃᓄᐃᓕᐅᕈᑎᒃᓴᓕᕆᔨᒃ ᒐᕙᒪᒃᑯᓐᓄᑦ ᔫᓇᐃᑕᑦ ᑭᖕᑕᒻᒥᑦ. ᐅᓇ ᐱᓕᕆᓂᖅ ᐃᓚᖃᖅᑐᑦ ᑎᓴᒪᓂᒃ ᑲᑎᒪᔨᓂ ᐃᓚᐅᑎᑦᑎᓪᓗᑎᒃ ᐅᑯᓇᙵᑦ ᔫᓇᐃᑕᑦ ᑭᖕᑕᒻ ᖃᐅᔨᓴᕐᓂᖅᒧᑦ ᐊᒻᒪ ᐱᓇᓱᐊᕐᓂᖅᒧᑦ (UKRI): ᓄᓇᒥᙶᖅᑐᓂᒃ ᐊᕙᑎᓕᕆᓂᖅᒧᑦ ᖃᐅᔨᓴᕐᓂᖅᒧᑦ ᑲᑎᒪᔨᑦ (NERC), ᓴᓇᐅᒐᓄᑦ ᐊᒻᒪ ᐃᓅᓯᕐᓄᑦ ᖃᐅᔨᓴᕐᓂᖅᒧᑦ ᑲᑎᒪᔨᒃᑯᑦ (AHRC), ᐊᐅᓚᐅᑎᓕᕆᓂᖅᒧᑦ ᐊᒻᒪ ᓴᖅᑭᔮᖅᑐᒃᑯᑦ ᖃᐅᔨᓴᖅᑐᓕᕆᓂᖅᒧᑦ ᑲᑎᒪᔨᑦ (EPSRC), ᐊᒻᒪᓗ ᑭᓇᐅᔭᓕᐅᕈᑎᓕᕆᓂᒃᑯᑦ ᐊᒻᒪ ᐃᓅᖃᑎᒌᖕᓂᖅᒧᑦ ᖃᐅᔨᓴᕐᓂᖅᒥᒃ ᑲᑎᒪᔨᓂᒃ (ESRC).
  • ᐅᑭᐅᕐᑕᖅᑐᖅᒥᑦ ᖃᐅᔨᒪᓂᖅ ᑲᓇᑕᒥ (POLAR) ᑲᓇᑕᒥ ᒐᕙᒪᒃᑯᓐᓄᑦ ᐱᓕᕆᕝᕕᐅᔪᖅ ᑲᒪᒋᔭᖃᖅᖢᑎᒃ ᓴᙱᑎᑦᑎᕚᓪᓕᕐᓂᖅᒥᒃ ᑲᓇᑕᒥᐅᑕᓂ ᐅᑭᐅᕐᑕᖅᑐᕐᒥ ᖃᐅᔨᓴᖅᑐᓕᕆᓂᒃᑯᑦ ᐊᒻᒪ ᐱᓕᕆᔾᔪᑎᓕᕆᓂᒃᑯᑦ. ᐅᕙᓃᑦᑐᖅ ᑲᓇᑕᒥ ᖁᑦᑎᒃᑯᕐᒥᐅᓄᑦ ᖃᐅᔨᓴᖅᕕᒃᒥᑦ (CHARS) ᐃᓕᓐᓂᐊᖅᕕᒃᒥᑦ, ᑖᓐᓇᓗ ᐊᐅᓚᑕᐅᓪᓗᓂ ᐅᕙᓂ ᐃᖃᓗᒃᑑᑦᑎᐊᖅ, ᓄᓇᕗᑦ.
  • ᑲᓇᑕᒥ ᖃᐅᔨᓴᖅᑐᓕᕆᓂᖅᒧᑦ ᑲᑎᒪᔨᒃᑯᑦ ᑲᓇᑕᒥ ᐊᖏᓛᖑᔪᖅ ᒐᕙᒪᑐᖃᒃᑯᑦ ᖃᐅᔨᓴᕐᓂᖅᒧᑦ ᐊᒻᒪ ᐱᕙᓪᓕᐊᓂᖅᒧᑦ ᑲᑐᔾᔨᖃᑎᒌᓂᒃ. ᑕᒪᒃᑯᐊ ᐅᑭᐅᕐᑕᖅᑐᕐᒥᑦ ᐱᓕᕆᐊᒃᓴᐅᔪᑦ ᑐᕌᒐᖃᕐᓂᐊᖅᑐᑦ ᑎᓴᒪᓪᓗᐊᑕᕐᓂᒃ ᖃᐅᔨᓴᕈᑎᐅᔪᓂᒃ: ᐃᒡᓗᓕᕆᓂᖅ, ᐋᓐᓂᐊᖃᕐᓇᙱᑦᑐᓕᕆᓂᖅ, ᓂᕿᓂᒃ ᐊᒻᒪ ᐃᒪᕐᒥᒃ.
  • ᒥᕐᖑᐃᕐᓯᖅᕕᓕᕆᔨᒃᑯᑦ ᑲᓇᑕᒥ ᐱᓕᕆᕝᕕᒃ ᑲᒪᒋᔭᖃᖅᑐᖅ ᑕᒪᒃᑯᐊ ᑲᓇᑕᒥ ᒥᕐᖑᐃᖅᓯᕕᐅᔪᑦ, ᐃᓂᒋᔭᐅᔪᕕᓂᑐᖃᐃᑦ ᐊᒻᒪᓗ ᑕᒪᐊᖔᖓᔪᑦ ᐃᑦᑕᕐᓂᓴᐃᑦ ᐃᓂᕕᓂᐅᔪᑦ ᓴᐳᔾᔭᐅᓯᒪᖕᒪᑕ ᐊᒻᒪ ᐊᓯᐅᑎᑕᐅᑦᑕᐃᓕᓪᓗᑎᒃ ᒪᓐᓇᒧᑦ ᐊᒻᒪ ᓯᕗᓂᒃᓴᒧᑦ ᐃᓄᒋᔭᐅᓂᐊᖅᑐᓄᑦ.
  • ᐅᓇ ᖃᐅᔨᓴᖅᑐᓕᕆᔨᒃᑯᑦ ᑯᐸᐃᒃᒥᑦ ᓴᕿᑎᑦᑎᕙᒃᑐᑦ ᐊᒻᒪ ᑮᓇᐅᔭᑎᒍᑦ ᐃᑲᔫᑎᖃᖅᑎᑦᑎᕙᒃᖢᑎᒃ ᒪᑯᓄᖓ: ᖃᐅᔨᓴᕐᓂᖅ; ᖃᐅᔨᓴᖅᑐᓕᕆᓂᒃᑯᑦ ᖃᐅᔨᔭᐅᕙᓪᓕᐊᔪᓂᒃ ᑐᓴᐅᒪᔭᐅᑎᑦᑎᓂᖅ; ᐊᒻᒪᓗ ᐊᔪᕈᓐᓃᖅᓴᖅᑎᑦᑎᓂᖅᒥᒃ ᖃᐅᔨᓴᖅᑎᓂᒃ ᓄᓇᐃᓐᓇᕐᒦᒃᑐᓂᒃ ᒪᑯᓂᖓ ᓄᓇᒦᙶᖅᑐᓂᒃ ᖃᐅᔨᓴᖅᑐᓕᕆᓂᖅᒥᒃ, ᓇᐃᓴᐅᓯᕆᓂᒃᑯᑦ ᖃᐅᔨᓴᖅᑐᓕᕆᓂᖅ, ᐊᐅᓚᐅᑎᖃᖅᑐᓂᒃ, ᐋᓐᓂᐊᖃᕐᓇᙱᑦᑐᓕᕆᓂᖅᒧᑦ ᐊᒻᒪ ᐃᓅᖃᑎᒌᖕᓂᖅᒧᑦ ᖃᐅᔨᓴᖅᑐᓕᕆᓂᖅᒥᒃ ᑯᐸᐃᒃᒥᑦ.

ᑲᓲᒪᕝᕖᑦ ᑐᕌᖓᖃᓯᐅᑎᔪᑦ

ᐃᓄᐃᑦ ᑕᐱᕇᑦ ᑲᓇᑕᒥ

ᑲᓇᑕᒥ ᐃᓄᖕᓄᑦ ᐸᕐᓇᐅᑎᐅᔪᖅ ᖃᐅᔨᓴᕐᓂᕐᒧᑦ

ᔫᓇᐃᑦ ᑭᖕᑕᒻ ᖃᐅᔨᓴᕐᓂᖅᒧᑦ ᐊᒻᒪ ᐱᓇᓱᐊᕐᓂᖅᒧᑦ

ᐅᑭᐅᕐᑕᖅᑐᖅᒥᑦ ᖃᐅᔨᒪᓂᖅ ᑲᓇᑕᒥ 2020-2025 ᖃᓄᐃᓕᐅᒐᒃᓴᓄᑦ ᐸᕐᓇᐅᑎ ᐊᒻᒪ ᖃᐅᔨᓴᖅᑐᓕᕆᓂᖅ ᐊᒻᒪ ᐱᓕᕆᔾᔪᑎᓕᕆᓂᒃᑯᑦ ᖃᓄᐃᓕᐅᕈᑎᒃᓴᑦ

ᑲᓇᑕᒥ ᖃᐅᔨᓴᖅᑐᓕᕆᓂᖅᒧᑦ ᑲᑎᒪᔨᒃᑯᑦ

ᒥᕐᖑᐃᕐᓯᖅᕕᓕᕆᔨᒃᑯᑦ ᑲᓇᑕᒥ ᐱᓕᕆᕝᕕᖓ

ᖃᐅᔨᓴᖅᑐᓕᕆᔨᒃᑯᑦ ᑯᐸᐃᒃᒥᑦ