ᒪᐃ 23, 2023 – ᐋᑐᕙ, ᐋᓐᑎᐊᕆᐅ
ᐊᑯᓂᐅᖖᒋᑦᑐᒥᒃ ᓄᖅᑲᖓᑎᑕᐅᓚᐅᖅᓱᓂ, ᐃᓄᐃᑦ ᐊᒻᒪᓗ ᐱᖃᑎᐊᓗᒌᑦ ᑲᑎᓐᓂᖃᖅᑎᑕᐅᕙᓐᓂᖓᑦ ᑲᔪᓯᑎᑕᐅᓯᒪᓂᐊᓕᕐᒥᔪᖅ ᐋᑐᕙᒥ ᐊᖑᓇᓱᒃᑎᓕᒫᑦ ᐃᓄᐃᑦ ᓄᓇᓗᒃᑖᖏᓐᓂ ᐃᓕᑕᕆᔭᐅᓯᒪᓂᖓᓐᓄᑦ, ᖁᕕᐊᓱᒡᓗᑎᒃ ᐱᓇᓱᒃᓯᒪᔭᖏᓐᓂᑦ ᓂᕆᖃᑎᒌᓕᓗᑎᒃ ᐊᒻᒪᓗ ᖁᕕᐊᓱᖃᑎᒌᒃᑎᑕᐅᓗᑎᒃ ᐃᓄᐃᑦ ᑎᑕᒍᓯᖏᓐᓂᒃ ᐊᒻᒪᓗ ᐱᐅᓯᑐᖃᕆᔭᖓᓐᓂᒃ.
ᐃᓄᐃᑦ ᑕᐱᕇᑦ ᑲᓇᑕᒥ ᑲᑎᓯᒪᓕᖅᑎᑦᑎᓂᐊᖅᑐᑦ ᐃᓅᖃᑎᒌᓂᑦ ᑐᕌᖓᑎᑕᐅᓯᒪᔪᓄᑦ ᐅᔾᔨᕈᓱᓕᖅᑎᑦᑎᒋᐊᕐᓂᕐᒥᒃ ᒪᐃ 29-ᒥ 6-ᒧᐊᖅᐸᑦ ᐅᓐᓄᒃᑯᑦ 10-ᒧᑦ ᐅᓐᓄᒃᑯᑦ ᑲᓇᑕᒥ ᓴᓇᐅᒐᓕᕆᕝᕕᖓᓂ. ᓄᑖᒥᒃ ᐊᑦᓯᖅᑕᐅᓯᒪᓕᕐᑐᖅ ᑖᓐᓇ ᖁᕕᐊᓱᖃᑎᒌᒃᑎᑦᑎᓂᐅᕙᒃᑐᖅ – ᑕᐱᕇᑦ – ᑐᑭᖃᖅᓱᓂ ᑲᑎᓐᓂᖃᕐᓂᕐᒥᒃ ᐅᖃᐅᓯᑦᑎᒍᑦ, ᐃᓄᒃᑐᑦ. ᐃᖅᑲᐅᒪᔭᐅᔪᒃᓴᐅᕗᖅ ᑕᐃᔭᐅᕙᓚᐅᕐᓂᖓᓂᒃ ᐃᒃᖠᓵᕆᓂᖅ.
ᓂᕆᖃᑎᒌᒃᑎᑦᑎᓗᑎᒃ ᑲᑎᓐᓂᖃᖅᑎᑦᑎᓂᕐᒧᑦ ᖃᓄᐃᓕᐅᖅᑎᑦᑎᓂᐅᕙᒃᑐᒥ ᓂᕆᔭᒃᓴᖃᖅᑎᑦᑎᓂᐊᖅᐳᑦ ᐃᓄᐃᑦ ᓂᕿᒋᕙᒃᑕᖏᓂᒃ ᐊᖑᓇᓱᐊᖅᑕᐅᓯᒪᔪᕕᓂᕐᓂᒃ ᐊᖑᓇᓱᒃᑎᓂᑦ ᐃᓄᐃᑦ ᓄᓇᓗᒃᑖᖓᓐᓂᑦ. ᒥᑭᑦᑑᓪᓗᑎᒃ ᐊᓪᓕᕋᕐᓄᑦ ᓂᕆᔭᒃᓴᖃᖅᑎᑦᑎᓂᐅᕙᒃᑐᑦ ᓴᖅᑭᑕᐅᓯᒪᓂᐊᖅᐳᑦ ᒪᓕᒃᑎᑕᐅᕙᓪᓕᐊᓗᑎᒃ ᓯᑕᒪᐅᓪᓗᑎᒃ ᐊᔾᔨᒌᒃᑑᓇᑎᒃ ᐊᕕᒃᑐᖅᓯᒪᓂᐅᔪᓂᑦ ᓄᓇᒋᔭᑐᖃᑦᑎᓐᓂ ᐊᒻᒪᓗ ᐃᓚᖃᖅᑎᑕᐅᓯᒪᓗᑎᒃ ᓂᕿᓂᒃ, ᐃᖃᓗᓐᓂᒃ ᐊᒻᒪᓗ ᐱᕈᖅᑐᖁᑎᒋᔭᐅᕙᒃᑐᓂᑦ ᓂᕆᕙᒃᑐᓂᑦ ᓂᕿᐅᖖᒋᑦᑐᓂᒃ. ᑖᓐᓇ ᖃᓄᐃᓕᐅᖅᑎᑦᑎᓂᖓᑦ ᐱᑕᖃᖅᑎᑦᑎᓂᐊᕐᒥᔪᖅ ᐱᐅᓯᑐᖃᒃᑯᑦ ᐊᒻᒪᓗ ᐅᓪᓗᒥᐅᓕᖅᑐᒥ ᑕᑯᓐᓈᒐᒃᓴᖃᖅᑎᑦᑎᓂᕐᓂᒃ ᑐᕌᖓᑎᑕᐅᓪᓗᑎᒃ ᐃᓄᐃᑦ ᐱᐅᓯᑐᖃᒥᒃᑎᒍᑦ ᓇᓗᓇᐃᖅᓯᔾᔪᑎᒋᕙᒃᑕᖏᓂᒃ ᐃᓚᖃᖅᑎᑕᐅᓗᑎᒃ ᖁᕕᐊᒋᔭᐅᓗᐊᖅᐸᒃᑑᓪᓗᑎᒃ ᐊᒥᕐᓂᑦ ᐋᓐᓄᕌᓕᐊᖑᓯᒪᔪᓂᒃ ᐊᑐᕐᓗᑎᒃ ᐊᔾᔨᓕᐅᖅᑕᐅᕕᒻᒥᒃ.
“ᑲᑎᖃᑎᒌᖕᓂᖅ ᐃᓄᐃᑦ ᓂᕆᒋᕙᒃᑕᖏᓂᒃ ᓂᕆᖃᑎᒌᒃᐸᓐᓂᖅ ᐱᐅᓯᑐᖃᑦᑎᓐᓄᑦ ᐃᓚᒋᔭᐅᖃᑕᐅᒻᒪᑦ,” ᐅᖃᖅᓱᓂ ᐃᓄᐃᑦ ᑕᐱᕇᑦ ᑲᓇᑕᒥ ᐊᖏᔪᖅᑳᖓᑦ ᓇᐃᓵᓐ ᐆᐱᑦ. “ᓂᕆᐅᒋᓂᐊᖅᐸᕋ ᑕᑯᒃᑲᓐᓂᕈᓐᓇᕐᓂᐊᕋᒃᑭᑦ ᐱᖃᑎᐊᓗᒃᑖᕆᓯᒪᔭᒃᑲ, ᐊᒻᒪᓗ ᐊᓯᖏᒃᑕᐅᖅ ᐱᖃᑎᐊᓗᒃᑖᕆᓯᒪᓕᕐᓂᐊᕐᒥᔭᒃᑲ, ᓂᕆᖃᑎᒌᒃᑎᓪᓗᑕ ᐱᑕᖅᑕᐅᓯᒪᔪᕕᓂᕐᓂᒃ ᐃᓄᐃᑦ ᓄᓇᖓᓐᓂᑦ.”
ᐃᓅᓪᓗᓂ ᐃᒐᔨᒻᒪᕆᒃ ᓰᓚ ᕕᓕᐅᕆᑎ ᐊᒻᒪᓗ ᑲᓇᑕᒥ ᓴᓇᐅᒐᓕᕆᕝᕕᖓᓂ ᐃᒐᔨᒻᒪᕆᒃ ᑭᓐᑕᓐ ᓚᐃᐅᕐ ᑕᑯᔭᒃᓴᖃᖅᑎᑦᑎᓂᐊᖅᐳᒃ ᐱᑕᒐᐅᖃᑦᑕᖅᓯᒪᔪᓂᑦ ᓂᕆᔭᒃᓴᓕᐊᖑᓯᒪᔪᓂᒃ ᐃᓚᖃᖅᑎᓪᓗᒋᑦ ᐃᖃᓗᒃᐱᒃ, ᓂᕐᓕᖅ, ᒪᒃᑖᖅ ᐊᒻᒪᓗ ᑐᒃᑐᑦ ᓂᕿᖏᓐᓂᒃ. ᐅᐸᒍᑎᓯᒪᖃᑕᐅᔪᑦ ᓂᕆᐅᖕᓂᖃᕈᓐᓇᕆᕗᑦ ᑕᑯᓐᓈᒐᒃᓴᖃᖅᑎᑦᑎᓂᐊᕐᓂᖏᑕ ᐃᓄᐃᑦ ᓲᕐᓗ ᑎᐊᕆ ᐅᔭᕋᒃ, ᓈᓐᓯ ᒪᐃᒃ, ᔪᕌᓂᒨ ᐃᓄᑎᖅ ᐊᒻᒪᓗ ᑎᐊᓐᓴ ᐃᑦᒪᓐᔅ.
ᑖᒃᑯᓄᖓ ᑕᐱᕇᑦ ᐱᔾᔪᑎᒋᓗᒋᑦ ᑐᓴᖅᑎᑕᐅᒋᐊᒃᑲᓐᓂᕈᒪᔪᑦ, ᐅᕙᓂ ᖃᐅᔨᒋᐊᕈᓐᓇᖅᐳᑦ.