ᔫᓂ 8, 2023 – ᐋᑐᕙ, ᐋᓐᑎᐊᕆᐅ
ᑲᓇᑕᒥ ᒪᒃᑯᒃᑐᑦ ᐃᓄᐃᑦ ᑲᑎᒪᔨᖏᑦ (NIYC) ᓂᕈᐊᖅᖠᓯᒪᓕᓚᐅᖅᑐᑦ ᓲᓯ-ᐋᓐ ᑲᑦᓗᒃ ᑲᖏᖅᓱᒃ, ᓄᓇᕕᖕᒥᐅᑕᒥᒃ ᓄᑖᖑᓪᓗᓂ ᐊᖏᔪᖅᑳᕆᔭᐅᓂᐊᖅᑐᒥᒃ 2023-ᒥᑦ 2025-ᒧᑦ ᐃᓂᖃᖅᑎᑕᐅᓗᓂ.
ᑲᓇᑕᒥ ᒪᒃᑯᒃᑐᑦ ᐃᓄᐃᑦ ᑲᑎᒪᔨᖏᑦ ᐱᑦᔪᑎᖃᖅᑎᒋᔭᐅᖕᒪᑕ ᒪᒃᑯᒃᑐᖏᓄᑦ ᐃᓄᐃᑦ ᑲᓇᑕᓕᒫᒥ. ᐊᖏᔪᖅᑳᖑᔪᖅ ᓂᐱᒋᔭᐅᕙᒃᐳᖅ NIYC-ᑯᓐᓄᑦ ᑕᒪᒃᑭᖕᓂ ᑲᓇᑕᐅᑉ ᐊᒻᒪᓗ ᓯᓚᕐᔪᐊᑉ ᖁᑦᑎᖕᓂᖏᑎᒍᑦ ᐊᒻᒪᓗ ᐊᑕᐃᓐᓇᖅᑑᓪᓗᓂ ᐃᓚᒋᔭᐅᖃᑕᐅᓪᓗᓂ ᑲᑎᒪᔨᖏᓐᓂ ᐃᓄᐃᑦ ᑕᐱᕇᑦ ᑲᓇᑕᒥ ᐊᒻᒪᓗ ᐃᓄᐃᑦ ᐅᑭᐅᖅᑕᖅᑐᒥ ᑲᑎᒪᔨᖏᓐᓄᑦ ᑲᓇᑕᒥ ᐊᒻᒪᓗ ᐊᑕᐃᓐᓇᖅᑐᒥᒃ ᐃᓚᒋᔭᐅᖃᑕᐅᒋᓪᓗᓂ ᐃᓄᐃᑦ-ᒐᕙᒪᑐᖃᒃᑯᑦ ᐱᓕᕆᐊᖃᖃᑎᒌᖏᑕ ᑲᑎᒪᔨᕋᓛᖏᓐᓄᑦ ᑐᓵᔭᖅᑐᕐᑎᐅᕙᖕᓂᕐᒥᒍᑦ.
ᑲᑦᓗᒃ ᐊᖏᔪᖅᑳᒧᑦ ᑐᖓᓕᕆᔭᐅᓚᐅᕐᐳᖅ ᖃᕐᔪᐃᑦ ᒪᒃᑯᒃᑐᑦ ᑲᑎᒪᔨᖏᓐᓄᑦ ᑕᐃᒪᖖᒐᓂᑦ 2021-ᒥ ᐃᓚᒋᔭᐅᖃᑕᐅᓕᖅᑳᓚᐅᕐᖢᓂ ᑲᑎᒪᔨᒋᔭᐅᔪᓄᑦ ᖃᕐᔪᐃᑦ ᒪᒃᑯᒃᑐᑦ ᑲᑎᒪᔨᖏᓐᓂ ᐱᔾᔪᑎᖃᖅᑎᐅᓪᓗᓂ ᐅᖔᕙ ᑕᕆᐅᖓᑕ ᓯᒡᔭᖓᓂᕐᒥᐅᓄᑦ. ᑲᑦᓗᒃ ᐱᓕᕆᖃᑎᖃᕈᒪᑦᑎᐊᖅᓯᒪᕗᖅ ᒪᒃᑯᒃᑐᓂᒃ ᐊᒻᒪᓗ ᒪᒃᑯᒃᑐᐃᑦ ᐱᐅᓂᖅᓴᒥᒃ ᐃᓅᓯᖃᓕᖅᑎᑕᐅᓯᒪᓕᖁᓪᓗᒋᑦ ᐃᑲᔪᕐᓂᖃᖅᑐᑎᒍᑦ ᐊᓯᔾᔩᓯᒪᓕᖅᑎᑦᑎᒋᐊᒧᑦ ᐊᒻᒪᓗ ᓂᐱᒋᔭᐅᓂᕐᒥᒍ ᒪᒃᑯᒃᑐᖏᓄᑦ ᐃᓄᐃᑦ.
“ᐅᐱᒍᓱᒃᐳᖓ ᐃᓚᒋᔭᐅᓂᐊᓕᕐᓂᓐᓂᒃ ᑲᓇᑕᒥ ᒪᒃᑯᒃᑐᑦ ᐃᓄᐃᑦ ᑲᑎᒪᔨᖏᓐᓄᑦ ᐊᖏᔪᖅᑳᕆᔭᐅᓗᖓ” ᐅᖃᓚᐅᕐᐳᖅ ᐊᖏᔪᖅᑳᖅ ᑲᑦᓗᒃ. “ᐱᓕᕆᐊᒃᓴᕆᔭᓐᓂᒃ ᐊᔪᖖᒋᓐᓂᓕᒫᒃᑯᑦ ᐱᓕᕆᓯᒪᒋᐊᕐᓂᐊᖅᑐᖓ, ᐊᒻᒪᓗ ᓂᐱᒋᔭᐅᓗᖓ ᒪᒃᑯᒃᑐᖏᓄᑦ ᐃᓄᐃᑦ ᑲᓇᑕᓕᒫᒥ ᐊᒻᒪᓗ ᓯᓚᕐᔪᐊᓕᒫᒥ. ᖁᕕᐊᓱᓪᓚᕆᒃᐳᖓ ᐱᓕᕆᖃᑎᒌᒍᓐᓇᕐᓂᐊᕐᓂᑦᑎᓐᓂᒃ ᓯᕗᓂᕆᓂᐊᖅᑕᑦᑎᓐᓂ ᐅᑭᐅᓂ. ᐃᓕᑕᕆᔪᒪᕙᒃᑲ ᖃᕐᔪᐃᑦ ᒪᒃᑯᒃᑐᑦ ᑲᑎᒪᔨᒋᔭᖏᑦ ᐅᕙᓐᓂᒃ ᐃᑲᔪᖅᑐᐃᓯᒪᓚᐅᕐᓂᖏᓐᓄᑦ ᓂᕈᐊᒐᒃᓴᖖᒍᖅᓯᒪᑎᓪᓗᖓ. ᓇᑯᕐᒦᒃ!
ᑕᕝᕙᓂ ᓂᕈᐊᖅᖠᓂᖃᖅᑎᓪᓗᒋᑦ ᒪᕐᕉᓚᐅᕐᒪᑎᒃ ᓂᕈᐊᒐᒃᓴᖖᒍᖅᓯᒪᔫᒃ; ᑕᐃᓗᕐ ᐊᕿᐊᕈᖅ ᐊᒻᒪᓗ ᓲᓯ-ᐋᓐ ᑲᑦᓗᒃ. ᐃᓛᓗ ᑕᐃᓗ ᓂᕈᐊᖅᑕᐅᓯᒪᓕᓚᐅᖖᒋᒃᑲᓗᐊᕋᒥ ᐊᖏᔪᖅᑳᑉ ᐃᓂᖓᓄ, ᐃᑲᔪᖅᑐᒐᐅᓯᒪᕗᖅ ᑲᑎᒪᔨᓂᑦ ᒪᒃᑯᒃᑐᓂᒃ ᐱᓕᕆᖃᑎᖃᖅᐸᓐᓂᕐᒥᓂᒃ ᐱᓕᕇᓐᓇᖁᓪᓗᒍ ᐊᒻᒪᓗ ᑲᑎᒪᔨᒋᔭᐅᔪᒥ.
NIYC-ᑯᑦ ᐊᖏᔪᖅᑳᖓᑦ ᐱᓕᕆᖃᑎᖃᑦᑎᐊᕐᓂᐊᖅᐳᖅ ᑲᓇᑕᒥ ᒪᒃᑯᒃᑐᑦ ᐃᓄᐃᑦ ᑲᑎᒪᔨᖏᓐᓂᒃ ᐃᓚᒋᔭᐅᔪᐃᑦ ᑎᓕᔭᐅᓯᒪᓪᓗᑎᒃ ᓂᕈᐊᖅᑕᐅᓯᒪᔪᓄᑦ ᐃᓚᒋᔭᐅᖃᑕᐅᔪᓄᑦ ᐱᔾᔪᑎᖃᖅᑎᒋᔭᐅᓪᓗᑎᒃ ᐃᓄᕕᐊᓗᐃᑦ ᐊᕕᒃᑐᖅᓯᒪᓂᖓᓂᑦ, ᕿᑎᕐᒥᐅᑦ ᐃᓄᐃᑦ ᑲᑐᔾᔨᖃᑎᒌᖏᓂᑦ, ᑭᕙᓪᓕᖅ ᐃᓄᐃᑦ ᑲᑐᑦᔨᖃᑎᒌᖏᓂᑦ, ᕿᑭᖅᑕᓂ ᐃᓄᐃᑦ ᑲᑐᑦᔨᖃᑎᒌᖏᓂᑦ, ᖃᕐᔪᐃᑦ ᒪᒃᑯᒃᑐᑦ ᑲᑎᒪᔨᖏᓂᑦ ᐊᒻᒪᓗ ᓄᓇᑦᓯᐊᕗᑦ ᒐᕙᒪᖓᓂᑦ.
ᖁᕕᐊᓱᒍᑎᕙᑦᑎᒋᑦ, ᓲᓯ-ᐋᓐ!