ᒪᐃ 24, 2023 – ᐃᓅᕕᒃ, ᓄᓇᑦᓯᐊᖅ
ᐃᓚᒋᔭᐅᔪᑦ ᐃᓄᐃᑦ ᖃᐅᔨᓴᖃᑎᒌᒃᑎᑦ ᐱᓕᕆᐊᖃᖅᑎᖏᓐᓄᑦ ᐃᓄᐃᑦ ᓄᓇᓕᓕᒫᖏᓐᓂᑦ ᐅᐸᒍᑎᓯᒪᓗᑎᒃ ᓯᕗᓪᓕᖅᐹᒥᒃ ᑕᕝᕙᓂ ᐱᓇᓱᐊᕈᓯᕐᒥ ᑲᑎᖖᒐᓂᖃᕐᓂᐊᖅᐳᑦ ᐱᕈᖅᑎᑦᑎᓯᒪᓕᕆᐊᕐᓗᑎᒃ ᑐᖖᒐᕝᕕᖁᑎᒃᓴᐅᓂᐊᖅᑐᓂᒃ ᐋᖅᑭᒃᓱᐃᕝᕕᒋᕙᓐᓂᐊᖅᑕᒥᓐᓄᑦ ᐊᒻᒪᓗ ᐃᑲᔪᖅᑐᐃᓂᖃᕐᓂᕐᓄᑦ ᐋᓐᓂᐊᖃᕐᓇᖖᒋᑦᑐᓕᕆᓂᕐᒥ ᖃᐅᔨᓴᐃᓂᐅᔪᓄᑦ ᐃᓄᓐᓂᑦ , ᐊᒻᒪᓗ ᖃᐅᔨᓴᕈᑦᔨᓂᐅᔪᓄᑦ, ᐱᔾᔪᑎᒋᓪᓗᒋᑦ ᐃᓄᐃᑦ.
ᑖᒃᑯᐊ IRN-ᖑᔪᑦ, ᑮᓇᐅᔭᖁᑎᒃᓴᖅᑖᓚᐅᖅᑐᑦ $6.4 ᒥᓕᐊᓐᑖᓚᓂᒃ ᐅᑭᐅᓄᑦ ᐱᖓᓱᓄᑦ ᐱᑎᑕᐅᕙᓪᓕᐊᓂᐊᖅᓱᑎᒃ ᑲᓇᑕᒥ ᐋᓐᓂᐊᖃᕐᓇᖖᒋᑦᑐᓕᕆᓂᕐᒥ ᖃᐅᔨᓴᕐᓂᓕᕆᔨᒃᑯᑦ ᐃᖅᑲᓇᐃᔭᕐᕕᖓᓐᓂᑦ 2022-ᒥ, ᐃᑲᔪᖅᑐᐃᓂᖃᖅᐳᑦ ᐊᑐᓕᖅᑎᑕᐅᓂᒃᓴᖏᑕ ᑲᓇᑕᒥ ᐃᓄᐃᑦ ᖃᐅᔨᓴᐃᖃᑦᑕᕐᓂᕐᓄᑦ ᐸᕐᓇᐅᑎᓂᒃ ᓯᕗᒻᒧᒃᑎᑦᑎᒋᐊᖅᓯᒪᓂᕐᒥᒃᑎᒍᑦ ᐃᓄᐃᑦ ᐃᓚᒋᔭᐅᖃᑕᐅᕙᓐᓂᖏᓐᓂᒃ ᖃᐅᔨᓴᐃᓂᐅᔪᓄᑦ ᐊᒻᒪᓗ ᖃᐅᔨᓴᐃᓂᕐᓄᑦ ᐊᐅᓚᑦᓯᔨᐅᔪᓐᓇᕐᓂᕐᓄᑦ. ᐃᓄᐃᑦ ᑕᐱᕇᑦ ᑲᓇᑕᒥ IRN-ᑯᓄᑦ ᐊᐅᓚᑦᓯᔨᒋᔭᐅᕗᑦ.
ᑕᕝᕙᓂ ᐱᓇᓱᐊᕈᓯᕐᒥ, ᐱᔾᔪᑎᖃᖅᑎᒋᔭᐅᔪᐃᑦ ᓯᑕᒪᐅᓪᓗᑎᒃ ᐊᕕᒃᑐᖅᓯᒪᓂᖏᓐᓂᑦ ᐃᓄᐃᑦ ᓄᓇᖓᓐᓂᑦ ᑲᑎᒪᖃᑎᒌᖕᓂᐊᖅᐳᑦ ᐃᓅᕕᒃᒥ ᖃᐅᔨᒋᐊᕐᓂᐊᕐᓗᒋᑦ ᐅᑭᐅᖓ ᓯᕗᓪᓕᖓᓂ ᐱᓕᕆᐊᖑᔪᑉ ᐱᒋᐊᖅᑎᑕᐅᓯᒪᓚᐅᕐᕕᖓᓂᑦ ᐊᒻᒪᓗ ᐅᖃᓪᓚᐅᓯᕆᓂᐊᕐᓗᒋᑦ ᓂᕆᐅᖕᓂᖃᕐᕕᒋᔭᐅᔪᓄᑦ ᐊᒻᒪᓗ ᐋᖅᑭᐅᒪᓂᕆᔭᖏᑦᑕ ᐱᓕᕆᐊᖃᑎᒌᖑᔪᑦ ᓯᕗᒻᒧᒋᐊᖅᑎᑕᐅᓯᒪᓕᕈᓐᓇᕐᒪᖔᑦ ᐊᑯᓃᖅᑐᒥ, ᑲᔪᓰᓐᓇᖅᑎᑕᐅᔪᓐᓇᕋᔭᕐᓂᖓᑕ ᐃᑲᔪᖅᑐᐃᓂᐅᔪᓄᑦ ᓄᓇᓕᐅᔪᓂ ᖃᐅᔨᓴᐃᔨᐅᔪᓂᒃ ᐊᒻᒪᓗ ᐱᓕᕆᐊᕆᑲᐃᓐᓇᖅᑕᖏᓐᓂᒃ.
ᐃᓚᒋᔭᐅᖃᑕᐅᑎᓪᓗᒍ ᑲᑎᒪᓂᖃᕐᓂᕐᒥᓐᓄᑦ, IRN-ᖑᔪᑦ ᐱᓕᕆᐊᖃᖃᑎᒌᒃᑎᖏᑦ ᑕᑯᔭᖅᑐᐃᓯᒪᔪᒪᒋᕗᑦ ᐊᒥᓱᕐᓚᐅᓪᓗᑎᒃ ᖃᐅᔨᓴᐃᓂᕐᒥ ᐱᓕᕆᐊᖑᑲᐃᓐᓇᖅᑐᓂᒃ ᐃᓄᕕᐊᓗᐃᑦ ᐊᕕᒃᑐᖅᓯᒪᓂᖓᓂ ᐊᒻᒪᓗ ᓱᕈᖅᐸᓪᓕᐊᓂᖓᓂᒃ ᓇᐅᑦᓯᖅᑐᐃᓂᐅᔪᒥᒃ ᑐᒃᑑᔮᖅᑑᒥ. ᑕᐃᒪᓐᓇᐃᑦᑐᑦ ᐱᓕᕆᐊᖑᑲᐃᓐᓇᖅᑐᑦ, ᓴᖅᑭᑉᐸᓪᓕᐊᔪᑦ ᐃᓄᐃᑦ ᓄᓇᓗᒃᑖᖓᓐᓂ, ᐃᑲᔪᖅᑕᐅᓯᒪᓕᕈᓐᓇᕐᓂᐊᕐᒪᑕ ᐊᒥᓱᐃᑎᒍᑦ ᐊᕕᒃᑐᖅᓯᒪᓂᐅᔪᒥ ᐱᓕᕆᓂᖃᕐᕕᒋᔭᖏᓐᓂᑦ IRN-ᖑᔪᑦ, ᓄᓇᓕᐅᔪᒥ ᖃᐅᔨᒪᓂᕆᔭᐅᔪᓂᑦ ᐊᒻᒪᓗ ᐊᔪᖖᒋᓐᓂᕆᔭᐅᔪᓂᑦ ᐊᒥᖅᑲᕈᑎᒋᔭᐅᓂᐊᖅᑐᑦ, ᐊᒻᒪᓗ ᑮᓇᐅᔭᖁᑎᒃᓴᐃᑦ ᓴᖅᑭᑎᑕᐅᕙᓪᓕᐊᓕᕐᓂᐊᖅᓱᑎᒃ ᑕᒪᒃᑯᑎᒎᓇᖅ.
IRN-ᒋᔭᐅᔪᑦ ᐱᓕᕆᐊᖏᑦ ᐃᑲᔪᕈᑎᐅᓕᕐᓂᐊᕐᒻᒪᑕ ᑕᒪᐃᓐᓄᑦ ᑲᓇᑕᒥᐅᖑᔪᓄᑦ ᖃᐅᔨᓴᐃᓂᖃᖅᑎᑦᑎᓂᕐᒥᒃᑎᒍᑦ ᐃᓄᐃᑦ ᓄᓇᖓᑦᑕ ᐃᓗᐊᓂ – ᐱᔾᔪᑎᒋᓪᓗᒍ 40 ᐳᕐᓴᓐᑎᒋᔭᖓᓂᒃ ᐊᖏᓂᖃᕐᓂᖓᑕ ᑲᓇᑕᐅᑉ ᓄᓇᖓᑕ ᐊᖏᓂᕆᔭᖓᓂᑦ, 72 ᐳᕐᓴᓐᑎᖓᓂᒃ ᑕᕆᐅᑦ ᓯᒡᔭᒋᔭᖏᓐᓂᒃ ᐊᒻᒪᓗ ᓱᒃᑲᓕᔪᒻᒪᕆᖕᒥᒃ ᐃᓅᓯᓕᕆᓂᐅᔪᑦ ᐊᒻᒪᓗ ᐊᕙᑎᓕᕆᓂᐅᔪᑦ ᐊᓯᑦᔨᖅᐸᓪᓕᐊᓂᖃᓕᖅᓯᒪᓂᖓᑦ – ᐱᓕᕆᓂᖃᕐᕕᐅᕙᒻᒪᑕ ᒪᓕᒃᑎᑕᐅᓪᓗᑎᒃ ᑲᓇᑕᒥ ᐃᓄᐃᑦ ᖃᐅᔨᓴᐃᖃᑦᑕᕐᓂᕐᓄᑦ ᐸᕐᓇᐅᑎᓕᐊᖑᓯᒪᔪᓂᒃ.
ᑕᒪᒃᑯᓄᖓ ᑐᓴᖅᑎᑕᐅᒋᐊᒃᑲᓐᓂᕈᒪᔪᑦ, ᐅᕙᖖᖓᑦ ᖃᐅᔨᒋᐊᕐᕕᖃᕈᓐᓇᖅᐳᑦ: