COVID-19Uncategorized @iuq

$1-million-nut Mastercard Kiinaujaqutiksaqtaarviit Kiinaujanik Tunisisimaningit Ikajurutiksauniaqtunik Ilinniaqtut Pisimaliriaqaqtanginut Puvvirinaqtualuk Nuvagjuarnaq (COVID-19) Siammaksimaliqpalliatillugu

$1-million-nut Mastercard Kiinaujaqutiksaqtaarviit Kiinaujanik Tunisisimaningit Ikajurutiksauniaqtunik Ilinniaqtut Pisimaliriaqaqtanginut Puvvirinaqtualuk Nuvagjuarnaq (COVID-19) Siammaksimaliqpalliatillugu

April 22, 2020

Nutaangulluni piliriqatiqalirnirmittigut Mastercard Kiinaujaqutiksaqtaarvikkunnik, Inuit Tapiriikkut Kanatami sarimagijaqallarikput tunijausimagiaminnik $1-million-nik Kiinaujaqutiksaqtaarvikkut Puvvirinaqtualuk Nuvagjuarnamit (Covid-19) Satuqsisimalirutiksanik ammalu Makigiakkannirutiksanik Piliriangannit taijaulluni COVID-19 Recovery and Resilience Program-mik. Taakkua kiinaujait qaitaujut atuqtauniaqtut pijausimajariaqallariktuullutik Inuit ilinniaqtuqutinginnut Canada-limaami.

Inuit ilinniaqtut kajusiinnaujaqtumik ilakuuniqarviummata qaritaujatigut aaqqiksugausimajutigut pilirijunnautiksani, atuinnauvagunnarnirmik uajamuuqtutigut sanarrutiqarunnarnirmut angirrarijaminni, ammalu atuinnauvviuvaktunut ilinniarnilirinirmi ikajurutiksaujunik ikajurutiuniarlutik ilinniarviit silataaniitillugit. Puvvirinaqtualuk Nuvagjuarnaup (COVID-19) siammakpallialiqsimaninganit ilagiarutiusimalirmat aksururnaqtukkuuqattarniujut quttingnirijanginut ammalu isumakkut aksurulualiqsimaningita ilinniaqtuit.

Maannamut tikitsugu, tamainni aulatsiniqarviujuit Canada-mi matusimaliqtittisimammata Ilinnialisaaqtunit pigiaqsugit grade 12-mut ilinniarviujunik, ammalu silattuqsarvinni ilinniaqtuit uajamuuqtutigut ilinniarutiminnik piliriniqangaaliqsimallutik. Aulatsiniqarviujuit, ilinniarviit ammalu katujjiqatigiingujut Canada-limaami ajjigiinngiuqtunik quttingniqaqtutigut ikajurutiksanik pitaqaqtittisimavut ilinniaqtunut.

$1-million-it qaitausimajut Mastercard Kiinaujaqutiksaqtaarvikkunginnit atuqtauniaqput piliriniqarnirni ilinniaqtuit pisimaliriaqaqtanginik sitamaullutik piluaqtumik pijjutiqarviujunut makununga:

  • Pituksimalirunnarnirmut tuluqtarviuvattut (suurlu angirrarijami qaritaujatigut pituksimalirunnarniq, qaritaujaralaaqariaqarniq ammalu qaritaujatigut ilinniarutinut sanarrutiksait)
  • Tuaviurnaqtutigut kiinaujaqutiksaqtaartitsiniq ilinniaqtut asinginut ilinniarialirniaqtunut (suurlu sanarrutiksait ikajurutiuniarlutik ilinniarutiminnik pijariiqsimaliqtut itirunnalirutiksanginik silattuqsaqvinni piliriangujunut)
  • Angigligiaqtittiniq qaritaujatigut ikajurutiksauvattunik (suurlu ilinniarutinginut tukimuaktiqarniq, isumakkut aanniaqaliqtailimajulirijinit ikajuqtiqarunnarniq)
  • Nautsiqtuivallianirmik asijjiqpalliallutik aktuisimalirniujunik Puvvirinaqtualuk Nuvagjuarnaup (COVID-19) Iinuit nunaligijangini ammalu ilinniaqtunik ammalu nalunaijainirmi piliriangulirumajunik aaqqiksugausimaliriaqullugit ammalu uummaqtitaugiakkanniqullugit Inuit ilinniarnilirinirmi piliriaqarutingit

Inuit Tapiriikkut Kanatami Katimajingit angiqatigiiksimalilauqput April 20, 2020-utillugu sanirvaisimaniarnirminnik kiinaujaqutissanik imanna:

Inuvialuit Aviktuqsimaningani Kuapuriisangat: $130,000
Nunavut Tunngavik Timiqutingat: $501,000
Makivik Kuapuriisangat: $250,000
Nunatsiavut Government-ngat: $119,000

Nunalirinirmi katujjiqatigiigijaujuit piliriaksaqaqtitaummata nangminiq ilagijaujuqutigijaminnik angirutiusimajut avatigijangita iluaniittunut ammalu silataaniittunut Inunnut.

“Maannaujuq ajjiginngitammarianik atuliqsimatilluta, tamattalimaaq tiliuqtausimaliratta ajjigiinngiuqtutigut nalunaiqsisimaliqujaulluta qanuq piliriniqalirunnarmangaattaa taimaunginnaujaqsutik inuuqatigijattinnit pisimaliqtaujariaqaqtunut. Qujagillarikpakka Mastercard Kiinaujaqutiksaqaqtittijiit apiqsurutiujunut kiusimalilaurninginnut, ikajuqsinirnut kajusititausimaqullugit ilinniarutiminnik pijariiqsisimalirunnaqullugit makkuktuqutivut ammalu tunngavviliurnirmut ingirrattiarniqaqtitauviksangita Inuit ilinniaqtuit Inuit Nunangannirmiut ammalu Canada-limaami.”
Natan Obed, Angijuqqaaq, Inuit Tapiriikkut Kanatami

“Taanna tuaviurnaqsisimaniujuq pijjutigillugu ilinniarutigilirattigu qanuq atavvigituraullarimmangaattaa tamattaulluta ammalu qanutigi sannginiqalirunnarnittinnut katinniqaqsimaliraangatta. Ilaakkuungalluta, atuni pijaksarijattinnik piliriniqarunnarmigatta sukkailititausimaliqullugu taanna aanniarniulirunnartup siammakpallianinga. Tamannattauq, nalunaiqsijjutiummijuq tapiriiliqsimanittinnik. Kkatinniqaliqsimaluta, akigiarviqalirvigijunnarattigu kiinaujaliurnirmik ilinngaisimalirningata Puvvirinaqtualuk Nnuvagjuarniup (COVID-19). piruqtittivalliakkannirunnaratta silarjuarijavut sannginiqsauliqtigiarlugu, pitsiarniqtaqarniqsaulirluni, ammalu qanuinnanngittumiinnaliqtillugu uvattinnut tamattauluta.”
Reeta Roy, Angijuqqaaq ammalu Allavingmi Isumatammarigijaujuq, Mastercard Kiinaujaqutiksaqtaarvikkunni

Inuit Tapiriikkut Kanatami Tusaumaqattautilirijingit
[email protected]; 613-292-4482

Toni Tiemens, Sivuliqtiujuq Pilirivviqaqtut Tusaumaqattautilirijingit
Mastercard Kiinaujaqutiksaqtaartingit
[email protected]