COVID-19Uncategorized @ius

$1-ᒥᓕᐊᓐᑖᓚᓄᑦ ᒫᔅᑐᕐᑳᕐᑦ (Mastercard) ᑮᓇᐅᔭᖁᑎᒃᓴᖅᑖᕐᕖᑦ ᑮᓇᐅᔭᓂᒃ ᑐᓂᓯᓯᒪᓂᖏᑦ ᐃᑲᔪᕈᑎᒃᓴᐅᓂᐊᖅᑐᓂᒃ ᐃᓕᓐᓂᐊᖅᑐᑦ ᐱᓯᒪᓕᕆᐊᖃᖅᑕᖏᓄᑦ ᐳᕝᕕᕆᓇᖅᑐᐊᓗᒃ ᓄᕙᒡᔪᐊᕐᓇᖅ (Covid-19) ᓯᐊᒻᒪᒃᓯᒪᓕᖅᐸᓪᓕᐊᓂᖓᓂ

$1-ᒥᓕᐊᓐᑖᓚᓄᑦ ᒫᔅᑐᕐᑳᕐᑦ (Mastercard) ᑮᓇᐅᔭᖁᑎᒃᓴᖅᑖᕐᕖᑦ ᑮᓇᐅᔭᓂᒃ ᑐᓂᓯᓯᒪᓂᖏᑦ ᐃᑲᔪᕈᑎᒃᓴᐅᓂᐊᖅᑐᓂᒃ ᐃᓕᓐᓂᐊᖅᑐᑦ ᐱᓯᒪᓕᕆᐊᖃᖅᑕᖏᓄᑦ ᐳᕝᕕᕆᓇᖅᑐᐊᓗᒃ ᓄᕙᒡᔪᐊᕐᓇᖅ (Covid-19) ᓯᐊᒻᒪᒃᓯᒪᓕᖅᐸᓪᓕᐊᓂᖓᓂ

ᐊᐃᐱᕆ 21, 2020

ᓄᑖᖑᓪᓗᓂ ᐱᓕᕆᖃᑎᖃᓕᕐᓂᕐᒥᑦᑎᒍᑦ ᒫᔅᑐᕐᑳᕐᑦ (Mastercard) ᑮᓇᐅᔭᖁᑎᒃᓴᖅᑖᕐᕕᒃᑯᓐᓂᒃ, ᐃᓄᐃᑦ ᑕᐱᕇᒃᑯᑦ ᑲᓇᑕᒥ ᓴᕆᒪᒋᔭᖃᓪᓚᕆᒃᐳᑦ ᑐᓂᔭᐅᓯᒪᒋᐊᒥᓐᓂᒃ $1-ᒥᓕᐊᓐᑖᓚᓂᒃ ᑮᓇᐅᔭᖁᑎᒃᓴᖅᑖᕐᕕᒃᑯᑦ ᐳᕝᕕᕆᓇᖅᑐᐊᓗᒃ ᓄᕙᒡᔪᐊᕐᓇᒥᑦ (Covid-19) ᓴᑐᖅᓯᓯᒪᓕᕈᑎᒃᓴᓂᒃ ᐊᒻᒪᓗ ᒪᑭᒋᐊᒃᑲᓐᓂᕈᑎᒃᓴᓂᒃ ᐱᓕᕆᐊᖓᓐᓂᑦ ᑕᐃᔭᐅᓪᓗᓂ COVID-19 Recovery and Resilience Program-ᒥᒃ. ᑖᒃᑯᐊ ᑮᓇᐅᔭᐃᑦ ᖃᐃᑕᐅᔪᑦ ᐊᑐᖅᑕᐅᓂᐊᖅᑐᑦ ᐱᔭᐅᓯᒪᔭᕆᐊᖃᓪᓚᕆᒃᑑᓪᓗᑎᒃ ᐃᓄᐃᑦ ᐃᓕᓐᓂᐊᖅᑐᖁᑎᖏᓐᓄᑦ ᑲᓇᑕᓕᒫᒥ.

ᐃᓄᐃᑦ ᐃᓕᓐᓂᐊᖅᑐᑦ ᑲᔪᓰᓐᓇᐅᔭᖅᑐᒥᒃ ᐃᓚᑰᓂᖃᕐᕕᐅᒻᒪᑕ ᖃᕆᑕᐅᔭᑎᒍᑦ ᐋᖅᑭᒃᓱᒐᐅᓯᒪᔪᑎᒍᑦ ᐱᓕᕆᔪᓐᓇᐅᑎᒃᓴᓂ, ᐊᑐᐃᓐᓇᐅᕙᒍᓐᓇᕐᓂᕐᒥᒃ ᐅᐊᔭᒨᖅᑐᑎᒍᑦ ᓴᓇᕐᕈᑎᖃᕈᓐᓇᕐᓂᕐᒧᑦ ᐊᖏᕐᕋᕆᔭᒥᓐᓂ, ᐊᒻᒪᓗ ᐊᑐᐃᓐᓇᐅᕝᕕᐅᕙᒃᑐᓄᑦ ᐃᓕᓐᓂᐊᕐᓂᓕᕆᓂᕐᒥ ᐃᑲᔪᕈᑎᒃᓴᐅᔪᓂᒃ ᐃᑲᔪᕈᑎᐅᓂᐊᕐᓗᑎᒃ ᐃᓕᓐᓂᐊᕐᕖᑦ ᓯᓚᑖᓃᑎᓪᓗᒋᑦ. ᐳᕝᕕᕆᓇᖅᑐᐊᓗᒃ ᓄᕙᒡᔪᐊᕐᓇᐅᑉ (Covid-19) ᓯᐊᒻᒪᒃᐸᓪᓕᐊᓕᖅᓯᒪᓂᖓᓂᑦ ᐃᓚᒋᐊᕈᑎᐅᓯᒪᓕᕐᒪᑦ ᐊᒃᓱᕈᕐᓇᖅᑐᒃᑰᖃᑦᑕᕐᓂᐅᔪᑦ ᖁᑦᑎᖕᓂᕆᔭᖏᓄᑦ ᐊᒻᒪᓗ ᐃᓱᒪᒃᑯᑦ ᐊᒃᓱᕈᓗᐊᓕᖅᓯᒪᓂᖏᑕ ᐃᓕᓐᓂᐊᖅᑐᐃᑦ.

ᒫᓐᓇᒧᑦ ᑎᑭᑦᓱᒍ, ᑕᒪᐃᓐᓂ ᐊᐅᓚᑦᓯᓂᖃᕐᕕᐅᔪᐃᑦ ᑲᓇᑕᒥ ᒪᑐᓯᒪᓕᖅᑎᑦᑎᓯᒪᒻᒪᑕ ᐃᓕᓐᓂᐊᓕᓵᖅᑐᓂᑦ ᐱᒋᐊᖅᓱᒋᑦ ᒍᕇᑦ 12-ᒧᑦ ᐃᓕᓐᓂᐊᕐᕕᐅᔪᓂᒃ, ᐊᒻᒪᓗ ᓯᓚᑦᑐᖅᓴᕐᕕᓐᓂ ᐃᓕᓐᓂᐊᖅᑐᐃᑦ ᐅᐊᔭᒨᖅᑐᑎᒍᑦ ᐃᓕᓐᓂᐊᕈᑎᒥᓐᓂᒃ ᐱᓕᕆᓂᖃᖔᓕᖅᓯᒪᓪᓗᑎᒃ. ᐊᐅᓚᑦᓯᓂᖃᕐᕕᐅᔪᐃᑦ, ᐃᓕᓐᓂᐊᕐᕖᑦ ᐊᒻᒪᓗ ᑲᑐᔾᔨᖃᑎᒌᖑᔪᑦ ᑲᓇᑕᓕᒫᒥ ᐊᔾᔨᒌᖖᒋᐅᖅᑐᓂᒃ ᖁᑦᑎᖕᓂᖃᖅᑐᑎᒍᑦ ᐃᑲᔪᕈᑎᒃᓴᓂᒃ ᐱᑕᖃᖅᑎᑦᑎᓯᒪᕗᑦ ᐃᓕᓐᓂᐊᖅᑐᓄᑦ.

$1-ᒥᓕᐊᓐᑖᓚᐃᑦ ᖃᐃᑕᐅᓯᒪᔪᑦ ᒫᔅᑐᕐᑳᕐᑦ (Mastercard) ᑮᓇᐅᔭᖁᑎᒃᓴᖅᑖᕐᕕᒃᑯᖏᓐᓂᑦ ᐊᑐᖅᑕᐅᓂᐊᖅᐳᑦ ᐱᓕᕆᓂᖃᕐᓂᕐᓂ ᐃᓕᓐᓂᐊᖅᑐᐃᑦ ᐱᓯᒪᓕᕆᐊᖃᖅᑕᖏᓂᒃ ᓯᑕᒪᐅᓪᓗᑎᒃ ᐱᓗᐊᖅᑐᒥᒃ ᐱᔾᔪᑎᖃᕐᕕᐅᔪᓄᑦ ᒪᑯᓄᖓ:

  • ᐱᑐᒃᓯᒪᓕᕈᓐᓇᕐᓂᕐᒧᑦ ᑐᓗᖅᑕᕐᕕᐅᕙᑦᑐᑦ (ᓲᕐᓗ ᐊᖏᕐᕋᕆᔭᒥ ᖃᕆᑕᐅᔭᑎᒍᑦ ᐱᑐᒃᓯᒪᓕᕈᓐᓇᕐᓂᖅ, ᖃᕆᑕᐅᔭᕋᓛᖃᕆᐊᖃᕐᓂᖅ ᐊᒻᒪᓗ ᖃᕆᑕᐅᔭᑎᒍᑦ ᐃᓕᓐᓂᐊᕈᑎᓄᑦ ᓴᓇᕐᕈᑎᒃᓴᐃᑦ)
  • ᑐᐊᕕᐅᕐᓇᖅᑐᑎᒍᑦ ᑮᓇᐅᔭᖁᑎᒃᓴᖅᑖᕐᑎᑦᓯᓂᖅ ᐃᓕᓐᓂᐊᖅᑐᑦ ᐊᓯᖏᓄᑦ ᐃᓕᓐᓂᐊᕆᐊᓕᕐᓂᐊᖅᑐᓄᑦ (ᓲᕐᓗ ᓴᓇᕐᕈᑎᒃᓴᐃᑦ ᐃᑲᔪᕈᑎᐅᓂᐊᕐᓗᑎᒃ ᐃᓕᓐᓂᐊᕈᑎᒥᓐᓂᒃ ᐱᔭᕇᖅᓯᒪᓕᖅᑐᑦ ᐃᑎᕈᓐᓇᓕᕈᑎᒃᓴᖏᓂᒃ ᓯᓚᑦᑐᖅᓴᖅᕕᓐᓂ ᐱᓕᕆᐊᖑᔪᓄᑦ)
  • ᐊᖏᒡᓕᒋᐊᖅᑎᑦᑎᓂᖅ ᖃᕆᑕᐅᔭᑎᒍᑦ ᐃᑲᔪᕈᑎᒃᓴᐅᕙᑦᑐᓂᒃ (ᓲᕐᓗ ᐃᓕᓐᓂᐊᕈᑎᖏᓄᑦ ᑐᑭᒧᐊᒃᑎᖃᕐᓂᖅ, ᐃᓱᒪᒃᑯᑦ ᐋᓐᓂᐊᖃᓕᖅᑕᐃᓕᒪᔪᓕᕆᔨᓂᑦ ᐃᑲᔪᖅᑎᖃᕈᓐᓇᕐᓂᖅ)
  • ᓇᐅᑦᓯᖅᑐᐃᕙᓪᓕᐊᓂᕐᒥᒃ ᐊᓯᔾᔨᖅᐸᓪᓕᐊᓪᓗᑎᒃ ᐊᒃᑐᐃᓯᒪᓕᕐᓂᐅᔪᓂᒃ ᐳᕝᕕᕆᓇᖅᑐᐊᓗᒃ ᓄᕙᒡᔪᐊᕐᓇᐅᑉ (Covid-19) ᐃᓄᐃᑦ ᓄᓇᓕᒋᔭᖏᓂ ᐊᒻᒪᓗ ᐃᓕᓐᓂᐊᖅᑐᓂᒃ ᐊᒻᒪᓗ ᓇᓗᓇᐃᔭᐃᓂᕐᒥ ᐱᓕᕆᐊᖑᓕᕈᒪᔪᓂᒃ ᐋᖅᑭᒃᓱᒐᐅᓯᒪᓕᕆᐊᖁᓪᓗᒋᑦ ᐊᒻᒪᓗ ᐆᒻᒪᖅᑎᑕᐅᒋᐊᒃᑲᓐᓂᖁᓪᓗᒋᑦ ᐃᓄᐃᑦ ᐃᓕᓐᓂᐊᕐᓂᓕᕆᓂᕐᒥ ᐱᓕᕆᐊᖃᕈᑎᖏᑦ

ᐃᓄᐃᑦ ᑕᐱᕇᒃᑯᑦ ᑲᓇᑕᒥ ᑲᑎᒪᔨᖏᑦ ᐊᖏᖃᑎᒌᒃᓯᒪᓕᓚᐅᖅᐳᑦ ᐊᐃᐱᕆ 20, 2020-ᐅᑎᓪᓗᒍ ᓴᓂᕐᕙᐃᓯᒪᓂᐊᕐᓂᕐᒥᓐᓂᒃ ᑮᓇᐅᔭᖁᑎᔅᓴᓂᒃ ᐃᒪᓐᓇ:

ᐃᓄᕕᐊᓗᐃᑦ ᐊᕕᒃᑐᖅᓯᒪᓂᖓᓂ ᑯᐊᐳᕇᓴᖓᑦ: $130,000
ᓄᓇᕗᑦ ᑐᖖᒐᕕᒃ ᑎᒥᖁᑎᖓᑦ:  $501,000
ᒪᑭᕕᒃ ᑯᐊᐳᕇᓴᖓᑦ: $250,000
ᓄᓇᑦᓯᐊᕗᑦ ᒐᕙᒪᖓᑦ: $119,000

ᓄᓇᓕᕆᓂᕐᒥ ᑲᑐᔾᔨᖃᑎᒌᒋᔭᐅᔪᐃᑦ ᐱᓕᕆᐊᒃᓴᖃᖅᑎᑕᐅᒻᒪᑕ ᓇᖕᒥᓂᖅ ᐃᓚᒋᔭᐅᔪᖁᑎᒋᔭᒥᓐᓂᒃ ᐊᖏᕈᑎᐅᓯᒪᔪᑦ ᐊᕙᑎᒋᔭᖏᑕ ᐃᓗᐊᓃᑦᑐᓄᑦ ᐊᒻᒪᓗ ᓯᓚᑖᓃᑦᑐᓄᑦ ᐃᓄᓐᓄᑦ.

“ᒫᓐᓇᐅᔪᖅ ᐊᔾᔨᒋᖖᒋᑕᒻᒪᕆᐊᓂᒃ ᐊᑐᓕᖅᓯᒪᑎᓪᓗᑕ, ᑕᒪᑦᑕᓕᒫᖅ ᑎᓕᐅᖅᑕᐅᓯᒪᓕᕋᑦᑕ ᐊᔾᔨᒌᖖᒋᐅᖅᑐᑎᒍᑦ ᓇᓗᓇᐃᖅᓯᓯᒪᓕᖁᔭᐅᓪᓗᑕ ᖃᓄᖅ ᐱᓕᕆᓂᖃᓕᕈᓐᓇᕐᒪᖔᑦᑖ ᑕᐃᒪᐅᖏᓐᓇᐅᔭᖅᓱᑎᒃ ᐃᓅᖃᑎᒋᔭᑦᑎᓐᓂᑦ ᐱᓯᒪᓕᖅᑕᐅᔭᕆᐊᖃᖅᑐᓄᑦ. ᖁᔭᒋᓪᓚᕆᒃᐸᒃᑲ ᒫᔅᑐᕐᑳᕐᑦ ᑮᓇᐅᔭᖁᑎᒃᓴᖃᖅᑎᑦᑎᔩᑦ ᐊᐱᖅᓱᕈᑎᐅᔪᓄᑦ ᑭᐅᓯᒪᓕᓚᐅᕐᓂᖏᓐᓄᑦ, ᐃᑲᔪᖅᓯᓂᕐᓄᑦ ᑲᔪᓯᑎᑕᐅᓯᒪᖁᓪᓗᒋᑦ ᐃᓕᓐᓂᐊᕈᑎᒥᓐᓂᒃ ᐱᔭᕇᖅᓯᓯᒪᓕᕈᓐᓇᖁᓪᓗᒋᑦ ᒪᒃᑯᒃᑐᖁᑎᕗᑦ ᐊᒻᒪᓗ ᑐᖖᒐᕝᕕᓕᐅᕐᓂᕐᒧᑦ ᐃᖏᕐᕋᑦᑎᐊᕐᓂᖃᖅᑎᑕᐅᕕᒃᓴᖏᑕ ᐃᓄᐃᑦ ᐃᓕᓐᓂᐊᖅᑐᐃᑦ ᐃᓄᐃᑦ ᓄᓇᖓᓐᓂᕐᒥᐅᑦ ᐊᒻᒪᓗ ᑲᓇᑕᓕᒫᒥ.”
ᓇᐃᑖᓐ ᐆᐱᑦ, ᐊᖏᔪᖅᑳᖅ, ᐃᓄᐃᑦ ᑕᐱᕇᒃᑯᑦ ᑲᓇᑕᒥ

“ᑖᓐᓇ ᑐᐊᕕᐅᕐᓇᖅᓯᓯᒪᓂᐅᔪᖅ ᐱᔾᔪᑎᒋᓪᓗᒍ ᐃᓕᓐᓂᐊᕈᑎᒋᓕᕋᑦᑎᒍ ᖃᓄᖅ ᐊᑕᕝᕕᒋᑐᕋᐅᓪᓚᕆᒻᒪᖔᑦᑖ ᑕᒪᑦᑕᐅᓪᓗᑕ ᐊᒻᒪᓗ ᖃᓄᑎᒋ ᓴᖖᒋᓂᖃᓕᕈᓐᓇᕐᓂᑦᑎᓐᓄᑦ ᑲᑎᓐᓂᖃᖅᓯᒪᓕᕌᖓᑦᑕ. ᐃᓛᒃᑰᖓᓪᓗᑕ, ᐊᑐᓂ ᐱᔭᒃᓴᕆᔭᑦᑎᓐᓂᒃ ᐱᓕᕆᓂᖃᕈᓐᓇᕐᒥᒐᑦᑕ ᓱᒃᑲᐃᓕᑎᑕᐅᓯᒪᓕᖁᓪᓗᒍ ᑖᓐᓇ ᐋᓐᓂᐊᕐᓂᐅᓕᕈᓐᓇᕐᑐᑉ ᓯᐊᒻᒪᒃᐸᓪᓕᐊᓂᖓ. ᑕᒪᓐᓇᑦᑕᐅᖅ, ᓇᓗᓇᐃᖅᓯᔾᔪᑎᐅᒻᒥᔪᖅ ᑕᐱᕇᓕᖅᓯᒪᓂᑦᑎᓐᓂᒃ. ᑲᑎᓐᓂᖃᓕᖅᓯᒪᓗᑕ, ᐊᑭᒋᐊᕐᕕᖃᓕᕐᕕᒋᔪᓐᓇᕋᑦᑎᒍ ᑮᓇᐅᔭᓕᐅᕐᓂᕐᒥᒃ ᐃᓕᖖᒐᐃᓯᒪᓕᕐᓂᖓᑕ ᐳᕝᕕᕆᓇᖅᑐᐊᓗᒃ ᓄᕙᒡᔪᐊᕐᓂᐅᑉ (COVID-19). ᐱᕈᖅᑎᑦᑎᕙᓪᓕᐊᒃᑲᓐᓂᕈᓐᓇᕋᑦᑕ ᓯᓚᕐᔪᐊᕆᔭᕗᑦ ᓴᖖᒋᓂᖅᓴᐅᓕᖅᑎᒋᐊᕐᓗᒍ, ᐱᑦᓯᐊᕐᓂᖅᑕᖃᕐᓂᖅᓴᐅᓕᕐᓗᓂ, ᐊᒻᒪᓗ ᖃᓄᐃᓐᓇᖖᒋᑦᑐᒦᓐᓇᓕᖅᑎᓪᓗᒍ ᐅᕙᑦᑎᓐᓄᑦ ᑕᒪᑦᑕᐅᓗᑕ,”
ᐅᖃᖅᓱᓂ ᕇᑕ ᕈᐃ, ᐊᖏᔪᖅᑳᖅ ᐊᒻᒪᓗ ᐊᓪᓚᕕᖕᒥ ᐃᓱᒪᑕᒻᒪᕆᒋᔭᐅᔪᖅ, ᒫᔅᑐᕐᑳᕐᑦ ᑮᓇᐅᔭᖁᑎᒃᓴᖅᑖᕐᕕᒃᑯᓐᓂ

ᐃᓄᐃᑦ ᑕᐱᕇᒃᑯᑦ ᑲᓇᑕᒥ ᑐᓴᐅᒪᖃᑦᑕᐅᑎᓕᕆᔨᖏᑦ
[email protected]; 613-292-4482

ᑑᓂ ᑕᐃᒪᓐᔅ, ᓯᕗᓕᖅᑎᐅᔪᖅ ᐱᓕᕆᕝᕕᖃᖅᑐᑦ ᑐᓴᐅᒪᖃᑦᑕᐅᑎᓕᕆᔨᖏᑦ
ᒫᔅᑐᕐᑳᕐᑦ ᑮᓇᐅᔭᖁᑎᒃᓴᖅᑖᕐᑎᖏᑦ
[email protected]