July 27, 2022 – Ottawa, Ontario
Ullumi arvinilingnik (6) ukiunik nalliuniqsiurutiqaliqput saqqitaulauqsimavinginit Canadami Inuit Imminiiqattaqujinnginnilirinirmut Parnautiit (NISPS) Inuit Tapiriikkunnit Kanatami. Taakkua NISPS-qutit aaqqiksuangusimavut aaqqiksuijjutiuniaqsutik imminiiqattaqujinnginnilirinirmut pilirianguliqsimajunik Canadaup, aviktuqsimaniujut, ammalu nunaliujut quttingningitigut. Taakkua Parnautiit ilisisimavut ammalu pitaqaqtitsillutik ikajuqtuijjutinik maannaujumi nunaliujunit ammalu aviktuqsimaniujunit pilirianguliqsimajunut imminiiqattaqujinnginnirmut.
“Imminiiqattaqtut aktuisimavangmata inulimaanik Inuit Nunaluktaanganni. Aaqqigiagutiksaunajaqtut amisuilingagaluaqsutik pijausimalirungnaqput. Inuuqatittinnut pitaqaqtitsijariaqallarikkatta aksuruliqsimaniqaqtunik—piluaqtumik makkuktuqutittinnut—ikajuqsuijjutiksanik pisimaliriaqaqtanginik sannginiqarutigijunnaqtanginik ammalu makigiakkannirutigijunnarniaqtanginik inuusilimaamingni. Imminiiqattaqujinnginnilirinirmut piliriangujut suli qutsingniqpautitauvut sivulliqpautitaujariaqaqtunit Inuit Tapiriikkunnit Kanatami, ammalu NISPS-qutiujut suli pitaqaqtitsivakput nalunaiqtausimajunut tunngavviqaqtitaullutik piliriaqarusiunajaqtunik tukimuagutiksauniaqtunik ammalu tusaumatitsivaksutik tamainnik pilirianguliqsimajunut,” uqaqsuni ITK-kut Angijuqqaangat Natan Obed.
Aturniqatsiaqtuuningita NISPS-qutit nalunaijaqtausimavut pimmariutiujutigut atavvigiturauttuuninginnut attanaqtumiiliqsimanirnut ammalu mianiqsisimajjutiujunut taassumunga ilagijauqataujunit. Parnautiit atuliqtitauningit tukimuagutiksaqaqtitauvut Canadami Inuit Imminiiqattaqujinnginnilirinirmut Piliriaqaqtingita timiqutingannit. Atuqtautuinnaqpanngimmata kisiani aaqqiksuiniarlutik aviktuqsimanirmi imminiiqattaqujinnginnilirinirmut parnautinik ammalu pilirianik, kiinaujanik pisimalirasuarutiksanik iglulirinirmi piliriaqarutiksanik, tusaqtitsiniarlutik maligaqutilirinirmut ammalu maligarjuaqutilirinirmut pilirianut, ikajurutiusimavammijut aviktuqsimaniujunut turaangallutik piliriangujunut turaangaluaqtunut sanngiktitsigiarnirmik ilagiingujunik, piruqtitsivallianirmut inuuqatigiiktunut naliqqautittinirmut, ammalu piusituqalirinirmi ikajuqtuinirnut naliqqautittinirmut. Tamakkua ilagijauqataungmijut aturniqatuinnaqsimanngilat piruqtittivallianirmik makigiakkannirunnaqtuuningita inuuqatigiiktut, kisianilittauq quvvaltitsigiaqpannirmut mamisainiqarunnarnirmik aniguisimalirutiginiarlugit ukiunut amisunut kinguvaariikpalliasimajut aksururnaqtukkuuqsimaninginnut ammalu ilainnaaqtitauqattaqsimaninginnut.
Nalunaiqsimalirniarlugu nalliunisiurningannut, Inuit Tapiriit Kanatami saqqiisimaliqput amisuilingallutik sanarrutiksauniaqtunik taijaullutik Pigiarviqarniq Nautsiqtuinirnik, Qaujigiaqsimanirnik ammalu Ilitsivallianiq (MEL). Taakkua sanarrutiksaliangusimajut pijausimalirunnaqput Canadami Inuit Imminiiqattaqujinnginnilirinirmut Parnautitigut (NISPS)Sivulliqpautitauqujausimajunut 6-nga: Piliriaqaliqtitsiniq Inuit Qaujimajatuqanginnit Makigiakkannirunnarnirnut ammalu Imminiiqattaqujinnginnilirinirmut, ammalu turaangatitausimallutik ikajurutiuniarningita Inuit nangminiq isumaliurutiliurunnarninginnut.
Inuit nangminiq isumaliurutiliurunnaliqpalliatillugit piliriangujut tautturiniaqtanginnut ammalu saqqitausimalirniarninginnut, pimmariuqataummata isumaliurutiqarunnarniq qanuq tamakkua piliriangujut nautsiqtugauvanniarningita ammalu qaujigiaqtausimaliqpanniarningita. Taakkua sanarrutiksaliangusimajut turaangatitausimavut atuqtauvanniaqsutik quttingniqsanut pijjutiqaqtunut ingirraniqatsiaqtitaulutik piliriangulirunnaqtut qaujigiaqtauqattarunnarniarmata ammalu ikajurutiusimalirlutik qaujimanirijaujunut ammalu piuniqpaatigut pilirijjusiuvanniaqtunut imminiiqattaqujinnginnilirinirnut. Amisunnguqpalliatillugit Inuit nautsiqtuijiuvanningini ammalu qaujigiaqtiullutik piliriniujunut, tamakkua nautsiqtuiniuvaktut ammalu qaujigiarniuvaktut ikajuutausimalirniarmata pisimalirumajattinnut Inuit Nunaluktaanganni.
Tusagaksalirijjutinut Apiqqusiksaqaqtunut:
Uqaalautingat: 1 (613) 238-8181 ext. 276
Qaritaujatigut: [email protected]
Qanuillattaarniujunut:
- Canadami Inuit Imminiiqattaqujinnginnilirinirmut Parnautiit (NISPS) uqaqsimavut aaqqiksuarijausimajunik piliriniunajaqtunik ammalu sapujjigiarniunajaqtunik piliriangusimaliqullugit quttiluammaringningita imminiiqattaqtunut inungni. Parnautiit quvvaqtittigiaqsimavut amiqqarutigijaullutik tukisiumaniujunik ilulirijanginni, ammalu takuksaunatik attanaqtumiiliqpaktunut ammalu mianiqsijjutiusimalirunnaqtunut ilagijauqataujunik, imminiiqattarnilirinirni Inuit nunalinginni, ammalu tukimuagutiuvaktunik maligaqutinut aviktuqsimaniujut ammalu Canadami quttingnirijanginni nalunaiqtausimajunut tunngavviqaqtitaullutik pilirijjusiuvanniaqtunut imminiiqattaqujinnginnilirinirmi.
- Sitamaullutik Inuit aviktuqsimanirijangit Canadami (Inuvialuit Aviktuqsimaningat Nunatsiarmi, Nunavut, Nunavik Quebec Taqrangani, ammalu Nunatsiavut Labrador Ukiuqtaqtunguni), tamarmiullutik qaujimajaujut Inuit Nunagingmagit, ingminiiqattartuinut quttingniqarmata 5-ngiqtarunnaninginnit 25-ngiqtarungnarninginnut quttingniqsaullutik ingminiikattarniujut quttingnirijanginnit Canadamiulimaanit.
- 2016-mi, Canadami Gavamangat kiinaujanik $9-million-nik qiturngiuqtittililauqsimavut Canadami Inuit Imminiiqattaqujinnginnilirinirmut Parnautinut (NISPS) atuqtauniaqsutik ukiut pingasut (3) atuqpallianinginni. 2019-mi gavamatuqakkut kiinaujaqutiksanik aulatsijjutiksanik tunisisimalilauqsimallutik $50-million-nik kiinaujanik qiturngiuqtitaminnik atuqtaujuksauniaqsutik ukiut qulit (10) atuqpalliatillugit, ilakkanniqsugit $5-million-kannirnik ukiuq tamaamut kajusititausimallutik ikajurutiksanut atuliqtitauvalliajjutiuniaqtunut NISPS-qutinik. December 2019-mi Inuit Tapiriit Kanatami Katimajingit kajusitittilauqsimavut piqujivungaarutinik sanirvaisimaliqujillutik kiinaujaqutiksanik Inuit Tapiriikkunnut Kanatami ammalu sitamaullutik Inuit Nunalirinirmi Katujjiqatigiinginnut atuliqtitsijjutiksauniaqtunik NISPS-qutinut.