ᑐᕌᓐᑐ ᐊᒻᒪ ᐋᑐᕚ, ᒫᑦᓯ 1, 2021
BMO ᑮᓇᐅᔭᓕᕆᔩᑦ (BMO) ᐱᓕᕆᖃᑎᓖᑦ ᐃᓄᐃᑦ ᑕᐱᕇᒃᑯᓐᓂᑦ ᑲᓇᑕᒥ (ITK) ᖃᐅᔨᒪᑦᑎᐊᕈᒪᓪᓗᑎᒃ ᑭᒃᑯᑐᐃᓐᓇᕐᓄᑦ ᐊᐃᑦᑐᖅᑕᐅᔾᔭᐃᒃᑯᑏᑦ (PPE) ᐊᑐᐃᓐᓇᐅᑦᑎᐊᕋᓗᐊᕐᒪᖔᑕ ᓄᓇᓕᐅᔪᓂᑦ ᐃᓄᐃᑦ ᓄᓇᖓᓐᓂ ᐊᑐᕆᐊᖃᕐᓂᕐᐹᖑᑎᓪᓗᒋᑦ ᑕᒪᒃᑯᓂᖓ. ᐅᖓᑖᓃᑦᑐᓂᑦ 113,900 ᑮᓇᕐᒧᑦ ᒪᑐᐊᑦ, 563,000 ᖃᐅᔨᖅᑐᑦ ᐊᓪᓚᕈᑏᑦ ᐊᒻᒪᓗ 438ᓂᑦ ᐊᖏᓂᓕᒻᒥᒃ ᑲᑎᓪᓗᒋᑦ ᐃᒪᓕᓐᓂᑦ ᐅᐊᓴᐅᑎᓂᑦ ᓇᔅᓯᐅᔾᔨᓯᒪᔪᑦ ᐃᑲᔪᖅᑐᒋᑦ ᓴᐳᑎᓯᒪᒍᓐᓇᖁᓪᓗᒋᑦ ᐃᓄᐃᑦ ᖃᓂᒪᓇᖅᑐᖅᑕᖃᕐᓂᖓᓂ ᓄᓇᓕᐅᔪᓂᑦ ᓄᓇᕗᒥ, ᓄᓇᕕᒻᒥ, ᐃᓄᕕᐊᓗᐃᑦ ᓄᓇᖓᓐᓂ ᐊᒻᒪᓗ ᓄᓇᑦᓯᐊᕗᒻᒥ.
“ᐃᓄᐃᑦ ᑕᐱᕇᑦ ᑲᓇᑕᒥ ᖁᕕᐊᓱᑦᑐᑦ ᑲᓲᑎᑎᑦᑎᔭᕆᐊᔅᓴᖅ ᐃᓄᐃᑦ ᓄᓇᓕᖏᓐᓂᒃ ᐊᒻᒪᓗ ᐊᐅᓚᑦᑎᔨᓂᑦ ᑲᑐᔾᔨᖃᑎᖏᓐᓂᒃ ᓲᕐᓗ ᑖᒃᑯᓂᖓ ᑮᓇᐅᔭᒃᑯᕕᓕᕆᔨᓂᑦ ᐃᑲᔫᑎᖃᕈᓐᓇᖅᑐᓂᑦ ᓄᓇᓕᖁᑎᑦᑎᓐᓄᑦ,” ᐅᖃᖅᑐᖅ ᓇᑖᓐ ᐅᐱᑦ, ᐊᖓᔪᖅᑳᖅ, ᐃᓄᐃᑦ ᑕᐱᕇᒃᑯᓐᓂᑦ ᑲᓇᑕᒥ. “ᐃᓄᐃᑦ ᐃᓱᒫᓗᓇᖅᑐᒦᓐᓂᓴᐅᒻᒪᑕ ᐊᑑᑎᕕᐅᔪᓐᓇᓂᕐᓴᐅᓪᓗᑎᒃ ᓄᕙᕐᔪᐊᓇᖅᑐᒧᑦ (COVID-19) ᐱᔾᔪᑎᒋᓪᓗᒋᑦ ᐊᑯᓂᐊᓗᒃ ᓈᒻᒪᖏᑦᑐᓄᑦ ᐊᑑᑎᕕᐅᖃᑦᑕᕐᓯᒪᑎᓪᓗᒋᑦ, ᐊᓯᖏᑦ ᑕᒪᒃᑯᐊ ᐱᒐᓗᐊᕐᒥᑎᓪᓗᒋᑦ, ᐊᒥᓱᑦ ᐃᓄᐃᑦ ᓴᓗᒪᔪᒥᒃ ᐃᒥᕐᒥᒃ ᐊᑐᖃᑦᑕᕆᐊᖃᖅᑎᓪᓗᒋᑦ ᐅᐊᓴᐅᑎᒋᖃᑦᑕᓂᐊᖅᑕᖏᓐᓂᒃ ᐊᒡᒐᖏᓐᓄᑦ, ᐊᒻᒪᓗ ᐃᓪᓗᖃᑦᑎᐊᕆᐊᖃᖅᑎᓪᓗᒋᑦ ᐃᓄᑑᕕᖃᑲᐃᓐᓇᕆᐊᖃᖅᑲᑕ ᓄᕙᕐᔪᐊᓇᖅᑐᒧᑦ ᖃᓂᒪᓱᒋᔭᐅᑎᓪᓗᒋᑦ ᐅᕝᕙᓘᓐᓃᑦ ᓇᓗᓇᐃᖅᑕᒥᓂᐅᑎᓪᓗᒋᑦ ᖃᓂᒻᒪᓇᖅᑐᖅᑕᖃᕐᓂᖏᓐᓂᒃ. ᐃᖅᑲᓇᐃᔮᔅᓴᖃᖅᑐᐃᓐᓇᐅᒐᑦᑕ ᑲᒪᒋᔭᖃᕈᓐᓇᓂᕐᒥᒃ ᑕᒪᒃᑯᓂᖓ ᐱᓇᐃᓗᑕᐅᕙᑦᑐᓂᑦ, ᐊᒻᒪᓗ ᖁᔭᓕᔪᖓ ᐃᖅᑲᓇᐃᔭᖅᑎᓄᑦ ᑮᓇᐅᔭᒃᑯᕕᒻᒥ ᑖᒃᑯᓂᖓ ᐃᑲᔫᑎᖃᕐᓂᖏᓐᓄᑦ ᐊᐃᑦᑐᖅᑕᐅᔾᔭᐃᒃᑯᓂᑦ ᐃᓄᓐᓄᑦ ᓄᓇᓕᐅᔪᓄᑦ ᒫᓐᓇ ᐊᑐᖅᑕᐅᔭᕆᐊᖃᓗᐊᖅᑎᓪᓗᒋᑦ.”
“ᑮᓇᐅᔭᒃᑯᕕᒻᒥ, ᐱᓕᕆᖃᑎᖃᑦᑎᐊᖃᑦᑕᕋᑦᑕ ᐊᑯᓂᐊᓗᓪᓗ ᐱᓕᕆᖃᑎᖃᖃᑦᑕᕐᓯᒪᓕᖅᑐᑎᒃ ᓄᓇᖃᖅᑐᑐᖃᕐᓂᑦ ᐃᑲᔪᕐᐸᑦᑕᖏᓐᓂᒃ ᐊᒻᒪᓗ ᓄᓇᓕᐅᔪᓂᑦ ᑲᓇᑕᒥ ᓇᒥᑐᐃᓐᓈᖅᑐᓂᑦ ᐊᖅᑯᑎᒋᓪᓗᒋᑦ ᓄᓇᖃᖅᑐᑐᖃᕐᓄᑦ ᑮᓇᐅᔭᒃᑯᕕᓕᕆᔩᑦ ᐊᒻᒪᓗ ᓄᓇᖃᖅᑐᑐᖃᕐᓄᑦ ᐅᖃᐅᔾᔨᒋᐊᖅᑏᑦ ᑲᑎᒪᔩᑦ,” ᐅᖃᖅᑐᖅ ᒪᐃᒃ ᕚᓄ, ᑮᓇᐅᔭᒃᕕᒻᒥ ᑲᓇᑕᒥ ᐃᖅᑲᓇᐃᔭᕐᕕᓐᓄᑦ ᑮᓇᐅᔭᒃᑯᕕᓕᕆᔩᑦ. “ᑕᒪᒃᑯᐊ ᐊᑦᑐᐊᓂᕗᑦ ᐃᑲᔫᑎᖃᕐᓯᒪᒻᒪᑕ ᑐᑭᓯᑎᑦᑎᓂᕐᒥᒃ ᐃᑲᔪᕈᓐᓇᓂᑦᑎᓐᓂᒃ ᓄᓇᓕᐅᔪᓂᑦ ᐃᑲᔪᖅᑕᐅᔭᕆᐊᓕᓐᓂᑦ, ᒪᑯᐊᖑᓪᓗᑎᒃ ᐊᓪᓚᐃᑦ, ᐊᓪᓚᖓᔪᑦ ᐊᒻᒪᓗ ᐃᓄᐃᑦ. ᐃᓄᐃᑦ ᓄᓇᓕᖏᓐᓂ ᐃᓄᐃᑦ ᓄᓇᖓᓐᓂ, ᖁᔭᓕᔪᒍᑦ ᑕᐱᕇᒃᑯᑦ ᑲᑐᔾᔨᖃᑎᖃᕐᓂᖏᓐᓂᒃ ᐊᑑᑎᖃᓪᓚᕆᒻᒪᑦ ᑕᒪᒃᑯᐊ ᐊᐃᑦᑐᖅᑕᐅᔾᔭᐃᒃᑯᑏᑦ ᐋᑕᐅᔪᓐᓇᓂᐊᕐᖓᑕ ᓄᓇᓕᐅᔪᓄᑦ ᐊᑐᕆᐊᖃᕐᓂᕐᐹᖑᑎᓪᓗᒋᑦ ᑕᒪᒃᑯᓂᖓ ᒫᓐᓇ.”
ᐊᐃᑦᑐᖅᑕᐅᔾᔭᐃᒃᑯᑏᑦ ᓇᔅᓯᐅᔾᔭᐅᓂᖏᑦ ᐃᓄᐃᑦ ᓄᓇᖓᓐᓄᑦ ᐃᓚᒋᔭᐅᒻᒪᑦ ᐊᖏᓂᕐᓴᒧᑦ ᐱᓕᕆᐊᖓᓐᓄᑦ ᑮᓇᐅᔭᒃᕕᓕᕆᔨᑦ ᐊᐃᑦᑐᖅᑕᐅᔾᔭᐃᒃᑯᑏᑦ ᓄᓇᖃᖅᑐᑐᖃᐃᑦ ᓄᓇᓕᒐᓴᖏᓐᓅᕈᔾᔭᐅᖁᓪᓗᒋᑦ ᑲᓇᑕᒥ ᓇᒥᓕᒫᖅ ᐃᑲᔪᖅᑎᖃᕐᓗᑎᒃ ᓄᓇᓖᑦ ᓯᕗᓕᖅᑎᖏᓐᓂᒃ ᑲᑐᔾᔨᖃᑎᒌᖏᓐᓂᓪᓗ ᓲᕐᓗ ᒪᑯᐊ ᑕᐱᕇᑦ, WASAC, ᐊᓪᓚᐃᑦ ᑲᑐᔾᔨᖃᑎᒌᖏᑦ ᐃᓕᖅᑯᓯᕐᒥᒃ ᐃᓕᓴᕕᓐᓄᑦ ᐊᒻᒪᓗ ᔨᐊᓗᑯᐃᓪ ᓯᓚᑦᑐᓴᕐᕕᒃ. ᐅᓪᓗᒥᒧᑦ ᑎᑭᑦᑐᒍ ᖃᓂᒋᔮᓃᑦᑐᑦ 150,000 ᑮᓇᕐᒧᑦ ᒪᑐᐊᑦ, 500 ᒑᓚᓐᓂᑦ ᐊᖏᓂᓖᑦ ᐊᒡᒐᒻᒧᑦ ᐅᐊᓴᐅᑏᑦ ᐊᒻᒪᓗ 750,000 ᖃᐅᓯᖅᑐᑦ ᐊᓪᓚᕈᑏᑦ ᓇᔅᓯᐅᔾᔭᐅᓯᒪᔪᑦ ᐊᓪᓚᐃᑦ ᐊᓪᓚᖓᔪᐃᓪᓗ ᓄᓇᓕᖏᓐᓄᑦ ᓄᓇᓕᓕᒫᖑᔪᓄᑦ ᐱᖓᓐᓇᖓᓂ ᑲᓇᓐᓇᖓᓄᑦ ᑎᑭᑦᑐᒍ ᐊᒻᒪᓗ ᐃᓄᐃᑦ ᓄᓇᓕᖏᓐᓄᑦ ᐃᓄᐃᑦ ᓄᓇᖓᓐᓃᑦᑐᓄᑦ.
ᑮᓇᐅᔭᒃᑯᕕᒻᒥ BMO ᑲᑐᔾᔨᖃᑎᒌᑦ
ᐃᑲᔪᕐᐸᑦᑐᑦ ᐊᑭᓕᕐᓱᐃᔪᖁᑎᒋᕙᑦᑕᖏᓐᓂᒃ 200ᓂᑦ ᐊᕐᕌᒍᓂᑦ ᐃᓚᕙᓪᓕᐊᑐᐃᓐᓇᖅᑐᑎᒃ, ᑮᓇᐅᔭᒃᕕᒃ ᐊᔾᔨᒌᙱᑐᒡᒍᑎᓪᓚᕆᐊᓗᓐᓂᑦ ᑮᓇᐅᔭᒃᑯᕕᓕᕆᔾᔪᑎᖃᕐᐸᑦᑐᑦ − 8ᒋᔭᐅᓪᓗᑎᒃ ᐊᖏᓂᕐᐹᖑᖃᑕᐅᔪᑦ ᑮᓇᐅᔭᒃᑯᕕᓐᓂᑦ, ᐱᖁᑎᑎᒍᑦ, ᐅᐊᓐᓇᖓᓂ ᐊᒥᐊᓕᒐᑦ. ᑲᑎᓕᒫᖅᑐᒋᑦ ᐱᖁᑎᖏᖏᑦ ᐊᑭᓖᑦ $973 ᕕᓕᐊᓐ ᔮᓐᓄᐊᓕ 31, 2021ᒥ ᑕᑯᓪᓗᒋᑦ, ᐊᒻᒪᓗ ᐃᖅᑲᓇᐃᔭᖅᑎᖏᑦ ᐊᔾᔨᒌᙱᑐᒡᒍᑎᐅᓪᓗᑎᒃ ᐊᒻᒪᓗ ᐃᓚᒋᔭᐅᑦᑎᐊᐸᑦᑐᑎᒃ ᐃᖅᑲᓇᐃᔭᖅᑎᖏᑦ, ᑮᓇᐅᔭᒃᑯᕕᒃ ᓯᕕᑐᔪᒨᖓᔪᓂᑦ ᐊᔾᔨᒌᑦᑐᓂᑦ ᑭᒃᑯᑐᐃᓐᓇᕐᓅᖓᔪᓂᑦ ᐊᒻᒪᓗ ᑮᓇᐅᔭᓕᐅᕋᓱᐊᕈᑎᐅᔪᓂᑦ ᑮᓇᐅᔭᒃᑯᕕᓕᕆᕙᑦᑐᑦ, ᖃᑭᒪᓂᕐᒧᑦ ᐊᐅᓚᑦᑎᔨᐅᕙᑦᑐᑦ ᐊᒻᒪᓗ ᐱᕈᕐᐸᓪᓕᐊᑎᑦᑎᓂᕐᒧᑦ ᑮᓇᐅᔭᒃᑯᕕᓕᕆᕙᑦᑐᑦ ᐱᔨᑦᑎᕋᐅᑎᖃᕐᐸᑦᑐᑎᓪᓗ ᐅᖓᑖᓃᑦᑐᓄᑦ 12 ᒥᓕᐊᓐ ᐃᑲᔪᕐᐸᑦᑕᖏᓐᓄᑦ ᐊᒻᒪᓗ ᐱᓕᕆᐊᖃᕐᐸᑦᑐᑎᒃ ᐱᖓᓱᓂᑦ ᐊᐅᓚᓂᓕᓐᓂᑦ ᑲᑐᔾᔨᖃᑎᒌᓂᑦ: ᑭᒃᑯᑐᐃᓐᓇᕐᓄᑦ ᑮᓇᐅᔭᓕᐊᕋᓱᐊᕋᑕᐅᔪᓄᑦ ᑮᓇᐅᔭᒃᑯᕕᓕᕆᓂᖅ, ᑮᓇᐅᔭᒃᕕᑯᒻᒥ ᖃᑭᒪᓂᕐᒧᑦ ᐊᐅᓚᑦᑎᓂᕐᒥᒃ ᐊᒻᒪᓗ ᑮᓇᐅᔭᒃᑯᕕᒻᒥ ᐊᑭᑐᔫᑎᓄᑦ ᓂᐅᕐᕈᑎᖃᖃᑦᑕᓂᕐᒥᒃ.