June 8, 2023 – Ottawa, Ontario
Canadami Makkuktut Inuit Katimajingit (NIYC) niruaqhlisimalilauqtut Susie-Anne Kudluk angijuqqaarijauniaqtumik 2023-mit 2025-mut iniqaqtitauluni.
Canadami Makkuktut Inuit Katimajingit pitjutiqaqtigijaungmata makkuktunginut Inuit Canadalimaami. Angijuqqaangujuq nipigijauvakpuq NIYC-kunnut tamakkingni Canadaup ammalu silarjuap quttingningitigut ammalu atainnaqtuulluni ilagijauqataulluni katimajinginni Inuit Tapiriit Kanatami ammalu Inuit Ukiuqtaqtumi Katimajinginnut Canadami ammalu atainnaqtumik ilagijauqataugilluni Inuit-Gavamatuqakkut Piliriaqaqatigiingita Katimajiralaanginnut tusaajaqturtiuvangnirmigut.
Kudluk angijuqqaamut tungalirijaulaurpuq Qarjuit Makkuktut Katimajinginnut taimannganit 2021-mi ilagijauqatauliqqaalaurłuni katimajigijaujunut Qarjuit Makkuktut Katimajinginni pijjutiqaqtiulluni Ungava tariungata sigjanganirmiunut. Kudluk piliriqatiqarumattiaqsimavuq makkuktunik ammalu makkuktuit piuniqsamik inuusiqaliqtitausimaliqullugit ikajurniqaqtutigut asijjiisimaliqtittigiamut ammalu nipigijaunirmigu makkuktunginut inuit.
“Upigusukpunga ilagijaunialirninnik Canadami Makkuktut Inuit Katimajinginnut Angijuqqaarijaulunga” uqalaurpuq Angijuqqaaq Kudluk. “Piliriaksarijannik ajunnginnilimaakkut pilirisimagiarniaqtunga, ammalu nipigijaulunga makkuktunginut Inuit Canadalimaami ammalu silarjualimaami. Quviasullarikpunga piliriqatigiigunnarniarnittinnik sivuniriniaqtattinni ukiuni. Ilitarijumavakka Qarjuit Makkuktut Katimajigijangit uvannik ikajuqtuisimalaurninginnut niruagaksannguqsimatillunga. Nakurmiik!
Tavvani niruaqłiniqaqtillugit marruulaurmatik niruagaksannguqsimajuuk; Tyler Akeeagok ammalu Susie-Anne Kudluk. Ilaalu Tyler niruaqtausimalilaunngikkaluarami angijuqqaap ininganu, ikajuqtugausimavuq katimajinit makkuktunik piliriqatiqaqpannirminik piliriinnaqullugu ammalu katimajigijaujumi.
NIYC-kut angijuqqaangat piliriqatiqattiarniaqpuq Canadami Mmakkuktut Inuit Katimajinginnik ilagijaujuit tilijausimallutik niruaqtausimajunut ilagijauqataujunut pijjutiqaqtigijaullutik Inuvialuit Aviktuqsimaninganit, Qitirmiut Inuit Katujjiqatigiinginit, Kivalliq Inuit Katutjiqatigiinginit, Qikiqtani Inuit Katutjiqatigiinginit, Qarjuit Makkuktut Katimajinginit ammalu Nunatsiavut Gavamanganit.
Quviasugutivattigit, Susie-Anne!