COVID-19Uncategorized @ius

ᐳᕝᕕᕆᓇᖅᑐᐊᓗᒃ ᓄᕙᒡᔪᐊᕐᓇᒥᒃ (COVID-19) ᖃᓂᒪᓕᖅᐸᒃᑐᓕᕆᓂᕐᒧᑦ ᐃᑲᔪᖅᑕᐅᔾᔪᑎᒃᓴᑦ ᐊᑐᐃᓐᓇᐅᑎᑕᐅᓂᖏᑦ ᐃᓄᒋᐊᒃᑐᓂᕐᒥᐅᓂ ᐃᓄᐃᑦ ᑲᑐᔾᔨᖃᑎᒌᖏᓐᓄᑦ

ᑕᒪᑐᒪᓂ ᐊᔾᔨᖃᖖᒋᑦᑐᒥᒃ ᐊᑐᓕᖅᓯᒪᓂᖃᖅᑎᓪᓗᑕ, ᐃᓄᐃᑦ ᑕᐱᕇᒃᑯᑦ ᑲᓇᑕᒥ (ITK) ᐃᓕᑕᖅᓯᓯᒪᔪᒪᕗᑦ ᑲᑐᔾᔨᖃᑎᒌᖑᔪᓂᒃ ᐱᓕᕆᓂᖃᕐᓂᖏᑕ ᐃᑲᔪᓕᕆᐊᕐᓂᕐᓄᑦ ᐃᓄᓐᓂᒃ ᓄᓇᖃᖅᑐᓂᒃ ᓯᓚᑖᓂ ᐃᓄᐃᑦ ᓄᓇᖓᑦᑕ ᑲᔪᓯᑎᑕᐅᓯᒪᖁᓪᓗᒋᑦ ᐱᓕᕆᓂᐅᔪᑦ ᐃᓄᐃᑦ ᖃᓄᐃᓐᓇᖅᑐᒦᑎᑕᐅᖁᓪᓗᒋᑦ, ᒥᐊᓂᕆᔭᐅᑦᓯᐊᕐᓗᑎᒃ ᐊᒻᒪᓗ ᖃᓄᐃᖖᒋᑦᑎᐊᖅᑎᑕᐅᖁᓪᓗᒋᑦ. ᐃᓄᐃᑦ ᑕᐱᕇᒃᑯᑦ ᑲᓇᑕᒥ (ITK) ᐱᓕᕆᐊᒃᓴᖃᕐᒪᑕ ᐳᕝᕕᕆᓇᖅᑐᐊᓗᒃ ᓄᕙᒡᔪᐊᕐᓇᖅ (COVID-19) ᖃᓂᒪᓂᖃᕐᓂᕐᒧᑦ ᑭᐅᓯᒪᓕᕆᐊᕈᑎᐅᔪᑦ ᐊᑐᓕᖅᑎᑕᐅᓯᒪᓂᖏᑦ ᐃᓚᐅᑎᑦᓯᓂᖃᖁᓪᓗᒋᑦ ᑕᒪᐃᓐᓂᒃ ᐃᓄᓐᓂᒃ ᐃᓚᒋᔭᐅᖃᑕᐅᑎᑦᓯᓂᖅ ᑲᓇᑕᒥ, ᐱᖃᓯᐅᑎᓗᒋᑦ ᑕᐃᒃᑯᐊ ᓯᑕᒪᐅᓪᓗᑎᒃ ᓄᓇᓕᕆᓂᕐᓂ ᐊᕕᒃᑐᖅᓯᒪᓂᐅᔪᑦ ᓯᓚᑖᓂᕐᒥᐅᑕᐅᔪᑦ.

ᑲᓇᑕᒥ ᒐᕙᒪᖓᑕ ᐳᕝᕕᕆᓇᖅᑐᐊᓗᒃ ᓄᕙᒡᔪᐊᕐᓇᒧᑦ (COVID-19) ᑐᐊᕕᐅᕐᓇᖅᓯᓯᒪᔪᓄᑦ ᑭᐅᒋᐊᕈᑎᐅᓪᓗᑎᒃ ᐸᕐᓇᐅᑎᖏᑦ ᐃᓚᖃᕐᒪᑕ $305-ᒥᓕᐊᓐᑖᓚᓂᒃ ᐊᔾᔨᒋᔭᐅᖖᒋᑦᑑᓪᓗᑎᒃ-ᑐᖖᖓᕝᕕᖃᖅᑎᑕᐅᔪᓄᑦ ᓄᓇᖃᖅᑳᕐᓯᒪᔪᑦ ᓄᓇᓕᖏᑕ ᐃᑲᔪᖅᑕᐅᔾᔪᑎᒃᓴᖏᓂᒃ ᑮᓇᐅᔭᖁᑎᖃᖅᑎᑕᐅᓗᑎᒃ, ᑕᐃᒪᓗ ᐃᓚᖃᖅᑎᑕᐅᓪᓗᑎᒃ $45-ᒥᓕᐊᓐᑖᓚᓂᒃ ᐃᓚᒋᔭᐅᖃᑕᐅᓪᓗᑎᒃ ᐃᓄᐃᑦ ᓄᓇᓕᕆᓂᕐᒥ ᑲᑐᔾᔨᖃᑎᒌᖑᔪᓄᑦ. ᐃᓄᐃᑦ ᑕᐱᕇᒃᑯᓐᓄᑦ ᑲᓇᑕᒥ ᑲᑎᒪᔨᖏᑦ ᑎᓕᐅᕆᓯᒪᒻᒪᑕ ᑖᒃᑯᐊ ᑮᓇᐅᔭᖁᑎᒃᓴᐃᑦ ᖃᐃᑕᐅᕙᓪᓕᐊᔪᑦ ᑲᓇᑕᒥ ᒐᕙᒪᖓᓐᓂ ᐃᒪᓐᓇ ᐋᖅᑭᒃᑕᐅᓯᒪᓕᖁᓪᓗᒋᑦ:

$5,850,000 ᐃᓄᕕᐊᓗᐃᑦ ᐊᕕᒃᑐᖅᓯᒪᓂᖓᓂ ᑯᐊᐳᕇᓴᖓᑦ
$22,545,000 to ᓄᓇᕗᑦ ᑐᖖᒐᕝᕕᒃᑯᑦ ᑎᒥᖓᑦ
$11,250,000 ᒪᑭᕕᒃ ᑯᐊᐳᕇᓴᖓᑦ
$5,355,000 ᓄᓇᑦᓯᐊᕗᑦ ᒐᕙᒪᖓᑦ
ᐅᔾᔨᕆᓗᒍ: ᑕᒪᒃᑯᐊ ᑮᓇᐅᔭᖁᑎᒃᓴᐅᓂᐊᖅᑐᑦ ᓱᓕ ᒐᕙᒪᑐᖃᒃᑯᓐᓂᑦ ᖃᐃᑕᐅᕙᓪᓕᐊᖖᒋᑦᑐᑦ.

ᑖᒃᑯᐊ ᑮᓇᐅᔭᖁᑎᒃᓴᐃᑦ ᐊᑐᖅᑕᐅᓂᐊᖅᑐᑦ ᐃᑲᔪᕈᑎᐅᓗᑎᒃ ᐊᑐᓂ ᓄᓇᓕᕆᓂᕐᒥ ᑲᑐᔾᔨᖃᑎᒌᖑᔪᓄᑦ ᐃᓚᒋᔭᐅᖃᑕᐅᔪᓄᑦ ᑲᓇᑕᓕᒫᒥ, ᐱᖃᓯᐅᑎᓗᒋᑦ ᑕᐃᒃᑯᐊ ᓄᓇᖃᖅᑐᑦ ᓄᓇᓕᕆᓂᕐᒥ ᐊᕕᒃᑐᖅᓯᒪᓂᕐᒥᑕ ᓯᓚᑖᓂ. ᐃᓄᐃᑦ ᑲᑐᔾᔨᖃᑎᒌᖏᑦ ᐊᐅᓚᑦᓯᓂᖃᖅᑐᑦ ᓯᓚᑖᓂ ᐃᓄᐃᑦ ᓄᓇᖓᑦᑕ ᐊᐱᕆᔭᐅᓯᒪᕗᑦ ᖃᐅᔨᒋᐊᖅᓯᒪᓕᖁᓪᓗᒋᑦ ᓄᓇᓕᕆᓂᕐᒥ ᑲᔾᔨᖃᑎᒌᒥᓐᓄᑦ ᐃᓚᒋᔭᐅᔪᖁᑎᒋᔭᒥᓐᓂᒃ, ᐃᒪᓐᓇ, ᖃᐅᔨᓯᒪᓕᕐᓂᐊᕐᓗᒋᑦ ᖃᓄᖅ ᑕᒪᒃᑯᐊ ᑮᓇᐅᔭᖁᑎᒃᓴᐅᔪᑦ ᐱᔭᐅᓯᒪᓕᕈᓐᓇᕐᒪᖔᑕ ᐊᒻᒪᓗ ᖃᓄᖅ ᐊᑐᖅᑕᐅᔪᒃᓴᐅᒻᒪᖔᑕ ᐃᑲᔪᕈᑎᐅᓂᖏᓐᓂ ᐱᔭᐅᓯᒪᓕᕆᐊᖃᖅᑐᓄᑦ ᐃᓄᒋᐊᒃᑐᓂᕐᒥᐅᖑᓪᓗᑎᒃ ᐃᓄᓐᓂᑦ ᐊᔾᔨᖃᖖᒋᑦᑐᒥᒃ ᐊᒻᒪᓗ ᐊᒃᓱᕈᕐᓇᖅᑐᓂᒃ ᐊᑐᓕᖅᓯᒪᑎᓪᓗᑕ.

ᑮᓇᐅᔭᖁᑎᒃᓴᐃᑦ ᐊᑐᐃᓐᓇᐅᕗᑦ ᐱᓕᕆᓂᖃᕐᓂᐅᔪᓄᑦ ᐊᑐᓕᖅᑎᑕᐅᓯᒪᓪᓗᑎᒃ ᒪᑯᓂᖓ ᐃᓚᖃᖅᑎᓪᓗᒋᑦ, ᑭᓯᐊᓂᓗ ᑭᒡᓕᖃᖅᑎᑕᐅᓯᒪᓇᑎᒃ ᑖᒃᑯᓄᖓᑐᐊᖅ:

  • ᐃᑲᔪᕈᑎᒃᓴᐃᑦ ᐃᓄᑐᖃᕆᔭᐅᔪᓄᑦ ᐊᒻᒪᓗ ᐊᒃᑐᖅᑕᐅᓴᕋᐃᑦᑑᓪᓗᑎᒃ ᓄᓇᓕᖃᖅᑐᓄᑦ
  • ᐱᓕᕆᐊᑦ ᐊᑐᓕᖅᑎᑕᐅᓯᒪᔪᑦ ᓂᕿᔅᓴᖃᖖᒋᓗᐊᖅᐸᒃᑐᓄᑦ
  • ᐃᓕᓐᓂᐊᕐᓂᓕᕆᓂᖅ ᐊᒻᒪᓗ ᐊᓯᖏᑦ ᐃᑲᔪᕈᑎᒃᓴᐃᑦ ᓱᕈᓯᕐᓄᑦ
  • ᐃᓱᒪᒃᑯᑦ ᐋᓐᓂᐊᖃᓕᖁᔨᖖᒋᓐᓂᕐᒧᑦ ᐃᑲᔪᕈᑎᒃᓴᖃᖅᑎᑦᓯᓂᖅ ᐊᒻᒪᓗ ᑐᐊᕕᐅᕐᓇᖅᑐᖃᖅᑎᓪᓗᒍ ᑭᐅᔨᐅᕙᒃᓱᑎᒃ ᐱᔨᑦᓯᕋᖅᑎᖏᑦ
  • ᐸᕐᓇᖅᓯᒪᓕᕆᐊᕈᑎᐅᓪᓗᑎᒃ ᐱᓕᕆᓂᐅᔪᑦ ᓯᐊᒻᒪᒃᑎᑕᐅᓯᒪᓕᖁᓇᒍ ᐳᕝᕕᕆᓇᖅᑐᐊᓗᒃ ᓄᕙᒡᔪᐊᕐᓇᖅ (COVID-19)

ᐊᓯᒃᑲᓐᓂᖏᑦ ᑮᓇᐅᔭᐃᑦ $15-ᒥᓕᐊᓐᑖᓚᐃᑦ ᓴᓂᕐᕙᖅᑕᐅᓯᒪᕗᑦ ᒐᕙᒪᑐᖃᑯᓐᓂᑦ ᐃᑲᔪᕈᑎᒃᓴᐅᓪᓗᑎᒃ ᐃᓄᓐᓄᑦ ᓄᓇᖃᖅᑐᓄᑦ ᓯᓚᑖᓂ ᓄᓇᓕᒋᔭᒥᒃᑕ. ᑖᒃᑯᐊ ᑮᓇᐅᔭᖁᑎᒃᓴᐃᑦ ᐱᔭᐅᓯᒪᓕᕈᓐᓇᖅᐳᑦ ᐃᓱᒪᓕᐅᕈᑎᓕᐅᕈᑎᑎᒍᑦ ᐅᕙᓂ proposals directly to the Government of Canada.

ᑮᓇᐅᔭᖁᑎᔅᓴᐅᓪᓗᑎᒃ ᓴᓂᕐᕙᖅᑕᐅᓯᒪᔪᑦ ᐃᓄᐃᑦ ᓄᓇᓕᕆᓂᕐᒥ ᑲᑐᔾᔨᖃᑎᒌᖏᓐᓄᑦ ᐃᓚᒋᐊᕈᑎᐅᓯᒪᒻᒪᑕ $500-ᒥᓕᐊᓐᑖᓇᓄᑦ ᓴᓂᕐᕙᖅᑕᐅᓯᒪᔪᓄᑦ ᐳᕌᕕᓐᓯᐅᔪᓄᑦ ᐊᒻᒪᓗ ᐊᕕᒃᑐᖅᓯᒪᓂᐅᔪᓄᑦ ᐊᑐᖅᑕᐅᔪᒃᓴᐅᓪᓗᑎᒃ ᐱᔭᐅᓯᒪᔭᕆᐊᖃᓪᓚᕆᒃᑑᓪᓗᑎᒃ ᐋᓐᓂᐊᖅᓯᐅᕐᑎᓕᕆᔨᓂᑦ ᐱᔭᐅᓯᒪᔭᕆᐊᖃᖅᑐᓄᑦ ᐸᕐᓇᒃᓯᒪᔪᓐᓇᖁᓪᓗᒋᑦ ᐊᒻᒪᓗ ᐱᓗᐊᖖᒋᓕᖅᑎᑦᓯᒋᐊᕈᑎᐅᓂᐊᕐᓗᑎᒃ ᐱᓕᕆᐊᖏᓐᓄᑦ; ᐊᒻᒪᓗ ᐱᔭᐅᓯᒪᔪᓐᓇᖅᓱᑎᒃ ᐳᕌᕕᓐᓯᒋᔭᐅᔪᓂᑦ ᐊᒻᒪᓗ ᐊᕕᒃᑐᖅᓯᒪᓂᕆᔭᐅᔪᓂᑦ ᑲᓇᑕᒥ ᑐᐊᕕᐅᕐᓇᖅᑐᖃᓕᖅᓯᒪᑎᓪᓗᒍ ᐸᕐᓇᒍᑎᐅᓯᒪᓪᓗᑎᒃ ᑲᑎᖅᓱᐃᕙᓪᓕᐊᓂᕐᓂᒃ ᐋᓐᓂᐊᖅᓯᐅᕐᑎᓕᕆᔨᒃᑯᑦ ᓴᓇᕐᕈᑎᖏᓂᒃ ᐊᒻᒪᓗ ᐱᖁᑎᒃᓴᖏᓂᒃ, ᐄᔭᒐᕐᑖᕐᕕᓕᕆᔨᓂᑦ ᐱᖁᑎᒃᓴᓂᒃ ᐊᒻᒪᓗ ᐃᓅᓯᓕᕆᓂᕐᒥ ᐱᖁᑎᒃᓴᓂᒃ, ᓲᕐᓗ ᐃᒡᓕᕐᓂᒃ ᐊᒻᒪᓗ ᕿᐱᓐᓂᒃ. ᐊᑏ ᖃᐅᔨᒋᐊᕐᕕᒋᓗᒋᑦ ᐅᑯᐊ ᐳᕌᕕᓐᓯᐅᔪᒥ ᐅᕝᕙᓘᓐᓃᑦ ᐊᕕᒃᑐᖅᓯᒪᓂᕐᒥ ᒐᕙᒪᐅᔪ ᐱᓕᕆᐊᖃᖅᑎᐅᔪᑦ ᑲᑐᔾᔨᖃᑎᒌᒋᔭᑦᓯ ᐊᓪᓚᕝᕕᖃᕐᕕᒋᔭᖓᓂ ᐅᕙᓂ provincial or territorial government appropriate to where your organization is based ᑐᑭᓯᐅᒪᓕᕆᐊᕐᓂᐊᕐᓗᒋᑦ ᐊᓯᒃᑲᓐᓂᖏᑦ ᐃᑲᔪᕈᑎᒃᓴᐅᔪᑦ ᐃᓕᑦᓯᓐᓄᑦ ᐊᑐᐃᓐᓇᐅᑎᑕᐅᑐᐃᓐᓇᕆᐊᓖᑦ.

ᐊᒻᒪᓗᒃᑲᓐᓂᖅ, ᐃᓄᐃᑦ ᐱᑎᑕᐅᔪᓐᓇᕐᒥᒻᒪᑕ ᐊᒥᓱᕐᓚᐅᔪᓂᑦ ᑲᓇᑕᒥ ᒐᕙᒪᒃᑯᑦ ᐃᑲᔪᕈᑎᒃᓴᐅᓪᓗᑎᒃ ᐊᑐᐃᓐᓇᐅᑎᓯᒪᔭᖏᓂᒃ ᑕᒪᐃᓐᓄᑦ ᑲᓇᑕᒥᐅᑕᐅᔪᓄᑦ. ᑐᓴᖅᑎᑕᐅᒃᑲᓐᓂᕈᒪᒍᑦᓯ ᒐᕙᒪᑐᖃᒃᑯᓐᓂᑦ ᐃᑲᔪᖅᑕᐅᔾᔪᓯᐊᖅᑖᖑᔪᓐᓇᖅᑐᓂᒃ ᐃᓚᖃᖅᑎᓪᓗᒋᑦ ᐃᖅᑲᓇᐃᔭᖅᑐᓕᕆᓂᕐᒥ ᓇᓪᓕᐅᒃᑯᒫᓄᑦ, ᑲᓇᑕᒥ ᑐᐊᕕᐅᕐᓇᖅᓯᓯᒪᔪᖃᖅᑎᓪᓗᒍ ᑭᐅᒋᐊᕈᑎᐅᓪᓗᑎᒃ ᐃᑲᔫᓯᐊᖅᑖᖑᔪᓐᓇᖅᑐᑦ, ᑲᓇᑕᒥ ᓱᕈᓯᕐᓄᑦ ᐃᑲᔫᓯᐊᖅᑖᖑᕙᑦᑐᑦ, ᐳᕝᕕᕆᓇᖅᑐᐊᓗᒃ ᓄᕙᒡᔪᐊᕐᓇᖅ (COVID-19) ᑮᓇᐅᔭᓕᐅᕈᑎᓄᑦ ᑮᓇᐅᔭᑎᒍᑦ ᐃᑲᔫᓯᐊᖅᑖᖑᕙᒃᑐᓄᑦ ᐊᒻᒪᓗ ᐊᓯᒃᑲᓐᓂᖏᓐᓄᑦ, ᐊᑏ ᐅᕙᓂ ᖃᕆᑕᐅᔭᑎᒍᑦ ᖃᐅᔨᒋᐊᕐᓗᒋᑦ  www.itk.ca/covid19