February 22, 2021 – Ottawa, Ontario
ᓇᓕᐊᓪᓘᓐᓃᑦ ᓄᓇᕐᔪᐊᕆᔭᐅᔪᓂᑦ, ᐃᓄᖁᑎᖏᓐᓂᑦ ᐅᕝᕙᓘᓐᓃᑦ ᐃᓄᑐᐊᖑᓗᓂ ᑭᓇᑐᐃᓐᓇᖅ ᓵᓚᒃᓴᖅᓯᒪᓕᕈᓐᓇᖖᒋᒻᒪᑦ ᓄᕙᒡᔪᕐᓇᖅ-19-ᒥᒃ ᑕᕝᕙᑐᐊᖑᓗᓂ. ᑕᒪᑦᑕᐅᓗᑕ ᑭᓯᐊᓂ ᐅᕙᑦᑎᓐᓂᓕᒫᖅ ᒥᐊᓂᕆᓯᒪᓕᕈᓐᓇᕐᓂᐊᕋᑦᑕ
ᐋᓐᓂᐊᓕᕇᒃᑯᑎ ᑲᐴᑎᑦ ᐃᑲᔪᕐᓂᖃᖅᑐᑦ
ᐋᓐᓂᐊᓕᕇᒃᑯᑎᑦ ᑲᐴᑎᑦ ᐃᓚᒋᔭᐅᒻᒪᑕ ᐃᑲᔪᕈᑎᒃᓴᐅᕙᒃᑐᓂ ᐊᐃᑦᑐᕐᓗᒍᑎᐅᔪᓐᓇᖅᓱᑎᒃ ᐋᓐᓂᐊᕐᓇᓂᒃ ᓄᖅᑲᖅᑎᑦᓯᔾᔪᑎᒃᓴᐅᕙᒃᑐᓂᑦ ᐊᒻᒪᓗ ᒥᑭᒡᓕᒋᐊᕈᑎᒃᓴᑦᓯᐊᖑᕙᒃᑐᓂ ᐋᓐᓂᐊᕐᓇᓂ ᐊᒃᑐᖅᑕᐅᓯᒪᓕᕈᓐᓇᕐᑐᓄᑦ, ᓴᐅᓂᖖᒍᓕᖅᐸᓐᓂᕐᓂ ᐅᑭᐅᖅ ᐊᑐᖅᐸᓪᓕᐊᓂᖓᓂᑦ ᓱᕈᓯᐅᔪᑦ ᐋᓐᓂᐊᖃᓕᕈᑎᒋᕙᒃᑕᖏᓐᓄᑦ. ᖃᓄᐃᖖᒋᓐᓇᖖᒋᑦᑑᓪᓗᑎᒃ ᐊᒻᒪᓗ ᐃᑲᔪᕐᓂᖃᖅᐸᓐᓂᖏᑦ ᐋᓐᓂᐊᓕᕇᒃᑯᑎᑦ ᑲᐴᑎᑦ ᓄᕙᒃᔪᐊᕐᓇᖅ-19-ᒥᑦ ᒥᐊᓂᕆᔭᐅᓯᒪᓕᕈᑎᒋᓂᐊᕋᑦᑎᒍᑦ ᐋᓐᓂᐊᕐᓇᖃᓕᕈᓐᓇᕐᓂᕐᓂᑦ ᐊᒻᒪᓗ ᐊᑐᕐᓂᖃᒻᒪᕆᒃᑐᒃᑯᑦ ᐊᓪᓗᕆᐊᕈᑎᒋᔪᓐᓇᖅᓱᑎᒍ ᖃᐅᑕᒫᑦ ᐃᓅᓯᕆᕙᒃᑕᑦᑎᓐᓄᑦ ᐅᑎᖅᓯᒪᓕᕋᔭᕐᓂᑦᑎᓐᓄᑦ ᐃᓄᐃᑦ ᓄᓇᖓᓐᓂ, ᑲᓇᑕᓕᒫᒥ ᐊᒻᒪᓗ ᓯᓚᕐᔪᐊᓕᒫᒥᐅᓂ.
ᓄᕙᒡᔪᐊᕐᓇᒧᑦ-19 ᐋᓐᓂᐊᓕᕇᒃᑯᑎ ᑲᐴᑎᑦ ᓄᖑᑎᑦᑎᓯᒪᓕᕈᓐᓇᖖᒋᑲᓗᐊᕐᑎᓪᓗᒋᑦ ᐋᓐᓂᕐᓇᖅᑐᒻᒪᕆᐅᓪᓗᓂ ᐊᑐᖅᑕᐅᓯᒪᔪᓄᑦ ᑲᓇᑕᒥ ᒐᕙᒪᖃᐅᓯᖅᑎᒍᑦ ᐋᓐᓂᐊᕐᓯᐅᖅᑎᓕᕆᓂᕐᒥ ᐱᓕᕆᔾᔪᑎᐅᓯᒪᔪᓂᑦ, ᐃᓚᒋᔭᐅᖃᑕᐅᓂᖏᑦ ᑭᓯᐊᓂ ᐃᓄᐃᑦ ᓄᕙᒡᔪᐊᕐᓇᖅ-19 ᐱᔾᔪᑎᒋᓪᓗᒍ ᑭᐅᔾᔪᑎᐅᓪᓗᑎᒃ ᐸᕐᓇᐅᑎᓕᐅᖅᐸᓪᓕᐊᓂᕐᓄᑦ ᓈᒻᒪᒃᑐᑎᒍᑦ ᓯᕗᒻᒧᒋᐊᕈᑎᐅᖃᑕᐅᕗᑦ ᓯᐊᒻᒪᖃᑎᒌᒃᓯᒪᓕᕋᔭᕐᓂᕐᓄᑦ. ᑲᓇᑕᓕᒫᒥ ᐸᕐᓇᐅᑎᓕᐅᕐᓃᑦ ᐱᔭᕇᖅᑕᐅᓯᒪᓕᕐᒪᑕ ᐃᓚᖃᖅᓱᑎᒃ ᐃᓄᐃᑦ ᐊᑐᖅᓯᒪᔭᖏᓐᓂ ᖃᓄᐃᓪᓚᑦᑖᕐᓂᐅᔪᓂᒃ, ᐱᐅᓯᑐᖃᖏᑦ ᐊᒻᒪᓗ ᐊᑐᖅᓯᒪᔭᖏᑦ ᐃᓱᒪᒋᔭᐅᖃᓯᐅᑎᓪᓗᒋᑦ, ᐱᓗᐊᖅᑐᒥᒃ ᐱᔾᔪᑎᐅᓯᒪᓪᓗᑎᒃ ᑕᐃᑦᓱᒪᓂᑐᖃᖅ ᐊᑐᖅᓯᒪᔭᑦᑎᓐᓂᑦ ᐊᐃᑦᑐᕐᓗᒍᑎᐅᔪᓐᓇᖅᑐᓂᑦ ᐋᓐᓂᐊᕐᓇᓂᑦ ᐃᓕᑦᓯᓯᒪᓕᖁᓪᓗᑕ.
ᐋᓐᓂᐊᓕᕇᒃᑯᑎ ᑲᐴᑎᑦ ᖃᓄᐃᓕᓐᓇᖖᒋᑦᑑᓂᖏᑦ
ᑭᓯᒥᒃ ᐋᓐᓂᐊᓕᕇᒃᑯᑎᐅᓪᓗᑎᒃ ᑲᐴᑎᑦ ᖃᓄᐃᓕᓐᓇᖖᒋᑦᑐᑦ ᐊᒻᒪᓗ ᐃᑲᔪᕈᑎᒃᓴᐅᔪᑦ ᓈᒻᒪᒋᔭᐅᓯᒪᓕᖅᐸᒃᑐᑦ ᐊᑐᖅᑕᐅᔪᓐᓇᕐᓂᖏᑦ ᑲᓇᑕᒥ. ᓄᑖᓂᒃ ᐋᓐᓂᐊᓕᕇᒃᑯᑎᒃᓴᓂᒃ ᑲᐴᑎᓕᐅᕐᓂᖅ ᐅᑭᐅᓄᑦ ᐊᒥᓱᓄᑦ ᐋᖅᑭᒃᓱᐊᖑᕙᓪᓕᐊᔪᓐᓇᕐᒪᑕ. ᐋᖅᑭᒃᓱᐃᓂᖅ ᐋᓐᓂᐊᓕᕇᒃᑯᑎ ᑲᐴᑎᒃᓴᓂᒃ ᓄᕙᒡᔪᐊᕐᓇᖅ-19ᒧᑦ ᓱᒃᑲᓕᔪᒥᒃ ᓯᕗᒻᒧᒋᐊᖅᑎᑕᐅᓯᒪᒻᒪᑕ ᐊᒥᓱᓂᒃ ᐱᔾᔪᑎᖃᖅᓱᑎᒃ, ᐃᓚᖃᖅᑎᓪᓗᒋᑦ ᓱᕗᒻᒧᒋᐊᖅᑎᑕᐅᓯᒪᓕᕐᓂᖏᑦ ᓱᓇᑐᐃᓐᓇᓂᒃ ᖃᐅᔨᓴᕐᓂᐅᕙᒃᑐᑦ ᐊᒻᒪᓗ ᓴᓇᕐᕈᑎᐅᕙᒃᑐᑦ; ᓯᓚᕐᔪᐊᓕᒫᒥ ᑲᑐᔾᔨᓂᖃᖅᓱᑎᒃ ᐱᓕᕆᓂᖃᕐᓂᖏᑦ ᖃᐅᔨᓴᖅᑎᒻᒪᕇᑦ, ᐋᓐᓂᐊᖃᕐᓇᖖᒋᑦᑐᓕᕆᓂᕐᒥ ᖃᐅᔨᒪᔨᒻᒪᕇᑦ, ᖃᐅᔨᓴᖅᑏᑦ, ᓴᓇᕝᕖᑦ ᐊᒻᒪᓗ ᒐᕙᒪᖏᔭᐅᔪᑦ; ᐊᒻᒪᓗ ᐊᖏᓂᖅᓴᐅᓕᖅᑎᑕᐅᓂᖏᑕ ᑮᓇᐅᔭᖁᑎᒃᓴᐅᔪᓂᑦ.
ᑲᓇᑕᒥ ᐋᓐᓂᐊᖃᕐᓇᖖᒋᑦᑐᓕᕆᔨᖏᑕ ᐃᓛᒃᑰᖓᓪᓗᑎᒃ ᐄᔭᒐᕐᓄᑦ ᐱᔪᓐᓇᐅᑎᖃᕐᓂᕐᒥᑎᒍᑦ ᐱᓕᕆᓂᕆᕙᒃᑕᖏᑦ ᐃᓕᑕᕆᔭᐅᓯᒪᒻᒪᑕ ᓯᓚᕐᔪᐊᓕᒫᒥ ᖁᑦᑎᒃᑐᒻᒪᕆᒻᒥᒃ ᐱᓕᕆᓂᖃᖅᐸᓐᓂᖏᓐᓄᑦ ᐊᒻᒪᓗ ᐅᔾᔨᖅᓱᑦᑎᐊᒻᒪᕆᒃᓱᑎᒃ ᕿᒥᕐᕈᓂᖃᖅᐸᓐᓂᖏᓐᓂᒃ. ᑲᓇᑕᒥ ᐃᓱᒪᓕᐅᕈᑎᐅᕙᒃᑐᑦ ᑐᖖᒐᕝᕕᖃᖅᑎᑕᐅᕙᒃᑐᑦ ᖃᐅᔨᓴᐃᔨᓂᑦ ᐊᒻᒪᓗ ᐋᓐᓂᐊᖃᕐᓇᖖᒋᑦᑐᓕᕆᔨᓂᑦ ᓇᓗᓇᐃᖅᑕᐅᓯᒪᔪᓄᑦ ᑕᑯᒃᓴᐅᑎᑦᓯᓯᒪᓪᓗᑎᒃ ᐋᓐᓂᐊᓕᕇᒃᑯᑎᑦ ᑲᐴᑏᑦ ᖃᓄᐃᓕᓐᓇᖖᒋᓐᓂᖏᑕ ᐊᒻᒪᓗ ᐃᑲᔪᕐᓂᖃᕐᐸᓐᓂᖏᑕ. ᐋᓐᓂᐊᓕᕇᒃᑯᑎᑦ ᑲᐴᑏᑦ ᐱᐅᓂᖅᐸᐅᒻᒪᑕ ᓄᖅᑲᖅᑎᑦᓯᓯᒪᓕᕆᐊᕈᑎᒃᓴᓄᑦ ᓄᕙᒡᔪᐊᕐᓇᖅ-19-ᒧᑦ ᐱᔾᔪᑎᒋᓪᓗᒍ ᐃᑲᔪᕈᑎᒃᓴᐅᔪᑦ ᒥᐊᓂᕆᔭᐅᓯᒪᓕᕐᓂᕐᓂᑦ ᐊᐃᑦᑐᕐᓗᒃᑕᐅᔪᓐᓇᕐᓂᕐᒥᑦ ᓇᓗᓇᐃᖅᑕᐅᓯᒪᒻᒪᑕ ᐊᖏᓂᖅᓴᐅᔪᒥᒃ ᖃᓄᑐᐃᓐᓇᖅ ᐊᑦᑕᓇᖅᑐᒦᓕᕈᓐᓇᐅᑎᐅᔪᓐᓇᖅᑐᓂᑦ ᑲᐱᔭᐅᓯᒪᓕᕐᓂᕐᒥᑦ.
ᐋᓐᓂᐊᓕᕇᒃᑯᑎᑦ ᑲᐴᑎᑦ ᓯᖏᐅᑎᓯᒪᓕᖅᑎᑦᓯᔪᓐᓇᕐᒪᑕ/ᑐᑭᓯᐅᒪᓕᕈᑎᐅᔪᓐᓇᕐᒪᑕ ᑎᒥᕕᑦ ᐋᓐᓂᐊᓕᕇᒃᑯᑎᒋᔭᖏᓄᑦ
ᐊᔾᔨᒌᖖᒋᐅᖅᑑᒻᒪᑕ ᐊᓐᓂᐊᓕᕇᒃᑯᑎᐅᓪᓗᑎᒃ ᑲᐴᑎᒃᓴᐃᑦ. ᑲᓇᑕᒥ ᐊᒻᒪᓗ ᐃᓄᐃᑦ ᓄᓇᖓᓐᓂ ᐊᑐᖅᑕᐅᕙᒻᒪᑕ ᑕᐃᔭᐅᔾᔪᓯᖃᖅᑐᓂᒃ Messenger RNA-ᓂᒃ (ᓯᖁᓪᓗᐃᔨᐅᑉ ᐆᑕᕐᓇᖅᑐᖓ) ᐋᓐᓂᐊᓕᕇᒃᑯᑎ ᑲᐴᑎᓂᒃ. ᑖᓐᓇ ᐅᖃᕈᓯᖅ RNA-ᒃ ᑐᑭᖃᕐᒪᑦ ᓯᖁᓪᓗᐃᔨᐅᑉ ᐆᑕᕐᓇᖅᑐᖓᓂᒃ ᑐᑭᖃᖅᑎᑕᐅᕗᖅ, ᐃᔨᒧᑦ ᑕᑯᒃᓴᐅᖖᒋᑦᑑᓪᓗᓂ ᐃᔭᕈᕙᐅᔭᖏᓄᑦ ᑎᒥᐅᑉ ᐱᑕᖃᓕᖅᑎᑦᓯᕙᒃᑐᑦ ᖃᓄᖅ ᓄᑭᖃᕐᓇᖅᑐᓂᒃ ᑎᒥᐅᑉ ᐱᓯᒪᔭᕆᐊᓕᖏᓐᓂᒃ ᐱᑕᖃᓕᖅᑎᑦᓯᒋᐊᖓᓄᑦ. ᐊᑐᖔᖖᒋᑦᓱᑎᒃ ᐆᒪᓪᓗᑎᒃ ᐋᓐᓂᐊᕐᓇᖃᖅᑐᒥᒃ ᓄᕙᒡᔪᐊᕐᓇᖅ-19ᒥᒃ ᐋᓐᓂᐊᖃᓕᕈᑎᐅᕙᒃᑐᓂᒃ, ᑖᒃᑯᐊ mRNA-ᖑᔪᑦ ᐋᓐᓂᐊᓕᕇᒃᑯᑎᑦ ᑲᐴᑎᑦ ᐃᔭᕈᕙᐅᔭᖏᓂᒃ ᑎᒥᑦᑕ ᓱᖏᐅᑎᓯᒪᓕᖁᔨᕙᒃᑐᑦ ᖃᓄᖅ ᓄᑭᖃᕐᓇᖅᑐᖏᓂᒃ ᐱᑕᖃᓕᖅᑎᑦᓯᔪᓐᓇᕐᓂᖏᓐᓄᑦ ᑕᐃᒪᓗ ᐋᓐᓂᐊᓕᕇᒃᑯᑎᖏᑦ ᑎᒥᑦᑕ ᐊᐅᓚᔾᔭᒋᐊᓕᖅᑎᑕᐅᓂᐊᖅᓱᑎᒃ. ᑕᐃᒪᓗ ᐊᐅᓚᔾᔭᒋᐊᓕᖅᐸᑕ, ᑎᒥᕗᑦ ᑕᐃᒪᓕ ᐅᓇᑕᕈᑎᔅᓴᓕᐅᓕᖅᐸᒃᑐᖅ ᐋᓐᓂᐊᓕᕇᒃᑯᑎᖏᓂᒃ ᑎᒥᐅᑉ. ᑕᒪᒃᑯᐊ ᐋᓐᓂᐊᓕᕆᒃᑯᑎᒋᔭᕗᑦ ᑎᒥᑦᑎᓐᓂ ᐅᓇᑕᕈᑎᒋᕙᒃᑲᑦᑎᒍᑦ ᐋᓐᓂᐊᕐᓇᓂᒃ ᐋᓐᓂᐊᕐᓇᓪᓚᕆᒥᒃ ᑎᒥᑦᑎᓐᓄᑦ ᐱᑕᖃᓕᕋᔭᖅᐸᑦ ᓯᕗᓂᕆᓂᐊᖅᑕᑦᑎᓐᓂ.
ᐋᓐᓂᐊᓕᕇᒃᑯᑎᑦ ᑲᐴᑎᑦ ᑭᒃᑯᑐᐃᓐᓇᓕᒫᓄᑦ ᐊᑐᐃᓐᓇᐅᓕᖅᑎᑕᐅᓂᐊᕐᓂᖏᑦ
ᑲᓇᑕᒥᐅᑕᓕᒫᑦ ᐊᑐᐃᓐᓇᐅᕝᕕᐅᓂᐊᖅᑐᑦ ᖃᓄᐃᓕᓐᓇᖖᒋᑦᑐᓂᒃ ᐊᒻᒪᓗ ᐃᑲᔪᕐᓂᖃᑦᓯᐊᐸᒃᑐᓂᒃ ᐋᓐᓂᐊᓕᕇᒃᑯᑎᑦ ᑲᐴᑎᓂᒃ ᓈᒻᒪᒃᑐᓂᒃ ᐊᒥᓲᓂᖏᓂᒃ ᐱᑕᖃᓕᑐᐊᖅᐸᑦ. ᑭᓯᐊᓂᓗ ᐱᔾᔪᑎᒋᓪᓗᒍ ᓱᓕ ᐊᒥᓲᓂᖏᑦ ᓈᒻᒪᖃᑦᑕᕐᓂᐊᖖᒋᒻᒪᑕ ᐱᒋᐊᓕᓵᕐᓂᖓᓂ, ᐱᔾᔪᑎᐅᓗᐊᖅᓱᑎᒃ ᐃᓅᖃᑎᒌᓂᑦ ᓯᕗᓪᓕᖅᐸᐅᑎᑕᐅᓯᒪᓂᐊᖅᑐᑦ. ᐃᑲᔪᖅᑕᐅᓯᒪᓪᓗᑎᒃ ᑎᒥᒋᔭᐅᔪᓂᑦ ᐃᓚᖃᖅᓱᒋᑦ ᐃᓄᐃᑦ ᐱᔾᔪᑎᖃᖅᑎᒋᔭᐅᓪᓗᑎᒃ ᑲᑐᔾᔨᖃᑎᒌᖏᓐᓂᒃ, ᑲᓇᑕᒥ ᐅᖃᐅᔾᔪᐃᒋᐊᖅᑎᐅᓪᓗᑎᒃ ᑲᑎᒪᔨᕋᓛᖑᔪᑦ ᐋᓐᓂᐊᓕᕇᒃᑯᑎᑦ ᑲᐴᑎᓕᕆᓂᕐᒧᑦ ᐱᑕᖃᖅᑎᑦᓯᓯᒪᕗᑦ ᐊᑐᓕᖅᑎᑕᐅᖁᔭᐅᓪᓗᑎᒃ ᐃᓱᒪᓕᐅᕈᑎᓂᒃ ᓯᕗᓪᓕᖅᐸᐅᑎᒃᓴᐅᖁᔭᐅᔪᓄᑦ ᓯᕗᓪᓕᖅᐹᒥᒃ ᑲᐱᔭᐅᓯᒪᓕᕈᑎᒃᓴᓄᑦ ᓄᕙᒡᔪᐊᕐᓇᖅ-19 ᐱᔾᔪᑎᒋᓪᓗᒍ. ᑕᐃᒪᓐᓇ ᑕᒪᓐᓇ ᒥᐊᓂᖅᓯᓯᒪᓕᕈᓐᓇᕈᑎᒋᔭᕗᑦ ᑕᐃᒃᑯᓂᖓ ᐊᖏᓂᖅᐸᐅᔪᒥᒃ ᐊᑦᑕᓇᖅᑐᒦᓕᕈᓐᓇᖅᑐᑦ ᓯᕗᓪᓕᖅᐸᐅᑎᑕᐅᖁᓪᓗᒋᑦ, ᐊᒻᒪᓗ ᑕᐃᒪᓕ ᐊᓯᒃᑲᓐᓂᖏᑦ ᑲᐱᔭᐅᖃᑦᑕᓕᕐᓂᐊᖅᑎᓪᓗᒋᑦ ᑲᓇᑕᒥᐅᑕᓕᒫᑦ ᐋᓐᓂᐊᓕᕇᒃᑯᑎᒥᒃ ᒪᓕᒃᐸᓪᓕᐊᑎᑕᐅᓗᑎᒃ ᐊᑐᐃᓐᓇᐅᓕᖅᑎᑕᐅᕙᓐᓂᖏᑕ ᑲᐴᑏᑦ.
ᓯᕗᓪᓕᖅᐸᐅᑎᑕᒃᓴᐅᓂᐊᖅᑐᓄᑦ ᐱᔾᔪᑎᖃᖅᑐᑦ ᐃᓚᖃᖅᑎᑕᐅᕗᑦ ᐃᓛᒃᑰᖓᓪᓗᑎᒃ ᐃᒡᓗᖃᖅᑐᑦ ᐅᕝᕙᓘᓐᓃᑦ ᐃᖅᑲᓇᐃᔮᖃᖅᑐᓂᒃ ᑲᒪᔨᐅᔪᓂ ᐃᓄᑐᖃᕆᔭᐅᔪᓄᑦ; ᐃᓄᑐᖃᐃᑦ ᐅᑭᐅᖃᕐᑐᑦ 70-ᓂᒃ ᐅᖓᑖᓄᓪᓗ; ᐋᓐᓂᐊᖃᕐᓇᖖᒋᑦᑐᓕᕆᔨᓂ ᐱᓕᕆᔩᑦ; ᐊᒻᒪᓗ ᐃᓐᓇᐅᔪᑦ ᓄᓇᖃᖅᑳᕐᓯᒪᔪᐃᑦ ᓄᓇᓕᒋᔭᖏᓐᓂ. ᑲᑎᒪᔨᕋᓛᑦ ᐊᑐᓕᖅᑎᑦᓯᖁᔨᓪᓗᑎᒃ ᐃᓱᒪᓕᐅᖅᓯᒪᕗᑦ ᐱᑦᓯᐊᖅᑑᓗᑎᒃ ᐃᓱᒪᓕᐅᕈᑎᓕᐅᖃᑦᑕᖁᔨᓪᓗᑎᒃ, ᐱᖃᓯᐅᑎᓗᒋᑦ ᑕᑯᒃᓴᑦᑎᐊᕐᓗᑎᒃ ᑐᓴᐅᒪᖃᑦᑕᐅᑎᓕᕆᕙᖁᓪᓗᒋᑦ ᐱᔾᔪᑎᖃᖅᑐᓄᑦ ᐊᓐᓂᐊᓕᕇᒃᑯᑎᓂᒃ ᑲᐴᑎᓂᒃ ᓴᓂᕐᕙᐃᕙᓐᓂᐊᕐᓂᕐᒥ ᐃᓱᒪᓕᐅᕈᑎᖃᖅᑎᓪᓗᒋᑦ. ᐱᑦᓯᐊᖅᑑᓗᑕ ᓇᓕᖅᑲᐅᑎᑦᓯᓯᒪᓗᑕ ᐊᒻᒪᓗ ᐃᒃᐱᒍᓱᑦᓯᐊᖅᑑᓗᑕ ᐃᓱᒪᓕᐅᕈᑎᖃᖅᐸᒃᑯᑦᑕ ᐊᒃᑐᖅᑕᐅᓴᕋᐃᓐᓂᖅᐸᐅᔪᓂᒃ ᐃᓱᒪᒋᔭᖃᕐᓗᑕ, ᑕᒪᑦᑕ ᐃᑲᔪᖅᑕᐅᓯᒪᓂᖃᓕᕐᓂᐊᖅᑐᒍᑦ ᐊᓂᖅᓴᐅᔪᒥᒃ ᐋᓐᓂᐊᖃᓕᖅᓯᒪᖖᒋᑦᑐᓂᒃ ᐃᓅᖃᑎᒌᒃᑐᖃᓕᕆᐊᒧᑦ.
ᐋᓐᓂᐊᖃᓕᖅᑕᐃᓕᒪᔾᔪᑎᑦ ᓴᖖᒋᒃᑎᒋᐊᖅᓯᒪᓕᕐᓂᖏᑦ ᒫᓐᓇᑲᐅᑎᒋ ᐱᑕᖃᓕᖅᑎᑕᐅᕙᖖᒋᑦᑐᑦ
ᐃᓄᐃᑦ ᑭᒃᑯᑐᐃᓐᓇᑦ ᐋᓐᓂᐊᓕᕇᒃᑯᑎᓂᒃ ᑲᐱᔭᐅᓯᒪᔪᑦ ᑎᒥᒥᓐᓄᑦ ᒥᐊᓂᖅᓯᔾᔪᑎᓂᒃ ᐋᓐᓂᐊᕐᓇᖃᓕᕈᓐᓇᕐᓂᕐᒥᑦ ᐱᓯᒪᓕᖅᐸᒻᒪᑕ ᐊᑦᑕᓇᖅᑐᖃᖅᑐᒥᑦ ᐋᓐᓂᐊᕐᓇᐅᓕᕈᓐᓇᖅᑐᒥᑦ ᐊᒃᑐᖅᑕᐅᓯᒪᓕᕆᐊᖃᕋᑎᒃ ᐊᒻᒪᓗ ᐱᓗᐊᖅᑐᒥᒃ ᐋᓐᓂᐊᓕᕈᑎᖃᕈᓐᓇᕐᓂᕐᒥᓐᓂᑦ. ᖃᐅᔨᓴᐃᓂᐅᔪᑦ ᐋᓐᓂᐊᓕᕇᒃᑯᑎᑦ ᑲᐴᑎᓄᑦ ᑕᐃᔭᐅᓪᓗᑎᒃ Moderna (ᒪᑑᕐᓇ) ᓄᕙᒡᔪᐊᕐᓇᖅ-19-ᒧᑦ ᓇᓗᓇᐃᖅᑕᐅᓯᒪᓕᕐᒪᑕ ᐃᑲᔪᕐᓂᖃᕐᑑᓂᖏᓂᒃ 94.1%-ᒥᒃ ᐊᑐᕐᓂᖃᖅᓱᑎᒃ ᓄᕙᒡᔪᐊᕐᓇᖅ-19-ᒥᒃ ᐊᓐᓂᐊᖃᓕᖅᑕᐃᓕᔪᓐᓇᕐᓂᕐᒥᒃ ᐱᓯᒪᓕᕐᐸᓐᓂᖏᑕ ᒪᕐᕉᒃ ᐱᓇᓱᐊᕈᓰᒃ ᐊᑐᐊᓂᒃᓯᒪᓕᕌᖓᑕ ᑐᒡᓕᕆᔭᖓᓂᒃ ᑲᐱᔭᐅᓯᒪᓕᕐᕕᖏᓐᓂᑦ. ᐊᓐᓂᐊᓕᕇᒃᑯᑎᑦ ᑲᐴᑎᑦ ᐊᑐᕐᓂᖃᕐᓂᖅᓴᐅᕙᒍᓐᓇᕐᒪᑕ ᐋᓐᓂᐊᓕᕇᒃᑯᑎᐅᓂᐊᕐᓂᖏᓄᑦ, ᒪᕐᕆᐃᕐᑕᐅᓄᒥ ᑲᐱᔭᐅᕙᒃᑎᓪᓗᒍ ᐱᓇᓱᐊᕈᑏᑦ ᓯᑕᒪᑦ ᐊᑐᐊᓂᒃᓯᒪᓕᕌᖓᑕ. ᑕᒪᓐᓇ ᑐᑭᖃᕐᒪᑦ ᐃᓄᐃᑦ ᐃᓗᐃᒃᑲᐅᔪᒥᒃ ᒥᐊᓂᕆᔭᐅᓯᒪᓕᖖᒋᑦᓱᓐᓇᕐᓂᖏᑕ ᓄᕙᒡᔪᐊᕐᓇᖅ-19-ᒥᑦ ᐋᓐᓂᐊᖃᓕᕈᓐᓇᕐᓂᖏᓂᒃ ᐊᓂᒍᖅᓯᒪᓕᓚᐅᖅᑳᕐᑎᓐᓇᒋᑦ ᐊᕐᕕᓂᓕᐅᓪᓗᑎᒃ (6) ᐱᓇᓱᐊᕈᑏᑦ ᓯᕗᓪᓕᖅᐹᒥᒃ ᑲᐱᔭᐅᓚᐅᕐᕕᖓᓐᓂᑦ.
ᓱᓕ ᖃᐅᔨᒪᖖᒋᓐᓇᑦᑎᒍ ᖃᓄᑎᒋ ᐋᓐᓂᐊᓕᕇᒃᑯᑎᖃᕆᐊᖃᕋᔭᕐᓂᖏᑕ ᐃᓄᒋᐊᖕᓂᕆᔭᐅᔪᓂ ᐃᓅᖃᑎᒌᓂᑦ ᓈᒻᒪᒐᔭᕐᓂᖏᓐᓄᑦ ᓄᓇᖅᑲᑎᒌᑦ ᐋᓐᓂᐊᖃᓕᖅᑕᐃᓕᒪᔾᔪᑎᖃᕋᔭᕐᓂᖏᓐᓄᑦ, ᑐᓴᐅᒪᔭᐅᒻᒥᔪᒥᒃ ᑲᑎᓐᓂᖃᖅᑐᑦ ᐋᓐᓂᐊᓕᕇᒃᑯᑎᖃᕐᓂᖏᓂᒃ. ᑕᐃᒪᓐᓇᐃᓕᖅᑎᓪᓗᒍ ᐃᓄᒋᐊᖕᓂᖅᓴᐅᔪᑦ ᐃᓚᒋᔭᐅᓪᓗᑎᒃ ᐃᓄᒋᐊᖕᓂᖃᖅᑐᓂᑦ ᐋᓐᓂᐊᓕᕇᒃᑯᑎᖃᓕᖅᐸᒻᒪᑕ. ᐊᒥᓲᓂᖏᑦ ᓈᒻᒪᒃᑑᓗᑎᒃ ᐃᓄᖏᑦ ᐋᓐᓂᐊᓕᖅᑕᐃᓕᒪᔾᔪᑎᖃᖅᐸᑕ ᐋᓐᓂᐊᓕᕈᑎᐅᔪᓐᓇᖅᑐᓄᑦ, ᑕᐃᒪᓕ ᐋᓐᓂᐊᓕᕈᑎᐅᔪᓐᓇᕐᑐᓄᑦ ᐊᐃᑦᑐᐃᕙᓐᓂᖅ ᐊᓯᒥᓄᑦ ᓇᒧᐊᒡᕕᒃᓴᖃᕈᓐᓃᖅᑎᑕᐅᕙᒻᒪᑦ ᐊᒻᒪᓗ ᐱᑕᖃᕈᖕᓃᖅᓯᒪᓕᖅᐸᒃᓱᓂ. ᖃᐅᔨᒪᓕᓚᐅᖅᑳᕐᑎᓐᓇᑕ, ᑭᒃᑯᑐᐃᓐᓇᓄᑦ ᐋᓐᓂᐊᖃᓕᖅᑕᐃᓕᒪᔪᓕᕆᓂᕐᒧᑦ ᖃᐅᔨᒪᔨᒻᒪᕆᒋᔭᐅᔪᑦ ᑲᓇᑕᒥᐅᓕᒫᓂᒃ ᐅᖃᐅᔾᔪᐃᓯᒪᕗᑦ ᓱᓕ ᐊᒡᒐᒥᓐᓂᒃ ᐅᐊᓴᖃᑦᑕᖁᓪᓗᒋᑦ, ᐊᖏᕐᕋᖅᓯᒪᕙᖁᓪᓗᒋᑦ ᖃᓂᒪᒍᑎᒃ, ᐊᓯᒥᓐᓄᑦ ᖃᓂᒡᓕᑦᑕᐃᓕᒪᐃᓐᓇᕐᓗᑎᒃ, ᐊᒻᒪᓗ ᑭᓇᒧᑦ ᓴᑉᓗᓕᖅᓯᒪᕙᖁᔨᓪᓗᑎᒃ ᐊᓂᓯᒪᓂᐊᕈᑎᒃ, ᑲᐃᔭᐅᕌᓂᒃᓯᒪᓕᕋᓗᐊᕈᑎᒃᓘᓐᓃᑦ ᐋᓐᓂᐊᖃᓕᖅᑕᐃᓕᒪᔾᔪᑎᒥᒃ.
ᐋᓐᓂᐊᓕᕇᒃᑯᑎᓂᒃ ᐱᕈᖅᑎᑦᓯᓇᓱᓐᓂᖓ ᑎᒥᓐᓄᑦ ᐊᒃᓱᕈᕐᓇᕐᑑᕗᖅ
ᐄᔭᒐᖅᑎᑐᑦ ᐃᖢᐊᖅᓴᐅᑎᐅᓪᓗᑎᒃ ᐅᕝᕙᓘᓐᓃᑦ ᑎᒥᒧᑦ ᐃᑲᔪᕈᑎᒃᓴᐅᔪᑎᑐᑦ (ᐱᖃᓯᐅᑎᓪᓗᒋᑦ ᑎᒥᒧᑦ ᖁᐃᒃᑎᓴᐅᑎᑦ), ᐊᓐᓂᐊᓕᕇᒃᑯᑎᑦ ᑲᐴᑏᑦ ᑎᒥᒧᑦ ᖃᓄᐃᓕᑎᑦᓯᔪᓐᓇᕐᒪᑕ. ᑕᒪᒃᑯᐊ ᖃᓄᐃᓕᖓᓕᖅᑎᑦᓯᕙᓐᓂᐅᔪᑦ ᐊᒥᓲᖖᒋᑦᑐᓄᑦ ᐃᑲᕐᕋᓅᕈᓐᓇᖅᐳᑦ ᐅᕝᕙᓘᓐᓃᑦ ᐊᒥᓲᓗᐊᖖᒋᑦᑐᓄᑦ ᐱᓇᓱᐊᕈᓯᕐᓄᑦ ᑲᐱᔭᐅᕌᓂᒃᓯᒪᓕᕐᕕᖓᓂᑦ. ᑕᐃᒪᓐᓇᐃᓕᖓᓕᖅᐸᓐᓃᑦ ᐱᔾᔪᑎᖃᖅᐸᒻᒪᑕ ᑎᒥᐅᑉ ᐊᒃᓱᕈᓕᖅᓯᒪᕙᓐᓂᖓᑕ ᐱᕈᖅᑎᑦᑎᓯᒪᓕᕆᐊᖅᓱᓂ ᐊᓐᓂᐊᖃᓕᖅᑕᐃᓕᔾᔪᑎᓂᒃ. ᑕᒪᒃᑯᐊ ᖃᓄᐃᓕᖓᓕᕈᑎᐅᕙᒃᑐᑦ ᖃᐅᑕᒫᑦ ᐃᓅᓯᕆᔭᐅᔪᓂ ᖃᓄᐃᓕᐅᕈᓯᐅᕙᒃᑐᓄᑦ ᐊᔪᓕᕈᑎᐅᓯᒪᕙᖖᒋᑦᑐᑦ ᐊᒻᒪᓗ ᐱᔭᕆᐊᖃᓪᓚᕆᒃᑯᑎᒃ ᖃᓄᐃᓪᓚᕆᒍᑎᐅᓐᓂᖅᐸᑕ ᐊᖅᑭᒋᐊᖅᑕᐅᓂᖃᕈᓐᓇᖅᐸᒃᓱᑎᒃ.
ᐃᓕᖖᒐᒃᓯᒪᓕᕈᑎᐅᔪᓐᓇᖅᑐᑦ ᒥᑭᑦᑐᑯᓘᕙᑦᑐᑦ ᐅᕝᕙᓘᓐᓃᑦ ᕿᑎᖅᐸᓯᐊᓂ. ᐃᓚᖃᓲᖑᓪᓗᑎᒃ ᐊᒃᑐᖅᓴᕋᐃᓐᓂᖃᕐᓂᕐᒥᒃ ᑲᐱᔭᐅᕝᕕᖓᓂ, ᑎᒥᐅᑉ ᕿᐅᓕᖃᑦᑕᕐᓂᖓᓂᒃ, ᑕᖃᓗᐊᖅᑰᔨᓂᕐᒥᒃ ᐃᒃᐱᒍᓱᓕᕐᓂᕐᒥᒃ ᐊᒻᒪᓗ ᑎᒥᐅᑉ ᐆᓇᖅᓯᓯᒪᓗᐊᖅᑰᔨᓂᖓᓂᒃ ᐃᒃᐱᒋᔭᐅᔪᓐᓇᖅᓱᑎᒃ. ᑕᒪᒃᑯᐊ ᖃᓄᐃᓕᖓᓕᕐᓂᐅᕙᒃᑐᑦ ᑕᐃᒪᐃᔾᔪᑎᐅᕙᒻᒪᑕ ᐋᓐᓂᐊᓕᕇᒃᑯᑎᓂᒃ ᑲᐴᑎᓂᑦ ᐊᒻᒪᓗ ᐋᓐᓂᐊᖃᓕᖅᑕᐃᓕᒪᔾᔪᑎᓄᑦ ᐊᑦᑕᓇᖅᑐᒦᓕᖅᑎᑦᓯᕙᒐᑎᒃ. ᐊᓐᓂᐊᖃᕐᓇᖖᒋᑦᑐᓕᕆᔨᕕᑦ ᐅᖃᐅᑎᓯᒪᓂᐊᕐᒪᑎ ᐊᓂᑦᑕᐃᓕᑲᓚᐅᖁᓗᓂᑎᑦ 15 ᒥᓂᑦᓯᓪᓗᐊᒥᒃ ᑲᐱᔭᐅᓵᕐᓂᕐᓂᑦ. ᑕᐃᒪᓐᓇᐃᔾᔪᑎᖃᕐᐸᒃᑐᑦ ᓇᐅᑦᓯᖅᑐᐃᔭᕆᐊᖃᕐᒪᑕ ᓈᒻᒪᒍᖕᓃᕈᑎᖃᓕᕈᓐᓇᕐᓂᕐᓂᒃ ᐅᕝᕙᓘᓐᓃᑦ ᓂᕆᐅᓐᓇᕋᑎᒃ ᖃᓄᐃᓕᖓᓕᕈᑎᐅᕙᒃᑐᓄᑦ ᐊᒻᒪᓗ ᑕᕝᕙᑲᐅᑎᒋ ᐱᔭᕆᐊᖃᕈᑎᒃ ᐋᖅᑮᓯᒪᓕᕆᐊᕈᓐᓇᕐᓂᐊᕋᒥᒃ.
ᓲᕐᓗ ᑕᒪᕐᒥᐅᑎᓪᓗᒋᑦ ᐋᓐᓂᐊᓕᕇᒃᑯᑎᑎᑐᑦ ᑲᐴᑎᑦ, ᐱᑕᖃᖅᐸᒻᒪᑕ ᐱᓗᐊᖅᑐᒥᒃ ᖃᓄᐃᓕᖓᓕᕈᑎᒋᔭᐅᔪᓐᓇᕐᓂᖏᓂᒃ, ᑭᓯᐊᓂᓗ ᑕᐃᒪᓐᓇᐃᒐᔪᖖᒋᒻᒪᕆᒃᑐᖅ. ᐱᓗᐊᖅᑐᒥᒃ ᖃᓄᐃᓕᖓᓕᕈᑎᐅᔪᓐᓇᕐᑐᑦ ᑕᐅᑦᑐᖃᕈᓐᓇᖅᐳᑦ ᓲᕐᓗ ᑎᒥᖓᑕ ᐊᔪᕐᒪᒍ ᐊᑐᕆᐊᖃᖖᒋᓐᓂᖓᓂᒃ. ᐅᖃᖃᑎᒋᓯᒪᓗᒍ ᐋᓐᓂᐊᖅᓯᐅᕐᑎᓕᕆᔨᒋᔭᐃᑦ ᐱᔾᔪᑎᒋᓗᒋᑦ ᐱᓗᐊᖅᑐᒥᒃ ᑎᒥᓐᓄᑦ ᓈᒻᒪᒍᖕᓃᖅᓯᒪᓕᕈᑎᐅᕙᓯᒪᔪᓄᑦ ᐅᕝᕙᓘᓐᓃᑦ ᐋᓐᓂᐊᕐᓂᖃᖅᑑᒍᕕᑦ ᖃᓄᐃᑦᑐᑐᐃᓐᓇᓂᒃ ᑲᐱᔭᐅᓂᐊᓵᖅᑎᓪᓗᑎᑦ.
ᓄᓇᖅᑲᑎᒋᔭᕐᓂᒃ ᒥᐊᓂᖅᓯᓯᒪᓕᕆᐊᕐᓃᑦ ᓈᒻᒪᑦᓯᐊᕐᐳᖅ
ᐋᓐᓂᐊᓕᕇᒃᑯᑎᓂᒃ ᑲᐱᔭᐅᓯᒪᓕᕆᐊᒃᓴᖅ ᓂᕈᐊᖅᓯᒪᔾᔪᑎᒋᓕᕈᓐᓇᖅᐸᐃᑦ ᓇᖕᒥᓂᖅ ᒥᐊᓂᕆᔾᔪᑎᒋᓯᒪᓂᐊᕐᓗᒍ, ᐃᒡᓗᒥᐅᖃᑎᒋᔭᕐᓂᒃ ᐊᒻᒪᓗ ᓄᓇᖅᑲᑎᒋᔭᕐᓂᒃ. ᐃᓚᒋᔭᐅᒻᒪᑦ ᓈᒻᒪᒃᑐᑎᒍᑦ ᐋᓐᓂᐊᖃᓕᖅᑕᐃᓕᒪᕙᓐᓂᕐᒧᑦ ᐊᒻᒪᓗ ᐱᒻᒪᕆᐅᓗᐊᕐᒪᑦ ᐱᓗᐊᖅᑑᓪᓗᓂ ᐋᓐᓂᐊᖃᓕᖅᑎᑦᑕᐃᓕᕙᓐᓂᕐᓄᑦ. ᑲᓇᑕᒥᐅᑕᐅᓪᓗᑎᑦ, ᐱᔪᓐᓇᐅᖃᖅᑎᑕᐅᒐᕕᑦ ᐋᓐᓂᐊᓕᕇᒃᑯᑎᒥᒃ ᑲᐱᔭᐅᓯᒪᓕᕆᐊᒥᒃ ᓇᓪᓕᐅᑎᓯᒪᓕᖅᐸᑦ ᑲᐱᔭᐅᕝᕕᒃᓴᕆᔭᐃᑦ, ᐊᒻᒪᓗ ᐱᔪᓐᓇᐅᑎᖃᕆᓪᓗᑎᑦ ᑲᐱᔭᐅᓯᒪᔭᕆᐊᖃᖖᒋᓐᓂᕐᓄᑦ. ᑭᓯᐊᓂᓗ ᐃᓱᒪᓕᐅᕈᑎᖃᖅᓯᒪᓕᕆᐊᕐᓂᖅ ᑲᐱᔭᐅᓯᒪᓂᐊᖖᒋᓐᓂᕐᓄᑦ ᐊᒃᑐᖅᑕᐅᓯᒪᓕᕈᑎᒋᔪᓐᓇᕐᒥᔭᑦ ᐱᓗᐊᖅᑑᓪᓗᓂ ᐋᓐᓂᐊᖃᓕᕈᓐᓇᕐᓂᕐᓂᑦ ᐊᒻᒪᓗ ᖃᓂᑕᕆᔭᕐᓄᑦ ᐊᓯᖏᓐᓄᑦ ᐊᐃᑦᑑᑎᒋᓯᒪᓕᕈᓐᓇᖅᓱᒍ.
ᐃᓱᒪᓕᐅᕈᑎᖃᖅᓯᒪᓂᕐᓂᑦ ᐋᓐᓂᐊᓕᕇᒃᑯᑎᒥᒃ ᑲᐱᔭᐅᓯᒪᓕᕐᓂᐊᕐᓗᑎᑦ ᐃᑲᔪᕈᑎᐅᓕᕐᓂᐊᕐᑐᖅ ᑕᒪᕐᒥᐅᓪᓗᑎᒃ ᓄᓇᖅᑲᑎᒋᔭᖅᐱᑦ ᐋᓐᓂᐊᖃᓕᕐᓂᐊᖖᒋᓐᓂᖏᓐᓄᑦ, ᓈᒻᒪᖕᓂᖅᓴᐅᓕᕐᓂᐊᖅᓱᓂ ᐊᑦᑕᓇᖅᑐᒦᓕᖅᑎᑦᓯᑦᑕᐃᓕᓂᕐᒧᑦ ᓄᑕᕋᓛᓂᒃ, ᓱᕈᓯᕐᓂᒃ ᐊᒻᒪᓗ ᐃᓄᓐᓂᒃ ᐋᓐᓂᐊᓕᖅᓴᕋᐃᑦᑐᓂᒃ ᐋᓐᓂᐊᓕᕇᒃᑯᑎᒥᒃ ᑲᐱᔭᐅᓂᕐᒥᒃ ᐊᔪᖅᑐᓂᑦ. ᐱᑕᖃᕐᓂᖅᐸᑦ ᐱᔾᔪᑎᒋᔭᕐᓄᑦ ᑐᕌᖓᓪᓗᑎᒃ ᓇᖕᒥᓂᖅ ᐋᓐᓂᐊᖃᓕᖅᑕᐃᓕᒪᓂᕐᓄᑦ ᑲᐱᔭᐅᓂᕐᒥᒃ ᐊᔪᕈᑎᒋᔭᕐᓄᑦ ᐋᓐᓂᐊᓕᕇᒃᑯᑎᒥᒃ, ᐃᑲᔪᖅᑕᐅᓂᖃᓕᕈᓐᓇᕋᕕᑦ ᒥᐊᓂᖅᓯᓯᒪᓂᐅᔪᓂᑦ ᐊᒥᓲᓂᖅᓴᐅᔪᑦ ᐃᓄᐃᑦ ᐊᕙᑎᒋᔭᕐᓂ ᐊᓐᓂᐊᓕᕇᒃᑯᑎᒥᒃ ᑲᐱᔭᐅᓯᒪᓕᕋᔭᖅᐸᑕ ᑭᖑᓂᐊᓂᓗ ᓄᓇᖅᑲᑎᒌᒃᑐᓂ ᐋᓐᓂᐊᖃᓕᖖᒋᔾᔪᑎᐅᔪᓐᓇᖅᑐᓂᑦ ᐅᕝᕙᓘᓐᓃᑦ ᑲᑎᓐᓂᖃᖅᑐᑦ ᐋᓐᓂᐊᖃᓕᖖᒋᔾᔪᑎᒋᔪᓐᓇᖅᑕᖏᓐᓄᑦ ᐱᑕᖃᓕᕐᓗᓂ.
ᐃᓛᓗ ᐄ ᐱᑕᖃᓪᓚᕆᒃᑲᓗᐊᕐᑎᓪᓗᒍ ᖃᓄᐃᓕᐅᕈᓐᓇᕐᓂᕐᓂᒃ ᐃᓕᓐᓂᒃ ᒥᐊᓂᕆᓯᒪᓕᕈᑎᒋᓂᐊᕐᓗᒋᑦ ᓄᕙᒡᔪᐊᕐᓇᖅ 19-ᒥᒃ ᐋᓐᓂᐊᓕᖅᑕᐃᓕᒪᔾᔪᑎᒃᓴᓂᕐᓂᒃ, ᐃᓚᖃᖅᑎᓪᓗᒋᑦ ᐊᒡᒐᓐᓂᒃ ᐅᐊᓴᖃᑦᑕᕐᓂᕐᓄᑦ, ᑭᓯᐊᓂ ᐱᔭᕆᐊᖃᓪᓚᕆᒃᑕᕐᓄᑦ ᓂᐅᕕᕐᕕᓕᐊᖃᑦᑕᕐᓗᑎᑦ, ᐊᒻᒪᓗ ᓴᑉᓗᓯᒪᐃᓐᓇᖅᐸᒃᓗᑎᑦ ᐊᖏᕐᕋᕐᓂᑦ ᐊᓂᓯᒪᑎᓪᓗᑎᑦ, ᐅᓪᓗᒥᐅᔪᖅ ᐊᓯᐊᒍᑦ ᒥᐊᓂᕆᔭᐅᔾᔪᑎᒃᓴᐅᓇᔭᖅᑐᓂᒃ ᑲᐱᔭᐅᓯᒪᓕᕐᓂᕐᓂᑦ ᐱᑕᖃᖖᒋᒻᒪᑦ ᓱᓕ.
ᑕᒪᕐᒥᒃ ᑐᓴᒐᒃᓴᐅᕙᒃᑐᑦ ᓇᓕᖅᑲᕇᒃᐸᖖᒋᒻᒪᑕ
ᐱᐅᓂᖅᐹᑎᒍᑦ ᓂᕈᐊᖅᖠᓯᒪᓕᕐᓂᐊᕈᕕᑦ ᐃᓕᓐᓄᑦ ᓇᖕᒥᓂᖅ ᐊᒻᒪᓗ ᐃᒡᓗᒥᐅᖃᑎᒋᔭᕐᓄᑦ ᐊᒻᒪᓗ ᐱᐅᓂᖅᓴᒥᒃ ᑐᑭᓯᐅᒪᓕᕐᓂᐊᕈᕕᑦ ᐊᓯᔾᔨᖅᐸᓪᓕᐊᓪᓗᑎᒃ ᑭᒃᑯᑐᐃᓐᓇᓄᑦ ᐋᓐᓂᐊᖃᕐᓇᖖᒋᑦᑐᓕᕆᔨᑦ ᐅᖃᐅᔾᔪᐃᔾᔪᑎᖏᓂᒃ, ᐅᔾᔨᖅᓱᑦᑎᐊᕐᐸᒃᓗᑎᑦ ᓇᑭᑦ ᓇᓗᓇᐃᖅᑕᐅᓯᒪᓪᓚᕆᒃᑐᓂᑦ ᑐᓴᒐᒃᓴᖃᓕᕈᓐᓇᕐᒪᖔᖅᐲᑦ, ᐃᒪᓐᓇ ᑐᓴᕐᕕᒃᓴᐅᕙᒃᑐᑦ ᐊᑕᕝᕕᖃᓪᓚᕆᒃᑑᓪᓗᑎᒃ ᖃᐅᔨᒪᔨᒻᒪᕆᒋᔭᐅᔪᓂᑦ ᑭᒃᑯᑐᐃᓐᓇᓄᑦ ᐋᓐᓂᐊᖃᕐᓇᖖᒋᑦᑐᓕᕆᔨᓂ ᓈᒻᒪᖕᓂᖅᓴᐅᕙᒻᒪᑕ. ᓈᒻᒪᒃᓱᓂᓗ ᐊᐱᖅᑯᑎᒃᓴᖃᕆᐊᒥᒃ. ᐊᒥᓱᑲᓪᓚᒻᒪᕆᐅᒻᒪᑕ ᑐᓴᒐᒃᓴᐃᑦ ᐊᑐᐃᓐᓇᐅᑎᑕᐅᓯᒪᔪᑦ ᐊᒥᓱᒻᒪᕆᓐᓂᑦ ᐱᓯᒪᓕᕐᕕᐅᔪᓐᓇᖅᑐᓂᑦ, ᑕᒪᒃᑯᐊᓗ ᐅᐃᒻᒪᒍᑎᐅᓯᒪᓕᕈᓐᓇᖅᓱᑎᒃ. ᐃᓚᖏᑦ ᑐᓴᒐᒃᓴᓂᒃ ᑐᓴᖅᓯᒪᓕᖅᑕᑦ ᓱᓕᖖᒋᑦᑑᔪᓐᓇᕐᒪᑕ ᐅᕝᕙᓘᓐᓃᑦ ᓴᒡᓗᔾᔪᑎᐅᓪᓗᑎᒃ ᐊᓯᖏᓂᒃ ᐱᔾᔪᑎᖃᖅᐸᒃᓱᑎᒃ.
ᓱᓕᖖᒋᑦᑑᓪᓗᑎᒃ ᐅᕝᕙᓘᓐᓃᑦ ᓴᒡᓗᔾᔪᑎᐅᓪᓗᑎᒃ ᐊᓯᖏᓂᒃ ᐱᔾᔪᑎᖃᖅᓱᑎᒃ ᑐᓴᒐᒃᓴᖁᑎᒋᔭᐅᔪᑦ ᓯᐊᒻᒪᑲᐅᑎᒋᓯᒪᓕᕈᓐᓇᕐᒪᑕ ᓲᕐᓗ ᐋᓐᓂᐊᖃᓕᕈᑎᐅᔪᓐᓇᖅᑐᑎᑐᑦ ᓯᐊᒻᒪᒃᑎᖅᓴᕋᐃᑦᑑᓪᓗᑎᒃ. ᐃᑲᔪᖅᑐᐃᓯᒪᕙᒃᓗᓯ ᐱᐅᓂᖅᓴᒃᑯᑦ ᑐᑭᓯᐅᒪᓕᕈᑎᒃᓴᓂᒃ ᐱᔾᔪᑎᒋᓗᒋ ᐋᓐᓂᐊᓕᕇᒃᑯᑎᓄᑦ ᑲᐴᑎᓄᑦ ᓄᓇᓕᒋᔭᑦᓯᓐᓂ ᐃᓱᒪᒃᓴᖅᓯᐅᕈᑎᖃᕐᓂᖅᑎᒍᑦ ᓇᑭᑦ ᑐᓴᒐᒃᓴᑦ ᐱᔭᐅᓯᒪᕐᓂᕐᒪᖔᑕ ᓄᑖᖑᓪᓗᑎᒃ ᑐᓴᖅᓯᒪᓕᖅᑕᑎᑦ, ᓇᓗᓇᐃᖅᓯᒋᐊᖅᐸᒃᓗᑎᑦ ᑐᓴᖅᓯᒪᓕᕐᕕᐅᔪᓂᒃ ᑕᒪᒃᑯᓄᖓ ᑐᓴᒐᒃᓴᓄᑦ, ᑐᓴᒐᒃᓴᓂᒃ ᐊᒥᖅᑲᕈᑎᖃᖃᑦᑕᖖᒋᓪᓗᑎᑦ ᐱᔭᐅᓯᒪᔪᓂᒃ ᓇᓗᓇᐃᖅᑕᐅᓯᒪᓇᑎᒃ ᖃᐅᔨᒪᔨᒻᒪᕆᐅᔪᓂᑦ ᑭᒃᑯᑐᐃᓐᓇᓄᑦ ᐋᓐᓂᐊᖃᓕᖅᑕᐃᓕᒪᔨᓂ, ᐊᒻᒪᓗ ᐊᐱᖅᑯᑎᒋᕙᒃᓗᒋᑦ ᑭᒃᑯᑐᐃᓐᓇᓄᑦ ᐋᓐᓂᐊᖃᓕᖅᑕᐃᓕᒪᔪᓕᕆᔨᑦ ᐃᖅᑲᓇᐃᔭᕐᕕᖓᓐᓂ ᐊᐱᖅᑯᑎᒃᓴᖃᕐᓂᕈᕕᑦ ᐱᔾᔪᑎᒋᓗᒋᑦ ᐋᓐᓂᐊᖃᓕᕇᒃᑯᑎᑦ ᑲᐴᑎᓄᑦ.
ᓄᑖᖑᓪᓗᑎᒃ ᐊᓯᖏᑦ ᐋᓐᓂᐊᖃᓕᕈᑎᐅᔪᓐᓇᖅᑐᑦ ᓴᖅᑭᑉᐸᓪᓕᐊᓯᒪᓕᕐᒪᑕ
ᐋᓐᓂᐊᕐᓇᕆᔭᐅᓕᕈᓐᓇᖅᑐᑦ ᐊᑕᐃᓐᓇᐅᔭᖅᑐᒥᒃ ᐊᓯᔾᔨᖅᐸᓪᓕᐊᓂᖃᖅᐸᒃᑐᑦ, ᐊᒻᒪᓗ ᓄᑖᖑᓪᓗᑎᒃ ᐊᓯᒃᑲᓐᓂᖏᑦ ᐋᓐᓂᐊᖃᓕᕈᑎᐅᔪᓐᓇᖅᑐᑦ ᐱᑕᖃᓕᖅᐸᓐᓂᐊᕐᓂᖏᑕ ᓂᕆᐅᒋᔭᐅᒻᒪᑕ ᑎᑭᑉᐸᓪᓕᐊᓯᒪᓂᐊᕐᓂᖏᓐᓄᑦ. ᐃᓛᓐᓂ ᓴᖅᑭᓯᒪᓕᓚᐅᖅᓱᑎᒃ ᓄᖑᓯᒪᓕᕈᓐᓇᖅᑐᑦ ᐱᑕᖃᕐᓂᖏᑦ. ᐃᓛᓐᓂᒃᑯᓪᓗ, ᓴᖅᑭᓯᒪᓕᕌᖓᒥᒃ ᑕᐃᒪᐅᖏᓐᓇᐅᔭᖅᐸᒃᓱᑎᒃ. ᐊᒥᓱᑲᓪᓚᐅᔪᑦ ᐋᓐᓂᐊᖃᓕᕐᓂᐅᔪᓐᓇᖅᑐᑦ ᓄᕙᒡᔪᐊᕐᓇᖅ-19ᒥᒃ ᐋᓐᓂᐊᖃᓕᕈᑎᐅᕙᒃᑐᑦ ᖃᐅᔨᔭᐅᓯᒪᓕᕐᓂᖏᑦ ᑎᑎᕋᖅᑕᐅᓯᒪᓕᕐᒪᑕ ᓯᓚᕐᔪᐊᕐᒥᐅᓕᒫᓂ ᓄᕙᒡᔪᐊᕐᓇᖅ-19ᒥᒃ ᐊᑐᓕᖅᓯᒪᓂᖅᑕᖃᖅᑎᓪᓗᒍ. ᖃᐅᔨᓴᖅᑎᒻᒪᕆᐅᔪᑦ ᐱᓕᕆᓂᖃᓕᖅᓯᒪᔪᑦ ᐃᓕᑦᓯᓯᒪᓕᕋᓱᐊᖅᓱᒍ ᖃᓄᖅ ᓯᐊᒻᒪᒃᑎᖅᐸᓪᓕᐊᕙᓐᓂᖓᓄᑦ, ᐱᓗᐊᖅᑐᒥᒃ ᐋᓐᓂᐊᓕᕈᑎᐅᔪᓐᓇᕆᐊᖏᑕ, ᐊᒻᒪᓗ ᐅᓪᓗᒥᐅᔪᒥ ᓈᒻᒪᒋᔭᐅᓯᒪᓪᓗᑎᒃ ᐋᓐᓂᐊᓕᕇᒃᑯᑎᑦ ᑲᐴᑎ ᒥᐊᓂᖅᓯᓯᒪᓕᕈᑎᐅᔪᓐᓇᕐᓂᐊᕐᒪᖔᑕ ᐅᕙᑦᑎᓐᓄᑦ ᑕᒪᒃᑯᓇᖖᒐᑦ.
ᐋᓐᓂᐊᓕᕇᒃᑯᑎᓂᒃ ᑲᐴᑎᓕᐅᖅᑏᑦ ᐊᓯᖏᑎᒍᑦ ᓴᓇᕐᕈᑎᒃᓴᓕᐅᕈᓐᓇᕐᒪᑕ ᓈᒻᒪᒋᔭᐅᓯᒪᓕᐊᓂᒃᑐᓄᑦ ᓄᕙᒡᔪᐊᕐᓇ-19-ᒧᑦ ᑲᐴᑎᒃᓴᕆᔭᐅᔪᓂᒃ ᐋᓐᓂᐊᓕᕇᒃᑯᑎᐅᓪᓗᑎᒃ ᑲᐴᑎᑦ ᐃᑲᔪᕐᓂᖃᓕᖅᑎᑕᐅᖁᓪᓗᒋᑦ ᓄᑖᓄᑦ ᐋᓐᓂᐊᓕᕈᑎᐅᔪᓐᓇᖅᑐᓄᑦ. ᐊᓄᐊᖅᓱᕈᑎᒋᓪᓗᒋᑦ ᐊᒻᒪᓗ ᐊᖏᓂᖅᓴᐅᔪᒥᒃ ᒪᓕᓕᖅᑎᑕᐅᓯᒪᓪᓗᑎᒃ ᑭᒃᑯᑐᐃᓐᓇᓄᑦ ᐋᓐᓂᐊᖅᓯᐅᕐᑎᓕᕆᔨᒃᑯᑦ ᒥᑭᒡᓕᑎᑦᓯᓯᒪᓕᕆᐊᒧᑦ ᐸᕐᓇᐅᑎᖏᓂᒃ, ᓲᕐᓗ ᑲᐱᔭᐅᓯᒪᓕᕐᓂᖅ, ᐊᓯᒥᓐᓂᑦ ᖃᓂᒡᓕᓗᐊᖅᑕᐃᓕᒪᕙᓐᓂᖅ, ᑮᓇᒧᑦ ᓴᑉᓗᒋᔭᐅᕙᒃᑐᓂᒃ ᐊᑐᖅᐸᓐᓂᖅ, ᐊᒡᒐᒻᒥᓐᓂᒃ ᐅᐊᓴᖅᐸᓐᓂᖅ, ᐊᒻᒪᓗ ᐊᖏᕐᕋᖅᓯᒪᐃᓐᓇᕆᐊᕐᓂᖅ ᐊᒻᒪᓗ ᐊᓂᑦᑕᐃᓕᓂᖅ, ᓱᓕ ᐊᑐᖅᑕᐅᔭᕆᐊᖃᕐᒪᑕ ᑕᒪᐃᓐᓂᒃ ᓯᐊᒻᒪᒃᑎᖅᐸᓪᓕᐊᑎᑕᐅᓕᖁᓪᓗᒍ ᐋᓐᓂᐊᖃᓕᕈᑎᐅᔪᓐᓇᕐᑐᖅ ᓄᕙᒡᔪᐊᕐᓇᖅ-19ᒥᒃ ᐋᓐᓂᐊᖃᓕᕈᑎᐅᕙᒃᑐᒥᑦ ᐊᒻᒪᓗ ᒥᐊᓂᕆᔭᐅᓯᒪᓕᖁᓪᓗᒋᑦ ᑭᒃᑯᑐᐃᓐᓇᑦ ᐋᓐᓂᐊᖃᓕᖅᑕᐃᓕᒪᕙᓐᓂᖏᑦ.
ᐱᔭᐅᓯᒪᓕᓚᐅᖅᑐᑦ: ᑲᓇᑕᒥ ᑭᒃᑯᑐᐃᓐᓇᓄᑦ ᐋᓐᓂᐊᖃᓕᖅᑕᐃᓕᒪᔪᓕᕆᔨᒃᑯᑦ ᐃᖅᑲᓇᐃᔭᕐᕕᖓᓂᑦ
