Uncategorized @iuq

Ilagijauqataujuit Katinniqalauqput Inuit Nunalilimaangannit Qaritaujatigut Ukiutamaat Katimavigjuaqatigiinnirmi

By October 29, 2020 No Comments
October 29, 2020, Ottawa, Ontario

Inuit Tapiriit Kanatami taanna pinasuarusiq atuqtillugu ukiutamaat katimavigjuarningani katimavigjuarutiqalauqtut qaritaujatigut, katimavigjuarnirmut upagutiqatausimatillugit ilagijauqataujuit tamainnit aviktuqsimanirijaujunit Inuit Nunangannit. qaritaujatigut katimavigjuarningat qaujisaijjutiulaurpuq tusaqsaujjutitigut pilirijjutiujut ajunnginnirijanginik amisuni pijjutiqaqtiujunit katimavigjuaqtillugit, amisuilingallutik siqinngujangita ajjigiinnginnirijanginik inuuvingmit ammalu Uluqhaqtuurmit ualinirmiunit Nain-mut ammalu Postville-mut kanangnamiutaujunit.

Inuit Tapiriit Kanatami Angijuqqaaq Natan Obed tunngasuktitsilaurpuq ilagijauqataujuit Inuit Tapiriit Kanatami Katimajinginnut, ammalu marruullutik atuni nunalirinirmut angirutigijausimajuni aviktuqsimaninginningaaqtunik. Ilagijauqataujut katimavigjuaqtillugit ukuninga ilaqalauqput: 

  • Duane Smith, Iksivautaq ammalu Allavimmi Isumatammarik (CEO), Inuvialuit Aviktuqsimaningani Kuapuriisanganit (Inuvik)
  • Gerald Inglangasuk, Inuvialuit Aviktuqsimaningani Kuapuriisanganit (Inuvik)
  • Colin Okheena, Inuvialuit Aviktuqsimaningani Kuapuriisanganit (Uluqhaqtok)
  • Aluki Kotierk, Angijuqqaaq, Nunavut Tunngavikkut Timingani (Iqaluit)
  • Stanley Anablak, Nunavut Tunngavikkut Timinganit Ilagijauqataujuq (Cambridge Bay)
  • Clara Evalik, Nunavut Tunngavikkut Timinganit Ilagijauqataujuq (Yellowknife)
  • Andy Pirti, Makivik Kuapuriisanganit Pijjutiqaqtiujuq (Kuujjuaraapik)
  • Samantha David, Makivik Kuapuriisanganit Ilagijauqataujuq (Kuujjuaq)
  • Liliane Emudluk-Tagoona, Makivik Kuapuriisanganit Ilagijauqataujuq (Kuujjuaq)
  • Johannes Lampe, Angijuqqaaq, Nunatsiavut Gavamanganit (Nain)
  • Gerald Asivak, Nunatsiavut Gavamanganit Ilagijauqataujuq (Goose Bay)
  • Tyler Edmunds, Nunatsiavut Gavamanganit Ilagijauqataujuq (Postville)
  • Crystal Martin-Lapenskie, Angijuqqaaq, Canadami Makkuktut Inuit Katimajirjuangit (Eganville, Ontario)
  • Lisa Koperqualuk, Inuit Ukiuqtaqtumiut Katimajingit Canadami Pijjutiqaqtingat (Montreal)

Katimavigjuaqtillugit katimajaqtuqatausimajut uqallausiqalauqtut sivummugiaqtitausimalirningita piliriangusimaliqtut kiinaujalirinnau ukiurilauqtanga kingulliq atuqtillugu (April 1, 2019-mit March 31, 2020-mut), ilaqaqsugit maannamut tikititausimaningita atuliqtitauvallianinganut Maligaqutiujumut Upigijausimaliqullugit Iqqiliit, Inuit ammalu Allangajut Surusingit, Makkuktungit ammalu Ilagiingujut, ammalu sivummugiaqsimalirningata aaqqiksuivallianirni Canadami Inuit Nirigijaksaminnik Pisimalirunnaqullugit Parnautinut, saqqitaksauniartumut Inuit Tapiriikkunnut Kanatami  2020-2023-mut Parnautingit ammalu Pilirianguliqsimajunut Parnautinginit  saqqitausimalilauqtunut taanna ukiuq atulisaaqtillugu.

Katimavigjuariaqsimajut maannamut tikititausimajunik tusaqtitalaurmijut turaangallutik Inuit Tapiriikkut Kanatami aaqqiksuangusimallutik pilirinirijanginik ikajuqtuiliriarutiullutik aviktuqsimaniujuni pijjutigillugu Nuvagjuarnaq-19 atuliqsimatilluta, ammalu pijjutigillugit Inuit Nunangani Qaujisainiqarnirmut Piliriamut  (INRP), piliriangulilaurtuq kiinaujaqutiqaqtitaulluni Ukiuqtaqtumik Tukisiniaqatigiikkunnit ammalu piliriangulluni katujjiniqaqsutik Inuit Tapiriikkunnit Kanatami ammalu Inuit aviktuqsimaninginnit. INRP-ngulluni piliriaq piliriangulluni katujjiqatigiingujunit katujjiniqaqsutik 30-ujunik piliriniqarumanirmut kiujjutausimalilaurtuq aujaulauqtumi. Tusaqtitsisimajjutiit isumaliurutinik qaujisainiqarumanirmut tunisisimaliqujillutik matuiqtausimalirniaqtuq pinasuarusiq naasimaliqpat.

Katimavigjuariaqsimajut niruaqłiniqaqtitaulauqtut aaqqigiaqtausimaliqullugit Inuit Tapiriikkut Kanatami Maligaralaaqutingit ammalu Niruaqłinirmi Pinasuarusiuvagialiit, ilaqaqsugit asijjiqtausimaliqullugu qassinut ukiunut angijuqqaap iniqaqtitauvanninga pingasunit ukiunut (3) sitamanut (4) ukiunut, pigiarviqaqtitauniarluni aaqqiktausimalluni Inuit Tapiriikkut Kanatami niruaqłiniqarumaarninganit 2021-mi. Tamarmik katimajiujuit ammalu katimavigjuarnirmi piqujivungaaliurutit (atuliqtitauqujaujut) atuinnaulirniaqtut Inuit Tapiriikkut Kanatami Maligaralaaqutingit ammalu Piqujivungaarutiliangusimajut (Atuliqtitauqujaujut) makpiranganni pinasuarusiuniaqtumi.

Naammaksaisimalaurmijut 2019-2020-mi Kiinaujalirijjutit Qaujisaqtausimallutik Titiraqtausimaningit, ilijauqatausimallutik Inuit Tapiriikkut Kanatami 2019-2020 Ukiutamaat Unikkaalianguvattuni.

Tavvani ukiurijattinni Katimavigjuarnivut aaqqiktausimalauqtuugaluaq Nunavingmiinniaqsuni, kisianili katimavigjuariaqsimajut qaritaujatigut kisiani katimavigjuarunnalilaurmata pijjutigillugu nuvagjuarnamut turaangallutik ingirrajunnarningit kigliqaliqtitausimammata. Katimavigjuariaqsimajut angiqatigiilauqtut parnautiliurniarnirminnik Inuit Tapiriikkut Kanatami Katimavigjuaqtitaujumaarningita Nunavikmi 2021-up ukiungani.

Katimavigjuarningat sivulliqpautitaulaurtuq Inuit Tapiriikkut Kanatami Katimajingita katimaningannit, ammalu katimaniqaqsutik katimajiujut uqallausiqalauqtut piluammariktumik pimmariujuuningata pilirivviqariaqarniup ilaqaqsugit Inuit Nunanganni Maligaqutiujut ilitaqsisimajariaqarningita Inuit Nunangat ajjiqaratik nunannguaqtigut naniinninganik, piusituqalirinirmi, ammalu gavamalirinirmi aviktuqsimajuuninganiinningata pijjutiqaqtillugit aulatsiniuvaktunut gavamatuqakkut pilirianginik, pijitsirarutinginik, ammalu piliriariliqsimajanginik.

Tavvani pinasuarusirmi qaritaujatigut katimavigjuarnirmit piliriangulauqtut pinasuarusiuvallianiaqtuni ilijausimaniaqtut Inuit Tapiriikkut Kanatami Facebook-tigut makpiranganni.

Makivik Kuapuriisanganit Ilagijauqataujuq