Uncategorized @ius

ᐃᓚᒋᔭᐅᖃᑕᐅᔪᐃᑦ ᑲᑎᓐᓂᖃᓚᐅᖅᐳᑦ ᐃᓄᐃᑦ ᓄᓇᓕᓕᒫᖓᓐᓂᑦ ᖃᕆᑕᐅᔭᑎᒍᑦ ᐅᑭᐅᑕᒫᑦ ᑲᑎᒪᕕᒡᔪᐊᖃᑎᒌᓐᓂᕐᒥ

By October 29, 2020 No Comments
ᐅᒃᑐᐱᕆ 29, 2020, ᐋᑐᕙ, ᐋᓐᑎᐊᕆᐅ

ᐃᓄᐃᑦ ᑕᐱᕇᒃᑯᑦ ᑲᓇᑕᒥ ᑖᓐᓇ ᐱᓇᓱᐊᕈᓯᖅ ᐊᑐᖅᑎᓪᓗᒍ ᐅᑭᐅᑕᒫᑦ ᑲᑎᒪᕕᒡᔪᐊᕐᓂᖓᓂ ᑲᑎᒪᕕᒡᔪᐊᕈᑎᖃᓚᐅᖅᑐᑦ ᖃᕆᑕᐅᔭᑎᒍᑦ, ᑲᑎᒪᕕᒡᔪᐊᕐᓂᕐᒧᑦ ᐅᐸᒍᑎᖃᑕᐅᓯᒪᑎᓪᓗᒋᑦ ᐃᓚᒋᔭᐅᖃᑕᐅᔪᐃᑦ ᑕᒪᐃᓐᓂᑦ ᐊᕕᒃᑐᖅᓯᒪᓂᕆᔭᐅᔪᓂᑦ ᐃᓄᐃᑦ ᓄᓇᖓᓐᓂᑦ. ᖃᕆᑕᐅᔭᑎᒍᑦ ᑲᑎᒪᕕᒡᔪᐊᕐᓂᖓᑦ ᖃᐅᔨᓴᐃᔾᔪᑎᐅᓚᐅᕐᐳᖅ ᑐᓴᖅᓴᐅᔾᔪᑎᑎᒍᑦ ᐱᓕᕆᔾᔪᑎᐅᔪᑦ ᐊᔪᖖᒋᓐᓂᕆᔭᖏᓂᒃ ᐊᒥᓱᓂ ᐱᔾᔪᑎᖃᖅᑎᐅᔪᓂᑦ ᑲᑎᒪᕕᒡᔪᐊᖅᑎᓪᓗᒋᑦ, ᐊᒥᓱᐃᓕᖓᓪᓗᑎᒃ ᓯᕿᖖᒍᔭᖏᑕ ᐊᔾᔨᒌᖖᒋᓐᓂᕆᔭᖏᓂᒃ ᐃᓅᕕᖕᒥᑦ ᐊᒻᒪᓗ ᐅᓗᖅᕼᐊᖅᑑᕐᒥᑦ ᐅᐊᓕᓂᕐᒥᐅᓂᑦ ᓇᐃᓂᒧᑦ ᐊᒻᒪᓗ ᐴᔅᑦᕕᐊᒧᑦ ᑲᓇᖕᓇᒥᐅᑕᐅᔪᓂᑦ.

ᐃᓄᐃᑦ ᑕᐱᕇᒃᑯᓐᓄᑦ ᑲᓇᑕᒥ ᐊᖏᔪᖅᑳᖅ ᓇᐃᑖᓐ ᐆᐱᑦ ᑐᖖᒐᓱᒃᑎᑦᓯᓚᐅᕐᐳᖅ ᐃᓚᒋᔭᐅᖃᑕᐅᔪᐃᑦ ᐃᓄᐃᑦ ᑕᐱᕇᒃᑯᑦ ᑲᓇᑕᒥ ᑲᑎᒪᔨᖏᓐᓄᑦ, ᐊᒻᒪᓗ ᒪᕐᕉᓪᓗᑎᒃ ᐊᑐᓂ ᓄᓇᓕᕆᓂᕐᒧᑦ ᐊᖏᕈᑎᒋᔭᐅᓯᒪᔪᓂ ᐊᕕᒃᑐᖅᓯᒪᓂᖏᓐᓂᖔᖅᑐᓂᒃ. ᐃᓚᒋᔭᐅᖃᑕᐅᔪᑦ ᑲᑎᒪᕕᒡᔪᐊᖅᑎᓪᓗᒋᑦ ᐅᑯᓂᖓ ᐃᓚᖃᓚᐅᖅᐳᑦ:

  • ᑐᕙᐃᓐ ᓯᒥᑦ, ᐃᒃᓯᕙᐅᑕᖅ ᐊᒻᒪᓗ ᐊᓪᓚᕕᒻᒥ ᐃᓱᒪᑕᒻᒪᕆᒃ, ᐃᓄᕕᐊᓗᐃᑦ ᐊᕕᒃᑐᖅᓯᒪᓂᖓᓂ ᑯᐊᐳᕇᓴᖓᓂᑦ (ᐃᓅᕕᒃ)
  • ᔨᐊᕈᓪᑦ ᐃᖕᓚᖓᓱᒃ, ᐃᓄᕕᐊᓗᐃᑦ ᐊᕕᒃᑐᖅᓯᒪᓂᖓᓂ ᑯᐊᐳᕇᓴᖓᓂᑦ ᐃᓚᒋᔭᐅᖃᑕᐅᔪᖅ (ᐃᓅᕕᒃ)
  • ᑳᓕᓐ ᐅᒃᕼᐄᓇ, ᐃᓄᕕᐊᓗᐃᑦ ᐊᕕᒃᑐᖅᓯᒪᓂᖓᓂ ᑯᐊᐳᕇᓴᖓᓂᑦ ᐃᓚᒋᔭᐅᖃᑕᐅᔪᖅ (ᐅᓗᖅᕼᐊᖅᑑᖅ)
  • ᐊᓗᑭ ᑰᑦᑎᖅ, ᐊᖏᔪᖅᑳᖅ, ᓄᓇᕗᑦ ᑐᖖᒐᕕᒃᑯᑦ ᑎᒥᖓᓂ (ᐃᖃᓗᐃᑦ)
  • ᓯᑖᓐᓕ ᐊᓇᑉᓚᒃ, ᓄᓇᕗᑦ ᑐᖖᒐᕕᒃᑯᑦ ᑎᒥᖓᓂᑦ ᐃᓚᒋᔭᐅᖃᑕᐅᔪᖅ (ᐃᖃᓗᒃᑑᑦᑎᐊᖅ)
  • ᑭᓕᐊᕋ ᐃᕙᓕᒃ, ᓄᓇᕗᑦ ᑐᖖᒐᕕᒃᑯᑦ ᑎᒥᖓᓂᑦ ᐃᓚᒋᔭᐅᖃᑕᐅᔪᖅ (ᔭᓗᓇᐃ)
  • ᐋᓐᑎ ᐴᕐᑎ, ᒪᑭᕕᒃ ᑯᐊᐳᕇᓴᖓᓂᑦ ᐱᔾᔪᑎᖃᖅᑎᐅᔪᖅ (ᑰᔾᔪᐊᕌᐱᒃ)
  • ᓴᒫᓐᑕ ᑕᐃᕕᑦ, ᒪᑭᕕᒃ ᑯᐊᐳᕇᓴᖓᓂᑦ ᐃᓚᒋᔭᐅᖃᑕᐅᔪᖅ (ᑰᔾᔪᐊᖅ)
  • ᓕᓕᐊᓐ ᐃᒪᑦᓚᒃ-ᑕᒍᕐᓈᖅ, ᒪᑭᕕᒃ ᑯᐊᐳᕇᓴᖓᓂᑦ ᐃᓚᒋᔭᐅᖃᑕᐅᔪᖅ (ᑰᔾᔪᐊᖅ)
  • ᔫᕼᐋᓐᔅ ᓛᒻᐱ, ᐊᖏᔪᖅᑳᖅ, ᓄᓇᑦᓯᐊᕗᑦ ᒐᕙᒪᖓᓂᑦ (ᓇᐃᓂ)
  • ᔨᐊᕈᓪᑦ ᐋᓯᕙᒃ, ᓄᓇᑦᓯᐊᕗᑦ ᒐᕙᒪᖓᓂᑦ ᐃᓚᒋᔭᐅᖃᑕᐅᔪᖅ (ᒎᔅ ᐸᐃ)
  • ᑕᐃᓗᕐ ᐃᑦᒪᓐᔅ, ᓄᓇᑦᓯᐊᕗᑦ ᒐᕙᒪᖓᓂᑦ ᐃᓚᒋᔭᐅᖃᑕᐅᔪᖅ (ᐴᔅᑦᕕᐊᓪ)
  • ᑯᕆᔅᑐᓪ ᒫᕐᑎᓐ-ᓚᐱᓐᔅᑭ, ᐊᖏᔪᖅᑳᖅ, ᑲᓇᑕᒥ ᒪᒃᑯᒃᑐᑦ ᐃᓄᐃᑦ ᑲᑎᒪᔨᕐᔪᐊᖏᑦ (ᐄᒐᓐᕕᐊᓪ, ᐋᓐᑎᐊᕆᐅ)
  • ᓖᓴ ᖁᐱᖅᕈᐊᓗᒃ, ᐃᓄᐃᑦ ᐅᑭᐅᖅᑕᖅᑐᒥᐅᑦ ᑲᑎᒪᔨᖏᑦ ᑲᓇᑕᒥ ᐱᔾᔪᑎᖃᖅᑎᖓᑦ (ᒪᓐᑐᕆᐋᓪ)

ᑲᑎᒪᕕᒡᔪᐊᖅᑎᓪᓗᒋᑦ ᑲᑎᒪᔭᖅᑐᖃᑕᐅᓯᒪᔪᑦ ᐅᖃᓪᓚᐅᓯᖃᓚᐅᖅᑐᑦ ᓯᕗᒻᒧᒋᐊᖅᑎᑕᐅᓯᒪᓕᕐᓂᖏᑕ ᐱᓕᕆᐊᖑᓯᒪᓕᖅᑐᑦ ᑮᓇᐅᔭᓕᕆᓐᓇᐅ ᐅᑭᐅᕆᓚᐅᖅᑕᖓ ᑭᖑᓪᓕᖅ ᐊᑐᖅᑎᓪᓗᒍ (ᐊᐃᐱᕆ 1, 2019-ᒥᑦ ᒫᔾᔨ 31, 2020-ᒧᑦ), ᐃᓚᖃᖅᓱᒋᑦ ᒫᓐᓇᒧᑦ ᑎᑭᑎᑕᐅᓯᒪᓂᖏᑕ ᐊᑐᓕᖅᑎᑕᐅᕙᓪᓕᐊᓂᖓᓄᑦ ᒪᓕᒐᖁᑎᐅᔪᒧᑦ ᐅᐱᒋᔭᐅᓯᒪᓕᖁᓪᓗᒋᑦ ᐃᖅᑭᓖᑦ, ᐃᓄᐃᑦ ᐊᒻᒪᓗ ᐊᓪᓚᖓᔪᑦ ᓱᕈᓯᖏᑦ, ᒪᒃᑯᒃᑐᖏᑦ ᐊᒻᒪᓗ ᐃᓚᒌᖑᔪᑦ, ᐊᒻᒪᓗ ᓯᕗᒻᒧᒋᐊᖅᓯᒪᓕᕐᓂᖓᑕ ᐋᖅᑭᒃᓱᐃᕙᓪᓕᐊᓂᕐᓂ ᑲᓇᑕᒥ ᐃᓄᐃᑦ ᓂᕆᒋᔭᒃᓴᒥᓐᓂᒃ ᐱᓯᒪᓕᕈᓐᓇᖁᓪᓗᒋᑦ ᐸᕐᓇᐅᑎᓄᑦ, ᓴᖅᑭᑕᒃᓴᐅᓂᐊᕐᑐᒧᑦ ᐃᓄᐃᑦ ᑕᐱᕇᒃᑯᓐᓄᑦ ᑲᓇᑕᒥ  2020-2023-ᒧᑦ ᐸᕐᓇᐅᑎᖏᑦ ᐊᒻᒪᓗ ᐱᓕᕆᐊᖑᓕᖅᓯᒪᔪᓄᑦ ᐸᕐᓇᐅᑎᖏᓂᑦ  ᓴᖅᑭᑕᐅᓯᒪᓕᓚᐅᖅᑐᓄᑦ ᑖᓐᓇ ᐅᑭᐅᖅ ᐊᑐᓕᓵᖅᑎᓪᓗᒍ.

ᑲᑎᒪᕕᒡᔪᐊᕆᐊᖅᓯᒪᔪᑦ ᒫᓐᓇᒧᑦ ᑎᑭᑎᑕᐅᓯᒪᔪᓂᒃ ᑐᓴᖅᑎᑕᓚᐅᕐᒥᔪᑦ ᑐᕌᖓᓪᓗᑎᒃ ᐃᓄᐃᑦ ᑕᐱᕇᒃᑯᑦ ᑲᓇᑕᒥ ᐋᖅᑭᒃᓱᐊᖑᓯᒪᓪᓗᑎᒃ ᐱᓕᕆᓂᕆᔭᖏᓂᒃ ᐃᑲᔪᖅᑐᐃᓕᕆᐊᕈᑎᐅᓪᓗᑎᒃ ᐊᕕᒃᑐᖅᓯᒪᓂᐅᔪᓂ ᐱᔾᔪᑎᒋᓪᓗᒍ ᓄᕙᒡᔪᐊᕐᓇᖅ-19 ᐊᑐᓕᖅᓯᒪᑎᓪᓗᑕ, ᐊᒻᒪᓗ ᐱᔾᔪᑎᒋᓪᓗᒋᑦ ᐃᓄᐃᑦ ᓄᓇᖓᓂ ᖃᐅᔨᓴᐃᓂᖃᕐᓂᕐᒧᑦ ᐱᓕᕆᐊᒧᑦ  (INRP), ᐱᓕᕆᐊᖑᓕᓚᐅᕐᑐᖅ ᑮᓇᐅᔭᖁᑎᖃᖅᑎᑕᐅᓪᓗᓂ ᐅᑭᐅᖅᑕᖅᑐᒥᒃ ᑐᑭᓯᓂᐊᖃᑎᒌᒃᑯᓐᓂᑦ ᐊᒻᒪᓗ ᐱᓕᕆᐊᖑᓪᓗᓂ ᑲᑐᔾᔨᓂᖃᖅᓱᑎᒃ ᐃᓄᐃᑦ ᑕᐱᕇᒃᑯᓐᓂᑦ ᑲᓇᑕᒥ ᐊᒻᒪᓗ ᐃᓄᐃᑦ ᐊᕕᒃᑐᖅᓯᒪᓂᖏᓐᓂᑦ. INRP-ᖑᓪᓗᓂ ᐱᓕᕆᐊᖅ ᐱᓕᕆᐊᖑᓪᓗᓂ ᑲᑐᔾᔨᖃᑎᒌᖑᔪᓂᑦ ᑲᑐᔾᔨᓂᖃᖅᓱᑎᒃ 30-ᐅᔪᓂᒃ ᐱᓕᕆᓂᖃᕈᒪᓂᕐᒧᑦ ᑭᐅᔾᔪᑕᐅᓯᒪᓕᓚᐅᕐᑐᖅ ᐊᐅᔭᐅᓚᐅᖅᑐᒥ. ᑐᓴᖅᑎᑦᓯᓯᒪᔾᔪᑏᑦ ᐃᓱᒪᓕᐅᕈᑎᓂᒃ ᖃᐅᔨᓴᐃᓂᖃᕈᒪᓂᕐᒧᑦ ᑐᓂᓯᓯᒪᓕᖁᔨᓪᓗᑎᒃ ᒪᑐᐃᖅᑕᐅᓯᒪᓕᕐᓂᐊᖅᑐᖅ ᐱᓇᓱᐊᕈᓯᖅ ᓈᓯᒪᓕᖅᐸᑦ.

ᑲᑎᒪᕕᒡᔪᐊᕆᐊᖅᓯᒪᔪᑦ ᓂᕈᐊᖅᖠᓂᖃᖅᑎᑕᐅᓚᐅᖅᑐᑦ ᐋᖅᑭᒋᐊᖅᑕᐅᓯᒪᓕᖁᓪᓗᒋᑦ ᐃᓄᐃᑦ ᑕᐱᕇᒃᑯᑦ ᑲᓇᑕᒥ ᒪᓕᒐᕋᓛᖁᑎᖏᑦ ᐊᒻᒪᓗ ᓂᕈᐊᖅᖠᓂᕐᒥ ᐱᓇᓱᐊᕈᓯᐅᕙᒋᐊᓖᑦ, ᐃᓚᖃᖅᓱᒋᑦ ᐊᓯᔾᔨᖅᑕᐅᓯᒪᓕᖁᓪᓗᒍ ᖃᔅᓯᓄᑦ ᐅᑭᐅᓄᑦ ᐊᖏᔪᖅᑳᑉ ᐃᓂᖃᖅᑎᑕᐅᕙᓐᓂᖓ ᐱᖓᓱᓂᑦ ᐅᑭᐅᓄᑦ (3) ᓯᑕᒪᓄᑦ (4) ᐅᑭᐅᓄᑦ, ᐱᒋᐊᕐᕕᖃᖅᑎᑕᐅᓂᐊᕐᓗᓂ ᐋᖅᑭᒃᑕᐅᓯᒪᓪᓗᓂ ᐃᓄᐃᑦ ᑕᐱᕇᒃᑯᑦ ᑲᓇᑕᒥ ᓂᕈᐊᖅᖠᓂᖃᕈᒫᕐᓂᖓᓂᑦ 2021-ᒥ. ᑕᒪᕐᒥᒃ ᑲᑎᒪᔨᐅᔪᐃᑦ ᐊᒻᒪᓗ ᑲᑎᒪᕕᒡᔪᐊᕐᓂᕐᒥ ᐱᖁᔨᕗᖔᓕᐅᕈᑎᑦ (ᐊᑐᓕᖅᑎᑕᐅᖁᔭᐅᔪᑦ) ᐊᑐᐃᓐᓇᐅᓕᕐᓂᐊᖅᑐᑦ ᐃᓄᐃᑦ ᑕᐱᕇᒃᑯᑦ ᑲᓇᑕᒥ  ᒪᓕᒐᕋᓛᖁᑎᖏᑦ ᐊᒻᒪᓗ ᐱᖁᔨᕗᖔᕈᑎᓕᐊᖑᓯᒪᔪᑦ (ᐊᑐᓕᖅᑎᑕᐅᖁᔭᐅᔪᑦ) ᒪᒃᐱᕋᖓᓐᓂ ᐱᓇᓱᐊᕈᓯᐅᓂᐊᖅᑐᒥ.

ᓈᒻᒪᒃᓴᐃᓯᒪᓚᐅᕐᒥᔪᑦ 2019-2020-ᒥ ᑮᓇᐅᔭᓕᕆᔾᔪᑎᑦ ᖃᐅᔨᓴᖅᑕᐅᓯᒪᓪᓗᑎᒃ ᑎᑎᕋᖅᑕᐅᓯᒪᓂᖏᑦ, ᐃᓕᔭᐅᖃᑕᐅᓯᒪᓪᓗᑎᒃ ᐃᓄᐃᑦ ᑕᐱᕇᒃᑯᑦ ᑲᓇᑕᒥ 2019-2020 ᐅᑭᐅᑕᒫᑦ ᐅᓂᒃᑳᓕᐊᖑᕙᑦᑐᓂ.

ᑕᕝᕙᓂ ᐅᑭᐅᕆᔭᑦᑎᓐᓂ ᑲᑎᒪᕕᒡᔪᐊᕐᓂᕗᑦ ᐋᖅᑭᒃᑕᐅᓯᒪᓚᐅᖅᑑᒐᓗᐊᖅ ᓄᓇᕕᖕᒦᓐᓂᐊᖅᓱᓂ, ᑭᓯᐊᓂᓕ ᑲᑎᒪᕕᒡᔪᐊᕆᐊᖅᓯᒪᔪᑦ ᖃᕆᑕᐅᔭᑎᒍᑦ ᑭᓯᐊᓂ ᑲᑎᒪᕕᒡᔪᐊᕈᓐᓇᓕᓚᐅᕐᒪᑕ ᐱᔾᔪᑎᒋᓪᓗᒍ ᓄᕙᒡᔪᐊᕐᓇᒧᑦ ᑐᕌᖓᓪᓗᑎᒃ ᐃᖏᕐᕋᔪᓐᓇᕐᓂᖏᑦ ᑭᒡᓕᖃᓕᖅᑎᑕᐅᓯᒪᒻᒪᑕ. ᑲᑎᒪᕕᒡᔪᐊᕆᐊᖅᓯᒪᔪᑦ ᐊᖏᖃᑎᒌᓚᐅᖅᑐᑦ ᐸᕐᓇᐅᑎᓕᐅᕐᓂᐊᕐᓂᕐᒥᓐᓂᒃ ᐃᓄᐃᑦ ᑕᐱᕇᒃᑯᑦ ᑲᓇᑕᒥ ᑲᑎᒪᕕᒡᔪᐊᖅᑎᑕᐅᔪᒫᕐᓂᖏᑕ ᓄᓇᕕᒃᒥ 2021-ᐅᑉ ᐅᑭᐅᖓᓂ.

ᑲᑎᒪᕕᒡᔪᐊᕐᓂᖓᑦ ᓯᕗᓪᓕᖅᐸᐅᑎᑕᐅᓚᐅᕐᑐᖅ ᐃᓄᐃᑦ ᑕᐱᕇᒃᑯᑦ ᑲᓇᑕᒥ ᑲᑎᒪᔨᖏᑕ ᑲᑎᒪᓂᖓᓐᓂᑦ, ᐊᒻᒪᓗ ᑲᑎᒪᓂᖃᖅᓱᑎᒃ ᑲᑎᒪᔨᐅᔪᑦ ᐅᖃᓪᓚᐅᓯᖃᓚᐅᖅᑐᑦ ᐱᓗᐊᒻᒪᕆᒃᑐᒥᒃ ᐱᒻᒪᕆᐅᔫᓂᖓᑕ ᐱᓕᕆᕝᕕᖃᕆᐊᖃᕐᓂᐅᑉ ᐃᓚᖃᖅᓱᒋᑦ ᐃᓄᐃᑦ ᓄᓇᖓᓐᓂ ᒪᓕᒐᖁᑎᐅᔪᑦ ᐃᓕᑕᖅᓯᓯᒪᔭᕆᐊᖃᕐᓂᖏᑕ ᐃᓄᐃᑦ ᓄᓇᖓᑦ ᐊᔾᔨᖃᕋᑎᒃ ᓄᓇᖖᒍᐊᖅᑎᒍᑦ ᓇᓃᓐᓂᖓᓂᒃ, ᐱᐅᓯᑐᖃᓕᕆᓂᕐᒥ, ᐊᒻᒪᓗ ᒐᕙᒪᓕᕆᓂᕐᒥ ᐊᕕᒃᑐᖅᓯᒪᔫᓂᖓᓃᓐᓂᖓᑕ ᐱᔾᔪᑎᖃᖅᑎᓪᓗᒋᑦ ᐊᐅᓚᑦᓯᓂᐅᕙᒃᑐᓄᑦ ᒐᕙᒪᑐᖃᒃᑯᑦ ᐱᓕᕆᐊᖏᓂᒃ, ᐱᔨᑦᓯᕋᕈᑎᖏᓂᒃ, ᐊᒻᒪᓗ ᐱᓕᕆᐊᕆᓕᖅᓯᒪᔭᖏᓂᒃ.

ᑕᕝᕙᓂ ᐱᓇᓱᐊᕈᓯᕐᒥ ᖃᕆᑕᐅᔭᑎᒍᑦ ᑲᑎᒪᕕᒡᔪᐊᕐᓂᕐᒥᑦ ᐱᓕᕆᐊᖑᓚᐅᖅᑐᑦ ᐱᓇᓱᐊᕈᓯᐅᕙᓪᓕᐊᓂᐊᖅᑐᓂ ᐃᓕᔭᐅᓯᒪᓂᐊᖅᑐᑦ ᐃᓄᐃᑦ ᑕᐱᕇᒃᑯᑦ ᑲᓇᑕᒥ ᕖᔅᐳᒃᑎᒍᑦ ᒪᒃᐱᕋᖓᓐᓂ.