Announcements

Gavamatuqakkut Ukiassaaq Makimanasuarutinuungajut Nalunairsigutingit Tusaruminaqtuqtaliit Inunnut turaangajunit

By December 1, 2020 No Comments

December 1, 2020

Taakkua Ukiassaaq Makimanasuarutinuungajut Nalunairsigutingit saqqiqtaulauqtut ippassaq Kanataup Gavamakkunginni tusaruminaqtuqtaqarngata Inunnut turaangajunit. Inuit Tapiriit Kanatami tukisikkannirumaniaqtut ullunit aggiqtunit maannamaakkut qanuq kiinaujait nalunaiqtausimammangaata titiqqanit ilijauniaqtut inunnut turaangaluaqtut, amisut pirurpalliatittijjutauniaqtut nalunaiqtaulauqtut ippassaq taijausimalaurngata Nunaqaqtutuqarnut pirurpalliatittijjutissaullutik.

Nalunairsigutingat ukuninga piqasiujjisimammat nutaanit qanimanaqtuq pijjutigillugu kiinaujanit amisuunilinnit $380 miliannit 2020-21 arraagumi Inunnut, Allanut Allangajunullu turaangallutik ilagijaullutik Nunaqaqtutuqarnut Ikajuutinut Kiinaujanut. Ilagijaukkanirniarmijut $174.3 milian pingasut arraagut ungataanut ilijaummijut ikajuutiuniarngata qangatasuuqaqattariaqallarinninginnik ungasittumiutait nunaliujut.

Isumagillugit atuutiningit qanimanaqtuup nunarjualimaami arnanut, surusirnut ilagiinullu, Tapiriikkut quviasupput maanna atuqtaunginnarnialiqtunit Inunnut−turaangajunit kiinaujaqtaqarnialirngat surusilaarnut ilinniariursatittiqattanirmut pairivilirinirmullu turaangajunit ammalu utaqqilluta tukisititaukkanirnianittinnik pijjutigillugit taakkua saqqiqtaurataarsimajut.

Kingullirpaami, Tapiriikkut niriunniqattiarmijut uqammarigutausimajunit $1.8 viliannit ikajuutiuniaqtunit piqutirjualirinirmut Nunaqaqtutuqarnut nunaliujunut qanuilingattaniarmangaata Inunnut turaangajut. Isumagillugit akituningit piqutirjualirinirmut akilissarijaujut Inuit Nunanganni, piqutirjualiriniq suli sivullipauttiujjausimallarimmat Inunnit Kanataullu Gavamakkunni Katujjiqatigiinnirmut Katimajiralaarnit.