December 3, 2020
Inuit Tapiriit Kanatami tunngasuttittijut nalunaiqtauninganik Maligassaq C-15, “Maligaq ikagillugit Atausiuqatigiit Nunaligasarjuaqutiliit Nalunairsisimagutingat Pijunnautinginnut Nunaqaqtutuqait,” naammattumik ammalu iqqaumajassaunialiqtumik pimmariujumik atuqtauniusajumik. Tapiriikkut ikajursiisimammata kattungairutigisimajangannik kanataup gavamakkungita pivalliatittiqatiqarumallutik maligaliangujumik Inunnik, Allanit Allangajunillu atuliqtittinirmut Atausiuqatigiit Nunaligasarjuaqutiliit Nalunairsisimajjutingannik, ammalu piliriqatiqarsimallutik gavamatuqakkunnit naammattumik atuutiniqaqullugit pivalliatitanginnut. Gavamatuqakkut maligaliangat atuqtaujariaqarngat ajjiungittumik iliqqusiqarviuqattaqunagit ammalu ajjiungittumik piniarniqarviuqattaqunagit inuit taimaak gavamatuqakkut maligangit atuagangillu nalimussititaulutik tamakkununga ataqasiutijut, tuvaaqaqatigiigutaujut, ammalu avititaujunnangittut pijunnautinut nalunaiqtausimajunut Atausiuqatigiinut Nunaligasarjuaqutilinnut Nalunairsivattunit.
Maligassaq C-15 piqasiujjijuq ukuninga pijjutilluatanginnik
- Ilisarsiniq Atausiuqatigiinut Nunaligasarjuaqutilinnut Nalunairsigutingannik iluunnanginnik nunarjualimaami kikkutuinnarnut pijunnautilirijjutimik atuqtitauniaqtuni Kanatamiut maligangannut
- Kamagijassaqarninginnik iluunnanginnik kamagijaujajaqialinnit taimaak qaujimattianiarngata maligangit Kanatami naammakkaluarmangaata pijunnautinginnut nalunaiqtausimajunut Atausiuqatigiinut Nunaligasarjuaqutiliit Nalunairsisimagutingannut
- Kamagijassaqarningit upalungaijainirmut qanuqtuurutissanit parnautinit pingasut arraagut tungaani katujjiqatiqarlutik nunaqaqtutuqarnit tikiutiniarngata pijjutinginnut Atausiuqatigiinut Nunaligasarjuaqutiliit Nalunairsijjutigisimajangannut.
- Kamagijassangit piqasiujjiqullugit, qanuqtuurutissanut parnautinit, qanuqtuurutauniaqtunit nauttirsurnirmuungajunit, kamagijaqarnirmuungajunit, sangutittinirmuungajunit uvvaluunniit aaqqissinirmuungajunit pijunnautinit nalunaiqtausimajunit Atausiuqatigiinut Nunaligasarjuaqutilinnut Nalunairsijjutausimajumik, taimaak qaujimattianiarngata malittittigutaujunnarninginnikta.
Tapiriikkut aaqqiumatittijut aaqqisimajjutinganik nalituinnangit gavamatuqakkunni maligaliangusimajut atuliqtittiqullugit Atausiuqatigiinut Nunaligasarjuaqutilinnut Nalunairsijjutausimajumik piqasiujjisimagiaqarngata sangutitauniarngat aaqqigiaqtaulunilu qaujimattianiarngata pijunnautivut maligarnit malittitijjutaujunnarninginnik. Maligaliangusimajut atuliqtittigutaugumaniaqtut Atausiuqatigiit Nunaligasarjuaqutiliit Nalunairsijjutigisimajangannik tamakkua pitaqaunngittut taimaittunit maligarnit maligassaqaqtittijunit pilirijjusiuvattunit nalunaikkutaqatuinnarniup saniani anginirsaummat aaqqisimanngittunit nunarjualimaami kikkutuinnarnut pijunnautinut piusirijaugajuttunut aulajjusiuvattunullu, ammalu ajjigiinngitittigiakkannirutauvattuni asijjiqtautillugit kikkutuinnarnut pijunnautiit turaagarijumalugit.
Angijumik kamagijaqariaqarniarngata qaujimattiarutauniarngat Maligassaq C-15 sivumuattitauniaraluarmangaaq maligaliurnirmut pilirinikkut ammalu Quvvasinnirpaami Angiqtauqullugu angiqtausaraijjuumiluni. Tapiriikkut tiliurillarittut Maligaliuqtiuqataujunit Maligaliurvijjuarmi ikajursuiqullugit Maligassaq C-15mik sivumuagunnarsititauniarngat tuavirnaqtumik iqqanaijaangujarialik atuliqtittinirmut Atausiuqatigiinut Nunaligasarjuaqutilinnut Nalunairsijjutausimajumik Kanatami ammalu nuqqaniarngat ajjigijaunngitittiniuvattuq Inunnit iluunnanginnillu Nunaqaqtutuqalimaanit.
.