Skip to main content
AnnouncementsTusaqtitsijjutiit

Gavamatuqakkut Iqqaqtuivingat uqaqtuq NCC-kut ammalu Kanataup Gavamangata Tukisiumaturaunnirmut Titiqqaqutingit (MOU) isumaliurutiunngimmata Aviktuqsimajut 35-mi Pijunnautini

June 14, 2024 – Ottawa, Ontario

Gavamatuqakkut Iqqaqtuivingat aaqqiisimalilauqtut iqqaqtuinirminni June 12-ngutillugu taakkua Tukisiumaturaunnirmut Titiqqaqutingit (MOU) atiliuqtausimajuit NunatuKavut Katimajikkunginnut (NCC) ammalu Gavamatuqakkunnit Ministarijaujumut Gavamalirijikkut-Nunaqaqqaaqsimajulirijikkunnullu aaqqiisimalirutiunngimmata Nunaqaqqaaqsimajunut pijunnautiqarnirminnik suurlu nalunaijaqtausimajunit Aviktuqsimajut 35-mi Kanatamiut Piqujarjuaqutinginnit.

Iqqaqtuiji Cecily Strickland isumaliulauqtuq iqqaqtuivitigut qimirrujautittiningita saqqitausimallutik Innu Inuuqatigiiktunit pijjutigillugit 2019-mi MOU-nginnut NCC-kut ammalu Kanataup Gavamangata uqallausiqarumallutik ilitarijaunirmit Nunaqaqqaaqsimajuit Pijunnautinginnik Pisimanirmik ammalu Nangminiq Isumaliurutiliurunnarnirmut pilirianguvallianirmik.

Innu Inuuqatigiit nalunaiqsigialilaurmata maligatigut taakkuat MOU aktuiniqaqsimalirunnarningita nunalirinirmi angiqatigiiliugasuaqtillugit piliriniqarvigisimaliqtaminit taimannganit 1978-mit. Nunatsiavut Gavamangat, pijungnautigijaujunik tigumiaqtiullutik Inungnut Laapatuarimiunut, sapujjigiaqtigijaulauqput.

Iqqaqtuiji Strickland aaqqiisimalilauqtuq iqqaqtuiviktigut taakkuat MOU aaqqiisimalirutiunnginningita uvvaluunniit asijjiisimalirutiunnginningita qanuittutuinnanik pijunnautigijaujunit uvvaluunniit piliriarijariaqaqtanginnit NCC-kut, Kanataup uvvaluunniit nalingita Nunaqaqqaaqsimajuit, ammalu maligatigut atuliqtitausimanngittuullutik. “MOU ilitaqsisimanngittut NCC-kunit, pisimatittingittuq NCC-kunit qanuittutuinnanik pijunnautinik ammalu piqarunnaitittinatik tuksirautiqaqtinik, sapujjigiaqtiujumut uvvaluunniit nalituinnangita katinniqaqtut qanuittutuinnanik pijunnautigijanginik.”

Ujjirusuksuni NCC ingirrattialiqsimanngittunik pingasuiqsutik pisimaniqautiqaqsimalirninginik tunngavvigivaksugit Kanatami Nunalirinirnut Maligaqutingit taimannganit 1991-mit, ammalu MOU-qutiuvaktut isumaliurutiuvanniarlutik uvvaluunniit nalunaiqsijjutiuvanniarlutik Aviktuqsimaningit 35-mi pijunnautigijaujunut turaangatitausimalilaunngimmata. “Naniluunniit MOU−mik uqaqsimanngimmata NCC ilitarijaunirminnik “Kanatami Nunaqaqqaaqsimajuuniraillutik” uvvaluunniit isumaliurutiusimaningata NCC-kut pisimaqatautitauninginik Aviktuqsimaningit 35-mi pijunnautiqarniujunut.”

Inuit Nunangannut Maligaqutigijaujut gavamatuqakkunni maligaqutiummata aaqqiktausimaliqqaalauqtunut ilitaqsisimanirmik Inuit taimannganituqamit pijunnautiqarninginik ammalu angirutiusimajutigut pijunnautiqarninginik. Nalunaijaisimammata Inuit ilagijauqatauningita Inuit Nunanganni Nunalirinirmut Angiqatigiimit, ukuangujunik: Inuvialuit Kingulliq Angirutik, Jaimispaimilu Kupaik Tarranganilu Angiqatigiinga, Angirutit Inunnu Nunavummi, ammalu Labrador Inuit Nunalirinirmut Angiruti.

Atuliqujausimallutik isumaliurutiusimalilauqtunut September 2023-mi; taikkua katujjiqatigiingujuit; ilaqaqsutik niruarunnaqtitaullutik ilagijaujunik Inuit Tapiriikkut Kanatami Katimajinginnut, isumaliuqsimalilaurningita gavamatuqakkut nalunaijaqsimatsianngittutigut kiusimalilaurninginnut NCC uimmagutiusimalirmata ammalu silataagut piliriniujunit piusigiaqtittisimaliriaqsutik inuusilirinirmi ammalu kiinaujaliurasuarutiuvaktut ilingannirijanginnut Inungni iluani ammalu silataani Inuit Nunangatta.

Inuit Tapiriit Kanatami katimajingit aaqqiisimalilauqtut NCC-kut Inungnut taimainnut ilagijauqataujuunnginningita, ilagijauqataujuqutingit tigumiaqtitaunirmik ajurmata Aviktuqsimaningit 35-mi pijunnautigijaujunik; ammalu ilitarijausimanngitsutik Inuuningita Inuit Tapiriikkunnut Kanatami.

Ammalukkanniq; Inuit angiqatigiigasuarniqaqsutik piqujarjuanit mianirijausimallutik ullumiuliqtumi angirutiqaqatiqaqsimammata gavamatuqakkunnik isumaliuqtiuvaktunik tamarmiullutik ammalu ilaakkuungallutik kinauninginnut Inuit. Inuit qipilugutiqaqsimammata atausiulingallutik ammalu gavamaqausiqtigut aulatsiniuvaktutigut pilirinirivaktanginik Inuunatik gavamaujuit nalunaijaisimanasuaqpanninginnik uvvaluunniit nalunaijaikkannirasukpanninginik Inuit tamarmiullutik uvvaluunniit Inuit kinauninginnut.