Ottawa, Ontario – March 24, 2022
Ullumi, Silarjualimaami Puvagluliqattarnirmut Ullurijangani 22, Inuit Tapiriit Kanatami (ITK) Angijuqqaangat Natan Obed ammalu Canadami Aanniaqaliqtailimajulirinirmi Qaujisainirnut Iqqasaijarviujuit (CIHR) Angijuqqaangat Dr. Michael J. Strong kikkulimaanut tusaqtittisimalilauqtuk nutauliqtittinirminnik piliriaksarijaminnut piusigiaqtitausimaliqullugi Inuit aanniaqaliqtailimaningit ammalu qanuinngitsiaqtitauninginnut, ilaqaqtillugit Puvagluliqattarnilirinirmi qaujisainiqtaqariaqarninganut Inuit Nunanganni.
Nuvagjuarnaq-19mik silarjualimaamiut aanniaqalirunnarninganik atuliqsimatilluta, Inuit Tapiriit Kanatami (ITK) ammalu Canadami Aanniaqaliqtailimajulirinirmi Qaujisainirnut Iqqasaijarviujuit (CIHR) piliriaqaqaqatigiinnirminnik sanngiktigiaqtitsisimalaurmata Inuit aanniaqaliqtailimajulirinirmi qaujisainiujunik ammalu tunngavviqutiliurnirmut ikajurutiksanik Inuit qaujisainirmi sivulliqpautitauqujanginnik, ilaqaqtillugit Puvagluliqattarniujut nungutitausimaliqullugu qaujisainiujumik. Taakkua marruullutik katujjiqatigiingujut aaqqiksuisimaliqtut Inuit Tapiriit Kanatami-Canadami Aanniaqaliqtailimajulirinirmi Qaujisainirnut Iqqanaijarviup Piliriangujarialingnut Parnautinik (2021-2025) piliriaqarniarnirminnut, ukiut tallimat (5) atuqpallianinginni, tamarmiullutik pisimalirumajaujunut ammalu sivulliqpautitauqujaujunut katujjiniqarlutik ikajuqtuinirminni atuliqtitauqullugit Canadami Inuit Parnautiliarisimajangit Qaujisainiuvaktunut (NISR). Sannginiqatsiaqtuulluni piliriaqagiigunnarniit pimmariuluaqtuuliqsimavut maannaujumi tukisivallianittinni naukkuurluta piliriniuvagiaqaqtunik nutaangullutik aanniaqaliqtailimajuliriniujunut pigiaqtitausimallutik Nuvagjuarjuq-19mit.
Ikajuqtursimallugu Pavagluliqattarniujup nungutitausimalirniksanga Inuit Nunalilimaanginni, Angijuqqaaq Obed ammalu Angijuqqaaq Strong sivuliqtiuqatigiilaurtuk Isumatait Katimarjuarutiqarningannut Qaujisainiuvaktunut ikajuqtugausimaliqullugu Puvalluliqattarniup Nungutitausimalirviksanganut Inuit Nunalilimaanginni February 2020-mi. Taanna katimarjuarniujuq kativviulaurmat isumakkarjuammaringnit ikajuqtugauliqullugu Inungnit aulatsijiqarlutik qaujisainiuvaktut piliriaqaqatigiigiaqsimallutik Puvagluliqattarniup nungutitausimalirviksanganut Inuit Nunanganni. Ilaalu tamanna aanniaqalirunnarniujuq atuliqsimaninganit piliriangujut kinguvariaqsimalilaurmata saqqitausimalirviksangita February 2020-mi Katimarjuarniulauqtumit qanuilingalirninganut, qaujisainiujut ikajuqsirutiullutik Puvagluliqattarniup nungutitausimaliqullugu Inuit Nunalilimaanginni suli sivulliqpautitaksarijauvuq tamakkinnit ITK-kunnit ammalu CIHR-kunnit.
Inuit Tapiriit Kanatami (ITK) Canadalimaami pijjutiqaqtigijaullutik katujjiqatigiigijauvut 65,000-nut Inungnut Canadami. Canadami Aanniaqaliqtailimajulirinirmi Qaujisainirnut Iqqasaijarviujuit (CIHR), 13-ngujunik qaujisainirmi iqqanaijarviqaqtuullutik, Canadami gavamatuqakkunnit kiinaujaqutiksaqaqtittijiuvakksutik sanavviuvut aanniaqaliqtailimanirmi qaujisaijjutiksanik.
Katujjiniqarluta, piliriaksaqaratta piusigiaqtitausimaliqullugit aanniaqaliqtailimanirmi qanuilinganniulirajaqtunut ammalu piruqtittigiaqsimalirajarnirmik qanuinngitsiaqtuulutik sivunirmi Inuit nunaligijangit sivuniksaqalirumaaqullugit.