Skip to main content
Uncategorized @iuq

Inuit−Gavamatuqakkut Piliriqatigiiktut Katimajingit pivallianginnaqtut sivulliutiqujaminik ikajuqtuijumallutit Inuit nangminiqsurumajangingnik kamalutit ammalu kamagijaulutit inuusiqattiarnirmut−kiinaujaliurasuarnirmut nalimugiititauvannginningit Inuit Nunangangni

April 8, 2021 – Ottawa, Ontario

Pimmariuniqpaangungmat Kanatami Gavamakkut piliriqatiqaqattarningit Nunaqaqqaaqsimajunit Inungnit. 2017-minit, atuutiqattiatukkut piliriqatigiingningit inuit sivuliqtiit ikajurniqaqsimavuq sivumuattitaulutit saimmaqatigiingniq, sanngattitausimallunilu Inuit−Gavamatuqakkut piliriqatigiingningit, ammalu aaqqiillutit ajuqsannginniqsaulirningit Inuit Nunangangni.

Kanatami Sivuliqtirjuangat Justin Trudeau, Angajuqqaaq Natan Obed Inuit Tapiriit Kanatami, Ministaujut Aulattijiit, ammalu Niruaqtausimajut Inuit Sivuliqtingit Inuvialuit Kuapuriisannganik, Nunavut Tunngavik Timinganik, Makivik Kuapuriisannganit, ammalu Nunatsiavut Gavamangingnit qarisaujakkut katimaqqaungmata ullumi Inuit−Gavamatuqakkut Piliriqatigiittut Katimajingit Katimaniqaqtillugit. Tallimariliqtangangnik arraagumi, Katimajiit katimaqqauvut qimirrunałłutit pivallianingingnik ammalu sivumuaqtittigumallutit iqqanaijaarijaujunit sivulliutitaujunit.

Nunarjuarmi Nuvagjuarnaq-19 auttuutaaluuqattatillugu ullumiujuq aksururnaqtunit pilualiqtittisimangmat nunaliujunit Inuit Nunangangni. Ullumiujuq katimaniqaqtillugit uqausiqaluaqqaujugut qanuq iqqanaijaqatigiingingnarunnarmangaatta kamagijauqullugit inuusirmut−kiinaujaliurnirmut nalimugiinngiluaqtualuutitauqattarninga Inuit Nunangata nunalingingni ajjiunngittumik ulurianaqtumuuqtittiniqsaulirunnaqłuni attuiniqarningat Nuvagjuarnaq-19.

Katimaniqaqtilluta, Kanatap Sivuliqtirjuangat, Angajuqaaaq Uupit, ammalu Katimajiuqataujut isumaksaqsiurniqaqqaujut pivaalliqsimaniriliqtangingnik arraaguulauqtumik, piqasiutillugulu aaqqiktausimaninga ilaakkuungajuq Ukiuqtaqtumi Aviktuqsimaninga Inuit−Gavamatuqakkut Piliriqatigiinningita Katimajingitta aulajjusingagut. Taanna ammalu asingit pivalliaqatigiiksimanirijangit, suurluk aaqqiksuiqatigiingingnarningit Inuit Nunangata Atuaganganik, pivalliatittigutausimavuq saimmaqatigiigasuarutaulluni, Inuit Nangminiqsuqattarningit, ammalu ikajuqtuilnluni atuutiqattiaqtumik, nunalingnut kamagijausimajunit aaqqigutiliarijausimajunit saqqiisimallunilu ajjiunngittunit pijjutinik Inungnut saanngajausuunut.

Katimajiujullu uqausiqaqqaugivut iqqanaijaarijaunginnaqtunik amisunit pijjutinik, piqasiutilugit  niqiksaqattiarnirmut, katimanirmut makimajjutinut pijarialingit Inuit Nunangangni, atuliqtittilutik piqujarmik ikpigusuttiarlutik Allanik, Inungnik, Iqqiliit surusingillu, makkuktut, ilagiit, aaqqiksuivallianiq ajjigiinnginningit tunngaviliit nunaqaqqaaqsimajut aanniaqarnanngittulirinirmut maligaliangujumajut, kamagijaqarnirmit aanniqtirinirmit Inunnit arnanit, niviaqsaanillu, ammalu arnauqatiminik angutauqatiminik angutinillu arnanillu aippaqaqattasuut arnarungaaqsimajut angutirungaaqsimajullu arnaqtitut annuraaqsimasuut Inuit marruungniglu anirniqarniraqtut Inuit, ammalu ikajuqtuqtaulluni Inuktut atuqtaugiarjuumiliqtitauninga, asiujauttailimaninga, sapujjausimaningalu ammalu uqausiq atuqtaujuumiqullugu pivalliagutigijaugasuarningit uqautauqqaugillutit Inuktut.

Ammalukkanniq, Katimajiit aaqqiiqqaugivut 2021 iqqanaijaaqarniarnirmut parnautinganik saimmaqatigiigutigijaunasuarutinut, nalunaijaillutillu qanuq piviqaliqtittijunnaniqsaugajarmangaata inungnut aanniarnaalungmut aniguutiqarasuaqtilluta, ammalu avviarutaujunit kamanasuaqłuta ajjiunngittumik tunngaviqaqtut kiinaujaqaqtitauliqullugit piqutirjualirijjutaujunut Inuit Nunangangni.

Inuit−Gavamatuqakkut Piliriqatigiingningit Katimajingit isumaksaqsiurniqaqqaugivut katutijamingnik kamaginiarniraqsimajanganik nutaaruriaqtitaulluni Inuit−Gavamatuqakkut piliriqatigiiqattarningit ammalu saimmaqatigiingnik tunngavigijaulutit nalunaiqsisimanivut pijunnautinit, ippigusuttiaqatigiingnirmik, piliriqatigiingnirmik, ammalu iqqanaijaqatigiingnirmik.

Uqautausimajut

“Nunarjuarmi Nuvagjuarnaq-19 aittuutaaluuqattatillugu attuqtautittisimakkannimmarippuq aanniaqtailimaningingnik ammalu qanuittailimaningingnik Inuit Nunangangnimiunit. Ullumiujuq katimanivut pimmarialuuqqauvuq kamagijaqaqłuta tamakkuninga nalimugiinngigutigijausuunit, sivumuaksitittisinnaaqłutalu saimmaqatigiingnittinnik, sanngattitaullunilu Inuit−Gavamatuqakkut piliriqatigiiqattarningit, ammalu atuutiqallattaaqtumik Inuit inuusingingnik qanuqtuuqłuta kamagijaqaqsinnaaqqaulluta. ”

— Niruaqtausimajuq Justin Trudeau, Kanatap Sivuliqtirjuangat

“Kingulliqpaamik katimanirilauqsimajattinnik Kanataup Sivuliqtirjuanga Jastin Turuutu Maajji 2020-utillugu Inuit−Gavamatuqakkut piliriqatigiittut katimajingit, nunarjuaq asijjiqsimalirmat, ammalu piliriqatigiingnivut pivalliagutigijausimajuq piliriqatigiingnikkut aulaningagut pirjuangusimammariliqpuq tuavirnaqtukkut ikajuqtuijjutiksanit katiqsuisimaliqłuta Inungnut Kanatalimaarmi Tamanna piliriqatigiingnivut pijjutaulluaqpuq kajusiniriniarnittinnik pivaalliqulluta katutijattinnik tikinnasuaqtatinnik nalimugiijjuuminiarmata Inuit ammalu asingit Kanatamiutaujut inuusingit. ”

— Angajuqqaaq Natan Obed, Inuit Tapiriit Kanatami

Nainaaqsimajut Tukisigiarutiit

  • Inuit−Gavamatuqakkut Piliriqatigiingningingnut Katimajingit aaqqiktaulauqsimavuq Viivvuari 2017−ngutillugu. Aaqqiktaulauqsimangmat tunngaviqaqłutit nalimugiittukkut piliriqatigiingningit Inuit ammalu gavamatuqakkut pimmariungmat saimmaqatigiingnirmut pivalliatitaunasuarninganut.
  • Katimajiit katimaqatigiisuut pingasuaqtiqłutit arraagumi. Atausiaq arraagumi iksivautauqatigiisuuk Kanatami Sivuliqtirjuangat ammalu Angajuqqaangat Inuit Tapiriit Kanatami
  • Katimajinut naalaktiqausuungugivut angajuqqaarijaujut Inuit Ukiuqtaqtumiut Katimajingit Kanatami, Kanatami Inuit Makkuttut Katimajingit, ammalu Pauktuutit Inuit Arnait Kanatami.
  • Inuit−Gavamatuqakkut Piliriqatigiingningingnut Katimajingita sivulliutillunigit kamagiqattarniarniraqsimajangit ukuanguvut:
    • Inuit−Gavamatuqakkut nunataarutaujut
    • Inuit Nunangangnut atuagaqarvingat
    • Inuktut aturjuumiliqtitaukkanniqtitauningat, uqausiq atuqtaungingnarningat, ammalu atuqtaukkaqtinnasuarningat
    • Saimmaqatigiingnirmut qanuiliurutausuut
    • Ilinniarniliriniq, ilinnialisaarniq, ammalu pilimmaksarniq
    • Aanniaqtailimaniq ammalu qanuittailimaniq
    • Avatiliriniq ammalu silap asijjirningat
    • Igluliriniq ammalu piqutirjualiriniq
    • Pivalliajuliriniq ammalu niuviqattaqtuliriniq
    • Piqujaksaliurutauniaqtut sivulliutitauqujaujut.
  • Inuit Nunangat Inungnut nunaqutigijaungmat Kanatami. Nunagijangit piqasiujjivut nunami, imarmi, ammalu sikumi Inuvialuit Nunangata, Nunatsiarmi, Nunavut, Nunavik Kupaki Uangnangani, ammalu Nunatsiavut Laavatuari Uangnangani Taakkuangullutit.
  • Maannamaaruluulauqtaq tusaqtittinirilauqtangit Ukiuqtaqtumi Kiglirijauningat pijjutiqaluaqtuq piliriqatigiingnikkut kamagijaqariarningit. Aaqqisuqsimanirijaugajaqtut Gavamakkut isumaliuqtingingnut sivumuanniqaqullugit tamakkuninga. Kanatami Gavamakkut iqqanaijaqatiqainnarniaqput inuit katujjiqatigiingingnik ammalu nunaliujunit sivulliutitaullutit kamagijauqujaujut sivumuagutigijaujunnarniarmata ammalu qaujimattiatittigutauniarmata aulatauningit piliriat ammalu pijittirarutiit ajjiqarniarmata Inuit Nunangata nunaligijangita kinngaamagijangingnit.
  • Taqqiulauqtumik, Kanatami Gavamakkut nalunaiqsikkannilaurivut kamagijaqarniarniraqsimajatuqanganik aturniarlutit kiinaujanit $42 milian kiinaujanit tallimat arraaguulaaqtunut akuniutigijuq atuqtaujuksamaanit ikajuqtauqullugit inuktut uqausirmut qanuiliurutigijaunasuaqtut ammalu ilinniarniliriniq Nunavummi .
  • Nunaqaqqaaqsimajut Uqausingitta Piqujangat, Aaqqisuqtaulauqsimajuq tusariarviqaqattalauqłutit nunaqaqqaaqsimajut inungingnik, ammalu ikajuqtuitittigutaunasuaqtuq tasuqtaulutit, aturjuumiliqtitaukkannirlutit, ammalu atuqtaungingnarasuaqłutit, sanngattitaulutillu nunaqaqqaaqsimajut uqausingit Kanatami, Angiqtaulauqsimavuq Juuni 21, 2019.
  • Ukiaksaangutillugu 2020-mi, Kanatami Gavamakkut pimmariujunit pivallianiqalauqsimavut sivumuattitauqullugu atuliqtitauningit Nunaqaqqaaqsimajut Uqausingitta Piqujanganik qarisaujakkut tusariarviqaqattaruluujaqłutit Kanatalimaarmi.

Tamakkununga Pijjutinut turaangajut Qarisaujakkut Kasuqtarutingit