December 13, 2021 – Ottawa, Ontario
Ullumi, Minister Marc Miller, Minister-gijaujuq Gavamatuqakkut-Nunaqaqqaaqsimajulirijingit ammalu Canadami Ukiuqtaqtumiutalirijikkunnut, ammalu Natan Obed, Angijuqqaarijaujuq Inuit Tapiriit Kanatami, iksivautauqatigiilauqpuk Inuit Gavamakkut Piliriqatigiingningita Katimajiralaangit (ICPC) katimaniqaqtillugit qaritaujatigut ammalu upagutisimallutik Shaw Convention Centre-mi. Katinnganingat iniqarunnaqtitsilaurpuq Inuit sivuliqtigijanginik Canadalimaami katujjiqatigiingujunit ammalu atuni sitamaullutik Nunalirinirmi Katujjiqatigiingujunit, ilaqaqsutik gavamatuqakkunnit Minister-gijaujunik pivalliajuliritillugit aktuiniqaqtunut Inuit Nunanginnirmiunut.
Uqallausiqartillugit pijjutigijaulualaurpuq kajusititausimajariaqarninga aaqqiksuiqatigiingnirmut Inuit Nunangani Maligaqutimik, uqallausiqarillutik inuusilirinirmi kiinaujaliurasuarutiuvaktunut naliqqautitaunnginniujunut Inuit Nunaluktaarijangani.
Canadaup Gavamangat ammalu Inuit sivuliqtingit kajusititsisimaniarmijut pimmariullutik piliriaqaqatigiingnirminnik Canadami Pilirianut Parnautinik, Inuit Pilirianut Parnautinginik ammalu Gavamatuqakkut Naukkuurviksangit pilirianguliqullugit ugguarnammariktuullutik Asiujijausimajut ammalu Inuaqtausimajut Nunaqaqqaaqsimajuit Arnanginni, Niviaqsiangini ammalu 2SLGBTQQIA+-ngullutik Inuuqatigiiktunut.
Asingit ullumi katimaniujumi ilauqataujunut ilaqalauqtut:
- Duane Smith,Iinuvialuit Aviktuqsimaningani Kuapuriisangat
- Aluki Kotierk, Nunavut Tunngavik Timingat
- Pita Aatami, Makivik Kuapuriisangat
- Johannes Lampe, Nunatsiavut Gavamangat
- Monica Ell-Kanayuk,Inuit Ukiuqtaqtumi Katimajingit
- Rebecca Kudloo, Pauktuutit Arnait Canadami
- Brian Pottle, kanatami Makkuktut Inuit Katimajirjuangit
- Minister Daniel Vandal, Ukiuqtaqtumiutalirijikkunnut Minister
- Minister Joyce Murray, Minister-gijaujuq Iqalliqijikkut, Tariulirijit ammalu Canadami Umiarjuakkut Mianiqsijikkunnut (CCG)
- Minister Mona Fortier, Canadami Katimajirjuakkunnut Angijuqqaaq
- Minister Pablo Rodriguez, Canadami Piusituqalirijikkunnut Minister
- Minister David Lametti, Iqqaqtuivvilirijikkunnut Minister
- Minister Patty Hajdu, kanatami nunaqaqqaarsimajulirijikkunnut minista
- Minister Omar Alghabra, Ingirrautilirijikkunnut Minister
Uqaqtaujut
“Ullumi attataqsimaqatigijungnaqsilaurattigu Inuit piliriaqaqatigivut pimmariullutik amiqqarutaullutik sivulliqpautitauqujaujunut ammalu uqallausirilauqsutigu tamattaulluta turaarviksaujumaniaqtunut sivunirijattinni. Niriungniqaqpunga katujjiniqarluta piliriaqaqatigiingniriniaqtattinnik ammalu kajusititausimaninginnut piliriqatigiingniujunut Inuit sivuliqtigijanginnik piliriariliriaqsugit sivulliqpautitaqujasi ammalu asijjiqtausimaliqullugit akuniiqtumut aktuqtausimalirniaqtunut Inuit nunaluktaanganni.”
Minister Marc Miller, Minister Gavamatuqakkut-Nunaqaqqaaqsimajulirijikkunnut
“Quviasullariktunga iksivautarijauqataulaurninnut tavvani sivulliqpaamik Inuit-Gavamakkut Piliriqatigiingningita Katimajiralaangit (ICPC) katinnganiqaqtillugit nutaangullutik Gavamakkut Katimavigjuarvinganni gavamalirijiujut katimaniqaqtillugit iksivautauqatigillugu iniqaliqtitausaaqsimajuq, Marc Miller, Gavamatuqakkut-Nunaqaqqaaqsimajulirijikkut ammalu Canadami Ukiuqtaqtumiulirijikkunnut Minister-gijaujuq. Tavvani katimaniujumi sivulliqpaamik piviksaqaqtitaulaurmata Inuit sivuliqtingit ammalu gavamatuqakkunnit minister-gijaujut katinngaqatigiillattaarunnaqtitaullutik ukiuk marrukasaak naasimaliqtillugit. Ullumi katinnganiqaqtilluta nutauliriaqtitsunnalauqtavut piliriaksarijattinnik piliriaqaqatigiinniarnittinnut aaqqiisimalirniarluta ajunngitsiaqtuulirutiujunnaqtunik Inunnut Canadami. Aaqqiksuisimalilauratta ikajurniqaqtuullutik uqallausirilauqtattinnit pijjutigillugit atuliqtitauniksangit 2021-mi Gavamatuqakkut Kiinaujaqutiksaqaqtitsivanningit ammalu Inuit sivulliqpautitauqujangit Kiinaujaqutiqaqtitaulutik piliriaksanik 2022-mi, ammalu amiqqarutigillutigu piliriaksarijattinnik pilirianguliqullugit inuusilirinirmi ammalu kiinaujaliurasuaqpannirni naliqqariiktitaunnginniujut Inuit nunaligijanginni nutaatigut kiinaujanik qiturngiuqtitsisimalirniqtigut ammalu atuliqtitauningittigut Inuit Nunanganni maligaqutiit.”
Natan Obed, Angijuqqaaq Inuit Tapiriit Kanatami
Katimajaqtursimalauqtut upagutisimallutik, saumianit: Makivik Kuapuriisangani Angijuqqaaq Pita Aatami, Gavamatuqakkut-Nunaqaqqaaqsimajulirijikkunnut Minister Marc Miller, Nunavut Tunngavik Timingani Angijuqqaaq Aluki Kotierk, Nunatsiavutmi Angijuqqaangat Johannes Lampe, Ukiuqtaqtumiulirijikkunnut Minister Dan Vandal, Iqalliqijikkut ammalu Tariulirijikkunnut Minister Joyce Murray, Canadami Katimajirjuakkunnut Angijuqqaangat Mona Fortier, Iqqaqtuivvilirijikkunnut Minister David Lametti, Inuvialuit Aviktuqsimaningani Kuapuriisangata Iksivautangat Duane Smith, Canadami Makkuktut Inuit Katimajirjuanginni Angijuqqaaq Brian Pottle ammalu Inuit Tapiriikkunnut Kanatami Angijuqqaaq Natan Obed. (Inuit Ukiuqtaqtumi Katimajingitta Canadami Angijuqqaangat Monica Ell-Kanayuk, Pauktuutikkunni Angijuqqaaq Rebecca Kudloo, Nunaqaqqaaqsimajulirijikkunnut Minister Patty Hajdu ammalu Ingirrautilirijikkunnut Minister Omar Alghabra katimajaqtursimaqataulauqtut qaritaujatigut)