ᐋᑐᕙ – ᔪᓚᐃ 7, 2021
ᐃᓚᒋᔭᐅᖃᑕᐅᔪᑦ ᐃᓄᐃᑦ-ᑲᓇᑕᒥ ᒐᕙᒪᖓᑕ ᐱᓕᕆᐊᖃᖃᑎᒌᑦ ᑲᑎᒪᔨᕋᓛᖏᓐᓄᑦ (ICPC) ᐅᓪᓗᒥ ᑲᑎᒪᖃᑎᒌᓚᐅᖅᑐ ᐅᖃᓪᓚᐅᓯᕆᓪᓗᒋᑦ ᐱᓕᕆᐊᖑᐃᓐᓇᖅᑐᓄᑦ ᑐᕌᖓᓪᓗᑎᒃ ᐋᖅᑭᒃᓱᐃᖃᑎᒌᓕᕐᓂᐊᕐᓂᕐᒧᑦ ᐊᒻᒪᓗ ᐊᑐᓕᖅᑎᑦᑎᓂᐊᕐᓂᕐᒧᑦ ᐃᓄᐃᑦ ᓄᓇᖓᓂ ᒪᓕᒐᖁᑎᓂᒃ, ᐊᓯᐅᔨᔭᐅᓯᒪᔪᑦ ᐊᒻᒪᓗ ᐃᓄᐊᖅᑕᐅᓯᒪᔪᑦ ᓄᓇᖃᖅᑳᖅᓯᒪᔪᐃᑦ ᐊᕐᓇᖏᑦ ᐊᒻᒪᓗ ᓂᕕᐊᖅᓯᐊᖏᑦ, ᑮᓇᐅᔭᖁᑎᒃᓴᕆᔭᐅᓂᐊᖅᑐᓄᑦ ᐱᓕᕆᐊᖑᕙᓪᓕᐊᔪᑦ, ᐃᓚᖃᖅᑎᓪᓗᒋᑦ ᖃᓄᖅ ᓄᕙᒡᔪᐊᕐᓇᖅ ᓯᓚᕐᔪᐊᓕᒫᒥ ᓱᓕ ᐊᒃᑐᐃᕙᓪᓕᐊᓂᖃᕐᒪᖔᑦ ᐃᓄᐃᑦ ᓄᓇᓕᖏᓐᓂᒃ.
ᑖᒃᑯᐊ ICPC-ᑯᑦ ᓯᕗᒻᒧᒋᐊᖅᑎᑦᓯᕙᖕᒪᑕ ᐱᓕᕆᐊᖑᔪᓂᒃ ᐊᒥᖅᑲᕈᑎᐅᓪᓗᑎᒃ ᓯᕗᓪᓕᖅᐸᐅᑎᑕᒃᓴᖁᑎᓄᑦ ᐱᔾᔪᑎᖃᖅᑐᓂᒃ ᐃᓄᖕᓂᑦ ᐊᒻᒪᓗ ᒐᕙᒪᑐᖃᒃᑲᓐᓂᑦ. ᑖᒃᑯᐊ ᑲᑎᒪᔨᕋᓛᕆᔭᐅᔪᑦ ᐅᑭᐅᖅ ᐱᖓᓱᐃᖅᖢᒍ ᑲᑎᒪᓂᖃᖅᐸᒃᑐᑦ ᐊᒻᒪᓗ ᐃᒃᓯᕙᐅᑕᕆᕙᒃᖢᒍ ᓇᐃᑖᓐ ᐆᐱᑦ, ᐊᖏᔪᖅᑳᖅ ᐃᓄᐃᑦ ᑕᐱᕇᒃᑯᓐᓄᑦ ᑲᓇᑕᒥ, ᐊᒻᒪᓗ ᒥᓂᔅᑕ ᑭᐊᕈᓕᓐ ᐱᓐᓂᑦ, ᒥᓂᔅᑕᕆᔭᐅᔪᖅ ᑲᓇᑕᒥ ᒐᕙᒪᖓᓂᑦ ᓄᓇᖃᖅᑳᖅᓯᒪᔪᓕᕆᔨᒃᑯᓐᓄᑦ. ᐅᑭᐅᖅ ᐊᑕᐅᓯᐊᖅᖢᒍ, ᐃᓄᐃᑦ-ᑲᓇᑕᒥ ᒐᕙᒪᖓᑕ ᐱᓕᕆᐊᖃᖃᑎᒌᑦ ᑲᑎᒪᔨᕋᓛᖏᑕ (ICPC) ᑲᑎᒪᓂᖓᑦ ᐃᒃᓯᕙᐅᑕᖃᖅᐸᒃᑐᑦ ᐊᖏᔪᖅᑳᖅ ᐆᐱᑦᒥᒃ ᐊᒻᒪᓗ ᑲᓇᑕᒥ ᐊᖏᔪᖅᑳᔪᐊᖅ ᔭᔅᑎᓐ ᑐᕉᑑᒥᒃ.
ICPC-ᑯᑦ ᐃᖅᑲᐃᑎᑦᓯᒋᐊᖅᐳᑦ ᐊᒥᖅᑲᕈᑎᒋᓗᒋᑦ ᐱᓕᕆᐊᒃᓴᖃᕐᓂᐅᔪᓄᑦ ᓄᑕᐅᓕᕆᐊᖅᑎᑕᐅᓯᒪᓪᓗᓂ ᐃᓄᐃᑦ-ᑲᓇᑕᒥ ᒐᕙᒪᒃᑯᑦ ᐱᓕᕆᐊᖃᖃᑎᒌᓐᓂᖏᓐᓂᒃ ᐊᒻᒪᓗ ᓴᐃᒻᒪᖃᑎᒌᒃᓯᒪᓕᕆᐊᕐᓂᕐᒧᑦ ᑐᖖᒐᕝᕕᖃᖅᑎᑕᐅᔪᓄᑦ ᐃᓕᑕᕆᔭᐅᓯᒪᓕᕐᓂᖏᑕ ᐱᔪᓐᓇᐅᑎᖃᕐᓂᐅᔪᑦ, ᐅᐱᒋᑐᕋᐅᑦᓯᐊᕐᓂᖅ, ᐱᓕᕆᖃᑎᒌᑦᓯᐊᕐᓂᖅ, ᐊᒻᒪᓗ ᐱᓕᕆᐊᖃᖃᑎᒌᖕᓂᖅ ᐃᑲᔪᖅᑎᒌᒃᓗᓂ.”
ᐃᓚᒋᔭᐅᖃᑕᐅᓚᐅᖅᑐᑦ ᐅᓪᓗᒥ ᑲᑎᒪᓂᖃᖅᑎᓪᓗᒋᑦ ᐅᑯᓂᖓ ᐃᓚᖃᓚᐅᖅᑐᑦ:
- ᓇᐃᑖᓐ ᐆᐱᑦ, ᐃᓄᐃᑦ ᑕᐱᕇᑦ ᑲᓇᑕᒥ
- ᑐᕙᐃᓐ ᓯᒥᑦ, ᐃᓄᕕᐊᓗᐃᑦ ᐊᕕᒃᑐᖅᓯᒪᓂᖓᓂ ᑯᐊᐳᕇᓴᖓᑦ
- ᐊᓗᑭ ᑰᑦᑎᖅ, ᓄᓇᕗᑦ ᑐᖖᒐᕕᒃ ᑎᒥᖁᑎᖓᑦ
- ᐲᑕ ᐋᑕᒥ, ᒪᑭᕕᒃ ᑯᐊᐳᕇᓴᖓᑦ
- ᔫᕼᐋᓐᔅ ᓛᒻᐱ, ᓄᓇᑦᓯᐊᕗᑦ ᒐᕙᒪᖓᑦ
- ᒫᓂᑲ ᐃᐊᓪ-ᑲᓇᔪᖅ, ᐃᓄᐃᑦ ᐅᑭᐅᖅᑕᖅᑐᒥ ᑲᑎᒪᔨᖏᑦ ᑲᓇᑕᒥ (ᑐᓵᔭᖅᑐᖅᓯᒪᔪᖅ)
- ᕆᐱᑲ ᑲᓪᓗᒃ, ᐸᐅᒃᑑᑎᑦ ᐊᕐᓇᐃᑦ ᐃᓄᐃᑦ ᑲᓇᑕᒥ (ᑐᓵᔭᖅᑐᖅᓯᒪᔪᖅ)
- ᐳᕋᐃᐊᓐ ᐹᑐᓪ, ᑲᓇᑕᒥ ᒪᒃᑯᒃᑐᑦ ᐃᓄᐃᑦ ᑲᑎᒪᔨᕐᔪᐊᖏᑦ (ᑐᓵᔭᖅᑐᖅᓯᒪᔪᖅ)
- ᑭᐊᕈᓕᓐ ᐱᓐᓂᑦ, ᑲᓇᑕᒥ ᒐᕙᒪᖓᓂᑦ-ᓄᓇᖃᖅᑳᖅᓯᒪᓕᕆᔨᒃᑯᑦ ᑲᓇᑕᒥ
- ᒫᒃ ᒥᓪᓗᕐ, ᓄᓇᖃᖅᑳᖅᓯᒪᔪᓕᕆᔨᒃᑯᑦ ᑲᓇᑕᒥ
- ᑖᓂᐅᓪ ᕚᓐᑖᓪ, ᐅᑭᐅᖅᑕᖅᑐᒥᐅᑕᓕᕆᔨᒃᑯᑦ ᑲᓇᑕᒥ
- ᑳᓱᕆᓐ ᒪᒃᑭᓐᓇ, ᐃᖅᑲᓇᐃᔭᕐᕕᓕᕆᔨᑦ ᐊᒻᒪᓗ ᓄᓇᓕᐅᔪᓕᕆᔨᒃᑯᑦ ᑲᓇᑕᒥ
- ᑯᕇᒡ ᕘᕐᒐᔅ, ᑲᓇᑕᒥ ᑮᓇᐅᔭᓕᕆᔨᕐᔪᐊᒃᑯᑦ ᑲᑎᒪᔨᖏᑦ (ᑐᓵᔭᖅᑐᖅᓯᒪᔪᖅ)
- ᔫᓕ ᑕᐳᕉᓯᓐ, ᑲᓇᑕᒥ ᐱᐅᓯᑐᖃᓕᕆᔨᒃᑯᑦ (ᑐᓵᔭᖅᑐᖅᓯᒪᔪᖅ)